Basha ba Botsa Jaana . . .

A Ruri Nka Nna Tsala ya Modimo?

GO NNA tsala ya Modimo? Ruri ga go kgonege, Doris wa dingwaga tse 20 o akanya jalo. Lekgarebe leno le ne la bua jaana ka khutsafalo: “Ke ipona ke se motho wa sepe e bile ke sa tshwanelwe ke go ratiwa ke motho ope. Tota e bile ke tila go rapela Jehofa Modimo ka gonne ga ke akanye gore ke tshwanelwa ke gore a ntebe.” Basha bangwe mo tengteng ga dipelo tsa bone ba akanya gore ga ba tshwanelwe ke go tsalana le Modimo. Le mororo ba ka rata go nna ditsala tsa Modimo, ba akanya gore ga ba kake ba kgona go nna tsone. A o kile wa ikutlwa jalo le wena?

Ka dinako tse dingwe, mosha a ka ikutlwa gore tota ga a tshwanelwa ke go atamela Modimo e le ka ntlha ya makoa a a nang le one. Ka sekai, akanya ka Michael yo mmotlana. O bolela gore pele ga a tlhaloganya ditsela tsa Modimo, o ne a ntse a “na le mo e ka nnang megopolo yotlhe ya boleo le e e bosula e bile a dira ditiro tse di ntseng fela jalo.” Lefa go ntse jalo, se a neng a se ithuta mo thutong ya gagwe ya Baebele se ne sa mo lemotsha tsela e a neng a hutsafatsa le go swabisa Modimo ka yone. O ne a tlhalosa jaana: “Pokano nngwe le nngwe ya phuthego e ne e dira gore ke lemoge diphoso tsa me sentle. . . . Ke ne ke sa bone kafa Jehofa a neng a ka intshwarela maleo a me a mantsintsi ka teng fa nna ka bonna ke ne ke inyatsa thata jalo.”

Ka dinako tse dingwe, mosha a ka ikutlwa a sa tshwanelwe ke go tsalana le Jehofa ka ntlha ya tsela e ba bangwe ba mo tshwarang ka yone. Ka sekai, Doris yo o nopotsweng pelenyana, o ne a latlhiwa ke mmaagwe e santse e le ngwana. O ne a tlhalosa jaana: “Ga ke akanye gore go na le motho yo o nthatang. Fa ke latlhilwe le ke mmè le ba lelapa la me tota, ke mang yo o ka tlholang a itshwenya ka nna?” Fa mosha a ile a tshwarwa makgwakgwa le go sotlwa go tswa bongwaneng, a ka nna le tumelo e e nonofileng ya gore Modimo ga o kake wa bo wa tsalana le ene.

Kafa letlhakoreng le lengwe, mosha a ka nna a bo a kile a tsalana le Modimo, lefa go ntse jalo, ka ntlha ya makoa, a bo a dira boleo jo bo masisi. Seno se ne sa diragalela Tracy. Lekgarebe leno la dingwaga tse 21 le bolela jaana ka khutsafalo: “Ke tlhabiwa ke ditlhong tota, ke utlwa botlhoko le go ipona molato ka tsela e ke sa kgoneng go e itshokela. Ke hutsafaditse Rraetsho Jehofa tota.”

Gongwe le wena o mo boemong jo bo tshwanang le bongwe jwa a a tlhalositsweng fa godimo. Lefa go ntse jalo, go na le tsholofelo: O ka kgona go nna tsala ya Modimo!

Lebaka la go Bo o Ka Kgona go Nna Tsala ya Modimo

Ke boammaaruri gore ditiro tsa boleo di ka dira gore motho a se ka a nna tsala ya Modimo. Ka lesego, Rraarona yo o lorato o ne a tsaya kgato go re thusa. Moaposetoloi Paulo o kwala jaana: “Modimo one, o re tlhomamiseditse lorato lwa one, ka e rile re sa ntse re le baleofi, Keresete a re swela.” (Baroma 5:8) Ka loso lwa gagwe, Jesu o ne a rekolola batho ba ba nang le kanaanelo ka loso lwa gagwe go re ba se ka ba laolwa ke boleo. (Mathaio 20:28) Ke gone ka moo moaposetoloi a oketsang jaana: “Re ne re le baba ba Modimo, lefa go ntse jalo o ne a re dira ditsala tsa gagwe ka loso lwa Morwaawe.”—Baroma 5:10, Today’s English Version.

Basha bangwe ba ka nna ba bo ba ne ba dira ditiro tse di maswe pele ga ba simolola go tlhaloganya melao ya ga Jehofa, fela jaaka Michael yo o umakilweng pelenyana. Lefa go ntse jalo, ka setlhabelo sa thekololo sa ga Jesu, motho a ka itshwarelwa maleo a gagwe a nako e e fetileng go sa kgathalasege gore a ne a le masisi go le kana kang. Baebele e re tlhomamisetsa jaana ka tsela e e amang pelo: “Fa re ipolela dibe tsa rona, one o boikanngo le tshiamo ya go re itshwarela dibe tsa rona, le go re tlhapisa mo tshiamololong yotlhe.” (1 Johane 1:9) Mme lefa go ntse jalo, motho o tshwanetse go tsaya dikgato tse di supetsang Modimo gore o anaanela go bo a tlhapisitswe. Moaposetoloi Paulo o bolela molaomotheo o re ka o dirisang mo ntlheng eno jaana: “‘Lo se ka lwa ama sepe se se itshekologileng; mme ke tlaa lo amogela. Ke tlaa nna Rraalona,’” go bua Jehofa. (2 Bakorinthe 6:17, 18) A bo go ama pelo jang ne go itse gore fa motho a tlogela tsela e e ntseng jalo e e phoso e bile a ikwatlhaya tota, Modimo o tla itumelela go mo itshwarela le go mo dira tsala ya Gagwe.

Go tweng ka basha ba ba ileng ba gola ba sotliwa mo lapeng? Ela tlhoko gore Modimo ga a pege batho molato gonne ba ne ba direlwa dilo tse di sa siamang ba sa rate. Batho ba ba ntseng jalo ba ne ba direlwa boleo e ne e se bone ba dirang boleo. Gape gakologelwa gore tsela e o leng botlhokwa ka yone ga e a ikaega ka tsela e motho yo mongwe a go lebang ka yone. Jehofa a ka nna Tsala ya gago go sa kgathalasege maemo a o leng mo go one. Maureen o ne a godisiwa ke mmè wa Mokeresete mo lelapeng le le neng le tletse thubakanyo ka ntlha ya ga rraagwe yo o neng a lemaletse bojalwa. Lefa go ntse jalo, o ne a re: “Le mororo ke ne ke tshelela mo maemong ao a a thata, ke ne ka kgona go nna le tsalano le Jehofa. Ke ne ka simolola go tlhaloganya gore ke Ene yo o se kitlang a ntatlha.”

Go Tweng Fa o Ka Dira Boleo jo bo Masisi?

Doug, yo o neng a godisitswe ke batsadi ba ba ratang Modimo o ne a inaakanya le boitsholo jo bo maswe jwa tlhakanelodikobo a santse a le dingwaga tse 18. Seno e ne le ka ntlha ya go itsalanya le ba ba bosula. Doug o ne a ipolela jaana: “Ke ne ke itse gore go phoso, lefa go ntse jalo, ke ne ka nna ka go dira ka gonne ke ne ke batla go ja monate.” Moragonyana ga foo, Doug o ne a lemoga gore tsela ya gagwe ga e ne e mo thusa ka sepe. O ne a dumela jaana: “Ke ne ka simolola go lemoga gore batho botlhe ba ba neng ba itirile ditsalanyana tsa me, ba ne ba dira jalo fela ka gonne ba ne ba batla madi mo go nna le go ijesa monate.” Morago ga moo o ne a simolola go tsaya dikgato tsa go bowa a tsalana gape le Jehofa. Mme go ne go na le sekgoreletsi se segolo fa pele ga gagwe.

Doug o tlhalosa jaana: “Selo se segolo e ne e le gore ke ne ke ikutlwa ke sa tshwanelege. Ke ne ke ikutlwa gore sengwe le sengwe se ke neng ke se dirile se ne se le maswe fa pele ga Jehofa. Ka ntlha ya go itse tsela e a leng molemo ka yone le kafa a ileng a intshokela ka teng, go ne go bonala go sena kafa a ka tlholang a intshwarela ka gonne ke ne ke dirile dilo tse di maswe thata.” Lefa go ntse jalo, Doug o ne a kgona go tswa mo bothateng jono ka go thusiwa ke mogolwane mo phuthegong le go sekaseka pego ya Baebele ya ga Manase ka kelotlhoko.

Manase e ne e le mang? E ne e le kgosi ya Juta wa bogologolo. Baebele e bontsha gore o ne a rutilwe go rata Jehofa ke rraagwe yo o neng a rata Modimo e bong Hesekia. Lefa go ntse jalo, morago ga loso lwa ga rraagwe o ne a simolola go akanya gore a ka dira jaaka a rata fa a sena a nna kgosi a na le dingwaga tse 12. O ne a tlogela go direla Jehofa mme a simolola go obamela Baale. Kobamelo e e ntseng jalo e ne e akaretsa meletlo e mo go yone go neng go dirwa boitsholo jo bo maswe jwa tlhakanelodikobo ka tsela e e feteletseng. Manase o ne “a dira bosula bo le botona mo ponong ya ga Jehofa, go mo tlhotlheleletsa bogaleng.” Ka baemedi ba ba ikanyegang, “Jehofa a bua le Manase le batho ba gagwe, mme ga ba a ka ba tlhokomela.” Morago ga moo Jehofa o ne a leretse Manase katlholo ya gagwe ka go dira gore a isiwe botshwarwa kwa Babilone a golegilwe maoto le matsogo ka ditshipi.—2 Ditirafalo 31:20, 21; 33:1-6, 10, 11.

E ne ya re fa Manase a akanya ka ditiro tse a neng a di dirile a bo a di bapisa le kafa a itseng melao ya ga Jehofa ka teng, o ne a ipona molato thata a bo a kopa maitshwarelo. O ne a ikokobetsa fa pele ga Modimo mme “a o rapela.” Mme Modimo le one o ne “wa rapelesega, wa utlwa mokokotlelo wa gagwe, wa ba wa mo lere gape kwa Jerusalema mo bogosing jwa gagwe.” Ee, “Rra mautlwelobotlhoko” o ne a itumelela gore moleofi yono yo o neng a ikwatlhaya a bowe a tsalane le ene gape. Fa a sena go utlwelwa botlhoko jalo, ka se se neng se mo diragaletse, Manase o ne a simolola go “itse fa Jehofa e le ene Modimo [wa boammaaruri, NW].”—2 Ditirafalo 33:12, 13; 2 Bakorinthe 1:3.

Fa e le gore Jehofa o ne a amogela Manase gape, ruri le gompieno o tla letla mosha wa seganana gore a bowe a tsalane le Ene gape fa e le gore mosha yoo o supa fa a ikwatlhaya. Doug o ne a dirisa kgakololo ya badisa ba semoya ba mo phuthegong ya gaabo. Ba ne ba mo thusa go lemoga sentle gore Modimo “ga a ketla a omana ka metlha yotlhe; le fa e le go nna ka bogale ka bosenabokhutlo.”—Pesalema 103:9.

Nna o Ntse o le Tsala ya Modimo

Fa Modimo a sena go nna Tsala ya gago, o tshwanetse go ngomaela tsalano e e ntseng jalo gore e nnele ruri. Mosetsana mongwe wa dingwaga tse 18 o ne a tshola ngwana a sa nyalwa. Lefa go ntse jalo, o ne a thusiwa gore a baakanye seemo sa gagwe le Jehofa. (Bona Isaia 1:18.) Ke eng se se neng sa dira gore a fetoge? O ne a tlhalosa jaana: “Ke ne ka lemoga gore Jehofa e ne e le Rre yo o lorato mme e seng mmolai. Ke ne ka lemoga gore o ne a utlwisitswe botlhoko ke se ke neng ke se dirile. Go botlhokwa thata gore motho a lebe Modimo e le Tsala, motho yo o nang le maikutlo, e seng Moya fela o o senang maikutlo o motho a ka o obamelang kwantle ga go o rata.” Fela jaaka Manase, o ne a tlhotlheletsega go obamela Jehofa ka botlalo. (2 Ditirafalo 33:14-16) Seno se ne sa mo sireletsa tota. O gakolola basha ba bangwe jaana: “Tswelelang pele lo kgaratlhela go galaletsa Jehofa lefa maemo a ka nna thata. Ka lorato Jehofa o tla bowa a baakanya ditsela tsa lona gape.”

Gape go botlhokwa gore o tsalane le batho ba e leng ditsala tsa Modimo. Mme o tile gotlhelele bao go lemotshegang sentle gore ga ba tlotle melaometheo ya bomodimo. (Diane 13:20) Linda yo mmotlana o ne a inaakanya le boitsholo jo bo maswe jwa tlhakanelodikobo le mosha yo botsala jwa gagwe le ene bo neng jwa nna “botlhokwa thata go gaisa selo sepe se sele.” Fa a sena go rarabologelwa semoyeng, Linda o ne a dumela jaana: “O ka senya botshelo jotlhe jwa gago ka go sa nne le tsalano eo e e atamalaneng le Jehofa.”

A o na le tsalano e e ntseng jalo? Fa go sa nna jalo, leka go nna le yone. Linda o sobokanya botlhokwa jwa go tsalana thata le Modimo ka go re: “Selo se se botlhokwa go di gaisa tsotlhe mo lefatsheng ke go nna le botsala jo bo molemo le Jehofa. Ga go na mosimane ope kana mosetsana ope mo lefatsheng yo o botlhokwa go gaisa seo. Fa motho a sena botsala le Jehofa, ga go ne go nna le sepe se se botlhokwa go feta seo.”

[Setshwantsho mo go tsebe 31]

Basha bangwe ba ka ikutlwa ba sa tshwanelwe ke go tsalana le Modimo