పరిచర్యలో నైపుణ్యాలు మెరుగుపర్చుకుందాం—రోజువారీ పనుల్లో కలిసేవాళ్లకు ఎలా సాక్ష్యమివ్వవచ్చు?

ఎందుకు ప్రాముఖ్యం? మనం ఇంటింటి పరిచర్య చేస్తున్నప్పుడు, చాలామంది ఇళ్లల్లో లేకపోవడం చూస్తుంటాం. ప్రయాణిస్తున్నప్పుడో, హాస్పిటల్‌లో వేచివున్నప్పుడో, స్కూల్‌ లేదా పని స్థలంలో విరామం తీసుకుంటున్నప్పుడో వాళ్లను మనం కలిసే అవకాశం ఉంది. ప్రతి ఒక్కరికీ రాజ్య సందేశం అందాలని యెహోవా కోరుకుంటున్నాడు. (1 తిమో. 2:3, 4) సువార్త చెప్పాలంటే, సాధారణంగా మనమే చొరవ తీసుకొని మాట్లాడాలి.

ఎలా చేయాలి?

జాగ్రత్తగా నిర్ణయించుకోండి. మనం చెప్పేది వినడానికి, మనతో మాట్లాడడానికి ఎదుటివ్యక్తి ఇష్టపడతాడా? ప్రశాంతంగా మాట్లాడడానికి పరిస్థితులు అనుకూలంగా ఉన్నాయా? కొందరు ప్రచారకులు ముందు వాళ్ల కళ్లలోకి చూసి, చిరునవ్వు నవ్వుతారు. వాళ్లు కూడా నవ్వితే, మాట్లాడడం మొదలుపెడతారు.
మాట్లాడడానికి ధైర్యం సరిపోకపోతే, మనసులో చిన్న ప్రార్థన చేసుకోండి.—నెహె. 2:4; అపొ. 4:29, 30.
చిన్న పలకరింపుతో, బహుశా హాయ్‌ చెప్పి మొదలుపెట్టండి. సమరయ స్త్రీతో మాట్లాడినప్పుడు యేసు నేరుగా రాజ్యం గురించి చెప్పలేదు. (యోహా. 4:7) కొన్నిసార్లు మీరు, “మీ పిల్లలు చాలా పద్ధతిగా ఉన్నారు!” అని అంటూ లేదా “నిన్న రాత్రి వార్తల్లో, మీరు అది చూశారా?” అని చిన్న ప్రశ్నతో మొదలుపెట్టవచ్చు.
మాట్లాడడం మొదలుపెట్టాక, సువార్త చెప్పే అవకాశం కోసం చూడండి, అయితే తొందరపడకండి. మామూలుగానే మాట్లాడుతూ ఉండండి. వాళ్లలో కుతూహలం పెంచే విషయం చెప్పండి, అప్పుడు వాళ్లు దాని గురించి అడుగుతారు. ఒకవేళ మీరు కుటుంబం గురించి మాట్లాడుతుంటే, “పిల్లల్ని పెంచడానికి చక్కగా ఉపయోగపడే సలహాలు ఎక్కడున్నాయో నేను తెలుసుకున్నాను” అని అనవచ్చు. మీరు ఒకానొక వార్త గురించి మాట్లాడుతుంటే, “ఎప్పటిలా కాకుండా ఈ మధ్యే ఓ మంచి వార్త చదివి ఆనందించాను.” సువార్త చెప్పకముందే మాట్లాడడం ఆపాల్సివస్తే నిరుత్సాహపడకండి.
ఔచిత్యం చూపించండి, గమనిస్తూ ఉండండి. మీ అభిప్రాయాలు వాళ్లమీద రుద్దుతున్నారని అనిపించేలా చేయకండి. బైబిల్లోని విషయాల గురించి మాట్లాడే ముందు, బైబిలంటే వాళ్లకు ఆసక్తి ఉందో లేదో తెలుసుకోవడానికి చిన్న ప్రశ్న వేసి చూడండి.
ఆసక్తి చూపించినవాళ్లకు ఇవ్వగలిగేలా కరపత్రాలను, ప్రచురణలను మీతోపాటు తీసుకెళ్లండి.

ఈ నెలలో దీన్ని ప్రయత్నించండి:

సువార్త పంచుకోవాలనే ఉద్దేశంతో, రోజువారీ పనుల్లో కలిసేవాళ్లలో వారానికి కనీసం ఒకరితోనైనా మాట్లాడడానికి ప్రయత్నించండి.