ప్రశ్నాభాగం

◼ తోటి ప్రచారకునితో కలిసి ఒక ప్రచారకురాలు ఇంటి గుమ్మం దగ్గర బైబిలు అధ్యయనం నిర్వహిస్తుంటే ఆమె ముసుగు వేసుకోవాలా?

ఒక ప్రచారకురాలు క్రమంగా జరుగుతున్న బైబిలు అధ్యయనాన్ని నిర్వహిస్తున్నప్పుడు, పక్కనే ప్రచారకుడు ఉంటే ఆమె ముసుగు వేసుకోవాలి. (1 కొరిం. 11:3-10) కావలికోట జూలై 15, 2002 సంచిక 27వ పేజీలో ఇలా ఉంది: “అది ముందుగానే నిర్ణయించుకోబడిన బోధనా కార్యక్రమం, దానికి అధ్యయనం నిర్వహించే వ్యక్తే అధ్యక్షత వహిస్తారు. ఈ పరిస్థితుల్లో, ఆ అధ్యయనం సంఘానికి సంబంధించినదవుతుంది. అలాంటి అధ్యయనాన్ని బాప్తిస్మం పొందిన ఒక స్త్రీ బాప్తిస్మం పొందిన ఒక పురుషుని సమక్షంలో నిర్వహిస్తున్నట్లైతే, ఆమె తన తలమీద ముసుగు వేసుకోవడం సముచితమే.” అధ్యయనం ఇంట్లో చేసినా, ఇంటి గుమ్మం దగ్గర చేసినా, వేరే ఏ స్థలంలో చేసినా అలాగే చేయాలి.

ఒకవేళ, ఇంకా క్రమమైన బైబిలు అధ్యయనంగా మారని అధ్యయనాన్ని ఒక సహోదరి ఇంటి గుమ్మం దగ్గరే నిర్వహిస్తుంటే, పక్కన ప్రచారకుడు ఉన్నా ఆమె ముసుగు వేసుకోనవసరం లేదు. ఆ పునర్దర్శనం ఉద్దేశం, బైబిలు అధ్యయనం ఎలా జరుగుతుందో చూపించడం లేదా అధ్యయనం నిర్వహించడానికి ఉపయోగించే ప్రచురణలోని సమాచారాన్ని పరిశీలించడం అయినా సరే ఆమె ముసుగు వేసుకోనవసరం లేదు. సాధారణంగా ఇంటి గుమ్మం దగ్గర జరిగే అధ్యయనాలు క్రమమైన బైబిలు అధ్యయనాలుగా మారాలంటే ఇంటివాళ్ల ఆసక్తిని పెంచేలా ఎన్నోసార్లు పునర్దర్శనం చేయాల్సివుంటుంది, కాబట్టి ముసుగు వేసుకోవడం ఎప్పుడు మొదలుపెట్టాలనేది ప్రచారకులు పరిస్థితులను గమనించి, ఆచితూచి నిర్ణయించుకోవాలి.