పరిచర్యలో నైపుణ్యాలు మెరుగుపర్చుకుందాం—కొత్తవాళ్లకు శిక్షణనివ్వడం

ఎందుకు ప్రాముఖ్యం? కొత్తగా శిష్యులైన వాళ్లు యేసు ఆజ్ఞాపించిన “వాటినన్నిటిని” చేయాలి. అందులో ఇతరులకు సత్యాన్ని బోధించే పని కూడా ఉంది. (మత్త. 28:19, 20) చాలామంది కొత్తవాళ్లు ఇప్పటికే దైవపరిపాలనా పరిచర్య పాఠశాలలో పాల్గొనడానికి అర్హులై ఉంటారు. అలాగే తమ కుటుంబ సభ్యులకు స్నేహితులకు సాక్ష్యం ఇచ్చి ఉంటారు. అయితే, నేర్చుకుంటున్న వాటి మీద నమ్మకం పెరిగేకొద్దీ, ప్రజలందరూ సువార్త వినాలని యెహోవా కోరుకుంటున్నాడని తెలుసుకునేకొద్దీ, వాళ్లు కూడా పరిచర్యలో పాల్గొనడానికి ఇష్టపడుతుండవచ్చు. (రోమా. 10:13, 14) బాప్తిస్మం తీసుకొనని ప్రచారకులైన కొత్తవాళ్లు ధైర్యంగా ప్రకటిస్తూ, ఆధ్యాత్మిక ప్రగతి సాధించాలంటే వాళ్లకు మంచి శిక్షణ అవసరం.—లూకా 6:40.

ఎలా చేయాలి?

ప్రకటించడానికి, బోధించడానికి కావాల్సిన ప్రచురణలు తీసుకోవడానికి కొత్త ప్రచారకునికి సహాయం చేయండి. మీ పరిచర్య బ్యాగును ఎలా సర్దుకుంటారో అతనికి చూపించండి, అలాగే మీరు ప్రతీ ప్రచురణ ఎందుకు తీసుకెళ్తున్నారో వివరించండి.
మన రాజ్య పరిచర్యలోని నమూనా అందింపును ఎంపిక చేసుకుని, ఇద్దరూ కలిసి ప్రాక్టీసు చేయండి. సొంత మాటల్లో చెప్పమని కొత్త ప్రచారకున్ని ప్రోత్సహించండి. మీ ప్రాంతంలో పరిస్థితులకు సరిపోయే సన్నివేశాలను పరిచర్య పాఠశాల పుస్తకం 82వ పేజీ నుండి ఎంచుకుని ప్రాక్టీసు చేయండి. మర్యాదగా ఉండే బట్టలు వేసుకోవడం, తల దువ్వుకోవడం, పరిచర్య చేస్తున్నప్పుడు చుట్టూ గమనించడం, వివేచనతో ఉండడం ఎందుకు ప్రాముఖ్యమో చెప్పండి.—2 కొరిం. 6:3, 8.
ప్రగతి సాధించేలా శిక్షణనివ్వండి. కొత్త ప్రచారకునికి టెరిటరీ కార్డును చూపించండి, అలాగే హౌస్‌-టు-హౌస్‌ రికార్డును ఎలా ఉపయోగించాలో నేర్పించండి. ఆసక్తి చూపించే వాళ్ల వివరాలను ఎలా రాసుకోవాలో చూపించండి. jw.org వెబ్‌సైట్‌ని, అన్ని దేశాల ప్రజలకు సువార్త అనే చిన్న పుస్తకాన్ని పరిచర్యలో ఎలా ఉపయోగించాలో నేర్పించండి. ఆసక్తి చూపించిన వాళ్లను మళ్లీ కలవడానికి సహాయం చేయండి.—1 కొరిం. 3:6.
ఓపిక చూపించండి, మెచ్చుకోండి. (సామె. 25:11) ఆదర్శంగా ఉండండి. మీరు చూపించే ఉత్సాహం, అతనిపై చూపించే శ్రద్ధ రాబోయే రోజుల్లో ఇంకా ఎక్కువ సేవ చేయడానికి కొత్తవాళ్లకు సహాయం చేస్తుంది.

ఈ నెలలో దీన్ని ప్రయత్నించండి:

మీ బైబిలు విద్యార్థితో కలిసి ఇంటింటి పరిచర్య చేయండి. వాళ్లను మీతోపాటు పునర్దర్శనానికి లేదా బైబిలు అధ్యయనానికి తీసుకెళ్లండి. మీకు బైబిలు విద్యార్థి లేకపోతే అంతగా అనుభవంలేని ప్రచారకున్ని తీసుకెళ్లండి.