Ajuda ba sira neʼebé defisiente matan

Iha mundu tomak, ema naʼin-millaun 43 mak defisiente matan no ema naʼin-millaun 295 mak iha problema ho matan.a Triste mak dala barak ema trata sira iha dalan neʼebé la diʼak no la justisa.

Maromak sente oinsá kona-ba sira neʼebé defisiente matan? Bíblia koʼalia saida kona-ba sira? No oinsá mak Testemuña ba Jeová ajuda sira ohin loron?

Maromak sente oinsá kona-ba sira neʼebé defisiente matan?

Bíblia hatudu katak Jeováb hadomi ema neʼebé defisiente matan. Nia hakarak ema hatudu justisa ba sira no hetan mós benefísiu husi edukasaun neʼebé nia fó. Nia mós fó ba sira esperansa furak ba futuru.

Eskritura: “Malisan ba ema neʼebé halo ema matan-delek laʼo sala dalan.”—Deuteronómio 27:18.

Eskritura: “Maromak la todan ba sorin.”—Apóstolu 10:34.

Eskritura: Jesus “halo ema matan-delek sira haree fali”.—Lucas 7:21.

Eskritura: “Ema matan-delek sei haree fali.”—Isaias 35:5.

Signifikadu: Jeová promete katak lakleur tan, bainhira nia ukun ona, ema neʼebé defisiente matan sei haree fali.

Oinsá Testemuña ba Jeová ajuda sira?

Iha mundu tomak, ami Testemuña ba Jeová fahe Maromak nia mensajen kona-ba futuru ba ema defisiente matan sira. Oinsá mak ami halo ida-neʼe?

• Ami prodús Bíblia no mós publikasaun no vídeo sira kona-ba Bíblia ho formatu oioin ba ema neʼebé defisiente matan no ba ema neʼebé iha problema ho matan, inklui braile, letra boot, no áudio.

• Ami halaʼo beibeik reuniaun Kristaun neʼebé ema hotu bele asiste, inklui sira neʼebé defisiente matan.

• Ami oferese kursu Bíblia interativu ba ema hotu no ema bele estuda ho Testemuña ida.c

Buat hotu neʼebé ami oferese mak gratuitu. Tanbasá? Tanba Jesus nia mandamentu dehan: “Imi simu hodi la selu, tan neʼe fó mós hodi la hein atu ema selu imi.”—Mateus 10:8.

Testemuña ba Jeová hanoin ema sira neʼebé defisiente matan. Ema sira neʼebé hakarak atu adora Maromak hamutuk ho ami sei hetan belun sira neʼebé diʼak no prontu ajuda sira. Neʼe mak esperiénsia balu husi Testemuña ba Jeová neʼebé defisiente matan.

Talita Alnashi, iha rai-Suésia, moris mai ho problema matan. Aprende oinsá ninia inan-aman hanorin nia kona-ba Bíblia no oinsá nia no ninia família simu domin no apoia husi sira-nia belun sira.

Cynthia Pablo, iha rai-Filipinas, defisiente matan no tilun. Oinsá mak ninia maluk fiar-naʼin sira apoia nia durante tempu pandemia COVID-19 neʼebé susar? Lee informasaun “Kongregasaun ajuda irmán ida neʼebé defisiente tilun no matan durante tempu pandemia”.

Publikasaun saida deʼit mak ami prodús?

Publikasaun ho letra braile. Ami fó sai Bíblia edisaun braile, kompletu ka la kompletu, no iha língua barak. (Atu haree lista ba língua sira, haree kaixa “Bíblia Tradusaun Mundu Foun ho letra braile”.) Ami mós prodús publikasaun barak kona-ba Bíblia ho letra braile. Ba sira neʼebé hakarak aprende braile, ami fó sai livru ho títulu Learn to Read Braille. Ami halo ida-neʼe hodi ema neʼebé defisiente matan bele aprende lee braile ho ajuda husi ema neʼebé bele haree.

• Bele hetan publikasaun ho letra braile hodi koʼalia ho Testemuña ba Jeová ida ka husu sira atu vizita Ita.

• Iha jw.org, download file ba mákina atu halo nota iha braile.d

• Bele hetan publikasaun ho letra boot hodi koʼalia ho Testemuña ba Jeová ida ka husu sira atu vizita Ita.

• Iha jw.org, download publikasaun dijitál ho letra boot neʼebé haree hanesan ho edisaun print nian.

• Ita bele loke ka download áudio iha jw.org no iha aplikasaun JW Library.

• Iha jw.org, download file eletróniku ba programa komputadór sira neʼebé lee liafuan husi screen.e

Vídeo sira ho esplikasaun áudio.f Testemuña ba Jeová prodús vídeo kona-ba Bíblia ho esplikasaun áudio iha língua 100 liu. Vídeo sira-neʼe ajuda ema komprende no aplika Bíblia nia matadalan.

• Buka reuniaun-fatin besik Ita-nia área.

• Buka-hatene kona-ba ami-nia reuniaun boot kada tinan.

• Asiste ami-nia reuniaun importante liu hotu neʼebé ami halaʼo kada tinan, Memoriál ba Jesus nia mate.

José Luis Ayala hela iha Méxiku. Nia moris mai defisiente tilun no sai defisiente matan bainhira nia idade 29. Aprende kona-ba oinsá ami-nia reuniaun sira ajuda ninia moris no oinsá nia hetan ajuda atu sai mestre Bíblia neʼebé diʼak.