Courtesy Jamie Christiani/Bulletin of the Atomic Scientists
MATAN-MORIS BÁ NAFATIN!
Mundu nia rohan sai besik liután
Iha 27 Janeiru 2026, sientista sira muda Doomsday Clocka nia daun sai besik liután ba meianoite. Meianoite reprezenta tempu neʼebé mundu tomak sei lakon mohu tanba ema nia hahalok.
“Ohin, grupu neʼebé estuda kona-ba siénsia no seguransa husi Bulletin of the Atomic Scientists muda Doomsday Clock ba segundu 85 besik meianoite, neʼe mak tempu neʼebé besik liu hotu ba mundu nia rohan.”—Bulletin of the Atomic Scientists.
“Doomsday Clock fó sai mensajen klaru tebes mai ita. Mundu nia situasaun sai perigu ba beibeik, ema lakohi serbisu hamutuk atu rezolve problema, no situasaun sai aat liután ba beibeik. Ema presiza halo mudansa no mudansa neʼe bele akontese. Maibé ema iha mundu neʼe tenke husu sira-nia ukun-naʼin atu halo lalais mudansa ruma.”—Alexandra Bell, prezidente no CEO, Bulletin of the Atomic Scientists.
Ema no planeta mundu sei lakon mohu ka lae? Ita presiza taʼuk kona-ba ita-nia futuru ka lae? Saida mak Bíblia dehan?
Ita-nia futuru sei sai oinsá
Bíblia fó sai katak “mundu iha ba nafatin” no ema “sei moris ba nafatin iha rai”. (Eclesiastes 1:4; Salmo 37:29) Tan neʼe, ema sei la estraga mundu toʼo halakon kriatura moris hotu.
Maibé, Bíblia fó sai duni kona-ba mundu nia rohan. Porezemplu, Bíblia dehan katak “mundu neʼe . . . sei lakon tiha”.—1 João 2:17.
Kuandu Bíblia temi kona-ba mundu nia rohan, neʼe katak sá? Lee informasaun “Mundu neʼe sei lakon mohu ka lae? Saida mak ‘Apokalipse’?”
Saida mak Bíblia dehan kona-ba tempu neʼebé mundu nia rohan sei toʼo mai? Lee informasaun “Bainhira mak mundu nia rohan sei toʼo mai?”
Mantein hanoin pozitivu
Bíblia bele ajuda ita atu mantein hanoin pozitivu maski mundu neʼe nakonu ho problema. Oinsá?
Bíblia fó matadalan oioin neʼebé ita bele aplika kedas iha ita-nia moris. (2 Timóteo 3:16, 17) Porezemplu, lee informasaun “Oinsá atu kontrola Ita-nia neon atu la hanoin barak demais” no buka-hatene oinsá mak Ita bele mantein hanoin pozitivu maski hasoru susar oioin.
Bíblia fó sai esperansa kapás kona-ba futuru. (Roma 15:4) Bíblia mós esplika ho loloos kona-ba saida mak akontese agora daudaun no iha futuru, no neʼe ajuda ita atu kalma nafatin no prepara an maski mundu nia situasaun troka.
Atu hetan ajuda liután husi Bíblia, ami konvida Ita atu koko ami-nia kursu Bíblia gratuitu.
a “Doomsday Clock atu fó avizu ba públiku kona-ba oinsá mak ita ema besik ona atu halakon ita-nia mundu liuhusi teknolojia neʼebé perigu tebes. Neʼe mak relójiu simbóliku atu fó-hanoin ita kona-ba perigu sira neʼebé ita presiza rezolve atu labele lakon mohu.”—Bulletin of the Atomic Scientists.