Aprende husi “Maromak neʼebé fó kmaan”

1. Tanbasá ita presiza fó kmaan ba ema seluk?

ITA hotu “hasoru terus oioin”, tan neʼe dala ruma ita presiza hetan kmaan no apoia. (1 Ped 1:6) Ita sente agradese kuandu hetan kmaan husi ema seluk, tan neʼe ita mós presiza prontu atu fó kmaan ba ema seluk neʼebé hasoru susar. (Mt 7:12) Jeová, “Maromak neʼebé fó kmaan ba ema iha situasaun hotu”, hatudu mai ita oinsá atu “fó kmaan ba ema seluk iha sira-nia susar hotu”. Ita bele banati-tuir ninia ezemplu hodi fó kmaan ba ema seluk. (2 Kor 1:​3, 4) Ita halo nuneʼe laʼós tanba obrigasaun, maibé tanba hadomi ita-nia irmaun-irmán sira. Iha lisaun neʼe, ita sei aprende kona-ba (1) liafuan kmaan iha Bíblia katak sá, (2) oinsá atu fó kmaan ba ema seluk, no (3) saida mak ita bele halo atu hetan kmaan.

LIAFUAN “FÓ KMAAN” IHA BÍBLIA KATAK SÁ

2. Tuir Bíblia, liafuan “fó kmaan” katak sá?

² Iha Bíblia, liafuan Gregu neʼebé tradús nuʼudar “fó kmaan” bele fó ideia barak, depende ba ninia kontestu. Neʼe bele signifika “fó aten-brani”, “anima”, “fó konsellu” ka “husu ho laran”. (Rom 12:8) Liafuan “fó kmaan” iha lian Gregu tradús kedas nuʼudar bolu ema ida mai ita-nia sorin atu ajuda. Entaun ita bele imajina belun ida bá lalais atu ajuda ninia maluk neʼebé hasoru susar no fó buat naran deʼit atu apoia nia. Ema ida bele ajuda ninia belun iha dalan oioin, maibé ninia objetivu mak atu ninia belun neʼe sente kmaan duni.

3. Oinsá mak Barnabé fó kmaan ba ema seluk? (Haree mós dezeñu.)

³ Hanoin toʼok ezemplu ida husi Bíblia. Mane Kristaun ida naran José sempre fó kmaan no ajuda ba ema seluk, tan neʼe apóstolu sira komesa bolu nia Barnabé, katak “Ida neʼebé fó kmaan ba ema seluk”. (Após 4:36) Naran neʼe diʼak duni ba nia, tan neʼe Bíblia nunka temi tan nia ho naran José. Bíblia fó-hatene katak Barnabé sempre ajuda ninia irmaun-irmán sira bainhira sira presiza. Porezemplu, kuandu Saul foin sai ema Kristaun, nia bá Jeruzalein tanba hakarak hasoru dixípulu sira iha neʼebá. Maibé sira taʼuk ba Saul tanba uluk nia sempre fó-terus ba sira. Maski nuneʼe, Barnabé tau konfiansa ba Saul no fó koñese Saul ba apóstolu sira.—Após 9:​26-28.

OINSÁ ATU FÓ KMAAN BA EMA SELUK

4. Saida mak dalan ida neʼebé diʼak liu atu fó kmaan ba ema seluk? (Roma 1:​11, 12)

⁴ Vizita sira, se bele. Jeová uza ninia atan sira atu fó kmaan ba ema seluk. Porezemplu, bainhira profeta Elias laran-kraik tebes, Jeová uza anju ida atu fó kmaan ba nia. (1 Reis 19:​4-7) Apóstolu Paulo mós hakarak vizita irmaun-irmán sira atu sira bele fó kmaan ba malu. (Lee Roma 1:​11, 12.) Kuandu Ita vizita ema ida, gasta tempu ho ema neʼe atu Ita bele fó kmaan ba nia. (1 Kor 16:7) Se Ita labele vizita ema neʼebé presiza ajuda, Ita bele hametin ema neʼe liuhusi telefone, hakerek karta, ka haruka mensajen. Jeová bele uza ita atu fó kmaan ba ema seluk kuandu ita prontu atu ajuda.

5. Tanbasá dala ruma susar atu fó kmaan ba irmaun-irmán sira?

⁵ Moris iha loron ikus sei sai aat liután, tan neʼe karik susar atu vizita irmaun-irmán sira bainhira sira presiza hetan kmaan. Durante Paulo sai dadur iha Roma, Onesíforo husi Éfeso bá hasoru Paulo maski neʼe perigu tanba nia mós bele tama komarka ka ema bele oho nia. (2 Tim 1:​16-18) Testemuña sira iha Rúsia mós hatudu aten-brani hanesan neʼe bainhira irmaun-irmán seluk hetan terus tanba sira-nia fiar. Bainhira halaʼo julgamentu iha tribunál, sira mós bá asiste atu fó apoiu ba maluk sira maski karik polísia mós bele kaer sira. Oinsá ita bele halo tuir ezemplu neʼe? Karik Ita bele aprende kona-ba oinsá Maromak nia atan sira ohin loron no tempu uluk ajuda malu no saida mak sira halo atu nafatin haksolok bainhira ema fó-terus.

6. Oinsá ita bele banati-tuir Jeová kuandu fó kmaan ba ema seluk? (Haree mós foto.)

⁶ Rona ba sira. Bainhira profeta Elias taʼuk katak nia sei mate, nia fakar sai ninia sentimentu ba Jeová. Ho domin Maromak rona ba Elias nia laran-susar maski Nia hatene ona kona-ba susar neʼebé Elias hasoru. Jeová rona ho pasiénsia maski Elias repete beibeik ninia liafuan. (1 Reis 19:​9, 10, 14) Jeová mós husik profeta Habakuk fó sai ninia hanoin no sentimentu duvida maski Habakuk hatoʼo iha dalan neʼebé haree hanesan la respeitu Jeová. (Hab 1:​2, 3) Ohin loron, Jeová rona didiʼak ba ita-nia orasaun maski nia hatene ona saida mak ita presiza. Ita bele banati-tuir Jeová hodi rona ho didiʼak no respeitu bainhira irmaun-irmán sira koʼalia. Ita tenke “lalais atu rona” bainhira sira koʼalia, no keta sente an ka korta sira maski sira koʼalia arbiru ka repete deʼit liafuan.—Tgo 1:19; Ecle 7:9.

7. Oinsá mak ita bele komprende ema nia presiza kuandu sira hetan susar?

⁷ Komprende sira-nia presiza. Só Jeová deʼit mak hatene ema nia laran, tan neʼe atu komprende ema nia presiza, ita tenke tau atensaun kuandu sira koʼalia. Maski Ita hatene buat neʼebé Ita presiza iha situasaun ruma, neʼe la dehan katak Ita mós hatene buat neʼebé ema neʼe presiza iha situasaun neʼebé hanesan. Ita hotu diferente. Entaun rona ho didiʼak, lalika ansi, no husu pergunta ho matenek atu ajuda nia fó sai ninia sentimentu.—Prov 20:5.

8. Oinsá mak Jesus fó kmaan ba Marta no Maria? (Haree mós foto.)

⁸ Hanoin toʼok kona-ba oinsá Jesus fó kmaan ba Marta no Maria kuandu sira-nia alin Lázaro mate. Maria no Marta hasoru susar neʼebé hanesan, maibé Jesus fó kmaan ba sira iha dalan neʼebé la hanesan. Depois Marta koʼalia tiha, Jesus fahe lia-loos kona-ba moris-hiʼas no neʼe hametin Marta nia fiar ba esperansa neʼe. Maibé kuandu Jesus haree Maria tanis, Jesus la temi kona-ba moris-hiʼas no nia tanis hamutuk ho Maria no husu sira tau Lázaro nia mate-isin iha neʼebé. (João 11:​20-35) Lisaun mak saida? Bainhira ita fó kmaan ba sira neʼebé hasoru susar, ita tenke komprende buat neʼebé sira presiza duké fó kmaan ba ema hotu iha dalan neʼebé hanesan deʼit.

9. Oinsá atu uza Bíblia hodi fó kmaan ba ema seluk? (Roma 15:​4, 5)

⁹ Uza Bíblia. Bainhira Ita uza ‘Eskritura sira atu fó kmaan’ ba ema ida, Ita ajuda ema neʼe atu hametin ninia esperansa. (Lee Roma 15:​4, 5.) Neʼe bele ajuda nia atu hetan kmaan liután tanba fiar katak Jeová hadomi no tau matan ba nia. (Isa 40:31) Oinsá Ita bele hetan eskritura atu fó kmaan ba ema seluk? Ema balu toman hakerek eskritura sira atu bele haree fali kuandu presiza, porezemplu eskritura sira iha tópiku “Kmaan” husi livru Eskritura sira neʼebé Ajuda Ita-nia Moris. Husu Jeová ajuda Ita atu uza Bíblia iha dalan neʼebé diʼak atu bele fó kmaan. Ninia espíritu bele ajuda Ita hanoin-hetan fali eskritura sira bainhira Ita presiza.—João 14:26.

10. Tanbasá ita tenke koʼalia ho laran-diʼak kuandu fó kmaan ba ema seluk?

¹⁰ Koʼalia ho laran-diʼak. Dala ruma, ita presiza fó kmaan ba belun ida hodi ajuda nia troka ninia dalan atu hanoin kona-ba problema neʼebé nia hasoru. Se presiza halo nuneʼe, hanoin didiʼak antes koʼalia hodi nuneʼe ita-nia liafuan sira bele fó kmaan, laʼós hakanek. (Prov 12:18) Jeová hatudu ezemplu diʼak tebes kuandu nia koʼalia ho Elias neʼebé hanoin sala katak nia mesak deʼit mak adora Jeová no nia la susesu nuʼudar profeta ida. Ho laran-diʼak Jeová ajuda Elias hadiʼa ninia hanoin neʼebé sala duké duun nia. (1 Reis 19:​15-18) Ita mós bele halo nuneʼe hodi hatudu laran-diʼak no hanoin didiʼak. Bainhira Ita hatoʼo parte ka komentáriu iha reuniaun sira, sempre koʼalia ho laran-diʼak no pozitivu nuʼudar Ita koko atu fó kmaan no hametin irmaun-irmán sira.

11. Baibain ema neʼebé hasoru susar presiza saida? (1 João 3:18)

¹¹ Fó ajuda tuir presiza. Baibain la toʼo atu koʼalia deʼit liafuan neʼebé fó kmaan ba ema neʼebé hasoru susar. (Lee 1 João 3:18.) Barnabé hatudu ezemplu diʼak bainhira nia faʼan ninia rai balu no fó osan neʼe ba apóstolu sira atu ajuda irmaun-irmán sira neʼebé kiak. (Após 4:​36, 37) Ohin loron ema Kristaun barak banati-tuir hodi fó ajuda ba malu tuir presiza. Irmán Gabriela husi Polónia sente triste tebes no hanoin barak bainhira inundasaun estraga ninia uma. Nia hatete: “Haʼu-nia inan-aman hela ho haʼu, no ami hotu taʼuk tebes no hanoin barak. Haʼu la hatene oinsá bele hadiʼa fali ami-nia uma. Maibé irmaun-irmán sira husi kongregasaun neʼebé besik, mai no halo serbisu barak iha loron ida deʼit. Esperiénsia neʼe hametin haʼu-nia fiar katak Jeová dirije ninia povu atu fó kmaan ba ema neʼebé hasoru susar.”

12. Oinsá mak Ita-nia laran-metin bele ajuda maluk Kristaun sira?

¹² Laran-metin nafatin ba Jeová. Paulo fó-hatene kongregasaun iha Tesalónika katak nia hetan kmaan no kbiit bainhira nia rona kona-ba sira-nia laran-metin. Nia hatene katak ninia hakaʼas an atu ajuda sira la saugati deʼit. (1 Tes 3:​5-8) No Paulo hatene katak se nia nafatin laran-metin kuandu hasoru susar, neʼe sei book ninia maluk sira atu nafatin laran-metin. (Kol 2:​1, 2) Nuneʼe mós, bainhira irmaun-irmán sira haree ita laran-metin hodi tahan hasoru susar, neʼe sei ajuda sira atu halo buat neʼebé hanesan.

13. Ita tenke hatudu hahalok saida kuandu fó kmaan ba ema?

¹³ Hatudu pasiénsia. Karik irmaun-irmán sira neʼebé laran-kraik tebes la sente diʼak kedas kuandu Ita fó kmaan ba sira. Maibé Eskritura fó-hatene ita atu “kontinua fó kmaan ba malu”, neʼe signifika katak la para. (1 Tes 5:​11, nota) Hatudu pasiénsia nuʼudar Ita kontinua anima no fó kmaan ba sira neʼebé presiza. (1 Tes 5:14) Maibé, dala ruma ita ida-idak mós presiza hetan kmaan. Se nuneʼe, saida mak ita presiza halo?

BAINHIRA ITA PRESIZA HETAN KMAAN

14-15. Saida mak ita presiza halo kuandu ita sente laran-taridu ka laran-kraik?

¹⁴ Halo orasaun. Husu Jeová fó kmaan ba Ita kuandu Ita sente laran-taridu ka laran-kraik. (Sal 94:19) Halo orasaun espesífiku, no fakar sai Ita-nia sentimentu ba Jeová. (Sal 62:8) Klaru katak Jeová hatene ona buat neʼebé Ita sente antes Ita halo orasaun. Maibé kuandu Ita fó-hatene nia Ita-nia sentimentu, neʼe hatudu katak Ita tau fiar ba nia. No Jeová sempre ajuda sira neʼebé halo orasaun ho fiar. (Mc 11:24) Filipe 4:​6, 7 hatete: “Husu ajuda husi Maromak liuhusi orasaun no harohan no mós fó agradese, no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin.”

¹⁵ Husu ema seluk nia ajuda. Fó sai buat neʼebé Ita sente ba belun neʼebé maduru ka katuas neʼebé Ita tau fiar. Irmaun-irmán sira bele fó kmaan ba Ita, maibé se Ita la fó sai Ita-nia sentimentu, sira sei la hatene ida-neʼe. (Prov 14:10) Ita bele husu sira atu rona didiʼak ba Ita ka fahe eskritura ka informasaun neʼebé sira gosta atu bele fó kmaan ba Ita.

16. Karik irmaun-irmán sira sei halo saida kuandu koko fó kmaan ba Ita, maibé Ita presiza hanoin-hetan saida?

¹⁶ Hatudu pasiénsia no fó perdua. Irmaun-irmán sira karik halo buat neʼebé la loos kuandu sira koko fó kmaan ba Ita. Porezemplu, karik sira-nia liafuan ka hahalok halo Ita sente aat liu. Se neʼe akontese, hatudu pasiénsia. (1 Kor 13:​4, 7) Hanoin-hetan liafuan iha Tiago 3:2: “Se ema ida la halo sala ho ninia liafuan, nia mak ema perfeitu.” Fokus ba irmaun-irmán sira-nia motivu neʼebé diʼak. Hanoin-hetan katak “laran hakarak, maibé isin fraku”.—Mt 26:41.

17. Ita presiza hakaʼas an atu halo saida?

¹⁷ Ita hotu presiza hetan kmaan no anima, liuliu tanba ita hela iha loron ikus sira neʼebé aat ba beibeik no nuʼudar Maromak nia inimigu sira kontra liután. Tan neʼe, mai ita hotu hakaʼas an atu fó kmaan ba malu.