Laʼo ba oin toʼo hetan batizmu

1. (a) Batizmu lori benefísiu saida? (b) Iha lisaun neʼe, ita sei koʼalia kona-ba saida?

ITA dedika an ba Jeová no hetan ona batizmu iha bee laran ka lae? Se nuneʼe, Ita husu ona ba Maromak atu iha konxiénsia neʼebé diʼak. (1 Ped 3:21) Hodi halo nuneʼe, Ita hatudu ezemplu diʼak ba joven no ema foun sira iha kongregasaun laran. Neʼe mak desizaun neʼebé diʼak tebes! Maibé, oinsá se Ita seidauk hetan batizmu? Klaru katak Ita mós hadomi Jeová no hakarak halo nia kontente. No Ita hatene katak batizmu mak importante atu bele hetan perdua ba Ita-nia sala no sai Jeová nia belun. (Após 2:​38-40) Maibé se Ita nafatin dada an, saida mak bele ajuda Ita? Iha lisaun neʼe, ita sei koʼalia kona-ba (1) tanbasá ema balu dada an atu hetan batizmu, (2) tanbasá diʼak atu hanoin kona-ba mundu nia rohan neʼebé besik ona, no (3) benefísiu mak saida se Ita laʼo ba oin no la demora atu hetan batizmu.

TANBASÁ EMA BALU DADA AN

2. Tanbasá ema balu dada an atu hetan batizmu?

² Ema balu dada an atu hetan batizmu tanba taʼuk. Porezemplu, maski sira hakarak serbí Jeová, sira taʼuk katak sira sei nunka bele halo Jeová kontente. Se Ita sente hanesan neʼe, hanoin kona-ba eskritura sira neʼebé bele hametin Ita-nia fiar katak Jeová nunka husu Ita atu sai perfeitu no nia kontente kuandu Ita hakaʼas an atu serbí nia tuir Ita-nia kbiit. (Sal 103:​13, 14; Kol 3:23) Se Ita taʼuk ema seluk trata aat Ita, husu Jeová atu fó ba Ita sentimentu neʼebé hanesan ho hakerek-naʼin ba salmo neʼebé hatete: “Jeová iha haʼu-nia sorin; haʼu sei nunka taʼuk. Saida mak ema bele halo ba haʼu?”—Sal 118:6.

3. Saida tan mak bele halo ema balu dada an atu hetan batizmu? (Haree mós dezeñu.)

³ Ema balu dada an atu hetan batizmu tanba hanoin katak sira seidauk iha koñesimentu barak. Maibé Ita presiza hatene buat hotu antes hetan batizmu ka lae? Hanoin toʼok ezemplu husi Bíblia. Bainhira apóstolu Paulo no Silas iha komarka no akontese tiha rai-nakdoko, sira haklaken ba guarda komarka nian no ninia família. Karik mane neʼe no ninia família komprende katak Maromak mak halo milagre atu Paulo no Silas livre husi komarka. Sira mós aprende hanorin importante kona-ba Jeová no Jesus iha kalan neʼebá. Rezultadu mak neʼe book sira atu “hetan batizmu iha momentu neʼe kedas”. (Após 16:​25-33) Se Ita hatene Jeová, hadomi nia ho laran, iha ona koñesimentu báziku kona-ba Bíblia, arrepende Ita-nia sala, no deside metin atu moris tuir ninia matadalan, neʼe katak Ita prontu atu hetan batizmu.—Mc 12:30.

4. Ema balu hanoin barak kona-ba saida toʼo dada an atu hetan batizmu? (Haree mós foto.)

⁴ Ema balu hakarak halo Maromak kontente no hetan batizmu, maibé sira sente susar demais atu moris tuir sira-nia dedikasaun. Klaru katak importante atu hanoin kona-ba rezultadu husi ita-nia desizaun sira. (Lc 14:​27-30) Maibé, ema balu hanoin demais kona-ba sakrifísiu neʼebé sira presiza halo. Hanoin toʼok kona-ba Candace neʼebé hatene lia-loos husi kiʼik kedas maibé la aplika buat neʼebé nia aprende. Bainhira nia boot ona, nia komesa estuda fali Bíblia. Nia hatete: “Haʼu hatene buat neʼebé haʼu presiza halo ba Jeová, maibé haʼu dada an tanba kontente ho buat neʼebé haʼu halo iha mundu neʼe. Haʼu sente susar atu troka ida-neʼe.” Ema balu fali hanoin demais katak karik depois hetan tiha batizmu sira sei halo sala sériu no hasai husi kongregasaun. Se sentimentu hanesan neʼe mak halo Ita dada an, saida mak Ita bele halo?

5. Se ita dada an atu hetan batizmu, ita presiza hanoin kona-ba saida? (Mateus 13:​44-46)

⁵ Kuandu ita hakarak sosa buat ruma, ita la haree deʼit ba presu maibé hanoin mós kona-ba ninia benefísiu. Se neʼe lori benefísiu neʼebé boot liu fali presu neʼebé ita selu, ita sei la dada an atu sosa. Nuneʼe mós, bainhira ita hanoin kona-ba hetan batizmu, ita la fokus deʼit ba sakrifísiu neʼebé ita presiza halo, maibé ita mós hanoin kona-ba benefísiu neʼebé ita hetan tanba iha relasaun diʼak ho Jeová. Jesus uza ilustrasaun rua atu hanorin pontu neʼe. (Lee Mateus 13:​44-46.) Ilustrasaun ida-idak konta kona-ba mane neʼebé faʼan buat hotu neʼebé nia iha hodi bele sosa buat folin-boot neʼebé nia hetan. Ita mós hetan ona buat neʼebé folin-boot tebes, neʼe mak lia-loos kona-ba Maromak nia Ukun. Se Ita dada an atu moris tuir lia-loos, hanoin didiʼak kona-ba Jesus nia ilustrasaun neʼe. Husu Ita-nia an: ‘Haʼu fiar duni katak lia-loos neʼebé haʼu hetan mak folin-boot ka lae? Haʼu hafolin duni haʼu-nia relasaun ho Jeová, esperansa ba futuru, no família espirituál neʼebé nia fó mai haʼu ka lae?’ Ita-nia resposta bele ajuda Ita atu hatene saida mak Ita presiza halo atu bele hetan batizmu.

6. Oinsá mak ita bele iha laran neʼebé diʼak?

⁶ Iha ai-knanoik kona-ba toʼos-naʼin neʼebé kari fini, Jesus esplika katak ema nia kondisaun iha laran bele hanetik ema neʼe atu laʼo ba oin iha dalan espirituál. Maibé, Jesus mós fó sai katak ema balu sei rona lia-loos “ho laran neʼebé diʼak” no aplika buat neʼebé sira aprende. (Lc 8:​5-15) Se Ita laran-rua hela, keta rende an. Ho Jeová nia ajuda, Ita bele “hetan laran neʼebé foun” hodi sai prontu atu halo tuir ninia matadalan. Husu Jeová atu fó laran neʼebé mamar hodi nuneʼe Ita bele aplika lia-loos iha Ita-nia moris.—Eze 18:31; 36:26.

7-8. Saida deʼit mak hanetik joven balu atu hetan batizmu? (Haree mós foto.)

⁷ Joven balu hadomi Jeová maibé la laʼo ba oin toʼo hetan batizmu tanba influénsia husi ema seluk. Porezemplu, mestre balu iha eskola hatete ba estudante sira atu “iha hanoin luan” kona-ba morál maski Jeová la simu hahalok balu. Maibé konsellu hanesan neʼe bele lori problema ba ita-nia moris. (Sal 1:​1, 2; Prov 7:​1-5) Ita bele hasees an husi perigu neʼe hodi banati-tuir hakerek-naʼin ba Salmo neʼebé hatete ba Jeová: “Haʼu matenek liu fali haʼu-nia mestre sira hotu, tanba haʼu hanoin kleʼan kona-ba Ita-nia avizu sira.”—Sal 119:99.

⁸ Dala ruma inan-aman neʼebé Testemuña mak la ho neon hanetik sira-nia oan atu hetan batizmu. Inan-aman sira-neʼe fokus liu ba oan sira-nia edukasaun no serbisu, ka sira la ajuda oan sira atu halo planu espirituál. Oinsá se Ita sente katak Ita-nia inan-aman bele ajuda liután Ita atu laʼo ba oin iha lia-loos? Entaun, diʼak atu koʼalia ho sira kona-ba neʼe. Maski ita-nia idade mak boot ka kiʼik, ita hotu bele sai Jeová nia belun.—Prov 20:11.

9. Tanbasá ema balu demora atu hetan batizmu?

⁹ Maski ema balu kumpre ona kritéria atu hetan batizmu, maibé sira demora tanba hakarak hetan batizmu hamutuk ho ema seluk, porezemplu ho sira-nia belun ka família. Klaru katak la sala atu hetan batizmu iha loron neʼebé hanesan ho ema neʼebé Ita hadomi. Maibé neʼe razaun neʼebé diʼak atu hein ba tempu kleur hodi hetan batizmu ka lae? Hanoin-hetan, Ita-nia dedikasaun mak promesa neʼebé Ita halo entre Ita no Jeová. Ita-nia batizmu la depende ba ema seluk.—Rom 14:12.

HANOIN-HETAN MUNDU NIA ROHAN BESIK ONA

10. Tanbasá ema balu demora atu laʼo ba oin no hetan batizmu?

¹⁰ Iha mós ema neʼebé demora atu laʼo ba oin no hetan batizmu tanba sira hanoin katak sei iha tempu barak antes mundu nia rohan toʼo mai. Maibé hanoin hanesan neʼe mak diʼak ka lae? Jesus fó avizu ba dixípulu sira: “Imi mós prontu nafatin bá, tanba imi la hatene iha oras saida mak Oan-Mane husi Ema sei mai.”—Lc 12:40.

11. Nuʼudar ita koñese Jeová diʼak liután, neʼe book ita atu halo saida, no tanbasá? (Salmo 119:60)

¹¹ Domin ba Jeová mak tenkesér motiva ita atu dedika an ba nia. Nuʼudar ita koñese Jeová diʼak liután, ita sei hafolin liután ninia mandamentu no neʼe sei book ita atu halo tuir kedas buat neʼebé nia haruka. (Lee Salmo 119:60.) Dixípulu Tiago mós temi razaun seluk tanbasá presiza halo tuir kedas Jeová nia mandamentu sira. Neʼe tanba ita la hatene saida mak sei akontese iha loron aban. Tan neʼe, ita presiza uza loron ida-idak “atu halo buat neʼebé loos” tuir Jeová nia hakarak.—Tgo 4:​13-17.

12. Ita bele aprende saida husi Jesus nia ilustrasaun kona-ba toʼos-uvas?

¹² Hanoin toʼok Jesus nia ilustrasaun kona-ba toʼos-uvas. Nia hatete katak ema neʼebé serbisu ba oras ida deʼit mós hetan kolen neʼebé hanesan ho ema neʼebé serbisu loron tomak. Tanbasá sira neʼebé serbisu ba oras ida deʼit la komesa sedu kedas? Sira hatete: “Tanba la iha ema ida mak fó serbisu ba ami.” Sira laʼós baruk-teen. Ba tempu barak sira la serbisu tanba seidauk iha ema ida mak bolu sira. Bainhira ema bolu, sira komesa kedas halo serbisu. (Mt 20:​1-16) Ohin loron, Jesus konvida ita atu sai ninia dixípulu no halo serbisu haklaken. Ita labele dada tempu atu simu ninia konvite bainhira rona ida-neʼe.

13. Saida mak ita aprende husi istória kona-ba Lot nia feen?

¹³ Ema balu hanoin katak sira sei komesa serbí Jeová kuandu mundu nia rohan besik loos ona. Maibé neʼe sei susar liu. Jesus hatene kona-ba neʼe no fó avizu ba ninia dixípulu sira: “Hanoin-hetan Lot nia feen.” (Lc 17:​31-35) Lot nia feen hatene katak lakleur tan Jeová sei halakon Sodoma no Gomorra. Maibé, nia la prontu atu husik buat hotu neʼebé nia iha. (Gén 19:​23-26) Istória neʼe mós fó-hanoin ita katak Jeová deside tiha ona tempu atu halakon mundu aat neʼe. Bainhira tempu neʼe toʼo, tarde ona ba ita atu halo mudansa.—Lc 13:​24, 25.

14. Oinsá mak Bíblia nia profesia kona-ba mundu nia rohan afeta Ita?

¹⁴ Buat neʼebé akontese daudaun iha mundu fó prova katak Bíblia nia profesia sai loos duni. Maski fatin neʼebé Ita hela ladún hetan impaktu husi akontesimentu sira-neʼe, maibé hodi haree ka rona kona-ba akontesimentu sira-neʼe bele book Ita atu halo kedas mudansa neʼebé Ita presiza no hetan batizmu. Hanoin toʼok ezemplu husi Bíblia. Apóstolu Pedro anima ema Kristaun iha tempu uluk atu “matan-moris” ka “sai prontu” tanba “buat hotu nia rohan besik daudaun ona”. (1 Ped 4:​7, nota) Karik “buat hotu nia rohan” refere ba tempu neʼebé Jeruzalein no templu sei harahun tiha. Ema Kristaun neʼebé simu Pedro nia karta hela dook husi Jeruzalein, tan neʼe sira sei la hetan kedas impaktu kuandu Jeruzalein naksobu. (1 Ped 1:1) Maibé, bainhira sira haree oinsá profesia neʼe sai loos, neʼe book sira atu fiar liután ba Jeová nia promesa seluk. Nuneʼe mós, kuandu Ita haree profesia sira kona-ba mundu nia rohan sai loos, neʼe motiva Ita atu matan-moris no laʼo ba oin toʼo hetan batizmu.

15. Oinsá mak ita bele sai prontu ba Jeová nia loron? (2 Pedro 3:​10-13)

¹⁵ Iha karta segundu, Pedro esplika oinsá ita bele sai prontu ba “Jeová nia loron”. Ema Kristaun iha apóstolu sira-nia tempu hanoin katak sira presiza hein ba tempu neʼebé kleur, maibé Pedro husu sira atu “hanoin-hetan nafatin” ka “hakarak tebes Jeová nia loron atu mai”. (Lee 2 Pedro 3:​10-13, nota.) Ita bele halo nuneʼe se ita sai prontu no hakarak atu loron neʼe toʼo mai hodi “hatudu hahalok santu no laran-metin ba Maromak”. Hanoin toʼok Jeová sente oinsá kuandu Ita “hatudu hahalok santu”! Ita bele fiar metin katak Jeová kontente duni kuandu haree Ita dedika an ba nia no hetan batizmu.

KETA DADA AN ATU HETAN BATIZMU

16. Bainhira mak tempu diʼak liu atu laʼo ba oin no hetan batizmu? (2 Korinto 6:​1, 2) (Haree mós dezeñu.)

¹⁶ Agora mak tempu neʼebé diʼak liu atu laʼo ba oin no hetan batizmu. (Lee 2 Korinto 6:​1, 2.) Ema-boot ida husi Etiópia neʼebé Filipe hasoru rekoñese katak nia presiza halo kedas buat ruma. Kuandu nia komprende ona liafuan diʼak no iha oportunidade atu hetan batizmu, nia la hanoin: ‘Haʼu hakarak aprende tan lai liafuan diʼak, no kuandu hetan bee-lihun boot tuirmai mak haʼu sei batizmu.’ Duké hanoin hanesan neʼe, nia husu Filipe: “Saida mak hanetik haʼu atu hetan batizmu?” (Após 8:​26, 27, 35-39) Neʼe mak ezemplu neʼebé diʼak! Depois ema-boot neʼe hetan tiha batizmu, nia “kontinua ninia viajen ho haksolok”.

17. Ita bele fiar kona-ba saida?

¹⁷ Se Ita dada an atu hetan batizmu, fiar bá katak Jeová prontu atu ajuda Ita atu iha relasaun diʼak ho nia. (Rom 2:4) Nia bele ajuda Ita atu manán hasoru sentimentu taʼuk, laran-rua, ka influénsia husi ema seluk neʼebé bele hanetik Ita laʼo ba oin. Kuandu Ita hetan batizmu, Ita sei sente kontente tanba iha konxiénsia neʼebé diʼak, no karik Ita sei la hanoin barak tan kona-ba “buat sira neʼebé iha kotuk”. (Flp 3:​8, 13) Ita bele fokus ba “buat sira neʼebé iha oin”, neʼe mak Jeová nia promesa ba sira neʼebé dedika an ba nia no hetan batizmu.—Após 3:19.