Batizmu signifika saida?

1. Oinsá ita hatene katak batizmu mak hanorin importante ida husi Bíblia?

ITA kontente tebes bainhira ema foun hetan batizmu! Jesus nia dixípulu sira mós kontente bainhira ema barak hetan batizmu iha loron Pentekostes tinan 33. Iha tempu neʼebá, apóstolu Pedro mak hatoʼo diskursu hodi esplika katak importante tebes atu hetan batizmu. (Após 2:​38, 40, 41) Liutiha tinan balu, apóstolu Paulo hakerek katak “hanorin báziku kona-ba Kristu” inklui “hanorin kona-ba batizmu oioin”. (Ebr 6:​1, 2) Sin, tópiku kona-ba batizmu mak hanorin importante ida, no ita presiza komprende ho didiʼak. Tanbasá?

2. Tanbasá ita presiza komprende didiʼak kona-ba batizmu?

² Fundasaun neʼebé metin bele ajuda uma atu hamriik metin. Hanesan neʼe mós, se ita komprende didiʼak kona-ba batizmu, neʼe bele ajuda ita atu iha fiar neʼebé metin. Maski ita seidauk hetan batizmu, ka hetan batizmu kleur ona, ita hotu presiza komprende didiʼak kona-ba batizmu. Iha lisaun neʼe, ita sei buka resposta ba pergunta: Batizmu signifika saida? Batizmu envolve saida deʼit? No tanbasá ita hetan batizmu hodi Aman, Oan, no espíritu santu nia naran?

BATIZMU SIGNIFIKA SAIDA

3. Liuhusi batizmu, Ita hatudu saida ba ema seluk?

³ Liuhusi batizmu, Ita hatudu ba ema seluk katak Ita (1) simu ona lia-loos kona-ba Maromak Jeová no Jesus Kristu, (2) arrepende ona Ita-nia sala, (3) halo ona mudansa ba Ita-nia moris atu serbí Jeová, (4) rekoñese Jesus mak dalan atu hetan salvasaun, no (5) promete ona ba Maromak liuhusi orasaun katak Ita sei halo tuir Ninia hakarak hodi sai parte ba Ninia organizasaun. Bainhira Ita halo promesa neʼe hodi dedika an ba Jeová, Ita hahú halaʼo moris foun neʼebé lori Ita ba moris rohan-laek.

4. Bainhira ita tama ba bee laran no sai husi bee, neʼe signifika saida? (Haree mós foto.)

⁴ Bainhira hetan batizmu, Ita-nia isin-lolon tomak hatama ba bee laran no tuirmai sai husi bee.a Neʼe hanesan Ita mate no hakoi tiha, no tuirmai moris filafali. (Kompara ho Koloso 2:12.) Batizmu hatudu duni mudansa boot iha Ita-nia moris. Oinsá? Bainhira Ita tama ba bee laran, neʼe signifika katak Ita husik ona Ita-nia moris uluk nian. Bainhira sai husi bee, neʼe signifika Ita komesa halaʼo moris foun hodi tau uluk Maromak nia hakarak liu fali Ita rasik nia hakarak.

5. Ita bele kompara buat neʼebé Ita halo atu sai prontu ba batizmu ho saida, no tanbasá? (1 Pedro 3:​18-21)

⁵ Lee 1 Pedro 3:​18-21. Ita bele kompara buat neʼebé Ita halo atu sai prontu ba batizmu ho Noé nia serbisu atu halo arka. Kuandu Ita foin komesa aprende kona-ba Jeová, karik Ita sente katak Ita presiza halo buat barak tebes antes hetan batizmu, hanesan ho Noé nia serbisu atu halo arka boot. Ita presiza halo duni buat sira-neʼe hotu ka lae? Sin. Hanoin toʼok kona-ba Noé. Maromak fó sai buat hotu neʼebé Noé presiza halo, no Noé tenke halo tuir ho didiʼak atu bele hetan salvasaun. Noé konsege halo arka tanba nia tau fiar no halo tuir Jeová, no Jeová mós ajuda nia. Hanesan Noé, Ita mós bele halo tuir ‘mandamentu hotu neʼebé Maromak fó ba Ita’.—Gén 6:22.

6. Pedro nia liafuan batizmu “salva imi” katak sá?

⁶ Iha versíkulu 21, apóstolu Pedro hakerek katak batizmu “salva imi”. Neʼe la dehan katak ita presiza deʼit batizmu atu bele hetan salvasaun ka perdua. Só Jesus nia raan deʼit mak bele hamoos ita-nia sala. (1 João 1:7) Maski nuneʼe, batizmu mak parte importante husi Maromak nia mandamentu. No liuhusi batizmu, ita bele “husu ba Maromak hodi ita bele iha konxiénsia neʼebé diʼak”. Jeová sei kontente atu fó buat neʼebé ita husu. Hodi halo nuneʼe, batizmu bele “salva” ita ka loke dalan ba ita atu moris ba nafatin.

BATIZMU ENVOLVE SAIDA DEʼIT

7. Batizmu presiza halaʼo oinsá?

⁷ Bíblia fó sai katak ema neʼebé hetan batizmu presiza tama ba bee laran, maibé ladún fó sai buat seluk kona-ba batizmu. Maski nuneʼe, Bíblia bele ajuda ita hatene oinsá atu halaʼo batizmu. Porezemplu, Bíblia nia prinsípiu bele ajuda kandidatu ba batizmu atu halo desizaun kona-ba hatais, no mós ajuda ema neʼebé asiste atu hatudu respeitu ba tempu importante neʼe. (1 Kor 14:40; 1 Tim 2:9) Ohin loron, baibain irmaun katuas ida mak halaʼo batizmu, maibé ita la dada atensaun ba irmaun neʼe. (1 Kor 1:​14, 15) Maski ema barak ka uitoan mak asiste iha batizmu, neʼe la importante.—Após 8:36.

8. Ema neʼebé atu hetan batizmu sei hatán ba pergunta saida, no tanbasá? (Apóstolu 2:​38-42) (Haree mós foto.)

⁸ Bíblia hatete katak ita presiza “fó sai [ita-nia fiar] iha ema barak nia oin hodi hetan salvasaun”. (Rom 10:​9, 10) Ita halo ida-neʼe iha loron neʼebé ita hetan batizmu! Irmaun neʼebé hatoʼo diskursu batizmu nian sei husu pergunta rua ba sira neʼebé hakarak hetan batizmu. Pergunta primeiru: “Ita arrepende ona Ita-nia sala sira, dedika an ona ba Jeová, no simu ona ninia dalan atu salva Ita liuhusi Jesus Kristu ka lae?” Pergunta neʼe fokus ba buat neʼebé ema presiza halo antes hetan batizmu, neʼe hanesan ho Pedro nia liafuan ba ema-lubun iha loron Pentekostes. Pergunta segundu: “Ita komprende katak Ita-nia batizmu hatudu katak Ita mak Testemuña ba Jeová ida no sai parte ba Jeová nia organizasaun ka lae?” Pergunta neʼe fó-hanoin ema neʼebé atu hetan batizmu katak nia sei moris tuir ninia dedikasaun hodi halo tuir matadalan husi Jeová nia organizasaun no serbí Jeová hamutuk ho irmaun-irmán sira, hanesan ho ema Kristaun iha tempu uluk. (Lee Apóstolu 2:​38-42.) Ema neʼebé ho laran hatán “Sin” ba pergunta rua neʼe mak kumpre kritéria atu hetan batizmu.

9. Ita hotu presiza halo hakat saida deʼit atu Jeová bele simu ita?

⁹ Antes aprende lia-loos, karik Ita halaʼo Ita-nia moris ho didiʼak no nunka halo sala sériu ruma. Ka Ita mak boot iha lia-loos no inan-aman ajuda Ita atu hadomi Jeová. Ita nafatin presiza arrepende an no hetan batizmu atu Jeová bele simu Ita ka lae? Sin, tanba ita hotu moris mai nuʼudar sala-naʼin no dook husi Maromak. (Sal 51:5) Maibé bainhira ita aprende kona-ba Jeová, ita deside atu tau uluk Ninia hakarak duké ita rasik nia hakarak. Ita sente triste tebes kona-ba ita-nia hahalok sala uluk nian, no fila fali ba Jeová hodi moris tuir dalan neʼebé halo Nia kontente. Tuirmai ita bele hetan batizmu.—Após 3:19.

10. Se Ita hetan ona batizmu iha relijiaun seluk, Ita presiza halo saida?

¹⁰ Se Ita hetan ona batizmu iha relijiaun seluk, Ita nafatin presiza hetan batizmu nuʼudar Testemuña ba Jeová. Tanbasá? Tanba uluk Ita la komprende ho didiʼak lia-loos kona-ba Maromak Jeová no Jesus. No maski Ita dedika an ona ba Maromak liuhusi orasaun, Ita-nia promesa neʼe la bazeia ba koñesimentu neʼebé loos kona-ba Ninia hakarak. Bainhira apóstolu Paulo hasoru mane balu iha Éfeso neʼebé hetan ona batizmu maibé seidauk hatene hanorin Kristaun, nia ajuda sira komprende katak sira presiza hetan fali batizmu.b (Após 19:​1-5) Nuneʼe mós ohin loron, batizmu sei vale só deʼit ema neʼebé hetan batizmu komprende ho loloos Maromak nia hakarak.

“HODI AMAN, OAN NO ESPÍRITU SANTU NIA NARAN”

11. Hetan batizmu “hodi Aman, Oan, no espíritu santu nia naran” katak sá? (Mateus 28:​18-20)

¹¹ Jesus haruka dixípulu foun sira atu hetan batizmu “hodi Aman, Oan, no espíritu santu nia naran”. (Lee Mateus 28:​18-20.) Neʼe katak sá? Kuandu Bíblia temi liafuan “naran”, dala barak neʼe refere ba reputasaun, pozisaun, ka kbiit husi ida neʼebé lori naran neʼe. Entaun, bainhira ita halo buat ruma hodi ema ka buat ruma nia “naran”, ita rekoñese kbiit husi naran neʼe. Mai ita haree oinsá mak Ita bele rekoñese Aman no Oan nia pozisaun no kbiit, no mós espíritu santu nia knaar.

12. Hetan batizmu hodi Aman nia naran katak sá? (Apokalipse 4:11) (Haree mós foto.)

¹² Hodi Aman nia naran. Neʼe katak ita rekoñese Jeová nuʼudar ita-nia Aman iha lalehan neʼebé fó moris mai ita. Nia mak Maromak neʼebé kbiit boot liu, no Kriadór ba buat hotu. (Lee Apokalipse 4:11.) Ita fiar katak nia rona orasaun, no ita uza ninia naran bainhira halo orasaun no koʼalia ba ema seluk kona-ba nia. (Sal 65:2) Maibé, hetan batizmu hodi Aman nia naran envolve buat seluk tan. Ema neʼebé rona Pedro nia diskursu iha loron Pentekostes hatene ona kona-ba Jeová, maibé sira presiza rekoñese katak Jeová mak fó moris rohan-laek ba sira liuhusi Jesus Kristu.—Rom 5:8.

13. Hetan batizmu hodi Oan nia naran katak sá? (Haree mós foto.)

¹³ Hodi Oan nia naran. Neʼe katak ita rekoñese Jesus nuʼudar Maromak nia Oan-Mane mesak. Ita fiar Jesus mak “dalan”, neʼe katak só liuhusi Jesus mak ita bele iha relasaun diʼak ho Jeová. (João 14:6) Jesus mak sosa fali ita, no ninia mate loke dalan ba ita atu hetan moris. Lia-loos neʼe book ita atu halo tuir ninia ezemplu loroloron, laʼós deʼit iha tempu neʼebé ita hetan batizmu. (1 João 2:6) Tan neʼe, hanesan Jesus, ita la husik buat ida hanetik ita atu haklaken ho badinas. (Lc 4:43) Ita mós prontu atu hasoru susar husi ema neʼebé kontra ita tanba ita halo tuir Jesus no serbí Jeová ho laran-metin. (2 Tim 3:12) Ita mós respeitu Jesus nuʼudar “ulun ba kongregasaun” hodi halo tuir matadalan husi ema neʼebé Jesus hili atu dirije ninia dixípulu sira.—Éf 4:​8, 11, 12; 5:23.

14. (a) Hetan batizmu hodi espíritu santu nia naran katak sá? (Haree mós foto.) (b) Ema neʼebé iha esperansa atu bá lalehan hetan batizmu saida tan? (Haree kaixa “Batizmu ba ema neʼebé iha esperansa atu bá lalehan”.)

¹⁴ Hodi espíritu santu nia naran. Neʼe katak ita simu lia-loos kona-ba espíritu santu. Espíritu santu laʼós hanesan anju ka parte ida husi Trindade, maibé neʼe mak forsa neʼebé Maromak uza atu halaʼo Ninia hakarak. Ita fiar katak espíritu santu mak dirije profeta no sira neʼebé hakerek Bíblia, tan neʼe ita lee beibeik Bíblia no halo tuir. (2 Ped 1:​20, 21) No ita hasees an husi sala neʼebé sériu, tanba neʼe sei hanetik espíritu santu dirije ita no kongregasaun.—Éf 4:30.

15. Ita-nia hakarak kontinua halo saida?

¹⁵ Se Ita hetan ona batizmu, kontinua aprende kona-ba buat saida deʼit mak envolve iha “hanorin kona-ba batizmu oioin”c no moris tuir promesa neʼebé Ita halo ona bainhira dedika an ba Jeová no hetan batizmu. Maibé oinsá se Ita seidauk hetan batizmu? Iha buat ruma neʼebé halo Ita dada an ka lae? Iha lisaun tuirmai, Ita sei aprende oinsá Ita bele laʼo ba oin toʼo hetan batizmu.