Prepara an ba dezafiu neʼebé bele mosu depois hetan tiha batizmu

1-2. Ita presiza halo saida atu prepara an ba dezafiu sira neʼebé bele mosu depois hetan tiha batizmu? Fó toʼok ilustrasaun.

ITA hatene katak ita sei hasoru susar oioin iha Satanás nia mundu. Jesus hatete ba ninia dixípulu sira: “Fatuk sidi nian tenke mosu mai.” (Mt 18:7) Tan neʼe, ita presiza prepara an atu hasoru dezafiu sira, no karik neʼe inklui problema ho ita-nia maluk fiar-naʼin sira.

² Hanoin toʼok ilustrasaun neʼe. Jeová nia atan sira hetan anima atu prepara an antes akontese dezastre naturais. Saida mak ita sei halo? Primeiru, ita buka-hatene dezastre neʼebé bele akontese iha ita-nia área, liuliu se ita mak foin muda ba área neʼebé foun. Tuirmai ita presiza halo planu kona-ba saida mak ita bele halo bainhira dezastre mosu. (Prov 21:5) Hanesan neʼe mós, ita bele buka-hatene nanis dezafiu sira neʼebé bele mosu depois hetan tiha batizmu, no prepara nanis atu bele prontu kuandu neʼe akontese. Hodi halo nuneʼe, ita bele tahan hasoru dezafiu sira no kontinua besik ho Jeová. (Sal 17:5) Iha lisaun neʼe, ita sei koʼalia kona-ba dezafiu tolu neʼebé karik ita sei hasoru no oinsá mak ita bele prepara an.a

IRMAUN KA IRMAUN IDA TRATA AAT ITA

3. Dezafiu saida mak bele akontese iha kongregasaun?

³ Ita sente oinsá bainhira tuir reuniaun ba dala primeiru no haree Jeová nia povu hatudu domin ba malu? Karik neʼe halo Ita fiar katak Ita hetan ona lia-loos. (João 13:35; Kol 3:12) Neʼe mak buat neʼebé Blancab sente. Maibé depois hetan tiha batizmu, buat neʼebé nia la espera akontese. Nia hatete: “Irmán ida trata haʼu la diʼak. Nia mós koʼalia negativu kona-ba ema seluk iha kongregasaun. Haʼu hakfodak tanba bainhira estuda Bíblia, haʼu aprende katak Testemuña ba Jeová hakaʼas an atu hatudu laran-diʼak no domin.” Klaru katak irmaun-irmán sira hakaʼas an atu haburas hahalok Kristaun, maibé sira mós la perfeitu. (Éf 4:​23, 24; 1 João 1:8) Tan neʼe, irmaun ka irmán ida bele deʼit koʼalia ka halo buat ruma neʼebé hakanek Ita-nia laran. (Tgo 3:8) Triste mak neʼe halo ema balu sai laran-kraik toʼo para atu serbí Jeová.

4. Saida mak ita bele halo agora atu prepara nanis kuandu irmaun ka irmán ida hakanek ita-nia laran? (Éfeso 4:32)

⁴ Saida mak Ita bele halo agora atu prepara nanis kuandu irmaun ka irmán ida hakanek Ita-nia laran? Haburas toman atu halo tuir matadalan iha Éfeso 4:32. (Lee.) Se Ita hakaʼas an hatudu laran-diʼak no hanoin ema seluk, neʼe sei ajuda Ita atu hasees an husi problema barak. No Ita mós bele deside agora atu fó perdua ho laran kuandu ema ruma halo sala. Saida mak bele ajuda Ita atu halo nuneʼe? Hanoin toʼok dala hira mak Ita husu Jeová atu perdua Ita, no dala hira mak nia perdua Ita. (Mt 6:12) Bainhira Ita hanoin kona-ba Jeová nia laran-luak, neʼe sei halo fasil ba Ita atu perdua ema seluk.

5. Bíblia nia prinsípiu saida mak bele ajuda ita bainhira ema seluk hakanek ita-nia laran? (Provérbios 19:11) (Haree mós foto.)

⁵ Lee Provérbios 19:11. Bíblia hatete katak matenek ka kbiit atu komprende didiʼakc bele ajuda ita atu la sai hirus lalais. Eskritura neʼe ajuda irmán Rima neʼebé hetan batizmu tinan balu liubá. Nia hatete: “Bainhira irmaun-irmán ruma hatete ka halo buat neʼebé hakanek haʼu-nia laran, haʼu hanoin-hetan Provérbios 19:11. Haʼu hanoin kona-ba sira-nia situasaun moris iha pasadu no tanbasá sira koʼalia ka hatudu hahalok la diʼak. Haʼu mós konvida sira atu haklaken hamutuk hodi bele koñese didiʼak sira.” Neʼe komentáriu kapás. Ita bele koñese didiʼak Ita-nia irmaun-irmán sira agora. Nuʼudar Ita koñese sira diʼak liután, neʼe halo fasil liu ba Ita atu fó perdua kuandu sira hatudu hahalok neʼebé la diʼak.

6. Saida mak bele ajuda Ita sente kontente atu ransu iha kongregasaun?

⁶ Saida mak bele ajuda Ita sente kontente atu ransu iha kongregasaun? Nuʼudar Ita koñese diʼak liután Ita-nia irmaun-irmán sira, hakaʼas an atu tau fokus ba sira-nia hahalok diʼak. (Kompara ho Provérbios 10:12; Rom 12:10; Flp 2:​2, 3) Haree toʼok oinsá neʼe ajuda irmaun Mark neʼebé foin hetan batizmu. Nuʼudar nia komesa ransu ho irmaun-irmán sira iha kongregasaun, nia nota kona-ba sira-nia fraku. Saida mak ajuda nia atu la sidi? Nia hatete: “Haʼu rekoñese katak haʼu fokus demais ba irmaun-irmán sira-nia sala, maibé neʼe mak sala kiʼik deʼit se kompara ho sala sériu neʼebé ema seluk halo iha mundu neʼe. Entaun, haʼu deside atu fokus ba irmaun-irmán sira-nia hahalok diʼak duké hanoin demais kona-ba sira-nia fraku.” Se Ita mós halo nuneʼe, Ita sei kontente atu ransu iha kongregasaun.

HANOIN FALI BUAT NEʼEBÉ ITA HUSIK ONA

7. Saida mak bele book Ita atu hanoin fali kona-ba buat neʼebé Ita husik ona?

⁷ Bainhira Ita sai Testemuña ba Jeová, Ita sente kontente tanba la sai tan parte ba Satanás nia mundu. Karik Ita sente susar atu fiar katak iha ema neʼebé hakarak fila fali ba Satanás nia mundu. Maibé bainhira Ita hasoru susar iha Ita-nia moris, Ita sei hanoin fali buat balu neʼebé Ita husik ona atu bele serbí Jeová. (Kompara ho Números 11:​4-6.) Porezemplu, irmaun-irmán balu husik sira-nia serbisu neʼebé halo sira iha naran-boot maibé han tempu barak. Balu fali sira-nia belun diʼak lakohi ransu tan ho sira tanba estuda Bíblia. Balu tan husik ona sira-nia toman neʼebé aat. Triste tebes se ema Kristaun ida fila fali ba moris uluk nian no hadook an husi Jeová! Saida mak Ita bele halo agora atu la fila fali ba buat neʼebé Ita husik ona?

8. Saida mak Ita aprende husi Abraão no Sara nia ezemplu?

⁸ Bíblia konta kona-ba fiar-naʼin sira-nia ezemplu diʼak hodi la hanoin buat neʼebé sira husik ona. Porezemplu, Abraão no Sara halo tuir Jeová nia mandamentu hodi husik sidade Ur neʼebé riku no seguru, no hela fali iha tenda. (Ebr 11:​8, 9) Klaru katak dala ruma sira hanoin fali moris uluk nian iha Ur. Maibé, “se sira hanoin beibeik” kona-ba sira-nia moris diʼak iha pasadu, neʼe bele book sira atu fila fali ba Ur. Maibé sira fokus ba Jeová nia promesa kona-ba futuru.—Ebr 11:​15, 16.

9. Apóstolu Paulo sente oinsá kona-ba buat neʼebé nia husik hodi bele serbí Jeová? (Filipe 3:​7, 8, 13)

⁹ Apóstolu Paulo mós troka ninia moris hodi bele serbí Jeová. Antes sai ema Kristaun, nia estuda kona-ba ema Judeu nia ukun-fuan husi mestre Gamaliel neʼebé naran-boot. (Após 22:3) Paulo mós bele sai ulun-naʼin ida neʼebé importante iha relijiaun Judeu nian. (Gal 1:​13, 14) Maibé bainhira nia simu liafuan diʼak, nia husik buat hotu neʼe. Ninia moris nuʼudar ema Kristaun mak fasil deʼit ka lae? Lae. Ninia maluk Judeu sira odi nia, baku nia, no hatama nia iha komarka. (2 Kor 11:​23-26) Se Paulo fokus liu ba susar sira neʼebé nia hasoru no kompara ho ninia moris uluk nian, nia bele hanoin katak ninia moris iha tempu uluk mak diʼak liu. Maibé, nia fokus ba priviléjiu neʼebé nia simu nuʼudar Jesus Kristu nia dixípulu no hein namanas ba kolen neʼebé nia sei hetan iha futuru. Paulo fiar katak bensaun neʼebé nia hetan mak folin-boot liu fali buat neʼebé nia husik ona.—Lee Filipe 3:​7, 8, 13.

10. Ita presiza hanoin beibeik kona-ba saida? (Marcos 10:​29, 30) (Haree mós foto.)

¹⁰ Lisaun mak saida? Se Ita komesa hanoin fali kona-ba buat neʼebé Ita husik ona hodi bele sai ema Kristaun, diʼak atu hanoin mós tanbasá mak Ita husik ida-neʼe. (Ecle 7:10) Kompara buat neʼebé Ita husik ona ho bensaun sira neʼebé Ita hetan. Porezemplu, Ita sai belun neʼebé besik ho Maromak Jeová. (Prov 3:32) Ita iha família espirituál neʼebé hadomi malu. (Lee Marcos 10:​29, 30.) No Ita mós hein namanas ba futuru neʼebé furak! (Isa 65:​21-23) Se Ita hanoin beibeik kona-ba bensaun sira neʼebé Ita hetan hodi serbí Jeová, neʼe ajuda Ita atu la hanoin fali buat neʼebé Ita husik ona.

11. Saida mak Ita aprende husi Rosemary nia esperiénsia?

¹¹ Irmán ida naran Rosemary hetan batizmu ho idade 50 liu. Saida mak nia halo atu la hanoin buat neʼebé nia husik ona? Nia hatete: “Foufoun, haʼu sente triste iha tempu Natál, tanba neʼe mak tempu neʼebé ami-nia família halibur hamutuk. Haʼu gosta fó prezente ba sira, no haree labarik sira tuur besik ai Natál ho oin-midar bainhira loke prezente.” Saida mak ajuda Rosemary? Nia hatete: “Haʼu buka dalan atu ransu hamutuk ho haʼu-nia família iha tempu seluk. Tinan-tinan, iha loron neʼebé la hanesan haʼu konvida haʼu-nia família, fó prezente ba sira, no fó sai katak haʼu hadomi tebes sira.” Rosemary mós hasoru susar seluk tan. Nia hatete: “Bainhira haʼu aprende lia-loos, haʼu-nia belun sira hadook an husi haʼu. Dala ruma neʼe halo haʼu sente mesamesak no triste.”d Saida mak ajuda nia? Nia halo planu ho irmán oioin atu haklaken hamutuk. Nia hatete: “Neʼe ajuda haʼu atu hetan belun foun neʼebé haʼu hadomi no hafolin.” Ita bele aprende saida? Karik Ita triste kuandu hanoin fali kona-ba buat neʼebé uluk halo Ita kontente, maibé Ita bele troka ho buat neʼebé diʼak liu no halo Ita hetan kontente neʼebé loos. (Flp 4:​8, 9) No hanoin-hetan: Jeová sempre fó ba Ita buat neʼebé diʼak liu fali saida mak Ita husik ona.

EMA BALU HUSIK JEOVÁ

12. Dezafiu saida mak bele mosu iha kongregasaun laran neʼebé susar atu simu?

¹² Bainhira Ita sai Testemuña ida, Ita sente kontente tanba Ita laʼós tan parte ba mundu aat neʼe no hamutuk fali ho família espirituál neʼebé hakaʼas an atu kaer metin ba morál neʼebé aas. (Isa 65:14) Maibé, dala ruma Ita rona katak ema ida iha kongregasaun halo sala sériu ka hasai husi kongregasaun. (1 Kor 5:13) Haree toʼok oinsá situasaun hanesan neʼe afeta irmán ida naran Samar. Nia hatete: “Lakleur depois haʼu hetan batizmu, katuas kongregasaun ida halo sala sériu no hasai husi kongregasaun. Neʼe halo haʼu besik atu sidi. Haʼu la fiar katak katuas ida bele halo sala hasoru Jeová no kongregasaun.” Klaru, ita presiza tau fiar katak irmaun-irmán sira hadomi Jeová no hakarak hatudu laran-metin ba nia. (1 Kor 13:​4, 7) Maibé, triste mak tinan-tinan iha ema neʼebé kongregasaun hasai. No susar tebes se ema neʼe mak besik ho Ita ka Ita respeitu tebes.

13. Saida mak Ita bele halo agora atu la sidi kuandu ema neʼebé besik ho Ita mak husik Jeová?

¹³ Saida mak Ita bele halo agora atu la sidi kuandu ema neʼebé besik ho Ita mak husik Jeová? Kontinua hametin Ita-nia relasaun belun ho Jeová. (Tgo 4:8) Hanoin-hetan katak Ita-nia relasaun ho Jeová la depende ba ema seluk nia fiar. Porezemplu, maski ita halaʼo adorasaun hamutuk ho família no kongregasaun, Ita rasik mós presiza iha toman atu halo orasaun no lee Bíblia.—Sal 1:2; 62:8.

14. Saida mak ita aprende husi apóstolu Pedro nia ezemplu? (João 6:​66-68)

¹⁴ Ita mós bele aprende husi apóstolu Pedro nia reasaun kuandu dixípulu barak para atu laʼo tuir Jesus. Iha tempu neʼebá, Pedro rasik mós konfuzaun. Maibé, haree toʼok saida mak nia hatete iha João 6:​66-68. (Lee.) Duké fokus ba buat neʼebé ema seluk halo, Pedro fokus ba lia-loos neʼebé nia aprende husi Jesus. Rezultadu mak Pedro kontinua laʼo tuir Jesus. Nuneʼe mós ho ohin loron, ema seluk nia hahalok la troka lia-loos folin-boot neʼebé Ita hetan ho ajuda husi Maromak nia organizasaun. Kontinua hafolin ida-neʼe! Samar neʼebé temi ona, hatete: “Haʼu sempre fó-hanoin ba haʼu-nia an katak maski ema ida halo sala, neʼe la dehan katak ema hotu iha kongregasaun ka organizasaun mak sala. No Jeová mak Maromak neʼebé iha hahalok furak oioin maski ema hatudu hahalok la diʼak.”

15. Saida mak Ita aprende husi Emily nia esperiénsia?

¹⁵ Hanoin toʼok kona-ba irmán ida naran Emily nia ezemplu. Liutiha semana ida depois nia hetan batizmu, ninia amá hasai husi kongregasaun no sai husi uma. Emily hatete: “Haʼu nunka espera neʼe akontese. Neʼe mak dezafiu boot liu neʼebé haʼu hasoru, no haʼu hanoin tebes haʼu-nia amá.” Saida mak ajuda Emily? Nia hatete: “Haʼu la mesak. Haʼu hetan apoiu husi haʼu-nia apá no mós husi irmaun-irmán sira iha kongregasaun neʼebé hanesan haʼu-nia família rasik. Ema hotu neʼebé serbí Jeová hasoru problema. Tan neʼe, importante atu nafatin hakbesik ba malu no anima malu.” (1 Ped 5:9) Ita la presiza hein toʼo susar mosu mak foin hakbesik ba irmaun-irmán sira. Halo ida-neʼe agora kedas. Neʼe ajuda Ita atu la sente mesamesak maski buat naran deʼit akontese.

16. Ita presiza hanoin-hetan saida? (Haree mós foto.)

¹⁶ Ita mós presiza hanoin-hetan katak Jeová fó dixiplina ba ema neʼebé nia hadomi. (Ebr 12:6) Nia hakarak ema hotu neʼebé sai ona husi kongregasaun atu fila fali. (2 Ped 3:9) Tan neʼe, se ema ida neʼebé besik ho Ita mak hasai ona husi kongregasaun, Ita bele fiar katak katuas sira sei hakaʼas an atu ajuda nia fila fali ba Jeová.—2 Tim 2:​24, 25.

17. Ita bele fiar kona-ba saida?

¹⁷ Ita koʼalia ona dezafiu balu deʼit neʼebé karik Ita hasoru depois hetan tiha batizmu. Maibé Ita la presiza taʼuk maski hasoru dezafiu naran deʼit. Ita iha buat barak neʼebé Ita bele halo atu prepara an. No labele haluha katak ajuda boot neʼebé Ita bele hetan mak mai husi Maromak Jeová. Nia ajuda ona Ita toʼo agora, no nia hakarak ajuda Ita ba nafatin! (1 Ped 5:10) Nia sei kontinua fó Ita kbiit no forsa neʼebé Ita presiza atu bele tahan. Ho Jeová nia ajuda, la iha buat ida mak bele halo Ita dook husi nia!—Sal 119:165; Rom 8:​38, 39.