Oinsá atu ajuda ita-nia família neʼebé laʼós Testemuña

1-2. Kuandu ita komesa aprende lia-loos, oinsá neʼe bele afeta ita-nia relasaun ho ita-nia família?

JESUS hatete ba mane ida neʼebé hakarak sai ninia dixípulu: “Bá ó-nia uma no konta ba ó-nia família buat hotu neʼebé Jeová halo ona ba ó.” (Mc 5:19) Jesus koʼalia hanesan neʼe tanba nia hatene katak ema barak hakarak konta fali ba família neʼebé sira hadomi kona-ba buat diʼak neʼebé akontese.

² Ita hanoin-hetan ka lae buat neʼebé Ita sente kuandu foin komesa aprende lia-loos? Karik Ita hakarak tebes atu konta fali ba ema seluk! Maibé karik Ita-nia família la kontente tanba Ita aprende Bíblia. Ka dalan neʼebé Ita koʼalia ba sira mak ladún matenek, no neʼe halo sira la kontente. Se nuneʼe, saida mak Ita bele halo atu mantein ka hadiʼa fali relasaun diʼak ho Ita-nia família no iha tempu hanesan laran-metin nafatin ba Jeová?

3. Iha lisaun neʼe, ita sei aprende kona-ba saida?

³ Iha lisaun neʼe, ita sei aprende kona-ba: (1) Oinsá mak hodi hanoin família nia situasaun bele motiva ita atu hatudu domin no pasiénsia ba sira; (2) saida mak ita bele halo bainhira família nia liafuan ka hahalok hakanek ita-nia laran; (3) se ita hatudu pasiénsia no la lakon esperansa, oinsá neʼe bele ajuda ita-nia família rekoñese lia-loos; no (4) oinsá mak ita bele hatudu katak ita hadomi sira.

HANOIN FAMÍLIA NIA SITUASAUN

4. Jesus nia reasaun mak oinsá kona-ba ema neʼebé la hatudu interese ba ninia mensajen?

⁴ Jesus la rende an lalais ho ema neʼebé la hatudu interese ba ninia mensajen. Nia kompara ninia an hanesan toʼos-naʼin neʼebé hakaʼas an atu tau matan ba ai-figeira hun hodi bele fó fuan. (Lc 13:​6-9) Bainhira Jesus konta ai-knanoik neʼe, nia koko ona ba tinan tolu liu atu ajuda ema Judeu tau fiar ba nia no sai ninia dixípulu. Tanbasá nia kontinua koko ajuda sira? Jesus komprende sira-nia situasaun no hanoin sira, no neʼe ajuda nia atu hatudu pasiénsia ba sira.

5. Tanbasá Jesus hakarak ajuda ninia maluk Judeu sira?

⁵ Jesus hanoin ninia maluk Judeu sira tanba nia hatene katak ulun-naʼin relijiaun la ajuda sira atu aprende kona-ba Jeová. Jesus haree sira hanesan “bibi neʼebé bibi-atan la iha”. (Mc 6:34) Lakleur antes Jesus mate, nia tanis kona-ba Jeruzalein tanba hatene katak ema barak iha sidade neʼe sei lakon sira-nia moris tanba la hatudu fiar ba nia no ninia Aman. (Lc 19:​41-44) Bainhira ita haburas sentimentu hanesan neʼe ba ita-nia família, neʼe sei motiva ita atu ajuda sira.

6. Tanbasá ita presiza hatudu pasiénsia ba ita-nia família neʼebé laʼós Testemuña? (Galásia 6:9)

⁶ Lee Galásia 6:9. Maski ita-nia família seidauk hatudu interese ba lia-loos, ita presiza pasiénsia ba sira no labele rende an atu “halo buat neʼebé diʼak”. Ita hatene katak presiza tempu ba ema ida atu troka ninia hanoin no hametin ninia fiar ba Jeová. Karik uluk Ita rasik mós “la iha esperansa no la hatene Maromak”. (Éf 2:12) Maibé, ema ruma mak hatudu pasiénsia no ajuda Ita. Se Ita mós hatudu pasiénsia ba Ita-nia família, karik Ita bele ajuda sira aprende kona-ba Jeová.

KUANDU FAMÍLIA NIA LIAFUAN NO HAHALOK HAKANEK ITA-NIA LARAN

7. Tanbasá Jesus nia alin sira la fiar kedas ba nia?

⁷ Karik Jesus nia alin sira rona kona-ba milagre neʼebé Jesus halo iha Galileia. (Lc 4:​14, 22-24) Maibé sira la fiar kedas ba nia. (João 7:5) Tanbasá? Bíblia la esplika kona-ba neʼe. Maibé, ita bele hanoin kona-ba razaun tanbasá ema Judeu balu lakohi sai Jesus nia dixípulu. Ema balu taʼuk katak viziñu sira sei fó susar ba sira. (João 9:​18-22) Ema balu fali koñese Jesus husi kiʼik no sente susar atu fiar katak nia mak Maromak nia Oan. (Mc 6:​1-4) Karik Jesus nia alin sira mós sente hanesan neʼe. Situasaun hanesan neʼe mós akontese ho ita-nia família ka lae?

8. Saida mak bele halo ita-nia família koʼalia negativu kona-ba ita?

⁸ Hanoin kona-ba motivu husi sira-nia liafuan no hahalok. Karik Jesus nia alin sira mós hamutuk ho família neʼebé hatete katak nia “bulak ona”. (Mc 3:21) Tanbasá sira hatete hanesan neʼe? Bíblia konta katak Jesus okupadu tebes atu haklaken no kura ema moras toʼo la iha tempu atu han. (Mc 3:20) Karik neʼe halo Jesus nia família hanoin katak nia fanátiku demais. Ita-nia família mós bele hanoin katak ita sai fanátiku kona-ba ita-nia relijiaun. Se sira sente hanesan neʼe, ita presiza hatudu liuhusi ita-nia hahalok katak ita laʼós ema neʼebé fanátiku.

9. Saida mak bele ajuda ita-nia família atu troka sira-nia hanoin kona-ba ita? (1 Pedro 3:​1, 2) (Haree mós foto.)

⁹ Kontinua hatudu hahalok diʼak no balansu. Ita-nia liafuan no hahalok diʼak bele book ita-nia família atu troka sira-nia hanoin. (Lee 1 Pedro 3:​1, 2.) Laʼen neʼebé laʼós Testemuña karik la kontente kuandu ninia feen tuir reuniaun ka bá haklaken. Karik feen neʼe presiza halo mudansa ba ninia oráriu atu bele gasta tempu barak liu ho ninia laʼen. Porezemplu, nia bele haklaken iha tempu neʼebé ninia laʼen bá serbisu ka la iha uma. Hodi halo nuneʼe bele ajuda laʼen atu iha hanoin pozitivu kona-ba Testemuña ba Jeová.

10. Oinsá mak ita bele halo tuir Jesus nia ezemplu kuandu ema kritika ita?

¹⁰ Kuandu família kritika, dala ruma diʼak atu nonook deʼit. Bainhira ema neʼebé kontra Jesus duun katak nia mak kaan-teen no lanu-teen, nia la hirus fali sira no la defende ninia an. Maibé, nia hakarak povu atu haree ninia hahalok no rekoñese katak neʼe la loos. (Mt 11:19) Liuhusi dalan neʼebé Jesus halaʼo ninia moris, nia hatudu katak nia la ulun-toos no hakarak halaʼo moris neʼebé kontente. (Kompara João 2:​2, 6-10.) Nuneʼe mós ho Ita, keta hanoin katak Ita presiza hatán ba ema ida-idak nia liafuan kritika. Maibé, husik Ita-nia família haree Ita-nia hahalok no sira rasik bele rekoñese katak Ita mak ema neʼebé moris ho balansu no kontente. Karik neʼe sei book sira atu la fiar ba informasaun falsu kona-ba ita.

HATUDU PASIÉNSIA NO KETA LAKON ESPERANSA

11. Jesus hatudu hahalok saida ba ninia alin sira?

¹¹ Bíblia fó sai katak Jesus kontinua hatudu pasiénsia ba ninia alin sira. Porezemplu, bainhira Jesus halo milagre primeiru iha Kaná, ninia alin-mane sira mós iha. (João 2:​11, 12) Maibé sira la fiar kedas katak Jesus mak Mesias. Maski nuneʼe, Jesus la hakotu ninia relasaun ho sira. Bíblia hatete katak liutiha maizumenus tinan tolu, nia koʼalia ho laran-diʼak ba ninia alin sira.—João 7:​5-8.

12. Saida mak bele ajuda ita atu la lakon esperansa ba ita-nia família?

¹² Tanba ita komprende ho klaru kona-ba Jeová nia laran-sadiʼa, neʼe bele ajuda ita atu la lakon esperansa. Bainhira relijiaun falsu sei lakon, karik ita-nia família sei hanoin-hetan buat neʼebé ita koʼalia ona kona-ba neʼe.a (Apok 17:16) Kuandu terus boot hahú, karik sira balu sei komesa serbí Jeová hamutuk ho ita. Maibé antes tempu neʼe, se ita-nia família hasoru susar ruma, ita sei hakaʼas an atu ajuda sira. Kuandu ita hatudu domin no laran-diʼak, neʼe bele book sira atu hakarak aprende Bíblia.

HATUDU DOMIN BA SIRA

13. Maski ita okupadu ho serbisu ba Jeová, ita presiza kuidadu kona-ba saida?

¹³ Maski ita okupadu ho serbisu ba Jeová, ita lakohi halo ita-nia família hanoin katak ita la hadomi sira no la iha tempu ba sira. (Mt 7:12) Oinsá mak ita bele hatudu katak ita hanoin sira? Mai ita haree buat balu neʼebé ita bele halo.

14-15. Oinsá mak ita bele hatudu domin ba ita-nia família? Fó toʼok ezemplu.

¹⁴ Koʼalia beibeik ho sira no hatudu katak Ita hadomi sira. Ita hatudu domin ba ita-nia família hodi fó-hatene beibeik buat neʼebé ita halo. Porezemplu, ita bele haruka mensajen ka foto ruma neʼebé ita hasai kuandu halo viajen, feriadu, ka ransu ho belun sira. Ita mós bele fó prezente kiʼik ruma ka hakerek karta atu halo sira kontente. Kuandu ita halo buat sira-neʼe, sira bele komprende katak ita hadomi sira.

¹⁵ Hanoin toʼok ezemplu husi irmán ida naran Anna iha Arménia. Ninia família iha toman atu ransu hamutuk, liuliu kuandu halo festa tinan no selebrasaun sira. Bainhira Anna sai Testemuña ba Jeová, ninia família hanoin barak katak nia sei la ransu tan ho sira. Sira mós hanoin kona-ba Anna nia futuru. Saida mak Anna halo atu sira la hanoin barak? Nia hatete: “Kuandu haʼu vizita sira, haʼu konta kona-ba haʼu-nia moris no saida mak haʼu halo. Haʼu mós konvida sira mai haʼu-nia uma no fó koñese haʼu-nia belun sira. Rezultadu mak haʼu-nia família barak hatene ona ema neʼebé haʼu ransu. Sira hatete katak sira haree haʼu kontente no sira la hanoin barak tan.”

16. Oinsá mak Jesus hatudu katak nia hanoin ninia alin Tiago? (Haree mós nota-rodapé.)

¹⁶ Hatudu katak sira importante ba ita. Depois Jesus hetan tiha moris-hiʼas, nia mosu ba ninia alin Tiago tanba hanoin nia. (1 Kor 15:7) Ita bele fiar katak Tiago sente kontente tebes tanba haree katak Jesus nafatin hanoin nia. Karik neʼe mak tempu neʼebé Tiago rekoñese katak Jesus mak Mesias. Depois neʼe, karik Tiago mak ajuda Jesus nia alin sira seluk atu hatene katak Jesus mak Mesias.b—Após 1:14.

17. Oinsá mak ita bele aplika prinsípiu iha Roma 12:15? (Haree mós foto.)

¹⁷ Lee Roma 12:15. Se ita hatudu interese no ajuda ita-nia família iha tempu diʼak no tempu susar, neʼe bele book sira atu troka sira-nia hanoin kona-ba ita.c Porezemplu, kuandu ita-nia família ida nia oan moris, ita bele fó parabéns no prezente ruma atu hatudu katak ita mós kontente. Kuandu ita-nia família triste tanba ema neʼebé sira hadomi mate, ita bele konsola sira, oferese ajuda, haruka karta ka mensajen. Klaru katak ita hakarak kontaktu ka vizita sira beibeik, liuliu iha tempu neʼebé sira hasoru susar.

18. Oinsá mak ita bele halo tuir André nia ezemplu?

¹⁸ Fó koñese sira ba maluk Kristaun. Bainhira André rekoñese Jesus mak Mesias, nia ho laran-manas bolu ninia maun Pedro atu koñese Jesus. (João 1:​40-42) Ita mós bele halo buat neʼebé hanesan ka lae? Porezemplu, ita bele konvida ita-nia família atu tuir reuniaun ka han hamutuk ho ita-nia belun sira. Karik neʼe sei ajuda ita-nia família atu hatene katak Testemuña mak ema baibain neʼebé hatudu hahalok diʼak no halaʼo moris hanesan deʼit ho sira.

19. Maski ita-nia família la komprende ho didiʼak ita-nia fiar, ita presiza hatudu hahalok saida? (1 Pedro 3:15)

¹⁹ Lee 1 Pedro 3:15. Karik ita-nia família la komprende ho didiʼak tanbasá ita la halo buat balu, maibé sira sei hanoin-hetan nafatin kuandu ita hatudu laran-diʼak no respeitu sira. Maski ita la hola parte iha selebrasaun ka atividade neʼebé kontra Bíblia, ita bele halo sira kontente kuandu ita hakaʼas an atu ransu ho sira. Porezemplu, ita bele vizita sira, han hamutuk, ka fó prezente iha tempu seluk.

KETA RENDE AN BA ITA-NIA FAMÍLIA

20. Tanbasá Tiago nia ezemplu anima ita?

²⁰ Tiago la akompaña Jesus bainhira Jesus halaʼo ninia knaar iha mundu, maibé ikusmai nia sai dixípulu ida. Ita bele fiar katak Tiago hanoin-hetan buat barak neʼebé Jesus hanorin. (Gal 1:​18, 19; 2:9) Porezemplu, Tiago hakerek karta ba maluk Kristaun sira hodi fó sai konsellu neʼebé atu hanesan ho pontu balu husi Jesus nia diskursu iha foho.d

21. Tanbasá ita labele rende an ho ita-nia família neʼebé laʼós Testemuña?

²¹ Maski ita hakaʼas an atu hatudu domin ba ita-nia família, maibé karik sira nafatin la kontente ho ita ka lakohi aprende kona-ba Jeová. Tanbasá ita labele rende an? Tanba kuandu ita hatudu laran-diʼak ba ita-nia família, ita halo tuir Maromak Jeová no ninia Oan Jesus neʼebé sempre hatudu laran-sadiʼa no laran-diʼak ba ema. (Lc 6:​33, 36) Se ita kontinua hatudu domin ba sira, neʼe bele troka sira-nia hanoin. Karik sira sei hanoin-hetan buat neʼebé ita koʼalia ona ba sira kona-ba ita-nia fiar. Se ita la rende an, karik ita sei hetan ksolok hodi haree ita-nia família balu deside atu serbí Jeová hamutuk ho ita.