Jullu

Jeová nia povu balu labele halo buat barak neʼebé sira hakarak tanba idade, moras, ka situasaun susar ruma. Karik neʼe halo sira sente katak sira la iha folin ba Jeová. Karik sira husu: ‘Jeová nafatin uza haʼu ka lae?’ Hakerek-naʼin ba Salmo 71 mós iha sentimentu neʼebé hanesan. Nia halo orasaun: “Keta husik hela haʼu bainhira haʼu-nia forsa lakon ona.” (Sal 71:​9, 18) Maibé nia kontinua fiar katak se nia serbí Jeová ho laran-metin, Jeová sei dirije no apoia nia. Jeová kontente ho ema neʼebé hakaʼas an atu serbí nia maski iha limitasaun oioin. (Sal 37:​23-25) Se Ita mak idade ona, hanoin toʼok kona-ba oinsá Jeová haree Ita. Nia bele ajuda Ita serbí nia ho laran-metin maski Ita iha limitasaun oioin. (Sal 92:​12-15) Duké fokus ba buat neʼebé Ita labele halo ona, fokus deʼit ba buat neʼebé Ita bele halo. w24.10 p. 28 par. 14-16

Baibain susar ba ema Kristaun neʼebé la maduru atu halo desizaun neʼebé bazeia ba Bíblia nia prinsípiu no halo tuir ida-neʼe. Se Bíblia la fó sai ukun-fuan ida, neʼe halo sira balu hanoin katak sira bele halo buat naran deʼit neʼebé sira hakarak. Balu fali karik hakarak ema seluk atu halo ukun-fuan ba sira, maski loloos la presiza. Porezemplu, ema Kristaun iha Korinto husu ba apóstolu Paulo atu fó ukun-fuan ida ba sira kona-ba bele ka lae han ai-han neʼebé hasaʼe ona ba estátua. Duké hatete ba sira saida mak sira presiza halo, Paulo hatudu katak sira ida-idak iha “direitu atu hili” bazeia ba sira-nia konxiénsia. Nia temi Bíblia nia prinsípiu neʼebé bele ajuda sira atu halo desizaun neʼebé tuir sira-nia konxiénsia no mós la halo ema seluk sidi. (1 Kor 8:​7-9) Hodi halo nuneʼe, Paulo ajuda ema Kristaun iha Korinto atu sai maduru iha dalan espirituál atu sira bele uza sira rasik nia kbiit atu tetu didiʼak duké sadere ba ema seluk ka buka deʼit ukun-fuan sira. w24.04 p. 5 par. 14

Iha Jonas nia tempu, ema Nínive hetan oportunidade atu arrepende an. Hanoin-hetan, Jesus hatete katak ema neʼebé “moris hiʼas atu hetan tesi-lia” mak ema neʼebé “halo hahalok aat”. (João 5:29) Tan neʼe, karik ema balu neʼebé iha Sodoma no Gomorra mós iha esperansa atu moris hiʼas, no karik ita sei hetan oportunidade atu hanorin sira kona-ba Jeová no Jesus Kristu. Jeová sempre ‘buka-hatene ema nia laran no haree didiʼak ema nia hanoin’. Bainhira Jeová fó moris-hiʼas ba ema iha futuru, nia sei ‘fó kolen ba sira ida-idak tuir sira-nia hahalok’. Jeová nia desizaun sira kona-ba tesi-lia mak metin, maibé nia mós sei hatudu laran-sadiʼa bainhira situasaun permite. Tan neʼe, se Bíblia la fó sai ho klaru, ita labele dehan katak ema neʼe sei la hetan moris-hiʼas! w24.05 p. 5-6 par. 15-16

Iha tempu uluk, mensajen husi Maromak hametin ninia atan sira kuandu sira presiza halo knaar neʼebé susar. Hanoin toʼok kona-ba profeta Jeremias. Nia hanoin barak bainhira Jeová fó knaar ba nia atu haklaken. Jeremias hatete: “Haʼu la iha matenek atu koʼalia, tanba haʼu mak joven deʼit.” (Jer 1:6) Saida mak ajuda nia atu haklaken ho aten-brani? Nia hetan kbiit husi Maromak nia liafuan. Nia hatete: “[Jeová nia] liafuan sai hanesan ahi neʼebé lakan makaʼas iha haʼu-nia ruin. Haʼu kole ona atu hanetik ida-neʼe.” (Jer 20:​8, 9) Maski Jeremias presiza haklaken iha fatin neʼebé ema lakohi rona, maibé mensajen neʼebé nia presiza haklaken fó kbiit ba nia atu halaʼo knaar neʼe. Ema Kristaun mós bele hetan kbiit husi Maromak nia Liafuan. Apóstolu Paulo hatete katak aprende kona-ba koñesimentu neʼebé loos sei book irmaun-irmán sira atu “moris ho loloos iha Jeová nia oin” no kontinua “fó fuan iha serbisu diʼak hotu”.—Kol 1:​9, 10. w24.04 p. 14-15 par. 2-4

Zadoc nafatin laran-metin ba Jeová maski Amlulik Boot Abiatar la laran-metin hodi apoia David nia oan Adonias, neʼebé planu atu hadau pozisaun nuʼudar liurai. David nunka duvida kona-ba Zadoc nia laran-metin. Bainhira David hatene kona-ba Adonias nia planu, David tau fiar ba Zadoc, Natan, no Benaias atu foti Salomão nuʼudar liurai. (1 Reis 1:​32-34) Hodi hamutuk ho Jeová nia atan neʼebé laran-metin hanesan Natan no sira seluk neʼebé apoia Liurai David, neʼe hametin no halo Zadoc sai aten-brani liután. Bainhira Salomão sai liurai, nia “foti amlulik Zadoc hodi troka Abiatar”. (1 Reis 2:35) Oinsá mak Ita bele banati-tuir Zadoc? Se Ita-nia família ka belun ida hili atu la laran-metin tan ba Jeová, hatudu ba Jeová katak Ita sei nafatin laran-metin ba nia. (Jos 24:15) Jeová sei fó Ita kbiit no aten-brani neʼebé Ita presiza. Sadere ba nia liuhusi orasaun no kontinua hakbesik ba maluk fiar-naʼin sira neʼebé laran-metin. Jeová hafolin Ita-nia laran-metin, no nia sei fó kolen ba Ita.—2 Sam 22:26. w24.07 p. 6-7 par. 16-17

Salmo 15:2 hatete katak ema neʼebé sai Jeová nia belun mak ema neʼebé ‘moris ho hahalok loos no halo buat neʼebé loos’. Neʼe mak hahalok neʼebé ita presiza kontinua hatudu. Maibé ita bele “moris ho hahalok loos” ka lae? Sin. Maski ita la perfeitu, maibé Jeová bele haree ita nuʼudar ema neʼebé “moris ho hahalok loos” se ita hakaʼas an atu halo tuir nia. Bainhira ita dedika an ba Maromak no hetan batizmu, neʼe hanesan ita hahú laʼo hamutuk ho Maromak. Iha Bíblia nia tempu, kuandu ema ida sai parte ba nasaun Izraél, neʼe la dehan katak nia bele sai bainaka iha Jeová nia tenda. Porezemplu, ema balu halo orasaun ba Maromak maibé laʼós ho “lia-loos no hahalok loos”. (Isa 48:1) Tan neʼe, ema Izraél presiza aprende kona-ba Jeová nia mandamentu no halo tuir. Nuneʼe mós ohin loron, atu bele sai Jeová nia belun la toʼo atu hetan deʼit batizmu no tuir reuniaun sira. Ita presiza kontinua “halo buat neʼebé loos”. w24.06 p. 9 par. 4; p. 10 par. 6

Iha dalan saida deʼit mak Jeová hatudu laran-luak? Mai ita hanoin kona-ba ezemplu balu. Jeová fó ita buat hotu neʼebé ita presiza. Karik ita la iha rikusoin barak, maibé Jeová sempre ajuda ita atu iha buat neʼebé ita presiza. Porezemplu, nia fó ita ai-han, roupa, no hela-fatin. (Sal 4:8; Mt 6:​31-33; 1 Tim 6:​6-8) Jeová tau matan ita laʼós tanba obrigasaun. Hanoin toʼok kona-ba Jesus nia liafuan iha Mateus 6:​25, 26. Jesus uza manu sira nuʼudar ezemplu hodi hatete: “Sira la kari fini, la koʼa, no la halibur ai-han ba armazén.” Maibé Jesus hatutan tan: “Imi-nia Aman iha lalehan fó ai-han ba sira.” Tuirmai Jesus husu: “Imi mak folin-boot liu fali sira, loos ka lae?” Saida mak ita aprende? Tan neʼe, se Jeová tau matan ba animál nia presiza, ita bele fiar metin katak nia mós sei tau matan ba ita-nia presiza! Hanesan aman neʼebé hadomi ninia oan, Jeová mós tau matan ba ninia família tanba hadomi sira.—Sal 145:16; Mt 6:32. w24.09 p. 26-27 par. 4-6

Atan ba kongregasaun mak irmaun neʼebé hetan ona batizmu no simu knaar liuhusi espíritu santu atu ajuda katuas sira halo knaar importante oioin iha kongregasaun. Importante liu mak atan ba kongregasaun tenke hadomi Jeová no moris tuir Ninia matadalan, no hadomi tebes irmaun-irmán sira. (Mt 22:​37-39) Oinsá mak irmaun ida neʼebé batizmu ona bele hakaʼas an atu serbí nuʼudar atan ba kongregasaun? Bíblia temi kona-ba kritéria neʼebé irmaun ida presiza kumpre atu bele serbí nuʼudar atan ba kongregasaun. (1 Tim 3:​8-10, 12) Se Ita hakarak serbí nuʼudar atan ba kongregasaun, Ita presiza estuda kona-ba kritéria sira-neʼe no hakaʼas an atu kumpre. Maibé ulukliu, Ita presiza hanoin didiʼak kona-ba Ita-nia motivu. w24.11 p. 15 par. 4-5

Ema balu dehan katak sira lee Bíblia dala barak ona. Maibé sira fiar duni buat neʼebé sira lee ka lae? Sira hakaʼas an atu moris tuir Bíblia nia hanorin ka lae? Triste, dala barak resposta mak lae. Neʼe diferente duni ho Jeová nia povu! Ita hakaʼas an atu aplika ida-neʼe iha ita-nia moris loroloron nian. Klaru katak dala ruma la fasil atu lee no halo tuir Maromak nia Liafuan. Karik ita sente susar atu buka tempu hodi lee Bíblia. Ka karik ita toman atu lee ho ansi no la hanoin kleʼan kona-ba buat neʼebé ita lee. Ka karik ita sente estrese tanba presiza halo mudansa barak. Maski Ita hasoru susar naran deʼit, Ita bele manán ida-neʼe ho Jeová nia ajuda. Mai ita deside metin atu sai ema neʼebé halo tuir Maromak nia Liafuan. Bainhira ita lee beibeik Maromak nia Liafuan no halo tuir, ita-nia moris sei sai kontente liután.—Tgo 1:25. w24.09 p. 7 par. 15-16

Liuhusi espíritu santu, Jeová fó kmaan mai ita bainhira ita hasoru situasaun neʼebé lori trauma. Se Ita hasoru daudaun susar, Ita bele halo orasaun beibeik ba Jeová iha tempu naran deʼit. (Sal 86:3; 88:1) Husu beibeik Jeová atu fó ninia espíritu santu. Nia sempre ajuda Ita. Ita sente la iha forsa tanba susar ruma ka lae? Espíritu santu bele fó Ita forsa atu kontinua serbí Jeová ho laran-metin. (Éf 3:16) Kuandu Ita husu ona espíritu santu, saida tan mak Ita presiza halo? Halo buat ruma neʼebé ajuda Ita atu simu liután espíritu santu. Neʼe inklui tuir reuniaun sira no haklaken. Hakaʼas an atu iha hanoin hanesan Jeová nian hodi lee Bíblia loroloron. (Flp 4:​8, 9) No kuandu Ita lee, tau atensaun ba ema iha Bíblia nia tempu neʼebé hasoru susar, no medita kona-ba oinsá Jeová ajuda sira tahan. w24.10 p. 9 par. 12-14

Hanesan Jeová no ninia Oan-Mane, ita mós hadomi ema. (Prov 8:31) Ita hanoin tebes sira neʼebé “la hatene Maromak” no “la iha esperansa”. (Éf 2:12) Ema sira-neʼe mout iha problema oioin, no ita iha palampu neʼebé sira presiza, neʼe mak liafuan diʼak kona-ba Maromak nia Ukun. Tanba ita hadomi no hanoin ema, neʼe book ita atu haklaken ba sira kona-ba liafuan diʼak. Lia-loos folin-boot neʼe bele fó sira esperansa, ajuda sira iha sira-nia moris agora, no fó sira oportunidade atu hetan “moris loloos”, neʼe mak moris ba nafatin iha mundu foun. (1 Tim 6:19) Ita-nia domin ba ema mós book ita atu fó avizu ba sira kona-ba mundu nia rohan neʼebé besik ona. (Eze 33:​7, 8) Ita hakarak sira hatene saida mak sei akontese durante terus boot. Primeiru, relijiaun falsu sei lakon, no tuirmai sistema aat neʼe sei lakon iha funu Armagedon.—Apok 16:​14, 16; 17:​16, 17; 19:​11, 19, 20. w24.05 p. 16-17 par. 8-9

Apóstolu Paulo anima ema Kristaun atu husik situasaun la justisa ba “Maromak nia hirus”. Neʼe katak husik Jeová mak lori justisa tuir ninia tempu no ninia hakarak. Irmaun ida naran John neʼebé hasoru situasaun la justisa tinan barak liubá hatete: “Haʼu presiza kontrola makaʼas haʼu-nia hakarak atu hadiʼa situasaun tuir haʼu-nia dalan. Eskritura iha Roma 12:19 ajuda haʼu atu hein ba Jeová ho pasiénsia.” Ita hetan benefísiu bainhira hein ba Jeová atu hadiʼa problema neʼebé mosu. Se ita halo nuneʼe, ita sei la sai estrese tanba la koko atu rezolve problema neʼe ho ita-nia kbiit rasik. Jeová oferese ajuda mai ita, neʼe hanesan nia dehan: ‘Entrega neʼe mai haʼu. Haʼu mak sei rezolve.’ Se ita tau fiar ba Jeová nia promesa neʼebé dehan “Haʼu sei selu fali”, neʼe sei ajuda ita atu la rai hirus tanba hatene katak Jeová sei hadiʼa situasaun neʼe iha dalan neʼebé diʼak liu. w24.11 p. 6 par. 14-15

Ita presiza kuidadu atu rikusoin la sai buat neʼebé importante liu ba ita. Ita bele aprende kona-ba neʼe husi apóstolu Paulo nia konsellu ba ema Kristaun. Nia koʼalia kona-ba ezemplu la diʼak husi ema Izraél antigu, inklui buat neʼebé akontese besik Foho Sinai. Nia fó avizu ba ema Kristaun atu “labele sai hanesan [ema Izraél] hodi kaan buat neʼebé aat”. (1 Kor 10:​6, 7, 11) Jeová halo milagre hodi fó ai-han ba ema Izraél, maibé tanba sira kaan-teen, ikusmai ai-han neʼebé Jeová fó sai fali “buat neʼebé aat”. (Núm 11:​4-6, 31-34) No bainhira sira adora karau-oan osan-mean, sira hatudu katak sira fokus liu kona-ba han, hemu no halo festa duké halo tuir Jeová. (Éx 32:​4-6) Paulo konta fali akontesimentu neʼe nuʼudar avizu ba ema Kristaun antes Jeruzalein no templu naksobu iha tinan 70 EC. Ita mós moris iha tempu neʼebé mundu aat neʼe besik atu remata, tan neʼe ita presiza tau atensaun didiʼak ba Paulo nia konsellu neʼe. w24.12 p. 6 par. 13

Jeová mak “Maromak neʼebé kontente”, no nia hakarak ita atu kontente. (1 Tim 1:11) Nia fó ita prezente barak atu ajuda ita moris kontente. (Tgo 1:17) Prezente ida mak arranju kaben nian. Bainhira mane no feto ida kaben, sira promete atu hadomi no respeitu malu. Kuandu laʼen no feen mantein sira-nia domin ba malu, sira bele moris kontente. Triste mak kaben-naʼin barak ohin loron haluha sira-nia juramentu kaben nian, no rezultadu mak sira la kontente. Jeová hakarak laʼen sira atu trata sira-nia feen iha dalan oinsá? Jeová haruka laʼen sira atu hatudu respeitu ba sira-nia feen. Laʼen neʼebé respeitu ninia feen sei trata feen ho laran-diʼak no domin.—1 Ped 3:7. w25.01 p. 8 par. 1-2; p. 9 par. 4-5

Klaru katak Paulo nia karta ba ema Kristaun Ebreu ajuda sira atu prepara an ba susar boot neʼebé sira sei hasoru. Paulo anima irmaun-irmán sira atu estuda didiʼak no komprende Maromak nia Liafuan. Hodi halo nuneʼe sei ajuda sira atu rekoñese hanorin neʼebé bele estraga sira-nia fiar. Nia anima sira atu hametin sira-nia fiar hodi bele sai prontu atu halo tuir matadalan husi Jesus no husi sira neʼebé dirije kongregasaun. No nia mós ajuda ema Kristaun sira atu haburas kbiit atu tahan hodi iha hanoin neʼebé loos kona-ba sira-nia susar, no haree susar sira-neʼe nuʼudar treinu husi Aman Jeová. Ita mós presiza halo tuir konsellu sira-neʼe husi Bíblia, tanba neʼe bele ajuda ita tahan ho laran-metin toʼo rohan.—Ebr 3:14. w24.09 p. 12 par. 17; p. 13 par. 19

Tuir Bíblia, sakrifísiu mak folin atu hamoos sala no hadame malu ho Maromak. Tuir Jeová nia haree, neʼe mak dalan ida atu bele hetan fali buat neʼebé lakon. Iha dalan oinsá? Hanoin-hetan, Adão no Eva lakon moris neʼebé perfeitu no ba nafatin. Entaun sakrifísiu nia folin presiza hanesan ho buat neʼebé lakon ona. (1 Tim 2:6) Atu bele sosa fali buat neʼebé Adão halo lakon, presiza mane ida neʼebé (1) perfeitu; (2) iha posibilidade atu moris ba nafatin iha rai; no (3) prontu atu fó ninia moris mai ita. Mai ita haree razaun tolu tanbasá folin husi Jesus nia sakrifísiu bele sosa fali ita. (1) Jesus perfeitu no “nia la halo sala ida”. (1 Ped 2:22) (2) Nia iha posibilidade atu moris ba nafatin iha rai. (3) Nia prontu atu mate no fó ninia moris atu sosa fali ita.—Ebr 10:9. w25.02 p. 4-5 par. 11-12

Jeová hadomi Ita no hakarak Ita sai parte ba ninia família, maski hasoru susar naran deʼit neʼebé bele hanetik Ita atu hetan batizmu. Jesus hatete ba ninia dixípulu sira: “Se imi-nia fiar boot hanesan mostarda-musan, imi sei hatete ba foho neʼe: ‘Muda husi neʼe hodi bá fali neʼebá’, no foho neʼe sei muda, no la iha buat ida neʼebé imi labele halo.” (Mt 17:20) Ema neʼebé rona Jesus nia liafuan neʼe foin mak sai Jesus nia dixípulu, tan neʼe sira presiza kontinua haburas sira-nia fiar. Entaun Jesus hametin sira katak se sira iha fiar neʼebé metin, Jeová sei ajuda sira atu manán hasoru susar neʼebé boot hanesan foho. No Jeová mós sei ajuda Ita iha dalan neʼebé hanesan! Se iha buat ruma neʼebé hanetik Ita atu hetan batizmu, keta demora atu halakon ida-neʼe. Dedika Ita-nia an ba Jeová no hetan batizmu. Neʼe mak desizaun diʼak liu hotu neʼebé Ita bele halo! w25.03 p. 7 par. 18-20

Ita bele tahan susar sira se ita hanoin-hetan katak Maromak neʼebé moris prontu atu ajuda ita. Ita bele hametin ita-nia fiar hodi hanoin kona-ba buat neʼebé Jeová halo ona iha tempu uluk. (Isa 37:​17, 33-37) No mós, Ita bele haree notísias sira iha ita-nia website jw.org neʼebé fó sai oinsá Jeová apoia ona irmaun-irmán sira ohin loron. Liután neʼe, Ita mós bele hanoin-hetan tempu neʼebé Jeová ajuda ona Ita. Keta hanoin barak se Jeová la halo buat neʼebé kmanek ba Ita. Tanba loloos, Jeová halo ona buat barak ba Ita! Nia dada Ita atu sai ninia belun. (João 6:44) Diʼak atu husu Jeová ajuda Ita atu hanoin-hetan tempu neʼebé nia hatán ba Ita-nia orasaun, fó apoia ba Ita iha tempu neʼebé loos, ka tau matan ba Ita iha tempu susar. Hodi hanoin fali kona-ba buat sira-neʼe sei hametin Ita-nia fiar ba Jeová katak nia sei kontinua ajuda ita. w24.06 p. 21 par. 8

Karik Ita deside metin ona atu la husik buat naran deʼit halo ita la laran-metin ba Jeová. Maibé, ita la perfeitu no fasil deʼit atu monu ba tentasaun. (Rom 7:​21-23) Derrepente deʼit ita bele hasoru tentasaun atu halo buat neʼebé sala. Atu bele laran-metin nafatin ba Jeová no ninia Oan-Mane, ita presiza halo tuir Jesus nia konsellu atu kontinua matan-moris kona-ba tentasaun. Ita hotu hasoru tentasaun atu halo sala. Maibé ita ida-idak iha fraku neʼebé la hanesan, karik neʼe mak atu halo sala neʼebé sériu, halo hahalok neʼebé la moos, ka hatudu hahalok tuir mundu neʼe nian. Porezemplu, karik ema ida luta makaʼas hasoru tentasaun atu halo sala seksuál. Ema seluk karik hakaʼas an atu la halo hahalok neʼebé la moos, hanesan masturbasaun ka haree pornografia. No ema balu karik luta hasoru sentimentu taʼuk ba ema, foti an, hirus lalais, ka buat seluk tan. w24.07 p. 14 par. 3; p. 15 par. 5

Imajina toʼok saida mak sei akontese kuandu katuas sira lakohi simu fali ema ida, ka se ema neʼe sente katak irmaun-irmán sira la hatudu domin ba nia maski kongregasaun simu ona nia. Nia bele sai “triste demais” no karik sente katak nia nunka bele serbí tan Jeová. Nia mós bele rende an atu haburas ninia relasaun ho Maromak. Aat liután mak irmaun-irmán sira sei tau sira-nia an iha perigu laran se sira lakohi fó perdua ba ema neʼebé arrepende an. Tanbasá? Tanba sira la halo tuir Jeová neʼebé fó perdua, maibé halo tuir liu Satanás neʼebé la hatudu laran-sadiʼa. Sira sei husik Diabu uza sira hodi hanetik ema atu serbí Jeová.—2 Kor 2:​10, 11; Éf 4:27. w24.08 p. 17 par. 7, 10-11

Jesus Kristu mós fó mane sira neʼebé serbí “nuʼudar prezente” iha dalan seluk tan. Jesus dirije katuas sira iha Jeruzalein atu haruka Paulo, Barnabé, no mane seluk tan atu bá vizita kongregasaun sira. (Após 11:22) Tanbasá? Objetivu mak atu hanesan ho atan no katuas kongregasaun sira, neʼe mak atu hametin kongregasaun. (Após 15:​40, 41) Katuas área sira presiza halo viajen barak. Sira balu halo viajen kilómetru atus ba atus entre kongregasaun sira. Semana-semana katuas área hatoʼo diskursu, halo vizita nuʼudar bibi-atan, dirije enkontru katuas, pioneiru, no grupu haklaken. Katuas área mós prepara diskursu no organiza asembleia no reuniaun boot sira. Sira hanorin iha eskola pioneiru, halo arranju ba reuniaun espesiál ho pioneiru sira, no halaʼo knaar urjente ruma neʼebé sira simu husi sukursál. w24.10 p. 21 par. 12-13

Profeta Jeremias temi kona-ba Jeová hodi hatete liafuan neʼebé hakerek iha eskritura ohin nian. Bainhira apóstolu Paulo temi fali liafuan sira-neʼe, nia uza fraze neʼebé hanesan hodi hatete: “Haʼu sei la hanoin-hetan tan sira-nia sala.” (Ebr 8:12) Maibé neʼe katak sá? Iha Bíblia, liafuan “hanoin-hetan” laʼós deʼit refere ba hanoin fali kona-ba buat neʼebé akontese iha pasadu. Maibé neʼe bele refere ba ema ida halo buat ruma. Porezemplu, kriminozu neʼebé prega iha Jesus nia sorin hatete: “Jesus, hanoin-hetan haʼu bá kuandu Ita tama iha Ita-nia Ukun.” (Lc 23:​42, 43) Nia laʼós husu deʼit Jesus atu hanoin fali nia. Jesus nia resposta hatudu katak Jesus sei halo buat ruma atu fó moris-hiʼas ba kriminozu neʼe. Tan neʼe, bainhira Jeová hatete katak nia la hanoin-hetan tan kona-ba ita-nia sala sira, neʼe katak nia sei la halo buat ruma hasoru ita. Nia sei la fó kastigu ba ita iha futuru kona-ba sala neʼebé nia perdua ona. w25.02 p. 10-11 par. 14-15

Kbiit atu komprende mai husi koñesimentu kona-ba Jeová nia hahalok, ninia hakarak, no saida mak nia gosta ka la gosta. Husu Ita-nia an: ‘Tuir buat neʼebé haʼu hatene kona-ba Jeová, desizaun saida mak sei halo Jeová kontente?’ (Éf 5:17) Atu halo Jeová kontente, dala ruma ita tenke foti desizaun neʼebé halo ema seluk la kontente. Porezemplu, inan-aman balu hakarak sira-nia oan-feto atu kaben ho mane neʼebé riku, ka bele fó folin neʼebé karun, maski mane neʼe nia espiritualidade mak ladún diʼak. Klaru, inan-aman hakarak sira-nia oan atu iha moris diʼak, maibé mane neʼe sei ajuda nia atu iha relasaun diʼak ho Jeová ka lae? Oinsá ho Jeová nia hanoin? Ita bele hetan resposta iha Mateus 6:33. Jesus anima ema Kristaun atu “kontinua buka uluk Maromak nia Ukun”. Maski ita respeitu inan-aman no ema seluk, maibé buat neʼebé importante liu mak halo Jeová kontente. w25.01 p. 17 par. 9-10

Ita presiza Jeová nia ajuda atu kontinua haklaken ho laran-manas maski ema kontra. (Apok 12:17) Tanbasá Ita bele fiar katak Jeová sei ajuda Ita? Hanoin toʼok Jesus nia orasaun iha João kapítulu 17. Jesus husu Jeová atu tau matan ba apóstolu sira, no Jeová hatán ninia orasaun. Livru Apóstolu fó sai oinsá Jeová ajuda apóstolu sira atu kontinua haklaken ho laran-manas maski ema fó-terus. Iha Jesus nia orasaun, nia mós husu Jeová atu tau matan ba ema seluk neʼebé tau fiar ba buat neʼebé apóstolu sira haklaken. Neʼe inklui Ita. Jeová kontinua hatán Jesus nia orasaun. Jeová sei ajuda Ita, hanesan nia ajuda ona apóstolu sira. (João 17:​11, 15, 20) Nuʼudar mundu nia rohan besik daudaun, karik sei sai susar liu ba ita atu haklaken ho laran-manas, maibé ita sei hetan apoiu neʼebé ita presiza.—Lc 21:​12-15. w25.03 p. 17-18 par. 13-14

Maromak nia povu bele “haklalak ho haksolok” tanba sira-nia laran nakonu ho sentimentu agradese. Lia-loos neʼebé hametin ita-nia fiar, promesa sira iha Bíblia, no mós esperansa ba futuru neʼebé bazeia ba Kristu nia sakrifísiu halo ita sente “laran-kontente”. Bainhira ita koʼalia kona-ba buat sira-neʼe, neʼe halo ita sente kontente! (Sal 34:8; 133:​1-3) Domin no unidade entre Jeová nia povu mak parte importante ba paraízu espirituál. (Kol 3:14) Neʼe ajuda ita komprende ita-nia moris iha mundu foun sei sai oinsá. Iha tempu neʼebá, Jeová nia atan sira sei sente domin no unidade iha dalan neʼebé boot liután. Se ema ida hakarak sente haksolok no kontente ho buat neʼebé sira iha, sira presiza tama ba paraízu espirituál. Maski ema iha mundu iha hanoin oioin kona-ba Jeová nia atan sira, maibé sira iha naran neʼebé diʼak ho Jeová no ninia atan hotu.—Isa 65:15. w24.04 p. 21 par. 7-8

Oinsá mak ita hotu bele apoia ema Kristaun klosan neʼebé hakarak kaben? Dalan ida mak hodi kuidadu kona-ba buat neʼebé ita koʼalia. (Éf 4:29) Ita bele husu ba ita-nia an: ‘Haʼu goza ema neʼebé hakarak atu kaben ka lae? Bainhira haʼu haree irmaun klosan no irmán klosan ida koʼalia hamutuk, haʼu sei hanoin kedas katak sira gosta malu ka lae?’ (1 Tim 5:13) Ita labele halo ema Kristaun klosan ida sente katak sira-nia moris la kompletu tanba la kaben. Tan neʼe, diʼak liu buka oportunidade atu gaba ema Kristaun sira neʼebé klosan! Oinsá se ita hanoin katak irmaun ida no irmán ida mak diʼak atu kaben? Bíblia anima ita atu hanoin ema seluk nia sentimentu. (Rom 15:2) Ema klosan balu lakohi atu ema seluk fó koñese sira ba klosan seluk, no ita presiza respeitu sira-nia hakarak. (2 Tes 3:11) Karik ema balu kontente atu hetan ajuda husi ema seluk, maibé ita labele ajuda se sira la husu ba ita.—Prov 3:27. w24.05 p. 24-25 par. 14-15

Ita hasoru problema neʼebé akontese derrepente deʼit no neʼe bele lori susar oioin. Ita agradese tebes tanba ita bele sadere ba Jeová atu hetan ninia ajuda! Bainhira ita simu ninia ajuda, neʼe hametin ita-nia fiar katak “Jeová mak Maromak neʼebé moris”! (Sal 18:46) Maibé, bainhira David temi tiha liafuan iha salmo neʼe, tuirmai nia bolu Maromak nuʼudar “haʼu-nia Fatuk Boot”. Tanbasá nia kompara Jeová hanesan fatuk boot? Bíblia kompara Jeová hanesan “fatuk boot” atu ajuda ita komprende kona-ba ninia hahalok balu. Bainhira Jeová nia atan sira hahiʼi nia kona-ba ninia hahalok furak sira, dala barak sira temi nia iha Bíblia nuʼudar fatuk boot. Dala primeiru neʼebé Bíblia temi Jeová nuʼudar “Fatuk Boot” mak hakerek iha Deuteronómio 32:4. Iha Ana nia orasaun, nia hatete: “La iha fatuk seluk hanesan ami-nia Maromak.” (1 Sam 2:2) Habakuk bolu Jeová nuʼudar “haʼu-nia Fatuk Boot”. (Hab 1:12) Hakerek-naʼin ba Salmo 73 bolu Maromak “haʼu-nia fatuk boot”. (Sal 73:26) No Jeová mós refere ba ninia an nuʼudar fatuk boot.—Isa 44:8. w24.06 p. 26 par. 1, 3

Liurai Izraél sira neʼebé halo Jeová kontente mak liurai neʼebé hadomi nia ho laran tomak. Kona-ba Josias, Bíblia hatete: “La iha liurai ida mak hanesan nia neʼebé fila fali ba Jeová ho ninia laran tomak.” (2 Reis 23:25) Oinsá ho Salomão neʼebé ikusmai halo buat neʼebé aat? ‘Nia la serbí Jeová ho laran tomak.’ (1 Reis 11:4) Kona-ba Abijam, liurai seluk neʼebé la laran-metin, Bíblia hatete: ‘Nia la serbí Jeová ho laran tomak.’ (1 Reis 15:3) Dala barak Bíblia uza liafuan “laran” atu refere ba ema ida nia hakarak, hanoin, hahalok, abilidade, motivasaun, no planu. Serbí Jeová ho laran tomak katak sá? Ho laran tomak katak ita serbí Jeová laʼós tanba neʼe mak toman deʼit. Maibé ita serbí Jeová tanba ita hadomi tebes nia no respeitu nia iha ita-nia moris tomak. w24.07 p. 21 par. 4-5

Jeová uza ilustrasaun atu fó sai oinsá nia hamoos ita-nia sala sira. Nia hatete: “Haʼu sei hamoos ó-nia sala no taka ó-nia sala hanesan taka ho kalohan mahar.” (Isa 44:22) Bainhira Jeová fó perdua, neʼe hanesan nia uza kalohan mahar atu taka ita-nia sala hodi la haree tan. Saida mak ita aprende husi ilustrasaun sira-neʼe? Bainhira Jeová perdua ita, ita labele kontinua fó-sala ba ita-nia an durante ita-nia moris tomak. Liuhusi Jesus Kristu nia sakrifísiu, ita-nia debe hamoos tiha iha dalan neʼebé kompletu. Neʼe hanesan ita nunka halo sala neʼe. Jeová bele fó perdua duni ba ita bainhira ita arrepende ita-nia sala. Jeová nia laran-sadiʼa mós loke dalan mai ita atu iha relasaun belun ho nia no ajuda ita atu la fó-sala demais ba ita-nia an. w25.02 p. 10 par. 11-14

Jeová hakarak katuas sira atu proteje kongregasaun husi ema neʼebé lakohi halo tuir ninia mandamentu. (1 Kor 5:7) Katuas sira mós hakarak ema neʼebé halo sala arrepende an. Sira kontinua tau esperansa katak ema neʼe sei troka ninia hahalok. Tanbasá? Tanba sira banati-tuir Jeová neʼebé “iha domin neʼebé boot tebes no laran-sadiʼa”. (Tgo 5:11) Haree toʼok oinsá apóstolu João hatudu domin ba irmaun-irmán sira. Nia dehan: “Haʼu-nia oan doben sira, haʼu hakerek buat sira-neʼe ba imi atu imi labele halo sala. Maibé se ema ida halo sala, ita iha ajuda-naʼin ida neʼebé hamutuk ho Aman, ajuda-naʼin neʼe mak Jesus Kristu neʼebé halo buat loos iha Maromak nia oin.” (1 João 2:1) Triste mak dala ruma ema Kristaun ida lakohi arrepende an. Se nuneʼe, kongregasaun tenke hasai nia. w24.08 p. 25 par. 19-20

Karik Ita komesa kompara buat neʼebé Ita halo ho buat neʼebé ema seluk halo. Keta halo nuneʼe! Jeová la kompara Ita ho ema seluk. (Gal 6:4) Porezemplu, Maria fó mina-morin neʼebé karun tebes ba Jesus. (João 12:​3-5) Maibé feto-faluk ida fó osan-besi rua neʼebé folin kiʼik nuʼudar kontribuisaun iha templu. (Lc 21:​1-4) Jesus la kompara feto naʼin-rua neʼe, maibé nia gaba sira-nia fiar. Jesus banati-tuir ninia Aman ho perfeitu. Tan neʼe ita bele iha konfiansa katak Jeová hafolin duni buat neʼebé ita halo tanba ita fiar no hadomi nia maski buat neʼebé ita fó mak kiʼik deʼit tuir ita-nia haree. Ita hotu dala ruma sente dúvida. Maibé, Bíblia bele ajuda ita atu halakon hanoin neʼebé negativu. Tanba neʼe sei ajuda ita atu iha konfiansa. Jeová hatene didiʼak ita ida-idak. Nia hafolin Ita-nia sakrifísiu no sei fó kolen ba Ita. Jeová hanoin no hadomi ninia atan hotu neʼebé laran-metin. w24.10 p. 25 par. 3; p. 29 par. 17-18