Juñu

Ita hetan ona benefísiu barak husi Jesus nia sakrifísiu. Porezemplu, tanba Jesus nia sakrifísiu, Jeová fó perdua ba ita-nia sala. Jeová halo ida-neʼe tanba ninia hakarak rasik, laʼós tanba iha obrigasaun. (Sal 103:​3, 10-13) Ema balu sente katak sira la merese hetan perdua husi Jeová. Tuir loloos, ita hotu la merese. Apóstolu Paulo komprende katak nia “la merese” atu sai apóstolu ida. Maibé nia hatete: “Haʼu bele sai hanesan agora tanba Maromak nia laran-diʼak neʼebé boot.” (1 Kor 15:​9, 10) Bainhira ita arrepende sala, Jeová perdua ita. Tanbasá? Laʼós tanba ita merese hetan ida-neʼe, maibé tanba nia hadomi ita. Entaun, se ita sente katak ita la merese hetan perdua, hanoin-hetan katak Jeová fó Jesus nia sakrifísiu laʼós ba ema neʼebé perfeitu, maibé ba ema sala-naʼin neʼebé arrepende an.—Lc 5:32; 1 Tim 1:15. w25.01 p. 26-27 par. 3-4

Ita labele kontrola saida mak ema seluk hatete ka halo mai ita, maibé ita bele koko atu kontrola buat neʼebé ita halo. No baibain buat diʼak liu neʼebé ita bele halo mak fó perdua. Tanbasá? Tanba ita hadomi Jeová, no nia hakarak ita atu fó perdua. Se ita nafatin hirus no la fó perdua, karik ita sei halo hahalok neʼebé la diʼak no karik bele hasoru problema saúde. (Prov 14:​17, 29, 30) Bainhira ita la rai hirus, neʼe sei ajuda ita atu la trata ema seluk tuir deʼit ita-nia sentimentu. Ita mós bele lori buat diʼak ba ita-nia an rasik, neʼe mak la hanoin tan kona-ba problema neʼe no sente kontente fali. Oinsá ita bele manán hasoru sentimentu laran-kanek? Dalan ida mak fó tempu ba ita-nia an atu sente diʼak fali. Bainhira ema ida simu tiha tratamentu médiku kona-ba kanek neʼebé boot, ema neʼe presiza tempu balu atu ninia kanek sai diʼak fali. Nuneʼe mós, karik ita mós presiza tempu atu bele sai diʼak iha dalan emosaun antes ita prontu atu fó perdua ba ema seluk. (Ecle 3:3; 1 Ped 1:22) Halo orasaun no husu Jeová ajuda Ita atu bele perdua ema seluk. w25.02 p. 16-17 par. 8-11

Ezemplu kona-ba hanorin báziku mak inklui arrepende an, fiar, batizmu, no moris-hiʼas. (Ebr 6:​1, 2) Hanorin báziku sira-neʼe mak fundasaun ba ema Kristaun loos nia fiar. Tan neʼe, bainhira apóstolu Pedro haklaken ba ema-lubun iha loron Pentekostes, nia koʼalia kona-ba hanorin báziku sira-neʼe. (Após 2:​32-35, 38) Atu bele sai Kristu nia dixípulu, ita presiza hatene hanorin báziku sira-neʼe. Porezemplu, Paulo fó avizu katak se ita la fiar kona-ba moris-hiʼas, ita labele dehan katak ita mak ema Kristaun neʼebé loos. (1 Kor 15:​12-14) Maski nuneʼe, la toʼo atu hatene deʼit kona-ba hanorin báziku, ita presiza iha duni hakarak atu aprende liután hodi bele sai maduru. La hanesan ho hanorin neʼebé báziku, ai-han espirituál neʼebé toos laʼós deʼit kona-ba Jeová nia ukun-fuan, maibé mós kona-ba prinsípiu sira neʼebé ajuda ita atu komprende kona-ba ninia hanoin. Atu bele hetan benefísiu husi ida-neʼe, ita presiza estuda, medita, no halo tuir Bíblia ho didiʼak. Hodi halo nuneʼe, ita treinu ita-nia an atu halo desizaun neʼebé halo Jeová kontente. w24.04 p. 5 par. 12-13

Maromak fó-hanoin Jonas katak ema Nínive “la hatene saida mak loos no saida mak sala”. (Jonas 1:​1, 2; 3:10; 4:​9-11) Tuirmai, Jesus uza ezemplu neʼe atu hanorin kona-ba Jeová nia justisa no laran-sadiʼa. Ema Nínive “sei hamriik” iha “tempu tesi-lia nian” katak sá? Jesus hanorin kona-ba “moris hiʼas atu hetan tesi-lia” iha futuru. (João 5:29) Jesus refere ba ninia Ukun ba Tinan Rihun Ida, no durante tempu neʼe “ema neʼebé hatudu hahalok loos no mós ema neʼebé hatudu hahalok la loos” sei hetan moris-hiʼas. (Após 24:15) Ema neʼebé hatudu hahalok la loos, sei “moris hiʼas atu hetan tesi-lia”. Neʼe katak depois ema sira-neʼe hetan tiha moris-hiʼas, Jeová no Jesus sei haree didiʼak ba sira-nia hahalok no oinsá sira halo tuir buat neʼebé sira aprende. Se ema Nínive neʼebé hetan moris-hiʼas lakohi simu adorasaun loos, Jeová sei la husik sira atu kontinua moris. (Isa 65:20) Maibé sira neʼebé hili atu adora Jeová ho laran-metin sei hetan oportunidade atu moris ba nafatin!—Dan 12:2. w24.05 p. 5 par. 13-14

Jesus hatudu laran-sadiʼa hanesan ninia Aman. (João 14:9) Liuhusi liafuan no hahalok, Jesus hatudu katak ninia Aman mak laran-sadiʼa, hadomi ema, no hakarak ajuda ema ida-idak atu manán hasoru sala. Jesus ajuda ema sala-naʼin neʼebé hakarak troka sira-nia hahalok no laʼo tuir nia. (Lc 5:​27, 28) Jesus hatene katak nia sei fó ninia moris nuʼudar sakrifísiu. Dala barak nia hatete ba ninia dixípulu sira katak ema sei entrega nia ba inimigu sira-nia liman no nia sei mate iha ai-riin. (Mt 17:22; 20:​18, 19) Nia hatene katak ninia sakrifísiu sei hamoos mundu nia sala. Jesus mós hatete katak depois fó tiha ninia moris, nia sei “dada ema oioin” ba nia. (João 12:32) Ema sala-naʼin bele halo Jeová kontente hodi simu Jesus nuʼudar sira-nia Naʼi no laʼo tuir ninia ain-fatin. Se sira halo nuneʼe, ikusmai sira bele ‘livre husi sala’. (Rom 6:​14, 18, 22; João 8:32) Jesus brani no prontu hetan terus no mate atu salva ita.—João 10:​17, 18. w24.08 p. 5 par. 11-12

Hanoin toʼok saida mak Ita sente bainhira Ita aprende lia-loos husi Bíblia ba dala primeiru. Porezemplu, Ita aprende katak Ita-nia Aman iha lalehan hadomi Ita, nia hakarak Ita atu sai parte ba ninia família neʼebé adora nia, no promete katak aban-bainrua sei la iha tan moras, terus, no iha mundu foun Ita bele hasoru fali ema neʼebé mate ona, no buat barak tan. (Mc 10:​29, 30; João 5:​28, 29; Rom 8:​38, 39; Apok 21:​3, 4) Lia-loos sira-neʼe halo Ita sente kontente tebes. (Lc 24:32) Ita gosta buat neʼebé Ita aprende, no Ita hakarak fahe tutan lia-loos furak neʼe ba ema seluk. (Kompara ho Jeremias 20:9.) Bainhira domin ba lia-loos sai buras iha ita-nia laran, neʼe book ita atu fahe ida-neʼe ba ema seluk. (Lc 6:45) Ita mós sente hanesan Jesus nia dixípulu iha tempu uluk neʼebé hatete: “Ami labele para atu koʼalia kona-ba buat neʼebé ami haree no rona ona.” (Após 4:20) Ita hadomi tebes lia-loos, tan neʼe ita hakarak fahe ida-neʼe ba ema barak liután. w24.05 p. 15 par. 5; p. 16 par. 7

Nuʼudar Jeová nia povu, ita haklaken ba ema tanba ita hadomi ita-nia Aman iha lalehan no hakarak ajuda ema seluk atu koñese nia. Maibé ema seluk susar atu sente kontente bainhira haklaken. Tanbasá? Ema balu mak moedór no la fiar an, balu la toman atu bá ema nia uma se uma-naʼin la konvida sira, no balu tan taʼuk ema sei hirus sira. Ema balu karik aprende husi kiʼik katak sira presiza hasees an husi situasaun neʼebé bele halo ema seluk sente la diʼak. Irmaun-irmán sira-neʼe sente susar atu fahe liafuan diʼak ba ema neʼebé sira la koñese. Dala ruma Ita mós sente la kontente iha serbisu haklaken tanba sentimentu hanesan neʼe ka lae? Se nuneʼe, keta sai laran-kraik. Se Ita la fiar an, karik neʼe hatudu katak Ita mak haraik an, lakohi dada atensaun ba Ita-nia an, no mós lakohi diskute malu ho ema seluk. No ita hotu lakohi ema seluk atu hirus ita, liuliu se ita koko atu ajuda sira. Ita-nia Aman iha lalehan komprende Ita-nia sentimentu no nia hakarak ajuda Ita.—Isa 41:13. w24.04 p. 14 par. 1-2

Nuʼudar Ita lee Bíblia, duké koko atu aplika buat hotu neʼebé Ita lee iha tempu hanesan, diʼak atu halo planu neʼebé Ita bele kumpre tuir Ita-nia kbiit. Karik Ita bele koko ida-neʼe: Halo lista kona-ba mudansa neʼebé Ita presiza halo. Tuirmai, hili pontu ida ka rua husi Ita-nia lista no fokus atu hadiʼa uluk ida-neʼe, no buat seluk Ita bele hadiʼa iha tempu tuirmai. Entaun, Ita sei hahú uluk husi neʼebé? Karik Ita bele hahú uluk ho pontu neʼebé Ita sente fasil liu atu kumpre, ka karik Ita bele hili atu hahú uluk ho pontu neʼebé Ita sente importante liu. Bainhira Ita deside ona Ita-nia planu, buka informasaun husi ita-nia publikasaun. Halo orasaun kona-ba Ita-nia planu hodi husu Jeová ‘fó ba Ita hakarak no kbiit atu halo buat neʼebé nia hakarak’. (Flp 2:13) Tuirmai, halo tuir buat neʼebé Ita aprende. Kuandu Ita kumpre ona Ita-nia planu primeiru, karik neʼe sei motiva Ita atu kumpre planu tuirmai. Tuir loloos, bainhira Ita konsege halo mudansa kona-ba buat ruma iha Ita-nia moris ka haburas hahalok Kristaun ida, karik Ita sei sente fasil liu atu halo mudansa kona-ba buat seluk tan. w24.09 p. 6 par. 13-14

Karik Ita sente neon-susar tanba Ita-nia hahalok uluk neʼebé hakanek ema seluk. Saida mak bele ajuda Ita? Halo buat neʼebé Ita bele atu hadiʼa situasaun, inklui husu deskulpa. Husu Jeová atu ajuda ema neʼebé Ita hakanek. Jeová bele ajuda Ita no ema neʼe atu kontinua serbí nia no iha dame. Aprende husi sala uluk nian, no prontu atu husik Jeová uza Ita atu kumpre ninia hakarak. Hanoin toʼok kona-ba profeta Jonas nia ezemplu. Duké halo viajen ba Nínive hodi tuir Maromak nia mandamentu, Jonas halai fali ba fatin seluk. Jeová fó dixiplina ba Jonas no Jonas aprende husi ninia sala. (Jonas 1:​1-4, 15-17; 2:​7-10) Jeová kontinua uza Jonas nuʼudar ninia profeta hodi fó ba nia oportunidade atu bá fali Nínive, no agora Jonas prontu atu halo tuir. Nia la husik ninia sala uluk nian hanetik nia atu simu knaar neʼe husi Jeová.—Jonas 3:​1-3. w24.10 p. 8-9 par. 10-11

Jeová laʼós deʼit halakon ita-nia debe, ka sala sira, maibé mós hamoos tiha ida-neʼe. Bainhira ita-nia debe la iha ona, karik ita bele imajina hanesan ema tau marka X iha ita-nia debe. Maski nuneʼe, ita nafatin bele haree númeru sira iha marka X nia kotuk. Maibé atu hamoos tiha buat ruma mak la hanesan duni. Atu komprende kona-ba neʼe, ita presiza hanoin-hetan katak iha tempu antigu tinta neʼebé uza atu hakerek mak fasil atu hamoos ho bee. Ema bele uza esponja neʼebé bokon atu hamoos tiha buat neʼebé nia hakerek. Entaun bainhira ita-nia debe “hamoos tiha”, neʼe lakon ona. Ema labele haree tan buat neʼebé hakerek antes neʼe. Neʼe hanesan debe neʼe nunka akontese. Neʼe halo ita sente kmaan hodi hatene katak Jeová laʼós deʼit perdua ita-nia sala, maibé nia mós hamoos tiha ida-neʼe iha dalan neʼebé kompletu!—Sal 51:9. w25.02 p. 10 par. 11

Kuandu ema seluk hanoin sala kona-ba ita ka trata aat ita, ita fiar metin katak Jeová hatene buat hotu neʼebé akontese. Neʼe bele ajuda ita atu tahan tanba hatene katak Jeová sei hadiʼa problema hotu. Kuandu ita husik buat hotu ba Jeová nia liman, ita sei la rai hirus ka odi ema. Se ita hirus nafatin, neʼe bele book ita atu hatudu hahalok la diʼak, halakon ksolok, no mós bele estraga ita-nia relasaun ho Jeová. Klaru, ita hotu sei nunka bele halo tuir Jesus nia ezemplu ho perfeitu. Dala ruma, ita koʼalia ka halo buat neʼebé ikusmai ita arrepende. (Tgo 3:2) No dala ruma situasaun la justisa bele fó impaktu ba ita-nia saúde fíziku no emosaun no ita presiza tahan ida-neʼe ba tempu kleur. Se Ita mós hasoru situasaun hanesan neʼe, hanoin-hetan katak Jeová hatene buat hotu neʼebé Ita hasoru. No Jesus mós komprende Ita-nia sentimentu tanba nia rasik hasoru ona situasaun la justisa. (Ebr 4:​15, 16) Ita kontente tanba Jeová fó konsellu husi Bíblia atu ajuda ita tahan. w24.11 p. 6 par. 12-13

Importante ba sira atu hatudu fiar ba Jesus hodi bele “hetan moris rohan-laek”. (João 3:​16-18, 36; 17:3) Ema Judeu barak la simu Jesus nia hanorin kona-ba presiza hatudu fiar ba nia atu Maromak simu sira. Sira husu ba Jesus: “Sinál saida mak ó sei hatudu ba ami, atu nuneʼe ami bele haree no fiar ó?” (João 6:30) Sira hatete katak sira-nia beiʼala iha Moisés nia tempu hetan maná nuʼudar ai-han loroloron nian. (Neem 9:15; Sal 78:​24, 25) Klaru, sira interese liu ba ai-han fíziku nian. No bainhira Jesus koʼalia kona-ba “ai-han neʼebé loos husi lalehan” neʼebé fó moris, sira la husu Jesus atu esplika liután kona-ba neʼe. (João 6:32) Sira fokus demais ba sira-nia presiza fíziku, no neʼe halo sira lakohi rona ba lia-loos neʼebé Jesus hakarak fahe ba sira. w24.12 p. 5-6 par. 10-11

Iha eskola, karik Ita-nia oan sei aprende kona-ba lei natureza neʼebé kontrola modelu ka kriasaun ida neʼebé bele mós haree iha kriasaun seluk. Porezemplu, ai-hun barak iha ninia lei neʼebé la troka. Ai-hun halo sanak, no sanak sira sai barak no ikusmai hamosu tahan. Modelu neʼe bolu nuʼudar fratál. Fratál neʼe mós bele hetan iha kriasaun seluk iha natureza. Maibé, sé mak halo lei kona-ba modelu furak neʼe? Kuandu Ita-nia oan hanoin kona-ba pergunta hanesan neʼe, neʼe mós sei hametin liután ninia fiar katak Maromak mak kria buat hotu. Nuʼudar oan sai boot, Ita mós presiza ajuda nia komprende tanbasá importante atu halo tuir Maromak nia matadalan. Atu halo nuneʼe, Ita bele husu pergunta hanesan: “Se Maromak mak kria ita, tuir ó-nia hanoin, nia hatene liu dalan neʼebé diʼak atu ita bele moris kontente ka lae?” Tuirmai Ita bele esplika katak Maromak fó ita Bíblia atu ita bele moris kontente. w24.12 p. 16 par. 8

Ho espíritu santu nia ajuda, apóstolu Paulo hakerek karta ida atu fó sai katak kongregasaun tenke hasai ema neʼebé la arrepende an. (1 Kor 5:13) No sira neʼebé laran-metin iha kongregasaun neʼe presiza halo saida? Paulo haruka sira “atu labele ransu tan” ho mane neʼe. Neʼe katak sá? Paulo esplika katak matadalan neʼe inklui mós “keta han ho ema hanesan neʼe”. (1 Kor 5:11) Se ita han hamutuk ho ema ruma, baibain ita mós dada lia ho nia. Tan neʼe Paulo koʼalia katak kongregasaun labele gasta tempu hamutuk ho mane neʼe. Hodi halo nuneʼe sei proteje kongregasaun husi influénsia neʼebé aat. (1 Kor 5:​5-7) Neʼe mós sei ajuda mane neʼe atu rekoñese katak nia halo ona Jeová laran-kanek, no nia sente triste toʼo hakarak atu arrepende an. w24.08 p. 15 par. 4-5

Tinan ida dala ida, ema Izraél selebra Loron Hamoos Sala nian. Iha loron neʼe, amlulik boot sei hasaʼe animál nuʼudar sakrifísiu atu taka povu nia sala. Klaru katak animál nia raan labele taka ema nia sala iha dalan neʼebé kompletu tanba ema mak folin-boot liu fali animál. Maibé kuandu ema Izraél arrepende an no hasaʼe sakrifísiu tuir buat neʼebé Jeová husu, nia prontu atu perdua sira-nia sala. (Ebr 10:​1-4) Arranju neʼe ajuda sira atu rekoñese katak sira mak sala-naʼin. Maibé, saida mak Jeová halo atu fó perdua ba ema nia sala iha dalan kompletu? Nia fó ninia Oan-Mane neʼebé nia hadomi “nuʼudar sakrifísiu dala ida deʼit ba nafatin atu lori ema barak nia sala”. (Ebr 9:28) Jesus “fó ninia moris hodi sosa fali ema barak”.—Mt 20:28. w25.02 p. 4 par. 9-10

“Laran hakarak, maibé isin fraku.” (Mt 26:41b) Jesus nia liafuan sira-neʼe hatudu katak nia komprende ita mak ema la perfeitu. Maibé, liafuan sira-neʼe mós inklui avizu ida: Kuidadu atu la fiar an demais. Oras balu antes Jesus hatete liafuan sira-neʼe, ninia dixípulu sira ho fiar an promete katak sira sei laran-metin ba sira-nia Naʼi. (Mt 26:35) Sira-nia motivu mak diʼak, maibé sira la rekoñese katak sira bele sai fraku bainhira hasoru susar. Tan neʼe, Jesus fó avizu ba sira hodi temi liafuan iha eskritura ba ohin nian. Triste mak dixípulu sira la matan-moris nafatin. Bainhira ema kaer Jesus, sira nafatin laran-metin ba nia ka lae? Ka sira monu ba tentasaun no husik hela Jesus? Tanba sira la matan-moris, tan neʼe sira la halo tuir sira-nia promesa no husik hela Jesus.—Mt 26:56. w24.07 p. 14 par. 1-2

Adão no Eva lakon buat folin-boot, neʼe mak sira-nia relasaun ho Aman Jeová. Foufoun, Adão no Eva mak parte ba Jeová nia família. (Lc 3:38) Maibé bainhira sira kontra Jeová, sira la sai tan parte ba ninia família. No neʼe akontese antes sira iha oan. (Gén 3:​23, 24; 4:1) Nuʼudar Adão no Eva nia bei-oan, ita presiza hadame malu ho Jeová. (Rom 5:​10, 11) Neʼe katak ita presiza haburas relasaun diʼak ho nia. Tuir referénsia ida, liafuan Gregu iha versíkulu neʼe neʼebé tradús nuʼudar “hadame malu” bele mós signifika atu “halo inimigu sai belun”. Ita agradese tebes tanba Jeová foti inisiativu atu halo ida-neʼe akontese. Oinsá? Jeová halo ona arranju atu hamoos sala hodi nuneʼe ema sala-naʼin bele iha relasaun diʼak ho nia. Arranju neʼe mak envolve atu troka fali buat ida ho folin neʼebé hanesan husi buat neʼebé lakon ona. Hodi halo nuneʼe mak buat neʼebé estraga ka lakon ona bele hetan fali ka troka foun. w25.02 p. 3-4 par. 7-8

Apóstolu Paulo hatete: “Kastigu neʼebé imi barak fó ba mane neʼe mak natoon ona ba nia.” (2 Kor 2:​5-8) Neʼe katak dixiplina neʼe kumpre ona ninia objetivu ba mane neʼebé uluk halo sala seksuál ho ninia aman nia feen. (1 Kor 5:1) Objetivu saida? Atu halo mane neʼe arrepende an. (Ebr 12:11) Paulo haruka kongregasaun atu “fó perdua ba nia ho laran-diʼak”, no ‘hatudu sai sira-nia domin ba nia’. Nota katak Paulo la haruka deʼit kongregasaun simu fali mane neʼe, maibé nia mós hakarak sira atu hatudu katak sira perdua duni no hadomi mane neʼe liuhusi sira-nia hahalok no liafuan. Kongregasaun presiza hatudu ho klaru katak sira kontente atu simu fali mane neʼe. w24.08 p. 15 par. 4; p. 16-17 par. 6-8

Apóstolu Paulo bele koʼalia ho fiar metin kona-ba saida mak ema Kristaun presiza halo atu bele tahan. Nia fó-hanoin sira katak bainhira hasoru susar, sira presiza sadere ba Jeová laʼós ba sira-nia an rasik. Tan neʼe Paulo koʼalia ho aten-brani: “Jeová mak haʼu-nia ajuda-naʼin.” (Ebr 13:6) Ita-nia irmaun-irmán balu tahan daudaun susar. Ita bele apoia hodi halo orasaun ba sira, no ita mós bele ajuda sira hodi fó buat ruma neʼebé sira presiza. Maibé, Bíblia hatete: “Ema hotu neʼebé hakarak atu moris ho laran-metin ba Maromak nuʼudar Kristu Jesus nia dixípulu sei hetan mós terus.” (2 Tim 3:12) Tan neʼe, ita hotu presiza prepara an ba buat neʼebé lakleur tan sei akontese. Mai ita kontinua tau fiar tomak ba Jeová no iha konfiansa katak nia sei ajuda ita tahan susar naran deʼit neʼebé ita hasoru. No iha tempu neʼebé loos, nia sei fó kmaan no salva ninia atan hotu neʼebé laran-metin.—2 Tes 1:​7, 8. w24.09 p. 12-13 par. 17-18

Saida mak ajuda ema Korinto atu hetan batizmu? (2 Kor 10:​4, 5) Maromak nia Liafuan no espíritu santu mak ajuda sira atu halo mudansa boot iha sira-nia moris. (Ebr 4:12) Ema Korinto neʼebé simu liafuan diʼak kona-ba Kristu konsege husik sira-nia toman aat hanesan hemu lanu, naʼok, no omoseksuál. (1 Kor 6:​9-11) Maski ema Korinto balu iha toman neʼebé aat no presiza halo mudansa boot, maibé sira la hanoin katak mudansa sira-neʼe mak susar demais. Sira hakaʼas an tebes atu laʼo tuir dalan kloot neʼebé lori ba moris rohan-laek. (Mt 7:​13, 14) Ita hakaʼas an hela halakon toman neʼebé la diʼak atu bele hetan batizmu? Keta rende an! Husu Jeová nia espíritu santu atu ajuda Ita manán hasoru Ita-nia hakarak neʼebé sala. w25.03 p. 6 par. 15-17

Jeová promete katak nia sei fó ita matenek atu tetu didiʼak hodi bele foti desizaun neʼebé halo nia kontente. Nia fó matenek hanesan neʼe ba “ema hotu ho laran-luak no la hamoe sira”. Bainhira Ita halo tiha orasaun ba Jeová hodi husu matadalan, tau atensaun didiʼak ba ninia resposta. Porezemplu, kuandu Ita halo viajen no lakon dalan, Ita husu ajuda ba ema neʼebé hela iha área neʼe. Maibé kuandu husu tiha, Ita sei bá deʼit antes hetan resposta ka lae? Klaru katak lae. Ita sei rona didiʼak ba ninia esplikasaun. Hanesan neʼe mós, depois husu tiha Jeová nia ajuda, Ita presiza buka-hatene ninia resposta liuhusi Bíblia nia mandamentu no prinsípiu sira neʼebé kona Ita-nia situasaun. Porezemplu, bainhira Ita atu deside sei tuir festa ka lae, hanoin didiʼak eskritura sira neʼebé temi kona-ba festa arbiru, ransu neʼebé aat, no kona-ba tau uluk Maromak nia Ukun duké Ita rasik nia hakarak.—Mt 6:33; Rom 13:13; 1 Kor 15:33. w25.01 p. 16 par. 6-7

Isaias nia profesia hatudu katak iha diferensa boot entre ema nia situasaun kuandu tama ba paraízu espirituál no la tama ba paraízu espirituál. Jeová hatudu laran-luak hodi tau matan ba ninia atan sira-nia presiza espirituál. Ita iha ninia Liafuan, simu ninia espíritu santu, no ai-han espirituál barak atu bele “han, . . . hemu, . . . [no] haksolok”. (Kompara ho Apokalipse 22:17.) Maibé ema neʼebé la tama ba paraízu espirituál, sira-nia situasaun mak “hamlaha . . . , hamrook . . . , [no] moe”. Sira la iha relasaun diʼak ho Maromak. (Amós 8:11) Jeová fó ho laran-luak buat neʼebé Ninia povu presiza, inklui ai-han espirituál. (Joel 2:​21-24) Porezemplu, nia fó ba ita Bíblia, publikasaun sira, ita-nia website, no mós reuniaun, asembleia, no reuniaun boot sira. Ita bele hetan benefísiu husi ai-han espirituál neʼe loroloron, no rezultadu mak ita sente bosu iha dalan espirituál no sente kmaan. w24.04 p. 21 par. 5-6

Se Ita hakarak hahú namora ho ema ida, Ita bele halo arranju atu koʼalia ho ema neʼe iha fatin públiku ka liuhusi telefone. Fó sai ho klaru kona-ba Ita-nia hakarak. (1 Kor 14:9) Se presiza, fó tempu ba nia atu hanoin kona-ba oinsá mak nia sei hatán. (Prov 15:28) No se ema neʼe lakohi namora ho Ita, hatudu respeitu ba ninia desizaun. Oinsá se ema ruma husu atu namora ho Ita? Karik nia presiza aten-brani atu husu Ita. Tan neʼe, hatudu laran-diʼak no respeitu. (Kol 4:6) Se Ita presiza tempu atu foti desizaun, fó-hatene ida-neʼe ba nia. Maski nuneʼe, koko la demora atu fó resposta ba nia. (Prov 13:12) Se Ita lakohi namora ho nia, fó sai ba nia ho laran-diʼak no klaru. Se Ita interese ho ema neʼe, fó-hatene ba nia no koʼalia hamutuk kona-ba oinsá imi hakarak halaʼo imi-nia tempu namora. Karik buat neʼebé imi hakarak mak la hanesan. w24.05 p. 23-24 par. 12-13

Bainhira David sei joven, nia bá vizita tropa Izraél nia hela-fatin. Nia haree katak tropa sira taʼuk tebes tanba jigante ida husi Filístia naran Golias “sadik tropa Izraél”. (1 Sam 17:​10, 11) Tropa sira taʼuk tanba sira fokus liu ba Golias nia isin-boot no ninia liafuan sadik. (1 Sam 17:​24, 25) Maibé David tau fokus ba buat seluk. David hatene katak bainhira Golias sadik tropa Izraél, loloos nia sadik “Maromak moris nia tropa sira”. (1 Sam 17:26) David hanoin liu kona-ba Jeová. David fiar katak Maromak neʼebé ajuda ona nia sei ajuda mós nia iha situasaun neʼe. Tanba David fiar metin katak Maromak sei ajuda nia, nia bá funu hasoru Golias, no nia manán!—1 Sam 17:​45-51. w24.06 p. 21 par. 7

Imajina toʼok ita-nia moris sei sai oinsá se ita la serbí tan Jeová. Hodi halo nuneʼe sei ajuda ita atu laran-metin nafatin. No hanesan hakerek-naʼin ba salmo, ita mós bele dehan: “Kona-ba haʼu, atu hakbesik ba Maromak mak diʼak mai haʼu.” (Sal 73:28) Ita bele tahan hasoru susar naran deʼit durante loron ikus sira-neʼe tanba ita mak “atan ba Maromak neʼebé loos no moris”. (1 Tes 1:9) Ita-nia Maromak iha duni no nia sempre ajuda ita. Nia ajuda ona ninia atan sira iha tempu uluk, no nia mós sei ajuda ita ohin loron. Lakleur tan ita sei hasoru terus boot. Maibé ita la mesak, Jeová hamutuk ho ita. Mai ita hotu “sai brani no dehan: ‘Jeová mak haʼu-nia ajuda-naʼin; haʼu sei nunka taʼuk.’”—Ebr 13:​5, 6. w24.06 p. 25 par. 17-18

Bíblia temi mane naʼin-40 liu neʼebé sai nuʼudar liurai ba nasaun Izraél. Liurai ida iha hahalok diʼak, maibé nia mós halo buat balu neʼebé aat. Hanoin toʼok kona-ba Liurai David neʼebé diʼak. Jeová hatete: “Haʼu-nia atan David . . . laʼo tuir haʼu ho ninia laran tomak, hodi halo deʼit buat neʼebé loos tuir haʼu-nia haree.” (1 Reis 14:8) Maibé, David halo sala seksuál ho feto neʼebé kaben ona no mós halo planu atu oho feto neʼe nia laʼen iha funu. (2 Sam 11:​4, 14, 15) Iha parte seluk, iha liurai barak neʼebé la laran-metin maibé sira mós halo buat balu neʼebé diʼak. Hanoin toʼok kona-ba Roboão. Tuir Jeová nia haree, nia “halo hahalok aat”. (2 Krón 12:14) Maski nuneʼe, Roboão halo tuir Jeová bainhira Jeová husu nia atu la halo funu hasoru suku 10 husi Izraél no husik sira atu hili sira-nia liurai. Nia mós hametin liután sidade barak iha ninia ukun atu bele proteje Maromak nia povu husi inimigu sira. (1 Reis 12:​21-24; 2 Krón 11:​5-12) Oinsá mak Jeová deside katak liurai ida mak laran-metin ka lae? Jeová haree ba ninia laran, oinsá nia arrepende an, no oinsá nia kaer metin ba adorasaun neʼebé loos. w24.07 p. 20 par. 1-3

Oinsá se labarik neʼebé seidauk toʼo tinan 18 no batizmu ona halo sala sériu? Grupu katuas sei arranja katuas naʼin-rua atu hasoru labarik neʼe no ninia inan-aman neʼebé Testemuña. Katuas sira sei buka-hatene hakat neʼebé inan-aman neʼe halo ona atu ajuda sira-nia oan arrepende an. Se labarik neʼe iha atitude diʼak no simu inan-aman nia ajuda, karik katuas naʼin-rua bele deside katak la presiza tan halo buat ruma ho kazu neʼe. Tuir loloos, neʼe mak inan-aman nia responsabilidade atu hanorin oan ho domin. (Deut 6:​6, 7; Prov 6:20; 22:6; Éf 6:​2-4) Katuas sira sei buka-hatene husi labarik neʼe nia inan-aman atu haree katak nia hetan ajuda tuir ninia presiza. Maibé, oinsá se labarik neʼe kontinua halo sala no la arrepende an? Se nuneʼe, katuas naʼin-tolu sei koʼalia ho labarik neʼe no ninia inan-aman. w24.08 p. 24 par. 18

Ita sente kontente duni bainhira ita simu prezente. Maski nuneʼe, ita sei sente kontente liután bainhira ita fó. Tanba ita rasik bele halo ita-nia an atu sente kontente liu. Ita bele sente ida-neʼe bainhira ita hanoin kona-ba dalan oioin neʼebé ita bele fó ba ema seluk no mós bainhira ita halo ida-neʼe. Furak tebes tanba Jeová kria ita iha dalan hanesan neʼe. (Sal 139:14) Bíblia hatete katak ema neʼebé fó ba ema seluk mak kontente, tan neʼe ita bele komprende tanbasá Jeová mak “Maromak neʼebé kontente”. (1 Tim 1:11) Nia mak ida neʼebé primeiru fó ba ninia kriatura sira no la iha ida mak laran-luak hanesan nia. Apóstolu Paulo hatete katak liuhusi Jeová mak “ita hetan moris, book an no iha”. (Após 17:28) Liután neʼe, “prezente diʼak ida-idak no prezente hotu neʼebé perfeitu” mai husi Jeová. (Tgo 1:17) Karik ita hotu hakarak sente kontente liután kuandu ita fó. Ita bele halo nuneʼe hodi banati-tuir Jeová nia laran-luak.—Éf 5:1. w24.09 p. 26 par. 1-4

Atan ba kongregasaun balu sente katak sira sei nunka bele kumpre kritéria atu serbí nuʼudar katuas kongregasaun. Maibé hanoin-hetan katak Jeová no ninia organizasaun sei la espera Ita atu kumpre ida-neʼe ho perfeitu. (1 Ped 2:21) Jeová nia espíritu bele ajuda Ita atu haburas hahalok neʼebé katuas sira presiza hatudu. (Flp 2:13) Iha ka lae hahalok ruma neʼebé Ita hakarak hadiʼa? Se nuneʼe, halo orasaun ba Jeová. Halo peskiza kona-ba pontu neʼe, no husu katuas ida atu fó sujestaun kona-ba oinsá atu hadiʼa hahalok neʼe. Se nuneʼe, kontinua laʼo ba oin! Husu Jeová treinu Ita hodi bele serbí nia liután no ninia kongregasaun. (Isa 64:8) Jeová sei haraik bensaun ba Ita-nia hakaʼas an atu kumpre kritéria hodi serbí nuʼudar katuas kongregasaun. w24.11 p. 24-25 par. 17-18

Ita labele hanoin katak ita merese simu Jeová nia laran-sadiʼa tanba ita serbí Jeová tinan barak ona. Klaru katak Jeová hafolin no hanoin-hetan buat hotu neʼebé ita halo ba nia. Maibé nia fó ita Jesus nia sakrifísiu nuʼudar prezente, laʼós atu selu ita-nia kolen. Se ita hanoin katak ita merese hetan Jeová nia perdua tanba buat barak neʼebé ita halo ona ba nia, neʼe hanesan ita dehan katak Kristu mate saugati deʼit. (Kompara ho Galásia 2:21.) Apóstolu Paulo hatene katak nia la merese hetan Maromak nia laran-sadiʼa. Entaun tanbasá nia hakaʼas an atu serbí Jeová? Nia halo nuneʼe atu hatudu agradese ba Jeová nia laran-diʼak neʼebé boot. (Éf 3:7) Hanesan Paulo, ita mós kontinua serbí Jeová ho laran-manas, laʼós atu hetan perdua, maibé atu hatudu agradese ba nia. w25.01 p. 27 par. 5-6