Yuni

Wi e kisi blesi nownow kba fu di Krestes gi en libi leki srakti-ofrandi gi wi. Fu eksempre, fu di a lusu-paiman pai, meki Yehovah e gi wi pardon fu den sondu fu wi. A no de ferplekti fu gi wi pardon. Ma a wani du dati (Ps. 103:3, 10-13). Sonwan fu wi kande feni taki wi no e ferdini en taki Yehovah e gi wi pardon. Fu taki en leti, nowan fu wi e ferdini dati. Na apostel Paulus ben e ferstan taki ’a no ben warti fu den kari en wan apostel’. Ma tòg a taki: „Na fu di Gado sori mi bun-ati, meki mi de a sma di mi de nownow” (1 Kor. 15:9, 10). Te wi e sori berow gi den sondu fu wi, dan Yehovah e gi wi pardon. Fu san ede? A no fu di wi e ferdini dati, ma fu di a lobi wi. Efu yu e firi leki yu no warti noti, dan hori na prakseri taki Yehovah no ben sorgu gi a lusu-paiman fu ferlusu sma di de sondro sondu, ma a du dati fu ferlusu sondusma di abi berow fu den sondu fu den.​—Luk. 5:32; 1 Tim. 1:15. w25.01 26-27 ¶3-4

Wi no man tapu trawan fu taki noso fu du sani di e hati wi. Ma wi kan hori wisrefi fu no pai ogri fu ogri. Èn nofo tron a moro bun fu gi sma pardon. Fu san ede? Fu di wi lobi Yehovah èn fu di a wani taki wi de klarklari fu gi trawan pardon. Efu wi e tan atibron èn efu wi e weigri fu gi trawan pardon, dan wi musu luku bun taki wi no e du wan don sani èn taki wi no e kon siki srefi (Odo 14:17, 29, 30). Te wi no e tan nanga atibron, dan wi ati no o kon bita. Boiti dati, wi e du wisrefi wan bun fu di wi no e tan prakseri a sani di sma du nanga wi. San kan yepi yu fu no tan nanga atibron te wan sma du wan hati sani nanga yu? Wan sani di kan yepi wi na te wi e ferstan taki a e teki ten fosi wi man gi wan sma pardon nanga wi heri ati. Te wan sma di kisi seryusu mankeri kisi datrayepi, dan a e teki ten fosi a kon betre baka. Na so a de tu taki a kan teki ten fosi wi man gi wan sma pardon nanga wi heri ati (Preik. 3:3; 1 Petr. 1:22). Begi Yehovah meki a yepi yu fu gi sma pardon nanga yu heri ati. w25.02 16-17 ¶8-11

Son wan fu den fosi sani di wi ben leri abi fu du nanga berow, bribi, dopu, nanga na opobaka (Hebr. 6:1, 2). Disi na wan tu fu den fosi leri fu Bijbel di ala tru Kresten e bribi. Na fu den sani disi na apostel Petrus ben taki nanga a bigi grupu sma na a Pinksterfesa (Tori 2:32-35, 38). Wi musu bribi den prenspari Bijbel leri disi fu man tron disipel fu Krestes. Fu eksempre, na apostel Paulus ben sori taki efu wi no e bribi na ini na opobaka, dan wi no kan taki dati wi na bakaman fu Krestes (1 Kor. 15:12-14). Ma fu man tron lepi Kresten wi no musu sabi den prenspari tori disi nomo, ma wi musu wani sabi moro. Tra fasi leki den fosi tori di wi ben leri fu Bijbel, dan den dipi sani di wi leri fu Bijbel no e taki soso fu den wet fu Yehovah, ma sosrefi fu den gronprakseri fu en. Den sani disi o yepi wi fu man sabi fa Yehovah e prakseri fu sani. Fu man kisi wini fu den sani disi, dan wi musu studeri Bijbel, wi musu prakseri dipi fu en, èn wi musu du ala muiti fu du san wi leri fu Gado Wortu. Te wi e du dati, dan wi e leri fa wi kan teki besroiti di o plisi Yehovah. w24.04 5 ¶12-13

Yehovah ben memre Yona taki den Ninefeisma no ben „sabi srefi san na den reti-anu èn san na den kruktu-anu” (Yona 1:1, 2; 3:10; 4:9-11). Bakaten, Yesus gebroiki na eksempre disi fu leri sma fu a retidu nanga a sar’ati fu Yehovah. Ma san a wani taki dati den Ninefei o „opo baka na a Krutudei”? Yesus ben taki dati na ini a ten di o kon sma o „opo baka fu kisi krutu” (Yoh. 5:29). A ben e taki fu a Dusun Yari Tiri fu en te ’den sma di du san reti èn den sma di no du san reti’ o kisi wan opobaka (Tori 24:15). Den sma di no du san reti o „opo baka fu kisi krutu”. Dati wani taki dati baka te den sma disi kisi wan opobaka, dan Yehovah nanga Yesus o luku efu den e gi yesi èn efu den e du san den e leri. Efu wan Ninefeisma di kisi wan opobaka e weigri fu anbegi Yehovah, dan Yehovah no o meki a tan na libi (Yes. 65:20). Ma ala den sma di e besroiti fu anbegi Yehovah na wan getrow fasi, o kisi na okasi fu libi fu têgo!​—Dan. 12:2. w24.05 5 ¶13-14

Yesus ben abi sar’ati neleki en P’pa (Yoh. 14:9). A fasi fa Yesus ben e taki nanga sma èn a fasi fa a ben e libi nanga den e leri wi taki Yehovah abi sar’ati, taki a lobi libisma, èn taki a wani yepi ibriwan fu wi fu kakafutu gi sondu. Yesus yepi sondu sma fu kon abi na angri fu kenki den fasi fu den èn fu tron bakaman fu en (Luk. 5:27, 28).Yesus ben sabi taki a ben o gi en libi leki wan srakti-ofrandi. Moro leki wán leisi a taigi den bakaman fu en taki sma ben o tori en èn taki den ben o anga en na wan pina-postu (Mat. 17:22; 20:18, 19). A ben sabi taki a srakti-ofrandi fu en ben o puru ala sondu fu grontapu. Yesus ben taki tu taki baka te a dede, a ben o „hari ala sortu sma” kon na en (Yoh. 12:32). Yehovah ben o feni den sma bun di ben o bribi na ini Yesus èn di ben o gi yesi na den komando fu en. Te den ben o du dati, dan te fu kba den ben o „kon fri fu sondu” (Rom. 6:14, 18, 22; Yoh. 8:32). Na fu a sani disi ede meki Yesus no ben frede fu dede na wan ogr’ati fasi so taki wi ben kan kisi ferlusu.​—Yoh. 10:17, 18. w24.08 5 ¶11-12

Prakseri baka fa yu ben e firi di yu kon sabi den tru tori fu Gado Wortu fu a fosi leisi. Yu kon sabi taki yu P’pa na hemel lobi yu, taki a wani taki yu tron wan fu den anbegiman fu en. Yu kon sabi tu taki a pramisi fu tyari wan kba kon na sari nanga pina, taki yu kan abi a howpu fu si den lobiwan fu yu baka na ini a nyun grontapu, èn furu tra sani sosrefi (Mark. 10:29, 30; Yoh. 5:28, 29; Rom. 8:38, 39; Openb. 21:3, 4). Den tru tori dati naki yu ati trutru (Luk. 24:32). Yu ben lobi san yu ben e leri èn yu ben wani ferteri ala sma den sani dati (Luku Yeremia 20:9). Te wi lobi den sani di wi e leri fu Bijbel, dan wi wani ferteri ala sma den sani dati (Luk. 6:45). Wi e firi leki den disipel fu Yesus na ini a fosi yarihondro di ben taki: „Wi no man tapu fu taki fu den sani di wi si èn di wi yere” (Tori 4:20). Wi lobi den tru tori fu Bijbel so te taki wi wani ferteri so furu sma leki wi man den sani dati. w24.05 15 ¶5; 16 ¶7

Leki a pipel fu Yehovah, wi e preiki gi trawan fu di wi lobi wi hemel Papa èn wi wani yepi sma fu tron wan mati fu en. Ma trawan no e prisiri na ini a preikiwroko. Fu san ede? Son preikiman e syensyen èn den feni taki den a no bun leriman. Trawan feni en muilek fu go na sma oso sondro taki den kisi wan kari. Tra preikiman e frede taki sma o atibron na den tapu èn son preikiman feni taki sma o meki trobi nanga den. A no makelek gi den brada nanga sisa disi fu taki fu a bun nyunsu nanga wan sma. A muilek gi yu son leisi fu du a preikiwroko nanga prisiri? Efu na so yu e firi, dan grantangi no firi brokosaka. A fasi fa yu e firi e sori taki yu abi sakafasi èn taki yu no wan taki trawan poti tumsi furu prakseri na yu. A e sori tu taki yu no wani hari taki nanga sma. Èn nowan sma wani taki sma e atibron nanga en, spesrutu te na wan bun sani a wani du gi den. Yu hemel Papa sabi heri bun fa yu e firi èn a wani gi yu a yepi di yu abi fanowdu.​—Yes. 41:13. w24.04 14 ¶1-2

Te yu e leisi Bijbel, na presi taki yu e pruberi fu fiti ala sani di yu leisi wantewante, a moro bun fu poti wan tu marki di yu man doro. Kande yu kan pruberi fu du disi: Meki wan lijst fu den kenki di yu musu tyari kon, èn baka dati pruberi fu wroko na wán noso tu fu den sani dati fosi. Baka dati yu kan wroko na den tra sani. Pe yu kan bigin? Kande yu e besroiti fu bigin wroko na wan sani di o makelek gi yu fu kenki. Noso kande yu e besroiti fu bigin wroko na wan sani di yu feni taki a prenspari moro den tra sani. Te yu sabi na san yu wani wroko, dan ondrosuku sani moro fini na ini den buku fu wi. Begi Yehovah fu yepi yu fu doro a marki di yu poti èn aksi en fu gi yu „a firi nanga a krakti fu du sani di e plisi en” (Fil. 2:13). Baka dati, pruberi fu du san yu leri. Te yu e si taki yu e doro a marki di yu ben poti fosi, dan yu o abi moro dek’ati fu wroko na wan trawan. Fu taki en leti, te yu e si taki yu ben man tyari kenki kon noso taki yu ben man sori wan Kresten fasi moro bun, dan kande yu o feni en moro makelek fu tyari tra kenki kon. w24.09 6 ¶13-14

Kande yu e firi brokosaka fu di yu ben du hati sani nanga trawan. San kan yepi yu? Du san yu man fu seti sani kon bun baka. No fergiti fu aksi pardon gi a sani di yu du. Efu yu du hati sani nanga sma, dan aksi Yehovah fu trowstu den sma disi. A kan yepi yu nanga den sma dati fu tan dini en èn fu kon abi wan korostu firi. De klarklari fu leri fu den fowtu fu yu, èn meki Yehovah gebroiki yu na iniwan fasi fa a feni bun. Luku na eksempre fu a profeiti Yona. Na presi taki a go na Ninefei soleki fa Yehovah ben taigi en, a lowe go na a westsei fu Tarsis. Yehovah pir’ai gi Yona èn Yona leri fu a fowtu fu en (Yona 1:1-4, 15-17; 2:7-10). Ma Yehovah no tapu fu gebroiki Yona leki en profeiti. Gado taigi en ete wan leisi fu go na Ninefei, èn disi leisi Yona no draidrai fu gi yesi. Yona ben e sari taki a ben trangayesi Yehovah, ma disi no tapu en fu du san Yehovah ben aksi fu en.​—Yona 3:1-3. w24.10 8-9 ¶10-11

Boiti taki wi no abi fu pai Yehovah gi den sondu fu wi moro, a e figi den sondu fu wi puru tu. Prakseri taki wan sma e hari wan strepi na ini a bedrag di yu musu pai. Tòg ala sma man si a bedrag ete di skrifi. Ma dati no de so te sma ben o figi a bedrag puru. Fu man ferstan na agersitori disi, dan wi musu hori na prakseri taki na ini owruten sma ben man figi enki puru makelek. Wan sma ben kan gebroiki wan nati sponsu fu figi puru san ben skrifi. Sobun, te sma ben figi wan paiman puru, dan a paiman dati no ben de fu si srefsrefi moro. Nowan sma ben man si moro san ben skrifi drape fosi. A ben de neleki a sma noiti no ben abi a paiman dati. Wi breiti so te fu sabi taki te Yehovah e gi wi pardon fu den sondu fu wi, dan a de neleki noiti wi ben du den sondu dati.​—Ps. 51:9. w25.02 10 ¶11

Te trawan e krutu wi, noso te den no e libi bun nanga wi, dan wi kan abi a fertrow taki Yehovah sabi san psa. Wi sabi taki Yehovah o seti sani kon bun baka, èn a sani dati e yepi wi fu no atibron te sma no e libi bun nanga wi. Te wi e fertrow tapu Yehovah èn te wi e wakti na en tapu fu lusu ala problema, dan wi no o tan nanga atibron èn wi no o kisi bit’ati. Te wi e tan nanga atibron, dan dati kan meki taki wi du wan sani di no bun, wi kan lasi prisiri, èn a matifasi di wi abi nanga Yehovah kan pori. A no de fu taki wi no o man du ala sani soifri soleki fa Yesus ben du dati. Son leisi wi kan taki noso du wan sani di kan hati wi bakaten (Yak. 3:2). Èn son leisi den sani di sma du nanga wi kan abi krakti na wi tapu wi heri libi langa. Efu na so a de nanga yu, dan yu kan de seiker taki Yehovah sabi san e miti yu. Èn Yesus sabi fa yu e firi fu di sma ben du ogri nanga en tu (Hebr. 4:15, 16). Wi breiti taki Yehovah e gi wi bun rai tu di kan yepi wi te sma no e libi bun nanga wi. w24.11 6 ¶12-13

Den ben musu bribi na ini Yesus efu den ben wani kisi „têgo libi” (Yoh. 3:16-18, 36; 17:3). Furu fu den Dyu dati no ben feni taki den ben musu bribi na ini Yesus. Den aksi en: „Dan sortu marki yu o sori wi, so taki wi kan si dati èn bribi yu?” (Yoh. 6:30) Den taki dati na ini a ten fu Moses, den afo fu den ben kisi mana di ben de den aladei n’nyan (Neh. 9:15; Ps. 78:24, 25). A de krin taki den ben e prakseri soso fu kisi brede di den ben kan nyan. Baka dati, Yesus taki fu „a trutru brede fu hemel” di ben de leki a mana di ben kmoto fu hemel en di ben kan gi den têgo libi. Ma den no aksi en srefi san a ben wani taki nanga dati (Yoh. 6:32). Fu di den ben e prakseri soso n’nyan, meki den no ben arki san Yesus ben e pruberi fu taigi den fu a têgo libi. w24.12 5-6 ¶10-11

A kan taki na skoro, a pkin fu yu e leri fu tra wet di Gado meki gi grontapu. Fu eksempre, a wet fu a zwaartekracht e sorgu taki na atmosfeer e tan krosbei fu grontapu, a e sorgu taki falawatra nanga frudu e kon, taki a watra fu den liba nanga kriki e tan lon go na den se, èn taki sani e tan waka na so wan fasi taki libi man de na grontapu. Ma suma meki a wet di e hori ala sani na wán? Suma e sorgu taki den sani na ini a natuur seti na so wan orga fasi? O moro yu pkin e denki fu den sani disi, o moro a o bribi taki na Gado meki ala sani. Te fu kba, yu kan aksi en a sani disi: „Efu Gado meki libisma, dan yu no denki taki a gi wi rai di e sori wi fa wi kan de koloku?” Baka dati, yu kan sori yu pkin taki den prenspari rai dati de fu feni na ini Bijbel. w24.12 16 ¶8

Nanga yepi fu santa yeye, na apostel Paulus skrifi wan brifi gi a gemeente fu sori den taki den musu puru wan brada fu a gemeente, fu di a no ben sori berow (1 Kor. 5:13). Fa den sma na ini a gemeente ben musu libi nanga a sma dati? Paulus taigi den taki den „no musu bumui nanga” en. San dati ben wani taki? Paulus tyari kon na krin taki den no ben musu „nyan srefi nanga so wan sma” (1 Kor. 5:11). Te yu e sdon nyan nanga wan sma, dan nofo tron unu e taki switi tori nanga makandra. Dati meki wi kan ferstan taki Paulus ben wani taigi a gemeente fu no abi prisiriten nanga a man dati. Na so a takru eksempre fu a man dati no ben o pori a gemeente (1 Kor. 5:5-7). Boiti dati, disi ben o yepi a man fu kon ferstan taki a sani di a ben du ben hati Yehovah trutru èn kande a ben o firi syen èn sori berow. w24.08 15 ¶4-5

Ibri yari den Israelsma ben musu hori wan fesa tapu wan spesrutu dei. Dati ben de a dei di sma ben e tyari ofrandi fu tapu den sondu fu den. Na a dei dati, a granpriester ben e tyari meti ofrandi fu aksi pardon gi a pipel. A no de fu taki dati den meti ofrandi no ben o man tapu den sondu fu den Israelsma dorodoro, fu di meti lagi moro libisma. Ma solanga den Israelsma ben abi berow èn den ben e tyari den ofrandi di Gado ben feni bun, dan a ben de klarklari fu gi den pardon fu den sondu fu den (Hebr. 10:1-4). Den ofrandi di den Israelsma ben e tyari na a spesrutu dei dati, ben e yepi den fu kon ferstan taki den ben de sondusma èn taki moro ben de fanowdu fu tapu den sondu fu den. Ma Yehovah seti sani taki libisma ben man kisi pardon fu den sondu fu den A seti sani so taki en lobi Manpkin ben o ’gi ensrefi leki wan ofrandi wán leisi nomo, fu tyari den sondu fu wan heri ipi sma’ (Hebr. 9:28). Yesus „gi en libi leki wan lusu-paiman fu ferlusu furu sma”.​—Mat. 20:28. w25.02 4 ¶9-10

„A tru taki na ati wani, ma a skin swaki” (Mat. 26:41b). Yesus ben taki a sani disi fu di a ben e ferstan taki wi abi sondu. Ma a ben taki a sani disi tu fu gi wi a warskow disi: No denki taki ala ten yu o tranga nofo fu du san bun. Wan tu yuru fosi Yesus ben taki den wortu dati, den disipel fu en ben pramisi en taki den no ben o gwe libi en noiti (Mat. 26:35). Den ben wani du san bun. Ma den no ben sabi taki te den ben o kisi tesi, dan kande a no ben o makelek gi den fu du san bun. Dati meki Yesus warskow den nanga den wortu di skrifi na ini a tekst fu tide. A sari taki den disipel no tan na ai. Di den srudati grabu Yesus, dan den disipel tan na en sei noso den gwe libi en? Fu di den no ben tan na ai, meki den du precies san den ben taki dati den no ben o du. Den gwe libi Yesus.​—Mat. 26:56. w24.07 14 ¶1-2

Di Adam nanga Eva sondu, dan den no ben man libi fu têgo moro. Ma den tron feanti tu fu den P’pa, Yehovah. Fosi den ben sondu, den ben de na ini a famiri fu Gado (Luk. 3:38). Ma di den trangayesi Yehovah, a no ben wani den moro na ini a famiri fu en. A sani disi psa fosi den ben meki pkin (Gen. 3:23, 24; 4:1). Nowan fu den pkin fu den ben o man de na ini Yehovah en famiri. Wi no ben o abi a grani dati tu. Dati meki wi ben abi yepi fanowdu fu man tron mati fu en (Rom. 5:10, 11). Wi no ben musu de feanti fu Gado moro, ma wi ben musu tron en mati. A moi fu si taki na Yehovah fosi du wan sani fu sorgu taki wi kan tron mati fu en. Fa so? Yehovah seti sani so taki sondu libisma man tron mati baka fu en. A sorgu gi wan sani di abi a srefi waarde leki den sani di Adam lasi, so taki wi kan kisi den sani dati baka. w25.02 3-4 ¶7-8

Na apostel Paulus ben taki dati ’a piri-ai di furu fu den ben gi a sma dati, ben nofo gi en’ (2 Kor. 2:5-8). Disi wani taki dati baka di den puru a man fu a gemeente, a kon si taki a ben musu sori berow. A man disi ben e du hurudu nanga a wefi fu en p’pa (1 Kor. 5:1). Fu di a ben sori berow, meki a no ben de fanowdu fu gi en pir’ai moro langa (Hebr. 12:11). Fu di a man ben sori berow, meki Paulus taigi den owruman fu teki a man baka na ini a gemeente. A taigi den tu fu ’gi en pardon nanga den heri ati èn fu trowstu en’. Den ben musu ’sori en tu taki den lobi en’. Paulus taigi a gemeente fu sori a man taki den ben gi en pardon trutru èn taki den lobi en. Den sani di den ben e taki èn du ben o sori dati. Na so a brada ben o firi taki den ben breiti taki a drai kon baka. w24.08 15 ¶4; 16-17 ¶6-8

Na apostel Paulus ben sabi heri bun san ben o yepi wan sma fu hordoro. A memre den Hebrew Kresten taki te den ben e kisi tesi, den no ben musu fertrow tapu densrefi, ma tapu Yehovah. Na dati ben gi Paulus a dek’ati fu taki: „Yehovah na mi yepiman. Mi no o frede” (Hebr. 13:6). Sonwan fu den brada nanga sisa fu wi e kisi ferfolgu nownow. Wi kan begi gi den fu sori taki wi lobi den èn son leisi wi kan gi den sani di den abi fanowdu. Ma Bijbel e taki krin taki „sma o frufolgu ala den wan di wani dini Gado fayafaya leki bakaman fu Krestes Yesus” (2 Tim. 3:12). Dati meki wi alamala musu sreka wisrefi gi den muilek ten di o kon. Meki wi tan fertrow tapu Yehovah nanga wi heri ati, èn wi no musu tweifri taki a o yepi wi fu psa iniwan tesi di kan miti wi. Te fu kba a o tyari ferlekti kon gi ala den getrow futuboi fu en.​—2 Tes. 1:7, 8. w24.09 13 ¶17-18

San yepi den Korentesma fu teki dopu? (2 Kor. 10:4, 5) Gado en Wortu nanga a makti santa yeye fu en yepi den fu tyari bigi kenki kon na ini den libi (Hebr. 4:12). Den sma fu Korente di ben e poti bribi na ini a bun nyunsu fu Krestes ben man tapu nanga sani di Gado no feni bun. Den tapu fu dringi sopi teleki den drungu, den tapu nanga fufuru, èn den tapu nanga a homo-libi (1 Kor. 6:9-11). A moi fu si taki aladi son sma na ini Korente ben musu tyari bigi kenki kon, tòg den no ben e denki taki a ben o muilek tumsi gi den fu tron Kresten. Den du tranga muiti fu kon na tapu a smara pasi di e tyari sma go na têgo libi (Mat. 7:13, 14). Yu e du tranga muiti fu tapu nanga wan takru gwenti noso nanga wan sani di no bun so taki yu kan teki dopu? Noiti no gi abra. Begi Yehovah fu gi yu en santa yeye fu yepi yu fu dwengi yusrefi te yu e firi fu du sani di no bun. w25.03 6 ¶15-17

Aksi Yehovah fu yepi yu fu kon ferstan fa a e denki fu wan tori. Yehovah pramisi taki a o gi wi a koni fu man si efu a besroiti di wi teki e kruderi nanga a wani fu en. A e gi ala sma a koni dati „nanga en heri ati èn sondro fu suku fowtu na den”. Te yu begi Yehovah fu sori yu san na a moro bun sani fu du, dan luku bun fa a o piki a begi fu yu. Kow taki dati yu go na wan presi ma yu lasi pasi. Kande yu aksi wan sma fu drape fu sori yu sortu pasi yu musu teki. Ma yu ben o waka gwe fosi a piki yu? Nôno, yu no ben o du dati. Yu ben o arki bun san a ben o taigi yu. Na so a de tu taki te yu aksi Yehovah fu gi yu koni, dan pruberi fu kon sabi san na a piki fu en. Yu kan kon sabi dati te yu e luku sortu Bijbel wet nanga gronprakseri abi fu du nanga a situwâsi fu yu. Kow taki dati yu musu besroiti efu yu o go na wan prisiri demakandra. A ben o bun fu luku san Bijbel e taki fu bradyari fesa èn fu takru kompe. A bun fu kon sabi tu fu san ede a prenspari fu poti Kownukondre afersi na a fosi presi na wi libi.​—Mat. 6:33; Rom. 13:13; 1 Kor. 15:33. w25.01 16 ¶6-7

A profeititori fu Yesaya e sori krin taki a libi fu den sma di e anbegi Gado de heri tra fasi leki a libi fu den sma di no e du dati. Yehovah e gi den anbegiman fu en ala san den abi fanowdu fu man tan bun mati fu en. Wi abi en santa yeye, a Wortu fu en, èn sosrefi bogobogo yeye n’nyan so taki wi kan ’nyan, dringi, èn prisiri’. (Luku Openbaring 22:17.) Ma a libi de heri tra fasi gi den wan di no e anbegi Yehovah. Bijbel e taki dati den ’de nanga angri, watra e kiri den, èn den e kisi syen’. Den sma disi no sabi Gado (Amos 8:11). Yehovah e gi a pipel fu en ala san den abi fanowdu, sosrefi rai fu Bijbel (Yoèl 2:21-24). A e du dati nanga yepi fu Bijbel, den buku fu wi, a website fu wi, den gemeente konmakandra, den kring konmakandra, nanga den kongres. Wi kan kisi wini fu den sani disi ibri dei èn na so wi o firi taki wi nyan bun èn taki wi kisi krakti baka. w24.04 21 ¶5-6

Te yu wani ferteri wan sma taki yu wani de nanga en,dan yu kan seti sani fu taki nanga a sma na wan presi pe furu sma de, noso yu kan bel en. Taigi a sma krin taki yu wani de nanga en fu kon leri sabi en moro bun (1 Kor. 14:9). Efu a sma abi ten fanowdu fu prakseri a sani disi, dan gi en a ten dati (Odo 15:28). Èn efu a sma no wani de nanga yu, dan lespeki a besroiti fu en. San yu musu du te wan sma e ferteri yu taki a wani de nanga yu? A sma teki dek’ati fu ferteri yu fa a e firi. Sobun, sori switifasi nanga lespeki gi en. Efu yu abi ten fanowdu fu prakseri efu yu wani de nanga en, dan taigi en dati. Ma pruberi fu piki en so esi leki yu man (Odo 13:12). Efu yu no wani de nanga a sma, dan taigi en dati krin èn du dati na wan switi fasi. Efu yu wani kon leri sabi a sma moro bun tu, dan taigi en dati, èn taki nanga makandra fa unu wani taki sani musu waka na ini a verkering fu unu. Den sani di yu e ferwakti kan difrenti fu san a sma e ferwakti. w24.05 23-24 ¶12-13

Kande di David ben de wan yonguman ete, dan a go na a legrekampu fu Israel. Drape a si taki den srudati ben e frede srefsrefi fu di a bigiskin Filisteaman Goliat ben wani si ’suma fu a legre fu Israel ben o prefuru fu kon feti nanga en’ (1 Sam. 17:10, 11). Den srudati fu Israel ben e frede fu di den ben e poti prakseri na a bigi skin fu Goliat èn na den sani di a ben e taigi den (1 Sam. 17:24, 25). Ma David ben e poti prakseri na wan tra sani. David ben sabi taki Goliat no ben e spotu a legre fu Israel, ma a ben e spotu „a legre fu a libilibi Gado” (1 Sam. 17:26). David ben e prakseri Yehovah. A ben abi a fertrow taki a Gado di ben yepi en di a ben de wan skapuman, ben o yepi en baka na ini a situwâsi disi. Fu di David ben de seiker taki Yehovah ben o horbaka gi en, meki a go feti nanga Goliat, èn a wini en.​—1 Sam. 17:45-51. w24.06 21 ¶7

Prakseri fa wi libi ben o de efu wi no ben e dini Yehovah. Te wi e prakseri fu san ede a bun gi wi fu dini Yehovah, dan dati o yepi wi fu tan gi yesi na Gado. Èn neleki a psalm skrifiman, wi o taki: „A bun gi mi fu kon krosbei na Gado (Ps. 73:28). Wi kan psa iniwan tesi di e miti wi na ini den lasti dei disi, fu di wi e „dini wan tru èn libilibi Gado leki srafu” (1 Tes. 1:9). A Gado fu wi e sorgu gi wi èn a o yepi wi ala ten. A sori taki a ben de nanga den futuboi fu en na ini a ten di psa èn a de nanga wi tu na ini a ten disi. Heri esi wan bigi banawtu o de na grontapu. Ma wi no o de wi w’wan fu di Yehovah o de nanga wi. Meki wi alamala abi dek’ati èn meki wi taki: „Yehovah na mi yepiman. Mi no o frede.”​—Hebr. 13:5, 6. w24.06 25 ¶17-18

Bijbel e kari den nen fu moro leki 40 man di ben e tiri leki kownu fu Israel. Den bun kownu ben du wan tu ogri. Luku san Yehovah e taki fu Kownu David di ben de wan bun kownu: ’Mi futuboi David ben hori den komando fu mi, èn a ben gi yesi na mi nanga en heri ati, fu di a du ala san mi feni bun’ (1 Kow. 14:8). Tòg a man dati ben du hurudu nanga wan uma di ben trow èn a seti sani so taki a masra fu en ben o lasi en libi na ini wan feti (2 Sam. 11:4, 14, 15). Ma Bijbel e ferteri wi tu sortu bun sani den kownu ben du di no ben tai hori na Yehovah. Luku na eksempre fu Rehabeyam. Yehovah ben e si Rehabeyam leki wan kownu di ben „du ogri” (2 Kron. 12:14). Ma tòg Rehabeyam ben du wan tu bun sani. A gi yesi di Yehovah taigi en fu no feti teige den tin lo fu Israel èn fu meki den poti wan tra sma leki kownu. Boiti dati, a ben tranga den foto na ini a kownukondre, fu kibri Gado pipel gi den feanti fu den (1 Kow. 12:21-24; 2 Kron. 11:5-12). Fa Yehovah ben e bepaal sortu kownu ben e dini en getrow? Yehovah ben e luku efu a kownu ben lobi en nanga en heri ati, efu a ben sori trutru berow, èn efu a ben e tai hori na a tru anbegi. w24.07 20 ¶1-3

Fa a de te yonguwan di dopu èn di no tapu 18 yari ete du wan seryusu sondu? A skin fu owruman o seti sani, so taki tu owruman e taki nanga a yonguwan disi makandra nanga en Kresten p’pa nanga m’ma. Den owruman o aksi a p’pa nanga m’ma san den srefi du kba fu yepi a pkin fu den fu tyari kenki kon èn fu sori berow. Efu a yonguwan e gi yesi na a rai fu en p’pa nanga a m’ma, efu a e kenki a denki fu en èn a fasi fa a e tyari ensrefi, dan den tu owruman kan besroiti fu meki a p’pa nanga a m’ma tan yepi a pkin go doro. Den owruman sabi taki Yehovah gi a p’pa nanga a m’ma a frantwortu fu pir’ai gi den pkin fu den na wan lob’ati fasi (Deut. 6:6, 7; Odo 6:20; 22:6; Ef. 6:2-4). Baka dati, den owruman o taki nanga a p’pa nanga m’ma ten na ten fu luku efu a yonguwan e kisi a yepi di a abi fanowdu. Ma san den owruman musu du efu wan yonguwan di dopu e tan du san no bun? Na ini a situwâsi dati, dan dri owruman o taki nanga en makandra nanga en Kresten p’pa nanga m’ma. w24.08 24 ¶18

Wi alamala e firi bun te wi e kisi sani fu sma. Ma wi e firi moro bun te wi e gi sma sani. Fu di Yehovah meki wi na so wan fasi, meki wi srefi kan du sani di e meki wi firi moro koloku. Wi kan de moro koloku te wi e suku okasi fu du bun gi trawan. Yu no breiti taki Yehovah meki wi na so wan fasi? (Ps. 139:14). Fu di Bijbel e taki dati den wan di lobi gi sma sani de koloku, meki a no e ferwondru wi te Bijbel e taki dati Yehovah na „a koloku Gado” (1 Tim. 1:1). Na Yehovah fosi gi trawan sani èn nowan sma man gi moro leki san Yehovah man gi. Bika na en „meki taki wi de na libi, taki wi e buweigi èn taki wi de”, soleki fa na apostel Paulus skrifi (Tori 17:28). A tru, „ibri bun presenti nanga ibri kado di bun dorodoro” e kon fu Yehovah (Yak. 1:17). A no de fu taki dati wi alamala wani gi sma sani so taki wi kan de moro koloku. Dati meki wi wani teki na eksempre fu Yehovah di lobi fu gi sma sani.​—Ef. 5:1. w24.09 26 ¶1-4

Son dinari ini a diniwroko ben kan feni taki den no o man tron owruman noiti fu di den musu wroko na so furu sani. Ma hori na prakseri taki Yehovah no e ferwakti taki yu no o meki fowtu, èn na organisâsi fu en no e ferwakti dati tu (1 Petr. 2:21). Boiti dati, a santa yeye fu Yehovah o yepi yu fu doro den marki disi (Fil. 2:13). Wan sani de di yu ben o wani du moro bun? Begi Yehovah fu a tori dati. Ondrosuku a tori dati moro fini èn aksi wan fu den owruman fa yu kan du a sani dati moro bun. Tan du muiti fu go na fesi. Aksi Yehovah fu train yu so taki a kan gebroiki yu moro bun na ini a gemeente (Yes. 64:8). Yehovah seiker o blesi a muiti di yu e meki fu man tron wan owruman. w24.11 25 ¶17-18

Nowan fu wi musu denki taki Yehovah de ferplekti fu sori sar’ati gi wi, awinsi wi e dini en furu yari langa. A no de fu taki dati Yehovah e warderi ala den sani di wi du gi en. A gi wi en Manpkin leki kado, a no gi wi en fu pai wi gi den bun sani di wi du gi en. Sobun, a ben o fowtu fu denki taki Yehovah de ferplekti fu gi wi pardon, soso fu di wi du furu sani gi en. Efu na dati wi e denki, dan eigenlijk wi e taki dati Yesus no ben abi fu dede gi wi. (Luku Galasiasma 2:21.) Na apostel Paulus ben sabi taki awinsi san a ben e du gi Yehovah, tòg Yehovah no ben de ferplekti fu sori sar’ati gi en. Dan fu san ede a wroko so tranga gi Yehovah? A du dati fu sori taki a ben de nanga tangi taki Yehovah sori swit’fasi nanga sar’ati gi en (Ef. 3:7). Neleki Paulus, wi e tan dini Yehovah fayafaya, èn wi no e du dati fu di wi wani taki Yehovah sori sar’ati gi wi, ma fu di wi wani sori taki wi de nanga tangi gi a sar’ati fu en. w25.01 27 ¶5-6