Mei

Baka di Yehovah ben puru a pipel fu en na ini katibo na Egepte, dan a poti priester fu dini na ini a tabernakel. Den Leifisma ben kisi a frantwortu fu du tra wroko na ini a tabernakel. A de so taki Yehovah ben sori moro lobi gi den Israelsma di ben e dini na ini a tabernakel, noso gi den wan di ben seti kampu krosbei fu a santa presi disi? Nôno! Yehovah no lobi a wan sma moro a trawan. Ibri Israelsma ben kan de wan bun mati fu Yehovah. Fu eksempre, Yehovah ben sorgu taki a heri pipel fu en ben man si a wolku nanga a faya di ben de na tapsei fu a tabernakel (Eks 40:38). Te a wolku ben bigin opo go na wan tra presi, dan srefi den wan di ben seti a tenti fu den bun fara fu a tabernakel, ben man si dati. Den ben man tyari den sani fu den kon na wan, den ben man broko den tenti fu den puru, èn den ben man gwe makandra nanga a heri pipel (Num. 9:15-23). Na so a de tu na ini a ten disi, taki awinsi pe fu grontapu wi e libi, tòg Yehovah lobi wi, a e sorgu gi wi, èn a e kibri wi. w24.06 4 ¶10-12

Sma ben wani du ogri nanga David. En manpkin Absalom ben de nomonomo fu kiri en fu di en srefi ben wani tron kownu (2 Sam. 15:12, 13). David ben musu gwe libi Yerusalem wantewante. Di den futuboi fu en ben e gwe, dan David besroiti taki wan sma ben musu tan na ini Yerusalem fu luku gi en san Absalom ben abi na prakseri fu du. Dati meki a seni Sadok nanga tra priester go baka na a foto fu tan drape, so taki den ben kan taigi en san ben e psa drape (2 Sam. 15:27-29). Ma den ben musu luku bun. David aksi Sadok nanga Husai, di ben de bun mati fu en, fu yepi en fu seti wan plan (2 Sam. 15:32-37). Husai ben musu du neleki a ben e horbaka gi Absalom èn a ben musu gi en rai fa fu go feti nanga David. A sani disi ben o gi David ten fu sreka ensrefi fu go feti nanga Absalom. Di Absalom arki a rai fu Husai, dan Husai taigi Sadok nanga Abiatar san ben psa (2 Sam. 17:8-16). Baka dati, den tu man disi sorgu taki David kon sabi san Absalom ben o du. A sani disi yepi fu kibri David en libi.​—2 Sam. 17:21, 22. w24.07 4-5 ¶9-10

Sonwan fu den futuboi fu Yehovah e firi brokosaka fu di den ben du sondu, awinsi na fosi den ben dopu noso baka di den dopu. Ma a bun te wi e hori na prakseri taki Yehovah lobi wi trutru èn taki a sorgu gi a lusu-paiman so taki wi kan kisi pardon fu den sondu fu wi. A no de fu taki dati a wani taki wi teki a kado disi di a gi wi. Yehovah e gi wi a dyaranti taki baka te wi „seti sani kon reti baka” nanga en, a o gi wi pardon nanga en heri ati. Wi de nanga tangi trutru taki wi lob’ati P’pa, Yehovah, no e memre den fowtu di wi ben meki. Na a srefi ten, Yehovah noiti e fergiti den bun sani di wi du (Ps. 103:9, 12; Hebr. 6:10). Efu yu e sari fu den sani di yu du na ini a ten di psa, dan poti prakseri na san yu e du now èn san yu o man du na ini a ten di e kon. Yu no man kenki san psa kba. Ma now yu kan prèise Yehovah èn yu kan meki taki a breiti nanga yu. Boiti dati, yu kan prakseri a moi tamara di a pramisi yu. w24.10 8 ¶8-9

Te yu e leisi Bijbel, dan kande yu e las’ati son leisi fu di yu e si taki yu musu wroko na so furu sani. Kow taki dati wan dei yu e leisi wan pisi na ini Bijbel di e taki dati wi no musu lobi a wan sma moro a trawan (Yak. 2:1-8). Yu e si taki yu kan wroko na a sani dati, èn dati meki yu e besroiti fu tyari wan tu kenki kon. Ma a tamara fu en, yu e leisi wan pisi di e sori taki a prenspari fu luku bun san yu e taki (Yak. 3:1-12). Yu e si taki son leisi yu e taki sani di e meki sma firi brokosaka. Sobun, yu e besroiti fu du moro muiti fu taki sani di e gi sma dek’ati. A dei baka dati, yu e leisi na ini Bijbel taki yu musu luku bun fu no tron wan mati fu grontapu (Yak. 4:4-12). Yu e si tu taki yu musu luku moro bun san yu e leisi, san yu e luku, noso san yu e arki. Ma a kan taki a dei baka dati, yu feni taki a muilek tumsi fu tyari ala den kenki disi kon. No las’ati. No fergiti taki wi musu tan du muiti „fu kisi nyun fasi”. w24.09 5-6 ¶11-12

Yesus ben sabi taki Yehovah ben e si san sma ben e du nanga en. A ben abi a fertrow taki Yehovah ben o tyari wan kba kon na ala den ogri di sma e du èn taki a ben o du dati na a yoisti ten. Wi kan de leki Yesus te wi e luku bun san wi e taki te trawan e du hati sani nanga wi. Son leisi a no de fanowdu fu taki noso fu du wan sani, fu di a sani di a sma du nanga wi no seryusu so. Noso wi kan besroiti fu no taki noti so taki a situwâsi no e kon moro ogri (Preik. 3:7; Yak. 1:19, 20). Tra leisi baka, a kan de fanowdu taki wi e opo taki gi wan sma fu di trawan no e libi bun nanga en, noso kande a de fanowdu taki wi e opo taki gi a bribi fu wi (Tori 6:1, 2). Te wi e taki, dan wi musu du dati na wan lespeki fasi èn wi musu taki rustig. Wan tra fasi fa wi kan teki na eksempre fu Yesus, na te wi e ’saka wisrefi na ondro a sma di e krutu sani na wan reti fasi’.​—1 Petr. 2:23. w24.11 5-6 ¶10-12

Efu wan sma e sori berow, dan wi breiti trutru (Luk. 15:7). Suma musu kisi a grani? Na den owruman? Memre san na apostel Paulus ben skrifi fu sma di e du seryusu sondu: „Kande Gado o meki den abi berow” (2 Tim. 2:25). Sobun, na Yehovah na a sma di e yepi wan Kresten fu kenki a denki fu en. A no libisma. Paulus e ferklari sortu bun sani e psa baka te wan sma sori berow. A sma dati o kon ferstan a waarheid moro bun, a e kisi ensrefi baka, èn a kan kmoto na ini a trapu fu Satan (2Tim. 2:26). Te wan sma sori berow, dan den brada o tan fisiti en fu yepi en fu tranga a bribi fu en, fu tan kakafutu gi den tesi fu Satan, èn fu du san reti.​—Hebr. 12:12, 13. w24.08 23 ¶14-15

Den sma di Yesus ben gi n’nyan ben e suku nomo fu furu den bere. Fa so? A dei baka dati, den si taki Yesus nanga den apostel ben gwe. Dati meki den sma teki boto di ben kmoto fu Tiberias èn den go na Kaperna-um fu go suku Yesus (Yoh. 6:22-24). Yu denki taki den ben du dati fu di den ben wani yere moro fu a Kownukondre? Nôno. A moro prenspari sani di den ben e prakseri, na fu kisi brede. Fa wi du sabi dati? Luku san psa di den sma feni Yesus krosbei fu Kaperna-um. Yesus taigi den krin taki den ben kon suku en soso fu di den ben wani n’nyan. Aladi den ’ben nyan a brede teleki den bere furu’, tòg dati ben de „n’nyan di e pori”. A taigi den fu wroko „gi n’nyan di e tan langa èn di e gi sma têgo libi” (Yoh. 6:26, 27). Yesus ben taki dati en P’pa ben o sorgu gi a n’nyan dati. w24.12 5 ¶8-9

Efu yu wani tron wan moro bun leriman, dan sorgu taki den rai di yu e gi den brada nanga sisa, ala ten e kruderi nanga Bijbel. Fu man du disi, yu musu studeri Bijbel nanga den buku fu wi bun (Odo 15:28). Te yu e studeri, dan luku bun fa den buku fu wi e ferklari den Bijbel vers, so taki yu kan fiti den na a yoisti fasi. Èn te yu e gi sma leri, dan du tranga muiti fu doro na ati fu den sma di e arki yu. Yu kan tron wan moro bun preikiman te yu e aksi owruman di abi ondrofeni fu gi yu rai (1 Tim. 5:17). Owruman musu man gi den Kresten brada nanga sisa dek’ati. Ma son leisi, a de fanowdu taki owruman gi den rai noso taki den piri-ai srefi gi den. Awinsi san na a situwâsi, den owruman musu sori swit’fasi ala ten. Efu yu abi swit’fasi nanga lobi gi trawan, èn efu yu e hori yusrefi na Gado Wortu te yu e gi leri, dan yu o de wan bun leriman fu di yu e teki na eksempre fu a Bigi Leriman, Yesus.​—Mat. 11:28-30; 2 Tim. 2:24. w24.11 24 ¶16

Wi kan gi Yehovah grani nanga den sani di wi e taki fu en. Den vers disi e taigi wi fu „singi gi Yehovah”, fu „prèise en nen”, fu „ferteri [trawan] a bun nyunsu taki a e ferlusu sma”, èn fu „fruteri den pipel fu grontapu fu a glori fu en” (Ps. 96:1-3). Ala den sani disi na fasi fa wi kan gi grani na wi P’pa na hemel (Tori 4:29). Fa wi kan du a srefi leki den? Wi kan gi Yehovah grani nanga den sani di wi abi. Ala ten tru anbegiman gi Yehovah grani na a fasi dati (Odo 3:9). Den Israelsma ben e gi moni nanga gudu fu yepi bow a tempel èn fu sorgu gi en (2 Kow. 12:4, 5; 1 Kron. 29:3-9). Sonwan fu den disipel fu Yesus ben e „gebroiki den sani fu den” fu horbaka gi Yesus nanga den apostel (Luk. 8:1-3). Èn Bijbel e taki dati te son Kresten ben e pina fu di wan angriten ben de, dan den brada nanga sisa di ben e libi na tra presi ben e seni moni gi den (Tori 11:27-29). Wi srefi na ini a ten disi kan gi Yehovah grani nanga yepi fu den bijdrage fu wi. w25.01 4 ¶8; 5 ¶11

San yepi Kornelius fu teki dopu? Bijbel e taki dati „en nanga ala den sma na ini en oso ben e anbegi Gado”. Boiti dati, Kornelius ben gwenti begi Gado (Tori 10:2). Di Petrus meki Kornelius kon sabi a bun nyunsu, dan en nanga en famiri poti bribi na ini Krestes èn den teki dopu wantewante (Tori 10:47, 48). A no de fu taki, dati Kornelius ben de klarklari fu tyari iniwan kenki kon di ben de fanowdu fu man anbegi Yehovah makandra nanga en famiri (Yos. 24:15; Tori 10:24, 33). Kornelius ben kan feni taki a no ben o man tron wan Kresten fu di a ben de wan prenspari sma. Ma a no gi pasi taki dati psa. Yu o abi fu tyari bigi kenki kon na ini yu libi fu man teki dopu? Efu dati de so, dan Yehovah o de yu Yepiman. A o blesi yu efu yu e du ala san yu man fu fiti Bijbel gronprakseri na ini yu libi so taki yu kan tron wan anbegiman fu en. w25.03 5 ¶12-13

Efu yu e yere taki trawan e ferteri lei fu na organisâsi noso fu den brada di e teki fesi, dan hori na prakseri san den feanti fu Gado ben du nanga Yesus èn nanga den disipel fu en. Yesus ben taki dati sma ben o ferfolgu a pipel fu Yehovah èn taki sma ben o ferteri lei fu den. Èn na dati e psa tu na ini a ten disi (Mat. 5:11, 12). Te wi e tan hori na prakseri taki den lei disi e komoto fu Satan, dan wi no o bribi den. Boiti dati, wi o man du wan sani wantewante fu sorgu taki den lei disi no abi krakti na wi tapu. Ma san wi kan du fu kibri wisrefi gi den lei fu Satan? No arki den lei di trawan e ferteri. Na apostel Paulus ben taki krin san wi musu du te trawan e ferteri lei fu na organisâsi. A ben taigi Timoteyus fu „warskow son sma taki den no musu . . . arki leitori” (1 Tim. 1:3, 4). Wi e weigri fu bribi den lei di sma e ferteri fu na organisâsi fu Yehovah, fu di wi sabi pe den lei disi e kmoto. Na presi fu dati, wi e bribi den „soifri leri” fu Bijbel.​—2 Tim. 1:13. w24.04 11 ¶16; 13 ¶17

Tan na ini wánfasi nanga den wan di e tai hori na Yehovah. Gado wani taki wi e anbegi en na ini wánfasi. Wi o tan de wán so langa wi e tan hori wisefi na san tru. Iniwan sma di e ferteri sani di no e kruderi nanga a waarheid e tyari prati kon na ini a gemeente, èn dati meki Gado e warskow wi fu „no bumui nanga den”. Efu wi e bemui nanga den sma disi, dan wi srefi kan bigin bribi sani di no tru èn disi kan meki wi drai baka gi Yehovah (Rom. 16:17). Te wi sabi san tru èn te wi e tan hori wisrefi na dati, dan wi o tan krosbei na Yehovah èn a bribi fu wi no o kon swaki (Ef. 4:15, 16). Sma no o man kori wi nanga falsi leri èn nanga falsi nyunsu, èn wi o feni kibri na Yehovah na a ten fu a bigi banawtu. Tan hori yusrefi na san tru „dan a Gado fu freide o de nanga [yu]”.​—Fil. 4:8, 9. w24.07 13 ¶16-17

Yesus ben yepi spesrutu den sma di ben e sari fu di den ben du sondu. A gi den wan kari fu tron en bakaman. A ben sabi taki sondu ben de a rutu fu ala den problema fu libisma. Sobun, a ben e yepi man nanga uma di ben e pina fu di den ben du sondu. A ben taki: „Gosontu sma no abi datra fanowdu, ma na siki sma abi datra fanowdu.” A taki moro fara: „Mi no kon fu kari sma di e du san reti, ma mi kon fu kari sondari” (Mat. 9:12, 13). Èn na dati Yesus du. Di wan uma wasi Yesus futu nanga den watra-ai fu en, dan Yesus taki switi nanga en èn a gi en pardon fu den sondu fu en (Luk. 7:37-50). Yesus leri a Samaria uma prenspari tru tori, aladi a ben sabi taki na uma disi ben e libi nanga wan man di no ben de en masra (Yoh. 4:7, 17-19, 25, 26). Boiti dati, Gado gi Yesus a makti srefi fu tyari wan kba kon na sondu nanga dede. Fa Yesus o du dati? A o gi man, uma, nanga pkin di dede wan opobaka.​—Mat. 11:5. w24.08 4 ¶9-10

Fa Yehovah o gi en nen grani na ini a ten di e kon? A o poti sani kon reti baka. Heri esi a o tyari wan kba kon na Babilon a Bigiwan, fu di a pori a santa nen fu en (Openb. 17:5, 16; 19:1, 2). Te Babilon a Bigiwan o kisi pori, dan a kan taki son sma o bigin anbegi Yehovah makandra nanga wi. Te fu kba, Yehovah o pori a heri grontapu fu Satan na ini a feti fu Armagedon èn a o tyari wan kba kon na ala sma di e gens en èn di e pori en nen. Ma a o kibri ala den sma di lobi en, di e gi yesi na en, èn di wani gi en grani (Mark. 8:38; 2 Tes. 1:6-10). Baka te sma kisi tesi fu a lasti leisi baka a Dusun Yari Tiri fu Krestes, dan a o de krin fu si taki Yehovah na a wan-enkri Gado di ala libisma musu anbegi (Openb. 20:7-10). Na a ten dati, a o de so taki „neleki fa a se lai nanga watra, na so a sabi fu a glori fu Yehovah o lai na grontapu” (Hab. 2:14). A o de wan span ten te ala sma o prèise Yehovah fu di a warti fu kisi grani. w25.01 7 ¶15-16

San ben o yepi den Hebrew Kresten fu hordoro te den ben o kisi ferfolgu? Na apostel Paulus ben wani yepi den Kresten fu ferstan taki den ben o kisi wini te den ben o hordoro na ondro tesi. Dati meki a sori den Kresten taki te den e kisi tesi, dan Gado kan gebroiki a tesi dati fu leri den son sani. Den sani dati kan yepi wan Kresten fu kon abi den fasi di Yehovah feni bun. Te den Hebrew Kresten ben e tan poti prakseri na den wini di den tesi dati ben o tyari kon gi den, dan den ben o feni en moro makelek fu hordoro (Hebr. 12:11). Paulus ben gi den Hebrew Kresten a rai fu abi dek’ati èn fu hordoro te den ben e kisi tesi. A ben de a yoisti sma fu gi den a rai dati. Fosi a ben tron wan Kresten, a ben ferfolgu den Kresten èn a ben si sortu ogr’ati sani sma ben du nanga den. A ben sabi tu fa fu hordoro na ondro tesi. Fu taki en leti, a ben kisi gens na difrenti fasi baka di a tron wan Kresten.​—2 Kor. 11:23-25. w24.09 12-13 ¶16-17

Ibri dei, a diniwroko fu wi e kon moro prenspari. Fu san ede? Fu di furu ten no de moro. Prakseri san Yesus ben taki fu a preikiwroko di wi o du na ini den lasti dei soleki fa a skrifi na ini Markus 13:10. Soleki fa na Evangelietori fu Mateyus e sori, dan Yesus ben taki dati a bun nyunsu ben o preiki na heri grontapu fosi „a kaba” kon (Mat. 24:14). Den wortu dati e sori taki na ogri grontapu fu Satan o kon na wan kba. Yehovah poti „a dei nanga a yuru” gi den sani di o psa heri esi (Mat. 24:36; Tori 1:7). Ibri dei wi e kon moro krosbei fu a ten dati (Rom. 13:11). Sobun, wi musu tan preiki teleki a kba kon. Ma wi wani poti prakseri na a prenspari aksi disi: Fu san ede wi e preiki a bun nyunsu? Fu taki en leti, na lobi e meki taki wi e preiki. Te wi e preiki, dan wi e sori taki wi lobi a waarheid, wi lobi tra sma, èn san moro prenspari, wi e sori taki wi lobi Yehovah nanga a nen fu en. w24.05 14-15 ¶2-3

P’pa nanga m’ma gi den pkin fu yu dek’ati fu denki dipi fu den sani di Yehovah meki. Te yu e waka na ini wan gron, noso te yu e wroko na ini yu dyari, dan yepi yu pkin fu si den moi patroon na ini den sani di Gado meki. Yepi yu pkin fu kon ferstan taki a musu fu de so taki na wan koni sma meki den sani disi. Fu eksempre, te yu e luku wan pakro, son bromki, den w’wiri fu son bon, èn son grupu stari, dan yu o si taki wan patroon fu spiraal de fu si na ini ala den sani disi. Sabiman studeri den sortu patroon disi furu yari langa. Sabiman Nicola Fameli e taki dati te yu e teri den spiraal di de fu si na ini sonwan fu den sani di Gado meki, dan yu o si taki den seti na wan spesrutu fasi. A sani disi nen de reeks van Fibonacci. Den spiraal disi de fu si na ini furu sani, soleki starisistema, pakro, den w’wiri fu bon, nanga zonnebloem. w24.12 16 ¶7

Moses, David, nanga Yohanes ben e libi wan langa ten psa. Èn a fasi fa den ben e libi e difrenti fu a fasi fa wi e libi tide. Ma wi de leki den na furu difrenti fasi. Den ben e dini a tru Gado èn wi e du dati tu. Neleki den, wi e begi Yehovah, wi e fertrow na en tapu, èn wi e suku rai na en. Èn neleki den man dati fu owruten, wi abi a fertrow taki Yehovah e blesi den wan di e gi yesi na en. Meki wi gi yesi na a rai fu den owru man disi èn meki wi gi yesi na den komando fu Yehovah. Te wi e gi yesi na Yehovah, dan a o yepi wi èn a o blesi wi. Wi o de na libi èn wi o „libi langa”, iya, fu têgo! Èn wi o prisiri fu di wi e plisi wi Tata na hemel di o blesi wi moro leki san wi ben kan denki.​—Ef. 3:20. w24.11 13 ¶20-21

Na ini a fosi yarihondro, wan tu brada ben kisi a frantwortu fu de dinari ini a diniwroko (1 Tim. 3:8). Den man disi ben e „yepi trawan”, soleki fa na apostel Paulus ben skrifi. A de krin taki dinari ini a diniwroko ben e du wan lo prenspari wroko so taki den owruman ben kan poti prakseri na a wroko di den ben musu du fu gi sma leri èn fu luku den skapu. Fu eksempre, a kan taki dinari ini a diniwroko ben e yepi fu meki kopi fu den buku fu Bijbel, noso kande den ben e bai den sani di ben de fanowdu fu meki den kopi disi. Kow poti prakseri na wan tu fu den prenspari sani di dinari ini a diniwroko e du na ini a gemeente fu yu (1 Petr. 4:10). Kande den kisi a frantwortu fu sorgu gi den moni-afersi fu a gemeente, noso gi a gebied fu a gemeente. Kande den musu bestel buku nanga tijdschrift gi a gemeente, kande den musu sorgu gi geluid nanga felem, kande den musu sori sma pe den kan sdon, noso kande den musu yepi fu hori a Kownukondre zaal bun. Ala den wroko disi musu du so taki den gemeente kan drai bun.​—1 Kor. 14:40. w24.10 19 ¶4-5

Wi o man psa iniwan tesi, bigiwan noso pkinwan, te wi e tan hori na prakseri taki Yehovah na wan libilibi Gado èn taki ala ten a man yepi wi. Yehovah na a Almakti Gado èn a kan gi wi a krakti di wi abi fanowdu fu hordoro. A sani disi e yepi wi fu no frede te tesi e miti wi. Te wi e si taki Yehovah e yepi wi fu hordoro te wi e kisi pkin tesi, dan wi kan de seiker taki a o yepi wi tu te wi e kisi moro bigi tesi. Meki wi poti prakseri na tu sani di Kownu David ben ondrofeni èn di ben yepi en fu fertrow moro tapu Yehovah. Di David ben e luku den skapu fu en p’pa di a ben moro yongu, dan wan leisi wan beer tyari wan fu den skapu gwe èn wan tra leisi wan lew du a srefi sani dati. Na ala tu okasi David sori dek’ati. A lon baka den ogri meti disi èn a puru a skapu na den mofo. Ma David no ben denki taki a ben kiri den meti disi nanga en eigi krakti. A ben sabi taki na Yehovah ben gi en a krakti fu du dati (1 Sam. 17:34-37). Fu di David ben e denki dipi fu den sani di a ben ondrofeni, meki a kon abi a fertrow taki a libilibi Gado ben o yepi en tu na ini a ten di e kon. w24.06 21 ¶5-6

Kow taki dati yu kisi wan kari fu de na wan prisiri demakandra. Yu musu go? Efu yu no sabi suma e hori a prisiri demakandra noso san a sma seti gi na okasi dati, dan yu o abi fu aksi en sani soleki: „Pe a demakandra o hori èn o ten a o hori? Omeni sma o de drape? Suma abi a frantwortu fu sorgu taki ala sani e waka bun? Suma o de drape? Sortu sani sma o du na a demakandra? Sopi o de?” Den piki tapu den aksi disi o yepi yu fu teki wan koni besroiti. Baka te yu kon sabi san yu wani sabi, dan poti prakseri na a heri situwâsi. San yu o du efu yu e kon sabi taki sma di no e lespeki Bijbel gronprakseri o de na a demakandra? San yu o du te yu e kon sabi taki sopi o de, ma taki sani no seti fu sorgu taki sma no e dringi tumsi furu? Yu denki taki a demakandra disi kan tron wan bradyari fesa? (1 Petr. 4:3) Te yu e prakseri ala den sani disi, dan a o moro makelek gi yu fu teki wan bun besroiti. w25.01 15 ¶4-5

Nanga yepi fu a lusu-paiman, Yehovah man figi den sondu puru fu den wan di abi berow. Wi o luku san Yehovah e du, soleki fa Bijbel e sori. A muilek srefsrefi fu puru redi flaka fu wan krosi. Ma Yehovah gebroiki na agersitori disi fu gi wi a dyaranti taki den sondu fu wi kan wasi kon so krin taki wi no man si den moro. Bijbel e agersi sondu nanga paiman (Mat. 6:12; Luk. 11:4). Sobun, ibri leisi te wi e sondu teige Yehovah, dan a de neleki den paiman fu wi e kon moro bigi. A paiman di wi abi na en bigi srefsrefi. Ma te Yehovah e gi wi pardon, dan a de neleki wi no abi fu pai a paiman moro di wi abi na en. Te a gi wi pardon fu sondu, dan a no e dwengi wi fu tan pai gi den sondu dati. Neleki fa wan sma e firi prisiri te a no abi fu pai den paiman fu en moro, na so wi e prisiri te Yehovah e gi wi pardon. w25.02 9-10 ¶9-10

Te p’pa nanga m’ma kon owru, dan a kan de fanowdu taki den pkin fu den e yepi den nanga son sani. Èn furu pkin de klarklari fu gi den p’pa nanga m’ma a yepi dati (1 Tim. 5:4). Ma p’pa nanga m’ma di e fertrow tapu Yehovah e ferstan taki a prenspari srefsrefi fu yepi den pkin fu den fu tron futuboi fu Yehovah. Te den e du dati, dan den o de moro koloku leki te den e kweki den pkin nanga a denki taki den o sorgu gi den te den kon owru (3 Yoh. 4). Te yu e yepi yu pkin fu kon sabi fa den kan sorgu gi densrefi, dan a bun fu sori den taki yu e fertrow tapu Yehovah. Yonguyongu kba den kan leri taki a bun fu wroko tranga (Odo 29:21; Ef. 4:28). Te den e kon moro bigi, dan yu kan yepi den fu wroko bun na skoro. P’pa nanga m’ma kan suku Bijbel gronprakseri na ini den buku fu wi fu yepi den pkin fu teki koni besroiti te a abi fu du nanga a skoroleri di den o teki. Na so den o man sorgu gi densrefi èn den o abi moro ten fu preiki noso fu pionier srefi. w25.03 30-31 ¶15-16

Na ini Yesaya kapitel 65 Yehovah meki wi kon sabi fa a libi ben o de gi den wan di de na ini a tru anbegi. A profeititori disi kon tru fu a fosi leisi na ini 537 Fosi Krestes. Na a ten dati, Dyu di ben abi berow ben kmoto na ini katibo na Babilon èn den drai go baka na a kondre fu den. Yehovah blesi a pipel fu en èn a yepi den fu meki Yerusalem di ben kisi pori, tron wan moi foto baka. A yepi den tu fu seti a tempel baka di ben de a moro prenspari presi pe sma ben e anbegi Yehovah na ini Israel (Yes. 51:11; Sak. 8:3). A di fu tu leisi di a profeititori fu Yesaya kon tru, ben de na ini 1919 di den anbegiman fu Yehovah ini a ten disi kmoto na ini katibo na Babilon a Bigiwan. Baka dati, a tru anbegi bigin seti na heri grontapu. Fayafaya Kownukondre preikiman seti furu gemeente èn den sma na ini den gemeente ben e sori den fasi fu Krestes. Man nanga uma di fosi ben e du ogri sani èn di ben e libi wan morsu libi, ben „kisi nyun fasi fu tron sma di de leki fa Gado wani”. w24.04 20-21 ¶3-4

Na ini son kondre, sma abi a gwenti taki papa nanga mama noso tra bigiwan fu a famiri suku wan trowpatna gi wan famiriman fu den di no trow. Na ini tra kondre, famiri noso mati e suku wan patna gi a sma èn den e seti sani so taki a man nanga na uma kan miti makandra fu luku efu den wani bigin wan sani. Efu den aksi yu fu suku wan trowpatna gi wan sma, dan luku san a man nanga na uma wani, san den lobi èn san den abi fanowdu. Efu yu si wan sma di ben o de wan bun trowpatna gi a famiriman noso a mati fu yu, dan kon leri sabi a sma dati bun. Luku fa a sma dati de èn sortu fasi a abi. Ma a moro prenspari sani na fu kon sabi efu a sma abi wan bun matifasi nanga Yehovah. Wan bun matifasi nanga Yehovah prenspari moro leki omeni moni wan sma abi, omeni skoroleri a kisi, noso fu sortu famiri a de. Ma hori na prakseri taki na a brada nanga a sisa srefi musu teki a besroiti te fu kba efu den o trow. w24.05 23 ¶11

Wi kan yepi tu sma di abi verkering te wi e luku bun san wi e taki èn san wi no e taki. Son leisi wi o abi fu hori wisrefi kande fu no taki noti (Odo 12:18). Fu eksempre, kande wi wani ferteri trawan taki den tu sma abi verkering, ma kande na den tu sma dati wani ferteri trawan a nyunsu. Wi no musu taktaki sani fu den tu sma di abi verkering èn wi no musu krutu den persoonlijk besroiti di den e teki (Odo 20:19; Rom. 14:10; 1 Tes. 4:11). Boiti dati, wi no musu taki sani noso aksi sani di kan meki den tu sma firi taki den musu trow nomonomo. Fa a de efu tu sma besroiti fu broko a verkering fu den? Wi musu luku bun fu no go bemui na ini a tori noso fu teki sei (1 Petr. 4:15). Te wan verkering broko, dan dati no wani taki dati den tu sma teki wan don besroiti. Eigenlijk a wani taki dati a verkering yepi den tu sma fu teki wan bun besroiti. Ma tòg a besroiti di den teki fu broko a verkering, kan meki den sari srefsrefi. Dati meki wi kan suku okasi fu yepi den. w24.05 31 ¶15-16

Wan fu den moro muilek tesi di kan miti wi, na te wan famiriman noso wan bun mati e gwe libi Yehovah (Ps. 78:40). O moro wi lobi a sma, o moro a situwâsi o muilek gi wi. Efu sowan hati sani psa nanga yu, dan a kan gi yu dek’ati te yu e prakseri fa Sadok tai hori na Yehovah. A tan gi yesi na Yehovah di en bun mati Abiatar besroiti fu drai baka gi Yehovah. A sani disi psa di Kownu David ben owru kba èn a ben de fu dede. En manpkin Adonia pruberi fu poti ensrefi leki kownu aladi Yehovah ben wani taki Salomo tron kownu (1 Kron. 22:9, 10). Abiatar besroiti fu horbaka gi Adonia (1 Kow. 1:5-8). Di Abiatar du dati, dan a no drai baka gi David nanga Sadok w’wan ma gi Yehovah tu. Furu yari langa, Sadok èn Abiatar ben wroko skinskin makandra leki priester.​—2 Sam. 8:17; 15:29; 19:11-14. w24.07 6 ¶14-15

Wi kan de seiker taki wi o kisi wini te wi e kakafutu gi tesi. Te wi du wan sondu, dan a kan taki wi e „nyan bun fu [dati] fu wan pisi ten nomo”, ma te wi e libi soleki fa Yehovah wani, dan wi o de moro koloku (Hebr. 11:25; Ps. 19:8). Dati de so fu di Gado meki wi fu libi soleki fa en wani (Gen. 1:27). Sobun, te wi e libi na wan fasi di Yehovah feni bun, dan wi o abi wan krin konsensi èn wan dei wi o man libi fu têgo (1 Tim. 6:12; 2 Tim. 1:3; Yud. 20, 21). A tru taki „a skin swaki” (Mat. 26:41). Ma disi no wani taki dati wi no man kakafutu gi den swakifasi fu wi. Yehovah de klarklari fu gi wi a krakti di wi abi fanowdu (2 Kor. 4:7). A bun fu hori na prakseri taki a krakti di bigi psa marki e kmoto fu Gado. Ma wi srefi musu du ala san wi man fu kakafutu gi tesi. Yehovah o gi wi moro krakti te wi e begi en fu yepi wi (1 Kor. 10:13). Iya, Yehovah kan yepi wi fu kakafutu gi tesi. w24.07 19 ¶19-21

Na apostel Paulus ben skrifi den wortu na ini a tekst fu tide, gi Timoteyus, wan tra owruman, fu taigi en taki a ben musu pir’ai gi sma di ben e du sondu, èn a ben musu du dati „na fesi ala sma”. San Paulus ben wani taki nanga dati? Paulus ben wani taki dati a sma di du wan seryusu sondu ben musu kisi pir’ai na fesi a heri gemeente? Nôno, dati no abi fu de so ala ten. Na presi fu dati a ben e taki fu den sma di ben sabi kba fu a sondu di a sma du. Kande den ben si san a sma du, noso kande a sma ben ferteri den san a du. Den owruman o ferteri soso den sma disi taki den seti a tori èn taki a sma kisi pir’ai. Son leisi, furu sma na ini a gemeente sabi kba taki wan sma du wan seryusu sondu, noso a musu fu de so taki den o kon sabi a tori. Na ini sowan situwâsi, a sma musu kisi pir’ai na fesi a heri gemeente. Dati meki wan owruman musu meki bekènti na ini a gemeente taki a brada noso a sisa kisi pir’ai. Fu san ede? Paulus e taki: „So taki a kan de wan warskow gi den trawan” fu no du wan seryusu sondu. w24.08 23-24 ¶16-17

Wi musu tan wroko fayafaya na ini a diniwroko fu Yehovah teleki a kba kon. Salfuwan musu tan na ai efu den wani taki Yesus ’teki den tyari gwe’ fu go libi na hemel (Mat. 24:40). Den salfuwan e wakti fayafaya teleki den o „de nanga” Yesus na hemel. Baka a feti fu Armagedon, den o de a trowmisi fu Yesus na a trowfesa fu a Pkin Skapu (2 Tes. 2:1). Aladi a ten e doro taki Yesus o krutu libisma, tòg wi no abi fu frede. Efu wi e tan getrow, dan wi lob’ati P’pa na hemel o gi wi „a krakti di bigi pasa marki” so taki wi „kan tanapu na fesi a Manpikin fu libisma” (2 Kor. 4:7; Luk. 21:36). Awinsi wi abi a howpu fu libi na hemel noso na grontapu, wi P’pa o breiti nanga wi te wi e gi yesi na den warskow di de feni na ini den agersitori fu Yesus. Èn fu di Yehovah lobi wi so te, meki a o ’skrifi wi nen na ini a buku’ fu libi.​—Dan. 12:1; Openb. 3:5. w24.09 24-25 ¶19-20

Yu kan du wan sani tu fu no firi brokosaka moro. San yu kan du? Prakseri den bun sani di yu abi, prakseri fa Yehovah e blesi yu, èn hori na prakseri taki Yehovah no e blesi den sma di no e dini en. Furu sma di no e dini Yehovah, e si wan bun wroko nanga wan switi libi leki den moro prenspari sani, fu di den no abi wan howpu gi a ten di e kon. Ma Yehovah pramisi yu taki a o gi yu moro blesi leki san yu ben kan denki (Ps. 145:16). Prakseri a sani disi tu: Yu no man sabi seiker fa yu libi ben o de tide efu yu ben teki tra besroiti. Ma wán sani de seiker: Te yu e teki besroiti fu di yu lobi Gado nanga tra sma, dan ala ten yu o abi den sani di o meki yu de koloku trutru. w24.10 27 ¶12-13