A tori fu Salomo e sori san kan psa nanga ibriwan fu den anbegiman fu Yehovah. Kande wan brada noso wan sisa du wan seryusu sondu, èn bakaten a e taki dati ala sani psa „wantronso”. Noso kande a e taki: „Mi no ben ferwakti taki a sani disi ben o psa”. Ma efu a de eerlijk, dan a o si taki a teki wan tu don besroiti di meki taki a du a sondu. Kande a ben abi mati di no lobi Yehovah. Noso kande a luku felem di no fiti èn a go tapu website noso na presi di no bun gi wan Kresten. Kande a tapu fu begi, fu leisi Bijbel, fu go na den konmakandra, noso fu teki prati na a preikiwroko. Neleki a yonguman na ini Odo, a du wan sondu fu di a ben teki furu don besroiti. San wi e leri fu a tori disi? Boiti taki wi no musu sondu, wi musu luku bun tu taki wi no e du don sani di kan meki taki wi sondu. Na disi Salomo ben tyari kon na krin baka di a ferteri san ben psa.​—Mat. 5:29, 30. w24.07 16 ¶10-11

San na a gudu disi? A gudu disi na a wroko di wi abi fu preiki a Kownukondre boskopu di kan kibri sma libi (2 Kor. 4:1). San na den prapi fu kleidoti? Den prapi fu kleidoti na den futuboi fu Gado di e preiki a bun nyunsu gi trawan. Na ini a ten fu Paulus, bisnisman ben e gebroiki prapi fu tyari prenspari sani soleki nyan, win nanga moni go na tra presi. Na so a de tu taki Yehovah gi wi a frantwortu fu preiki a bun nyunsu di prenspari srefsrefi. Sobun, Yehovah kan gi wi a krakti di wi abi fanowdu fu tan preiki a bun nyunsu. Son leisi wi kan frede libisma. San kan yepi wi fu no frede libisma moro? Poti prakseri na san den apostel begi Gado di sma taigi den taki den no musu preiki moro. Den no ben frede èn den no stop preiki. Na presi fu dati, den begi Yehovah fu yepi den so taki den ben man ’tan taki sondro frede’. Wantewante Yehovah piki a begi fu den (Tori 4:18, 29, 31). Te wi e frede son leisi fu preiki gi sma, dan aksi Yehovah fu yepi yu fu kon abi moro lobi gi libisma so taki yu no e frede fu ferteri sma a bun nyunsu. w24.04 16 ¶8-9

A lobi di wi abi gi Yehovah e meki taki wi wani santa en nen. Disi wani taki dati wi wani meki trawan kon sabi taki den takru sani di Satan ferteri fu Yehovah na ogr’ati lei (Gen. 3:1-5; Yob 2:4; Yoh. 8:44). Te wi e preiki, dan wi e angri fu ferteri ala sma di wani arki suma na Yehovah èn fa a de trutru. Wi wani taki ala sma musu sabi taki a moro prenspari fasi fu en na lobi, taki a e tiri na wan reti fasi, èn taki heri esi a Kownukondre fu en o tyari wan kba kon na ala pina. Disi o meki taki libisma o abi freide èn den o de koloku (Ps. 37:10, 11, 29; 1 Yoh. 4:8). Te wi e ferteri sma den sani disi fu Yehovah, dan wi e santa a nen fu en. Wi breiti tu fu di wi e du san wi musu du leki Yehovah Kotoigi. w24.05 18 ¶12