Yuli

Son futuboi fu Yehovah no man du so furu moro leki san den ben wani fu di den kon owru, den e siki, noso den abi wan mankeri. Den sma disi ben kan denki taki Yehovah no e broko en ede nanga den. Kande den e aksi densrefi: ’Yehovah man gebroiki mi ete?’ A skrifiman fu Psalm 71 ben e broko en ede tu fu di a ben kon swaki. A begi Gado: „No gwe libi mi te mi e kon swaki” (Ps. 71:9, 18). Ma aladi a ben e broko en ede, tòg a ben de seiker taki efu a ben e tan dini en Gado, Yehovah, getrow, dan a ben o tiri en èn a ben o yepi en. A psalm skrifiman ben leri taki Yehovah lobi te sma e du ala san den man fu dini en, awinsi a no makelek gi den (Ps. 37:23-25). Efu yu na wan sma di kon owru, dan prakseri fa Yehovah e si yu. A kan yepi yu fu dini en na wan getrow fasi awinsi yu e siki noso awinsi yu kon owru (Ps. 92:12-15). No tan poti prakseri na san yu no man du moro, ma poti prakseri na san yu man du. w24.10 28 ¶14-16

Gi Kresten di no lepi, a muilek fu teki a yoisti besroiti ini wan tori efu wan Bijbel wet no de. Efu wan Bijbel wet no de gi wan tori, dan son Kresten kan denki taki den mag du san den wani. Tra sma wani taki sma musu meki wan weti gi den aladi Bijbel no e taki fu wan spesrutu wet gi wan tori. Fu eksempre, a gersi leki son Kresten na ini Korente ben aksi na apostel Paulus efu wan wet ben de di ben taki efu den ben mag nyan wan sani di ben tyari leki ofrandi gi den falsi gado. Paulus no ben taigi den san den ben musu du. Ma Paulus ben taki dati a konsensi fu ibri sma ben kan yepi a sma fu besroiti san a ben o du na ini a tori disi. A ben taigi den san na wan tu gronprakseri di ben o yepi den fu teki wan besroiti di no ben gi den konsensi fonfon èn di no ben o meki tra sma naki futu (1 Kor. 8:7-9). Na so Paulus ben yepi den Korentesma fu gro kon tron lepi Kresten so taki den kan gebroiki den eigi ferstan fu teki koni besroiti, na presi fu ferwakti taki tra sma musu teki besroiti gi den noso taki den abi wan wet fanowdu di ben o sori den san den musu du. w24.04 5 ¶14

Na ini a ten fu Yona, den Ninefeisma ben kisi na okasi fu sori berow. Boiti dati, hori na prakseri san Yesus ben taki fu den sma di „o opo baka fu kisi krutu”. Den wan di o kisi na opobaka disi na sosrefi „den sma di du takru sani” (Yoh. 5:29). Sobun, a gersi leki howpu de ooktu gi den sma fu Sodom nanga Gomora. A kan taki wan tu fu den sma dati o kisi wan opobaka èn kande wi o kisi na okasi fu leri den fu Yehovah èn fu Yesus Krestes. Ala ten Yehovah e „luku san de na ini na ati èn [a] e ondrosuku den niri”. Te a o besroiti suma a o gi wan opobaka, dan a o „pai ibri sma gi a fasi fa a e libi”. Yehovah o strafu den wan di musu kisi strafu ma a o sori sar’ati te dati fiti. Dati meki wi no musu taki noiti taki wan sma no o kisi wan opobaka efu Bijbel no e taki dati. w24.05 5-6 ¶15-16

Srefi na ini owruten, den sani di Yehovah ben taigi den futuboi fu en, gi den dek’ati te den ben musu du wan wroko di no ben makelek. Kow luku na eksempre fu a profeiti Yeremia. A ben e frede di Yehovah gi en a wroko fu go preiki. Yeremia taki: „Mi no sabi srefisrefi fa fu taki. Mi na wan boi ete” (Yer. 1:6). Fa a kisi dek’ati fu go preiki? A ben kisi krakti fu den sani di Yehovah ben taigi en. Yeremia e taki: „A boskopu fu Gado de leki wan faya na ini mi ati èn na ini mi bonyo. Mi kon weri fu hori en gi misrefi” (Yer. 20:8, 9). A tru taki Yeremia ben musu preiki na ini wan muilek kontren, ma a boskopu di a ben musu tyari gi den sma gi en a dek’ati di a ben abi fanowdu fu man du a wroko fu en. Te Kresten abi krakti fanowdu, dan den e kisi a krakti dati fu den sani di skrifi na ini Gado Wortu. Na apostel Paulus ben taki dati te den brada nanga sisa ben o kon sabi moro bun san na a wani fu Yehovah, dan dati ben o yepi den fu ’abi bun bakapisi nanga ala san den e du’. Na so den ben o ’tyari densrefi na wan fasi di Yehovah feni bun’.​—Kol. 1:9, 10. w24.04 14-15 ¶2-4

Sadok tan gi yesi na Yehovah aladi Granpriester Abiatar ben drai baka gi David di Adonia, a manpikin fu David, pruberi fu poti ensrefi leki kownu. David ben sabi taki a ben kan fertrow Sadok ala ten. Di a kon na krin san Adonia ben wani du, dan David meki Sadok, Natan, nanga Benaya salfu Salomo leki kownu (1 Kow. 1:32-34). A ben musu fu de wan dek’ati gi Sadok fu de makandra nanga getrow anbegiman fu Yehovah, soleki Natan nanga tra man di ben e horbaka gi David. Di Salomo tron kownu, a „gi Priester Sadok a wroko fu Abiatar” (1 Kow. 2:35). Fa yu kan de leki Sadok? Efu wan sma di yu lobi e besroiti fu gwe libi Yehovah, dan sori Yehovah taki yu e tai hori na en (Yos. 24:15). Yehovah o gi yu a krakti nanga a dek’ati di yu abi fanowdu. Begi Yehovah èn tan krosbei fu den mati fu yu di e tai hori na en. Yehovah breiti taki yu e tai hori na en èn a o blesi yu gi dati.​—2 Sam. 22:26. w24.07 6-7 ¶16-17

Psalm 15:2 e taki dati wan mati fu Gado na wan sma di „e libi wan krin libi, [èn] di e du san reti”. Disi na wan sani di wi musu tan du doronomo. Ma a tru taki wi man „libi wan krin libi”? Iya. Aladi wi alamala na sondu sma, tòg Yehovah o si wi leki sma di e „libi wan krin libi” te wi e du ala san wi man fu gi yesi na en. Te wi gi wisrefi abra na Gado èn teki dopu, dan disi na soso a bigin. Fu eksempre, na ini Bijbel ten, wan sma no ben kan kon na ini a tenti fu Yehovah soso fu di a ben de wan Israelsma. Son sma ben e kari a nen fu Yehovah ’aladi den ben e lei èn aladi den no ben e du san reti’ (Yes. 48:1). Ret’ati Israelsma ben musu kon sabi den wet fu Yehovah èn den ben musu gi yesi na den. Na so a de tu taki efu wi wani de bun mati fu Yehovah na ini a ten disi, dan a no nofo te wi dopu èn te sma e kari wi Yehovah Kotoigi. Wi musu tan „du san reti”. w24.06 9 ¶4; 10 ¶6

San na wan tu sani di Yehovah de klarklari fu gi wi? Luku wan tu eksempre. Yehovah e gi wi san wi abi fanowdu. Kande a no e gi wi ala san wi wani, ma ala ten a e gi wi san wi abi fanowdu. Fu eksempre, a e sorgu taki wi abi n’nyan, krosi, nanga wan presi fu tan (Ps. 4:8; Mat. 6:31-33; 1 Tim. 6:6-8). Ma Yehovah no e gi wi den sani disi fu di a feni taki a de ferplekti fu du dati. Luku san Yesus e taki na Mateyus 6:25, 26. Yesus gebroiki na eksempre fu pkin fowru èn a taki: „Den no e sai siri, den no e koti nyanyan èn den no e kibri nyanyan na ini maksin.” Ma luku san a e taki baka dati: „Un Tata na hemel e gi den n’nyan.” Ma luku san Yesus e taki now: „Unu no warti moro den?” San a ben wani leri wi? Efu Yehovah e sorgu gi den meti, dan wi kan de seiker taki a o sorgu gi wi tu. Neleki fa wan p’pa e broko en ede nanga en pkin, na so Yehovah e sorgu gi en famiri fu di a lobi den.​—Ps. 145:16; Mat. 6:32. w24.09 26-27 ¶4-6

Wan dinari ini a diniwroko na wan dopu brada di poti na wroko nanga yepi fu santa yeye fu yepi den owruman. Den e du furu prenspari sani na ini a gemeente. Den brada disi lobi Yehovah èn den e libi na wan fasi di Gado feni bun. Boiti dati, den lobi den Kresten brada nanga sisa nanga den heri ati (Mat. 22:37-39). San wan dopu brada kan du fu tron wan dinari ini a diniwroko? Bijbel e sori sortu marki wan brada musu doro fu man tron wan dinari ini a diniwroko (1 Tim. 3:8-10, 12). Efu yu wani tron wan dinari ini a diniwroko, dan kon sabi san na den marki disi èn ondrosuku den moro fini. Baka dati, du tranga muiti fu doro den. Ma yu musu aksi yusrefi fosi fu san ede yu wani tron wan dinari ini a diniwroko. w24.11 15 ¶4-5

Son sma e taki dati den leisi Bijbel omeni leisi. Ma a de so taki den e bribi san skrifi na ini Bijbel? Den fiti den sani dati, noso den meki den sani dati abi krakti tapu den libi? A sari taki nofo tron den no du dati. Ma a pipel fu Yehovah de heri tra fasi. Wi e du ala san wi man fu fiti den rai fu Bijbel na ini wi libi. A no makelek ala ten fu leisi Gado Wortu èn fu fiti san wi e leri. Kande wi no man feni ten fu leisi Gado Wortu, noso kande wi e leisi es’esi sondro fu denki dipi fu san wi e leisi. A kan tu taki wi e las’ati te wi e si omeni kenki wi musu tyari kon. Awansi san yu feni muilek, tòg dati no wani taki dati yu no man du en. Yehovah kan yepi yu fu du san de fanowdu. Meki wi du ala san wi man fu du san Gado Wortu e taki. A no de fu taki dati o moro wi e leisi Gado Wortu èn e fiti en na ini wi libi, o moro wi o de koloku.​—Yak. 1:25. w24.09 7 ¶15-16

Te wan ogri sani psa nanga wi, dan Yehovah e trowstu wi nanga yepi fu en santa yeye.Efu yu e sari fu di wan ogri sani miti yu, dan taigi Yehovah krin fa yu e firi. Yu kan taki nanga en o langa yu wani (Ps. 86:3; 88:1). Aksi Yehovah ibri leisi baka fu gi yu en santa yeye. Noiti a no o weigri fu gi yu dati.Oiti yu ben de na ini wan muilek situwâsi di swaki yu so te taki yu no ben e firi fu du noti? Santa yeye kan gi yu krakti baka fu tan dini Yehovah getrow (Ef. 3:16). Baka te yu aksi Yehovah fu gi yu en santa yeye, dan san yu musu du? Du sani di o meki a santa yeye abi moro krakti na yu tapu. Go na den konmakandra èn preiki gi trawan. Leisi Gado Wortu ibri dei fu furu yu ferstan nanga den prakseri fu Yehovah (Fil. 4:8, 9). Te yu e leisi bijbel, dan poti prakseri na den sma na ini Bijbel di ben kisi tesi èn di ben e denki dipi fu a fasi fa Yehovah yepi den fu hordoro. w24.10 9 ¶12-14

Neleki Yehovah nanga en Manpkin, wi lobi sma (Odo 8:31). Wi e firi gi den wan di ’no sabi Gado’ èn di ’no abi nowan howpu’ (Ef. 2:12). Fu di den abi furu problema, meki den kan firi leki den de na ini wan dipi peti. Ma wi abi wan t’tei fu hari den puru na ini a peti dati. A t’tei dati na a bun nyunsu fu Gado Kownukondre. Fu di wi lobi den sma disi èn fu di wi e firi gi den, meki wi wani du ala san wi man fu ferteri den a bun nyunsu. Te den yere a bun nyunsu, dan dati kan gi den howpu, a kan yepi den fu de koloku nownow kba, èn a kan gi den na okasi fu kon abi a „trutru libi” noso têgo libi wan dei (1 Tim. 6:19). Fu di wi lobi sma, meki wi wani warskow den taki na ogri grontapu disi e kon na wan kba (Esek. 33:7, 8). Wi wani taki den kon sabi san o psa na a ten fu a bigi banawtu. Na a fosi presi, Gado o tyari wan kba kon na ala falsi kerki, èn baka dati a heri ogri grontapu o kisi pori na ini Armagedon.​—Openb. 16:14, 16; 17:16, 17; 19:11, 19, 20. w24.05 16-17 ¶8-9

Na apostel Paulus ben gi Kresten a rai fu „libi en meki Gado puru atibron na [sma] tapu”. Wi e du dati te wi e meki Yehovah besroiti o ten a o meki sani kon reti baka, èn na sortu fasi a o du dati. Baka di sma ben du wan hati sani nanga wan brada di nen John, a brada disi taki: „Mi ben musu dwengi misrefi fu no du wan don sani, ma a no ben makelek. Romesma 12:19 yepi mi fu wakti tapu Yehovah.” A bun te wi e wakti tapu Yehovah fu lusu wan problema. Te wi e du dati, dan wi no o kisi ed’ati fu di wi srefi pruberi fu lusu a problema. Yehovah wani yepi wi. Eigenlijk a e taigi wi: ’Libi a sani gi mi, mi o lusu a problema.’ Efu wi e bribi taki Yehovah o pai den sma baka di ben du wan hati sani nanga wi, dan wi no o tan nanga atibron, fu di wi sabi taki Gado o du san reti. w24.11 6 ¶14-15

Wi musu luku bun taki den sani di wi abi no e tron den moro prenspari sani gi wi. Na disi na apostel Paulus ben wani leri wi te wi e luku san a ben skrifi den Kresten brada nanga sisa fu en. A ben taki fu den ogri di den Israelsma ben du di den ben de na ini a gran sabana, èn a taki tu fu a sani di psa krosbei fu Sinai-bergi. A ben warskow den Kresten fu no „angri fu du ogri, soleki fa [den Israelsma] ben e angri fu du den sani dati” (1 Kor. 10:6, 7, 11). Yehovah ben du wan wondru fu sorgu taki den Israelsma dati ben abi n’nyan. Ma fu di den ben gridi gi n’nyan, meki a sani dati tron wan takru sani gi den (Num. 11:4-6, 31-34). Di den Israelsma ben e anbegi a gowtu pkin kaw, dan den ben e nyan, dringi, èn meki prisiri (Eks. 32:4-6). Paulus ben taki fu den eksempre disi fu warskow den Kresten di ben e libi na a ten fosi Yerusalem nanga a tempel fu en kisi pori na ini a yari 70. Fu di wi e doro a kba fu a grontapu disi, meki a prenspari srefsrefi taki wi no e meki a srefi fowtu di den Israelsma ben meki. w24.12 6 ¶13

Yehovah na „a koloku Gado” èn a wani taki wi de koloku tu (1 Tim. 1:11). A gi wi furu kado fu yepi wi fu nyan bun fu a libi (Yak. 1:17). Wan fu den kado dati na a trowlibi. Te wan man nanga wan uma trow, dan den e pramisi fu lobi èn fu lespeki makandra. Te den e tan sori tranga lobi gi makandra, dan den ala tu o de koloku.A sari fu si taki furu trowpaar na ini a ten disi e fergiti san den ben pramisi makandra na a trowdei fu den. Dati meki den no de koloku. Fa Yehovah wani taki wan masra e libi nanga a wefi fu en? Yehovah wani taki masra musu gi den wefi grani. Te wi e gi wan sma grani, dan dati wani taki dati wi e lespeki a sma èn a o de fu si na ini a fasi fa wi e libi nanga en. Wan masra di e gi en wefi grani, o sori swit’fasi nanga lobi gi en.​—1 Petr. 3:7. w25.01 8 ¶1-2; 9 ¶4-5

A no de fu taki dati a brifi di na apostel Paulus ben skrifi gi den Hebrew Kresten yepi den fu sreka densrefi gi a muilek ten di ben o kon. Paulus gi den brada nanga sisa fu en a rai fu studeri Gado wortu finfini èn fu ferstan en moro bun. Te den ben o du dati, dan den ben o man si sortu leri ben o swaki a bribi fu den èn den ben o man weigri tu fu bribi den leri dati. Paulus gi den dek’ati fu tranga a bribi fu den so taki den no ben o draidrai fu gi yesi na den rai fu Yesus èn fu den brada di ben e teki fesi na ini a gemeente. Boiti dati, Paulus yepi den Kresten fu si tesi leki wan okasi fu kisi leri fu a lob’ati P’pa fu den èn disi ben o yepi den fu hordoro. Meki wi fiti den Bijbel rai disi tu. Disi o yepi wi fu hordoro te na a kba.​—Hebr. 3:14. w24.09 13 ¶17, 19

Soleki fa Bijbel e sori, Yehovah besroiti taki wan lusu-paiman ben musu pai so taki wi kan kisi pardon fu sondu èn so taki wi kan tron en mati. San ben de a lusu-paiman di ben musu pai so taki libisma ben kan kisi baka san Adam lasi? Hori na prakseri taki Adam nanga Eva lasi a libi fu den di ben de sondro sondu èn den no ben o man libi fu têgo moro tu. Sobun, a lusu-paiman ben musu de wan prijs di ben abi a srefi waarde fu den sani di ben lasi (1 Tim. 2:6). A sma di ben kan pai a lusu-paiman ben o abi fu de wan man di (1) ben de sondro sondu; (2) ben o man libi fu têgo na grontapu; èn (3) a ben musu de klarklari fu gi en libi fu a bun fu wi. Luku dri reide fu san ede Yesus ben man pai a lusu-paiman: (1) „A no du nowan sondu” (1 Petr. 2:22). (2) Fu di a no ben abi sondu, meki a ben o man libi fu têgo na grontapu (3). A ben de klarklari fu dede èn fu gi en libi fu a bun fu wi​—Hebr. 10:9. w25.02 4-5 ¶11-12

Yu kan bribi taki Yehovah lobi yu èn taki a wani taki yu kon na ini a bigi famiri fu en, awinsi sortu problema e meki en muilek gi yu fu teki dopu. Yesus ben taigi wan grupu fu den fosi disipel fu en: „Efu a bribi fu unu pikin leki wan mosterd-siri, dan unu o man taigi a bergi disi: ’Opo fu dya go drape’, èn a bergi o opo ensrefi go drape. Noti sa de di unu no man du” (Mat. 17:20). Den sma di ben de drape fu yere san Yesus taki, ben e waka nanga Yesus wan tu yari nomo, sobun a bribi fu den no ben tranga so ete. Ma Yesus pramisi den taki efu den ben abi nofo bribi, dan Yehovah ben o yepi den fu psa problema di ben de leki bigi bergi. Èn yu kan de seiker taki Yehovah o yepi yu fu du a srefi. Efu wan sani de di e tapu yu fu teki dopu, dan no draidrai fu puru a problema dati na pasi. Gi yusrefi abra na Yehovah èn teki dopu. Dati na a moro bun besroiti di yu ben kan teki na ini yu libi. w25.03 7 ¶18-20

Wi kan psa iniwan tesi te wi e hori na prakseri taki a libilibi Gado de klarklari fu yepi wi . Wi kan kon abi moro fertrow taki Yehovah o yepi wi te wi e prakseri san a du na ini a ten di psa (Yes. 37:17, 33-37). Boiti dati, yu kan leisi noso luku nyunsu tapu jw.org, a website fu wi, fu kon sabi fa Yehovah e horbaka gi den brada nanga sisa fu wi na ini a ten disi. Wan tra sani di yu kan du, na fu prakseri ala den leisi di Yehovah yepi yu. No broko yu ede efu yu no man memre wan spesrutu okasi di Yehovah du wan kfalek bigi sani gi yu. Ma san prenspari, na taki Yehovah du bun furu sani gi yu. A hari yu kon na en èn now yu de wan mati fu en (Yoh. 6:44). Sobun, aksi en fu yepi yu fu memre den okasi di a piki den begi fu yu, di a gi yu soifri san yu ben abi fanowdu na a yoisti ten, noso di a yepi yu fu psa wan muilek situwâsi. Te wi e prakseri den sani dati, dan wi o abi moro fertrow taki Yehovah o tan yepi wi. w24.06 21 ¶8

Wi no wani du nowan enkri sani di Yehovah no feni bun. Ma wi na sondu sma èn a kan psa makelek taki wi du wan sondu (Rom. 7:21-23). Sondro taki wi e ferwakti dati, wi kan kisi tesi fu du wan sani di no bun. Efu wi wani tan gi yesi na Yehovah nanga en Manpkin, dan wi musu gi yesi na a rai di Yesus e gi wi fu tan na ai gi tesi di kan meki taki wi du sondu. Wi alamala e kisi tesi fu du wan sani di no bun. Ma wi alamala abi wi eigi swakifasi. Sobun, san de wan tesi gi wi, no abi fu de wan tesi gi trawan. Fu eksempre, kande wan sma di trow wani abi seks nanga wan sma di no de en trowpatna, noso kande wan sma di no trow wan abi seks nanga wan trawan aladi den no trow. Kande wan tra sma musu kakafutu gi a tesi di a e kisi fu du wan sani di no krin. Kande a musu hori ensrefi fu no prei nanga en syen presi noso fu luku porno. Ma a kan tu taki wan tra sma e atibron esi, kande a abi heimemre, noso kande a no abi a dek’ati fu du san bun fu di a e frede san trawan o denki. w24.07 14 ¶3; 15 ¶5

Prakseri san ben kan psa efu den owruman ben weigri fu teki wan man baka na ini a gemeente baka di a sori berow. Noso fa a man ben o firi efu te a ben drai kon baka, den brada nanga sisa ben o weigri fu sori lobi gi en? A kan taki a ben o „sari so te, taki a lasi-ati”. Kande a ben o firi leki a no ben o man dini Yehovah noiti moro. Kande a ben o denki srefi taki Yehovah noiti no ben o man gi en pardon, èn taki na fu soso a ben o kenki den fasi fu en. Ma san moro ben kan psa efu den brada nanga sisa ben weigri fu gi a man pardon baka di a sori berow? A sani disi ben kan pori a matifasi di den ben abi nanga Yehovah. Fu san ede? Fu di den ben o sori taki den no de leki Yehovah di de klarklari fu gi sma pardon te den sori berow. Na presi fu dati, den ben o de leki Satan di abi ogr’ati èn di no e sori sar’ati gi sma. Fu taki en leti, den ben o meki Didibri gebroiki den fu meki a man tapu fu dini Yehovah.​—2 Kor. 2:10, 11; Ef. 4:27. w24.08 17 ¶7, 10-11

Yesus ben gi son brada a frantwortu fu yepi a gemeente na wan tra fasi. A gebroiki den owruman na ini Yerusalem fu seni Paulus, Barnabas, nanga trawan fu go luku den difrenti gemeente (Tori 11:22). Fu san ede? Den ben musu du a srefi sani di den dinari ini a diniwroko nanga owruman ben musu du. Den ben musu tranga den gemeente (Tori 15:40, 41). Kring-owruman abi furu fu du. Sonwan fu den e reis omeni kilometer fu go luku den gemeente. Ibri wiki, wan kring-owruman e hori difrenti lezing, a e go luku den brada nanga sisa, a e hori wan pionier konmakandra, wan konmakandra gi den owruman, èn sosrefi preikiwroko konmakandra. A e sreka lezing èn a e orga kring-konmakandra nanga kongres. A e gi leri na Pionierskoro, a e seti sani fu hori wan spesrutu konmakandra nanga den pionier na ini a kring. Boiti ala den sani disi, a bijkantoro wani taki a kring-owruman e poti prakseri na tra prenspari sani so srefi. Son leisi den sani dati musu du wantewante. w24.10 21 ¶12-13

Yehovah ben taigi a profeiti Yeremia san skrifi na ini a tekst fu tide. Paulus ben gebroiki den srefi wortu disi di a taki: „Mi no o memre den sondu fu den kwetikweti moro” (Hebr. 8:12). Ma san disi wani taki trutru? Te Bijbel e gebroiki a wortu „memre” dan a no de so ala ten taki wan sma e prakseri wan sani di ben psa wan leisi. Na presi fu dati, a kan de so tu taki a sma e du wan sani. Na ogriman di ben e anga na a postu sei Yesus ben aksi en: „Yesus, memre mi te yu kon na ini yu Kownukondre” (Luk. 23:42, 43). A man disi ben e aksi Yesus fu du wan sani gi en. Yesus taigi a man taki a ben o gi en wan opobaka. Sobun, te Yehovah e taki dati a no e memre den sondu fu wi moro, dan dati wani taki dati a gi wi pardon èn taki a no o du wan sani na ini a ten di e kon fu strafu wi gi den sondu di wi ben du. w25.02 10-11 ¶14-15

Iya, te wi sabi san na den fasi fu Yehovah, san na a wani fu en, èn san a lobi noso san a no lobi, dan ala ten wi o sabi san na a yoisti sani fu du. Aksi yusrefi: ’Now di mi sabi den sani disi fu Yehovah, dan sortu besroiti mi musu teki so taki a kan feni dati bun?’ (Ef. 5:17) Fu man du san Yehovah feni bun, dan son leisi wi musu du sani di den famiriman nanga mati fu wi no lobi. Kande wan p’pa nanga wan m’ma di abi a bun fu na umapkin fu den na prakseri, wani taki a trow nanga wan man di abi furu moni, noso di o man sorgu bun gi den. A p’pa nanga mama wani a sani disi aladi den sabi taki a man no e meki muiti fu go na fesi na ini a waarheid. A tru taki den wani taki na umapkin fu den abi wan bun libi, ma suma o yepi en fu tron wan lepi anbegiman fu Yehovah? Fa Yehovah e si a tori? Wi e feni a piki na Mateyus 6:33. A tekst disi e gi Kresten dek’ati fu tan „suku fosi a Kownukondre”. Aladi wi e lespeki wi p’pa nanga m’ma èn sosrefi den famiriman nanga mati fu wi, tòg a moro prenspari sani gi wi, na taki wi wani prisiri Yehovah ati. w25.01 17 ¶9-10

Na ini a ten disi, furu sma e gens a wroko fu wi. Dati meki wi abi a yepi fu Yehovah fanowdu fu man tan preiki a bun nyunsu fayafaya (Openb. 12:17). Fu san ede yu kan abi a fertrow taki Yehovah o horbaka gi yu? Wi kan leisi san a e taki na ini Yohanes kapitel 17. Yesus aksi Yehovah fu kibri den apostel fu en, èn na dati Yehovah du tu. A buku Tori fu den apostel e ferteri fa a yepi den apostel fu preiki fayafaya aladi sma ben e ferfolgu den. Yesus begi Yehovah tu fu kibri den sma di ben e bribi den sani di den apostel ben e taki. Dati wani taki dati Yesus begi tu gi yu. Yehovah no kba piki a begi fu Yesus. A o yepi yu neleki fa a ben yepi den apostel (Yoh. 17:11, 15, 20). Now di a kba e kon moro krosbei, a kan taki a o moro muilek gi wi fu preiki a bun nyunsu. Ma Yesus gi wi a dyaranti taki a o gi wi a yepi di wi abi fanowdu fu man du a wroko disi fayafaya.​—Luk. 21:12-15. w25.03 18 ¶13-14

A pipel fu Gado kan „bari fu prisiri” fu di den de nanga tangi gi san Yehovah e du gi den. Den tru tori nanga den pramisi na ini Gado Wortu e gi wi dek’ati. Boiti dati wi abi wan trutru howpu fu di Krestes dede gi wi. Den sani disi e meki wi firi bun na ini wi ati. Te wi e taki fu den sani disi, dan dati e gi wi prisiri trutru (Ps. 34:8; 133:1-3). Tu prenspari sani fu a tru anbegi, na a lobi nanga a wánfasi di de na mindri a pipel fu Gado. Te wi e luku fa den futuboi fu Gado „de wán trutru”, dan dati e yepi wi fu ferstan fa a libi o de na ini a nyun grontapu pe sma o abi moro lobi nanga wánfasi (Kol. 3:14). Efu wan sma wani de koloku trutru, dan a musu kon na ini a tru anbegi. Awinsi san a grontapu disi e denki fu Yehovah en futuboi, den abi wan bun nen na Yehovah èn na ala sma di e anbegi en.​—Yes. 65:15. w24.04 21 ¶7-8

Fa wi kan yepi Kresten di wani trow? Wan fasi fa wi kan du dati na fu luku bun san wi e taki (Ef. 4:29). Wi kan aksi wisrefi: ’Mi e ferferi den sma di wani trow? Te mi e si taki wan brada nanga wan sisa di no trow, e taki nanga makandra, dan mi e denki wantron taki den abi wan sani nanga makandra?’ (1 Tim. 5:13) Boiti dati, noiti wi musu gi den Kresten disi a firi taki den no warti, noso taki wan sani no bun nanga den fu di den no trow. A moro betre fu suku okasi pe wi kan prèise den Kresten brada nanga sisa di no trow! Fa a de efu wi denki taki wan brada nanga wan sisa ben o bun gi makandra? Bijbel e ferteri wi taki wi musu hori den firi fu trawan na prakseri (Rom. 15:2). Furu sma di no trow no wani taki trawan tyari den fu go meki kennis nanga wan sma di ben o bun gi den. Wi musu lespeki a sani dati (2 Tes. 3:11). Trawan kan aksi wi fu yepi den pkinso, ma wi no musu suku fu yepi den efu den no aksi wi fu du dati.​—Odo 3:27. w24.05 24-25 ¶14-15

Wi e libi na ini wan grontapu pe problema kan miti wi wantronso. Den problema disi kan meki a libi muilek gi wi noso den kan kenki wi heri libi. Dati meki wi breiti srefsrefi taki wi kan suku yepi na Yehovah Gado. Te Yehovah e yepi wi, dan dati e gi wi a fertrow taki a de „wan libilibi Gado!” (Ps. 18:46). Ma baka di David taki dati Yehovah na wan libilibi Gado, dan a kari Yehovah „a Stonbergi fu mi”. San dati wani taki? Bijbel e kari Yehovah wan „stonbergi” fu yepi wi fu ferstan sonwan fu den fasi fu en. Te den futuboi fu Yehovah e prèise en na ini Bijbel gi den moi fasi fu en, dan nofo tron den e kari en wan stonbergi. A fosi leisi te Bijbel e kari Yehovah „wan Stonbergi”, de fu feni na ini Deuteronomium 32:4. Na ini begi Hana ben taki dati „a Gado fu wi na wan stonbergi èn nowan sma de leki en” (1 Sam. 2:2). Habakuk ben kari Yehovah „mi Stonbergi” (Hab. 1:12). A skrifiman fu Psalm 73 taki: „Mi o fertrow tapu Gado nanga mi heri ati. En na mi stonbergi” (Ps. 73:26). Èn Yehovah srefi ben kari ensrefi wan stonbergi.​—Yes. 44:8. w24.06 26 ¶1, 3

Den kownu fu Israel di Yehovah ben feni bun, ben e anbegi en nanga den heri ati. Bijbel e taki fu Yosia: „Nowan kownu ben de fosi Yosia di du someni muiti fu anbegi Yehovah baka nanga en heri ati” (2 Kow. 23:25). Fa a de nanga Salomo di ben du ogri na en owrudei? „A no ben e dini Yehovah en Gado nanga en heri ati moro” (1 Kow. 11:4). Èn Bijbel e taki fu Kownu Abiam taki a „no ben dini Yehovah en Gado nanga en heri ati” (1 Kow. 15:3). Nofo tron Bijbel e gebroiki a wortu „ati” fu sori fa wi de trutru. Disi abi fu du nanga den sani di wi wani, den sani di wi e prakseri, a fasi fa wi e denki, a reide di wi abi fu du sani, èn den marki di wi wani doro. Ma san a wani taki fu dini Yehovah nanga yu heri ati? Wan sma di e dini Yehovah nanga en heri ati no e anbegi Gado soso fu di a sabi taki a musu du dati. Na presi fu dati, a e anbegi Gado fu di a lobi en èn fu di a abi bigi lespeki gi Yehovah en heri libi langa. w24.07 21 ¶4-5

Yehovah e gebroiki wan agersitori fu sori wi fa a e figi den sondu fu wi puru. A e taki: „Mi o figi den ogri fu yu puru èn mi o tapu den sondu fu yu nanga wan wolku” (Yes. 44:22). Te Yehovah e gi wi pardon, dan a de neleki a e tapu den sondu fu wi nanga wan wolku, so taki wi no e si den èn en srefi no e si den tu. San den agersitori disi e leri wi? Te Yehovah e gi wi pardon fu den sondu fu wi, dan wi no musu meki wi konsensi tan fon wi fu di wi ben du den sondu dati. A ferlusu-ofrandi fu Yesus pai kba gi den sondu fu wi. Te Yehovah gi wi pardon fu wan sondu, dan a de neleki wi noiti no ben du a sondu dati. Na so Yehovah e gi wi pardon te wi abi berow fu den sondu fu wi. Te Yehovah e gi wi pardon, dan wi kan de seiker taki a tron wi mati baka. Disi e yepi wi fu no tan sari fu a sondu di wi du. w25.02 10 ¶11-14

Yehovah gi den owruman di e taki nanga sma di du wan seryusu sondu, a frantwortu fu hori a gemeente krin (1 Kor. 5:7). Ma den owruman e du ala san den man tu fu yepi wan sma fu sori berow. Èn te den e yepi a sma, den e tan howpu taki a sma o kenki. Fu san ede? Fu di den wani teki na eksempre fu Yehovah di „lobi sma trutru èn [di] a abi sari-ati” (Yak. 5:11). Luku fa na apostel Yohanes di ben kon owru kba ben sori taki a ben lobi den brada nanga sisa fu en. A ben skrifi: „Mi pikin, mi e skrifi unu den sani disi, so taki unu no du wan sondu. Ma toku, efu wan sma du wan sondu, dan wi abi wan yepiman na a Tata, dati na Yesus Krestes, wan reti-ati sma” (1 Yoh. 2:1). A sari taki son leisi wan Kresten no wani sori berow. Efu dati de so, dan den musu puru en fu a gemeente. w24.08 25 ¶19-20

Kande yu e teki yusrefi gersi nanga trawan. No du dati. Fu san ede? Fu di Yehovah no e teki a wan sma gersi nanga a trawan (Gal. 6:4). Fu eksempre, Maria ben gi Yesus diri switismeri-oli leki kado (Yoh. 12:3-5). Ma a pôti uma di masra ben dede ben gi tu pkin sensi leki bijdrage na ini a tempel. Den pkin sensi disi no ben warti furu (Luk. 21:1-4). Tòg Yesus no ben teki den tu uma disi gersi nanga makandra. A ben si taki Maria nanga a pôti uma disi ben abi bribi. Yesus ben sori krin taki a ben e denki leki en P’pa. Sobun, yu kan de seiker taki Yehovah e si ala san yu e du gi en. A e si taki yu abi bribi èn taki yu lobi en. Den sani dati prenspari gi en, awinsi yu feni taki den no warti furu. Wi alamala e tweifri son leisi. Ma Bijbel kan yepi wi fu no tweifri moro. Den piki tapu den aksi di yu abi, o yepi yu fu no o tweifri moro. A de krin taki Yehovah e poti prakseri na yu. A e warderi a muiti di yu e meki fu dini en èn a o blesi yu seiker. Yehovah lobi ala den getrow futuboi fu en èn i a e broko en ede nanga den. w24.10 25 ¶3; 29 ¶17-18