April

Wi na ini a ten disi musu poti bribi na ini a lusu-paiman fu man kisi têgo libi. (Ef. 1:7). A tru taki den sma di Yesus ben kari den „tra skapu”, no e nyan fu a brede èn den no e dringi tu fu a win na a Avondmaal fu Masra. Den no musu du dati tu (Yoh. 10:16). Ma tòg den e kisi wini fu a skin nanga a brudu fu Yesus Krestes. Den e kisi wini fu di den e bribi na ini a srakti-ofrandi fu Yesus èn na ini den moi sani di a e du (Yoh. 6:53). Den sma di musu nyan fu a brede èn dringi fu a win e sori taki den de na ini a nyun ferbontu èn taki den abi a howpu fu tiri na ini a Kownukondre na hemel. Dati meki, awinsi wi de fu a grupu fu salfuwan, noso fu den tra skapu, wi kan leri taki wi alamala musu bribi tranga na ini a lusu-paiman efu wi wani libi fu têgo. w24.12 13 ¶14, 16

Na a Avondmaal fu Masra, Yesus ben gi den apostel fu en brede sondro srudeki èn a taigi den taki a brede dati ben e prenki en skin. Dan a meki wan kan nanga win psa na den fesi fu meki den dringi èn a taki dati a win disi ben e prenki a „brudu fu a frubontu” (Mark. 14:22-25; Luk. 22:20; 1 Kor. 11:24). A nyun ferbontu disi meki nanga na Israel fu Gado. Dati na den wan di o tiri makandra nanga Yesus „na ini a Kownukondre fu Gado” (Hebr. 8:6, 10; 9:15). Den sani di Yesus ben taki na a Avondmaal fu Masra abi fu du nanga a „pikin ipi”. Den fosi sma na ini a grupu disi ben de den getrow apostel di ben de drape na ini a kamra makandra nanga Yesus. Na den sma disi o tiri na hemel makandra nanga Yesus. w24.12 11 ¶9-10

Wan fu den bun mati fu Yesus tori en. Baka dati, den feanti fu en grabu en, den kosi en, èn den krutu en fu sani di a no ben du. Den gi en dedestrafu èn baka dati den wipi en. Te fu kba den spikri Yesus na wan postu. Yesus tan hordoro aladi a ben e pina so hebi. Ma a no de fu taki dati a ben hati Yehovah trutru fu si san ben e psa nanga a Manpkin fu en. Yehovah ben abi a makti fu tyari wan kba kon na a pina di en Manpkin ben e pina, ma tòg a no du dati. Fu san ede a meki a pina èn dede? Fu di Yehovah lobi yu. Na ofrandi disi e sori o furu Yehovah lobi yu. Aladi a ben hati en srefsrefi, tòg a gi en eigi lobi Manpkin leki srakti-ofrandi fu man ferlusu yu fu sondu nanga dede (1 Yoh. 4:9, 10). A wani yepi ibriwan fu wi fu dini en aladi wi na sondu sma ete, èn na ini a ten di e kon a wani tyari wan kba kon na sondu fu ala ten. w24.08 6 ¶13-14

Wi kan ferstan moro bun fa Yehovah lobi wi te wi e prakseri fa a ben musu fu hati en fu si fa en Manpkin ben e pina. Satan taki dati nowan enkri futuboi fu Gado o tan gi yesi na en te tesi e miti en. Fu sori taki Satan na wan leiman, meki Yehovah gi pasi taki Yesus pina fosi a dede (Yob 2:1-5). Yehovah ben e luku fa den kerki fesiman ben e spotu Yesus, fa den srudati wipi en teleki en skin ben e brudu, èn fa den spikri en na wan postu. Dan Yehovah luku fa den libi en lobi Manpkin fu pina teleki a dede (Mat. 27:28-31, 39). Yehovah ben abi a makti fu tyari wan kba kon na den sani disi (Mat. 27:42, 43). Ma efu Gado ben du wan sani, dan wan lusu-paiman no ben o pai èn wi no ben o abi wan howpu. Dati meki Yehovah gi pasi taki en Manpkin pina teleki a hari en lasti bro. w25.01 22 ¶7

Tapu 16 Nisan fu a yari 33, tu fu den disipel fu Yesus e gwe libi Yerusalem èn den e go na Ema-us. Den e sari èn den e frede. Wan man e waka kon miti den te den de na pasi èn a e waka nanga den. Den disipel e ferteri a man disi sortu ogri sma du nanga Yesus. Ne a man bigin ferteri den sani di den no ben o fergiti noiti. A bigin ferklari fu san ede a Mesias ben musu pina èn dede. Di den doro na Ema-us, dan den kon ferstan taki a man disi di den no sabi ben de Yesus di Gado ben gi wan opobaka (Luk. 24:13-35). Na ini den lasti 40 dei di Yesus ben de na grontapu, a sori ensrefi wan tu leisi na den disipel fu en. Na a ten dati, den bakaman fu Yesus ben e sari èn den ben e frede. Ma now den ben de nanga prisiri èn den no ben e frede fu go preiki a bun nyun fu a kownukondre èn fu gi sma leri. w24.10 12 ¶1-3

Wan pkin e gro kon tron wan bigi sma baka ten, ma nowan sma kan gro kon tron wan lepi Kresten sondro taki a ben meki muiti gi dati. Fu eksempre, den brada nanga sisa na ini Korente ben bribi a bun nyunsu, den dopu, santa yeye kon na den tapu, èn den leri furu fu den sani di na apostel Paulus ben leri den (Tori 18:8-11). Ma tòg, wan tu yari baka di den ben dopu, furu fu den no ben de lepi Kresten ete (1 Kor. 3:2). Fu man tron wan lepi Kresten, dan wi musu wani dati fosi. Den sma di no wani kon lepi, wani tan wan beibi na yeyefasi èn den no o gro (Odo 1:22). Wi no wani fu de leki den sma di de bigi sma kba, ma di no wani teki frantwortu na den tapu èn di wani nomo meki den papa nanga mama teki besroiti gi den. Na presi fu dati, na wi musu sorgu taki wi e gro kon tron lepi Kresten. Efu yu e meki muiti fu tron wan lepi Kresten, dan begi Yehovah meki a „gi yu a firi nanga a krakti” fu tron wan lepi Kresten.​—Fil. 2:13. w24.04 4 ¶9-10

Te a abi fu du nanga a fasi fa Yehovah e krutu sma, dan a e taigi wi krin fa a e denki fu a tori dati. Yehovah no gaw fu pori sma fu ala ten. A abi furu sar’ati èn a de klarklari fu sori sar’ati te dati fiti. San wi sabi fu den sma di no o kisi wan opobaka? Bijbel e taki fu wan tu sma nomo di no o kisi wan opobaka. Yesus ben sori taki Yudas Iskariot no ben o kisi wan opobaka (Mark. 14:21; luku sosrefi Yohanes 17:12.). Yudas ben sabi heri bun taki a ben e gens Yehovah Gado nanga en Manpkin (Luku Markus 3:29; w07 15/7 blz. 17 par. 8-blz 18 par. 10.). Yesus ben taki tu dati sonwan fu den kerki fesiman di ben gens en ben o dede, ma howpu no ben de gi den fu kisi wan opobaka (Mat. 23:33). Èn na apostel Paulus ben warskow taki den sma di ben fadon kmoto na bribi, no ben o kisi wan opobaka efu den no sori berow.​—Hebr. 6:4-8; 10:29. w24.05 4 ¶10-11

Te wi e tan krosbei fu Yehovah, dan Satan no o man du ogri nanga wi fu ala ten (1 Yoh. 3:8). Na ini a nyun grontapu, Yehovah o sorgu taki a bribi fu den getrow mati fu en tan tranga, èn a o kibri den tu gi dede (Openb. 21:4). A de wan bigi grani taki wi mag de na ini a tenti fu Yehovah èn taki wi kan tan abi wan bun matifasi nanga en (Esek. 37:27). San wi musu du efu wi wani tan na ini a tenti fu Yehovah? Efu wan sma gi yu wani kari fu kon na ini en oso, dan a no de fu taki dati yu ben o wani sabi san a sma e ferwakti fu yu. Na so a de tu taki wi ben o wani sabi san Yehovah e ferwakti fu den wan di wani tan na ini a tenti fu en. Fu di wi lobi Yehovah, meki wi wani du ala san wi man fu „tan prisiri en dorodoro” (Kol. 1:10). Ala ten wi musu abi dipi lespeki gi en. Te wi abi lespeki gi en, dan disi o yepi wi fu no du sani di ben o hati en èn a o yepi wi tu fu ’abi sakafasi aladi wi e waka’ nanga a Gado fu wi.​—Mika 6:8. w24.06 4 ¶8-9

Yehovah ben aksi Abraham fu gi en eigi manpkin leki ofrandi. A no de fu taki dati a sani disi no ben makelek gi Abraham. Tòg a gi yesi na Yehovah. Ma di Abraham ben de fu kiri en manpkin, dan Gado tapu en fu no du dati. Na eksempre disi e yepi wi fu kon sabi san Yehovah ben o du na ini a ten di e kon. Yehovah ben o de klarklari fu gi en eigi lobi Manpkin leki ofrandi. Na so furu Yehovah lobi libisma (Gen. 22:1-18). Di Yehovah gi den Israelsma a Wet, dan a taigi den fu tyari ofrandi so taki den ben kan kisi pardon fu den sondu fu den (Lef. 4:27-29; 17:11). Den ofrandi disi ben e prenki wan moro prenspari ofrandi di ben o ferlusu ala libisma fu sondu nanga dede. Gado ben taigi den profeiti fu en fu skrifi fu a pramisi pkin. Den ferklari taki a wan-enkri Manpkin fu Gado, ben o abi fu pina èn dede, so taki libisma ben kan kisi ferlusu fu sondu nanga dede. A du disi gi yu sosrefi!​—Yes. 53:1-12. w24.08 4 ¶7-8

Te yu leisi wan tu vers, dan prakseri fa yu kan fiti den sani di yu leri. Te yu e leisi wan pisi fu Gado Wortu, dan aksi yusrefi: ’Fa mi kan gebroiki den sani disi tide noso na ini a ten di e kon?’ Fu eksempre, kow taki dati yu ben leisi 1 Tesalonikasma 5:17, 18. Baka di yu leisi den tu vers disi, dan yu kan stop fu prakseri o furu yu e begi èn efu yu e taigi Gado ala san de na tapu yu ati. Yu kan prakseri tu gi sortu sani yu de nanga tangi. Kande yu e besroiti fu taigi Yehovah tangi gi dri spesrutu sani. Awinsi yu e teki wan tu miniti nomo fu poti ala yu prakseri na san Bijbel e leri, tòg dati o yepi yu fu ferstan Gado Wortu èn fu du san a e taki. Èn efu ibri dei yu e fiti san yu leisi na ini Bijbel, dan yu o tron wan moro bun futuboi fu Gado te fu kba. w24.09 4-5 ¶9-10

Yehovah meki wi na so wan fasi taki wi o de moro koloku te wi e gi sma sani leki te wi e kisi sani fu sma. Wi e firi bun te wi man yepi wi Kresten brada nanga sisa. Èn wi de koloku te den e sori taki den e warderi san wi du gi den. Ma awinsi sma no e sori warderi gi a bun di wi du gi den, tòg wi kan de nanga prisiri taki wi du san reti. Noiti no fergiti taki awinsi san yu e gi, „Yehovah man gi yu moro leki dati srefi” (2 Kron. 25:9). Noiti wi o man gi trawan moro leki san Yehovah man gi wi. Èn te Yehovah e pai wi, dan dati na a moro bun pai di wi kan kisi. Dati meki wi musu tan du bun gi trawan neleki fa wi Tata na hemel e du dati. w24.09 31 ¶20-21

Yehovah abi sar’ati èn a e firi gi sma (Ps. 103:13; Yes. 49:15). A e ferstan fa sma e firi. Te wi e sari, dan a e sari tu (Sak. 2:8). A e yepi wi fu kon sabi en èn fu tron en mati (Ps. 25:14; Tori 17:27). Èn a abi sakafasi. A „e saka ensrefi fu luku hemel nanga grontapu. A e opo a mofinawan puru na doti” (Ps. 113:6, 7). Na den sani disi e meki taki wi wani gi wi bigi Gado grani Wi e gi Yehovah grani so taki tra sma kan kon sabi en. Furu sma no sabi den tru tori fu Yehovah. Fu san ede? Fu di Satan ferteri ogr’ati lei fu En èn sma e bribi den lei dati (2 Kor. 4:4). Satan meki sma bribi taki Yehovah na wan ogr’ati Gado di no e broko en ede nanga libisma èn taki na en e meki taki so furu pina de na grontapu. Ma wi sabi san tru. Wi abi na okasi fu ferteri sma suma na Gado trutru èn wi kan yepi den fu gi en grani tu.​—Yes. 43:10. w25.01 3 ¶6-7

Aladi Yesus, a Manpikin fu Gado, ben de sondro sondu èn a ben e du wondru, tòg Satan ben e gebroiki sma fu ferteri furu lei fu en. Fu eksempre, den kerki fesiman ben e ferteri sma taki Yesus ben e puru ogri yeye na sma tapu nanga yepi fu a „tiriman fu den ogri yeye” (Mark. 3:22). Di Yesus ben de na fesi krutu, dan den kerki fesiman taki dati a ben taki ogri fu Gado èn den gi den ip’ipi sma drape dek’ati fu kiri Yesus (Mat. 27:20). Bakaten di den futuboi fu Krestes ben e preiki a bun nyunsu, dan den sma di ben e gens den „sutu faya gi den trakondre sma èn den kori den” fu ferfolgu den Kresten dati (Tori 14:2, 19). Luku san A Waktitoren fu 1 december 1998 e taki fu Tori fu den apostel 14:2: „Den sma di ben e horbaka gi Satan no ben wani arki a boskopu di den Kresten ben e preiki. Boiti dati, den ferteri ogri-ati lei fu den so taki sma no ben o arki den èn so taki sma ben o teige den.” Te nanga now Satan e ferteri lei èn a e tan „kori sma na heri grontapu”. w24.04 11 ¶15-16

A no a ten te a sma dede o bepaal efu a o kisi wan opobaka. Yehovah na a moro bigi Krutuman. Ala ten a e krutu sma na wan reti fasi (Ps. 33:4, 5). Wi kan abi a fertrow taki „a sma di e krutu heri grontapu” o du san reti. Wi kan ferstan tu fu san ede a no a ten te wan sma dede noso a presi pe a e tan o bepaal efu a o kisi têgo libi. Yehovah noiti ben o krutu milyunmilyun sma leki „bokoboko”, soso fu di den e libi na ini kondre pe noiti den no kisi na okasi fu kon sabi a Kownukondre boskopu (Mat. 25:46). A ret’ati Krutuman fu heri grontapu e broko en ede moro nanga den sma dati leki fa wi e du dati. Wi no sabi fa Yehovah o du sani na a ten fu a bigi banawtu. Kande wan tu fu den sma disi o kisi na okasi fu kon leri sabi Yehovah, fu poti bribi na ini en, èn fu teki a sei fu en te a o meki sma na heri grontapu kon sabi a nen fu en.​—Esek. 38:16. w24.05 12 ¶14-15

A pipel fu Yehovah lobi fu yepi makandra (2 Kor. 8:4). Ma son leisi, den abi dek’ati fanowdu fu man du dati. Fu eksempre, te feti de na ini a kondre, dan den owruman fu den gemeente e ferstan taki den brada nanga sisa abi yepi nanga dek’ati fanowdu. Kande den musu kisi buku nanga tra sani, noso kande den abi n’nyan fanowdu, krosi, noso wan presi fu tan. Son leisi, ogri ben kan miti den owruman disi. Ma fu di den lobi den brada nanga sisa, meki den e du ala san den man fu sorgu taki den e kisi san den abi fanowdu. Na ini den situwâsi dati, a prenspari taki wi e tan na ini wánfasi. Gi yesi na den rai fu a bijkantoro na ini a kondre fu yu (Hebr. 13:17). Owruman musu abi a gwenti fu luku den rai di e sori fa fu sreka gi rampu èn san den musu du te wan rampu de (1 Kor. 14:33, 40). Abi dek’ati, ma luku bun (Odo 22:3). Gebroiki yu ferstan. Sorgu taki yu e tan veilig. Fertrow tapu Yehovah. A kan yepi yu fu horbaka gi yu brada nanga sisa sondro taki ogri miti yu. w24.07 4 ¶8; 5 ¶11

Kownu David ben sabi Yehovah èn a ben e fertrow na en tapu. Di den feanti fu en nanga Kownu Saul ben e suku fu kiri en, dan David begi Yehovah fu yepi en. Di Gado piki a begi fu David èn di a ferlusu en, dan David taki: „Yehovah na wan libilibi Gado!” (Ps. 18:46) San David ben wani taki nanga den wortu disi? Soleki fa wan buku e taki, dan David ben e sori krin taki Yehovah na a tru Gado di ala ten o yepi den futuboi fu en. David ben sabi taki a Gado fu en ben sabi san ben e miti en èn taki a ben de klarklari fu yepi en. A sani dati gi David dek’ati fu tan dini Yehovah go doro èn fu prèise en (Ps. 18:28, 29, 49). Te wi e bribi taki Yehovah na a libilibi Gado, dan dati kan yepi wi fu tan dini en fayafaya. Wi o man hordoro te tesi miti wi èn wi o tan dini en fayafaya. Boiti dati, wi o du ala san wi man fu tan krosbei fu Yehovah. w24.06 20-21 ¶3-4

San wi kan leri fu den sani di na apostel Paulus taigi den Tesalonikasma? Te wi e yere wan sani di no e kruderi nanga san wi leri fu Bijbel, noso te wi e yere wan span tori, dan wi musu gebroiki wi ferstan. Na ini a Sovyet-Unie, sma fu a regering ben seni wan brifi gi den brada fu wi èn den meki den brada denki taki a brifi disi ben kmoto fu na edekantoro. A brifi ben e gi wan tu fu den brada dek’ati fu bigin wan organisâsi di ben e wroko aparti fu Yehovah en organisâsi. A ben gersi leki a brifi ben kmoto fu Yehovah en organisâsi. Ma den brada di ben e dini Yehovah getrow, no meki a sani disi kori den. Den kon si taki a boskopu na ini a brifi no ben e kruderi nanga san den ben leri. Na ini a ten disi, sma di e gens a waarheid e gebroiki Internet nanga social media son leisi fu bruya wi, so taki prati kan kon na wi mindri. Na presi taki wi e ’meki sma bruya wi denki so esi’, wi musu ondrosuku efu den sani di wi e yere noso e leisi e kruderi nanga den tru tori di wi sabi kba.​—2 Tes. 2:2; 1 Yoh. 4:1. w24.07 12 ¶14-15

A moro prenspari besroiti di wan libisma kan teki, na fu gi ensrefi abra na Yehovah èn fu anbegi en makandra nanga wi brada nanga sisa. Yehovah wani taki ala sma du dati. Fu san ede? A wani taki den tron mati fu en èn taki den libi fu têgo (Deut. 30:19, 20; Gal. 6:7, 8). Ma Yehovah no e dwengi nowan sma fu dini en. A e meki ibri sma besroiti gi ensrefi san a o du. Ma fa a de te wan dopu Kresten du wan seryusu sondu? Efu a no e sori berow, dan den musu puru en fu a gemeente (1 Kor. 5:13). Ma awinsi den brada puru a sma fu a gemeente, tòg Yehovah wani taki a sma dati e sori berow èn taki a e tron en mati baka. Fu taki en leti, wan prenspari reide fu san ede Yehovah sorgu gi a lusu-paiman, na fu gi sma pardon te den sori berow. Yehovah na wan lob’ati Gado di e gi sma di du seryusu sondu a dek’ati fu sori berow.​—Sak. 1:3; Rom. 2:4; Yak. 4:8. w24.08 14 ¶1-2

Na a ten na apostel Yohanes skrifi a di fu dri brifi fu en, son sma ben e leri sma sani di no tru èn den ben e tyari seryusu problema kon na ini a gemeente. Ma trawan „tan gi yesi na a tru leri” (2 Yoh. 4, 6). Den getrow Kresten disi meki taki Yohanes nanga Yehovah ben breiti trutru (Odo 27:11). San disi e leri wi? Te wi e tan gi yesi na Yehovah dan wi o de koloku èn trawan o de koloku tu (1 Yoh. 5:3). Fu eksempre, wi de koloku fu di wi sabi taki Yehovah breiti nanga wi. A e prisiri te wi e weigri fu du san no bun èn te wi e gi yesi na den wet fu en. Tra engel na hemel e prisiri tu (Luk. 15:10). Wi kan prisiri tu te wi e si fa wi brada nanga sisa e tan gi yesi na Yehovah (2 Tes. 1:4). Èn te a grontapu fu Satan kisi pori, dan wi o de koloku fu di wi tan getrow na Yehovah. w24.11 12 ¶17-18

O langa yu musu luku a sma fosi yu ferteri en taki yu abi lobifiri gi en? Efu yu go taki nanga en tumsi gaw, dan a kan denki taki yu e teki besroiti sondro fu denki (Odo 29:20). Na a tra sei, efu a sma sabi taki yu abi firi gi en, ma yu e teki tumsi langa fu go taki nanga en, dan a sma kan denki taki yu e draidrai tumsi fosi yu e teki besroiti (Preik. 11:4). Hori na prakseri taki te yu e go taki nanga a sma, dan yu no abi fu de seiker taki yu o trow nanga a sma dati. Ma san yu musu sabi seiker, na taki yu de klarklari fu trow èn taki a sma kan de wan bun trowpatna gi yu. Ma san yu musu du efu yu firi taki wan sma wani kon leri sabi yu moro bun? Efu yu no wani de nanga a sma, dan pruberi fu du sani fu sori en taki yu no wani. A no ben o de wan lob’ati sani efu yu meki a sma denki taki yu wani de nanga en, aladi dati no de so.​—Ef. 4:25. w24.05 22-23 ¶9-10

Yesus o teki soso den Kresten di de trutru salfuwan èn di de getrow, ’tyari gwe’ fu tiri makandra nanga en na ini a Kownukondre. Wan salfuwan di no de na ai no o kisi a grani fu de wan fu den sma „di Gado kari” (Mat. 24:31). Èn ala den sma di abi a howpu fu libi fu têgo na grontapu musu si den wortu fu Yesus tu leki wan warskow fu tan na ai èn fu tan getrow. Fu di wi kon sabi Yehovah bun, meki wi abi a fertrow taki ala ten a e du san reti. Sobun a no e ferwondru wi te Yehovah e besroiti fu salfu son getrow Kresten na ini a ten disi. Wi sabi ete san Yesus ben taki na ini na agersitori fu den wrokoman di ben kon wroko feifi yuru bakadina na ini a droifidyari (Mat. 20:1-16). Den sma di ben kisi a kari fu kon wroko na ini a droifidyari moro lati na ini a dei, kisi a srefi pai leki den wan di ben bigin wroko moro fruku. Na so a de tu taki awinsi o ten wan salfuwan kisi a kari, tòg den o kisi a grani fu go na hemel efu den e tan getrow. w24.09 24 ¶15-17

Wi kan leri fu Yesus te wi e luku san a du di sma ben du ogri nanga en. Furu sma no ben e libi bun nanga en, sosrefi en famiri. Den famiriman fu en di no ben de na bribi ben taki dati a ben lasi en ferstan, den kerki fesiman ben taki dati a ben e wroko nanga ogri yeye, èn den srudati fu Rome spotu en, den fon en, èn den kiri en te fu kba (Mark. 3:21, 22; 14:55; 15:16-20, 35-37). Aladi sma ben e du den sani disi nanga en, tòg Yesus noiti no pai ogri fu ogri. San wi kan leri fu na eksempre fu en? (1 Petr. 2:21-23) Na eksempre fu Yesus e leri wi san wi musu du te sma e du ogri nanga wi. Yesus ben sabi o ten a ben musu tan pî èn o ten a ben musu taki (Mat. 26:62-64). Son leisi te sma ben e ferteri lei fu en, dan a no ben e taki noti (Mat. 11:19). Te a ben e taki wan sani, dan a no ben e kosi sma èn a no ben e taigi den taki a ben o pai den baka gi a sani di den ben du nanga en. w24.11 4-5 ¶9-10

Kow taki dati yu gi wan sma di yu lobi wan moi kado di a kan gebroiki bun. A no de fu taki dati a ben o hati yu te a sma e poti a kado gwe, ma dan a no e poti prakseri moro na en. Na a tra sei yu ben o breiti srefsrefi efu a sma e gebroiki a kado fu yu bun èn te a e taigi yu tangi gi dati. San na agersitori disi abi fu du nanga a lusu-paiman? Yehovah gi en Manpkin fu dede gi wi. Sobun, Yehovah musu fu breiti srefsrefi te wi e sori taki wi de nanga tangi gi a warti kado dati èn gi a lobi di a e sori gi wi. Na fu di a lobi wi meki a sorgu gi a lusu-paiman (Yoh. 3:16; Rom. 5:7, 8). Ma efu wi e no e warderi a lusu-paiman moro, dan a ben o de neleki wi e poti a moi kado di Gado gi wi, na wan presi pe wi no man si en. Efu wi no wani taki dati psa, dan wi musu kon abi a gwenti fu prakseri san Yehovah nanga Krestes du gi wi. w25.01 26 ¶1-2

Wan brada di doro den marki fu man tron owruman no musu de wan sma di de nyun na ini a bribi. Fu man tron wan owruman, yu no abi fu de wan sma di dopu furu yari kba. Ma tòg yu musu gro kon tron wan lepi Kresten fu man kisi a grani dati èn dati e teki ten. Fosi yu tron wan owruman, dan neleki Yesus, yu musu sori taki yu abi sakafasi èn taki yu de klarklari fu wakti teleki Yehovah gi yu wan grani (Mat. 20:23; Fil. 2:5-8). Yu e sori taki yu e „tai hori” na Yehovah te yu e tan gi yesi na en. Dati meki yu e hori yusrefi na den wet fu Yehovah èn na den rai di yu e kisi nanga yepi fu en organisâsi. Bijbel e taki krin taki owruman musu sabi fa fu gi leri. Disi wani taki dati yu musu man hori kfalek moi lezing? Nôno. A no ala owruman na bun publiki takiman. Ma te owruman e preiki, èn te den e go luku den skapu, dan den musu man gebroiki Bijbel bun fu gi den brada nanga sisa dek’ati èn fu gi den leri. w24.11 23-24 ¶14-15

Te yu e leisi wan sani na ini Bijbel di yu no e ferstan, dan ondrosuku a tori dati moro fini. Baka dati, meki ten fu denki fu den sani di yu studeri èn fu den sani di yu leri fu Yehovah, fu en Manpkin, èn fu a lobi di den abi gi yu (Ps. 119:97). No las’ati efu yu no feni wan nyun sani ibri leisi te yu e leisi Bijbel noso te yu e ondrosuku sani moro fini. Fu taki en leti, yu musu si yusrefi leki wan sma di e suku gowtu. Nofo tron, wan sma di e suku gowtu e wroko omeni yuru noso omeni dei langa fosi a feni pkinso gowtu. Ma tòg a e tan suku nanga pasensi fu di ibri pisi gowtu di a e feni, awinsi fa a pkin, prenspari gi en. A no de fu taki dati ibri nyun sani di wi e leri fu Bijbel warti moro gowtu (Odo 8:10). Sobun, tan leisi Bijbel èn tan ondrosuku en moro fini fu leri nyun sani.​—Ps. 1:2. w25.01 25 ¶14-15

Yehovah wani taki wi musu de klarklari fu gi trawan pardon te den du wan hati sani nanga wi (Ps. 86:5; Luk. 17:4; Ef. 4:32). Kande a e hati wi trutru te wan sma e taki noso e du wan hati sani nanga wi, spesrutu te a sma dati na wan bun mati noso wan famiriman fu wi (Ps. 55:12-14). Son leisi, a sani di a sma du kan hati wi so te taki a gersi leki wan sma sutu wi nanga wan nefi (Odo 12:18). Kande wi e pruberi fu du leki a sani di a sma du no e hati wi. Ma dati ben o de neleki wan sma sutu wi nanga wan nefi èn wi libi a nefi na ini wi skin. Na so a de tu taki wi no kan ferwakti taki wi o firi moro bun te wi e du leki a sani di psa no e hati wi. Te wan sma du wan hati sani nanga wi, dan nofo tron wi e ati bron. A tru taki Bijbel e taki dati wi kan ati bron. Ma a e warskow wi tu taki wi no musu tan nanga ati bron (Ps. 4:4; Ef. 4:26). Fu san ede? Fu di atibron furu tron e tyari takru bakapisi kon (Yak. 1:20). Hori na prakseri taki wi kan ati bron, ma wi kan besroiti fu no tan nanga atibron. w25.02 15 ¶4-6

Yesus ben ferteri wan tori di e sori taki wan sma di e kibri moni „no gudu na ini Gado ai” (Luk. 12:16-21). Nowan sma no sabi san o psa tamara (Odo 23:4, 5; Yak. 4:13-15). Boiti dati, Yesus ben taki dati ala sma di wani tron en disipel musu de klarklari fu „libi den sani” di den abi (Luk. 14:33). Na dati den Kresten na ini Yudea ben du na a ten fu den apostel. Den ben de klarklari fu libi ala den sani di den ben abi na baka (Hebr. 10:34). Na ini a ten disi, furu brada nanga sisa lasi den wroko fu di den weigri fu horbaka gi wan politiek partij (Openb. 13:16, 17). Fa a du kon taki den ben man du dati? Den e fertrow dorodoro na ini a sani disi di Yehovah pramisi: „Mi no o libi yu kwetikweti èn noiti mi o gowe fu yu” (Hebr. 13:5). Dati meki wi e du ala san wi man fu sorgu taki wi abi nofo moni te wi kon owru. Èn wi de seiker taki Yehovah o yepi wi efu wan sani psa di wi no ben ferwakti. w25.03 29 ¶13-14

Yehovah no e ferwakti fu wi taki wi e gro kon tron lepi Kresten sondro a yepi fu tra sma. Yehovah gi wi skapuman nanga leriman na ini a Kresten gemeente. Den wani yepi wi fu tron „lepi Kresten” so taki wi „kan kon de leki wan bigisma di lepi dorodoro leki Krestes” (Ef. 4:11-13). Yehovah gi wi en santa yeye tu di o yepi wi fu „denki soleki fa Krestes e denki” (1 Kor. 2:14-16). Boiti dati, Gado gi wi den fo Evangelietori fu sori wi fa Yesus ben denki, fa a ben taki, èn fa a ben du en diniwroko di a ben de na grontapu. Te yu e meki muiti fu denki èn du leki Yesus, dan yu kan doro a marki di yu abi fu tron wan lepi Kresten. Ma fu man gro kon tron lepi Kresten, dan wi no musu leri soso den fosi sani di wi ben leri kba èn di abi fu du nanga Krestes. w24.04 4-5 ¶11-12

Ibri dei wi musu teki besroiti. Son besroiti makelek fu teki, soleki san wi o nyan te m’manten noso te neti. Tra besroiti moro muilek fu teki. Kande den besroiti dati o abi krakti tapu a gosontu fu wi, tapu a fasi fa wi libi o waka, tapu wi famiri, noso tapu na anbegi fu wi. Wi wani teki besroiti di e tyari wini kon gi wi nanga wi osofamiri. Ma san moro prenspari, na taki wi e howpu taki Yehovah o feni den besroiti fu wi bun (Rom. 12:1, 2). Wan prenspari sani di o yepi wi fu teki wan bun besroiti, na taki wi musu kon sabi sani finfini. Fu san ede a sani disi prenspari? Kow taki dati wan sikisma e go suku yepi na wan datra fu di a e siki seryusu. Yu denki taki a datra ben o besroiti kba sortu datrayepi a o gi a sma, sondro taki a e ondrosuku en fosi èn sondro taki a poti aksi gi en? A no de fu taki dati a no ben o du dati. Yu o man teki moro bun besroiti tu te yu e kon sabi finfini san fiti na ini a situwâsi fu yu. w25.01 14 ¶1-3

San wi sabi fu a sar’ati fu Yehovah? Fa a sori taki a „no wani taki wan sma lasi libi”? (2 Petr. 3:9) Prakseri fa a sori sar’ati gi son sma di ben du seryusu sondu. Kownu David ben du wan tu seryusu sondu. A ben du sutadu èn ben kiri wan sma srefi. Ma David sori berow èn dati meki Yehovah sori sar’ati gi en èn a gi en pardon (2 Sam. 12:1-12). Kownu Manase ben du furu ogr’ati sani bijna en heri libi langa. Tòg Yehovah sori sar’ati gi en èn a gi en pardon fu di a ben sori berow (2 Kron. 33:9-16). Den eksempre disi e memre wi taki Yehovah de klarklari fu sori sar’ati te reide de fu du dati. Te sma kon ferstan taki den ben du seryusu sondu èn te den e sori berow, dan Yehovah o gi den wan opobaka. w24.05 4 ¶12