Maart

Bijbel e taki fu ret’atisma di bigin du sani di Yehovah no feni bun. Kownu Salomo ben de wan fu den sma dati. A ben de wan getrow futuboi fu Yehovah èn Yehovah gi en furu blesi. Ma bakaten, Salomo bigin anbegi falsi gado. A sani disi meki taki Yehovah kisi bigi atibron èn den sondu fu Salomo meki taki a heri pipel fu Israel pina hondrohondro yari langa. Soleki fa Bijbel e sori, dan di Salomo dede, a „go rostu neleki den afo fu en”, èn wan fu den afo dati ben de a getrow man Kownu David (1 Kow. 11:5-9, 43; 2 Kow. 23:13). Ma a fasi fa wan sma ben beri wani taki dati a sma ben o kisi wan opobaka? Bijbel no e taki dati. Na opobaka na wan kado fu wi lob’ati Gado. A e gi a kado dati na den wan di a wani gi na okasi fu dini en fu ala ten (Yob 14:13, 14; Yoh. 6:44). Salomo o kisi a kado disi? Na Yehovah w’wan sabi. Wi no sabi dati. Ma san wi sabi, na taki ala ten Yehovah e du san reti. w24.05 4 ¶9

Te wi gi wisrefi abra na Yehovah, dan na agersi fasi wi e kon na ini a tenti fu en. Wi e kisi ala san wi abi fanowdu fu man tan bun mati fu Yehovah èn fu den tra sma di de mati fu en tu. Sma fu ala kondre kan kon na ini a tenti fu Yehovah. A tenti fu Yehovah de na iniwan presi pe den getrow futuboi fu en de (Openb. 21:3). Fa a de nanga den getrow futuboi fu Yehovah di dede kba? De den de ete na ini a tenti fu en? Iya! Fu san ede wi kan taki dati? Fu di Yehovah no fergiti den sma disi. Yesus ben taki: „Na ini a tori fu Moses nanga a makabusi, Moses srefi ben sori taki dede sma o kisi wan opobaka. Drape a e kari Yehovah ’a Gado fu Abraham, a Gado fu Isak, èn a Gado fu Yakob.’ A no de wan Gado fu den dede sma, ma wan Gado fu den wan di de na libi, bika gi en den alamala e libi.”​—Luk. 20:37, 38. w24.06 3 ¶6-7

Sadok ben go na Hebron nanga den fetsani fu en èn a ben de srekasreka fu feti (1 Kron. 12:38). A ben de klarklari fu go makandra nanga David fu feti teige den feanti fu Israel. Kande Sadok no ben abi ondrofeni leki fetman, ma a yonguman disi ben abi furu dek’ati. Pe wan priester leki Sadok ben leri fu abi so furu dek’ati? A ben sabi furu man di ben tranga èn di ben abi dek’ati. A no de fu taki dati a leri furu fu den. Fu eksempre, di David ben e ’teki fesi na ini a legre fu Israel te den ben e go na feti’, dan ala den Israelsma ben wani taki a tron kownu (1 Kron. 11:1, 2). Ala ten David ben abi a fertrow taki Yehovah ben o yepi en fu wini den feanti fu en (Ps. 138:3). Sadok ben leri tu fu dek’ati man soleki Yoyada nanga en manpkin Benaya di ben de wan fetman, èn fu den 22 tra legre edeman di ben e horbaka gi David.​—1 Kron. 11:22-25; 12:26-28. w24.07 3 ¶5-6

Saulus fu Tarsus ben e ferfolgu den bakaman fu Krestes na wan ogr’ati fasi. A kan taki furu Kresten ben denki taki a no ben o kenki noiti, ma Yesus ben sabi taki Saulus ben kan kenki èn sori berow. Yesus nanga en P’pa ben man si den bun fasi fu Saulus. Dati meki Yesus ben taki: ’Mi teki a man disi fu go ferteri den trakondre sma fu a nen fu mi’ (Tori 9:15). Yesus ben du wan wondru srefi fu yepi Saulus fu sori berow (Tori 7:58–8:3; 9:1-9, 17-20). Saulus sori berow èn a tron wan Kresten di sma ben sabi now leki na apostel Paulus. Paulus ben gwenti taki fa a ben de nanga tangi taki Yehovah nanga Yesus sori lobi nanga sar’ati gi en (1 Tim. 1:12-15). Wan leisi, Paulus yere taki a gemeente na ini Korente ben e gi pasi taki wan man di ben du hurudu tan na ini a gemeente. San Paulus taigi den fu du? Den sani di a taigi a gemeente, e sori fa Yehovah e pir’ai gi wi na wan lob’ati fasi èn fu san ede a prenspari fu sori sar’ati gi trawan leki fa en e du dati. w24.08 13 ¶15-16

Saf’safri Yehovah meki wi ferstan moro krin fa sondu libisma kan tron mati fu en. Baka di sma opo densrefi na ini Eden, dan Abel, a di fu tu manpkin fu Adam nanga Eva, ben de a fosi libisma di sori taki a ben e bribi na ini Yehovah. Fu di Abel ben lobi Yehovah èn fu di a ben wani tron wan mati fu en, meki a tyari wan ofrandi. Abel ben de wan skapuman, èn dati meki a teki wan tu fu den yongu pkin skapu fu en èn a gi Yehovah den leki ofrandi. San Yehovah du? A „ben e prisiri nanga Abel èn nanga na ofrandi fu en” (Gen. 4:4). Yehovah ben breiti tu nanga den ofrandi fu tra sma di ben lobi en èn di ben e fertrow en, èn wan fu den sma dati ben de Noa (Gen. 8:20, 21). Fu di Yehovah ben feni den sortu ofrandi dati bun, meki a sori taki libisma kan tron mati fu en te den e du san a feni bun. w24.08 3 ¶5-6

Te sma e du ogri nanga wi, dan dati kan hati wi trutru èn a kan meki wi firi brokosaka (Preik. 7:7). Getrow futuboi fu Gado, soleki Yob nanga Habakuk, ben e firi so tu (Yob 6:2, 3; Hab. 1:1-3). A tru taki wi alamala kan firi so. Ma tòg wi musu luku bun taki wi no e du wan don sani di kan tyari moro problema kon. Te a gersi leki sma no e kisi strafu gi den ogri di den du, dan wi ben kan denki taki na las’ten fu du san reti. Wan futuboi fu Yehovah ben si taki ogrisma ben e pina bun sma, èn a ben gersi leki den ogrisma ben e libi wan switi libi. A ben taki: „Na so a libi fu den ogrisma de kba. Noiti den abi brok’ede” (Ps. 73:12). A ben mandi tu fu di sma no ben e du san reti èn a ben feni taki na las’ten fu anbegi Yehovah. A ben taki tu: „Mi ben pruberi fu ferstan a sani disi, ma a ben muilek gi mi.”​—Ps. 73:14, 16. w24.11 3 ¶5-7

Wi e gi Yehovah grani fu di wi abi bigi lespeki gi en. Wi abi furu reide fu lespeki Yehovah. A abi a makti fu du iniwan sani di a wani èn a no e kon weri noiti (Ps. 96:4-7). Den sani di a meki e sori taki a koni psa marki. Na en gi wi libi èn na en e hori ala sani na libi (Openb. 4:11). A e tan horbaka gi den anbegiman fu en (Openb. 15:4). Ala sani di a e du abi bun bakapisi èn ala ten a e du san a pramisi (Yos. 23:14). Dati meki a profeiti Yeremia ben taki disi fu Yehovah: „Nowan koniman noso kownu fu den pipel de leki yu” (Yer. 10:6, 7). A no de fu taki dati wi abi bun reide fu lespeki wi P’pa na hemel. Ma boiti taki wi e lespeki Yehovah, wi lobi en tu nanga wi heri ati. San moro prenspari, na taki wi e gi Yehovah grani fu di wi lobi en trutru. w25.01 3 ¶5-6

Den feanti fu Gado e pruberi fu meki sma denki takru fu den bun sani di na organisâsi e leri wi. Soleki fa Bijbel e leri wi, dan Yehovah wani taki wi musu de krin, wi musu tyari wisrefi na wan fasi di fiti, èn wi musu anbegi en na a fasi di a feni bun. Yehovah e taki dati sma di e tan du ogri sondro fu sori berow, no mag tan na ini a gemeente (1 Kor. 5:11, 12; 6:9, 10). Ma fu di wi e gi yesi na a komando disi, meki den feanti fu wi e taki dati wi no lobi sma. Den e taki dati wi e krutu sma èn taki wi e desko den wan di e tyari densrefi tra fasi leki wi. Wi musu kon ferstan suma na a sma di wani meki trawan bribi lei fu na organisâsi fu Yehovah. A sma dati na Satan Didibri. En na „a tata fu ala lei” (Yoh. 8:44; Gen. 3:1-5). Sobun, wi musu ferwakti taki Satan o gebroiki den feanti fu wi fu ferteri lei fu Yehovah en organisâsi. w24.04 10-11 ¶13-14

Srefi baka te a bigi banawtu bigin, a kan taki son sma di e si taki „Babilon a Bigiwan” kisi pori, o memre taki Yehovah Kotoigi ben taki fu a sani disi langa ten kba. Yu denki taki sonwan fu den sma di e si taki „Babilon a Bigiwan” kisi pori, o poti bribi na ini Yehovah? (Openb. 17:5) Na dati ben psa na ini Egepte na a ten fu Moses. Memre taki „furu sma fu tra kondre” gwe libi Egepte makandra nanga den Israelsma (Eks. 12:38). Kande sonwan fu den sma disi bigin poti bribi na ini Yehovah di den si taki den Tin Rampu kon na tapu a pipel, soleki fa Moses ben taki. Efu wan srefi sortu sani ben o psa baka te Babilon a Bigiwan kisi pori, dan wi ben o mandi taki den sma dati kisi ferlusu syatu fosi Armagedon kon? Kwetkweti! Wi wani de leki wi P’pa na hemel di de „wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki”.​—Eks. 34:6. w24.05 11 ¶12-13

San kan psa te wi e tapu fu hori wisrefi na „a soifri leri”? Luku na eksempre disi: Na ini a fosi yarihondro, son Kresten ben e panya wan lei taki a dei fu Yehovah ben doro kba. Son Kresten na ini Tesalonika no go ondrosuku efu a sani dati ben tru, ma den bigin bribi en èn den ben e ferteri trawan a lei disi tu. Efu den ben hori na prakseri san Paulus ben leri den di a ben de ete nanga den, dan den no ben o bribi a lei dati (2 Tes. 2:1-5). Paulus ben gi den brada nanga sisa fu en a rai fu no bribi ala san den ben e yere. Èn fu yepi den Tesalonikasma na ini a ten di ben o kon, meki Paulus skrifi a sani disi na a kba fu a di fu tu brifi di a ben skrifi gi den: „Mi, Paulus, e seni taki unu odi. Mi srefi skrifi unu, soleki fa unu kan si na ini ala den brifi fu mi. Disi na a fasi fa mi e skrifi.”​—2 Tes. 3:17. w24.07 12 ¶13-14

Den Hebrew Kresten ben o abi fu hordoro na ini a diniwroko fu den, fu di wan muilek ten ben o doro heri esi. Aladi son Hebrew Kresten ben kisi hebi ferfolgu, tòg furu fu den teki a Kresten bribi na a ten di sani ben e waka bun. Na apostel Paulus memre den fu sreka densrefi gi moro hebi ferfolgu èn fu tan getrow na Yehovah te na dede, neleki fa Yesus ben du dati (Hebr. 12:4). Ma fu di moro sma ben e teki a Kresten Bribi, meki den Dyu gensman ben e kisi bigi atibron èn den ben e du ogri’ati sani nanga den Kresten. Wan tu yari na fesi moro leki 40 Dyu „meki wan sweri taki fluku ben kan kon na den tapu efu den no kiri Paulus. Den ben taki dati den no ben o nyan noso dringi solanga den no du dati” (Tori 22:22; 23:12-14). Aladi sma ben o teige den Kresten èn ferfolgu den, tòg den Kresten dati ben o abi fu kon makandra fu anbegi Gado, fu preiki a bun nyunsu, èn fu tranga a bribi fu den. w24.09 12 ¶15

Yohanes ben de wan bun mati fu Yesus Krestes (Mat. 10:2). Yohanes ben e preiki furu makandra nanga Yesus èn a si fa a ben du wondru. A tan getrow na Yesus na ini muilek ten. A si fa sma kiri Yesus èn a si Yesus baka di a kisi wan opobaka. A ben si tu fa a Kresten gemeente gro. Yohanes ben libi langa nofo fu si fa a bun nyunsu „preiki gi ala sma na grontapu” (Kol. 1:23). Di Yohanes ben kon owru, dan a ben abi a grani fu skrifi a span buku Openbaring (Openb. 1:1). Èn a skrifi dri brifi di wi sabi now leki a fosi, a di fu tu, nanga a di fu dri brifi fu Yohanes. A ben skrifi a di fu dri brifi fu en gi wan getrow Kresten di nen Gayus èn di a ben lobi neleki a ben de en pkin (3 Yoh. 1). Den sani di a getrow owru man disi skrifi e gi ala den bakaman fu Yesus dek’ati te na a dei fu tide. w24.11 12 ¶15-16

Te wan masra lobi en wefi, dan a o breiti nanga en èn a o sori en taki a e warderi en. A e si en wefi leki wan warti kado di a kisi fu Yehovah (Odo 18:22; 31:10). Dati meki a e sori switfasi nanga lespeki gi en, srefi te den abi seks. A no o dwengi en wefi fu du sani di e meki a firi fisti, di e meki a firi taki en masra no lobi en, noso di e trobi a konsensi fu en. Te den abi seks, dan a masra no o wani du nowan sani tu di ben o trobi en eigi konsensi (Tori 24:16). Un masra, un kan de seiker taki Yehovah e si a muiti di unu e du fu gi un wefi grani na ini ala san unu e taki èn e du. Sori taki yu wani gi yu wefi grani ala ten. Sobun, no du sani di e hati en, sori switfasi gi en, sori en taki yu e lespeki en, èn sori en taki yu lobi en. Na so a o man si taki yu lobi en èn taki a prenspari gi yu. Gi yu wefi grani, dan yu no o pori a matifasi di yu abi nanga Yehovah, a moro prenspari mati fu yu.​—Ps. 25:14. w25.01 13 ¶17-18

Den futuboi fu Yehovah e preiki a bun nyunsu fayafaya. Disi na wán reide fa den e difrenti fu den sma di e kari densrefi Kresten. San kan yepi wi fu tan du a preikiwroko fu wi fayafaya? Wi kan leri fa fu de fayafaya na ini a preikiwroko te wi e poti prakseri na a eksempre fu Yesus. Di a ben de na grontapu a no tapu noiti fu preiki fayafaya gi sma. Fu taki en leti, a ben e wroko moro tranga dei fu dei. Na ini wan agersitori, Yesus agersi a wroko fu en nanga a di fu wan man di ben e wroko na ini wan droifidyari. A man disi ben du tranga muiti dri yari langa fu sorgu gi wan figabon, sondro taki a bon ben gi froktu. Yesus preiki dri yari langa tu gi den Dyu, ma furu fu den no tron en disipel. Tòg Yesus no tapu fu preiki gi den. Neleki a man fu a droifidyari, a ben e tan howpu taki a figabon ben o gi froktu (Luk. 13:6-9). Te wi e gi yesi na san a taki èn na san a du, dan dati o yepi wi fu tan preiki fayafaya. w25.03 14-15 ¶1-4

San yu musu du efu yu denki taki wan sma kan de wan bun trowpatna gi yu? Yu musu taigi a sma wantewante fa yu e firi? Bijbel e taki dati wan koni sma o suku fu kon sabi sani, fosi a du wan sani. Sobun, a ben o de wan koni sani efu yu e luku fu wan pisi ten fa a sma de fosi yu ferteri en fa yu e firi. San yu kan du fu luku fa wan sma de? Te yu de na den gemeente konmakandra noso te yu e meki prisiri nanga trawan, yu kan si efu a sma lobi Yehovah, yu kan si fa a de nanga tra sma èn fa a e tyari ensrefi. Suma na den mati fu en èn fu sortu sani a e taki? (Luk. 6:45) Den sani di a wani du na ini en libi o fiti nanga san yu wani du? Yu kan taki nanga den gemeente owruman noso tra lepi Kresten di sabi en bun (Odo 20:18). Yu kan aksi efu tra sma e taki bun fu en èn sortu moi fasi a abi (Rut 2:11). Na ini a pisi ten te yu e luku fa a sma de, dan sorgu taki yu no e meki a firi ferferi. Lespeki den firi fu en, no de ini a sma birti ala ten èn no suku fu kon sabi ala sani fu en libi. w24.05 22 ¶7-8

Den owruman no de gaw fu denki taki a sma no wani kenki a denki fu en èn taki a no wani tapu fu du sondu. Son sma kan sori berow a fosi leisi kba te den owruman e taki nanga den. Ma son sma kande abi moro ten fanowdu. Dati meki den owruman kan besroiti fu taki moro leki wán leisi nanga a sma. Kande baka a fosi leisi di den taki nanga a sma, a Kresten disi di du wan sondu e bigin denki bun fu san den brada taigi en. Kande a e begi Yehovah fu aksi en pardon gi den sondu fu en (Ps. 38:18). Sobun, a tra leisi te den o taki nanga a sma, dan kande a e denki heri tra fasi leki a fosi leisi di den taki nanga en. Den owruman e sori sar’ati nanga swit’fasi gi a sma di du wan seryusu sondu, fu di den wani yepi en fu sori berow. Den e begi Yehovah fu blesi a muiti fu den èn den e howpu taki a Kresten brada noso sisa fu den o kisi ensrefi èn o sori berow.​—2 Tim. 2:25, 26. w24.08 22-23 ¶12-13

Yehovah wani taki nowan sma musu lasi en libi! A wani taki sma di du sondu e meki en bun baka nanga En (2 Kor. 5:20). Dati meki ala ten Yehovah gi den futuboi fu en di gwe libi en a dek’ati fu sori berow èn fu drai kon baka nanga en. Den owruman na ini a gemeente abi a grani fu wroko makandra nanga Yehovah fu yepi den wan di du wan seryusu sondu fu sori berow (Rom. 2:4; 1 Kor. 3:9). Bigi prisiri de na ini hemel te wan sma di du wan sondu sori berow! Wi P’pa na hemel, Yehovah, e prisiri ibri leisi baka te wan fu den lasi skapu fu en e drai kon baka na a gemeente. A lobi di wi abi gi Yehovah e kon moro tranga te wi e denki dipi fu a sar’ati fu en, fu a bun’ati fu en, èn fu a fasi a e broko en ede nanga wi.​—Luk. 1:78. w24.08 31 ¶16-17

Efu Yesus ben gi pasi taki den sma poti en leki kownu, dan a ben o teki sei na ini den politiek afersi fu den Dyu di ben de na ondro a tiri fu Rome. Yesus besroiti fu ’go na a bergi en w’wan’. Aladi tra sma ben e dwengi en, tòg a weigri fu bemui nanga politiek. Disi e leri wi wan prenspari sani. A no de fu taki dati tra sma no o aksi wi fu du wan wondru so taki moro brede de èn so taki sikisma kan kon betre. Den no o pruberi tu fu meki wi tron kownu noso tiriman fu a kondre fu den. Ma den kan dwengi wi fu stem noso fu horbaka gi wan sma di den denki taki a o man tyari kenki kon. Na eksempre fu Yesus de krin. A weigri fu bemui nanga politiek afersi, èn bakaten a taki srefi: „Mi kownukondre no de fu a grontapu disi” (Yoh. 17:14; 18:36). Leki Kresten, wi musu abi a srefi denki leki Yesus èn wi musu teki na eksempre fu en. Neleki en, wi e horbaka gi Gado Kownukondre. Wi e ferteri trawan fu a Kownukondre disi èn wi e begi fu a kon.​—Mat. 6:10. w24.12 4 ¶5-6

Te yu e studeri, dan prakseri fa yu kan fiti den sani di yu e leri na ini yu libi. Fu eksempre, te yu e libi bun nanga trawan, dan dati e sori taki yu lobi retidu neleki Yehovah. Te yu de klarklari fu du san Yehovah wani èn te yu e yepi trawan awinsi dati no makelek son leisi, dan yu e teki na eksempre fu Yesus. Wan tra fasi fa yu kan de leki Yesus, na te yu e preiki gi trawan so taki den kan kon sabi den kfalek sani di Yehovah du gi sma. Na so den kan poti bribi na ini a lusu-paiman. O moro wi e leri fu a lusu-paiman, o moro wi o kon lobi Yehovah nanga en Manpkin, èn den o kon abi moro lobi tu gi wi (Yak. 4:8). Sobun, meki wi tan gebroiki ala den sani di Yehovah seti so taki wi kan kon sabi moro fu lusu-paiman. w25.01 25 ¶16-17

Na agersitori disi e sori taki Yehovah e trowe den sondu gwe fu den sma di sori berow èn a no e luku den moro. Wi kan ferstan den wortu fu a tekst disi tu leki: „Yu meki a gersi leki mi no du nowan sondu.” Bijbel e tyari a tori disi kon moro na krin na ini wan tra agersitori di skrifi na Mika 7:18, 19. Den tekst dati e taki dati Yehovah e trowe den sondu fu wi na ini a dipi fu a se. Efu wan sma na ini owruten ben trowe wan sani go na ini a dipi fu a se, dan a no ben o feni a sani dati noiti moro. Den agersitori disi leri wi taki te Yehovah e gi wi pardon, dan a e puru den sondu fu wi na wi tapu so taki wi konsensi no e trobi wi moro. A de trutru soleki fa David taki: „Koloku fu den sma di kisi pardon fu den kruktudu fu den èn koloku fu den sma di Gado tapu den sondu fu den (Rom. 4:7). Disi e sori taki a gi wi pardon trutru. w25.02 9 ¶7-8

Na ini a ten disi sma de di e anbegi Yehovah makandra èn den e du furu bun sani. Den de na ini a tru anbegi di abi milyunmilyun sma di e libi na ini trutru freide èn na ini wánfasi. Den sma di e anbegi Yehovah noiti no wani tapu fu anbegi en. Den wani tu taki so furu sma leki a kan e kon abi freide nanga Yehovah èn nanga trawan. A moi fu si taki na anbegi fu Yehovah e gi a pipel fu en na okasi fu de na ini freide èn na ini wánfasi, aladi den e libi na ini na ogri grontapu fu Satan pe sma no lobi makandra (1 Yoh. 5:19; Openb. 12:12). A lob’ati Gado fu wi e si fa a grontapu disi e pori sma, ma a e sorgu taki den futuboi fu en abi a dyaranti taki sani o waka bun nanga den. Na a fasi disi den kan tan dini en nanga prisiri. A Wortu fu Gado e taki dati a tru anbegi na wan presi pe sma kan go „kibri” èn wan „dyari di e kisi furu watra” (Yes. 4:6; 58:11). Fu di Yehovah blesi den wan di de na ini a tru anbegi, meki den de koloku èn den no e frede taki ogri o miti den na ini den muilek lasti dei disi.​—Yes. 54:14; 2 Tim. 3:1. w24.04 20 ¶1-2

Efu yu e suku wan trowpatna, dan seiker yu begi fu dati. Soleki fa wi kan ferstan, Yehovah no e pramisi nowan sma taki a o gi en wan trowpatna. Ma a e broko en ede nanga san yu abi fanowdu èn fa yu e firi, èn a kan yepi yu te yu e suku wan patna. Sobun, tan ferteri Yehovah san yu wani èn fa yu e firi (Ps. 62:8). Begi en fu yepi yu fu abi pasensi èn fu gi yu koni (Yak. 1:5). Awinsi a e teki pkinso moro langa fu feni wan trowpatna, Yehovah e pramisi taki a o sorgu gi yu èn a o sorgu taki yu kisi a lobi di yu abi fanowdu (Ps. 55:22). Ma luku bun taki a suku di yu e suku wan trowpatna, no tron a moro prenspari sani na ini yu libi (Fil. 1:10). Trutru koloku no e kon fu di yu trow noso fu di yu no trow, ma fu di yu abi wan bun matifasi nanga Yehovah (Mat. 5:3). Èn te yu no trow ete, yu kan abi moro ten fu du moro na ini a diniwroko (1 Kor. 7:32, 33). Gebroiki a ten disi bun. w24.05 21 ¶4; 22 ¶6

O langa wan verkering musu hori? Te sma e hasti densrefi fu teki wan besroiti, dan a e psa moro furu taki den abi takru bakapisi (Odo 21:5). Dus a verkering fu yu musu de langa nofo gi yu fu leri sabi a sma bun. Ma yu no musu hari a verkering go tumsi langa efu a no de fanowdu. Bijbel e taki tu: „Te wan sma no man kisi san a e fruwakti, dan en ati o kon siki” (Odo 13:12). San trawan kan du gi tu sma di abi verkering? Wi kan kari den fu kon nyan nanga wi, fu kon na wi Osofamiri Anbegi noso fu go du wan prisiri sani makandra (Rom. 12:13). Kande den abi wan sma fanowdu fu go nanga den na wan presi so taki den no de den w’wan. Kande yu kan rèi nanga den na ini a wagi. Noso yu kan kari den kon na yu oso so taki den no de den w’wan (Gal. 6:10). Efu tu sma di abi verkering aksi yu fu kon nanga den so taki den no de den w’wan, dan yu kan si dati leki wan moi okasi fu yepi den mati fu yu. Ma luku bun taki yu no e libi den tu sma dati den w’wan. Sorgu tu taki yu e ferstan o ten yu musu libi den so taki den kan taki nanga densrefi. w24.05 30 ¶13-14

Den owruman e pruberi fu kon sabi sortu besroiti a sma ben teki fosi a du wan sondu. San swaki a matifasi fu en nanga Yehovah? A tapu fu leisi Bijbel ibri dei noso fu go na ini a preikiwroko? A tapu nanga a gwenti di a ben abi fu begi Yehovah? A meki den takru lostu fu en abi krakti na en tapu? Nanga suma a ben e bemui? Sortu prisiriten a ben abi? Fa den besroiti disi ben kan abi krakti tapu na ati fu en? A e ferstan fa a sani di a du e meki en P’pa Yehovah firi? Den owruman kan poti aksi gi a sma fu yepi en fu kon si sortu sani meki taki a matifasi fu en nanga Yehovah kon swaki èn di meki taki a du wan sondu (Odo 20:5). Boiti dati, den kan gebroiki agersitori fu yepi a sma fu prakseri san a du so taki a e kon ferstan fu san ede a sani dati no bun. Kande na a fosi leisi kba te den owruman taki nanga a sma disi, a e bigin sari fu den besroiti di a teki èn fu a fasi fa a ben e denki. Kande a e sori berow srefi. w24.08 22 ¶9-11

Yesus ben e preiki „a bun nyunsu fu Gado Kownukondre” fayafaya, fu di a ben sabi taki na a wroko dati Gado ben wani taki a du Gi Yesus, a preikiwroko ben de a moro prenspari wroko na ini en libi. Srefi na ini den lasti mun fu a diniwroko fu en, a ben e go „na ala den foto èn na ala den dorpu” fu preiki gi sma (Luk. 13:22). Boiti dati, a ben e leri tra disipel fu preiki a bun nyunsu neleki fa en ben e du dati (Luk. 10:1). Na ini a ten disi, a de so tu taki a preikiwroko na a moro prenspari wroko di Yehovah nanga Yesus wani taki wi du (Mat. 24:14; 28:19, 20). Wan sani di o yepi wi fu de fayafaya na ini a preikiwroko, na te wi e leri fu si sma soleki fa Yehovah e si den. Yehovah wani taki so furu sma leki a kan e kon sabi a bun nyunsu (1 Tim. 2:3, 4). Awinsi sma no e tron futuboi fu Yehovah now, tòg den kan kisi okasi fu du dati fosi a bigi banawtu kon na wan kba. w25.03 15-16 ¶5-7

Ibri Kresten musu meki a konsensi fu en di oefen nanga yepi fu Bijbel, tiri en te a e besroiti san a o du te wan sma puru fu a gemeente. Son sma kan feni taki a no de wan problema gi den fu taki a sma odi noso fu gi en wan switikon na a konmakandra. Ma wi no o taki langa tori nanga a sma èn wi no o abi demakandra nanga en na tra fasi tu. Son sma ben kan aksi den srefi: ’Ma Bijbel no e taki dati wan Kresten di e taki sowan sma odi e horbaka gi den ogri sani di a e du?’ (2 Yoh. 9-11). A tekst disi e sori taki a rai disi abi fu du nanga den sma di fadon kmoto na bribi èn nanga tra sma di e pruberi fu meki trawan du sani di Bijbel e krutu (Openb. 2:20). Dati meki efu wan sma e gi trawan dek’ati fu drai baka gi Yehovah noso fu du tra sani di no bun, dan den owruman no o seti sani fu taki nanga en. Tòg howpu de ete taki a sma kisi ensrefi. Ma teleki dati psa, wi no musu taki sowan sma odi èn wi no musu gi en wan kari tu fu kon na wan gemeente konmakandra. w24.08 30-31 ¶14-15

Baka di Yesus gi sma n’nyan, a meki den apostel fu en gwe libi a kontren drape nanga boto fu go baka na Kaperna-um. Ma Yesus go na den bergi en w’wan fu di a no ben wani taki den sma poti en leki kownu (Yoh. 6:16-20). Di den apostel ben de na ini a boto, dan wan bigi winti wai di meki taki a watra bigin seki kfalek. Ne Yesus waka tapu a watra fu kon na den. A taigi na apostel Petrus fu waka tapu a watra tu (Mat. 14:22-31). Di Yesus kren go na ini a boto, dan a winti saka. Den disipel no ben man bribi èn den taki: „Yu na trutru a Manpkin fu Gado” (Mat. 14:33). Fu san ede den disipel ben taki a sani disi baka di Yesus ben waka na tapu watra? Fu san ede den no ben taki disi di Yesus ben du wan wondru nanga a brede? Luku san Markus ben taki fu a srefi okasi disi. A ben skrifi: „Di den [apostel] si disi, den ferwondru srefsrefi. Den no ben ferstan ete san a wondru fu den brede ben wani taki (Mark. 6:50-52). Iya, den no ben e ferstan taki Yehovah ben gi Yesus a makti fu du moro leki fu sorgu gi brede nomo. w24.12 5 ¶7

Wi kan du ala san wi man na ini den wiki fosi èn baka a Memrefesa fu sori Yehovah fa wi de nanga tangi gi a lusu-paiman. Boiti taki wi e sreka sani fu de na a Memrefesa, wi kan gi trawan wan kari tu fu kon na a okasi disi. Ferteri den sma di yu gi wan kari san o psa na a Memrefesa. A bun fu sori den sma den felem di nen Fu san ede Yesus dede? nanga Memre a dede fu Yesus. Den owruman musu sorgu taki den e gi sma di no e preiki moro wan kari fu kon na a Memrefesa. Prakseri fa Yehovah en futuboi na hemel èn na grontapu o prisiri efu wan tu fu den lasi skapu fu Yehovah e drai kon baka na a ipi fu en (Luk. 15:4-7). Te wi de na a Memrefesa, dan wi no musu taki soso den brada nanga sisa fu wi odi, ma spesrutu den nyun sma noso den wan di no ben kon na den konmakandra wan heri pisi ten. Wi wani taki den firi switi na ini a Kownukondre zaal.​—Rom. 12:13. w25.01 29 ¶15

A tru taki a lusu-paiman e yepi wi fu ferstan taki Yehovah na wan Gado di lobi retidu, ma san moro prenspari, na taki a e yepi wi fu kon ferstan o furu Yehovah lobi wi (Yoh. 3:16; 1 Yoh. 4:9, 10). Yehovah seni en Manpkin kon fu dede gi wi fu di a wani taki wi libi fu têgo èn fu di a wani taki wi tron en pkin. Luku san psa: Di Adam sondu, dan a no ben kan de wan pkin fu Yehovah moro. Ma nanga yepi fu a lusu-paiman, Yehovah man gi wi pardon fu den sondu fu wi èn te fu kba ala libisma di e sori bribi èn di e gi yesi na en o man kon na ini a famiri fu en. Nownow kba srefi, wi kan tron bun mati fu Yehovah èn fu wi Kresten brada nanga sisa. A de krin taki Yehovah lobi wi trutru.​—Rom. 5:10, 11. w25.01 21 ¶6

A no de fu taki dati a lusu-paiman na wan kado di warti srefsrefi! (2 Kor. 9:15) Fu di Yesus gi en libi gi wi, meki yu kan de wan mati fu Yehovah Gado. Boiti dati, yu abi a howpu tu fu libi fu têgo na ini a ten di e kon. Wi abi furu reide fu de nanga tangi taki Yehovah sorgu gi a lusu-paiman. A du disi fu di a lobi wi trutru (Rom. 5:8). Fu yepi wi fu tan de nanga tangi èn fu no fergiti noiti san Yehovah nanga Yesus du gi wi, meki Yesus gi wi a komando fu de na a Memrefesa di e hori ibri yari (Luk. 22:19, 20). A yari disi, a Memrefesa o hori tapu fodewroko 2 april 2026. A no de fu taki dati wi alamala o de drape. Wi o kisi furu wini te wi e meki ten na ini den wiki fosi èn baka a Memrefesa, fu denki dipi fu san Yehovah nanga Yesus du gi wi. w25.01 20 ¶1-2

O moro yu e tan denki dipi fu den sani di Yehovah Gado nanga Krestes Yesus du gi yu, o moro yu o si fa den lobi yu. Kande yu kan leisi wan fu den Evangelietori finfini a yari disi, na ini den wiki fosi èn baka a Memrefesa. No pruberi fu leisi tumsi furu kapitel wán leisi. Na presi fu dati, teki yu ten èn luku sortu tra reide de fu san ede wi musu lobi Yehovah nanga Yesus. Efu yu de na ini waarheid furu yari kba, dan kande yu e aksi yusrefi efu nyun sani de ete fu leri fu a retidu fu Gado, fu a lobi fu en, èn fu a lusu-paiman. Fu taki en leti, nyun sani o de fu leri ala ten fu den tori disiSobun leisi èn studeri den moi tori di de fu feni na ini den buku fu wi. w25.01 24-25 ¶13-15