Februari

Brada di e sori taki den abi moi Kresten fasi, na wan bigi yepi gi a gemeente. Wan man di „e fiti ensrefi makriki na trawan” e du tranga muiti fu sorgu taki a abi freide nanga trawan èn a e yepi trawan tu fu abi freide nanga makandra. Boiti dati, wan man di e fiti ensrefi makriki na trawan, e arki trawan èn a e pruberi fu ferstan fa den e firi. Kow taki dati yu na wan owruman kba, èn na wan konmakandra fu a skin fu owruman, furu fu den owruman e agri nanga wan besroiti di e kruderi nanga Bijbel gronprakseri. San yu o du? Yu o horbaka gi a besroiti dati awinsi yu ben o wani du sani tra fasi? No e dwengi trawan fu du sani soleki fa yu wani. Yu e arki san trawan abi fu taki fu di yu sabi taki dati prenspari (Gen. 13:8, 9; Odo 15:22). Disi wani taki dati yu no e taki grofu nanga trawan èn yu no e hartaki nanga den. Na presi fu dati, yu e sori swit’fasi gi den. Fu di yu na wan man di lobi freide, meki yu e du tranga muiti fu meki freide nanga trawan, srefi na ini muilek situwâsi (Yak. 3:17, 18). Yu e taki switi nanga trawan èn dati e yepi den fu no kisi atibron, srefi efu den no e agri kwetkweti nanga a bribi fu wi.​—Krut. 8:1-3; Odo 25:15; Mat. 5:23, 24. w24.11 23 ¶13

Aladi Yesus dede „wán leisi nomo”, tòg a e du furu sani ete gi wi (Rom. 6:10). San a e du gi wi? A e tan wroko fu sorgu taki wi e kisi den someni bun sani di wi man kisi now fu di a lusu-paiman pai. Nownowde a de wi Kownu, wi Granpriester, èn na ede fu a gemeente (1 Kor. 15:25; Ef. 5:23; Hebr. 2:17). A e teki fesi na ini a wroko di e du fu tyari den salfuwan nanga a bigi-ipi kon na wán. A wroko disi o klari fosi a bigi banawtu kon na wan kba (Mat. 25:32). Yesus e sorgu tu taki den getrow futuboi fu en e kisi san den abi fanowdu fu man tan dini Yehovah na ini den lasti dei disi (Mat. 24:45). Èn na a ten fu a Dusun Yari Tiri, a o tan du sani gi wi. A de krin taki Yehovah no gi en Manpkin soso fu dede gi wi, ma gi en fu du so furu tra sani tu gi wi. w25.01 24 ¶12

Te Yehovah e gi wi pardon fu den sondu fu wi, dan a de neleki noiti wi ben du den sondu dati èn wi kan de seiker taki a no o strafu wi gi den sondu dati na ini a ten di e kon. Na so wi kan de mati fu wi P’pa na hemel. Ma wi sabi taki te Yehovah e gi wi pardon, dan dati na wan kado di a e gi wi fu di a lobi wi èn fu di a de klarklari fu du bun gi wi. A no e gi wi pardon fu di wi e ferdini dati. Wi de nanga tangi trutru taki Yehovah e gi wi pardon fu den sondu fu wi (Ps. 130:4; Rom. 4:8). Ma efu wi wani taki Yehovah gi wi pardon, dan wi musu du wan prenspari sani. Luku san Yesus ben taki: „Efu unu no e gi sma pardon fu den sondu fu den, dan un Tata no o gi unu pardon fu den sondu fu unu” (Mat. 6:14, 15). Sobun, neleki Yehovah wi musu de klarklari fu gi trawan pardon. w25.02 13 ¶18-19

Prakseri fa a de nanga den sma fu Sodom nanga Gomora. Lot ben de wan ret’ati man di ben e libi na mindri den sma dati. Ma wi sabi efu Lot ben preiki gi ala sma drape? Nôno. A tru taki den sma drape ben ogri, ma a de so taki ibriwan fu den ben sabi san bun èn san no bun? Memre taki wan bigi grupu man fu a foto ben wani abi seks nanga den fisitiman fu Lot. Bijbel e taki dati „yonguwan nanga owruwan” ben de na ini a grupu disi. Disi e sori taki den alamala ben gro kon na ini wan libimakandra pe sma no ben e tyari densrefi bun kwetkweti. A kan tu taki noiti den ben kisi na okasi fu kon sabi den wet fu Yehovah di e sori san bun èn san no bun (Gen. 19:4; 2 Petr. 2:7). Ma wi sabi seiker efu Yehovah, a Gado di abi sar’ati, besroiti taki nowan fu den sma disi o kisi wan opobaka? Nôno, wi no kan taki dati. Bijbel e sori taki tin ret’ati sma srefi no ben de na ini a foto dati (Gen. 18:32). Sobun, den sma drape no ben e du san reti èn Yehovah ben abi leti fu kiri den. Ma wi sabi seiker efu nowan fu den o kisi wan „opobaka” leki „wan sma di no du san reti”? Nôno, wi no sabi seiker! w24.05 2 ¶3; 3 ¶8

Son sma teki wan wroko di meki taki den ben musu froisi gwe farawe fu den osofamiri. Ma bakaten, furu fu den sma disi kon si taki dati no ben de wan koni sani fu du. Fosi yu teki wan nyun wroko, no luku nomo omeni moni yu o meki, ma luku tu efu a wroko disi o yepi yu nanga yu osofamiri fu tan krosbei fu Yehovah (Luk. 14:28). Aksi yusrefi: ’San kan psa nanga mi trowlibi te mi no de nanga mi trowpatna? Mi o man go na ala den konmakandra, mi o man go na ini a preikiwroko, èn mi o man de makandra nanga mi Kresten brada nanga sisa?’ Efu yu abi pkin, dan yu musu aksi yusrefi a prenspari sani disi tu: ’Fa mi o kweki mi pkin „nanga a leri èn nanga den rai fu Yehovah” efu mi no de nanga den?’ (Ef. 6:4). Te yu e teki wan besroiti, dan du san Yehovah wani. No du san famiriman noso mati di no e bribi na ini Yehovah e taigi yu fu du. w25.03 29 ¶12

Wan Kresten di no e gro èn di no lepi, kan meki taki falsi nyunsu nanga sma di fadon kmoto na bribi kori en nanga den „triki” èn den „lei” fu den. A kan taki a e dyarusu es’esi, taki a lobi fu strei, a e atibron gawgaw, noso a kan du sani di no bun te a kisi wan tesi (1 Kor. 3:3). Neleki fa wan beibi e gro kon tron wan bigi sma, na so wan Kresten musu gro kon lepi tu (Ef. 4:15). Furu sani de di wan pkin no sabi, dati meki a abi a yepi fanowdu fu wan bigi sma di kan leri en san a musu du. Fu eksempre, wan mama e aksi en yongu meisje fu hori en anu te den e abra a strati. Te a pkin e gro kon moro bigi, dan a kan taki a mama e meki en w’wan abra a strati, ma tòg a e memre en meisje taki a musu luku efu wagi no e kon fosi a abra a pasi. Te a pkin tron wan bigi sma kba, dan ensrefi sabi kba san a musu du fu no meki ogri miti en te a e abra a strati. So a de ooktu tak te wan lepi Kresten musu teki wan besroiti, dan a e prakseri bun san Bijbel e taki fu a tori so taki a kan sabi fa Yehovah e si a tori, èn a e du tu san a leri. w24.04 3 ¶5-6

Fu wan heri pisi ten, na soso den engel ben e libi makandra nanga Yehovah na hemel. Ma bakaten, Yehovah meki libisma èn a gi den a kari tu fu kon na ini a tenti fu en. Wan tu fu den sma disi ben de Heinok, Noa, Abraham, nanga Yob. Bijbel e kari den tru anbegiman disi mati fu Gado noso den wan di „ben e waka nanga a tru Gado”(Gen. 5:24; 6:9; Yob 29:4; Yes. 41:8). Na ini den hondrohondro yari di psa, Yehovah tan gi moro mati fu en a kari fu kon na ini a tenti fu en (Esek. 37:26, 27). Fu eksempre, a profeititori fu Esekièl e leri wi taki Yehovah e angri fu abi wan bun matifasi nanga den getrow anbegiman fu en. A e pramisi taki a „o meki wan frubontu fu freide nanga den”. A profeititori dati e taki fu wan ten te den wan di abi a howpu fu libi na hemel èn den wan di abi a howpu fu libi na grontapu, o de makandra na ini a tenti fu Yehovah leki „wán ipi” (Yoh. 10:16). Na dati e psa now. w24.06 2 ¶2, 4; 3 ¶5

Leki a pipel fu Yehovah, wi e horbaka fayafaya gi Gado Kownukondre, ma nofo tron wi abi dek’ati fanowdu fu man du dati (Mat. 6:33). Fu eksempre, na ini na ogri grontapu disi, wi abi dek’ati fanowdu fu man hori wisrefi na den wet fu Yehovah èn fu man preiki a bun nyunsu fu a Kownukondre. Boiti dati, den politiek problema fu a ten disi e tyari prati kon moro nanga moro na ini a grontapu disi. Dati meki wi abi dek’ati fanowdu fu no teki sei na ini den afersi disi (Yoh. 18:36). Furu fu den futuboi fu Yehovah kon abi moni problema, sma fon den, noso den ben musu koti strafu fu di den ben weigri fu teki prati na ini politiek noso fu go na ini a legre. Te wi e prakseri fa trawan sori dek’ati fu man tan horbaka gi Yehovah èn gi a Kownukondre fu en, dan wi srefi wani sori dek’ati. Di wi Kownu, Krestes Yesus, ben de na grontapu, dan a weigri krinkrin fu bemui na ini den politiek afersi fu a grontapu fu Satan (Mat. 4:8-11; Yoh. 6:14, 15). Ala ten a ben abi a fertrow taki Yehovah ben o gi en a krakti di a ben abi fanowdu fu du san reti. w24.07 3 ¶4; 4 ¶7

Yehovah meki sma skrifi a sari tori dati na ini Bijbel so taki wi kan ferstan wan prenspari sani. A tori disi e yepi wi fu ferstan fu san ede Yehovah no lobi sondu kwetkweti. Sondu e pori a matifasi di wi abi nanga Yehovah èn a e tyari dede kon gi wi (Yes. 59:2). Satan no lobi Yehovah nanga libisma kwetkweti. Dati meki a tesi Adam nanga Eva fu du sondu èn a e tesi libisma te nanga a dei fu tide. Sobun, di Adam nanga Eva sondu, dan a kan taki Satan ben denki taki a ben o tapu pasi gi Yehovah fu du san a ben abi na prakseri gi libisma. Ma a no ben e ferstan o furu Yehovah lobi libisma. Noiti Gado kenki a prakseri di a ben abi gi den bakapkin fu Adam nanga Eva. Fu di a lobi libisma, meki a gi den wan howpu wantewante. (Rom. 8:20, 21) Yehovah ben sabi taki sma ben o de di ben o lobi en èn di ben o gi yesi na en. A ben sabi tu taki den sma disi ben o suku yepi na en fu man kakafutu gi sondu. Yehovah sorgu taki den sma disi man tron en mati so taki den kan kisi ferlusu fu sondu nanga dede. w24.08 3 ¶3-4

Furu anbegiman fu Yehovah abi furu fu du te dei opo. Furu fu wi abi wan grontapuwroko fu man sorgu wisrefi èn wi osofamiri (1 Tim. 5:8). Furu Kresten brada nanga sisa e sorgu gi sikisma noso gi owrusma. Wi alamala musu sorgu taki wi srefi e tan gosontu, èn a sani dati e teki ten. Boiti den frantwortu disi, wi abi prenspari sani fu du na ini a gemeente. Wan prenspari frantwortu di wi abi, na fu du ala san wi man fu preiki a bun nyunsu. Wan fu den „den moro prenspari sani” di wi leki Kresten musu du, na fu leisi Bijbel. Dati meki wi musu sorgu taki wi e du dati tu. A fosi psalm na ini Bijbel e taki fu wan man di de koloku: „A lobi a wet fu Yehovah. Dei nanga neti a e leisi a wet fu Gado nanga wan safri sten” (Ps. 1:1, 2). Disi e sori krin taki wi musu poti ten na wan sei fu leisi Bijbel. San na a moro bun ten fu leisi Bijbel? Kande ibriwan fu wi e leisi na wan tra ten. Ma san prenspari, na taki wi e leisi na wan ten di o meki en makelek gi wi fu leisi Bijbel ibri dei. w24.09 3 ¶5-6

Wan lepi Kresten abi a yepi fu wan tra sma fanowdu? Iya. Son leisi srefi lepi Kresten musu aksi tra sma fu yepi den. Kande wan sma di no de wan lepi Kresten ete wani taki tra sma taigi en san a musu du noso taki a tra sma musu teki wan besroiti di ensrefi ben musu teki. Ma te wan lepi Kresten e aksi a yepi fu wan Kresten di abi koni nanga ondrofeni, dan a sabi taki ensrefi musu teki en eigi besroiti èn taki Yehovah e ferwakti fu en taki a „musu tyari en eigi lai”. Neleki fa ala bigi sma no de a srefi, ma den e difrenti, na so ala lepi Kresten no abi a srefi koni nanga deki-ati. Boiti dati den no e sori switifasi na a srefi fasi, èn a fasi fa den e sori sari-ati gi trawan e difrenti. Sosrefi, te tu lepi Kresten de na ini a srefi sortu situwâsi, dan a kan taki den e teki tu difrenti besroiti, ma ala tu besroiti e kruderi nanga san Bijbel e taki. Disi de furu tron so te a tori abi fu du nanga a konsensi fu wan sma. Fu di den e ferstan disi meki den no e krutu wan trawan di teki wan tra besroiti leki den. Ma na presi fu dati, den wani taki a wánfasi tan na den mindri.​—Rom. 14:10; 1 Kor. 1:10. w24.04 4 ¶7-8

San yu kan du efu yu e firi leki yu no warti noti? Leisi Bijbel vers di kan gi yu a dyaranti taki yu warti gi Yehovah, èn denki dipi fu den vers dati. No teki yusrefi gersi nanga trawan èn no tan poti prakseri na san yu no man du. Yehovah noiti no e ferwakti moro fu yu leki san yu man du (Ps. 103:13, 14). Efu sma ben du ogri nanga yu, dan a no yu fowtu. Hori na prakseri taki Yehovah o krutu den sma di e libi takru nanga trawan, ma a e yepi den wan di e firi brokosaka fu di sma du ogri nanga den (1 Petr. 3:12). Noiti no denki taki Yehovah no o man gebroiki yu fu yepi trawan. A gi yu a grani fu wroko makandra nanga en na ini a preikiwroko (1 Kor. 3:9). A musu fu de so taki den sani di yu ondrofeni na ini yu libi e meki en moro makelek gi yu fu ferstan den wan di e pina. Yu kan du furu fu yepi den sortu sma disi. w24.10 7-8 ¶6-7

Yehovah wani taki sma libi bun nanga wi èn a e si te sma e du hati sani nanga wi. „Yehovah lobi te sani e waka na wan reti fasi” (Ps. 37:28). Yesus e pramisi wi taki Yehovah o „sorgu taki den [futuboi fu en] o kisi reti esi-esi” na a reti ten. Èn heri esi a o tyari wan kba kon na ala pina èn a o sorgu taki noiti moro sma du ogri nanga wi (Ps. 72:1, 2). Wi musu wakti teleki Yehovah lusu ala problema. Ma nownow kba a e yepi wi te trawan no e libi bun nanga wi (2 Petr. 3:13). A e leri wi fu no du don sani. Wán fasi fa a e du disi, na taki a e sori wi na ini Bijbel san en Manpkin ben e du te sma ben e du ogri nanga en. Èn na ini Bijbel a e gi wi rai tu fu sori wi san wi kan du te sma no e libi bun nanga wi. w24.11 2-3 ¶3-4

Di Yesus taigi den apostel fu en fu gi wan bigi grupu sma n’nyan, dan dati ben de wan problema, fu di sowan 5000 man ben de drape. Èn te yu ben o teri den uma nanga den pkin, dan a kan taki sowan 15.000 sma ben musu kisi n’nyan (Mat. 14:21). Ne Andreas taki: „Wan pkin boi de dya èn a abi feifi brede nanga tu pkin fisi. Ma disi no sa sari gi den someni sma di de dya” (Yoh. 6:9). Sma ben gwenti nyan brede di ben meki fu groto èn a kan taki den fisi disi ben de drei fisi di sma ben sowtu. Ma den fisi nanga den brede di a boi ben abi noiti no ben o sari gi so furu sma. Na dati den disipel ben e denki. Fu di Yesus ben wan sori swit’fasi gi den sma, meki a aksi den fu sdon na ini grupu na tapu a grasi (Mark. 6:39, 40; Yoh. 6:11-13). Ne Yesus taigi en P’pa tangi gi den brede nanga den fisi. Na so a sori taki na Gado ben de a sma di ben sorgu gi a n’nyan èn a sori tu taki a ben de nanga tangi gi a n’nyan. Neleki Yesus, wi musu begi tu fosi wi n’nyan. Baka dati Yesus meki den prati a n’nyan èn den sma nyan den bere furu. w24.12 2-3 ¶3-4

Di Yesus ben de na grontapu, dan a gi en P’pa grani. A fasi fa a du dati, na taki a ferteri sma taki na Yehovah ben gi en a krakti fu du wondru (Mark. 5:18-20). Yesus ben gi en P’pa grani tu nanga yepi fu a fasi fa a ben e taki fu en èn a fasi fa a ben e libi nanga trawan. Wan leisi di Yesus ben e gi leri na ini wan snoga, dan wan uma ben de drape e arki en. Na uma disi ben abi wan ogri yeye na en tapu 18 yari langa. Na ogri yeye ben meki taki na uma disi en skin ben kron so te, taki a no ben man tnapu let’opo. Disi ben de wan sari sani fu si. Fu di Yesus ben e firi gi na uma disi, meki a waka go na en èn a taigi en na wan switi fasi: „Uma, yu musu kon betre fu a siki fu yu.” Ne a poti en anu na tapu na uma èn wantewante na uma tnapu let’opo èn a „gi Gado glori”. A ben de nanga tangi taki Yehovah ben meki a kon betre baka (Luk. 3:10-13). Na uma dati ben abi bun reide fu gi Yehovah grani, èn wi abi bun reide tu fu du dati. w25.01 2-3 ¶3-4

Yu denki taki wi man kisi ala den sani baka di Adam nanga Eva lasi? Wi w’wan no o man sorgu taki wi kisi den baka (Ps. 49:7-9). Efu wi no ben o kisi yepi, wi no ben o abi a howpu fu libi fu têgo noso fu kisi wan opobaka. Wi ben o dede èn wi no ben o libi baka noiti moro, neleki fa a de nanga den meti (Preik. 3:19; 2 Pet. 2:12). Wi lob’ati P’pa pai gi a sondu di wi kisi fu Adam nanga Eva. Yesus ben ferklari en so: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). A sani disi di Yehovah du, e meki tu taki wi man abi wan bun matifasi nanga en. Wi kan kisi wini fu a moi sani di Yehovah du so taki wi kan kisi pardon gi den sondu fu wi. w25.02 3 ¶3-6

San yepi Saulus fu teki dopu? Di Yesus taki nanga Saulus kmoto fu hemel, dan wan leti di ben kmoto fu hemel breni en (Tori 9:3-9). Dri dei langa Saulus no nyan èn a musu de so taki a denki dipi fu a sani di psa nanga en. Iya, Saulus ben de seiker now taki Yesus ben de a Mesias èn taki den bakaman fu en ben abi a tru bribi. Wi kan leri wan tu sani fu Saulus. Efu a ben abi heimemre noso efu a ben e frede libisma, dan dati ben kan tapu en fu teki dopu. Ma a no gi pasi taki dati psa. Saulus ben de klarklari fu tron wan Kresten aladi a ben sabi taki sma ben o ferfolgu en (Tori 9:15, 16; 20:22, 23). Baka di a teki dopu, a tan abi a fertrow taki Yehovah ben o yepi en fu hordoro te a ben o kisi tesi (2 Kor. 4:7-10). Te yu teki dopu fu tron wan Yehovah Kotoigi, dan a kan taki yu o kisi tesi noso taki sma o gens yu. Ma yu kan de seiker taki Gado nanga Krestes ala ten o gi yu a yepi di yu abi fanowdu fu hordoro èn fu tan getrow.​—Fil. 4:13. w25.03 4 ¶8-9

Leisi Bijbel na wan bun marki fu poti gi wisrefi. Ma wi musu du moro efu wi wani kisi wini dorodoro fu den sani di wi e leisi na ini Gado Wortu. Luku na eksempre disi: Yongu plantje abi watra fanowdu fu man gro. Ma efu na ini wan syatu pisi ten tumsi furu alen e fadon, dan a gron o abi tumsi furu watra. Te moro alen e fadon, dan a gron no o man teki a watra èn dati no bun gi den plantje. Te tumsi furu alen no e fadon, dan a gron o man teki a watra èn den plantje o gro moro bun. Na so a de tu taki wi no musu leisi Bijbel so esi taki wi no abi ten fu denki dipi fu san wi e leisi. Wi no o man memre san wi leisi, èn wi no o man fiti den sani dati tu (Yak. 1:24). Yu feni taki yu e leisi Bijbel tumsi esi son leisi? San yu musu du? Teki yu ten, so taki yu kan denki dipi fu den sani di yu e leisi. Noso te yu kba leisi, dan meki ten fu denki dipi fu den sani dati. Yu kan besroiti fu studeri moro langa so taki yu kan denki dipi fu den sani di yu leisi. w24.09 4 ¶7-9

Te den owruman e kisi rai fu na organisâsi, dan den musu du muiti fu ferstan den rai dati bun èn fu fiti den. Den e kisi rai fa fu hori den difrenti pisi fu a konmakandra èn fa fu begi gi a gemeente. Ma den e kisi rai tu fa fu sorgu gi den skapu fu Krestes. Te den owruman e fiti ala den rai disi, dan den brada nanga sisa o firi taki Yehovah lobi den èn taki a e sorgu gi den. Te wi e kisi rai fu den owruman, dan wi musu de klarklari fu fiti den rai disi. Disi o meki en moro makelek gi den brada disi fu tyari den frantwortu fu den. Bijbel e gi wi a dek’ati fu gi yesi na den wan di e teki fesi èn fu saka wisrefi na den ondro (Hebr. 13:7). Ma son leisi a sani disi no makelek. Fu san ede? Fu di den man disi na sondu libisma. Te wi e tan poti prakseri na den fowtu fu den na presi fu luku den bun fasi fu den, dan fu taki en leti wi e yepi den feanti fu wi. Fu san ede wi kan taki dati? Wi o tweifri taki Gado e gebroiki en organisâsi fu tiri wi èn wi no o fertrow na organisâsi moro. w24.04 10 ¶11-12

A de so taki ala den sma di o dede na a ten fu a bigi banawtu o dede fu ala ten èn taki howpu no o de gi den fu kisi wan opobaka? Bijbel e sori krin san o psa nanga den sma di ben e gens Yehovah krinkrin. Yehovah nanga den legre fu en o pori den sma disi èn den no o kisi wan opobaka (2 Tes. 1:6-10). Ma fa a de nanga tra sma, fu eksempre, den wan di o dede fu di den kon siki, fu di den kisi mankeri, noso fu di tra sma kiri den? (Preik. 9:11; Sak. 14:13) A kan taki sonwan fu den sma disi de na ini a grupu fu den „sma di no du san reti” èn di o kisi wan opobaka na ini a nyun grontapu? (Tori 24:15) Fu taki en leti, wi no sabi. Ma te a abi fu du nanga a ten di e kon, dan a tru taki wi sabi difrenti sani. Fu eksempre, wi sabi taki a fasi fa sma ben libi nanga den salfu brada fu Krestes o bepaal sortu krutu den o kisi (Mat. 25:40). Den o kisi krutu leki skapu fu di den horbaka gi den salfuwan èn gi Krestes.​—Openb. 12:17. w24.05 10-11 ¶9-11

Bijbel e taki dati wi e libi na ini muilek ten di tranga fu psa (2 Tim. 3:1). A pipel fu Yehovah e ondrofeni den srefi problema di e miti tra sma na ini a ogri grontapu disi fu Satan. Boiti dati, sma e ferfolgu wi èn den e gens wi fu di wi e dini Yehovah. Fa a du kon taki wi man tan anbegi Yehovah aladi wi e kisi den sortu problema disi? Wan reide, na fu di wi kon sabi Yehovah leki „a libilibi Gado” (Yer. 10:10; 2 Tim. 1:12). Yehovah e si ala den tesi di e miti wi èn ala ten a wani yepi wi (2 Kron. 16:9; Ps. 23:4). Te wi e si Yehovah leki a libilibi Gado, dan dati kan yepi wi fu hordoro, awinsi sortu tesi e miti wi. w24.06 20 ¶1-2

Wi musu tan fertrow na organisâsi fu Yehovah. Son leisi a de krin taki wi musu kenki a fasi fa wi ben e ferstan wan tru tori fu Bijbel, noso wan sani di abi fu du nanga a fasi fa wi e dini Yehovah. Te dati de so, dan a Tiri Skin no e draidrai fu tyari den kenki disi kon. A Tiri Skin e du dati fu di san prenspari gi den, na taki den wani plisi Yehovah. Boiti dati, a Tiri Skin e du ala san den man fu hori densrefi na Gado Wortu di e sori ala anbegiman fu Yehovah san na a wani fu en. Na apostel Paulus gi a rai disi: Tan hori yusrefi na „a soifri leri” (2 Tim. 1:13). „A soifri leri” na den Kresten leri di de fu feni na ini Bijbel (Yoh. 17:17). Den leri disi na ala sani di wi e bribi. Na organisâsi fu Yehovah leri wi fu tan hori wisrefi na den leri dati. Solanga wi e du dati, wi o kisi blesi. w24.07 11-12 ¶12-13

Fu di na apostel Petrus srefi ben sori berow èn fu di a ben ondrofeni fa Gado gi en pardon, meki a ben man ferteri trawan san a ben leri. Petrus ben meki den Dyu di ben de na a Pinksterfesa kon ferstan taki na den ben kiri a Mesias. Ma tòg a gi den a dek’ati disi: „Fu dati ede un musu abi berow èn un musu drai un libi, so taki Yehovah srefi kan figi un sondu puru. Dan a o gi unu krakti” (Tori 3:14, 15, 17, 19). Na so Petrus sori taki te wan sma abi berow, dan dati o gi en dek’ati fu kenki a fasi fa a e denki èn e tyari ensrefi. A o tapu fu du san no bun, èn a o bigin du san e plisi Gado. Na apostel Petrus ben sori den Dyu disi tu taki Yehovah ben o gi den pardon nanga en heri ati. A de neleki a e figi den sondu fu den puru so taki den no de fu si srefsrefi moro. A sani disi e trowstu wi leki Kresten trutru te wi du wan sondu, awinsi na seryusu sondu. w24.08 12 ¶14

Efu wi e bribi tranga taki heri esi Yehovah o pori na ogri grontapu disi, dan wi no o poti wi fertrow na ini moni noso na ini gudu. Fu taki en leti, sma o „trowe den solfru na strati” fu di den o si taki „a solfru nanga a gowtu fu den no o man frulusu den na a dei fu Yehovah en atibron” (Esek. 7:19). Na presi taki wi e suku fu meki so furu moni leki wi man, wi musu teki besroiti di o yepi wi fu libi wan simpel libi èn fu poti Yehovah na a fosi presi. Disi wani taki dati wi no meki paiman di no de fanowdu èn wi no o gebroiki tumsi furu fu wi ten fu sorgu gi den gudu fu wi. Wi o luku bun tu taki den gudu di wi abi kba no e tron den moro prenspari sani na ini wi libi (Mat. 6:19, 24). Now di a kba fu a grontapu disi e kon moro krosbei, wi musu besroiti efu wi o fertrow tapu Yehovah noso tapu den gudu fu wi. w24.09 11 ¶13-14

Kande wi kan wini wan tu fu den swakifasi fu wi. Ma kande wi e si tu taki wi musu tan kakafutu wan heri pisi ten gi tra swakifasi. Luku na eksempre fu na apostel Petrus. Fu di a ben e frede, meki a taki dri leisi taki a no ben sabi Yesus (Mat. 26:69-75). Ma bakaten a ben gersi leki Petrus ben wini a swakifasi dati, fu di a no ben e frede fu opo taki gi Yesus na fesi a Sanhedrin (Tori 5:27-29). Ma wan tu yari baka dati, a tapu fu nyan makandra nanga den Kresten di no ben de Dyu, „fu di a ben frede den sma di besnèi” (Gal. 2:11, 12). A swakifasi fu Petrus ben opo kon baka. Kande a no ben wini a swakifasi dati noiti. Wan srefi sortu situwâsi kan miti wi. Wi kan sorgu taki wan swakifasi di wi no wini ete no e meki taki wi sondu. Wi kan du dati te wi e gi yesi na a rai di Yesus ben gi. A ben taki: „Tan na ai.” (Mat. 26:41) Srefi te yu e firi leki yu tranga nofo, tòg yu musu tan wai pasi gi situwâsi di kan tron wan tesi gi yu. Tan du den sani di yepi yu kba fu kakafutu gi a swakifasi.​—2 Petr. 3:14. w24.07 18-19 ¶17-19

Nowan enkri libisma oiti du moro leki Yesus fu yepi trawan. Di Yesus ben de na grontapu, a ben gwenti du wondru fu yepi sma (Luk. 9:12-17). A moro bigi kado di Yesus gi wi, na a libi fu en (Yoh. 15:13). Sensi di Yesus kisi wan opobaka, a tan yepi wi. Neleki fa a ben pramisi, a aksi Yehovah fu gebroiki en santa yeye fu gi wi leri èn fu trowstu wi (Yoh. 14:16, 17; 16:13). Èn Yesus e gebroiki den gemeente konmakandra, fu gi wi san wi abi fanowdu fu man meki disipel na heri grontapu (Mat. 28:18-20). Meki wi poti prakseri now na wan tra sani di Yesus ben du gi wi. Na apostel Paulus ben skrifi taki baka di Yesus opo go na hemel, dan a „gi a gemeente mansma di abi spesrutu koni” (Ef. 4:7, 8). Paulus taki dati Yesus ben gi wi den man disi fu yepi a gemeente na difrenti fasi (Ef. 1:22, 23; 4:11-13). A no de fu taki dati den man disi na sondusma, sobun, den e meki fowtu (Yak. 3:2). Ma tòg wi Masra Yesus Krestes e gebroiki den fu yepi wi. w24.10 18 ¶1-2

David ben taigi en manpkin taki sani ben o waka bun gi en solanga a ben e gi yesi na Yehovah Gado. A sari taki di Salomo kon owru, dan a bigin anbegi tra gado. Yehovah no ben lobi a sani dati èn a tapu fu gi Salomo a koni fu tiri a pipel nanga lobi èn na wan reti fasi (1 Kow. 11:9, 10; 12:4). San disi e leri wi? Te wi e gi yesi na Yehovah, dan a o blesi wi èn a o yepi wi (Ps. 1:1-3). A no de fu taki dati Yehovah no pramisi wi taki wi o kon gudu èn taki wi o kisi biginen neleki Salomo. Ma efu wi e gi yesi na a Gado fu wi, dan a o tiri wi èn a o gi wi koni fu teki bun besroiti (Odo 2:6, 7; Yak. 1:5). Den rai fu en kan yepi wi te wi musu teki besroiti di abi fu du nanga wroko, skoro, moni, èn nanga prisiriten. Te wi e gi yesi na den rai fu Gado, dan dati e yepi wi fu tan bun mati fu en èn wi o kisi têgo libi (Odo 2:10, 11). Wi o abi bun mati èn wi osofamiri o de koloku. w24.11 10-11 ¶11-12

Yepi yu pkin fu denki dipi fu den sani di Bijbel e leri. Yu abi furu difrenti okasi fu taki fu Bijbel èn fu Gado nanga den pkin fu yu. Kande yu kan leri yu pkin den sani disi te unu e go na presi soleki wan museum. Yu kan sori yu pkin fa wan sani di den e si drape, noso wan sani di ben psa na ini owruten, abi fu du nanga wan tori na ini Bijbel. Disi kan yepi yu pkin fu si taki san Bijbel e taki, tru. A pkin fu yu sabi taki Gado en nen skrifi tapu wan pisi ston di sma sabi leki a Moab-ston èn di owru moro leki 3000 yari? Wan kopi fu a Moab-ston de fu si na a tentoonstelling di nen „Bijbel nanga a nen fu Gado”, èn a e hori na a edekantoro fu Yehovah Kotoigi na Warwick, na ini New York. Tapu a Moab-ston skrifi taki Kownu Meisa fu Moab ben opo ensrefi teige Israel. A sani disi e kruderi nanga san Bijbel e taki (2 Kow. 3:4, 5). Te yu pkin e si den beweisi di e sori taki san Bijbel e taki tru, dan a bribi fu en o kon moro tranga. w24.12 14 ¶4; 15 ¶6