Yanuari

A e gi wan trowpaar furu prisiri te den kisi wan gosontu beibi. Ma aladi a p’pa nanga m’ma lobi a nyun beibi fu den, tòg den no wani meki a tan wan beibi ala ten. Den ben o broko den ede trutru efu a beibi no ben e gro. Na so a de tu taki Yehovah breiti te wi e bigin leri sabi en, ma a no wani taki wi no e go na fesi noso taki wi e tan wan beibi (1 Kor. 3:1). Ma na presi fu dati, a wani taki wi e „tron lepi” Kresten. Na ini Bijbel a Grikitongo wortu di vertaal leki „bigi sma” wani taki sosrefi „wan lepi sma” (1 Kor. 2:6). Neleki fa wan beibi e gro kon tron wan bigisma, na so a matifasi di wi abi nanga Yehovah musu kon moro tranga teleki wi tron wan lepi brada noso sisa. A no de fu taki dati awinsi wi tron wan lepi Kresten kba, wi musu tan meki muiti fu go na fesi.​—1 Tim. 4:15. w24.04 2 ¶1, 3

Efu wan sma ben o aksi yu: „Fa yu e si Yehovah?” dan san yu ben o piki? Kande yu ben o piki: „Yehovah na mi P’pa, mi Gado, èn mi Mati.” Kande tra fasi de tu fa yu ben o kari Yehovah. Ma yu e si Yehovah tu leki a Sma di gi yu wan kari fu kon na ini a tenti fu en? Kownu David ben agersi Yehovah nanga wan sma di e gi trawan a kari fu kon na ini a tenti fu en èn a e agersi den getrow anbegiman fu en nanga sma di kisi a kari disi. David ben aksi: „Yehovah, suma kan kon tan nanga yu na ini yu tenti? Suma kan kon tan na tapu yu santa bergi?” (Ps. 15:1). Den wortu disi di skrifi nanga yepi fu santa yeye e sori taki Yehovah kan gi wi a kari fu kon na ini a tenti fu en, èn dati wani taki dati wi kan tron wan mati fu en. Fosi Yehovah ben meki ala sani, a ben de en w’wan. Ma baka wan pisi ten a gi en fosi Manpkin a kari fu kon na ini a tenti fu en. Yehovah ben breiti srefsrefi fu du dati. Bijbel e taki dati Yehovah en Manpkin „ben e gi en bigi prisiri”. Èn en Manpkin ben taki dati a ’ben breiti ala ten fu di a ben de nanga Yehovah’.​—Odo 8:30. w24.06 2 ¶1-3

Pruberi fu si a sani disi na yu fesi. Moro leki 340.000 man nanga uma ben kon makandra fu poti David leki kownu fu heri Israel. Dri dei langa, den man nanga uma tan na ini a bergi kontren krosbei fu Hebron. Den ben e taki tori, èn den ben e singi prèisesingi gi Yehovah (1 Kron. 12:39). Wan yonguman di nen Sadok ben de drape tu. Kande furu sma no ben o poti prakseri na en. Ma Yehovah poti prakseri na en èn a wani taki wi du dati tu (1 Kron. 12:22, 26-28). Sadok ben de wan priester di ben e wroko skinskin nanga Granpriester Abiatar. Boiti dati, Gado ben gi Sadok furu koni èn a ben man ferstan krin san na a wani fu En (2 Sam. 15:27). A ben de wan dek’ati man tu. Na ini den lasti dei disi, Satan e pruberi moro leki oiti bifo fu pori a bribi di wi abi na ini Yehovah (1 Petr. 5:8). Dati meki wi musu abi dek’ati fu man hordoro teleki Yehovah pori Satan nanga na ogri grontapu fu en (Ps. 31:24). Te wi e du dati dan wi kan sori dek’ati neleki Sadok. w24.07 2 ¶1-3

Di Yehovah meki a fosi man nanga uma, dan a ben wani taki den de koloku. A gi den wan moi tanpe, a meki den tron masra nanga wefi, èn a gi den wan wroko di ben o gi den furu prisiri. Den ben musu furu grontapu nanga den bakapkin fu den, èn den ben musu meki heri grontapu tron wan paradijs neleki a dyari fu Eden. Ma wán sani nomo den no ben mag du. Yehovah ben warskow den taki efu den ben o trangayesi en, dan dati ben o tyari dede kon gi den. Wi sabi san psa. Wan ogri yeye di no ben lobi libisma nanga Gado, kori Adam nanga Eva fu meki den trangayesi Gado. Adam nanga Eva du san na ogri engel, Satan, ben wani. Fu di den no ben e fertrow a lobi P’pa fu den, meki den sondu. San Yehovah ben taki kon tru. Fu di Adam nanga Eva trangayesi Gado, meki den kon owru èn te fu kba den dede.​—Gen. 1:28, 29; 2:8, 9, 16-18; 3:1-6, 17-19, 24; 5:5. w24.08 3 ¶3

Yehovah nanga en lobi Manpkin wani taki wi de koloku. Psalm 119:2 e taki: „Koloku fu den sma di e du san a taki èn di e suku en nanga den heri ati.” Yesus ben taki tu: „Koloku fu den sma di e yere a wortu fu Gado èn di e du san a wortu e taki!” (Luk. 11:28) Leki futuboi fu Yehovah wi de koloku fu di wi gwenti leisi Gado Wortu èn wi e meki muiti fu fiti san wi e leri (Yak. 1:22-25). Te wi e fiti san wi leri fu Gado wortu, wi e meki Yehovah ati prisiri (Preik. 12:13). Boiti dati, te wi e fiti den rai na ini Gado wortu, dan wi o man feni en moro bun nanga den sma na ini wi osofamiri èn wi o tron moro bun mati nanga den sma na ini a gemeente. Wan tra wini, na taki wi no o abi den problema di e miti den sma di no e gi yesi na den komando fu Yehovah. A de neleki fa Kownu David ben taki. Baka di David ben taki fu den wet, den komando, nanga den krutubosroiti fu Yehovah na ini wan singi, dan a taki: „Te [yu futuboi] e hori ensrefi na den, dan a e kisi furu blesi.”​—Ps. 19:7-11. w24.09 2 ¶1-3

San Yehovah e si te a e luku den futuboi fu en na grontapu? A e si te wi de koloku èn te wi e sari (Ps. 37:18). Te a e si taki wi e du ala san wi man fu dini en srefi te wi e firi brokosaka, dan a e prisiri srefsrefi. Ma san moro prenspari, na taki a de klarklari fu yepi wi èn fu trowstu wi. Psalm 147:3 e sori taki Yehovah e broko en ede nanga den wan di e firi brokosaka, neleki fa wan bun datra e broko en ede nanga wan sma di kisi mankeri. A tekst disi e sori fa Yehovah de klarklari fu yepi de wan di e firi brokosaka. San wi musu du efu wi wani kisi wini fu den someni fasi fa Yehovah e yepi wi? Luku na eksempre disi: Wan koni datra kan du furu fu yepi wan sma di kisi mankeri. Ma efu a sma wani kon betre, dan a musu du soifri san a datra e taigi en. Nanga yepi fu en wortu Yehovah e taki nanga i den wan di e firi brokosaka èn a e gi den rai fu. w24.10 6 ¶1-2

Fosi, den buku fu wi ben e taki san o psa nanga den sma di Yehovah e krutu leki sma di no du san reti. Wi ben taki dati den sma disi no o kisi wan opobaka na ini a ten di e kon. Difrenti Bijbel tori e ferteri fa Yehovah krutu sma di no du san reti, soleki a bigi grupu sma di dede na ini a Frudu. Bijbel e taki tu fu den seibi pipel di ben e libi na ini a Pramisi kondre èn di Yehovah ben wani taki a pipel fu en ben musu puru na pasi. Wan tra eksempre na den 185.000 srudati fu Asiria di wan engel fu Yehovah kiri na ini wán neti (Deut. 7:1-3; Yes. 37:36, 37). Te wi e leisi den tori disi, dan wi kan taki dati Bijbel gi wi nofo beweisi fu bribi taki ala den sma disi dede fu ala ten èn taki noiti moro den o kisi wan opobaka? Nôno, dati no de so. Wi no sabi fa Yehovah krutu ibriwan fu den sma dati, èn wi no sabi tu efu den sma di dede ben kisi okasi fu leri sabi Yehovah èn fu sori berow. w24.05 3 ¶5-7

Yesus ben ferteri wan agersitori fu wan uma di masra ben dede kba. Na uma disi ben e tan aksi wan krutuman fu yepi en fu di wan sma no ben e libi bun nanga en. A no de fu taki dati den disipel fu Yesus ben man ferstan fa na uma dati ben e firi fu di na a ten dati, a ben e psa furu taki sma no ben e libi bun nanga trawan (Luk. 18:1-5). Wi kan ferstan tu fa na uma disi ben e firi, fu di wi alamala ondrofeni wan leisi taki sma no libi bun nanga wi.Furu sma na ini a ten disi e denki takru fu trawan, den no abi swit’fasi, èn den gridi. Dati meki wi kan ferwakti taki sma o du hati sani tu nanga wi (Preik. 5:8). Ma san kan hati moro, na te wan brada noso wan sisa e du wan hati sani nanga wi. A no de fu taki dati tra fasi leki den sma di e ferfolgu wi noso di e gens wi, wi Kresten brada nanga sisa no wani du sani di e hati wi. Tòg disi e psa son leisi fu di den na sondu sma. Wi kan leri furu fu Yesus te wi e luku san a ben du te ogri-ati gensman ben e du ogri nanga en. Efu wi kan abi pasensi nanga gensman di e du ogri nanga wi, dan a no de fu taki dati wi musu abi moro pasensi nanga wi Kresten brada nanga sisa. w24.11 2 ¶1-2

Brede ben de a moro prenspari n’nyan gi den sma na ini Bijbel ten (Gen. 14:18; Luk. 4:4). Brede ben prenspari so te taki son leisi te Bijbel e gebroiki a wortu „brede”, dan dati ben abi fu du nanga a ’n’nyan’ di sma ben e nyan ibri dei (Mat. 6:11). Boiti dati, tu fu den wondru di Yesus ben du, ben abi fu du nanga brede (Mat. 16:9, 10). Wan fu den tori dati de fu feni na ini Yohanes kapitel 6. Di den apostel fu Yesus ben kba nanga a preikiwaka fu den, dan Yesus teki boto makandra nanga den èn den go abrasei fu a Se fu Galilea. Drape den ben o man rostu pkinso (Mark. 6:7, 30-32; Luk. 9:10). Den doro krosbei fu Betsaida, na wan presi pe den ben kan de den w’wan. Ma sma yere taki Yesus ben de drape èn heri esi dusundusun sma doro drape fu di den ben wani si en. Yesus no libi den sma so, ma a teki en ten fu leri den sani fu a Kownukondre èn a dresi den sikiwan. Fu di a ben e kon lati kba, meki den disipel ben e aksi densrefi fa ala den sma disi ben o man feni wan sani fu n’nyan. Kande sonwan fu den ben abi pkinso n’nyan na den, ma furu fu den ben o abi fu go bai n’nyan na ini den dorpu.​—Mat. 14:15. w24.12 2 ¶1-2

Wi fosi p’pa nanga m’ma, Adam nanga Eva, no ben abi sondu èn den ben e libi na ini wan moi paradijs (Gen. 1:27; 2:7-9). Den ben abi a howpu fu libi wan koloku libi fu ala ten. Ma den lasi ala sani. Den lasi a Paradijs pe den ben e tan èn den lasi a howpu di den ben abi fu libi fu têgo. San den libi na baka gi den pkin fu den? Bijbel e taki: „Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu” (Rom. 5:12). Wi kisi sondu fu Adam èn dati meki wi e dede. A sondu di wi kisi de leki wan bigi paiman di nowan fu wi man pai (Ps. 49:8). Yesus e agersi sondu nanga paiman (Mat. 18:32-35). Te wi e sondu, dan a de neleki wi e meki wan paiman na Yehovah. Wi srefi no man pai a paiman dati, èn na soso te wi dede wi no ben o abi fu pai en moro.​—Rom. 6:7, 23. w25.02 2-3 ¶2-3

Wi e si en leki wan grani fu ferteri trawan fu a Kownukondre fu Gado. Ma a no ala sma e kisi a grani disi. Fu eksempre, di Yesus ben de na grontapu a no ben gi pasi taki den ogri yeye ben e ferteri sma fu en (Luk. 4:41). Na ini a ten disi a de so taki fosi wan sma e teki prati na a preikiwroko, a musu libi kba na wan fasi di Yehovah feni bun. Te wi e ferteri trawan fu a Kownukondre fu Gado awinsi pe de èn na iniwan okasi, dan wi e sori krin taki wi e warderi a grani di wi abi fu teki prati na a preikiwroko. Neleki Yesus wi wani du ala san wi man fu preiki gi trawan èn fu yepi den fu kon sabi den tru tori fu Bijbel (Mat. 13:3, 23; 1 Kor. 3:6). Neleki Yesus, na organisâsi fu Yehovah e du ala san a man fu yepi sma fu kon sabi a nen fu Gado. Wan fasi fa na organisâsi fu wi e du dati, na taki den tyari a Nyun-Grontapuvertaling Bijbel kon na doro. Na ini a Bijbel disi, a nen fu Gado de fu feni baka na den presi pe a musu de. A heri Bijbel disi noso pisi fu en de fu feni na ini moro leki 270 tongo. w24.04 9 ¶8-9

Son brada di abi wan koloku trowlibi e sorgu taki den e du wan sani ibri dei fu sori a wefi fu den taki den lobi en (1 Yoh. 3:18). Kande wan masra e du pkinpkin sani fu sori a lobi dati. Kande a e hori en wefi anu te a e taki nanga en, noso kande a e gi en wan waran brasa. A kan tu taki a e seni wan sms gi en fu taigi en taki a e misi en, noso fu aksi en fa a e go. Ten na ten, a kan skrifi wan tu moi wortu gi en wefi tapu wan karta fu sori en taki a lobi en. Te wan masra e du den sani disi, dan a e gi en wefi grani èn na so a trowlibi fu den o waka moro bun. Wan masra di e gi en wefi grani e taigi en fu san ede a breiti nanga en èn a e gi en dek’ati. Wán fasi fa a e du dati, na taki a no e fergiti fu sori en taki a e warderi ala sani di a e du fu horbaka gi en (Kol. 3:15). Te wan masra e prèise en wefi nanga en heri ati, dan dati e meki a wefi firi koloku. A o abi a dyaranti taki sani o waka bun nanga en, taki en masra lobi en, èn taki a e lespeki en. w25.01 11 ¶15; 13 ¶16

Psalm 15 e tapu nanga a pramisi disi: „Sma di e libi na a fasi disi, no sa naki futu noiti”. Dyaso a psalm skrifiman e sori fu san ede Gado wani taki wi du ala den sani di kari na ini a psalm disi. Yehovah wani taki wi de koloku. Te wi e du san Gado e aksi fu wi, dan wi o abi wan moro bun libi èn a o kibri wi. Den sma di mag tan na ini a tenti fu Yehovah kan ferwakti wan moi tamara. Den salfuwan o libi na ini hemel pe Yesus sreka wan presi gi den (Yoh. 14:2). Den sma di abi a howpu fu libi na grontapu e ferwakti fu kisi a pramisi di skrifi na Openbaring 21:3. A no de fu taki dati wi alamala e si en leki wan bigi grani taki Yehovah gi wi a kari fu tan ini en tenti fu ala ten!​—Ps. 15:1-5. w24.06 13 ¶19-20

Bijbel e sori taki Yehovah na wan Gado di abi bigi makti. Wan tu dei baka di Yehovah ben puru a pipel fu Israel na ini katibo na Egepte, a sori den a bigi makti di a abi. Pruberi fu si na yu fesi san ben psa: Milyunmilyun Israelsma ben kon makandra na a futu fu Sinai-bergi fu yere san a Gado fu den ben o taigi den. Ne wan dungru wolku tapu a heri bergi. Wantronso, soso smoko ben de fu si na loktu. A gron bigin seki hebi, faya koti na hemel, dondru bari, dan a tranga b’bari fu wan tutu ben de fu yere (Eks. 19:16-18; 24:17; Ps. 68:8). A no de fu taki dati den Israelsma no ben man bribi di den si a bigi makti fu Yehovah. Na ini a ten disi. wi leki libisma man yepi trawan tu fu kon si taki Yehovah na wan makti Gado. Wán fasi fa wi kan du dati, na te wi e ferteri trawan fu a bigi makti fu en èn fu den moi fasi di a abi. Wi e gi Yehovah grani tu te wi e prèise en gi den sani di wi ben man du.​—Yes. 26:12 w25.01 2 ¶2-3

Di den Israelsma ben de na pasi fu go na a Pramisi Kondre, dan prenspari man opo densrefi teige Moses èn den no ben e lespeki a frantwortu di Yehovah ben gi en. Den ben taki: „A heri pipel [a no Moses w’wan] santa èn Yehovah de na den mindri” (Num. 16:1-3). A tru taki gi Gado „a heri pipel” ben santa, ma tòg Yehovah ben poti Moses fu teki fesi na mindri a pipel fu en. Di den sma bigin krutu Moses, dan fu taki en leti, den ben e krutu Yehovah. Den no ben e poti prakseri na san Yehovah ben wani, ma den ben e poti prakseri na san den srefi ben wani. Den ben wani moro makti èn moro grani. Gado kiri den sma di ben e sutu faya gi trawan fu opo densrefi teige Moses èn a kiri dusundusun tra sma di ben e horbaka gi den (Num. 16:30-35, 41, 49). Na ini a ten disi wi kan de seiker taki Yehovah no lobi den wan di no e lespeki den seti fu na organisâsi fu en. w24.07 11 ¶11

Neleki den Hebrew Kresten, wi musu abi wan tranga bribi tu. Wi e libi na ini wan ten pe furu sma no e bribi taki a kba fu a grontapu disi e kon. Den e spotu wi srefi fu di wi e bribi dati (2 Petr. 3:3, 4). Tòg furu sani de di wi no sabi. Wi musu abi a tranga bribi taki a kba fu a grontapu disi o kon na a yoisti ten èn wi no musu tweifri taki Yehovah o sorgu gi wi na a ten dati. Wi musu bribi tu taki Yehovah e gebroiki „a koni srafu di de fu frutrow” fu tiri wi na ini a ten disi (Mat. 24:45). Te a bigi banawtu bigin, dan a kan taki wi o kisi den sortu rai dati tu. Now na a ten fu kon abi moro fertrow na ini den rai di wi e kisi fu den brada di e teki fesi na ini Yehovah en organisâsi. Wi no musu denki taki wi o de klarklari fu gi yesi na den rai fu den na a ten fu a bigi banawtu, efu wi feni en muilek fu du dati now. w24.09 11 ¶11-12

A pkin fu yu no o bribi na ini Yehovah soso fu di yu e du dati. Dati meki a kan taki a pkin fu yu o bigin aksi yu sani soleki: ’Fa mi kan sabi seiker taki wan Gado de? Mi kan bribi trutru san Bijbel e taki?’ Fu taki en leti, Bijbel e gi wi dek’ati fu gebroiki wi „frustan” èn fu „ondrosuku ala sani fu luku efu den tru” (Rom. 12:1; 1 Tes. 5:21). Ma fa yu kan yepi yu pkin fu tranga a bribi fu en? Gi yu pkin dek’ati fu feni beweisi di e sori taki san Bijbel e taki tru. Te yu pkin e poti aksi gi yu, dan gebroiki na okasi dati fu sori en fa a kan feni piki tapu den aksi dati. Gebroiki den sani di wi abi fu ondrosuku Bijbel, soleki Ondrosuku Bijbel moro fini​—Gi Yehovah Kotoigi. Na ini a buku disi a kan go na a tori „Bijbel” èn a kan suku a pisi di nen „Gado gebroiki en santa yeye”. Drape a o feni beweisi di e sori taki Bijbel a no gewoon wan buku di libisma skrifi. Na presi fu dati, Bijbel na „a wortu fu Gado”.​—1 Tes. 2:13. w24.12 14-15 ¶4-5

Den musu train tra brada èn den musu yepi den awinsi den yongu ete, so taki den man tyari moro bigi frantwortu. Owruman e ferstan taki den brada di den e train e meki fowtu. Den musu gi den yongu brada disi rai na wan lob’ati fasi so taki den kan kon abi ondrofeni èn so taki den man si fu san ede a prenspari fu abi sakafasi, èn fu san ede den musu de klarklari fu dini trawan (1 Tim. 3:1; 1 Petr. 5:5). Boiti taki Yesus ben gi den disipel fu en a frantwortu fu preiki a bun nyunsu, den ben musu gi sma leri tu. Den disipel ben kan denki taki den no ben o man du san Yesus ben taigi den fu du. Ma Yesus ben de seiker taki den ben o man du a wroko. Dati meki a taigi den: „Neleki fa a Tata seni mi kon, na so mi e seni unu tu.”​—Yoh. 20:21. w24.10 16 ¶15; 17 ¶17

David ben de wan kownu fu a pipel fu Yehovah èn a ben e dini Gado nanga en heri ati. Furu tesi ben miti en. Wan tu yari a ben e libi leki loweman fu di a ben e lowe gi Kownu Saul di ben dyarusu na en tapu. Baka di David tron kownu, a ben musu lowe baka fu di en manpkin Absalom di ben wani tron kownu, ben e suku fu kiri en. Aladi den problema disi ben e miti David èn aladi a ben meki wan tu fowtu, tòg a tan dini Gado te na a dede fu en. Yehovah ben taki dati a ben lobi David. A no de fu taki dati wi musu arki den koni rai fu David (1 Kow. 15:5). Luku a rai di David ben gi en manpkin Salomo di ben o tron kownu baka en. Yehovah ben teki a yonguman disi fu bow wan tempel pe sma ben kan anbegi En (1 Kron. 22:5). Furu wroko ben de fu du èn a ben abi yepi fanowdu fu Yehovah fu man tiri a pipel. San David ben o taigi en? David ben taigi en manpkin taki efu a ben o gi yesi na Yehovah, dan sani ben o waka bun gi en.​—1 Kow. 2:2, 3. w24.11 10 ¶9-11

Wan masra di e fon en wefi noso di e kosi en, musu du wan tu sani fu meki sani bun baka nanga Yehovah èn nanga a wefi fu en. A fosi sani, na taki a musu ferstan taki a abi wan seryusu problema. Nowan enkri sani kibri gi Yehovah (Ps. 44:21; Preik. 12:14; Hebr. 4:13). A di fu tu sani, na taki a musu tapu fu fon en wefi èn fu kosi en, èn a musu kenki a fasi fa a e tyari ensrefi (Odo 28:13). A di fu dri sani, na taki a musu taigi en wefi nanga Yehovah taki a e ferstan fa a hati den firi fu den, èn a musu begi den fu gi en pardon (Tori 3:19). A musu begi Yehovah tu fu yepi en fu kon abi na angri fu kenki, èn fu yepi en fu denki, fu taki, èn fu tyari ensrefi na wan fasi di Yehovah feni bun (Ps. 51:10-12; 2 Kor. 10:5; Fil. 2:13). A di fu fo sani, na taki a musu leri fu no lobi nowan ogri noso dot’taki, èn a musu begi Yehovah tu fu yepi en nanga dati (Ps. 97:10). A di fu feifi sani, na taki a musu go suku yepi wantewante na den owruman fu a gemeente fu en (Yak. 5:14-16). A di fu siksi sani, na taki a musu suku wan fasi di o yepi en fu no du den sortu sani disi moro. w25.01 11 ¶14

Yu lobi Yehovah Gado, a Gado di gi yu ibri bun kado, srefi a libi fu yu? Yu no wani sori en taki yu lobi en? A moro bun fasi fa yu kan du dati, na te yu e gi yusrefi abra na en èn e dopu. Te yu e teki dopu, dan yu e kon na ini a bigi famiri fu Yehovah. Disi o meki taki yu P’pa di de sosrefi yu Mati, o sori yu san na a moro bun pasi fu waka èn a o sorgu gi yu fu di yu o de fu en (Ps. 73:24; Yes. 43:1, 2). Te yu gi yusrefi abra na en èn e dopu, dan yu o abi a howpu tu fu libi fu têgo (1 Petr. 3:21). Wan sani e tapu yu fu teki dopu? Efu dati de so, dan yu no de yu w’wan. Milyunmilyun sma ben musu tyari bigi kenki kon na ini a fasi fa den ben e tyari densrefi èn na ini a fasi fa den ben e denki, soso fu man doro den marki fu teki dopu. Ma now den sma disi e prisiri fu dini Yehovah fayafaya. w25.03 2 ¶1-2

Furu tron Bijbel e agersi den sondu fu wi nanga hebi lai. Disi na san Kownu David ben taki fu den sondu fu en: „Den fowtu fu mi furu so te, taki den psa mi ede. Den de leki wan hebi lai na mi tapu, iya, den hebi tumsi fu tyari” (Ps. 38:4). Ma te sma e sori berow fu den sondu fu den, dan Yehovah e gi den pardon (Ps. 25:18; 32:5). Den Hebrew wortu di vertaal nanga „gi pardon”, wani taki „fu opo” noso „fu tyari” wan sani. Sobun, te Yehovah e gi wi pardon fu den sondu fu wi, dan a e puru wan hebi na wi tapu. A de neleki wi ben e tyari wan hebi lai na tapu wi skowru èn a e teki en puru na wi tapu. Wan tra agersitori e sori taki Yehovah e tyari den sondu fu wi gwe bun fara. Psalm 103:12 e taki: „So fara leki son-opo de fu sondongo, na so fara fu wi a poti den sondu fu wi.” Son-opo nanga sondongo e psa na tu difrenti ten èn na tu difrenti presi. Disi wani taki dati Yehovah e tyari den sondu fu wi gwe moro fara leki san wi ben man denki. Disi e gi wi a dyaranti taki Yehovah e gi wi pardon trutru. w25.02 9 ¶5-6

Baka di Yesus drai go baka na hemel, dan na apostel Petrus dresi wan man di ben malengri sensi di a gebore (Tori 1:8, 9; 3:2, 6-8). A no de fu taki dati wan lo sma kon luku a sani disi di psa (Tori 3:11). Ma aladi Petrus ben gro kon na ini wan libimakandra pe sma ben lobi kisi grani, tòg a no ben wani taki sma gi en grani gi a sani di a du. Na presi fu dati, a taigi den sma fu prèise Yehovah nanga Yesus. A ben taigi den: „A man di unu e si dya èn di unu sabi, kon betre baka nanga yepi fu a nen fu Yesus èn fu di wi e bribi na ini a nen disi” (Tori 3:12-16). Neleki Petrus, wi kan tan du muiti fu sori sakafasi. Wi e du sani gi trawan fu di wi lobi Yehovah èn fu di wi lobi sma. Wi no e du sani gi trawan fu di wi wani taki sma prèise wi. Te wi de klarklari fu dini Yehovah nanga wi brada nanga sisa, srefi te sma no e si san wi e du, dan wi e sori taki wi abi trutru sakafasi.​—Mat. 6:1-4. w25.03 10-11 ¶11-12

Te wi e tan hori na prakseri taki a preikiwroko na wan moi fasi fa wi kan sori taki wi lobi Yehovah nanga tra sma, dan dati o yepi wi fu du a preikiwroko nanga moro prisiri (Mat. 22:37-39). Prakseri fa Yehovah o breiti te a e si taki wi e du a wroko di a gi wi. Prakseri tu fa sma o breiti te den e bigin studeri Bijbel nanga wi. Boiti dati, no fergiti taki den wan di e arki a boskopu fu wi èn e besroiti fu dini Yehovah o man libi fu têgo (Yoh. 6:40). Yu na wan sma di no man kmoto na ini yu oso fu di yu e siki noso fu wan tra reide ede? Efu dati de so, dan luku san yu man du fu sori taki yu lobi Yehovah nanga tra sma. Na a ten fu a COVID-19 siki di ben panya na heri grontapu, Samuel nanga en wefi Dania no ben man kmoto na ini den oso. Na ini den muilek pisi ten dati den ben e preiki gi sma nanga yepi fu telefon, den ben e skrifi brifi gi sma èn den ben e hori Bijbelstudie nanga yepi fu Zoom. Aladi Samuel nanga Dania no ben man du so furu na ini a situwâsi fu den, tòg den ben e du ala san den man èn dati ben e gi den prisiri. w24.04 18 ¶15-16

Aladi koloku no e kon nomo fu di yu trow, tòg furu Kresten yonguwan nanga owruwan wani wan trowpatna. A no de fu taki dati fosi yu abi verkering, dan yu musu abi wan bun matifasi nanga Yehovah, yu musu sabi yusrefi bun, yu no musu denki moro leki wan pkin ma leki wan bigisma, èn yu musu man tyari yu frantwortu na moni sei te yu trow (1 Kor. 7:36). Yu musu sabi kba ooktu san yu e suku na ini wan trowpatna, fosi yu bigin abi verkering. Bika efu yu no sabi dati, dan srefi efu wan sma di ben o de wan bun trowpatna gi yu de leti na yu fesi, tòg yu no ben o man si dati, noso a kan psa taki yu o abi verkering nanga wan sma di no bun gi yu. A no de fu taki dati a sma di yu o suku musu de wan dopu Kresten (1 Kor. 7:39). Ma a no ibri sma di dopu o de wan bun trowpatna gi yu. Sobun, yu kan aksi yusrefi: ’San mi wani du na ini mi libi? Sortu fasi mi feni taki mi trowpatna musu abi? Mi no e ferwakti tumsi furu?’ w24.05 20 ¶1; 21 ¶3

Te unu abi verkering, dan san unu kan du te unu no e agri nanga makandra? San yu musu du efu wanwan leisi unu e kisi trobi? Disi wani taki dati unu no bun gi makandra? Dati no abi fu de so. Ala paar e kisi pkinpkin trobi nanga densrefi. Tu sma abi wan bun trowlibi te den e lespeki makandra èn te den man fiti densrefi na san a trawan wani. Dus a fasi fa yu e lusu wan probleem now kan sori efu yu kan abi wan bun trowlibi. Un kan aksi unsrefi: ’Wi kan tan rustig èn taki fu wan sani na wan lespeki fasi? Wi de gaw fu taki dati wi du wan sani di no bun èn wi e pruberi fu wroko na en? Wi de gaw fu libi wan tori, fu taki sorry èn fu gi pardon?’ (Ef. 4:31) Ma efu ala yuru yu e kisi trobi nanga makandra noso efu yu no e feni en nanga makandra, dan a situwâsi no o kon moro bun baka te yu trow. Efu yu kon si taki a sma no bun gi yu, dan a moro bun sani gi un ala tu na fu broko a verkering. w24.05 29 ¶12

Wi kan de wan bun eksempre gi trawan te wi e tan gi yesi na Yehovah na ini ala sani èn te den besroiti fu wi e kruderi nanga Bijbel. Te wi e studeri Gado Wortu èn te wi e tranga a bribi di wi abi na ini Yehovah, dan wi o man tai hori na en èn na den wet fu en. Wi o man si krin san na den falsi leri nanga denki di no e kruderi nanga san Yehovah e leri wi, èn den sani disi no o abi krakti na wi tapu (Ef. 4:14; Yak. 1:6-8). Boiti dati, wi man yepi den wan tu di e kisi tesi (1 Tes. 3:2, 3). Owruman no musu du sani psa marki, den musu de nanga krin ferstan, den libi musu orga bun, èn den musu fiti densrefi makelek na trawan. Den man disi e yepi trawan fu no bruya èn fu abi wan tranga bribi na ini Yehovah, fu di den „e hori finifini na a wortu di tru” (Tit. 1:9; 1 Tim. 3:1-3). A bun fasi fa den owruman e tyari densrefi èn fa den e sorgu gi den skapu fu Yehovah, e gi den preikiman dek’ati fu kon na den gemeente konmakandra ibri wiki, fu teki prati na a preikiwroko, èn fu studeri so taki den kan tranga a bribi fu den. Te den brada nanga sisa e kisi problema di kan gi den broko-ede, dan den owruman e yepi den fu tan fertrow na tapu Yehovah èn fu tan hori den pramisi fu en na prakseri. w24.06 31 ¶16-18

Di Yesus ben de na grontapu, a leri sma taki en P’pa de klarklari fu gi wi pardon te wi sondu. Prakseri a tori fu wan p’pa nanga en manpkin. A yonguman dati ben besroiti fu gwe libi oso fu go libi wan yayolibi. Ma „a kisi ensrefi” èn a drai kon baka na oso. San en p’pa du? Yesus ferteri taki a manpkin „ben de fara fu oso ete, di en papa si en. Ne a papa lon go brasa en boi èn a gi en wan switi bosi.” A manpkin ben wani aksi en p’pa efu a ben kan tron wan fu den wrokoman fu en, ma en p’pa ben de klarklari fu gi en pardon. A kari en „a boi fu mi” èn a teki en baka na ini a famiri. A p’pa taki: „A ben lasi, ma mi feni en baka” (Luk. 15:11-32). Di Yesus ben e libi na hemel, dan seiker a ben si furu leisi fa en P’pa ben e firi gi sma di ben sori berow èn fa a ben de klarklari fu gi den pardon. A tori di Yesus ferteri e trowstu wi trutru èn a e sori taki wi P’pa, Yehovah, abi sar’ati trutru. w24.08 11 ¶11-12

Te wi de nanga krin ferstan, dan wi o prakseri fa Yehovah e denki fu sani te wi e teki besroiti. Wi o hori na prakseri taki nowan-enkri sani prenspari moro leki a matifasi di a abi nanga Yehovah. Wi no o denki tumsi furu fu wisrefi, èn wi o hori na prakseri taki wi no sabi ala sani. Efu wi de nanga krin ferstan, dan wi o abi a gwenti fu begi Yehovah fu yepi fu kon sabi wi san na a moro bun sani fu du. Na so wi e sori taki wi e fertrow na en tapu. Wi e ferstan taki wi musu tan begi Yehovah fu yepi wi, awinsi wi e denki taki a makelek gi wi fu du son sani. Dati meki te wi musu teki prenspari besroiti, dan a prenspari taki wi e begi Yehovah fu yepi wi, èn wi musu abi a fertrow taki a sabi san bun gi wi. Wi de nanga tangi taki Yehovah meki wi na so wan fasi taki wi man sori den moi fasi fu en (Gen. 1:26). A no de fu taki dati wi no man sori den fasi fu Yehovah dorodoro.​—Yes. 55:9. w25.03 11 ¶13; 13 ¶17-18

No denki takru fu trawan. Efu tra sma no e taigi wi tangi gi den sani di wi du gi den, dan wi kan aksi wisrefi: ’Na warderi den no abi gi san mi du gi den, noso na fergiti den fergiti fu taigi mi tangi?’ Kande tra reide de fu san ede den no sori warderi soleki fa wi ben ferwakti. Son sma kande de nanga tangi trutru, ma den no sabi fa fu sori dati. Kande den e syen fu teki a yepi di trawan e gi den, spesrutu efu na den ben gwenti yepi trawan fosi. Ma efu wi lobi wi brada nanga sisa trutru, dan wi no o denki takru fu den èn wi o prisiri fu du bun gi den (Ef. 4:2). Abi pasensi. Wan leisi, a koni Kownu Salomo ben skrifi: „Trowe yu brede go na tapu a watra, bika baka wan heri pisi ten yu o feni en baka” (Preik. 11:1). Den wortu disi e leri wi taki son leisi a kan taki sma e taigi wi tangi „baka wan heri pisi ten”. w24.09 30 ¶18-19

Den owruman e meki bekènti son leisi taki wan sma kisi pir’ai. Te dati de so, dan wi kan tan bemui nanga a sma dati fu di wi sabi taki a sori berow èn taki a tapu fu du san no bun . A de wan skapu fu Yehovah ete èn a de fanowdu taki a gemeente e gi en dek’ati fu tan du san bun (Hebr. 10:24, 25). Ma dati no de so nanga wan sma di den puru fu a gemeente. Wi „no musu bumui nanga” a sma dati, nôno, wi „no musu nyan srefi nanga so wan sma”(1 Kor. 5:11). A de so taki a rai disi wani taki dati wi no kan kari wan sma di puru fu a gemeente kon na a konmakandra, noso taki wi no mag taki en odi efu a kon na wan konmakandra? Nôno. A no de fu taki dati wi no o bemui nanga en. Ma efu a sma di den puru fu a gemeente na wan famiriman fu wi noso efu a ben de wan bun mati fu wi, dan wi kan besroiti gi wisrefi efu wi o kari en kon na wan konmakandra. w24.08 30 ¶13-14