Kuvandudza Unyanzvi Hwedu Muushumiri—Kuva Nevanhu Vaunogara Uchiendesera Magazini

Sei Zvichikosha? Kune vakawanda vanofarira kuverenga magazini edu asi vasingadi kudzidza nesu Bhaibheri. Zvichida vanogutsikana nechitendero chavo kana kuti vanoona sokuti havana nguva yokudzidza. Asi kana vakagara vachiverenga magazini edu, vangada kuziva zvakawanda nezveShoko raMwari. (1 Pet. 2:2) Vanogona kubayiwa mwoyo nenyaya yavanenge vaverenga kana kuti mamiriro avo ezvinhu anogona kuchinja. Kugara tichivashanyira kwenguva pfupi, kunoita kuti vajairane nesu, zvoita kuti tizive zvavanofarira nezvinovanetsa. Nekufamba kwenguva, vangabvuma kudzidza nesu Bhaibheri.

Maitirwo Azvo:

Mwedzi wega wega, iva nepurogiramu yekuendesera munhu wacho magazini eNharireyomurindi neAwake! anenge achangobuda. Unogona kumushanyira pane dzimwe nguva mumwedzi iwoyo uchimukurudzira kuverenga imwe nyaya iri mumagazini awakamupa kana kumusiyira chinyorwa chatinenge tichipa vanhu mwedzi iwoyo. Nyora pasi zvamunenge maita pose paunodzokera.—Ona Ushumiri Hwedu hwoUmambo hwaJanuary 2014, p. 3.
Gadzirira pose paunomushanyira. Pane kungopa saimba magazini woenda, taura naye nyaya uye edza kuvaka ushamwari kuti awedzere kufarira.
Gara uchitsvaka mikana yokudzidza naye Bhaibheri. Kana munhu waunogara uchipa magazini akakubvunza kuti Bhaibheri rinotii nezveimwe nyaya, muendesere chinyorwa chatinodzidza nevanhu chinopindura mubvunzo wacho mokurukura mose. Kana mapedza, siya mubvunzo unoenderana nezvamanga muchikurukura, wozoupindura paunodzoka. Kana mukagara muchikurukura zvakarongeka muchishandisa Bhaibheri kana kuti chimwe chinyorwa chatinodzidza nevanhu, unenge uchitoitisa chidzidzo cheBhaibheri. Wakamboedza here kupa saimba bhurocha raMashoko Akanaka womuratidza muchidimbu kuti chidzidzo cheBhaibheri chinoitwa sei? Wakamuratidza here vhidhiyo yaNei Uchifanira Kudzidza Bhaibheri? uye yaZvidzidzo zveBhaibheri Zvinoitwa Sei? Kunyange zvazvo munhu wacho asina kumbobvira afarira kudzidza, mamiriro ake ezvinhu anogona kuchinja. Wakambofunga here kuedza zvakare?

Edza Izvi Mwedzi Uno:

Nyora mazita evanhu vaunoda kuzogara uchiendesera magazini. Vape magazini emwedzi iwoyo, wovaudza kuti uchavaunzira magazini emwedzi unotevera.