2023 Raiva Gore Rekushushikana Mupfungwa—Bhaibheri Rinomboti Kudii?

Mugore ra2023 makaitika zvinhu zvakawanda pasi rese zvinonyatsoratidza kuti zvechokwadi tiri kurarama mune anonzi neBhaibheri “mazuva ekupedzisira.” (2 Timoti 3:1) Cherechedza kuti zviri kuitika mazuva ano zvinoenderana sei nezvakanga zvagara zvataurwa neBhaibheri.

Zvinotaurwa neBhaibheri Uye Zviri Kuitika Pasi Rese

“Hondo nemashoko pamusoro pehondo.”—Mateu 24:6.

• “Kurwisana kuri kuramba kuchiwedzera munzvimbo dzakawanda pasi rese.”a

“Kudengenyeka kwenyika munzvimbo dzakawanda.”—Mako 13:8.

• “Kubva zvatanga gore ra2023, paitika kudengenyeka kwenyika kwakasimba chaizvo kunosvika 13. Iyi inhamba yakakura chaizvo kana tichienzanisa nemamwe makore.”b

“Zvinhu zvinotyisa.”—Ruka 21:11.

• “Kunze kwaimbopisa; asi iye zvino kwava kuita kubvira.”—António Guterres, UN secretary-general.c

“Nzara.”—Mateu 24:7.

• “Gore ra2023 raiva rimwezve gore raishungurudza kune vaya vakanga vagara vachitoomerwa nekuriritira mhuri dzavo.”d

“Nguva dzakaoma, dzinonetsa kurarama madziri.”—2 Timoti 3:1.

• “Munhu mumwe chete pavanhu 8 vega vega vari panyika ane chirwere chekushungurudzika mupfungwa.”e

Chii chatingatarisira muna 2024?

Hapana anonyatsoziva zvichaitika mugore ra2024. Asi zviri kuitika panyika zvinoratidza kuti munguva pfupi iri kutevera Umambo hwaMwari, kana kuti hurumende yekudenga, ichabvisa hurumende dzese dziri panyika nezvinhu zvese zviri kuita kuti vanhu vatambure uye vashushikane.—Dhanieri 2:44; Zvakazarurwa 21:4.

Asi pari zvino, kana tikashushikana mupfungwa, tinogona kuvimba naMwari kuti atibatsire. Bhaibheri rinoti:

“Pandinenge ndichitya, ndinovimba nemi.”—Pisarema 56:3.

Tingaratidza sei kuti tinovimba naMwari? Tinokukumbira kuti unzwe zvakawanda nezvemashoko ari muBhaibheri anotivimbisa kuti kutambura kwese kuchapera mune ramangwana. Tinokukurudzira kuti uite kosi yeBhaibheri yatinoitisa kuti unzwe zvakawanda nezvekuti vimbiso dziri muBhaibheri dzingakubatsira sei pamwe chete nemhuri yako.