Kuchengeta Tsinhirano Pakati Pavakuru Navabatiri Vanoshumira

CHINGUVANA pashure pePentekosta 33 N.V., mugariro unoda betsero yokukurumidza wakamuka muungano yechiKristu yakanga ichangobva kuumbwa. Gadziriro yakanga yatangwa yokutarisira chirikadzi dzinoshayiwa. Asi pashure penguva yakati “vaJudha, vaitaura chiGiriki, vakanyunyutira vaHebheru, nokuti chirikadzi dzavo dzaidarikwa pakugoverwa kwomusi mumwe nomumwe.”—Mabasa 6:1.

Idzi nyunyuto dzakanzwiwa navaapostora. “Zvino vane gumi navaviri vakadana vadzidzi vazhinji, vakati: Hakuzakafanira kuti isu tirege shoko raMwari, tishumire pamatafura. Zvino hama dzangu, sanangurai pakati penyu varume vanomwe, vanopupurirwa zvakanaka, vazere noMweya nouchenjeri, vatingaisa pabasa iri.”—Mabasa 6:2, 3.

Ikoku kunoratidzira nheyo inokosha yokuronga mukati meungano yechiKristu. Varume vakavimbika vanoshandiswa kutarisira zvinhu zvenguva dzose, apo vamwe vanotarisira zvinhu zvomudzimu zvinokosha zvikuru. Ikoku hakusati kuri kusina muenzaniso. Muna Israeri wakare, Aroni navazukuru vake vakagadzwa kuti vabatire savaprista kuti vaite zvibayiro kuna Mwari. Zvisinei, Jehovha akarayira kuti vaRevhi vavabatsire kupfurikidza no‘kutarisira midziyo yose yetende yokusangana.’ (Numeri 3:5-10) Nenzira yakafanana, vatariri nhasi vanobatsirwa navabatiri vanoshumira.

Basa Ravakuru Navabatiri Vanoshumira

Magwaro anoonesa zvikwaniriso zvakakwirira zvavose vari vaviri vakuru navabatiri vanoshumira. (1 Timotio 3:1-10, 12, 13; Tito 1:6-9) Ivo havasati vari vakwikwidzani asi vanoshandira nharidzano imwe cheteyo—kuvakwa kweungano. (Enzanisa naVaEfeso 4:11-13.) Kunyanguvezvo, pane misiyano yakati mubasa ravanoita muungano. Pana 1 Petro 5:2, vatariri vanoudzwa, kuti: “Fudzai boka raMwari riri pakati penyu, musingazviiti nokurovererwa, asi nomwoyo unoda nokuda kwaMwari, musingazviiti nokuda kwokukarira fuma yakaipa.” Ivo vanozvidavirira kuna Mwari nokuda kwenzira yavanoita nayo ichi chakaronzeswa chinoyera.—VaHebheru 13:17.

Zvakadiniko nezvavabatiri vanoshumira? Magwaro haadi kuti ivo vave vakakwaniriswa zvakafanana mumano avo okudzidzisa. Mabasa avo akati siyanei naayo avakuru. Muzana rokutanga ramakore N.V., pasina panikiro kwakanga kune zvinhu zvakawanda zvokunyama, zvenguva dzose, kana kuti zvomuitiro zvaida ngwariro, zvichida kubatanidza kutengwa kwezvinhu zvokukopera Magwaro kana kuti kunyange kukopa kumene.

Nhasi, vabatiri vanoshumira vanopfuurira kuita mhatsa yamabasa anokosha mukati meungano, zvakadai sokutarisira akaunzi dzeungano nendima, kuparadzira magazini namabhuku, uye kuchengeta Horo yoUmambo. Vamwe vabatiri vanoshumira vane mano vangatoshandiswa mukudzidzisa, pane dzimwe nguva kuitisa Fundo dzeBhuku dzeUngano, kutarisira mativi paMisangano yeBasa, uye kukurukura hurukuro dzavose.

Apo vakuru navabatiri vanoshumira vanoshandira pamwe chete nenzira ine tsinhirano, zvinodikanwa zveungano—zvose zviri zviviri zvomudzimu nezvokuronga—zvinotarisirwa nenzira yakadzikama. Mitezo yeungano panguva iyeyo inofara, inosimba, uye inobudirira mumudzimu. Yeuka izvo Pauro akanyorera vakazodzwa muEfeso, kuti: “Muviri wose wakasonganiswa zvakanaka maari nokubatanidzwa nenhengo dzose dzinosimbisa, mutezo mumwe nomumwe uchibata nechiyero chawo, kuti muviri ukuriswe pakuvakwa kwawo murudo.”—VaEfeso 4:16.

Vakuru navabatiri vanoshumira vanofanira kuvavarira kutanga tsinhirano yakafanana, ndiko kuti, bvumirano, wirirano, batira pamwe, uye chinzwano. Zvisinei, tsinhirano yakadaro haisati ichierekana yaitika. Inofanira kusakurirwa ndokutaviridzwa nokungwarira.

Icho Vakuru Vanogona Kuita

Nhano inokosha kuziva kuti ukama hwomukuru nomubatiri anoshumira hahusati huri huya hwatenzi nomuranda kana kuti hwomushandirwi nomushandi. Uko kune tsinhirano yechokwadi, vakuru vanorangarira vabatiri vanoshumira savashumiri biyavo vaMwari. (Enzanisa na 1 VaKorinte 3:6-9.) “Pakukudzana tungamiriranai,” inodaro VaRoma 12:10. Vakuru naizvozvo vanodzivisa kubata vabatiri vanoshumira nenzira dzinoratidzika kuva dzinoderedza kana kuti dzinodzvinyirira. Ivo vanokurudzira, panzvimbo pokuparadza, kutanga kuita zvinhu kwakanaka. Kubata vabatiri vanoshumira noruremekedzo kunobudisa zvakanakisisa mavari uye kunovabetsera kufarikanya basa ravo muungano.

Vakuru vanofanira kurangarirawo kuti basa ravo rokufudza boka raMwari riri mutarisiro yavo rinobatanidza hama dzinobatira savabatiri vanoshumira. Chokwadi, varume vakavimbika vakadaro vanokarirwa kuva vaKristu vakakura mumudzimu. Kunyanguvezvo, kufanana navasara vose veboka, ivo vanoda ngwariro yomunhu oga nguva nenguva. Vakuru vanofanira kufarira zvikuru kukura kwavo kwomudzimu.

Somuenzaniso, apo muapostora Pauro akasangana nejaya Timotio, akakurumidza kunzwisisa mano aTimotio uye “akada kuti aende naye.” (Mabasa 16:3) Timotio akabatira seshamwari inofambira yaPauro, achigamuchira rovedzo inokosha somuuyo. Chokwadi, makore akati gare gare Pauro aigona kunyorera vaKristu vaiva muKorinte, kuti: “Ndakatuma Timotio kwamuri, mwana wangu unodikanwa, wakatendeka munaShe; iye uchakuyeudzai mitoo yangu iri muna Kristu Jesu”!—1 VaKorinte 4:17.

Vakuru, makavamba here kushandisa mano akazara avabatiri vanoshumira vari muungano menyu? Munovabetsera here kufambira mberi kupfurikidza nokuvapa rovedzo yomunhu oga mukutaura pachena nokunzvera Bhaibheri? Makakumbira vakakwaniriswa kukuperekedzai pashanyo dzokufudza here? Munoshanda navo muushumiri hwomumunda here? Mumufananidzo waJesu wamatarenda, tenzi akaudza vabatiri vake vakatendeka, kuti: “Zvakanaka, muranda wakanaka, wakatendeka.” (Mateo 25:23) Imi nenzira yakafanana mune rupo here nerumbidzo nokuonga kuvabatiri vanoshumira vanoita nokuzvininipisa migove yavo nenzira yakaisvonaka? (Enzanisa naZvirevo 3:27.) Kana musati, vachanzwa here kuti basa ravo harisati richiongwa?

Kurukurirano inokosha nenzira yakafanana kuukama hwokushanda hune tsinhirano. (Enzanisa naZvirevo 15:22.) Mabasa haasati achifanira kugoverwa kana kuti kutorwa nomutoo wokushusha kana kuti usina kurongwa. Vakuru vanofanira kukurukura nenzira yokunyengetera kuti mano ehama anogona kushandiswa zvakanakisisa sei muungano. (Enzanisa naMateo 25:15.) Apo mugove unoitwa, hama inofanira kurayidzwa zvakakwana pamusoro pechinodikanwa kwairi chaizvoizvo. “Kana vanhu vasingatungamirirwi nouchenjeri,” inonyevera kudaro Zvirevo 11:14, “vanodedera.”

Hakuna kunakisisa kungoudza chete hama kutora bato reakaunzi, ramagazini, kana kuti ramabhuku kumumwe mubatiri. Pane dzimwe nguva mubatiri achangobva kugadzwa anogara nhaka zvinyorwa zvakawanda zvisina kururama kana kuti zvisina kukwana. Kunoodza mwoyo sei! “Zvinhu zvose ngazviitwe nomutoo wakafanira zvine mirayiro yazvo,” inorayira kudaro 1 VaKorinte 14:40. Vakuru vanofanira kutanga kurovedza hama, vachirovedzanisa nemiitiro yeungano nokugadza muenzaniso ivo vamene mukutevera miitiro yakadaro. Somuenzaniso, vakuru vanofanira kuronga kuti akaunzi dzeungano dzinzverwe mwedzi mitatu iri yose. Kuregeredza gadziriro inokosha yakadaro kunogona kutungamirira kuzvinetso ndokunetesa ruremekedzo vabatiri vanoshumira vanarwo rwemirayidzo yesangano.

Asi ngatitii imwe hama inoratidzika kuva inoregeredza mukutarira mugove wakati? Panzvimbo pokuibvisa nokukurumidza pamugove wayo, vakuru vanofanira kukurukura zvinhu nayo. Zvichida chinetso chacho kushayikwa kwerovedzo. Kana hama yacho ichipfuurira kuva nezvinetso mukutarisira mugove wayo, zvichida ingaita zvakanaka mune mumwe mugove.

Vakuru vanogonawo kusimudzira tsinhirano kupfurikidza nokuratidzira kuzvininipisa. VaFiripi 2:3 inokurudzira vaKristu kuti “musingaiti chinhu nenharo, kana nokuzvikudza, asi mumwe nomumwe ngaati nomwoyo unozvininipisa, vamwe vanomupfuura iye pakunaka.” Mukuru anofanira nokudaro kuyedza kubatira pamwe kana murindiri akamurayiridza kugara pachigaro chakati muhoro, kwete kurangarira kuti nemhaka yokuti mukuru, haafaniri kuteerera. Zvichida murindiri ari kungotevera zvake chikarakadzo chokugara muzvikamu zvakasiyana-siyana zvehoro, kunyange zvazvo achifanira kuyeuka kuti hakuna murayiro wokuti vose vanofanira kuita saizvozvo.a Mukuru achadzivisa kuisa parutivi zvisiri madikanwa zvisarudzo pazvinhu zvakagoverwa mubatiri anoshumira.

Vabatiri Vanoshumira Vanoshanda nokuda Kwetsinhirano

“Saizvozvowo vashumiri ngavave vanokudzwa,” akadaro muapostora Pauro. (1 Timotio 3:8) Kurangarira kwavo migove zvakakomba—sorutivi rwebasa ravo rinoyera—kunoita zvakawanda kudzivisa zvinetso kutanga. Kana iwe uri mubatiri anoshumira, unoita mabasa ako nembavarira here? (VaRoma 12:7, 8) Wakazvishandisa umene here kuti ugova ane unyanzvi mukuitwa kwamabasa ako? Wakavimbika uye wakatendeseka here? Unoratidza mudzimu wokudisa apo kunouya kumigove here? Mumwe mubatiri anoshumira muimwe nyika yeAfrica anotarisira migove mitatu yakasiyana muungano. Chimiro chake chendangariro? “Eya, kunongoreva zvako basa rakaoma rakawanda zvikuru,” iye anodaro, “uye basa rakaoma harikuurayi.” Zvamazvirokwazvo, avo vanozvipa vamene vanofarikanya mufarwa mukurusa.—Mabasa 20:35.

Unogonawo kuita zvakawanda kusimudzira tsinhirano kupfurikidza nokubatira pamwe zvizere navakuru. “Teererai vatungamiriri venyu, muzviise pasi pavo;” inodaro VaHebheru 13:17, “nokuti vanorinda mweya yenyu, savanhu vanozobvunzwa pamusoro penyu, kuti vaite izvozvo nomufaro, vasingaiti neshungu; nokuti izvozvo hazvikubatsiriyi chinhu.” Chokwadi, vakuru varume vasina kukwana, uye kungava nyore kuvawanira mhaka. Bva chimiro chendangariro chokutsoropodza chinoparira kusavimba. Chinogona kuparadza mufaro wako ndokutapura zvakaipa vamwe vari muungano. Muapostora Petro nokudaro akapa iri zano: “Imi vaduku, muzviise pasi pavakuru, nemi mose pfekai kuzvininipisa mumwe kune mumwe, . . . Naizvozvo zvininipisei pasi poruoko rune simba rwaMwari, kuti akukudzei nenguva yakafanira.”—1 Petro 5:5, 6.

Zano rakadaro rakafanira zvikuru kana uchinzwa kuti uri kufuratirwa nokuda kweropafadzo dzebasa. Zvichida wave uchi“svasvavirira nzvimbo yomutariri,” asi hapana gadzo yati yaitwa. (1 Timotio 3:1, NW) Kuzvininipisa kunogona kukubetsera kuchengeta “chimiro chendangariro chokumirira.” (Mariro 3:24, NW) Panzvimbo pokunzwa pfunde-pfunde kuvakuru—uko kune chokwadi chokunetesa ukama hwako hwokushanda—vabvunze kana pane nzvimbo umo ungaita vandudziko. Kudisa kwako kwapachokwadi kugamuchira ndokushandisa zano pasina panikiro kuchaonwa soufakazi hwoukuru mumudzimu.

Kuzvininipisa kwoumwari nokuzvidukupisa zvinogona kubetsera mubatiri anoshumira kuchengeta dzikamo yake kana iye ane mano echienzi kana kuti betsero dzedzidzo nedzenzanga. Kungava kunoedza sei kuti aedze kuvhairira vakuru kana kuti kudanira ngwariro kumano ake amene! Zvirevo 11:2 (NW), rinotiyeuchidza kuti “uchenjeri hune vanozvininipisa.” Hama inozvininipisa inoziva miganhu yayo. Inodisa kushanda chinyararire isingazviratidziri uye kushandisa mano ayo kutsigira vakuru. Kuzvininipisa kungaibetserawo kuziva kuti nepo ingava nezivo yakawanda mune zvenyika, ingave ichiri kushayiwa munharaunda dzinokosha dzouchenjeri nenzwisiso zvomudzimu—mavara umo vakuru vangaita zvakanaka.—1 VaKorinte 1:26–2:13; VaFiripi 1:9.

Nenzira yakajeka, vakuru navabatiri vanoshumira vanoita mabasa anokosha. Pamwe chete vanogona kuita zvakawanda kuvaka vose vari muungano. Asi kuti vaite saizvozvo, vanofanira kushandira pamwe chete nenzira ine tsinhirano, “nokuzvininipisa kwose nounyoro, nomwoyo murefu, [va]chiitirana mwoyo murefu murudo; [va]chishingaira kuchengeta umwe hwoMweya muchisungo chorugare.”—VaEfeso 4:2, 3.

[Mashoko Omuzasi]

[Mifananidzo iri papeji 27]

Vakuru vanorangarira vabatiri vanoshumira, kwete savaduku, asi savashumiri biyavo vaMwari