Ko Matsive Akaipa Here?

Mumugwagwa usingaripirwi mutero uri muUnited States, imwe motokari yakanonoka kubuda mumugwagwa ndokurega imwe ichipfuura. Muchairi wemotokari yechipiri akatsiva kupfurikidza nokupfura motokari inogumbura, achiuraya mukwiri asina mhaka.

Mumwe musikana wechiduku akarasikirwa norutivi mumutambo wechikoro nemhaka yomumwe musikana. Akamutsiva kupfurikidza nokuudza mukomana womusikana wacho kuti musikana wacho akanga ari kuona mumwe mukomana mune chimwe chikoro. Iye nokudaro akaparadza ukama hwomusikana wacho nomukomana.

VANHU vakawanda vanonzwa vachiruramiswa mukutsiva pavanofunga kuti vatadzirwa. Munzira yakati, ivo vanotevera kutaura, kwokuti: “Usatsamwa, tsiva panzvimbo pezvo.” Nhasi, rudo rwomuvakidzani rwuri pamwero wakaderera, uye mudzimu wamatsive uri kuwedzera.—Mateo 24:12.

Iwe, kunyanguvezvo, unorangarira sei matsive? Kana uchidavira Bhaibheri, zvichida unorangarira kuti zvikurukuru matsive akaipa. Asi sezvatinorarama munyika isina umwari, ungarangarira kuti kanganwiro, mhesano yokuda kutsiva, kazhinji kazhinji haisati iri yechokwadi. Waizoita sei kudai ukakorovherwa kana kuti kubhinywa? Unova anoda kutsiva kana mumwe munhu akakufuratira kana kuti akataura zvakaipa pamusoro pako kuna vamwe here? Unotsiva kana kuti unokanganwira here?

Chimiro Chokutsiva Chinokuvadza

Chokwadika, kune mwero yechigumbu. Asi vanhu vazhinjisa vanoda kutsiva mumwe munhu havana kubhinywa kana kuti kudenhwa nenzira youtsotsi. “Zvigumbu” zvanokorwa mashoko pamavambo enyaya ino zvaisava hazvo zvinokosha, kunyange zvazvo zvakaratidzika kuva zvikuru mundangariro dzaavo vakasarudza kutsiva.

Bhaibheri rinotaura kuti hatifaniri kusakurira chimiro chokutsiva. Zvirevo 24:29 inopa zano, kuti: “Usati: ‘Sezvaakandiitira, ndizvo zvandichamuitirawo.’” Kuregerereiko? Kutanga, chimiro chakadaro chinokuvadza mundangariro nomumuviri. Mifungo yokutsiva inobvisa rugare rwendangariro ndokudzivisa kurangarira kwakanaka. Rangarira uyu mushumo wenhau, unoti: “Varimi vaviri vachipfura vari muturori twavo vakaurayana vari munopakwa motokari, vachigumisa utsinye hukuru hwamakore 40 hwakavamba apo vaiva vana.” Fungidzira, muupenyu hwavo hwose kufunga kwaava varume vaviri kwakanga kwashatiswa nomudzimu unoshatirisa, wokutsiva!—Zvirevo 14:29, 30.

Chimwe chikonzero chokusasakurira mudzimu wokutsiva ndechokuti vanhu vanotadza—kunyange vanhu vanotadza zvakakomba—vanogona kuchinja. Muapostora Pauro, somuenzaniso, paimwe nguva ‘akatendera kuuraiwa’ kwomudzidzi Stefano ndoku‘rangarira kutyisidzira nokuuraya vadzidzi vaShe.’ Asi iye akachinja. Makore akati gare gare muapostora Petro—ane upenyu hwakanga hwave huri mungozi yaibva kuna Pauro mukati menguva iyeyo yapakuvamba—akamudana kuti “hama yedu inodiwa Pauro.” (Mabasa 8:1; 9:1; 2 Petro 3:15, NW) MaKristu aigona kuve akaedza kuita matsive pana Pauro, zvikurukuru paakanga akamirira, ari bofu, muDhamasko. (Mabasa 9:3-15) Ichocho chaizodai chakava chikanganiso chine ngwavaira zvakadini!

Pauro aigona kusanopa zano, naizvozvo, pana VaRoma 12:20, kuti: “Kana muvengi wako aziya, umupe kudya; kana afa nenyota, umupe kunwa.” Neiko? Nemhaka yokuti kana tikatsiva isu timene pamuvengi, tinoomesa chimiro chake ndokusimbisa ruvengo rwuri pakati pedu. Asi kana tikaita zvakanaka kumunhu anotigumbura kana kuti kutikuvadza, tingapfavisa chimiro chake ndokuita kuti aichimbova muvengi ave shamwari.

Kuziva utera hwedu timene kunobetserawo mukukurira kukasharara kunotungamirira kuchishuvo chokutsiva. Wezvamapisarema akabvunza, kuti: “Dai imi Jehovha, mairangarira zvisakarurama, ndianiko airamba amire?” (Pisarema 130:3) Tose zvedu takakuvadza kana kuti kugumbura vamwe. Hatina kufara here kana vasina kuedza kutsiva? Hatifaniri here, ipapoka, kuita nokuzvidzora kwakafanana? Jesu akapa zano, kuti: “Zvinhu zvose, naizvozvo, izvo munoda kuti vanhu vaite kwamuri, imiwo munofanira kuita kwavari nenzira yakafanana.”—Mateo 7:12, NW.

Chokwadi, Bhaibheri rinoti: “Vengai zvakaipa.” (Pisarema 97:10; Amosi 5:15) Asi haritiudzi kuti tivenge munhu ari kuita chakaipa chacho. Kutaura idi, Jesu akatiraira, kuti: “Pfuurirai kuda vavengi venyu nokunyengeterera avo vanokutambudzai.” (Mateo 5:44, NW) Kana tikadzorera kukuvadzwa nokukuvadza, tinotevedzera mudzimu womuiti wechakaipa. Chirevo chekare chinoti: “Usati: ‘Ndichatsiva zvakaipa;’ mirira Jehovha, iye uchakuponesa.” (Zvirevo 20:22) Chimiro chokuchenjera zvakadini! Kuri nani zvikuru sei kuzviratidza timene kuva vakundi kupfurikidza nokudzivisa muedzo wokutevedzera vaiti vezvakaipa.—Johane 16:33; VaRoma 12:17, 21.

Chirango—Chinoitwa Naani?

Chokwadika, zvimwe zviito zvakakomba zvikuru kupfuura zvigumbuso zvomunhu oga kana kuti kukuvadzwa. Zvakadiniko kana tiri nyajambwa woutsotsi? Nenzira yomuzvarirwo, tinorangarira kuti nokuda kwedonzo reruramisiro, chimwe chinhu chinofanira kuitwa. Asi chiiko? Mudzimwe nzanga kwave kusati kuri kwechienzi kutarisira zvinhu somunhu oga ndokutsiva. Asi nzanga dzakadaro kazhinji kazhinji dzakaguma dzatsemurwa noutsinye hwakaipa hune chishava. Nhasi, mitemo yaMwari uyewo muzvinoitika zvizhinjisa mitemo yavanhu haibvumiri vanhu kuita matsive omunhu oga nokuda kwoutsotsi, uye nokuda kwechikonzero chakanaka. Masimba masimba omunhu oga akadaro anoparira bedzi mamwe masimba masimba.

Nyajambwa woutsotsi, ipapoka, anofanira kungogara ndokugamuchira kubatwa zvisina kufanira asingaiti chinhu here? Kwete hazvo. Apo isu kana kuti zvinhu zvinoshatiswa, kune zviremera zvokutendeukira kwazviri. Ungada kudana mapurisa. Kubasa, enda kumutarisiri. Kuchikoro, ungada kuona mukuru wechikoro. Ichocho ndicho chimwe chikonzero nei varipo—kuti vatsigire ruramisiro. Bhaibheri rinotiudza kuti zviremera zvehurumende “mushumiri waMwari, mutsivi wokutsamwa kune anoita zvakaipa.” (VaRoma 13:4) Ruramisiro inoda kuti hurumende ishandise chiremera chayo, kumisa kuita zvakaipa, uye kuranga vaiti vezvakaipa.

Chokwadi, padzimwe nguva ruramisiro inononoka kuuya. Mumwe munyori aneta nenyika akati: “Ruramisiro yakafanana nechitima chinononoka dzinodokuva nguva dzose.” Pane dzimwe nguva, zvamazvirokwazvo, chitima hachitongosviki. Vaiti vokusaruramisira vangava vane simba kwazvo zvokuti zviremera hazvigoni kuvadzora. Zvisinei, nzira yokuchenjera kuzvidzora. “Benzi rinobudisa hasha dzaro dzose; asi munhu wakachenjera unodzidzora nokudzinyaradza,” rinodaro Bhaibheri.—Zvirevo 29:11.

Matsive—Anoitwa Naani?

Kuzvidzora timene pakutsiva nokudaro kuchaunza betsero kwatiri, uye tinogona kumirira takaterama, tichiziva kuti kana ruramisiro ichifanira kuitwa, Mwari achaiita panguva yakakodzera. Jehovha anoziva kuti kuita zvakaipa kusingadzorwi kunotungamirira kukusaruramisira. (Muparidzi 8:11) Haasati achizobvumira vakaipa vakaoma kuti vadzvinyirire rudzi rwomunhu nokusingaperi. Ndicho chikonzero nei muapostora Pauro akatipa zano, kuti: “Musatsiva, vadikanwa, asi mudziurire kutsamwa; nokuti kwakanyorwa, kuchinzi: ‘Kutsiva ndokwangu, ini ndicharipira—ndizvo zvinoreva [Jehovha, NW].’” (VaRoma 12:19) Zvamazvirokwazvo, Bhaibheri rinotaura nezvezuva ramatsive roMusiki. Zuva ramatsive irori richavei? Uye ndivanaani vachava vanyajambwa vamatsive aMwari? Tichakurukura ikoku munyaya inotevera.

[Bhokisi riri papeji 4]

Kuti udzore mirangariro yamatsive, yeuka kuti

□ Mwari anoitira hanya ruramisiro

□ kuchengeta chimiro chokutsiva kunokuvadza

□ kuva nomutsa kazhinji kazhinji kunoderedza zvinetso navamwe

□ zvizhinji zvezvikanganiso zvedu timene zvakafuratirwa

□ vanhu vanotadza vangachinja

□ tinokunda nyika kupfurikidza nokudzivisa nzira dzayo