Chikonzero Nei Réunion Ine Horo dzoUmambo Dzakawanda Kudaro
ANENGE makiromita 640 kumabvazuva kweMadagascar, chitsuwa chiduku cheRéunion chinosimuka kamwe kamwe chichibva muIndian Ocean hombe. Kunyange zvazvo chine makiromita anenge 60 bedzi okureba namakiromita 50 okufara, chitsuwa chacho chakakurumbira nokuda kwamakomo acho anoputika neratidzirwo dzomwoto dzapanhambo nenhambo. Urengarenga hwakareba zvikurusa, pamamita 3 069 pamusoro pomwero wegungwa, pane Piton des Neiges (Urengarenga Hwesinou) risisaputiki. Murutivi rwokumaodzanyemba kwakadziva kumabvazuva rwechitsuwa chacho mune gomo rinoputika rine mamita 2 625 pakanzi nomazvo Piton de la Fournaise (Urengarenga Hwebisiro). Chiono chinoshamisa zvakadini apo rinoputika usiku! Migwagwa yakawanda inonzvendanzvenda ichikwira nokudzika mumawere makuru, ichigovera zviono zvinoshamisa zverwakanzi runako runotyisa rweRéunion.
Neiko Horo dzoUmambo Dzakawanda Kudaro?
Runako rwechokwadi rweRéunion, zvisinei, rwuri munzira iyo vazhinji vavagari vapachitsuwa vanogamuchira nayo “mashoko akanaka oumambo” anoziviswa neZvapupu zvaJehovha. (Mateo 24:14, NW) Basa razvo rokuparidzira rakavamba muna 1960, apo vashumiri vaviri venguva yakazara vakasvika vachibva France. Zvino, makore 30 gare gare, Zvapupu 1 665 zvakabatikana kuparadzira shoko roUmambo pakati pavagari vane 582 000—chiverengero cheChapupu 1 kuvanhu 350 vari vose vari pachitsuwa.
Kukura kwakadaro kwakada kuvakwa kwenzvimbo dzemisangano dzakakodzera kuitira kuti Zvapupu zvigogona kupfuuridzira kunamata kwazvo nedzidzo yomudzimu. (VaHebheru 10:24, 25) Nechekare, 13 dzeungano 19 dzeRéunion dzakavaka Horo dzoUmambo dzadzo dzimene. Nemhaka yamadutu anoitika kazhinji kazhinji munharaunda iyi, izvozvi zvivako zvakasimba zvamabwe izvo zvinoda nguva yakati—uye ndyiko—kuvaka. Naizvozvo kwakabvira sei kuvaka horo dzakadaro, sezvo Zvapupu zvizhinjisa paichi chitsuwa zvinowana mibhadharo yeavhareji uye zvine mhuri huru dzokutsigira? Mumashoko eBhaibheri, mhinduro ndeyokuti ‘ruoko rwaJehovha harusi rupfupi.’—Isaya 59:1.
Mhinganidzo Dzinokundwa
Somuenzaniso, rangarira kuti Jehovha akasunda sei mwoyo yavanhu kubetsera nokuvakwa kweHoro yoUmambo mutaundi duku reSaint-Louis, riri murutivi rwokumaodzanyemba kwakadziva kumadokero kweRéunion. Apo mapurani akatanga kubvumirwa, Chapupu chiduku chakaudza mudzidzisi wacho womukirasi yedzimba dzamabwe kuti Horo yoUmambo yaizovakwa nebasa rokuzvipira. Mudzidzisi wacho haana kungopa bedzi mabasa ake amene asiwo akaunza kirasi yake yose kunzvimbo kuzobetsera kuchera faundesheni. Gare gare, iye akapa simbi dzaidikanwa nokuda kwefaundesheni.
Apo vazvipiri vanopfuura zana vakauya pamwe chete pazororo kuzoisa kongiri panharaunda yamamita 190 akaenzana kumativi mana, vakashamiswa kuwana kuti taundi rakanga ravhara mvura. Vaigona sei kugadzirira kongiri pasina mvura? Mumwe wavashandi uyo aiziva mukuru webato rokudzima mwoto akasarudza kuti aizotsanangura chitambudzo chacho kuuyu murume ane mutsa. Gare gare zvishomanene, motokari inodzima mwoto yakasvika panzvimbo yacho. Motokari yacho yaiva nemvura yakakwana nokuda kwebasa racho, uye bato rokudzima mwoto rakaibvumira kuramba iripo kwezuva rose! Nenzira inonzwisisika, vazvipiri vose vakasundwa kuisa mwoyo wavo wose mubasa.
Betsero yaJehovha yaiva pachena munzira iyo dzimwe mhinganidzo dzakakundwa nadzo. Somuenzaniso, pane mumwe mwero wokuvaka, siringi yakanga yagadzirirwa nokuda kwokuiswa kwezvinhu chaizvo zvamagetsi 22 zvakanga zvaodhwa mwedzi misere pamberi pezvi. Asi kambani yakazivisa hama kuti rudzi rwavaida rwakanga rusati ruchagadzirwa. Chii chaigona kuitwa? Ko gadziriro yose nesiringi zvaizofanira kuchinjwa here? Aiwa, nokuti panguva yakarurama chaipo, hama dzakanzwa nezvomunhu womunzvimbomo anoita rangano aiva namarambi akafanana ebasa risina kutongoitika.
“Mune mangani?” akabvunzwa kudaro.
“Anenge 25,” akapindura kudaro.
Pasina imwe nonozeko, marambi akatengwa ndokuiswa.
Sezvo basa racho rakafambira mberi, mumwe munhu akanga achangobva kutanga kufunda Bhaibheri neZvapupu zvaJehovha akaororwa zvikuru nechivako chakaisvonaka.
“Ndiudzei,” akabvunza kudaro, “pane chimwezve here chinhu chipi nechipi chamunoda?”
“Hungu,” yakapindura imwe hama. “Tinoda gudzanzwi.”
Naikoko, uyu munhu achangobva kufarira akakurumidza kubudisa bhuku rake recheki ndokupa inodokukwana nokuda kwegudzanzwi itsva chose chose. Mipiro yakadaro, pamwe chete nechikwereti chorupo chakabva kudzimbahwe reWatch Tower Society muUnited States, zvakabetsera ungano kupedza iyi Horo yoUmambo yakaisvonaka.
Kugumisa kwose ikoku, Ungano yeSaint-Louis yakafadzwa kuva naHama Carey W. Barber, mumwe mutezo woMutumbi Unodzora weZvapupu zvaJehovha, akauya ndokutsaurira Horo yoUmambo muna December 1988. Hama Barber akarongwa kubva kudzimbahwe reSosaiti muBrooklyn, New York, kuzotsaurira zvivako zvitsva zvebazu pachitsuwa chiri pedyo cheMauritius. Apo hama dzomuSaint-Louis dzakanzwa pamusoro paikoku, mumavhiki matatu chete, vakawana mari yakakwana kufukidza mari yokukwira ndege nomumwe mutezo weDare reBazu reMauritius kufamba kubva kuMauritius kuuya kuRéunion. Nemhaka yokukura chibviro chenguva iyoyo, Ungano yeSaint-Louis yaifanira kukamuraniswa. Zvino, ungano mbiri dzinogoverana Horo yoUmambo itsva.
Mbiri Inoenda Kuna Jehovha
Zvakadiniko nedzimwe ungano dzomuRéunion? Nemhaka yokugamuchira kwakaisvonaka basa rokuparidzira Umambo, vanopinda misangano paHoro dzoUmambo vakabva pa 150 kusvikira ku 200 muzana yechiverengero cheZvapupu zvaJehovha zviri pachitsuwa chacho. Naizvozvo kuri pachena chikonzero nei Horo dzoUmambo dzakawanda dzichidikanwa muRéunion. Kutaura idi, dzimwe nhatu dzakavakwa chibviro cheimwe yomuSaint-Louis, uye ikoko kwakasvitsa hwerengedzo ku 13 nokuda kweungano 19 dziri pachitsuwa chacho.
Nokuda kwaikoku kwose, mbiri inoenda kuna Jehovha, uyo akadeya kutaura, kuti: “Muduku uchava chiuru, wakadukupa uchava rudzi rune simba; ini Jehovha ndichakurumidza kuzviita nenguva yazvo.” (Isaya 60:22) Somumamwe mativi apasi, uporofita ihwohwu hwakava hwechokwadi paichi chitsuwa chakaisvonaka.