“Haiwa Jehovha, Ndapota Svinudzai Maziso Ake”

PANE chimwe chikomo chaiva mubani muIsraeri paiva nerimwe guta rainge rakakomberedzwa nemasvingo rainzi Dhotani. Rimwe zuva ari mangwanani-ngwanani, pane mushandi akamuka akaenda panze, akaona zvinhu zvakamuvhundutsa. Paiva nemabhiza, nengoro, neuto guru revaSiriya rakanga rasvika usiku vakarara. Panguva iyi, rakanga ratokomberedza guta. Uto racho rainge ranyanya kufambira munhu mumwe chete. Munhu wacho wavaitsvaga aiva muprofita Erisha. Apera nekutya, mushandi wacho akamhanya kunoudza tenzi wake uyo aiva muprofita Erisha kuti zvinhu zvakanga zvisisina kumira zvakanaka.

Zvinhu zvinotyisa kudai zvakanga zvisiri zvitsva kuna Erisha. Makore akawanda izvi zvisati zvaitika, Jehovha akanga atuma muprofita Eriya kuti anogadza Erisha kuti azova muprofita panzvimbo yake uye kuti amudzidzise basa racho. Varume vaviri ava vainge vambopikiswa namambo ainge akaipa Ahabhi, nemudzimai wake Mambokadzi Jezebheri, uye nemwanakomana wavo Ahaziya. Ngoro yaMwari yakadzika, ichibva yasvika ikaparadzanisa muprofita uyu wechikuru neshamwari yake yechidiki. Eriya akabva atakurwa akaendeswa kune imwe nzvimbo ari mudutu. Erisha anogona kunge asina kuzombobvira akaonana neshamwari yake yechikuru iyi zvakare. Asi akaenderera mberi nebasa rakanga ratangwa naEriya, achitungamirira “vanakomana vevaprofita” muhondo yaJehovha yakanga ichiri kuenderera mberi yekurwisa kunamatwa kwaBhaari.—2 Madz. 2:15.

Jehovha akaita kuti Erisha akwanise kuita zvishamiso zvakati wandei. Nguva pfupi izvi zvisati zvaitika, muprofita Erisha akanga aporesa Naamani, uyo aiva mukuru weuto aiva nemukurumbira uye ari mushandi anoremekedzwa waBheni-hadhadhi mambo weSiriya. Asi Mambo Bheni-hadhadhi akatoramba achitumira mapoka evanhu vaipamba kuIsraeri pane kuti aratidze kuti aitenda zvaakanga aitirwa. Jehovha akaramba achivhiringidza zvaiitwa naBheni-hadhadhi. Aiita kuti Erisha agare aziva kuti mapoka acho evanhu vaipamba ari kunanga kupi. Izvi zvakaita kuti mambo weSiriya ashatirwe, saka akabvunza vashandi vake kuti ndiani pakati pavo anga achiita basa rekufumura urongwa hwake kuvavengi. Mumwe mushandi wake akamupindura achiti, “Erisha muprofita ari muIsraeri ndiye anoudza mambo weIsraeri zvinhu zvamunotaura muri muimba yenyu yekurara.” Bheni-hadhadhi paakaziva kuti Erisha aiva kuDhotani, akatuma vanhu kuti vaende kunomubata.

Mushandi waErisha ndiye akatanga kuona uto revaSiriya. Akabva amhanya kuna Erisha achichema achiti: “Maiwee, tenzi wangu kani! Tichaita seiko?” Erisha akaona kuti murume wacho ainge apera basa nekutya, saka akamusimbisa achiti: “Usatya!” Akabva aenderera mberi achitaura mashoko aya asingakanganwiki ekuti: “Nekuti vari kwatiri vazhinji kupfuura vari kwavari.” Pamwe mushandi wacho anogona kunge akatotarisa muprofita wacho achishaya kuti ari kurevei. Varume vaviri vanganzi vakawanda kupfuura uto rakakura here? Saka Erisha akabva anyengetera achiti: “Haiwa Jehovha, ndapota svinudzai maziso ake kuti aone.”

Jehovha akabva angomupindura ipapo ipapo. Akaita kuti mushandi wacho akwanise kuona zvakanga zvisingaoneki nemaziso enyama. Mushandi wacho akangoerekana ava kuona uto raityisa kupfuura chero uto ripi zvaro revanhu ringawanikwa panyika. “Akaona kumakomo kuzere nemabhiza nengoro dzehondo dzemoto zvakapoteredza Erisha.”

Asi uto revaSiriya harina kuona uto raJehovha rengirozi. Vakaramba vachiswedera pedyo neguta racho kuti vatore Erisha. Muprofita wacho akabva anyengetera achikumbira Jehovha kuti avapofumadze. Apa Jehovha haana kuita kuti maziso evaSiriya atadze kuona. Asi zvinoita sekuti akaita kuti vavengi ava vatadze kunzwisisa zvavaitoona nemaziso avo. Vaita sevanhu vabatwa nechadzimira, vakabvuma kuratidzwa nzira naErisha. Akavafambisa makiromita 16 kusvika vasvika kuSamariya chaiko ndokubva akumbira Jehovha kuti achivhura maziso avo. Jehovha paakavhura maziso avo ndipo pavakazopengenuka vachiona kuti vaiva kupi. Vaiva pakati chaipo peguta guru reIsraeri, vasisina kwekubuda nako. Mambo weIsraeri aida kuvauraya, asi Erisha akanzwira tsitsi vapambi vacho akataura kuti vaifanira kupiwa zvekudya vosiyiwa vachidzokera havo kumba. Nyaya yacho inobva yapera nemashoko ekuti: “Mapoka evanhu vaipamba evaSiriya haana kuzombouyazve munyika yeIsraeri kana kamwe chete zvako.”

Muprofita Erisha akanga agara achiziva kuti mauto engirozi akanga agara ariko. Aimaona nemaziso ake ekutenda. Mumakore ese aainge ashumira Jehovha, akanga adzidza kuti Jehovha nengirozi dzake havasi kure naye, uye kuti vanogara vakagadzirira kubatsira vashumiri vaMwari vakatendeka. Kuziva izvozvo kunofanira kunge kwakaita kuti Erisha ave neushingi, uye kunogona kuita kuti isuwo tive neushingi.

Verenga nyaya yacho muBhaibheri:

• 2 Madzimambo 6:​8-23

Mubvunzo wekukurukura:

Erisha akaratidza sei ushingi?

1. 2. Nei Erisha akakumbira “chikamu chakapetwa kaviri” chemweya waEriya? (2 Madz. 2:9; w03 11/1 31-wcgr)

   Mhinduro yako

2. 3. Nei zviine musoro kuti titaure kuti Jehovha haana kupofumadza maziso evaSiriya asi kuti akapofumadza pfungwa dzavo? (it “Upofu” ¶6-wcgr)

   Mhinduro yako

3. 4. Tsanangura basa rakaitwa naErisha paaiva muprofita. (it “Erisha” ¶27-28-wcgr)

   Mhinduro yako

Zvidzidzo Zvatinowana

• Ndepapi patingasimbiswa nekuona ngirozi nemaziso edu ekutenda? Ona mufananidzo B

  Mhinduro yako

  

• Vakuru nevamwe vangatevedzera sei zvakaitwa naErisha paakasimbisa mushandi wake?

  Mhinduro yako

• Ndepapi pamwe paunogona kutevedzera ushingi hwakaratidzwa naErisha?

  Mhinduro yako

Mibvunzo Yekufunga Nezvayo

• Nyaya iyi inondidzidzisei nezvaJehovha?

  Mhinduro yako

• Nyaya iyi inobatana papi nechinangwa chaJehovha chaakasikira nyika nevanhu?

  Mhinduro yako

• Zvinhu zvipi zvandinoda kuzobvunza Erisha paachamutswa?

  Mhinduro yako

Dzidza Zvimwe

Ndezvipi zvakaitwa naErisha zvinogona kutevedzerwawo nehama padzinopiwa mabasa matsva musangano?

Remekedza Varume Vagara Nebasa (4:48)

Ongorora zvimwe zvidzidzo zvatinowana kubva pane zvakaitika muupenyu hwaErisha.

“Erisha Akaona Ngoro Dzemoto—Unodzionawo Here?” (w13 8/15 28-30-wcgr)