Funganyo Inogona Kubatwa Nayo!

“Kuchagara kune funganyo muupenyu, uye chaizvoizvo chatinofanira kutotarisa ndechokuti tinoita sei panzvimbo pokuedza kubvisa funganyo.”—Leon Chaitow, munyori weutano anozivikanwa zvikuru.

BHAIBHERI rakafanotaura kuti “namazuva okupedzisira,” kwaizova ne“nguva dzokutambudzika.” Ufakazi hunoratidza zvakajeka kuti tiri kurarama munguva iyoyo, nokuti vanhu—maererano nouporofita—“vanozvirumbidza, vanozvikudza, vanotuka, vasingateereri vabereki, vasingaongi, vasati vari vatsvene, vasina rudo chairwo, vasingadi kuyanana, vanoshora vamwe, vasingazvidzori, vane hasha, vasingadi zvinhu zvakanaka, vanonyengera, vasingarangariri, vanoita manyawi.”—2 Timotio 3:1-5.

Hazvishamisi kuti kuchengetedza runyararo rwakati kuti kwakaoma kwazvo! Kunyange avo vanoedza kurarama nerugare vanogona kutapurwa. “Wakarurama une madambudzo mazhinji,” akanyora kudaro wezvemapisarema Dhavhidhi. (Pisarema 34:19; enzanisa na2 Timotio 3:12.) Kunyange zvakadaro, pane zvakawanda zvaunogona kuita kuderedza funganyo kuti irege kukukurira. Rangarira zvikarakadzo zvinotevera.

Zvitarisire

Ngwarira zvaunodya. Zvokudya zvakanaka zvinobatanidza mapuroteni, michero, miriwo, macereal nezvimwewo zvinogadziriswa bota, uye zvinogadzirwa nemukaka. Ngwarira furawa yakacheneswa uye manda. Ngwarira munyu waunodya, shuga chena, zvinodhaka, uye caffeine. Vandudza zvokudya zvako, uye ungava anotapurwa zvishoma nefunganyo.

Rovedza muviri. “Kurovedza muviri kunobatsira,” rinopa zano kudaro Bhaibheri. (1 Timotio 4:8) Zvirokwazvo, kurovedza muviri kune mwero asi kwenguva dzose—vamwe vanokurudzira katatu pavhiki—kunosimbisa mwoyo, kunovandudza kufamba kweropa, kunoderedza cholesterol, uye kunoderedza mikana yako yekuva nehosha yemwoyo. Zvinopfuura izvozvo, kurovedza muviri kunokurudzira pfungwa yokunzwa zvakanaka, zvimwe nemhaka yemaendorphin anoburitswa mukati mebasa rakaoma.

Rara zvakakwana. Kusarara kunonetesa uye kunoderedza kukwanisa kwako kubata nefunganyo. Kana une chinetso chokurara, edza kurara nokumuka panguva imwe cheteyo nguva dzose. Vamwe vanokarakadza kuti kurara masikati kuganhurirwe kumaminiti 30 kuitira kuti kurege kudzongonyedza kurara zvakanaka usiku.

Rongeka. Vanhu vanogona kuronga nguva yavo vanokwanisa kubata nefunganyo zviri nani zvikuru. Kuti urongeke, tanga kuziva kuti ibasa ripi rinofanira kutanga kuitwa. Tevere, ita rudungwe kuti izvi zvigorega kuregeredzwa.—Enzanisa na1 VaKorinte 14:33, 40 uye VaFiripi 1:10.

Chengetedza Ukama Hwakanaka

Wana tsigiro. Mukati menguva dzinotambudza avo vane shamwari nehama dzakawanda vanowana dziviriro yakati mukurwisa kukurirwa. Kuwana shamwari imwe bedzi yokuvimba nayo yaunogona kuudza zvakavanzika kunogona kuita musiyano. Chirevo cheBhaibheri chinoti: “Shamwari inoda nguva dzose; hama inoberekerwa kuti ibatsire pakutambudzika.”—Zvirevo 17:17.

Pedza magakava. “Zuva ngarirege kuvira muchakatsamwa,” akanyora kudaro muapostora Pauro. (VaEfeso 4:26) Uchenjeri hwokukurumidza kupedza kusawirirana panzvimbo pokuchengeta hasha hunoratidzwa mukunzverwa kwevapukunyuki vane 929 vehosha yemwoyo. Zvaibvira kakapetwa katatu kuti avo vaiva nemwero yakakwirira yoruvengo vafe nokutadza kurova kwemwoyo mukati memakore gumi pashure pehosha yemwoyo kekutanga kupfuura vamwe vavo vanyoro. Vanyori vekufunda kwacho vakaonesa kuti kunyange zvazvo hasha dzichiratidzika sechikonzero chakasimbisisa, murangariro upi neupi wakaipa wakakomba unoparira kudururwa kwemahormone efunganyo mumuviri kunogona kuva nemigumisiro yakafanana. “Godo rinoodza mapfupa,” inodaro Zvirevo 14:30.

Iva nenguva yemhuri. Vabereki vechiIsraeri vakarayirwa kupedza nguva nevana vavo, vachiroverera nheyo dzakarurama mumwoyo mavo. (Dheuteronomio 6:6, 7) Chisungo chaivapo chaitsigira kubatana kwemhuri—chimwe chinhu chiri kushayika nhasi nenzira inosuruvarisa. Kumwe kunzvera kwakaratidza kuti vamwe varoorani vanoshanda vanopedza avhareji yeanenge maminiti 3,5 vachitamba nevana vavo zuva rimwe nerimwe. Asi, mhuri yako inogona kuva munobva betsero huru pakutarisana nefunganyo. “Mhuri inokupa mukana usina ganhuriro wokuva mutezo muboka rinotsigira mumurangariro rinokuziva chaizvoizvo sezvauri uye rinokuda,” rinodaro rimwe bhuku rinotaura zvefunganyo. “Kushanda pamwe chete kwemhuri seboka ndeimwe nzira yakanakisisa yokuderedza nayo funganyo.”

Vamba Dzikamo Muupenyu Hwako

Iva nemufungo. Munhu anonyanyisa pakuita zvinhu mumuviri nomundangariro ndiye chaiye asingatani kupera simba uye sezvingabvira anoora mwoyo. Dzikamo ndiyo kiyi yacho. “Kuchenjera kunobva kumusoro . . . kune rugare,” akanyora kudaro mudzidzi Jakobho. (Jakobho 3:17; enzanisa naMuparidzi 7:16, 17 naVaFiripi 4:5.) Dzidzira kuti kwete kuzvinorayirwa zvinopfuura zvaunogona kuita nenzira ine mufungo.

Usazvienzanisa nomumwe munhu. VaGaratia 6:4 inotaura kuti: “Munhu mumwe nomumwe ngaaidze basa rake amene, ipapo ungazvirumbidza pamusoro pake iye amene oga asingazviiti pamusoro pomumwe.” Hongu, kunyange munhau dzokunamata, Mwari haaiti kuenzanisa kusina kunaka, achirayira zvinopfuura izvo mamiriro edu ezvinhu anobvumira. Anogamuchira zvipo nezvibayiro zvedu ‘maererano nezvatinazvo, kwete maererano nezvatisina.’—2 VaKorinte 8:12.

Iva nenguva yokufaranuka. NaJesuwo, kunyange zvazvo aishanda zvakaoma, aizviwanira nguva yokuzorora nevadzidzi vake. (Marko 6:30-32) Munyori akafuridzirwa waMuparidzi akarangarira kuti kufaranuka kwakanaka kunobatsira. Akanyora kuti: “Ipapo ndakarumbidza mufaro, nokuti munhu haane chinhu chinopfuura ichi, kuti adye, anwe, afare; kuti izvozvo zvigare naye pakubata kwake mazuva ose oupenyu hwake, hwaakapiwa naMwari.” (Muparidzi 8:15) Mifaro yakadzikama inogona kuzorodza muviri uye inobatsira kuderedza funganyo.

Ona Funganyo Nenzira Ine Mufungo

Apo unosangana nemamiriro ezvinhu anofunganyisa:

Usagumisa kuti Mwari haachakutenderi. Bhaibheri rinotiudza kuti Hana, mukadzi akatendeka, kwemakore “wakanga ane shungu kwazvo,” (“achirwadziwa zvikuru” Revised Standard Version). (1 Samueri 1:4-11) MuMakedhonia, Pauro akanga “atambudzika pari pose.” (2 VaKorinte 7:5, Byington) Asati afa, Jesu akanga “ari pakutambudzika kukuru,” uye kutambudzika kwake kwakanga kuri kukuru kwazvo zvokuti “ziya rake rakaita samadonhwe eropa, akadonhera pasi.”a (Ruka 22:44) Ava vaiva vabatiri vakatendeka vaMwari. Apo unotarisana nefunganyo, naizvozvo, hapana chikonzero chokugumisa kuti Mwari akusiya.

Dzidza kubva mumamiriro ako ezvinhu anotambudza. Pauro akanyora kuti aitofanira kutambura “munzwa munyama,” pasina mubvunzo chinetso choutano chaimuparira nhamo huru. (2 VaKorinte 12:7) Anenge makore mashanu gare gare, kunyange zvakadaro, akakwanisa kutaura kuti: “Ndinoziva urombo, ndinozivawo kuva nezvakawanda; pachinhu chipi nechipi napazvinhu zvose ndakadzidziswa kuti ndizive kuguta nokunzwa nzara, kuva nezvizhinji nokushaiwa. Ndingaita zvose naiye unondipa simba.” (VaFiripi 4:12, 13) Pauro haana kufarikanya “munzwa [wake] munyama,” asi kupfurikidza nokuutsungirira, akadzidzira kutsamira pana Mwari zvikuru nokuda kwesimba.—Pisarema 55:22.

Sakurira Umudzimu

Rava nokufungisisa Shoko raMwari. “Vakaropafadzwa varombo pamweya,” akadaro Jesu (Mateo 5:3) Kurava nokufungisisa Shoko raMwari kunokosha. Kazhinji kazhinji, kupfurikidza nokunzvera magwaro nokushingaira, tinowana shoko chairo rakarurama rinokurudzira ratiri kuda kuti tipedze zuva. (Zvirevo 2:1-6) “Mundangariro dzangu zhinji mukati mangu,” akanyora kudaro wezvemapisarema, “kunyaradza kwenyu [Mwari] kunofadza mweya wangu.”—Pisarema 94:19.

Nyengetera nguva dzose. Pauro akanyora kuti: “Mukumbiro yenyu ngaiziviswe Mwari nokunyengetera nokukumbira, pamwe chete nokuonga. Zvino rugare rwaMwari runopfuura kunzwisisa kwose, rucharinda mwoyo yenyu nemifungo yenyu muna Kristu Jesu.” (VaFiripi 4:6, 7) Hongu, “rugare rwaMwari” rwunogona kunyaradza mirangariro yedu yatambudzika ndokuidzikamisa, kunyange apo “simba rinopfuura romuzvarirwo” rinodikanwa.—2 VaKorinte 4:7.

Pinda misangano yechiKristu. Ungano yechiKristu inogovera tsigiro inokosha, nokuti avo vari mairi vanorayirwa “kurangariran[a], kumutsan[a] mwoyo kuti [va]ve norudo namabasa akanaka, . . . [va]rayirane.” Nechikonzero chakanaka, Pauro akaudza vaKristu vechiHebheru vomuzana rokutanga ramakore kuti ‘vasarega kuungana kwavo pamwe chete.’—VaHebheru 10:24, 25.

Tariro Yechokwadi

Sezvinobvumwa, kuderedza funganyo inhau inopfuura kungotevera bedzi muitiro wakapfava. Kazhinji kazhinji, kuchinja kukuru mumafungire kunodikanwa. Somuenzaniso, munhu angada kudzidza nzira itsva dzokudavidza nadzo kumamiriro ake ezvinhu kuti arege kumukurira. Mune zvimwe zvinoitika uwandu noukuru hwefunganyo hungaita kuti zvive madikanwa kutsvaka ngwariro younyanzvi hwezvokurapa.

Chokwadika, hapana munhu nhasi ane upenyu husina funganyo chose chose. Bhaibheri, zvisinei, rinotivimbisa kuti Mwari achakurumidza kutendeudzira ngwariro yake kuvanhu ndokubvisa mamiriro ezvinhu anovaparira funganyo inokuvadza zvikuru kwazvo. Pana Zvakazarurwa 21:4, tinorava kuti Mwari “uchapisika misodzi yose pameso avo; uye rufu haruchavipo kana kuchema, kana kurira, kana kutambudzika hazvingavipo.” Pashure, rudzi rwomunhu rwakatendeka rwuchagara muchengeteko. Muporofita Mika akafanotaura kuti: “Asi mumwe nomumwe uchagara pasi pomuzambiringa wake napasi pomuonde wake, hakuna uchazovatyisa, nokuti muromo waJehovha wehondo wakataura izvozvo.”—Mika 4:4.

[Mashoko Omuzasi]

[Bhokisi riri papeji 30]

Funganyo Nokuvhiya

Vamwe vanachiremba vanorangarira mwero wefunganyo wevarwere vavo vasati vapinda navo mukamuri rokuvhiyira. Somuenzaniso, Dr. Camran Nezhat, muvhiyi, anotaura kuti:

“Kana mumwe munhu anofanira kuvhiyiwa akandiudza kuti avhundutswa uye kuti haadi kuvhiyiwa, handivhiyi.” Nei? Nezhat anotsanangura kuti: “Muvhiyi wose anoziva kuti vanhu vanotya zvikuru havaiti zvakanaka pakuvhiya. Vanobuda ropa zvikuru, vanoita hosha nezvimwe zvinonetsa zvikuru. Vanova nenguva yakaoma zvikuru yokupora. Zviri nani kana vakadzikama.”

[Mifananidzo iri papeji 28]

Kusakurira umudzimu kunogona kukubatsira kuramba wakadzikama

[Mifananidzo iri papeji 29]

Kutarisira utano hwako kunoderedza funganyo

Kuzorora

Zvokudya zvakanaka

Kurovedza muviri