යුද ගිනි දිගින් දිගටම ඇවිළෙන්නේ ඇයි?

පව්කාරකම

දෙවියන් අපේ මුල් දෙමාපියන් වුණ ආදම්වයි, ඒවවයි නිර්මාණය කළේ ඔහුට සමානකම් තියෙන අය විදිහට. (උත්පත්ති 1:27) ඒ කියන්නේ එයාලට ලේසියෙන්ම ආදරේ, සමාදානය වගේ දෙවියන්ට තියෙන ගුණාංග පෙන්නන්න පුළුවන්කම තිබුණා. (1 කොරින්ති 14:33; 1 යොහන් 4:8) ඒත් ආදම් සහ ඒව දෙවියන්ට අකීකරු වෙලා පව් කළා. ඒ නිසා ඒ දෙන්නාගෙන් පැවතෙන අපි හැමෝටම පව්කාරකම සහ මරණය උරුම වුණා. (රෝම 5:12) උරුම වෙච්ච පාපය නිසා අපේ හිතේ දරුණු සිතුවිලි ඇති වෙන්න පුළුවන්. අද ගොඩක් අය ගහමරාගන්නේ, යුද්ධ කරන්නේ ඒ නිසයි.—උත්පත්ති 6:5; මාක් 7:21, 22.

ලෝකේ ආණ්ඩු

මිනිස්සුන්ට මිනිස්සුන්වම පාලනය කරන්න හැකියාව නැහැ. මොකද දෙවියන් අපිව නිර්මාණය කරද්දී අපිට ඒ හැකියාව දුන්නේ නැහැ. බයිබලේ කියන්නේ “තමන් යන්න ඕනෙ මාර්ගය මොකක්ද කියලා තීරණය කරන්න මිනිසෙක්ට අයිතියක් නැහැ” කියලයි. (යෙරෙමියා 10:23) යුද ගැටුම් සම්පූර්ණයෙන්ම නවත්තන්න පාලකයන්ට බැරි වෙලා තියෙන්නේ ඒ නිසයි.

සාතන් සහ භූතයන්

බයිබලේ කියනවා “මුළු ලෝකයම දුෂ්ටයාගේ බලපෑමට අහු වෙලා” කියලා. (1 යොහන් 5:19, පාදසටහන) ඒ දුෂ්ටයාව සාතන් විදිහටත් යක්ෂයා විදිහටත් හඳුන්වලා තියෙනවා. එයා මිනීමරුවෙක් කියලත් බයිබලේ කියනවා. (යොහන් 8:44) සාතනුයි, එයාගේ පැත්තේ ඉන්න භූතයනුයි මිනිස්සු පිටිපස්සේ ඉඳන් ප්‍රචණ්ඩකාරී, දරුණු දේවල් කරන්න එයාලව පොලඹවනවා.—එළිදරව් 12:9, 12.