Kapa ti tisango azo ti ndo lê sese kue na kota bungbi ti district “A ga nduru ti zi e awe!”

Awafango tënë ti kongregation oko oko kue ayeke kangbi anduru mbeti ti tisango ndo so ayeke nde

¹ Na nze ti mai 2006 na ambeni kodoro, kapa ti akota bungbi ti district ayeke to nda ni na ayeke gue juska ti mû ndo lê sese kue. Na yâ ti angoi so kue, a yeke sara mbeni kapa ti tisango azo na yâ ti akodoro 155 tongaso na akota bungbi ni, na a yeke sara ande kusala na mbeni nduru mbeti ngbanga ni. Kapa so ayeke ndu nga akota bungbi so ayeke nde, so a leke ti sara ande na Zamani, na République ti tchèque nga na Pologne na nze ti juillet nga na kozo yenga ti août 2006.

² Akota bungbi so ayeke gboto lê na ndo zendo so Nzapa amû ti zi azo na yâ ti sioni sese ti laso. Tongaso, ndali ti so e yeke na yâ ti ndangba mbage ti lâ ti nda ni so, abungbi so ayeke pika ande bê ti azo ngangu, ala so ayeke na yâ ti dutingo so alingbi teti fini. Atënë ti yâ ni ayeke pusu ande ala ti bi bê na aye so ayeke ga. Ti tene azo kutu mingi mingi awara lege ti mä tënë so adë bê na so amû beku, a wa akongregation ahon 98 000 ti aTémoin ti Jéhovah ti ndo lê sese kue ti mû mbage na wâ na yâ ti kapa ti tisango azo na kota bungbi ni so a tisa ala aTémoin ni ti gue dä.

³ Fade akongregation ayeke wara anduru mbeti so gbani gbani tongaso si awafango tënë oko oko awara ti ala mbeti ni 50 me ahon so pëpe. Tongana tanga ni angbâ, a lingbi ti mû ni na apionnier. Na yâ ti akongregation oko oko, kapa ni ayeke to nda ni yenga ota kozoni na kota bungbi so a tisa ala ti gue dä. Ngoi so ayeke mû lege na awafango tënë ti kangbi ambeti so na yâ ti territoire ti ala mingi wala kue.

⁴ Tongana lege ayeke dä, a yeke nzoni ti mû nduru mbeti ni na zo oko oko na yanga-da ti lo. Ye oko, tongana zo ni ayeke na yanga-da pëpe, mo lingbi ti zia ni na mbeni lege so agboto lê ti azo pëpe. A lingbi e sara ngangu ti kangbi anduru mbeti kue na yâ ti ayenga ota so.

⁵ E hinga na bê ti e kue so fade ngangu so aita ayeke sara ti fa tënë ti Kota Bungbi ti District “A ga nduru ti zi e awe!”, tongana ti so a sara tënë ni na yâ ti article so, ayeke duti ande mbeni kota tënë ti témoin so adö bê. E sambela Jéhovah ti tene lo iri deba nzoni na ndo ngangu so mo yeke sara na ngoi so mo yeke mû mbage na yâ kapa ti tisango ndo so a yeke sara na ndo lê sese kue.