Atënë so i hunda

◼ Ti tene mo zo mo gi nda ti ambeni ye so a yeke bâ na Ekole ti Kusala ti aChrétien na mo zia ni na lembeti si mo kangbi ni na aita, a yeke na lege ni?

Mo lingbi ti sara ni ndali ti mo wani wala ti sewa ti mo wala ti azo so ayeke nduru na mo mingi. Me, a lingbi mo kangbi ni na azo kirikiri pëpe wala mo kä ni kango pëpe ti wara pata na pekoni. Tongana mo sara tongaso, mo yeke doro andia so ayeke bata ambeti ti e.​—aRom. 13:1.

Ti ambeni ye so a yeke bâ na Ekole ti Kusala ti aChrétien, a yeke fa gi li ti atënë ni; na a fa pëpe ambeni mbeti so mo lingbi ti gi nda ti atënë ni dä. Me tongana a mû devoir na mbeni zo si mo gue mo gi ti mo nda ni na mo zia iri ti ambeti so mo wara atënë ni dä na lembeti ti mû na zo ni, a yeke nzoni la? Oko pëpe. A yeke nga nzoni oko pëpe ti zia na lembeti akiringo tënë kue na atënë so a yeke hunda na lisoro ti dango bê ti mû na mbeni zo. Ti sara tongaso ayeke mû maboko na lo pëpe ti bata na li ti lo angbongboro tënë ni. A lingbi élève ni lo wani lo gi nda ti atënë ni, ngbanga ti so a yeke na lege ti Ekole so la si Jéhovah ayeke fa ye na e ti tene ‘yanga ti e ahinga ti sara tënë’.​—Es 50:4.