Mo yeke sala kusala na akete mbeti ti tisango ndo?
Mbeni lâ, mbeni maseka-koli ti ngu 11 awara mbeni ndulu mbeti so a sû na ndo ni kota li ti tënë ti mbeni diskur na ndo enfer. Lo tene na nda ni: “Tënë ni andu mbi ngangu. Teti so mbi bâ lani so mbi yeke sala gi aye ti sioni, mbi yeke gi bê ti mbi mingi so na peko ti kuâ ti mbi, mbi yeke gue na yâ ti wâ ti enfer.” Lo gue lo mä diskur ni. Ngu oko na pekoni, tonga na lo hunzi ti manda Bible awe, lo wara batême. A yeke tongaso si Karl Klein, so asala kusala teti angu mingi tonga na oko ti a-ita so ayeke na yâ ti Wabatango Bungbi ti aTémoin ti Jéhovah, ato nda ti kusala ti lo ti Chrétien. Ye so kue asi ngbanga ti so lo wara kete mbeti ti tisango ndo.
Laso nga, andulu mbeti ti tisango ndo ayeke anzoni gbakuru ti fango tënë. Mingi ti awafango tënë abâ so mungo mbeti ti tisango ndo na mbeni zo ayeke nzoni lege ti to nda ti mbeni lisoro. Ababâ na mama alingbi ti sala si amolenge ti ala amû mbage na yâ fango tënë na lege ti so ala yeke mû na azo ambeti ti tisango ndo. Awafango tënë so ayeke fa tënë na lege ti alettre alingbi ti zia na yâ ni ambeti ti tisango ndo so afa molongo ti abungbi ti e. Nga, ambeti ti tisango ndo so asala si a yeke ngangu pëpe ti tisa azo so e yeke manda Bible na ala na azo so asala nzara ti tënë ni ti ga na bungbi.
Mo yeke sala kusala nzoni na andulu mbeti ti tisango ndo na ngoi ti fango tënë?