Ngbâ ti ku Jéhovah

1. Kota li ti tënë ti kota bungbi ti district so ayeke nyen? Ngbanga ti nyen a lingbi tâ na ngoi ni?

¹ Esaïe atene lani: “L’Eternel ayeke Nzapa ti fango ngbanga ti mbilimbili. Ngia ayeke na azo kue so aku Lo.” (Es. 30:18b). Bible asi singo na gbâ ti atondo so afa tongana nyen Jéhovah afâ ngbanga na ndo ti awato ti lo nga lege so lo bata awakua be-ta-zo ti lo. Aye wa awakua ti Jéhovah ti laso amanda na lege ti atondo so? Ye wa e lingbi ti sara fadeso ti leke tere ti e “kozoni si lâ ti L’Eternel aga, kota lâ ni so amû mbeto mingi”? (Joël 2:31, 32). Kota Bungbi ti e ti District “A ga nduru ti zi e awe!” ayeke pusu ande e ti bi bê na ndo ahundango tënë so nga ti gbu li ti e na ndo ni. A yeke mû ande maboko na e ti ngbâ ti ku Jéhovah.

2. Tongana nyen si e lingbi ti fa so e bâ na nene ni kota bungbi ti e ti district?

² Mo leke tere ti mo awe ti wara ye ti nzoni na yâ ti alango ota ti kota bungbi so? Na tapande, mo hunda na patron ti mo awe ti zia lege ande na mo ti gue dä? Tene pëpe so fade a yeke yeda na mo ti gue senge. Sambela ngbanga ni. Na pekoni, hunda patron ti mo ni (Néh. 2:4, 5). Legeoko nga, a yeke nzoni e leke kozoni aye so andu guengo ti e na kota bungbi ni nga na kiringo ti e, ndo so e yeke lango dä nga na ambeni ye so e yeke na bezoin ni. Mara ti nzoni lekengo tere tongaso afa so e bâ na nene ni kapa so Jéhovah aleke ti fa ye na e na lege ti yingo. A yeke nzoni a-ancien aduti nduru ti mû maboko na aita so ayeke na yâ ti bezoin ti tene ala leke tere ndali ti kota bungbi so, mingi ni, aita so aga mbakoro awe.​—aGal. 6:10.

3. Asarango ye wa a yeke nzoni azo ti Jéhovah afa ni polele na yâ ti gbata so kota bungbi ni ayeke tambela dä?

³ Nzoni tambela amû gonda na Nzapa: Na ngoi so e yeke bungbi gbani gbani na akota bungbi, nzoni tambela ti e ayeke duti mbeni nzoni tapande ndali ti azo ti ndo ni. Ye so ahunda ti tene e sara nyen? A yeke nzoni azo so e yeke tingbi na ala na ando so e lango dä, ada ti tengo kobe wala ando ti dengo buze so ayeke nduru na place ti kota bungbi ni awara ngia na lege ti anzoni sarango ye ti e ti aChrétien. A yeke asarango ye tongana be-nze-pepe, tâ be-ti-molenge, ngangu ti kanga nzara ti tere nga na sarango ye na lege ni (aGal. 5:22, 23; aPhil. 4:5). Zia e kue e fa na gigi so “ndoye asara kirikiri pëpe, ndoye agi ye ti lo mveni pëpe, bê ti ndoye aso fade pëpe.” Atâa mbeni kpale wala mbeni ye so anzere na e pëpe asi, e yeke “sara ye kue teti gloire ti Nzapa.”​—1 aCor. 10:31; 13:5.

4. Tongana nyen ababâ na mama alingbi ti mû maboko na amolenge ti ala ti duti na mbeni tambela so ayeke mû gonda na Jéhovah?

⁴ Na peko ti mbeni kota bungbi, sarango ye nga na lekengo tere ti amaseka ti e apika bê ti mbeni wayinda ti hôtel mingi si lo tene so a nzere na lo “lakue ti wara aTémoin ti Jéhovah na da ti lo.” So tâ ye ti mungo ngia na zo! Ye so afa so ababâ na mama ayeke fa ye nga ayeke mû li ni nzoni. A yeke duti na lege ti ndara pëpe ti tene ababâ na mama azia amolenge ti ala gi tongaso na ando so ala lango dä. A yeke nzoni ala bâ ndo lakue na ndo ti amolenge ni (aProv. 29:15). Zia si nzoni sarango ye ti amolenge ni amû gonda na Jéhovah na asara si bê ti lo aduti na ngia!​—aProv. 27:11.

5. Tongana nyen e lingbi ti ne Jéhovah na lege ti yungo bongo ti e nga na lekengo tere ti e?

⁵ Yü bongo so alingbi nga leke tere nzoni: E oko oko kue e lingbi ti mû mbage na anzoni sarango ye so a yeke bâ ka na angoi ti kota bungbi tongana e kpe ti yü abongo so ayeke na lege ni pëpe, so ahon ndo ni wala alingbi na ngoi ni pëpe. Ye so andu abongo so e yeke yü na ngoi ti gango ti e na kota bungbi ni wala kiringo ni, na ngoi so e yeke leke ando ti kota bungbi ni na nga tongana e yeke ga na yâ ti alango ni. Teti so e yeke awakua ti Nzapa, kozo ye so agbu bê ti e ayeke ti ne iri ti Jéhovah, me pëpe ti bi bê gi na aye so anzere na e wala nzoni duti ti e. Azo so amû li ni na yâ ti sewa ayeke na kungba ti bâ nzoni si yungo bongo ti azo ti sewa ti ala akpa ti azo so asara tere ti ala kete nga na lege ti ndara na ngoi kue.​—1 Tim. 2:9.

6. Ngbanga ti nyen a yeke nzoni ti ngbâ ti yü bongo ti e nzoni na angoi ti wungo tere?

⁶ A yeke nga kota ye ti tene e yü bongo lakue nzoni na ngoi so e yeke wu tere ti e, e yeke gue ti vo ye wala e yeke gue na ada ti tengo kobe. A yeke nzoni ti yü bongo so e ga na ni na kota bungbi tongana e yeke gue ti te ye na mbeni ndo na peko ti kota bungbi ni. Ti yü abadge ti e na kate ti e ayeke mû lege na e ti fa tënë na mbeni lege so e leke ni kozo pëpe.​—2 aCor. 6:3, 4.

7. Tongana nyen si e lingbi ti mû mbage ti tene ye kue atambela na lege ni nga na yâ ti ngia na ngoi ti kota bungbi so? (Bâ “Adango bê ti kota bungbi.”)

⁷ Esaïe atene lani kozoni: “L’Eternel aku si Lo lingbi sara na i na lege ti grâce; tongaso fade a yä iri ti Lo, si Lo lingbi sara be-nzoni na i.” (Es. 30:18a). Ti duti na bê ti kiri singila ndali ti be-nzoni nga na kota nzobe ti Jéhovah ayeke pusu e ti mû gonda na lo na lege ti tambela ti e nga na yungo bongo ti e na ngoi so e yeke bungbi ndo oko na lâ ti kota bungbi so. Zia si Kota Bungbi ti District “A ga nduru ti zi e awe!” aga na gonda na Nzapa na amû maboko na e ti ngbâ ti ku lo!

[Encadré na lembeti 5]

Adango bê ti kota bungbi

◼ Angbonga ni: Na yâ ti alango ota ni kue, kapa ni ayeke to nda ni na 7:50 ti ndapre. Na yâ ti akete penze-ngbonga kozo na tongo nda ti bungbi ni, fade président ni ayeke duti ande na ndo ti estrade na ngoi so a yeke pika mozoko ti Royaume ti tongo nda ni. A yeke nzoni e kue e duti na place ti e na ngoi ni so, si kapa ni alingbi ti to nda ni na mbeni lege so ane zo. Kapa ni ayeke hunzi ande na 15:15 na lango ti vendredi nga na 15:05 na lango ti samedi. Na dimanche, a yeke hunzi ande na 14:10.

◼ Ndo ti lutingo ti akutukutu: Mingi ni, ndo ti lutingo ti akutukutu ayeke kota pëpe. Ni la, ahon ti tene zo oko oko amû kutukutu ti lo yâ ni senge ti gue na ni na kota bungbi ni, a yeke nzoni lo mä tere na amba ti lo so ayeke na ni awe ti yô lo ti tene ala gue oko na kota bungbi ni. A yeke nzoni e sara kusala maboko na maboko na aita so abâ lege ti ndo ti lutingo ti akutukutu si andao asi pëpe.

◼ Ando ti duti: A yeke nzoni ti bata ndo ti duti gi teti azo so mo na ala aga legeoko na yâ ti kutukutu wala so mo na ala alango da oko.

◼ Ngoi ti wungo tere: A yeke nzoni ti tene mo ga na mbeni ye ti te ahon ti zia ndo ti kota bungbi ni na ngoi ti wungo tere ti gue ti gi ye ti tengo na mbeni ndo nde. Mo lingbi ti ga na mbeni kete ye ti batango kobe, so mo lingbi ti zia ni na gbe ti ye ti duti. A yeke yeda pëpe ti tene zo aga na sämba, asakpa so akono mingi nga na averre na ando so a yeke sara kota bungbi dä.

◼ A-offrande: A mû nginza mingi ti futa na aye so a leke teti kota bungbi so. E lingbi ti fa bê ti kiri singila ti e teti aye so a leke ni awe na ziango na bê kue a-offrande na yâ ti aboîte so ayeke na yâ ti aDa ti Royaume ti e wala so ayeke na ando nde nde ti kota bungbi ti e so. A yeke nzoni a zia iri ti bungbi ti e so ndia ahinga ni na yâ kodoro so e yeke dä na ndo achèque so e ye ti bi na yâ sanduku so. Na tapande, na Cameroun, a lingbi ti sara chèque ni na iri ti “ACTJ CAM”. Bâ aita so ayeke bâ lege ti nzoni tambelango ti kota bungbi so ti wara ambeni sango na ndo ni.

◼ Andao na akpale so ahunda ti mû yorö hio: Tongana tere ti mbeni zo aso hio tongaso na ngoi ti kota bungbi ni, sara tënë ni na mbeni ita ti ndokua ti yambango azo so ayeke nduru na mo. Fade ita ni ayeke gue hio ti sara tënë ni na ndokua ti mungo ayorö. Kâ, aita ti ndokua ni ayeke bâ ande wala kobela ni ayeke ngangu wala pëpe, na nga ala yeke mû maboko so alingbi. A yeke nzoni azo so ayeke na kpale ti seni agirisa pëpe ti ga na ayorö ti ala na kota bungbi ni.

◼ Amasini: Tongana mo yeke na aye tongana camera wala ambeni ye nde, a hunda ti tene mo sara kusala na kuran ti ndo ti kota bungbi ni pëpe. Mo lingbi ti sara kusala na amasini ti mo ni gi tongana a kanga lê ti azo pëpe wala a gboto lê ti ala pëpe.

◼ Mungo afoto: Tongana mo ye ti mû afoto, sara kusala na flash pëpe.

◼ Atéléphone ti maboko: Zia si atéléphone ti maboko na ambeni ye tongaso agboto lê ti azo pëpe.

◼ Kete mbeti: Veuillez suivre l’intérêt (S-43): A lingbi ti sara kusala na kete mbeti so ti mû ambeni sango na ndo ti mbeni zo so asara nzara ti tënë ni na peko ti so a fa na lo tënë na mbeni lege so a leke ni kozo pëpe na ngoi ti kota bungbi so. A lingbi awafango tënë aga na mbeti ni so oko wala use tongaso na ngoi ti kota bungbi so. A lingbi nga ti wara ambeti so na ndokua so ayeke bâ lege ti ambeti. Tongana mo sû ye na lê ti mbeti so awe, mo lingbi ti zia ni na oko ndokua so wala mo lingbi ti mû ni na secrétaire ti kongregation ti mo tongana mo kiri na kongregation ti mo.​—Bâ Kusala ti Royaume ti février 2005, lembeti 8.

◼ Ada ti lango: Na ando kue so mo lango dä, fa sarango ye ti aChrétien na mbage ti azo kue so ayeke na ndo ni so. Sara ye na nzobe, na ndoye nga ne zo. Tongana mo lango na dä ti mbeni zo, mû mbage na yâ ti akua ti da ni nga futa ambeni ye. Kozo ti tene mo kiri na ndo ti mo, gi ti bâ wala ndo so a mû na mo ti lango dä angbâ nzoni.