Bâ terê ti mo kete, yeda so mo hinga ambeni ye ape

1. Jéhovah acréé e na ngangu ti sara aye wa? Ngbanga ti nyen?

JÉHOVAH acréé e na ngangu ti gbu li, ti manda ye, ti mä yâ ti ye nga ti sara ye na ndara. Lo créé e tongaso ngbanga ti nyen? Lo ye si e “wara hingango ye na ndö ti Nzapa” nga e sara na lo na hingango ndo ti e.—aProv. 2:​1-5; aRom. 12:1.

2. (a) Nyen la e bezoin ti comprendre na ndö ti e wani? (Job 37:​23, 24). (Bâ nga foto.) (b) Tongana e yeda so e hinga ye kue ape, e yeke bâ nzoni dä tongana nyen?

² Jéhovah acréé e na ngangu ti manda aye, me aye mingi ayeke dä so e hinga ape. (Diko Job 37:​23, 24.) Gbu li na ndö ti tapande ti Job. Jéhovah ahunda na lo gbâ ti atënë so a-aidé lo ti hinga so aye mingi ayeke dä so lo hinga ape. Ye so asara si lo sara terê ti lo kete nga a-aidé lo ti changé bango ndo ti lo (Job 42:​3-6). E nga kue tongana e bâ terê ti e kete e yeda so e hinga ye kue ape, e yeke bâ nzoni dä. Ti sara tongaso ayeke pusu e ti duti na confiance so Jéhovah ayeke fa na e tâ ye so e bezoin ti hinga ni tongaso si e mû anzoni desizion.—aProv. 2:6.

3. Nyen la e yeke bâ na yâ ti article so?

³ Na yâ ti article so, e yeke bâ ambeni ye so e hinga ape nga na akpale so e peut ti wara na pekoni. E yeke bâ nga ndani so a yeke nzoni so e hinga ambeni ye ape. Ti bâ aye so ayeke aidé e ti sara confiance mingi so Jéhovah “Lo so ahinga ye kue” ayeke fa na e ye kue so e bezoin ti hinga.—Job 37:16.

E HINGA PËPE LAWA LA NDA NI AYEKE GA

4. Ti gue oko na Matthieu 24:​36, mbeni ye wa la e hinga ape?

⁴ Diko Matthieu 24:36. E hinga ape lawa la nda ni ayeke ga. Même Jésus, na ngoi so lo yeke lani na sese, lo hinga ‘lango ni nga na l’heure ni’ ape.a Ambeni ngoi na pekoni, lo tene na abazengele ti lo so Jéhovah, so ayeke fa kapa so aye ayeke si na ni, abata lango so ambeni ye ayeke si na ni na “gbe ti komandema ti lo wani.” (Kus. 1:​6, 7). Jéhovah aleke awe lango so nda ni ayeke ga na ni, me e peut ti hinga mbilimbili lango ni so ape.

5. So e hinga pëpe lawa la nda ni ayeke ga, a peut ti sara nyen na ndö ti e?

⁵ Ti gue oko na tënë so Jésus atene, e hinga ape e doit ti ku ngoi oke si nda ni aga. Tongaso, e peut ti kanga bê gbâ wala e découragé mbilimbili tongana e yeke ku lâ ti Jéhovah asara ambeni ngoi awe. E peut nga ti découragé tongana ambeni zo ti sewa ti e wala ambeni zo ahe e ndali ti so ade nda ni aga ape (2 Pi. 3:​3, 4). E peut ti bâ so tongana e hinga mbilimbili lango so nda ni ayeke ga na ni, e yeke kanga bê mingi nga a yeke duti ngangu na e ape ti gbu ngangu tongana a he e.

6. Ngbanga ti nyen la a yeke nzoni so e hinga ape lango so nda ni ayeke ga na ni?

⁶ Ti vrai ni, so Jéhovah afa na e pëpe lango so nda ni ayeke ga na ni, lo mû na e pasa ti fa so e yeke voro lo ndali ti so e ye lo nga e sara confiance na lo. E ye ti sara na Jéhovah teti lakue lakue, me gï pëpe juska nda ni aga. Ahon ti pensé kozo ni kue na lango so “lâ ti Jéhovah” ayeke ga na ni, a yeke nzoni e pensé na anzoni ye so ayeke ga ande na pekoni. Ye so ayeke aidé e ti ga nduru mingi na Jéhovah, ti sara confiance na lo nga ti sara ye kue so e peut ti sara ti zia ngia na bê ti lo.—2 Pi. 3:​11, 12.

7. Aye wa la e hinga?

⁷ A yeke nzoni e zia li ti e na ndö ti aye so e hinga: lâ ti nda ni akomanse na ngu 1914. Na yâ ti Bible, Jéhovah afa na e aprophétie so afa so lâ ti nda ni akomanse na ngu 1914. Lo fa nga na e gbâ ti anzene nzene ye so afa aye so ayeke si na yâ ti dunia na peko ti ngu ni so. Ye so asara si e hinga na bê ti e kue so “kota lâ ti Jéhovah aga nduru!” (Soph. 1:14). E hinga nga kua so Jéhovah aye ti tene e sara. Lo ye ti tene e fa “nzoni tënë ti Royaume” na gbâ ti azo (Mat. 24:14). E yeke fa nzoni tënë so na yâ ti akodro 240 tongaso nga na ayanga ti kodro ahon 1000. Ti yapu na yâ ti kua so, e bezoin ti hinga ‘lango nga na l’heure’ so nda ni ayeke ga na ni ape.

E HINGA FASON SO JÉHOVAH APEUT TI SARA NA YE APE

8. “Kusala ti tâ Nzapa” aye ti sara tënë ti nyen? (Zo-ti-fa-tene 11:5).

⁸ Lakue la e hinga “kusala ti tâ Nzapa” ape. (Diko Zo-ti-fa-tene 11:5.) Tënë so aye ti sara tënë ti ye so Jéhovah asara si asi wala lo zia lege na ni ti si tongaso si ye so lo leke na bê ti lo ti sara aga tâ tënë. E peut pëpe ti hinga ndani so Jéhovah azia lege na mbeni ye ti si wala mbilimbili ye so lo yeke sara ti aidé e (Ps. 37:5). Bible atene so legeoko tongana ti so e peut ti hinga pëpe tongana nyen la mbeni bébé ayeke kono na yâ ti mama ti lo, e peut ti hinga pëpe “kusala ti tâ Nzapa”. Même awandara ade ti hinga nzoni ape tongana nyen la mbeni molenge ayeke kono na yâ ti mama ti lo. Legeoko nga, e hinga nzoni ape tongana nyen la Jéhovah ayeke sara ande aye.

9. So e hinga nzoni ape aye so Jéhovah ayeke sara ande, mara ti pensé wa la apeut ti komanse ti ga na li ti e?

⁹ So e hinga nzoni ape ye so Jéhovah ayeke sara ande ti aidé e, mbeto apeut ti sara e ti mû ambeni desizion. Mbeto apeut ti sara e ti sara asacrifice ti fa tënë mingi na tapande ti duti na aye mingi ape wala ti gue na ndo so a bezoin awafango tënë ti Royaume mingi dä. Tongana e wara lege ape ti sara aye so e leke na bê ti e ti sara na yâ ti kua ti Jéhovah, e fa tënë ngangu me e bâ anzoni ye ti peko ni ape wala tongana e wara akpale na yâ ti mbeni kua ti Jéhovah, e peut ti pensé so e zia ngia na bê ti lo ape.

10. So e hinga ape ye so Jéhovah ayeke sara ande, a aidé e ti duti na asarango ye wa so ayeke kota ye?

¹⁰ Ti vrai ni, so e hinga ape ye so Jéhovah ayeke sara ande, a aidé e ti gi ti duti na asarango ye so ayeke kota mingi na tapande sarango terê kete nga na bango terê kete. A aidé e ti comprendre so apensé ti Jéhovah nga na fason ti sarango ye ti lo ayeke nzoni mingi ahon ti e (És. 55:​8, 9). E manda nga ti sara confiance mingi na Jéhovah, e hinga so lo yeke bâ ande si ye kue atambela nzoni. Tongana e wara anzoni ye na peko ti fango tënë wala na peko ti mbeni kua so e sara ndali ti Jéhovah, a yeke na lege ni ti gonda lo ndali ni (Ps. 127:1; 1 aCor. 3:7). Tongana aye apassé tongana ti so e ye ape, a yeke nzoni e girisa ape so Jéhovah ahinga ye kue (És. 26:12). E yeke sara ye so e peut ti sara, na e yeke na confiance so Jéhovah ayeke aidé e lakue. E hinga biani so lo yeke fa lege na e même tongana lo sara ni na lege ti miracle ape tongana ti so lo yeke sara ândö.—Kus. 16:​6-10.

11. Aye wa la e hinga so apeut ti aidé e?

¹¹ E hinga so Jéhovah aye e, lo yeke mbilimbili nga lo yeke na ndara. E hinga so lo bâ na nene ni mingi aye so e sara ndali ti lo nga ndali ti aita ti e. E hinga nga so Jéhovah ayeke futa lakue azo so ayeke be-ta-zo na lo.—aHéb. 11:6.

E HINGA YE SO AYEKE SI KEKEREKE APE

12. Ti gue oko na Jacques 4:​13, 14, nyen la e hinga ape?

¹² Diko Jacques 4:​13, 14. E hinga ye so ayeke si na e kekereke ape. Na yâ ti dunia so, ‘ye so e ku terê ti e na ni pëpe’ apeut ti si na e (Zo-ti. 9:11). Ye so asara si e peut ti hinga ape wala e yeke sara aye so e leke ti sara wala même eskê e yeke ngbâ na fini ti hunzi ni.

13. So e hinga ape aye kue so ayeke si kekereke, a peut ti sara e tongana nyen?

¹³ So e hinga mbilimbili aye so ayeke si kekereke ape, a peut ti duti ngangu na e ti gbu ngangu. Ngbanga ti nyen? Tongana e gi bê ti e mingi na ndö ti ye so apeut ti si, peut-être e yeke duti na ngia encore ape. Akota kpale so asi gï hio tongaso nga na asioni ye so asi so e ku terê ti e na ni ape apeut ti sara e vundu nga ason bê ti e. Nga tongana aye asi tongana ti so e ye ape, vundu apeut ti sara e nga e découragé.—aProv. 13:12.

14. Nyen la ayeke sara si e ngbâ ti duti na ngia? (Bâ nga afoto.)

¹⁴ Tongana e gbu ngangu na yâ ti akpale, e yeke fa so atâa nyen la asi, e yeke voro Babâ ti e ti yayu ndali ti so e ye lo me ti wara ye na pekoni ape. Ambaï ti Bible afa so a yeke nzoni ape ti tene e ku ti tene Jéhovah abata e si kpale oko asi na e ape nga akpale so asi na e, lo leke kozo ape ti tene a si tongaso. Lo hinga so e peut ti duti na ngia même tongana e hinga ape aye kue so ayeke si ande na e. Me e yeke duti na ngia tongana e ngbâ ti hunda lo ti fa lege na e nga e mä yanga ti lo (Jér. 10:23). Tongana e bâ ndo na mbage ti lo na ngoi so e yeke mû adesizion, a yeke mo bâ mo tene e yeke tene: “Tongana Jéhovah aye, e yeke ngbâ na fini na e yeke sara so wala so.”—Jacq. 4:15.

15. Nyen la e hinga na ndö ti kekereke?

¹⁵ Atâa so e hinga ape ye so ayeke si lâ oko oko, e hinga so Jéhovah atene lo yeke mû na e fini ti lakue lakue, atâa na yayu wala na ndö ti sese. E hinga so lo peut ti tene mvene ape nga ye oko apeut ti kanga lege na lo ape ti sara ye alingbi na azendo ti lo kue (Tite 1:2). Lo oko la lo peut ti “fa tongana nyen ye ni ayeke hunzi, nga ngbene ye giriri [lo] fa aye so ade ti si pëpe.” Ândö, aye kue so lo tene ayeke si asi na aye kue so lo tene ayeke si ande ayeke si (És. 46:10). E hinga biani so mbeni ye apeut ti kanga lege na Jéhovah ape ti ye e (aRom. 8:​35-39). Lo yeke dë bê ti e nga lo yeke mû na e ndara nga na ngangu so e bezoin ni ti gbu ngangu atâa kpale wa la e wara. E peut ti duti sûr so Jéhovah ayeke aidé e nga lo yeke sara tufa na ndö ti e.—Jér. 17:​7, 8.

JÉHOVAH AHINGA E NZONI MINGI, E PEUT TI COMPRENDRE NI KUE APE

16. Tongana ti so Psaume 139:​1-6 afa, nyen la Jéhovah ahinga ni so e peut ti comprendre ni kue ape?

¹⁶ Diko Psaume 139:​1-6. Lo so acréé e ahinga ye kue na ndö ti e. Lo hinga ye so apusu e ti pensé nga na ye so asara si e yeke na ngia wala vundu. Lo hinga atënë so e tene nga na atënë so ayeke na yâ ti bê ti e. Lo hinga nga ye kue so e sara na ndani so e sara ni. Gbia David atene so Jéhovah ayeke lakue nduru ti aidé e nga lo yeke na ngangu ti sara ni. So Seigneur ti dunia kue so ngangu ti lo ahon angangu kue, so acréé yayu na sese ayeke pensé mingi na e ahon gbungo li ti e. David atene: “Mara ti hingango ye so asara si mbi gi li ti mbi dä gbä. Mbi peut ti hinga ye dä pëpe.”—Ps. 139:​6, akete tënë na gbe ni.

17. Ngbanga ti nyen la a peut ti duti ngangu na e ti yeda so Jéhovah ahinga e nzoni mingi?

¹⁷ Aye so e vivre na yâ ti sewa ti e, ngobo ti e wala aye so e mä na bê na ni ândö apeut ti sara si a yeke ngangu na e ti bâ Jéhovah tongana Babâ so aye e nga so ayeke pensé na e. Wala e peut ti pensé so afaute so e sara ândö ayeke sioni mingi tongaso Jéhovah ayeke ye lâ oko ape ti hinga e nga lo yeke yongoro mingi na e. Même David kue apensé lani tongaso (Ps. 38:​18, 21). Wala mbeni zo so ayeke sara ngangu ti changé asarango ye ti lo ti sara ye alingbi na aye so Nzapa ahunda na e apeut ti hunda terê ti lo: ‘Ti vrai ni, tongana Nzapa acomprendre mbi, ngbanga ti nyen la lo hunda na mbi ti ke aye so a yeke ngangu na mbi ti ke ni?’

18. Tongana e yeda so Jéhovah ahinga e nzoni mingi ahon e wani ayeke aidé e tongana nyen? (Bâ nga afoto.)

¹⁸ E peut ti manda ti yeda so Jéhovah ahinga e nzoni mingi ahon e wani nga so lo peut ti bâ anzoni ye so e sara so e bâ ni ape. Atâa so lo yeke bâ afaute so e sara, lo hinga zo so e ye ti duti ni na lo ye e (aRom. 7:15). Tongana a nzere na e mingi so Jéhovah abâ so e peut ti sara anzoni ye, a yeke mû na e ngangu so e bezoin ni ti sara na lo be-ta-zo nga ti duti na ngia.

19. Nyen la e hinga ni biani na ndö ti Jéhovah?

¹⁹ E hinga so Jéhovah ayeke ndoye. Kite ayeke na ndö ni oko ape (1 Jean 4:8). E hinga so aye so lo hunda na e ti sara, ndoye la apusu lo ti hunda ni nga tënë ti nzoni duti ti e agbu bê ti lo mingi. E hinga so Jéhovah aye ti tene e wara fini ti lakue lakue. Ndani la lo mû ye so a futa ti zi azo. Ye so a futa ti zi azo afa na e so e peut ti zia ngia na bê ti Jéhovah atâa so e yeke mbilimbili-kue ape (aRom. 7:​24, 25). E hinga nga so “Nzapa ayeke kota ahon bê ti e, na lo hinga ye kue.” (1 Jean 3:​19, 20). Jéhovah ahinga ye kue na ndö ti e na lo yeke na confiance so e peut ti sara ye so bê ti lo aye.

20. Nyen la ayeke aidé e ti gi bê ti e ahon ndö ni ape?

²⁰ Jéhovah afa na e ye kue so e yeke tâ na bezoin ti hinga ni. Tongana e bâ terê ti e kete e yeda na tënë so, e yeke gi bê ti e ahon ndö ni ape na ndö ti ye so e yeke na komandema na ndö ni ape nga e peut ti zia li ti e na ndö ti ye so ayeke biani kota ye. Tongana e sara tongaso, e yeke fa so e sara confiance mingi na Jéhovah, “Lo so ahinga ye kue”. (Job 36:4). Atâa so laso e hinga ambeni ye ape, e yeke ku kungo ti tene Kota Nzapa ti e afa afini ye na e teti lakue lakue.—Zo-ti. 3:11.