Ngbâ ti manda ye mingi na ndö ti Jéhovah

1. Tongana e gbu li na ndö ti aye kue so Jéhovah ahinga nga na aye so lo sara so apika bê mingi, a sara e tongana nyen?

JÉHOVAH NZAPA ti e ahinga aye kue, lo yeke na ndara ahon azo kue nga lo sara gbâ ti aye so apika bê. Tongana e gbu li na ndö ti lo, li ti e akpe. Tënë ti bê ti e ague oko na ti bazengele Paul so atene lani atene: “Bâ, tongana nyen mosoro ti Nzapa, ndara ti lo na hingango ye ti lo ayeke kota ma! Zo alingbi ti gi nda ti afango ngbanga ti lo pëpe, zo alingbi nga ti hinga alege ti lo kue pëpe.”—aRom. 11:​33, 34.

2. Nyen la afa so e peut ti hinga Jéhovah?

² Atâa so e peut lâ oko ape ti hinga ye kue na ndö ti Jéhovah, e peut kamême ti hinga lo. Gbia David atene lani na molenge ti lo Salomon atene: “Hinga Nzapa ti babâ ti mo na mo sara na lo na bê ti mo kue . . . Tongana mo gi lo, lo yeke sara si mo wara lo.” (1 Chron. 28:9). Tongana ti so bazengele Jean atene na amba ti lo aChrétien angu ngbangbo mingi na pekoni, e wara “ndara so amû lege na e ti hinga tâ Nzapa.” (1 Jean 5:20). Nga Jésus atene so lo yeke aidé azo ti ‘hinga tâ nzoni mingi Babâ ni.’—Mat. 11:27.

3. Nyen la e yeke bâ na yâ ti article so?

³ Azo kue so amû terê ti ala na Jéhovah, ahinga aye mingi na ndö ti lo awe. Me e yeke zia lâ oko ape ti “gi ti hinga” Jéhovah (Jean 17:3). E peut lakue ti gi ti hinga ye na ndö ti aye so anzere na lo nga tongana nyen la e peut ti sara confiance mingi na lo. Zia e bâ ahunda ota so a yeke nzoni e kue e gbu li na ndö ni atâa e yeke sara na Jéhovah asara ngu oke: Ti gi ti hinga Jéhovah aye ti tene nyen? Ngbanga ti nyen la a yeke nzoni e ngbâ ti gi ti hinga lo nzoni? Tongana nyen la e peut ti gi ti hinga lo nzoni?

TI GI TI HINGA JÉHOVAH AYE TI TENE NYEN?

4. Mbeni lege ti gi ti hinga Jéhovah ayeke so wa?

⁴ Mbeni lege ti gi ti hinga Jéhovah ayeke so wa? Jéhovah amû lani zendo na aJuif so ayeke londo ande na Babylone ti kiri atene: “Mbi yeke mû na ala mbeni bê so ayeke pusu ala ti hinga mbi, so mbi la mbi yeke Jéhovah.” (Jér. 24:7). Kite ayeke dä ape so azo so alondo Babylone akiri ahinga lani gbâ ti aye na ndö ti Jéhovah. Me na peko ti so ala kiri, ala bezoin mbilimbili ti ga nduru mingi na lo. Mbeni mbeti so asara tënë na ndö ti Bible atene: “Kota kangbi ayeke na popo ti hingango ye na ndö ti Nzapa nga na hingango lo nzoni. A yeke tongana kangbi so ayeke na popo ti dikongo ye na ndö ti yengo mbeni zo nga na tingo mbeni zo.” Gï ti hinga iri ti Jéhovah nga ti hinga so lo yeke Nzapa alingbi ape. E doit ti gi ti hinga lo yeke tongana nyen.

5. Nyen la e peut ti manda na lege ti tapande ti Gbia Josias na ndö ti ye so aye ti tene ti gi ti hinga Jéhovah?

⁵ Na ngoi so e yeke gi ti hinga Jéhovah, e yeke hinga aye so anzere na lo nga na aye so anzere na lo ape. Gbu li na ndö ti tapande ti Gbia Josias. Bible atene: “Na yâ ti ngu miombe ni ti komandema ti Josias, na ngoi so lo de maseka mingi, lo komanse ti gi Nzapa ti kotara ti lo David.” (2 Chron. 34:3). Josias amanda lani gbâ ti aye na ndö ti Jéhovah, me lo ngbâ gï ge ape. Lo sara ye alingbi na aye so lo hinga. Na lege ti prophète Jérémie, Jéhovah atene so Josias ‘afâ ngbanga mbilimbili, lo sara ye na lege ni’ nga lo gbu koko ti azo so a sara pasi na ala nga na awayere. Na pekoni, Jéhovah akiri atene: “A yeke ndali ti so lo hinga mbi la si lo sara ye tongaso so, ni la ape?”—Jér. 22:​15, 16.

6. Tongana ti so a fa na Psaume 9:​10, tongana e gi ti hinga Jéhovah, a yeke pusu e ti sara nyen?

⁶ Diko Psaume 9:10. Tongana e hinga Jéhovah nzoni, e yeke sara confiance na lo mingi. A yeke ye so asi lani na bazengele Paul. Na ndangba kanga so lo sara nga ngoi kete kozo ti tene lo kui, lo tene: “Kamene asara mbi pëpe. Biani, mbi hinga lo so mbi mä na bê na lo.” (2 Tim. 1:12). Aye so Paul ahinga nga na aye so lo vivre ni asara si lo zia bê ti lo kue na Nzapa ti lo. Mbeni note ti étude na ndö ti versê ni atene: “Paul . . . ayeke lani na confiance so Jéhovah ayeke girisa lo ape nga na akua so lo sara be-ta-zo nga lo yeke zingo lo na kuâ.”

NGBANGA TI NYEN LA E DOIT TI NGBÂ TI GI TI HINGA JÉHOVAH?

7. Na peko ti so e sara na Jéhovah angu mingi awe, nyen la apeut ti si?

⁷ Tongana ngoi ayeke hon, peut-être e yeke sara effort mingi ape ti gi ti hinga Jéhovah tongana ti so e yeke sara lani na tongo nda ni. Ngbanga ti nyen? Tongana e yeke diko Bible e oko wala na ngoi ti abungbi, mingi ni e yeke gi ti hinga tongana nyen la apeut ti aidé e wala tongana nyen la e peut ti sara kua na ni ti aidé mbeni zo. A yeke na lege ni ndali ti so Bible awa e ti sara tongaso (2 Tim. 3:​16, 17). Me Bible afa nga na e gbâ ti aye na ndö ti Wa ni (Ps. 25:​8-10). E doit ti hunda terê ti e: ‘Nyen la versê so afa na mbi na ndö ti Jéhovah Nzapa?’a

8. Tongana e gi ti hinga Jéhovah nzoni ayeke sara nyen na ndö ti songo ti e na lo? (Psaume 73:​24-28).

⁸ Tongana e gi ti hinga Jéhovah nzoni, songo ti e na lo ayeke kpengba mingi. Na tapande, tongana mo diko Bible ti mo ti lango ni, mo bâ mbeni kapa ti Télé JW wala mo gue na mbeni kota bungbi, a yeke sara ka mo tongana nyen? Mingi ni, a yeke sara si mo ga nduru mingi na Babâ ti e ti yayu. Ngbanga ti nyen? Ngbanga ti so e manda ye mingi na ndö ti lo. Ye so apusu e ti gonda lo nga ti kiri singila na lo. E yeke pensé tongana ti zo ti sungo psaume so agbu li na ndö ti ndoye ti Jéhovah na mbage ti lo na lo tene: “Nzapa ayeke kota tênë so asara si bê ti mbi awara ngangu nga lo yeke part ti mbi lakue lakue.” (Diko Psaume 73:​24-28.) A-effort kue so e sara ti gi ti hinga Jéhovah nzoni asara si e kiri singila mingi na lo ndali ti pendere songo ti kamarade so e yeke na ni na lo.

9. Tongana e “bi bê” na Jéhovah ayeke sara nyen na ndö ti adesizion so e yeke mû? Mû mbeni tapande ti fa ni.

⁹ Tongana e “bi bê” na Jéhovah, so ti tene e dabe na aye so e manda na ndö ti lo nga e gbu li na ndö ti aye so sarango ye ti e ayeke sara na ndö ti lo, a yeke pusu e ti mû anzoni desizion (aProv. 3:​5, 6). Na tapande, gbâ ti aita ayeke zia foto ti koli wala ti wali ti ala na ndö ti bureau ti ala, na yâ ti portefeuille ti ala wala na lê ti téléphone ti ala. Ye so ayeke aidé ala ti pensé mingi na zo ni, ti mû adesizion so ala hinga so ayeke nzere na lo nga ti sara pëpe mbeni ye so ayeke son zo ni. Legeoko nga tongana e mû ngoi mingi ti gbu li na ndö ti Jéhovah, e yeke mû adesizion so anzere na lo.—Ps. 19:​13, 14.

10. Tongana e manda ye na ndö ti Jéhovah ayeke aidé e ti sara nyen?

¹⁰ Jéhovah aleke e na image ti lo, ye so amû lege na e ti sara ye tongana lo (Gen. 1:26). Tongana e manda ye mingi na ndö ti apendere sarango ye ti Jéhovah, e yeke comprendre nzoni tongana nyen ti mû tapande ti lo. Jésus afâ lani ngbanga na ndö ti ascribe nga na aFarizien so asara ye tongana Nzapa ape. Atâa so ala hinga anzene nzene ye na ndö ti Ndia nzoni mingi, ala “bâ na nene ni pëpe aye so ayeke kota ahon ni na so Ndia ahunda: So ti tene mbilimbili, sarango nzoni bê na zo nga dutingo be-ta-zo.” (Mat. 23:23). E ye ti sara ye tongana ala ape me e ye ti gbu li na ndö ti ye so andia nga na amama-ndia so ayeke na yâ ti Bible afa na e na ndö ti Jéhovah. Tongana e sara tongaso ayeke aidé e ti sara ye tongana lo.—1 Jean 4:​8, 11.

NYEN LA E YEKE SARA TI HINGA JÉHOVAH NZONI?

11. Mo hinga lani Jéhovah tongana nyen?

¹¹ Zo wa la asara si mo hinga Jéhovah? Peut-être babâ na mama ti mo ayeke aChrétien. Peut-être ala fa na mo ambaï ti Bible so afa apendere sarango ye ti Nzapa nga ala fa na mo tongana nyen la aye so lo créé afa apendere sarango ye ti lo. Wala mbeni Témoin ti Jéhovah la amanda lani Bible na mo. Peut-être zo so amanda Bible na mo asara kua na buku Ngbâ na fini lakue lakue! ti aidé mo ti gbu li mingi na ndö ti ambaï ti Bible nga na ndö ti aye so Jéhovah acréé so afa apendere sarango ye ti lob (Néh. 8:8; Kus. 14:17). Zia e bâ tongana nyen la e peut ti ngbâ ti manda ye na ndö ti Jéhovah.

12-13. Tongana e diko Bible, nyen la e peut ti manda na ndö ti Jéhovah? Fa mbeni tapande ni. (Jérémie 39:​15-18). (Bâ nga foto .)

¹² Kozo ni, e peut ti manda aye mingi na ndö ti Jéhovah na dikongo Bible nga na mandango ni. Na ambeni ngoi, Bible afa ambeni mbilimbili sarango ye ti Nzapa (Ex. 34:​6, 7). Me mingi ni, a sara tënë ti aye so azo asara nga na adesizion so ala mû. Tongana mo diko mara ti ambaï tongaso, gbu li na ndö ti aye so mo peut ti manda na ndö ti Jéhovah na lege ni.

¹³ Bâ mbeni tapande ni la. Tongana mo diko Jérémie 38:​6-13, mo yeke manda ye na ndö ti Ébed-Mélec so ayeke zo ti Éthiopie so asö lani prophète Jérémie. Kite ayeke dä ape so hio mo yeke bâ tongana nyen la mo peut ti mû tapande ti Ébed-Mélec so asara asacrifice, lo sara ye na mbeto ape nga lo ye amba ti lo awakua ti Jéhovah. Eskê ambeni pendere sarango ye ti Jéhovah asigi na yâ ti mbaï so? (Diko Jérémie 39:​15-18.) Na tapande, nyen la afa so Jéhovah abâ na nene ni ye so azo ayeke sara? Nyen la afa so Jéhovah asara ye na lege ni nga lo sara kangbi na popo ti azo ape? Ambeni sarango ye ti Jéhovah wa la asigi na yâ ti mbaï so? Tongana mo diko mbeni versê na yâ ti Bible, gi ti hinga asarango ye ti Jéhovah so asigi na yâ ni. Kiri singila na lo nga gonda lo ndali ti asarango ye ni so.

14. Ngbanga ti nyen la a yeke nzoni e gbu li nzoni na ndö ti aye so Nzapa acréé?

¹⁴ Use ni, e peut ti manda ye mingi na ndö ti Jéhovah tongana e gbu li na ndö ti aye so lo créé (Ps. 145:​9, 10). Ti vrai ni, gï ti bâ aye so ayeke na yâ ti dunia alingbi ape. Ambeni zo amû fini ti ala kue ti manda ye na ndö ti aye so ayeke na yâ ti dunia. Me ala hinga apendere sarango ye ti Jéhovah ape wala ala hinga même ape so lo yeke dä. Bazengele Paul atene so “asarango ye ti terê ti Nzapa so lê abâ ni pëpe asigi polele ngbene ye so a leke dunia ti ga na ni, ngbanga ti so a bâ ni na lege ti aye so lo sara”. (aRom. 1:20). Mbeni Bible akiri na peko ti versê so atene: “Mbeni zo so agbu li ti lo nzoni apeut ti bâ apendere sarango ye ti terê ti Nzapa.” Tongaso, e ye ti mû ngoi ti gbu li na ndö ti apendere ye so Nzapa acréé nga ti bâ ye so afa na e na ndö ti lo.

15. Nyen la Patrick asara ti gi ti hinga Jéhovah nzoni? Tongana nyen la mo peut ti mû tapande ti lo? (Bâ nga foto.)

¹⁵ Mingi ti e alango na yâ ti agbata so ayo na akeke, afleur nga na anyama. Tongana mo yeke lango na yâ ti mbeni gbata, eskê mo peut ti manda ye na ndö ti Jéhovah na lege ti aye so lo créé? Bâ tapande ti Patrick so ayeke na Brazzaville, mbeni kota gbata na République du Congo. Lo tene: “Lâ oko oko, mbi yeke gi ti bâ mbeni ye so Jéhovah acréé. Fani mingi, mbi yeke bâ akete kete nyama wala akete ndeke so ayeke gi kobe wala ndo ti lango. Mbeni lâ, mbi bâ ambeni ndeke so ayeke leke da ti ala, ala yeke gue ayo ape si ala wara aye ti lekengo na da ni. Aye so ala wara a-aidé ala ti leke mbeni da ndali ti akete ni.” Me Patrick angbâ ge ape. Lo gbu li mingi na ndö ti Lo so acréé lo. Lo tene: “Mbi manda so Jéhovah ayeke pensé na nzoni duti ti aye so lo créé même ati so ayeke ye oko ape. Ye so afa na mbi so lo yeke bâ nga lege ti mbi nga lo yeke ngbâ ti mû na mbi aye so mbi bezoin ni.”

16. Nyen la a-aidé lani Marie mama ti Jésus ti gi ti hinga Jéhovah nzoni mingi? Tongana nyen la e peut ti mû tapande ti lo? (Bâ nga foto.)

¹⁶ Ota ye so e peut ti sara ti gi ti hinga Jéhovah nzoni ayeke ti gbu li na ndö ti aye so lo sara ndali ti e. A yeke ye so Marie mama ti Jésus asara lani. Lo hinga lani Jéhovah nzoni awe na “Nzapa abâ lo na nzoni lê”. (Luc 1:30). Me na pekoni Nzapa amû na lo mbeni kota kua so ayeke ti duti mama ti Molenge ti lo. Na lege ti ange Gabriel nga na fami ti lo Élisabeth, Jéhovah akpengba lo nga lo dë bê ti lo. Na pekoni, lo gbu li na ndö ti aye so lo vivre ni so afa na lo so Jéhovah ayeke na ngangu mingi, lo yeke sara ye na nzoni bê, lo sara kangbi na popo ti azo ape nga lo yeke pensé même na azo so a bâ ala tongana ambumbuse zo (Luc 1:​46-55). Marie akiri lani singila na Nzapa so a-aidé lo. E nga kue e yeke kiri singila na Jéhovah tongana lo aidé e “na tâ ngoi ni.” (aHéb. 4:16). Tongana lo aidé mo, hunda terê ti mo: ‘Ye so afa na mbi nyen na ndö ti Jéhovah? Asarango ye ti lo wa la mbi bâ na yâ ti ye so asi so?’

E YEKE NGBÂ ANDE LAKUE TI MANDA YE

17-18. Ngbanga ti nyen la e peut ti tene so e yeke ngbâ ande lakue ti manda ye na ndö ti Jéhovah?

¹⁷ Gbu li na ndö ti gbâ ti aye so e yeke manda ande na ndö ti Jéhovah na yâ ti fini dunia. E yeke wara ande afini rouleau so afa na e aye so lo ye ti tene e sara (Apoc. 20:12). E yeke manda ande aye mingi na ndö ti lo na lege ti aye so lo créé (És. 11:​6-9). Nga e yeke hinga ande encore Babâ ti e nzoni mingi na lege ti afini ye so lo yeke sara, na tapande na ngoi so lo yeke zingo azo so e ye ala mingi na kuâ nga na ngoi so e yeke bâ tongana nyen la lo yeke aidé e ti ga mbilimbili-kue.

¹⁸ E yeke ngbâ ande lakue ti gi ti hinga Jéhovah. Lo yeke dä a ninga mingi awe nga “zo alingbi pëpe ti hinga kota ti hingango ndo ti lo.” (Ps. 90:2; 147:5). E ‘lingbi lâ oko pëpe ti hinga kua so tâ Nzapa asara, ti londo na tongo nda ni juska na ngoi so lo hunzi ni.’ (Zo-ti. 3:11). Tongaso, atâa e yeke sara na Jéhovah asara ngu oke, e kue e ye ti gbu alege kue so azi na e ti manda ye mingi na ndö ti Babâ ti e so aye e mingi.