Aidé azo so mo yeke manda Bible na ala ti mû desizion ti sara na Jéhovah

1-2. (a) Ngbanga ti nyen la ambeni zo so ayeke manda Bible ayeke sara mbeto ti sara achangement ti sara na Jéhovah? (b) Nyen la e yeke bâ na yâ ti article so?

ESKÊ ambeni ye ayeke lani dä so mo gi bê ti mo na ndö ni so akanga lege na mo ti ga Témoin ti Jéhovah? Peut-être mo sara lani mbeto ti tene amba ti mo ti place ti kua, akamarade ti mo wala afami ti mo asara ngonzo na terê ti mo. Wala peut-être mo bâ lani so a yeke duti ngangu na mo ti mä yanga ti Jéhovah na yâ ti aye kue. Tongana mo pensé lani tongaso, mo peut ti bâ mawa ti azo so ayeke manda Bible so asara mbeto ti sara na Jéhovah.

² Jésus ahinga lani so mara ti aye tongaso apeut ti kanga lege na mbeni zo ti sara na Jéhovah (Mat. 13:​20-22). Me lo ngbâ lani ti gi ti aidé azo so asara mbeto ti mû peko ti lo. Lo fa lani na adisciple ti lo tongana nyen ti aidé mara ti azo tongaso (1) ti hinga aye so akanga lege na ala ti gue na li ni, (2) ti ye Jéhovah mingi, (3) ti changé aye so ayeke kota ye na lê ti ala nga (4) ti hon ndö ti akpale so ala wara. Na ngoi so e yeke sara kua na buku Ngbâ na fini lakue lakue!, tongana nyen la e peut ti sara ye alingbi na ye so Jésus afa na adisciple ti lo ti aidé mbeni zo so ayeke manda Bible ti sara na Jéhovah?

AIDÉ ZO SO MO YEKE MANDA BIBLE NA LO TI HINGA AYE SO AKANGA LEGE NA LO TI GUE NA LI NI

3. Peut-être nyen la akanga lani lege na Nicodème ti ga disciple ti Jésus?

³ Nicodème, mbeni Juif so ayeke mokonzi so iri ti lo awu mingi, awara lani mbeni kpale so akanga lege na lo ti ga disciple ti Jésus. Gï nze omene na peko ti so Jésus akomanse ti fa tënë, Nicodème ahinga so Nzapa la atokua lo (Jean 3:​1, 2). Me “mbeto ti aJuif asara” Nicodème na lo soro ti gue ti bâ Jésus na hondengo ni (Jean 7:13; 12:42). Peut-être lo pensé lani so lo yeke perdre aye mingi tongana lo ga disciple ti Jésus.a

4. Tongana nyen la Jésus a-aidé Nicodème ti hinga ye so Nzapa aye ti tene lo sara?

⁴ Nicodème ahinga lani Ndia, me lo bezoin lani ti tene a aidé lo ti comprendre ye so Jéhovah aye ti tene lo sara. Jésus a-aidé lo lani tongana nyen? Jésus ayeke lani nduru ti mû ngoi ti sara lisoro na lo même na bï. Na Jésus afa na lo polele aye so lo doit ti sara ti ga disciple: lo doit ti changé bê ti lo, ti wara batême ti ngu nga ti mä na bê na Molenge ti Nzapa.—Jean 3:​5, 14-21.

5. Tongana nyen la e peut ti aidé mbeni zo so e yeke manda Bible na lo ti hinga aye so akanga lege na lo ti gue na li ni?

⁵ Même tongana mbeni zo amä yâ ti aversê ti Bible nzoni, peut-être lo bezoin ti tene a aidé lo ti hinga aye so akanga lege na lo ti gue na li ni. Na tapande, kua ti nginza ti lo apeut ti mû ngoi ti lo mingi wala afami ti lo apeut ti ke ti tene lo ga Témoin ti Jéhovah. Tongaso, mû ngoi ti sara lisoro na lo. Mo peut ti tisa lo ti tene mo na lo anyon café wala ala fono. Na angoi tongaso, lo peut ti fa na mo akpale ti lo. Wa lo ti sara achangement so lo doit ti sara ti zia ngia na bê ti mo ape me ti fa so lo ye Jéhovah.

6. Tongana nyen la mo peut ti aidé mbeni zo so ayeke manda Bible ti wara ngangu ti sara ye alingbi na aye so lo manda? (1 aCorinthien 16:13).

⁶ Tongana mbeni zo so ayeke manda Bible ayeke sûr so Jéhovah ayeke aidé lo ti sara ye alingbi na aye so Bible ahunda, lo yeke wara ngangu ti sara ye alingbi na aye so lo yeke manda. (Diko 1 aCorinthien 16:13.) A peut ti haka kua so mo yeke sara na ti mbeni wafango mbeti. Na ngoi so mo yeke sara lani ekole, wafango mbeti wa la mo ye lo mingi? Peut-être a yeke lo so lo kanga bê lo aidé mo ti hinga so mo peut ti sara aye so mo doit ti sara. Legeoko nga, zo so ahinga ti fa ye nzoni na zo na ndö ti Bible ayeke fa na zo aye so Nzapa aye ti tene lo sara nga lo yeke tene na lo so na mungo maboko ti Jéhovah lo peut ti sara achangement so lo doit ti sara. Mo peut ti sara ni tongana nyen?

AIDÉ ZO SO MO YEKE MANDA BIBLE NA LO TI YE JÉHOVAH MINGI

7. Tongana nyen la Jésus a-aidé azo so amä lo ti ye Jéhovah mingi?

⁷ Jésus ahinga lani so tongana mbeni zo aye Nzapa, lo yeke sara ye alingbi na aye so lo yeke manda. Mingi ni, lo fa na adisciple ti lo aye so ayeke aidé ala ti ye Babâ ti ala ti yayu mingi. Na tapande, lo haka Jéhovah na mbeni koli so ayeke mû anzoni ye na amolenge ti lo (Mat. 7:​9-11). Peut-être ambeni zo so ayeke mä lani Jésus ayeke na babâ so aye ala tongaso ape. Imaginé tënë ti bê ti ala na ngoi so Jésus afa na ala mbaï ti mbeni babâ ti ndoye so ayamba molenge ti lo ti koli na peko ti so lo sara gbâ ti asioni ye. Ala peut ti bâ so Jéhovah ayeke bâ mawa ti amolenge ti lo so ayeke na sese.—Luc 15:​20-24.

8. Tongana nyen la mo peut ti aidé mbeni zo so ayeke manda Bible ti ye Jéhovah mingi?

⁸ Mo peut ti aidé mbeni zo so ayeke manda Bible ti ye Jéhovah mingi tongana mo sara tënë mingi na ndö ti asarango ye ti Nzapa na ngoi so mo yeke fa ye na lo. Na ngoi ti mandango ye oko oko, aidé lo ti sara kamba na popo ti aye so lo yeke manda na ndoye ti Jéhovah. Na ngoi so ala yeke sara lisoro na ndö ti ye so a futa ti zi azo, aidé lo ti comprendre so a bâ nga lo (aRom. 5:8; 1 Jean 4:10). Tongana mbeni zo so ayeke manda Bible acomprendre so Jéhovah aye lo mingi, a peut ti aidé lo ti ye nga Jéhovah mingi.—aGal. 2:20.

9. Nyen la a-aidé mbeni koli so iri ti lo Michaël ti sara achangement?

⁹ Bâ tapande ti Michaël so ayeke na Indonésie. Na ngoi so lo yeke kono lo manda tâ tënë, me lo wara batême ape. Na ngu 18, lo gue na kodro-wande ti kpe na akota oto. Ambeni ngoi na pekoni lo sara mariage, me lo zia sewa ti lo, lo gue na kodro-wande ti ngbâ ti sara kua ni. Na ngoi ni so, wali ti lo nga na molenge ti lo ti wali akomanse ti manda Bible nga ala komanse ti gue na li ni. Na peko ti so mama ti Michaël akui, lo kiri na kodro ti bâ lege ti babâ ti lo na lo yeda ti manda Bible. Na ngoi so ala yeke sara mbage “Gi ti hinga aye mingi” so ayeke na ye ti manda 27 ti buku Ngbâ na fini lakue lakue!, a ndu bê ti Michaël mingi. Tongana Michaël agbu li na ndö ti vundu so asara Jéhovah ti bâ Molenge ti Lo abâ pasi, lo komanse ti toto. Lo kiri singila mingi ndali ti ye so a futa ti zi azo, na bê ti lo apusu lo ti sara achangement na lo wara batême.

AIDÉ ZO SO MO YEKE MANDA BIBLE NA LO TI CHANGÉ AYE SO AYEKE KOTA YE NA LÊ TI LO

10. Tongana nyen la Jésus a-aidé akozo disciple ti lo ti changé aye so ayeke kota ye na lê ti ala? (Luc 5:​5-11). (Bâ nga foto.)

¹⁰ Akozo disciple ti Jésus ahinga lani hio so lo yeke Messie so Nzapa amû zendo ti lo, me ala bezoin lani ti tene lo aidé ala ti zia kua ti fango tënë na kozo ndo. Na ngoi so Jésus atisa lani Pierre na André ti mû peko ti lo teti lakue lakue, ala yeke lani adisciple a sara ambeni ngoi awe (Mat. 4:​18, 19). Ala yeke sara lani kua ti gingo susu legeoko na Jacques na Jean na ala wara nginza dä mingi (Marc 1:​16-20). Na ngoi so Pierre na André ‘azia agbanda’ ti ala, peut-être ala leke lani mbeni ye so ayeke aidé ala ti bâ lege ti sewa ti ala na ngoi so ala yeke mû peko ti Jésus. Nyen la apusu lani ala ti changé aye so ayeke kota ye na lê ti ala? Mbaï so ayeke na Luc afa na e so Jésus asara mbeni miracle so asara si ala yeke na confiance mingi so Jéhovah ayeke na ngangu ti bâ lege ti ala.—Diko Luc 5:​5-11.

11. Tongana nyen la e peut ti sara kua na aye so asi na e ti kpengba mabe ti zo so e yeke manda Bible na lo?

¹¹ E peut ti sara miracle tongana ti so Jésus asara lani ape, me e peut ti fa tongana nyen la Jéhovah amû maboko na azo so azia lo na kozo ndo. Na tapande, eskê mo dabe ti mo na aye so Jéhovah asara ti aidé mo na ngoi so mo komanse ti ga na abungbi? Peut-être mo doit lani ti fa na patron ti mo ndani so mo doit ti hunzi kua hio na alango ti bungbi. Na ngoi so mo yeke fa na zo so mo yeke manda Bible na lo aye so asi na mo, fa na lo tongana nyen la so Jéhovah a-aidé mo ti zia vorongo lo kozo, a kpengba mabe ti mo.

12. (a) Ngbanga ti nyen la a yeke nzoni ti tene e na aita nde nde e gue e sara étude ni? (b) Tongana nyen la mo peut ti sara kua na avidéo ti fa ye nzoni na zo so mo yeke manda Bible na lo? Fa mbeni tapande ni.

¹² A yeke nga nzoni ti tene ambeni ita afa na zo so mo yeke manda ye na lo tongana nyen la ala sara achangement ti zia Jéhovah kozo. Tongaso, tisa aita nde nde ti tene mo na ala ague asara étude ni. Hunda na ala ti fa tongana nyen la ala ga na yâ ti tâ tënë nga aye so ala sara ti zia kua ti Jéhovah kozo na yâ ti fini ti ala. Na ndö ni, mû ngoi ti tene mo na lo abâ avidéo so ayeke na mbage “Gi ti hinga aye mingi” wala ambeni so mo soro na mbage “Gi nda ti ye” na yâ ti buku Ngbâ na fini lakue lakue! Na tapande, na ngoi so ala yeke sara ye ti manda 37, mo peut ti sara tënë na ndö ti amama-ndia so ayeke na yâ ti vidéo Jéhovah ayeke mû ande na e aye so e yeke na bezoin ni.

AIDÉ ZO SO MO YEKE MANDA BIBLE NA LO TI HON NDÖ TI AKPALE

13. Tongana nyen la Jésus aleke lani adisciple ti lo ti ku na kangango lege?

¹³ Fani mingi Jésus atene na adisciple ti lo so azo ayeke kanga lege na ala, même afami ti ala (Mat. 5:11; 10:​22, 36). Kete kozo ti tene Jésus akui, lo tene na adisciple ti lo so a peut ti fâ ala ndali ti so ala voro Jéhovah (Mat. 24:9; Jean 15:20; 16:2). Lo wa ala ti sara hange na ngoi so ala yeke fa tënë. Lo wa nga ala ti papa pëpe na azo so ake ala nga ti sara ye na ndara tongaso si ala peut ti ngbâ ti fa tënë.

14. Tongana nyen la e peut ti aidé zo so e yeke manda Bible na lo ti leke terê ti lo ti ku na kangango lege? (2 Timothée 3:12).

¹⁴ E peut ti aidé zo so e yeke manda Bible na lo ti leke terê ti lo ti ku na kangango lege tongana e fa na lo atënë so amba ti lo ti place ti kua, akamarade ti lo nga na afami ti lo apeut ti tene na lo. (Diko 2 Timothée 3:12.) Ambeni mba ti lo ti place ti kua apeut ti he lo ndali ti fini fason so lo yeke vivre na ni. Ambeni zo nde, même avrai fami ti lo, apeut ti kasa lo ndali ti atënë ti Bible so lo mä na bê na ni. Tongana e leke lo hio, lo yeke hinga ye ti sara tongana a kanga lege na lo.

15. Nyen la apeut ti aidé mbeni zo so ayeke manda Bible ti gbu ngangu tongana afami ti lo akanga lege na lo?

¹⁵ Tongana afami ti zo so mo yeke manda Bible na lo akanga lege na lo, aidé lo ti gbu li na ndö ti ndani so bê ti ambeni fami ti lo ason. Ala peut ti pensé so a handa lo wala peut-être ala ke aTémoin ti Jéhovah senge senge. Même ambeni fami ti Jésus apensé lani so ye asara li ti lo (Marc 3:21; Jean 7:5). Fa na zo so mo yeke manda ye na lo ti kanga bê na azo, même na afami ti lo, nga ti sara tënë na ala na nzoni bê.

16. Tongana nyen la e peut ti aidé zo so e yeke manda Bible na lo ti fa atënë ti mabe ti lo na kode?

¹⁶ Même tongana mbeni fami aye ti hinga ye na ndö ti tâ tënë, a yeke nzoni ape ti tene zo so ayeke manda Bible agi ti fa gbâ ti aye na ndö ti tënë ni. Tongana lo sara tongaso, zo ni apeut ti comprendre aye ni kue ape na a peut ti sara si lo ke ti sara lisoro na lo na ndö ti aye so lo mä na bê na ni. Tongaso, wa lo ti sara tënë nduru si afami ti lo apeut ti yeda ti sara lisoro na lo mbeni lâ (aCol. 4:6). Lo peut ti tisa afami ti lo ti gue na ndö ti site jw.org. Ye so apeut ti aidé ala ti manda ye na ndö ti aTémoin ti Jéhovah na fason so ala ye.

17. Tongana nyen la mo peut ti fa na zo so mo yeke manda Bible na lo ti kiri tënë na ahunda so azo ayeke na ni na ndö ti aTémoin ti Jéhovah? (Bâ nga foto.)

¹⁷ Mo peut ti sara kua na molongo ti a-article “Atënë so azo ayeke hunda ka” so ayeke na ndö ti jw.org ti aidé zo so mo yeke manda Bible na lo ti kiri tënë nduru na ahunda so afami ti lo wala amba ti lo ti place ti kua apeut ti hunda (2 Tim. 2:​24, 25). Na hunzingo ti ye ti manda oko oko, sara lisoro na ndö ti mbage “Ambeni zo atene” na yâ ti buku Ngbâ na fini lakue lakue! Wa zo ni ti fa tongana nyen la lo yeke kiri tënë na azo na hunda ni so. Tongana bezoin ni ayeke dä, aidé lo ti fa na azo aye so lo mä na bê na ni na mbeni nzoni fason. Tongana lo tara terê ti lo tongaso, lo yeke fa aye so lo mä na bê na ni na azo sân mbeto.

18. Tongana nyen la mo peut ti wa zo so mo yeke manda Bible na lo ti fa tënë legeoko na congrégation? (Matthieu 10:27).

¹⁸ Jésus awa lani adisciple ti lo ti fa nzoni tënë na azo. (Diko Matthieu 10:27.) Tongana mbeni zo so ayeke manda Bible akomanse ti fa tënë ti mabe ti lo hio, hio lo yeke manda ti sara confiance na Jéhovah. Tongana nyen la mo peut ti aidé lo ti zia na gbele lo ti fa tënë? Tongana a leke mbeni kapa ti fango tënë na congrégation, na tapande kangbingo ambeti ti tisango ndo, wa lo ti gbu li na ndö ti aye so lo peut ti sara ti ga wafango tënë. Fa na lo ndani so azo mingi abâ so a yeke ngangu na ala ape ti komanse ti fa tënë na ngoi ti mara ti akapa tongaso. Mbeni ye so lo peut ti gi ti sara ayeke ti sara devoir na ngoi ti abungbi ti milieu ti yenga. Na ngoi so lo yeke gi ti sara ni, lo yeke hinga tongana nyen ti fa nda ti aye so lo mä na bê na ni nzoni.

SARA CONFIANCE NA ZO SO MO YEKE MANDA BIBLE NA LO

19. Tongana nyen la Jésus afa lani so lo sara confiance na adisciple ti lo? E peut ti mû tapande ti lo tongana nyen?

¹⁹ Kozo ti tene Jésus akui na lo gue na yayu, lo tene na adisciple ti lo so lo na ala ayeke kiri ande ti duti ndo oko. Ala comprendre lani ape so Jésus ayeke sara tënë ti guengo ti ala na yayu la. Atâa so adisciple ti Jésus acomprendre aye kue ape, lo hinga so ala ye ti mû peko ti lo (Jean 14:​1-5, 8). Lo hinga lani so ala bezoin ngoi ti mä yâ ti ambeni ye, na tapande beku ti guengo na yayu (Jean 16:12). E nga kue e peut ti duti na confiance so zo so e yeke manda Bible na lo aye ti zia ngia na bê ti Jéhovah.

20. Tongana nyen la mbeni ita-wali na Malawi afa so lo sara confiance na zo so lo yeke manda Bible na lo?

²⁰ E yeke ngbâ lakue ti duti na beku so zo so e yeke manda Bible na lo ayeke na nzara ti sara ye na lege ni. Bâ tapande ti Ita-wali Chifundo so ayeke na Malawi. Lo komanse lani ti manda Bible na yâ ti buku Ngbâ na fini lakue lakue! na mbeni maseka-wali so ayeke Catholique so iri ti lo Alinafe. Na ngoi so ala hunzi ye ti manda 14, Chifundo ahunda lo ye so lo pensé na ndö ti sarango kua na a-image ti voro na Nzapa. Ngonzo asara Alinafe na lo tene: “So desizion ti mbi la!” Chifundo apensé so Alinafe ayeke ke étude ni. Me lo kanga bê lo ngbâ ti sara étude na lo, lo yeke na beku so tongana angoi ayeke hon, lo yeke comprendre ande. Ambeni nze na pekoni, Chifundo ahunda na lo hunda so ayeke na yâ ti ye ti manda 34 so atene: “Tongana nyen la aye so mo manda na yâ ti Bible nga na ndö ti tâ Nzapa Jéhovah aga na mo aye ti nzoni?” Chifundo afa kiringo tënë ti Alinafe, lo tene: “Lo fa gbâ ti apendere ye so mbeni oko ayeke so aTémoin ayeke sara pëpe aye so Bible atene ayeke sioni.” Kete na pekoni, Alinafe azia ti sara kua na a-image na lo wara batême.

21. Tongana nyen la e peut ti mû maboko na zo so e yeke manda Bible na lo ti mû desizion ti sara na Jéhovah?

²¹ Atâa so Jéhovah la ayeke zo “so asara si ye ni akono”, kua ti e ayeke ti aidé zo so e yeke manda Bible na lo ti gue na li ni (1 aCor. 3:7). E yeke fa na lo aye so Nzapa aye ti tene lo sara, me a ngbâ gï ge ape. E yeke aidé lo ti ye Jéhovah mingi. E yeke wa nga lo ti fa so lo ye Jéhovah na lege so lo zia lo na kozo ndo. Nga e yeke tene na lo ti sara confiance na Jéhovah tongana lo wara akpale. Tongana e fa so e yeke na confiance so lo ye ti zia ngia na bê ti Jéhovah, lo yeke wara ngangu ti mû desizion ti sara na lo.