E oko oko kue e sara ngangu ti fa tënë ti kota bungbi ti district “E mû peko ti Christ!” E yeke kiri ti kangbi ambeti ti tisango ndo
1 Na ngu so ahon, kapa ti tisango ndo na kota bungbi ti district “A ga nduru ti zi e awe!” asara ngangu mingi na ndo ti azo so aye tënë ti Nzapa. Azo so ayeda na tisango ndo so aga abâ ti kozoni pendere matanga ti kobe ti yingo na popo ti aTémoin ti Jéhovah (Es. 65:13). Ala kangbi ngia ti e nga na dutingo beoko ti e ti aChrétien (Ps. 133:1). Ti mû maboko na azo ti ga na kota bungbi ti district “E mû peko ti Christ!”, e yeke kiri ti kangbi ambeti ti tisango ndo na ndo lê sese kue.
2 Aye so asi na ngu so ahon: Na lege ti atondo so e wara na ambage kue ti sese, aye ti nzoni mingi asi na ngoi ti kangbingo ambeti ti tisango ndo so. Na ando mingi, azo asara atënë ti gonda na ndo ti e. Na tapande, na mbeni gbata, mbeni mbeti-sango asara tënë mingi na ndo kapa ti kangbingo mbeti so, lo tene: “Ti ndu azo kue kozo na kota bungbi ni, aTémoin asara kua ngangu na yâ ti kodoro ni: ala fa tënë aninga, ala tambela ayo, ala sara tënë gi nduru.” Nzoni kode ti kangbingo mbeti ti tisango ndo so agboto lê ti azo ti mungo sango ti mbeni gbata, na apusu ala ti sara tënë mingi na ndo ni. Kozo na kota bungbi ni, mbeti-sango ota tongaso asara nzoni tënë na ndo kusala ti e. Mbeni wasungo sango asû atënë mingi na ndo ni ahon lembeti use ti mbeni mbeti-sango so ayeke sigigi ka na dimanche. Mbeti-sango so afa tënë ti aye so e mä na bê dä, songo so ayeke na popo ti e, kangbingo mbeti ti tisango ndo ni nga kota bungbi ni. Na ngoi so mbeni wafango tënë ayeke kangbi ni na mbeni da, zo ti da ni amû tënë na yanga ti lo, lo tene: “Ën, mbi mä tënë ni. Mbi ngbâ même fade ti diko tënë ni na yâ ti mbeti-sango!” Mbeni wali atene: “Mbi londo ti diko ye na ndo ti ala, na bâ ala la asi awe so! Ti mbi invitation ni la?” Na lo kiri lo tene: “So pendere ye la aTémoin ti Jéhovah asara so.”
3 A bâ azo mingi aga na kota bungbi so na mbeti ti tisango ndo ni na maboko ti ala. Ambeni alondo na agbata so ayo ti ga na abungbi ni. Ngangu so e sara ti tisa azo asara si azo mingi aga na kota bungbi ni. Na tapande, na yâ ti mbeni kodoro, tongana a mû azo 100, azo 27 aga na kota bungbi so ahon ti kota bungbi so a sara na ngu 2005.
4 Fango tënë na yâ ti territoire kue: Mo lingbi ti komanse ti kangbi ambeti ti tisango ndo ni yenga ota kozoni si kota bungbi ti mo ato nda ni. A yeke nzoni ti sara ngangu ti hunzi territoire ti kongregation kue. Na yâ ti akongregation so territoire ni akono mingi, awafango tënë alingbi ti zia mbeti ni (me na lê ti azo kirikiri pëpe) na azo so ayeke na yanga-da pëpe na ndangba yenga ni. A lingbi akongregation asara ngangu ti kangbi ambeti ti tisango ndo so kue, na ti hon na yâ ti territoire ti ala kue tongana lege ayeke dä. Apionnier alingbi ti sara kua na tanga ni.
5 Ye ti tene: Mo lingbi ti tene: “Na ndo sese kue, e yeke kangbi na ndembe so mbeni tisango ndo na mbeni kota bungbi so ayeke ga. Ti mo la. Tanga ti tënë ni ayeke na yâ ti mbeti ni.” Ti sara tënë nduru ayeke mû lege ti kangbi ambeti so mingi. Biani, tongana azo ni ayeke na mbeni tënë ti hunda, mû ngoi ti kiri tënë na ala. Tongana mo bâ so zo ni aye tënë ni, mû note na kiri hio ti bâ lo.
6 Bâ tongana nyen a yeke kota ye tongana e gi ti mû peko ti Christ! (Jean 3:36). Kota bungbi ti e ti district so ayeke ga ayeke mû ande maboko na azo kue so aga ti sara ni. Biani, e lingbi ti tene so fade mbeni kota fango tënë ayeke kiri ti tambela ndali ti ngangu so zo oko oko asara ti fa tënë ti kota bungbi ti e ti district “E mû peko ti Christ!” Tongaso, zia mo sara kue ti tisa azo mingi mingi ti ga. Zia Jéhovah airi tënë nzoni mingi na ndo ti ngangu so mo sara ti mû mbage na kota kapa ti fango tënë so aita ti mo kue ayeke sara na ndo sese.