Kamere dutegerezwa gukurikirana

“Ukurikirane ubugororotsi, ukwihebera Imana, ukwizera, urukundo, ukwihangana, [be n’]ubwitonzi.”​—1 TIM. 6:11.

1. Tanga uburorero bwerekana ico ijambo “gukurikirana” risobanura.

IYO wumvise ijambo “gukurikirana,” ni igiki uca ubona mu bwenge? Kumbure uca wibuka ivyabaye mu gihe ca Musa igihe ingabo z’Abanyamisiri ‘zoma inyuma’ Abisirayeli, ivyo bikaba ata kindi vyazishikanyeko atari ukubonera ku Kiyaga Gitukura ayo imbwa yaboneye ku mugezi. (Kuv. 14:23) Canke na ho woshobora guca wibuka akaga uwaba yishe umuntu kw’isanganya muri Isirayeli ya kera, yaca ajamwo. Yategerezwa guca yirukira adatebaganye muri kimwe mu bisagara bitandatu vy’ubuhungiro vyari vyarashinzwe. Ahandiho, “umuhōzi amukurikiye [yari guhava] amuhamvy[a] mu nzira akiratse, . . . akamwica.”​—Gus. 19:6.

2. (a) Imana yateye akamo abakirisu bamwebamwe ngo bakurikirane agashimwe akahe? (b) Ni icizigiro ikihe Yehova akomorera abakirisu benshi cane muri kino gihe?

² Mu buryo butandukanye n’ubwo burorero bwo muri Bibiliya buvuzwe aho haruguru, rimbura agatima keza intumwa Paulo yari afise. Yavuze ati: “Ndashishikara ngana kw’ihangiro ngo ndonke agashimwe k’ihamagarwa ryo kuduga twahamagawe n’Imana biciye kuri Kristu Yezu.” (Flp. 3:14) Bibiliya yerekana yuko abakirisu basizwe 144.000, na Paulo arimwo, ari bo baronka ako gashimwe ko kuba mw’ijuru. Bazofadikanya na Yezu Kristu gutegeka isi muri ya Ngoma yiwe y’imyaka igihumbi. Ese ukuntu uwo ari umugambi mwiza igitangaza Imana yateye akamo abo bantu ngo bakurikirane! Ariko rero, abakirisu b’ukuri benshi muri kino gihe bafise icizigiro, canke umugambi utandukanye n’uwo. Yehova abigiranye urukundo arabakomorera ico Adamu na Eva batakaje, ico na co kikaba ari icizigiro co kubaho ibihe bidahera mw’isi y’iparadizo, bafise amagara atagira agahaze.​—Ivyah. 7:4, 9; 21:1-4.

3. Twoshobora kwerekana gute ko dukenguruka ubuntu ata wari abukwiriye bw’Imana?

³ Abantu b’abanyabicumuro ntibashobora kwironsa ubuzima budahera biciye ku twigoro tudatunganye bagira kugira ngo bakore ibigororotse. (Yes. 64:6) Kuronka ubuzima budahera bishoboka gusa biciye ku kwizera intunganyo zirangwa urukundo zerekeye ubukiriro Imana yashizeho biciye kuri Yezu Kristu. None twokora iki kugira ngo twerekane ko dukenguruka ubwo buntu ata wari abukwiriye bw’Imana? Kimwe mu bintu twokora, ni ukwumvira iri tegeko rigira riti: “Ukurikirane ubugororotsi, ukwihebera Imana, ukwizera, urukundo, ukwihangana, [be n’]ubwitonzi.” (1 Tim. 6:11) Kurimbura ibijanye n’izo kamere vyoshobora gufasha umwumwe wese muri twebwe kwiyemeza kuguma “[a]rushiriza rwose” kuzikurikirana.​—1 Tes. 4:1.

“Ukurikirane ubugororotsi”

4. Ni kubera iki twokwemera tudakeka ko gukurikirana “ubugororotsi” bihambaye, kandi ni intambwe z’ishimikiro izihe umuntu ategerezwa kubanza gutera?

⁴ Mu makete yompi intumwa Paulo yandikiye Timoteyo, yaratondetse kamere zikwiye gukurikiranwa, kandi muri rimwerimwe ryose yatangura kuvuga “ubugororotsi.” (1 Tim. 6:11; 2 Tim. 2:22) Vyongeye, no mu bindi vyanditswe Bibiliya iraturemesha incuro n’izindi gukurikirana ubugororotsi. (Imig. 15:9; 21:21; Yes. 51:1) Uburyo bumwe twotangura kubigira ni mu ‘kuguma twironsa ubumenyi bwerekeye Imana yonyene y’ukuri, n’ubwerekeye uwo yatumye, Yezu Kristu.’ (Yoh. 17:3) Gukurikirana ubugororotsi biravyurira umuntu umutima wo kugira ico akoze, ni ukuvuga akihana ibicumuro yakoze muri kahise maze ‘agahindukira’ kugira ngo akore ivyo Imana igomba.​—Ibik. 3:19.

5. Ni igiki dutegerezwa gukora kugira ngo tugire impagararo nziza imbere y’Imana twongere tuyizigame?

⁵ Abantu amamiliyoni bariko barakurikirana vy’ukuri ubugororotsi muri kino gihe bareguriye Yehova ubuzima bwabo bongera baravyerekana mu kubatizwa mu mazi. Nimba umaze kuba umukirisu yabatijwe, woba urazirikana ku bijanye n’ukuntu uburyo ubayeho bukwiye kwerekana ko uguma ukurikirana ubugororotsi, canke ko bwoba buriko buravyerekana? Umuce umwe ubigaragaza ni ukuntu utahura “iciza n’ikibi” wisunze Bibiliya, igihe uba uhanganye no gufata ingingo mu buzima. (Soma Abaheburayo 5:14.) Nk’akarorero, nimba uri umukirisu w’umwirebange ageze kwubaka urwiwe, woba wariyemeje rwose kwirinda kugirana ubucuti ubwo ari bwo bwose burimwo ivy’ugukundana n’umuntu atari umukirisu yabatijwe? Nimba uriko urakurikirana ubugororotsi ivyo ni vyo ukwiye kugira.​—1 Kor. 7:39.

6. Gukurikirana vy’ukuri ubugororotsi bijamwo n’iki?

⁶ Kuba umugororotsi biratandukanye no kwibona ubugororotsi canke kuba “umugororotsi arengeje urugero.” (Umus. 7:16) Yezu yaratanze ingabisho yo kwirinda kwerekana mwene ubwo bugororotsi kugira ngo umuntu yiyerekane ko ari intore gusumba abandi. (Mat. 6:1) Gukurikirana vy’ukuri ubugororotsi birajamwo n’umutima, ni ukuvuga ugukosora ivyiyumviro bibi, agatima kabi, imvo mbi be n’ivyipfuzo bibi umuntu yoba afise. Mu gihe twobandanya kugira ico kintu, turashobora kudakora ibicumuro bikomakomeye. (Soma Imigani 4:23; gereranya na Yakobo 1:14, 15.) N’ikindi kandi, Yehova araduhezagira akongera akadufasha igihe dukurikirana izindi kamere za gikirisu zihambaye.

“Ukurikirane . . . ukwihebera Imana”

7. “Ukwihebera Imana” ni iki?

⁷ Ukwihebera ikintu birimwo ukuciyegurira wivuye inyuma no kutagihemukira namba. Igitabu kimwe c’inyizamvugo y’ivya Bibiliya kivuga yuko ijambo ry’ikigiriki ryahinduwe ngo “ukwihebera Imana” ridondora “guha agaciro cane ugutinya Imana, mu buryo bwiza kandi buranga ukuvyitwararika.” Abisirayeli barananiwe incuro nyinshi kugaragaza mwene ukwo kwihebera Imana, nk’uko bibonekera mu bikorwa vyabo vyaranga ukugambarara, ivyo bakoze mbere n’inyuma y’aho Imana ibakuriye mu buja barimwo mu Misiri.

8. (a) Igicumuro ca Adamu cavyuye ikibazo ikihe? (b) Inyishu y’iryo “banga ryeranda” yahishuwe gute?

⁸ Imyaka ibihumbi n’ibihumbi inyuma y’aho wa mugabo yari atunganye Adamu acumuriye, hari ikibazo kitari bwaronke inyishu, ico na co kikaba ari iki: “Ubwo hoba hari umuntu n’umwe yoshobora kugaragaza ukwihebera Imana kutagira agahaze?” Mu binjana n’ibindi vyahaciye, nta muntu n’umwe w’umucumuzi yashoboye kubaho afise ukwihebera Imana kutagira agahaze. Ariko igihe Yehova yashinze kigeze, yarahishuye inyishu y’iryo “banga ryeranda.” Yarimuye ubuzima bw’Umwana wiwe w’ikinege wo mw’ijuru abushira mu nda ya Mariya kugira ngo avuke ari umuntu atunganye. Mu kiringo cose c’ubuzima bwa Yezu bwo kw’isi, ushizemwo n’urupfu rumaramaje yishwe, yarerekanye ico bisobanura kwiyegurira Imana y’ukuri umuntu yivuye inyuma be no kuba intadohoka kuri yo bimwe bishitse. Amasengesho yatura yarerekana ko yatinya Se wiwe w’umunyarukundo wo mw’ijuru. (Mat. 11:25; Yoh. 12:27, 28) Ni co gituma Yehova yahumekeye Paulo kugira ngo avuge ivyerekeye “ukwihebera Imana” igihe yariko aradondora ibijanye n’ukuntu Yezu yabayeho mu buryo bw’intangakarorero.​—Soma 1 Timoteyo 3:16.

9. Twoshobora gute gukurikirana ukwihebera Imana?

⁹ Kubera yuko turi abanyabicumuro ntidushobora kugaragaza ukwihebera Imana kutagira agahaze. Yamara turashobora kugukurikirana. Ivyo bidusaba gukurikira neza uko bishoboka kwose akarorero ka Kristu. (1 Pet. 2:21) Muri ubwo buryo, ntituzoba nk’abantu b’abiyorobetsi, usanga “bafise ishusho y’ukwihebera Imana mugabo bakihakana ububasha bwakwo.” (2 Tim. 3:5) Ivyo ntibisobanura yuko ukwihebera Imana kw’ukuri ata co gusa gusana n’ukuntu tuboneka inyuma. Mu vy’ukuri birafitaniye isano. Nk’akarorero, twaba turiko duhitamwo impuzu yo kwambara ku bugeni canke iyo kwambara igihe tuba tugiye kugira utwo tuguze, ukuntu tuboneka bikwiye nantaryo kwama bihuza n’ivyo tuvuga ko “[du]tinya Imana.” (1 Tim. 2:9, 10) Ni vyo, ugukurikirana ukwihebera Imana bisaba ko mu buzima bwacu bwa misi yose twama twisunga ingingo mfatirwako zigororotse z’Imana.

“Ukurikirane . . . ukwizera”

10. Ni igiki dutegerezwa gukora kugira ngo ukwizera kwacu kugume gukomeye?

¹⁰ Soma Abaroma 10:17. Kugira ngo umukirisu agire ukwizera gukomeye yongere akuzigame, ategerezwa kuguma azirikana ku kuri kw’agaciro dusanga mw’Ijambo ry’Imana. Wa “mushumba w’umwizigirwa kandi w’ubwenge” yaraturonkeje ibisohokayandikiro vyinshi vyiza. Ibitabu bitatu bidasanzwe ni: Umuntu Ahambaye Kuruta Ababayeho Bose, Igira kuri wa Mwigisha Ahambaye be na “Viens, suis-moi” (‘Ingo unkurikire’), ivyo bikaba ari ibitabu bigenewe kudufasha kurushiriza kumenya Kristu, gutyo tugashobora kumwigana. (Mat. 24:45-47) Wa mugwi w’umushumba uratunganya kandi amakoraniro, amateraniro be n’amahwaniro, vyinshi muri ivyo bikaba bishimika kw’“ijambo ryerekeye Kristu.” Woba ubona uburyo butandukanye ushobora kurushiriza kwungukira kuri izo ntunganyo, uko “[witwararika] kuruta uko bisanzwe” ivyo Imana ituronsa?​—Heb. 2:1.

11. Isengesho be n’ukugamburuka bidufasha gute mu gukurikirana ukwizera?

¹¹ Isengesho ni ikindi kintu kidufasha gutsimbataza ukwizera gukomeye. Igihe kimwe abayoboke ba Yezu baramwinginze bati: “Twongerereze ukwizera.” Na twebwe turashobora kwinginga Imana nk’ukwo nyene twicishije bugufi. (Luka 17:5) Kugira ngo ivyo tubishikeko, turakwiye gusenga dusaba gufashwa n’impwemu nyeranda y’Imana, nakare ukwizera ni kimwe mu “vyamwa vy’impwemu.” (Gal. 5:22) N’ikindi kandi, kugamburuka amabwirizwa y’Imana birakomeza ukwizera kwacu. Nk’akarorero, twoshobora kugira akigoro ko kurushiriza kugira uruhara mu gikorwa co kwamamaza. Ivyo birashobora gutuma duhimbarwa cane. Kandi, uko tuzirikana ku mihezagiro turonka bivuye ku “[ku]banza kurondera ubwami n’ubugororotsi [bw’Imana],” ukwizera kwacu kurongerekana.​—Mat. 6:33.

“Ukurikirane . . . urukundo”

12, 13. (a) Ibwirizwa rishasha Yezu yatanze ni irihe? (b) Ni mu buryo buhambaye butari bumwe ubuhe dutegerezwa gukurikirana urukundo nk’urwa Kristu?

¹² Soma 1 Timoteyo 5:1, 2. Paulo yaratanze impanuro ngirakamaro mu bijanye n’ukuntu abakirisu bashobora kugaragarizanya urukundo. Ukuyobokera Imana kwacu gutegerezwa kujamwo ukugamburuka ibwirizwa rishasha Yezu yatanze ryo ‘gukundana’ nk’uko yadukunze. (Yoh. 13:34) Intumwa Yohani yavuze ati: “Uwo wese afise uburyo bwo kwibeshaho bwo muri iyi si akabona umuvukanyi wiwe ari mu mukeno yamara akamwugarirako umuryango w’impuhwe ziwe z’ikibabarwe, mbega urukundo rw’Imana ruguma muri we gute?” (1 Yoh. 3:17) Woba ushobora kwibuka ibiringo woba waragaragaje urukundo mu buryo buboneka?

¹³ Ubundi buryo dukurikirana urukundo ni mu kubabarira abandi, ntitugirire inzika abavukanyi bacu. (Soma 1 Yohani 4:20.) Nyabuna twipfuza gukurikiza iyi mpanuro yahumetswe igira iti: “Mushishikare kwihanganirana no kubabarirana ata gahigihigi iyo hari uwufise ico yidogera uwundi. Nk’uko na Yehova yabababariye ata gahigihigi, namwe nyene mugenze mutyo.” (Kol. 3:13) Hoba hari umuntu mw’ishengero woshobora kugirira ibivugwa muri iyo mpanuro? Ubwo none uzomubabarira?

“Ukurikirane . . . ukwihangana”

14. Ni igiki dushobora kwigira kw’ishengero ry’i Filadelufiya?

¹⁴ Usanga vyoroshe ko twihata kugira ngo dushike ku mugambi w’igihe gito, yamara ugasanga ari ibindi bindi igihe uwo mugambi utatworoheye gushikako canke udateye imbere nk’uko twari tuvyiteze. Biragaragara rero yuko ugukurikirana umugambi w’ubuzima budahera bisaba ukwihangana. Umukama Yezu yabwiye ishengero ry’i Filadelufiya ati: “Ko wagumije ivyo navuze ku bijanye n’ukwihangana, nanje nzokurinda isaha y’ukugeragezwa.” (Ivyah. 3:10; akajambo k’epfo muri Bible de référence.) Mu vy’ukuri, Yezu yarigishije ibijanye n’uko bikenewe kwihangana, iyo ikaba ari kamere idufasha kudateshwa ngo dute igihe tuba turi mu ngorane canke mu bigeragezo. Abavukanyi bo mw’ishengero ryo mu kinjana ca mbere ry’i Filadelufiya bategerezwa kuba baragaragaje ukwihangana kw’akarorero mu bintu vyinshi baciyemwo bigerageza ukwizera. Ni co gituma Yezu yabasubirije umutima mu nda ko yari kurushiriza kubafasha mu kiringo c’ikigeragezo gikomeye kuruta cariko kiraza.​—Luka 16:10.

15. Yezu yigishije iki ku bijanye n’ukwihangana?

¹⁵ Yezu yari azi yuko abayoboke biwe bokwanswe n’incuti zabo zitizera be n’abantu muri rusangi, akaba ari co gituma n’imiburiburi mu biringo bibiri yabaremesheje muri ubu buryo: “Uwihanganye gushika ku muhero ni we azokizwa.” (Mat. 10:22; 24:13) Yezu yarerekanye kandi ukuntu muri ico gihe abigishwa biwe bari gushobora kuronka inkomezi bari bakeneye kugira ngo bihangane. Mu kigereranyo kimwe, abantu “[bakirana ijambo ry’Imana] akanyamuneza” mugabo bagaca bagwa igihe baba bahuye n’ibigerageza ukwizera, yabagereranije n’isi y’igitandara. Ariko, abayoboke biwe b’abizigirwa bobo yabagereranije n’ivu ryiza kubera yuko ‘bagumya’ ijambo ry’Imana bakongera “bakama ivyamwa mu kwihangana.”​—Luka 8:13, 15.

16. Ni intunganyo iyihe iranga urukundo yafashije abantu amamiliyoni kwihangana?

¹⁶ Woba wabonye akabanga gatuma ushobora kwihangana? Dutegerezwa ‘kugumya’ ijambo ry’Imana, tugatuma riguma ari rizima mu mitima yacu be no mu mizirikanyi yacu. Kubera yuko dufise Impinduro y’isi nshasha, iyo ikaba ari impinduro ya Bibiliya itagira amakosa kandi yoroshe gusoma, iyiriko iraboneka mu ndimi ziguma zirushiriza kuba nyinshi, vyaratumye vyoroha kandi bishoboka kubishikako. Kuzirikana ku musi ku musi ku gihimba kinaka c’Ijambo ry’Imana bizodufasha kuronka inkomezi dukeneye kugira ngo twame ivyamwa “mu kwihangana.”​—Zab. 1:1, 2.

“Ukurikirane . . . ubwitonzi” be n’amahoro

17. (a) Ni kubera iki kugira “ubwitonzi” bihambaye cane? (b) Yezu yerekanye gute ko yari afise ubwitonzi?

¹⁷ Nta muntu n’umwe ahimbarwa no kwagirizwa ikintu atavuze canke atakoze. Abantu barakunze guca baharira barakaye igihe baba batyojejwe. Ese ukuntu birushiriza kuba vyiza iyo umuntu agaragaje “ubwitonzi”! (Soma Imigani 15:1.) Bisaba inkomezi nyinshi kugira ngo umuntu agume atekereje igihe aba ariko aratyozwa. Yezu Kristu yaradusigiye akarorero katagira agahaze muri ivyo. “Igihe yatukwa, ntiyasubizayo igitutsi. Igihe yababazwa, ntiyahiga, mugabo yaguma yiha umwe aca imanza mu bugororotsi.” (1 Pet. 2:23) Naho tutokwitega gukora nk’ivyo Yezu yakoze mu bijanye n’ivyo, ubwo ntitwokora uko dushoboye kwose kugira ngo twongerereze urugero tugezako mu kugaragaza ubwitonzi?

18. (a) Ubwitonzi bushikana ku vyiza ibihe? (b) Ni iyindi kamere iyihe duhimirizwa gukurikirana?

¹⁸ Mu kwigana akarorero ka Yezu, ese ‘twokwama nantaryo twiteguriye kuburanira’ ivyo twemera “[tubigiranye] ubwitonzi n’icubahiro kigera kure”! (1 Pet. 3:15) Ni vyo, igihe tubaye abantu bafise ubwitonzi birashobora gutuma ukutabona ibintu kumwe n’abantu tuba duhuye mu busuku canke n’abo dusangiye ukwizera kutavamwo ibihari bikomeye. (2 Tim. 2:24, 25) Ugutekereza kurashobora gutuma tugira amahoro. Ico ni co kumbure catumye mw’ikete rya kabiri Paulo yandikiye Timoteyo, ashira “amahoro” muri kamere dukwiye gukurikirana. (2 Tim. 2:22; gereranya na 1 Timoteyo 6:11.) Egome, “amahoro” ni iyindi kamere Ivyanditswe bituremesha gukurikirana.​—Zab. 34:14; Heb. 12:14.

19. Inyuma y’aho turimburiye kamere indwi za gikirisu, ni igiki wiyemeje gukurikirana, kandi kubera iki?

¹⁹ Twarimbuye muri make kamere indwi za gikirisu turemeshwa gukurikirana, izo na zo zikaba ari ubugororotsi, ukwihebera Imana, ukwizera, urukundo, ukwihangana, ubwitonzi be n’amahoro. Ese ukuntu aba ari umuhezagiro igihe mw’ishengero iryo ari ryo ryose abavukanyi n’abavukanyikazi bihatiye kugaragaza izo kamere z’igiciro, bakabigira mbere bimwe birushirije kuba ivyuzuye! Ivyo biratera iteka Yehova bikongera bikamuha akaryo ko kubumbabumba umwumwe wese muri twebwe ku bw’ugushemezwa kwiwe.

Ivyiyumviro vyo kuzirikanako

• Gukurikirana ubugororotsi be n’ukwihebera Imana birimwo iki?

• Ni igiki kizodufasha gukurikirana ukwizera be n’ukwihangana?

• Ni gute urukundo rukwiye kugira ico rukoze ku kuntu dufatana?

• Ni kubera iki dukeneye gukurikirana ubwitonzi be n’amahoro?

[Ifoto ku rup. 12]

Yezu yaratanze ingabisho yo kwirinda kugaragaza ubugororotsi kugira ngo umuntu atangaze abandi

[Ifoto ku rup. 13]

Turashobora gukurikirana ukwizera mu kuzirikana ku kuri kwo mw’Ijambo ry’Imana

[Ifoto ku rup. 15]

Turashobora gukurikirana urukundo be n’ubwitonzi