Ukwihangana Kwawe Nukwongereko Ukuyobokera Imana

“Ukwizera kwanyu mukwongerek[o] . . . kwihangana; ukwihangana mukwongereko k[uyoboker]a Imana.”​—2 PETERO 1:5, 6.

1, 2. (a) Ni ikura bwoko ki ryitegwa ku bijanye n’umwana? (b) Ikura ryo mu vy’impwemu rihambaye ku rugero rungana iki?

GUKURA birahambaye ku mwana, ariko si ugukura kwo mu buryo bw’umubiri kwitegwa gusa. Ugukura mu bwenge no mukanyengetera na kwo nyene kuritegwa. Haciye igihe, umwana araheba kwifata nk’uruyoya maze agakura agacika umugabo canke umugore akuze. Intumwa Paulo yavuga ivyo igihe yandika ati: “Igihe nari uruyoya, navuga nk’uruyoya, nkiyumvira nk’uruyoya, nkibwira nk’uruyoya; ariko ubu nacitse umugabo, narikuyeko [uturanga] tw’uruyoya.”​—1 Ab’i Korinto 13:11, NW.

² Amajambo ya Paulo arimwo iciyumviro gihambaye cerekeye ikura ryo mu vy’impwemu. Abakirisu barakeneye gukura, bakava ku kuba inzoya mu vy’impwemu bakaba “abakuze mu bubasha bwo gutahura.” (1 Ab’i Korinto 14:20, NW) Bakwiye kwihata, bakarondera gushika “ku rugezo rw’ubginshi bg’ukunengesera kwa Kristo.” Ico gihe ntibazoba ‘inzoya, ngo bazungazungishwe n’imipfunda, ngo bajanwe irya n’ino n’imiyaga yose y’inyigisho.’​—Abanyefeso 4:13, 14.

3, 4. (a) Dutegerezwa gukora iki kugira ducike abakuze mu buryo bw’impwemu? (b) Ni kamere zishimwa n’Imana izihe dukwiye kugaragaza, kandi zihambaye ku rugero rungana iki?

³ Dushobora gute kuba abakuze mu buryo bw’impwemu? Naho ikura ryo mu buryo bw’umubiri risa n’aho ryizana igihe ibintu vyifashe neza, ikura ryo mu vy’impwemu risaba ko hagirwa akigoro kitondewe. Ritangurira ku kwironsa ubumenyi ntagakosa bw’Ijambo ry’Imana no ku gukora ibihuye n’ivyo twiga. (Abaheburayo 5:14; 2 Petero 1:3) Ivyo na vyo biraheza bikadushoboza kugaragaza kamere zishimwa n’Imana. Nk’uko biri ku gukura kwo mu buryo bw’umubiri, na kamere zitandukanye zishimwa n’Imana kenshi na kenshi zikurira icarimwe. Intumwa Petero yanditse ati: “Ubganyu mushiruke umwete wose; ukwizera kwanyu mukwongerekw ingeso nziza; ingeso nziza muzongerek’ubgenge; ubgenge mubgongereko kwirinda; ukwirinda mukwongereko kwihangana; ukwihangana mukwongereko k[uyoboker]a Imana; uk[uyoboker]a Imana mukwongereko gukunda bene Data; ugukunda bene Data mukwongerek’urukundo.”​—2 Petero 1:5-7.

⁴ Kamere imwimwe yose Petero atondeka ni nkenerwa, kandi nta n’imwe ishobora guhara. Yongerako ati: “Namba mugira ivyo, bikagwira, bituma mutaba abanyabute cank’ingumba ku vyo kumenya neza Umwami wacu Yesu Kristo.” (2 Petero 1:8) Reka twitunire ku vy’uko bikenewe ko ukwihangana kwacu tukwongerako ukuyobokera Imana.

Ukwihangana Kurakenewe

5. Ni kuki dukeneye ukwihangana?

⁵ Petero na Paulo bompi barerekana isano riri hagati y’ukuyobokera Imana n’ukwihangana. (1 Timoteyo 6:11) Kuba uwufise ukwihangana ntibisigura gusa kwumirako mu gihe c’amagume be n’ukuguma ushikamye. Birimwo ukwiyumanganya, uburindutsi, ugushikama, ukudatakaza icizigiro igihe uhanganye n’ibigeragezo, intambamyi, inyosha mbi canke uruhamo. Kubera yuko tubaho “[tuyobokera] Imana [tu]ri muri Kristo Yesu,” turitega guhamwa. (2 Timoteyo 3:12) Dutegerezwa kwihangana niba tugomba kugaragaza ko dukunda Yehova, tugatsimbataza kandi kamere zikenewe kugira turonke ubukiriro. (Abaroma 5:3-5; 2 Timoteyo 4:7, 8; Yakobo 1:3, 4, 12) Tutagize ukwihangana, ntituzoronka ubuzima budahera.​—Abaroma 2:6, 7; Abaheburayo 10:36.

6. Kwihangana gushika kw’iherezo bisigura gukora iki?

⁶ Naho twoba twatanguye neza gute, impera n’imperuka ikiba gihambaye cane ni uko tugira ukwihangana. Yezu yavuze ati: “Uwihangana, agashitsa kw iherezo, ni we azokira.” (Matayo 24:13) Vyemere, dutegerezwa kwihangana gushika kw’iherezo, haba ari gushika kw’iherezo ry’ubuzima dufise ubu, canke kw’iherezo ry’uru runkwekwe rubi rw’ibintu. Ivyo ari ivyo vyose, dutegerezwa kuguma turi intadohoka ku Mana. Ariko rero, tutongeye ukuyobokera Imana ku kwihangana kwacu, ntidushobora guhimbara Yehova, kandi nta buzima budahera tuzoronka. Ariko none ukuyobokera Imana ni iki?

Ico Ukuyobokera Imana Gusobanura

7. Ukuyobokera Imana ni iki, kandi kudusunikira ku gukora iki?

⁷ Kuyobokera Imana ni ukwubaha bigera kure, ugusenga be n’umurimo umuntu arangurira Yehova Imana, ata guhemukira ukuba segaba w’ijuru n’isi kwiwe. Kugira ngo twimenyereze kuyobokera Yehova, turakeneye kumumenya bimwe bitagira agakosa no kumenya inzira ziwe. Dukwiye kwipfuza kumenya Imana ubwayo kandi neza. Ivyo bizodusunikira ku gutsimbataza urukundo tuyikunda ruvuye ku mutima, rugaragarira mu bikorwa dukora no mu buryo tubaho. Dukwiye kwipfuza kumera nka Yehova ukwo bishoboka kwose, ni ukuvuga kwigana inzira ziwe no kugaragaza kamere ziwe be n’ukuntu ameze. (Abanyefeso 5:1) Mu vy’ukuri, ukuyobokera Imana kuratuvyurira umutima wo kwipfuza kuyihimbara mu vyo dukora vyose.​—1 Ab’i Korinto 10:31.

8. Ni gute ukuyobokera Imana gufitaniye isano cane n’ukuyibandako?

⁸ Kugira tuyobokere Imana vy’ukuri, dutegerezwa gusenga Yehova wenyene musa, ntitureke ngo hagire ikindi kintu na kimwe kija mu kibanza afise mu mitima yacu. Kubera ko ari Umuremyi wacu, arakwiriye ko tumwibandako. (Gusubira mu Vyagezwe 4:24; Yesaya 42:8) Ariko rero, Yehova ntaduhata ngo tumusenge. Yipfuza ko tumwibandako bivuye ku mutima. Urukundo dukunda Imana rushingiye ku kuyimenya bimwe bitagira agakosa ni rwo rudusunikira ku gutyorora ubuzima bwacu no ku kuyiyegurira tutiziganya hanyuma tukabaho twisunga ukwo kwiyegura.

Nugiriranire Ubucuti n’Imana

9, 10. Dushobora gute gutsimbataza no kuzigama ubucuti bwa hafi tugiranira n’Imana?

⁹ Tumaze kugereranya ukwiyegurira Imana kwacu mu kubatizwa, tuba tugikeneye gutsimbataza ubucuti bwa hafi na yo. Icipfuzo dufise co kubigira no gusukurira Yehova turi abizerwa gica kidusunikira ku kubandanya twiga Ijambo ryiwe kandi tukarizirikanako. Uko tureka impwemu y’Imana igakorera mu mizirikanyi yacu n’imitima yacu, urukundo dukunda Yehova ruragera ibwina. Ubucuti tugirana na we burabandanya kuba co kintu gihambaye kuruta ibindi vyose mu buzima bwacu. Yehova tumubona ko ari we Mukunzi wacu pfampfe kandi tugashaka kwama tumuhimbara. (1 Yohana 5:3) Ukunezerererwa ubucuti bwacu bwiza dufitaniye n’Imana kurakura, maze tugakenguruka ivy’uko atwigisha, kandi akadukosora aho bikenewe abigiranye urukundo.​—Gusubira mu Vyagezwe 8:5.

¹⁰ Tutabandanije gutera intambwe zo gukomeza ubucuti bwacu bw’agaciro dufitaniye na Yehova, burashobora kugoyagoya. Igihe ivyo bishitse, ntiryoba ari ikosa ry’Imana, kuko “itari kure y’umuntu n’umwe muri twebge.” (Ivyakozwe 17:27) Ese ukuntu tunezererwa kubona Yehova adatuma ukumwegera biba ibigoye! (1 Yohana 5:14, 15) Ego ni ko dutegerezwa kwihata kugira tuzigame ubucuti bwa hafi dufitaniye na Yehova. Ariko rero, aradufasha kumwegera mu kudushiriraho intunganyo zose dukeneye kugira dutsimbataze twongere tuzigame ukuyobokera Imana. (Yakobo 4:8) Dushobora gukoresha gute bimwe vyuzuye izo ntunganyo ziranga urukundo?

Nugume Ukomeye mu Buryo bw’Impwemu

11. Ni uburyo bumwebumwe ubuhe dushobora guseruriramwo ukuyobokera Imana kwacu?

¹¹ Urukundo dukunda Imana rwashinze imizi ruzodusunikira ku kugaragaza aho tugeza mu kuyiyobokera, mu buryo buhuye n’impanuro ya Paulo igira iti: “Wame ugira umwete wo kwiha Imana nk’uwamaze kurama, umukozi atarinda gutētērwa, aramiriza neza mw ijambo ry’ukuri.” (2 Timoteyo 2:15) Ivyo kubigira bisaba ko tugumana akamenyero keza ko kwiga Bibiliya ubudahorereza, kwitaba amakoraniro no kugira uruhara mu busuku bwo mu ndimiro. Turashobora kandi kuguma twiyegereje Yehova mu ‘gusenga ubudasiba.’ (1 Ab’i Tesalonike 5:17) Ubwo ni uburyo buri n’ico buvuze bwo guserura ukuyobokera Imana kwacu. Gufata minenerwe kimwe conyene muri ivyo bishobora gutuma turwara mu vy’impwemu, kandi bigatuma twifatirwa n’imigabo ya Shetani.​—1 Petero 5:8.

12. Dushobora gute guhangana n’ibigeragezo tukererwa?

¹² Kuguma dukomeye mu buryo bw’impwemu kandi turi n’umwete na vyo nyene biradufasha guhangana n’ibigeragezo vyinshi bidusagiriza. Ibigeragezo vyoshobora kuva ku masoko ashobora kutugerageza bimwe bibabaza. Ukutanegwa ibintu, ukurwanywa, be n’uruhamo birashobora kurushiriza kugora kwihanganira igihe bituruka ku bantu ba hafi mu muryango, ku ncuti canke ku babanyi. Harashobora kwaduka imikazo yinyegeje yotuma tudohoka ku ngingo ngenderwako zacu za gikirisu ku kazi canke kw’ishure. Ugucika intege, indwara, canke intimba birashobora gutuma tugoyagoya mu buryo bw’umubiri maze bigatuma kwihanganira ibigerageza ukwizera birushiriza kugora. Ariko, turashobora guhangana n’ibigeragezo vyose tukererwa mu gihe dukomeye ku muheto “mu ngeso zera no mu k[uyoboker]a Imana, no mu kurereka ukuza kw’umusi w’Imana [t]uwuhahamiye.” (2 Petero 3:11, 12) Kandi tubigize gutyo, turashobora kuzigama umunezero wacu, tukizigira umuhezagiro w’Imana.​—Imigani 10:22.

13. Dutegerezwa gukora iki niba dushaka kuguma tuyobokera Imana?

¹³ Naho Shetani yerekeza ibitero vyiwe ku bayobokera Imana, ntidukwiye kuba abanyabwoba. Uti kuki? Kubera ko ‘Umwami Imana azi gukiza abamuyobokera ibibagerageza.’ (2 Petero 2:9) Kugira twihanganire ibigeragezo maze twironkere ukwo gukizwa, dutegerezwa “kwikunkumura ukutubaha Imana n’ukwifuza ivy’isi, . . . kwama tudahugumba, tugororoka, twubaha Imana, mu gihe ca none.” (Tito 2:12) Kubera ko turi Abakirisu, dutegerezwa kuba maso kugira ntihagire ubugoyagoye na bumwe burimwo ibikorwa be n’ivyipfuzo vy’umubiri bunyoha ukuyobokera Imana kwacu, maze bikagusambura. Nimuze ubu naho dusuzume zimwezimwe muri izo mbangamyi.

Uraba Maso ku Vyobangamira Ukuyobokera Imana

14. Dukwiye kwibuka iki niba dukwegakwezwe n’umutego w’amaronko?

¹⁴ Amaronko ni umutego ku bantu benshi. Turashobora mbere kwihenda, ‘twibwira yuko kuyobokera Imana ari ukwironkera inyungu z’ivy’amaronko.’ Gutyo, twoshobora kwubahuka kuriramwo mbege iyo abavukanyi dusangiye ukwizera bagaragaje ko batwizigira. (1 Timoteyo 6:5) Dushobora mbere gushika ku ciyumviro kitari co c’uko ari vyiza guhata Umukirisu yifise ngo aduhe ingurane tudashoboye kuriha. (Zaburi 37:21) Ariko, ukuyobokera Imana ni kwo “kuzana isezerano ry’ubu[zima] bga none n’ubuzoza,” si ukwironkera amaronko. (1 Timoteyo 4:8) Kubera ko ‘ata co twazanye mw’isi kandi ata co dushobora kuyivanamwo,’ nimuze twitwararike canecane ivy’ugukurikirana “[ukuyobokera] Imana gufatanije no kubūmbga n’ivy[o d]ufise,” maze ubwacu ‘tubumbwe n’ivyo turya n’ivyo twambara.’​—1 Timoteyo 6:6-11.

15. Dushobora gukora iki niba ugukurikirana ivy’ukwinezereza bigomba kunyoha ukuyobokera Imana kwacu?

¹⁵ Ugukurikirana ivy’ukwinezereza birashobora kunyoha ukuyobokera Imana. Vyoba bishoboka ko dukenera kugira ivyo duhinduye ningoga muri ivyo? Ego niko, hari ibintu bimwebimwe umuntu ashobora kwungukira ku myimenyerezo n’ukwiruhura vyo mu buryo bw’umubiri. Yamara rero, ivyo bintu ahungukira ni bito ubigereranije n’ubuzima budahera. (1 Yohana 2:25) Muri kino gihe, abantu benshi “bakunda ibibahimbara bakabirutisha Imana, bafise ishusho yo kwubaha Imana, ariko bahakana ubushobozi bgakwo,” kandi dukwiye kwirinda abantu nk’abo. (2 Timoteyo 3:4, 5) Abitunira ku kuyobokera Imana baba bariko “bībīkir[a] ubutunzi buzoba itanguriro ryiza mu gihe kizoza, kugira ngo bacakire ubu[zima] nyakuri.”​—1 Timoteyo 6:19.

16. Ni ivyipfuzo biranga icaha ibihe bibuza bamwebamwe kubaho bisunga ivyo Imana isaba bigororotse, kandi dushobora gute gutsinda ivyo vyipfuzo?

¹⁶ Ukwizizirwa n’inzoga be n’ibiyayura umutwe, ubushegabo n’ivyipfuzo biranga icaha birashobora gusambura ukuyobokera Imana kwacu. Kwisuka muri ivyo bintu birashobora kutubuza kubaho twisunga ivyo Imana isaba bigororotse. (1 Ab’i Korinto 6:9, 10; 2 Ab’i Korinto 7:1) Mbere na Paulo yategerejwe kwihanganira intambara y’urudaca arwana n’umubiri munyacaha. (Abaroma 7:21-25) Umuntu arakeneye gufata ingingo zikomeye kugira yikuremwo ivyipfuzo bibi. Kimwe coco ni uko dutegerezwa kwiyemeza kuguma tudahumanye mu vy’inyifato runtu. Paulo atubwira ati: “Mwice ingingo zanyu ziri mw isi, ubushakanyi, ibihumanya, ukwifuza kw’umubiri, ukwifuza kubi kwose, no kwifuza ivy’abandi, ni kwo gusenga ibigirwamana.” (Ab’i Kolosayi 3:5) Kwica ingingo zacu z’umubiri nko ku vyerekeye ibintu birimwo icaha nk’ivyo bisaba umwiyemezo kugira tuvyikuremwo. Gusengana ubwira dusaba ko Imana idufasha bizodushoboza kwikunkumura ivyipfuzo bibi vyongere bidufashe gukurikirana ubugororotsi be n’ukuyobokera Imana muri runo runkwekwe rubi rw’ibintu.

17. Dukwiye kubona gute ugutozwa indero?

¹⁷ Ugucika intege kurashobora gutuma ukwihangana kwacu kugoyagoya kandi kukagira ingaruka mbi ku kuyobokera Imana kwacu. Abenshi mu basavyi ba Yehova barashikiwe n’ugucika intege. (Guharūra 11:11-15; Ezira 4:4; Yona 4:3) Ugucika intege kurashobora canecane kutugirako ingaruka mbi mu gihe gufatanije n’ukwidoga kubera twumva ko twasuzuguwe canke twakangiriwe canke twatojejwe indero bimwe bikomeye. Ariko rero, ugukangirwa n’ugutozwa indero ni ikimenyamenya c’uko Imana itwitwararikana urukundo. (Abaheburayo 12:5-7, 10, 11) Ugutozwa indero ntigukwiye kubonwa gusa nk’igihano, ariko gukwiye kubonwa ko ari uburyo bwo kutumenyereza mu nzira y’ubugororotsi. Niba twicisha bugufi, tuzokenguruka twongere twemere impanuro, dutahure yuko “uguhana kw’ukwigisha ar’inzira y’ubu[zima].” (Imigani 6:23) Ivyo birashobora kudufasha kugira iterambere ryiza ryo mu vy’impwemu mu kubandanya tuyobokera Imana.

18. Ni ibanga irihe dufise ku bijanye n’udukosa dutoduto abandi batugirira?

¹⁸ Ukutumvikana n’abandi be n’udukosa dutoduto batugirira birashobora gutuma ukuyobokera Imana kwacu kuba urugamba. Bishobora gutuma umuntu ahagarika umutima canke bigatuma bamwebamwe batera intambwe itaranga ubukerebutsi yo kwigungira ukwabo bakikura ku bavukanyi be n’abavukanyikazi babo bo mu vy’impwemu. (Imigani 18:1) Ariko rero, ni vyiza ko twibuka yuko kubika inzigo canke kugirira abandi inzika bishobora kugira ingaruka mbi ku bucuti dufitaniye na Yehova. (Abalewi 19:18) Nkako, “ūdakunda mwene Data yabonye ntashobora gukunda Imana atābonye.” (1 Yohana 4:20) Muri ya Nsiguro yiwe yo ku Musozi, Yezu yarashimitse ku vy’uko bikenewe kwihutira gutera intambwe zo gutorera umuti ingorane zaduka hagati yacu. Yabwiye abamwumviriza ati: “Ni wajana ishikanwa ryawe ku gicaniro, ukahībukira ko har’ico upfa na mugenzawe, usige ishikanwa ryawe imbere y’igicaniro, ubanze ugende wikiranure na mugenzawe, uce ugaruka, ushikane ishikanwa ryawe.” (Matayo 5:23, 24) Gusaba imbabazi birashobora gufasha kuvura igikomere catewe n’amajambo canke ibikorwa bibabaza. Uruguma rurashobora gukira maze ubucuti burangwa amahoro bugasubira kugaruka niba dusavye imbabazi kandi tukemera ko twakoze ibintu mu buryo butabereye. Yezu yaratanze kandi iyindi mpanuro ku bijanye n’ugutorera umuti ingorane. (Matayo 18:15-17) Ese ukuntu tunezerwa igihe utwigoro two gutorera umuti ingorane twerewe!​—Abaroma 12:18; Abanyefeso 4:26, 27.

Nukurikire Akarorero ka Yezu

19. Ni kuki bihambaye cane kwigana akarorero ka Yezu?

¹⁹ Nta nkeka ibigeragezo bizodusagiriza, ariko ntibikwiye kudukevya ngo bidukure muri kwa gusiganirwa ubuzima budahera. Niwibuke ko Yehova ashobora kuturokora mu kigeragezo. Uko “twiyambur[a] ibituremēra vyose” kandi “[tuga]siganirw[a] ivyo twashizwe imbere twihanganye,” nimuze “duhan[g]e amaso Yezu, we ndongozi y’ukwemera kwacu akaba ari we akunogereza.” (Abaheburayo 12:1-3, UB) Gusuzuma twitonze akarorero ka Yezu kandi tukita ku rutare kugira tumwigane mu vyo tuvuga no mu vyo dukora, bizodufasha gutsimbataza ukuyobokera Imana no kubigaragaza ku rugero runini.

20. Ni izihe mpera ziva ku kuguma umuntu yihangana kandi ayobokera Imana?

²⁰ Ukwihangana kurafitaniye isano cane n’ukuyobokera Imana mu vyo kudufasha gutuma ubukiriro bwacu butaba umugani. Tugaragaje izo kamere z’agaciro, turashobora kubandanya kurangurana ubwizerwe umurimo wacu mweranda turangurira Imana. Mbere n’igihe twoba turi mu kigeragezo, tuzogira ubuhirwe uko twibonera urukundo rurangwa ikibabarwe be n’umuhezagiro vya Yehova kubera ko twihanganye tukaba kandi tugaragaza ko tuyobokera Imana. (Yakobo 5:11) Vyongeye, Yezu ubwiwe adukura amazinda ati: “Ukwihangana kwanyu ni kwo kuzotuma mukiza ubu[zima] bganyu.”​—Luka 21:19.

Wokwishura Gute?

• Ni kubera iki ukwihangana guhambaye?

• Ukuyobokera Imana ni iki, kandi guserurwa gute?

• Dushobora gute gutsimbataza no kuzigama ubucuti bwa hafi dufitaniye n’Imana?

• Ni ibintu bimwebimwe ibihe bishobora kubangamira ukuyobokera Imana kwacu, kandi dushobora kuvyirinda gute?

[Amafoto ku rup. 12, 13]

Ukuyobokera Imana kugaragazwa mu buryo bwinshi

[Amafoto ku rup. 14]

Uraba maso ku vyobangamira ukuyobokera Imana kwawe