Worwanya gute ibigusamaza?

1-2. Ikintu gihambaye coshobora gute gucika igisamaza?

NI RYARI uheruka kurwanya ikintu cari guhava kigusamaza? Kumbure ni igihe wariko urakora ikintu kanaka, maze hagaca hitamwo ikindi kintu kigusamaza, bica biba ngombwa ko uhitamwo igihambaye kuruta ikindi. Nk’akarorero, dufate ko uriko uratwara imodoka maze bagaca baguterefona. Naho boba bakurondereye ibintu vyihutirwa, uratahura ko kwitaba terefone uriko uratwara imodoka bishobora kugusamaza. Muri uwo mwanya, ikiba gihambaye ni ukubandanya utwara iyo modoka.

² Mu buzima bwa misi yose twama dufise ibintu bihambaye dutegerezwa gukora. Ariko kandi turazi ko gushira imbere ibikorwa vy’impwemua no kwubahiriza urutonde twishingiye bihambaye cane. (Mat. 6:33) Cokimwe rero n’abashoferi biyubara, abasavyi ba Yehova baragerageza kumenya ivyohava bibasamaza bigatuma badashira imbere ibihambaye kuruta.—Imig. 4:25; Mat. 6:22.

3. Kubera iki kurimbura iki cigwa biza kudufasha cane?

³ Nta n’umwe muri twebwe yipfuza kugira ivyomusamaza ku buryo adashira imbere ibikorwa vy’impwemu. Naho ari ukwo, twese turashikirwa n’ibintu bishobora kudusamaza bitagoranye. (Luka 21:​34-36) Kugira rero tugume dushira imbere gukorera Yehova, tugiye kurimbura (1) ibintu bishobora kudusamaza, (2) ukuntu Yezu yarwanije ivyari gushobora kumusamaza, (3) ukuntu natwe tworwanya ivyodusamaza.

NI IBIKI BISHOBORA KUDUSAMAZA?

4-6. Ni ibiki bishobora kudusamaza bitagoranye?

⁴ Twese turafise ibintu vyinshi tubwirizwa kwitwararika mu buzima. Nk’akarorero, dushobora kuba dufise ingorane z’amagara, ivyo twitwararika mu muryango canke ivyo twitwararika ku giti cacu. Ego ni ko ivyo bintu birahambaye, kandi dutegerezwa kuvyitwararika. Mugabo none, vyoba vyoshika bikadusamaza? Ego cane. Birashobora kudusamaza hamwe twoguma tuvyiyumvira kandi bikadutwara umwanya wacu wose n’inguvu zacu.

⁵ Uretse ivyo, abenshi muri twebwe turagirwako ingaruka n’ingorane z’ivya politike, iz’ivy’ubutunzi, ivyago vy’ivyaduka be n’indyane zidahera zo muri iyi si ya Shetani. (2 Tim. 3:1) Igihe dushikiwe n’ibintu nk’ivyo, turashobora kugira amaganya menshi ku buryo dusanga ata bindi twiyumvira atari izo ngorane gusa turimwo.

⁶ Ushobora kuba uzi abantu bashikiwe n’ibintu nk’ivyo bibabaje, bigatuma ubuzima bwabo buhinduka cane. Birumvikana ko batuntujwe cane n’ivyabashikiye, nakare Yehova ntiyaremye abantu kugira bagume bashikirwa n’ingorane zidahera. Ntibitangaje rero kubona bamwebamwe mu bashikirwa n’izo ngorane, baca biyumvira ko batazosubira kubaho nk’uko bavyipfuza. Ivyo bituma bamwebamwe baca bamara umwanya munini bariko barisamaza, kugira barabe ko bokwiyibagiza izo ngorane. None twokora iki dusanze ivyacu vyifashe gutyo? Reka turabe ivyo twokwigira kuri Yezu vyodufasha kurwanya ibintu vyotuma tudashira Yehova mu kibanza ca mbere.

YEZU YARWANIJE GUTE IVYARI GUSHOBORA KUMUSAMAZA?

7. Ni ibiki vyari gushobora gusamaza Yezu?

⁷ Yezu yari gushobora gusamazwa n’ibintu vyinshi, nk’ingorane zo mu kibano be n’ivya politike. Mu gihe ciwe abantu benshi bari bahanganye n’ubukene n’indwara. (Mat. 14:14; Mrk. 14:7) N’ikindi kandi, bararenganywa n’Abaroma be n’Abayuda bagenzi babo. Igihe rero abantu babona ko Yezu afise ububasha bwo gukora ibitangaro, baciye bipfuza kumugira umwami wabo. (Yoh. 6:​14, 15) Vyongeye, Shetani yaramugerageje mu kumwereka ko yari gushobora kuba umwami w’isi bitagoranye. (Mat. 4:​8, 9) Intumwa Petero na we, akaba yari umwe mu bagenzi somambike ba Yezu, igihe kimwe yamuremesheje kurondera kwiyorohereza mu kumubwira ati: «Ibabarire Mukama.»—Mat. 16:​21, 22, akajambo k’epfo.

8. Yezu yarwanije gute ivyari gushobora kumusamaza?

⁸ Yezu yarwanije gute ivyari gushobora kumusamaza? Yabigize mu buryo butatu. Ubwa mbere, yakora ibintu yisunze uko Yehova abibona. (Yoh 8:28; 14:9) Ubwa kabiri, yaguma yituniye ku gikorwa co kwamamaza no kwigisha. (Mat. 9:35) Ubwa gatatu, yaratahura neza ivyari bihambaye kuruta ibindi. (Yoh 4:34) Yarananiye ibigeragezo vya Shetani, aranka no kwoshwa n’iciyumviro Petero yari amubwiye co kwibabarira, naho ata mvo mbi yari abigiranye. (Mat. 4:10; 16:23) Vyongeye, Yezu ntiyemeye gusamazwa n’ivyo abantu bavuga, ivyo bakora, canke ivyo biyumvira, ngo bitume adashitsa ivyo Imana agomba. Naho ivyoshobora kudusamaza bitandukanye n’ivyari gusamaza Yezu, na twebwe dukoze ivyo bintu bitatu twoshobora gutsinda ibidusamaza.

TWORWANYA GUTE IBIDUSAMAZA?

9. Mu Banyefeso 5:17 haduhimiriza gukora iki, kandi twobigira gute?

⁹ Niwige kubona ibintu nk’uko Yehova abibona. Ivyo bizogufasha ‘kubandanya utahura ivyo Yehova agomba ivyo ari vyo.’ (Soma Abanyefeso 5:17.) Turashobora kumenya ibihimbara Yehova mu gusoma Ijambo ryiwe no mu kurizirikanako. Ivyo turakwiye kubigira mbere n’igihe ivyo turiko turasoma muri Bibiliya bitoba bihuye neza na neza n’uko ivyacu vyifashe. None twobigira gute? Igihe twiyigisha Bibiliya, turakwiye kurondera kumenya uko Yehova abona ibintu maze tukihatira kubibona nk’uko abibona.

10. Twokwiga gute kubona ibintu nk’uko Yehova abibona?

¹⁰ Turashobora kwiga kubona ibintu nk’uko Yehova abibona mu kwiyigisha Bibiliya no mu kuzirikana ku kuntu afata abantu. (Yer. 45:5) Igihe dusoma inkuru zo muri Bibiliya, turashobora kwibaza ibibazo nk’ibi: «Ibi binyigisha iki ku vyerekeye Yehova? Nobikoresha gute kugira ndushirize kubona ibintu nk’uko Yehova abibona?» Turazi ko ivyiyumviro vya Yehova biri hejuru cane y’ivyacu. (Yes. 55:9) Ni co gituma tumwitura mw’isengesho tumusaba ngo atwigishe gukora ivyo agomba. (Zab. 143:10) Vyongeye, turamwitura tumusaba ngo adufashe kurushiriza kubona ibintu nk’uko abibona.—1 Yoh 5:14.

11. Yehova atwipfuriza iki?

¹¹ Uko twiga kubona ibintu nk’uko Yehova abibona, turatahura ko yipfuza ko twirinda ibidusamaza kugira tugume twiteguriye iherezo ry’iyi si. (Mat. 24:44) Ntiyipfuza ko turengerwa n’amaganya. (Mat. 6:​31, 32) Ni co gituma yama yiteguriye kudufasha igihe cose tuba dufise amaganya ajanye n’amagara yacu, akazi dukora, aho dukika umusaya, canke ayajanye n’izindi ngorane zitwega ku giti cacu canke izo mu muryango. Kanatsinda, aradusaba kumwitura kugira tumusabe ubukerebutsi n’inkomezi bidufasha kwihanganira ingorane tuba turimwo.—Zab. 55:22; Imig. 3:​5-7.

12. Ni igiki codufasha kwihanganira amaganya aterwa n’ibiba mw’isi? (Matayo 5:3)

¹² Nugume ufise vyinshi ukora mu gikorwa c’Umukama. Twese birashika tukagira amaganya kubera ibintu biba mw’isi kandi akenshi usanga ata co dushoboye gukora kugira tubihagarike. Kugira rero twirinde gusamazwa n’ivyo tudashoboye guhindura, dukwiye kuguma dufise vyinshi dukora mu gikorwa c’Umukama. Ivyo bizotuma duhimbarwa kubera ko tuzoba turiko turitwararika ivyo dukeneye mu vy’impwemu, narirya Yehova yaturemanye ico cipfuzo. (Soma Matayo 5:3.) Kugira tubishikeko, bisaba ko twiga Ijambo ry’Imana Bibiliya kuko bidufasha kumenya neza Yehova. Turakwiye kandi gukora ivyo dushoboye vyose mu gikorwa ciwe ceranda. Ivyo nitwabigira, tuzotuma na Yehova anezerwa kubera ko tuzoba turiko turakoresha neza umwanya wacu.—Imig. 23:15.

13. Twokoresha neza gute umwanya wacu?

¹³ Twese abakirisu twipfuza ‘gukoresha neza umwanya wacu.’ (Ef. 5:​15, 16) Iyo mpanuro yo muri Bibiliya ntiyerekeza gusa ku kuntu twokoresha neza umwanya wacu mu bikorwa vya misi yose. Ahubwo iduhimiriza gusuzuma neza ingene dukoresha umwanya wacu, imbere y’uko Yehova akuraho iyi si ya Shetani. None twokoresha neza gute umwanya wacu? Hamwe twomara umwanya munini tuguma dukurikirana amakuru y’ibintu bibi biriko biraba, vyohava bidusamaza, bikaduca intege bikanatuma umwete twari dufise mu gikorwa ceranda ugabanuka. Icotubera ciza ni uko twokwishingira umwanya tutorenza turiko turaraba canke dusoma amakuru kanaka. Ivyo bituma twirinda kurengerwa n’amaganya kandi tugashobora gukora vyinshi mu gikorwa c’Umukama. Vyoba vyiza kandi tuzirikanye ingene twokwongereza umwete mu gikorwa co kwamamaza, nk’akarorero mu kugendera kenshi abo tuba twarayaze. Turatahura ko bihambaye cane kutagisha akaryo na kamwe turonse ko gufasha abantu kugira ‘bakizwe kandi bamenye neza ukuri.’ 1 Tim. 2:4.

14. Kuguma dufise vyinshi dukora mu gikorwa c’Umukama bidufasha gute? (Raba n’ifoto.)

¹⁴ Kuguma dufise vyinshi dukora mu gikorwa c’Umukama, biradufasha kudata umutwe kubera ibintu biba muri iki gihe. Nk’akarorero, igihe tubonye ingorane z’ivya politike n’iz’ivy’ubutunzi ziguma zongerekana, indwara z’ibiza na zo zikaguma zaduka, ntiduhagarika umutima cane. Turazi ko ari ubuhanuzi bwo muri Bibiliya buba buriko buraranguka. Aho kureka ngo ivyo bintu bitume dutekerwa n’ubwoba, turizigira tudakeka ivyo Yehova yadusezeraniye muri kazoza. Nitwaguma twizigiye ko Yehova azodufasha kwihangana bizotuma tuguma dutekanye.—Zab. 16:8; 112:​1, 6-8.

15. Kuba «abantu biyumvira neza» bidufasha gukora iki? (1 Petero 4:7)

¹⁵ Nugume wibuka ibihambaye kuruta ibindi ivyo ari vyo. Abantu benshi bo muri iyi si bashira imbere cane ivyo kwinezereza. Ntibigera bitaho ivy’uko umuhero w’iyi si wegereje. Naho kwinezereza atari bibi, turakwiye kuba «abantu biyumvira neza», kugira ntidutwarwe n’ukuntu isi ibona ibintu. (Soma 1 Petero 4:7.) None ivyo bisobanura iki? Bisobanura ko dukwiye kwiga kubona ibintu mu buryo bwiza, kugira ngo ntiturenze urugero mu bijanye no kwinezereza maze bitume dufata ingingo nziza. Gufata ingingo nziza bizokwerekana ko tubona ibintu nk’uko Yehova abibona kandi ko dutahura ibihambaye kuruta ibindi ivyo ari vyo.—2 Tim. 1:7.

16. Ni igiki cari kiraje ishinga cane Yezu igihe yari yimirije kwicwa?

¹⁶ Yezu yagumye yibuka ibihambaye kuruta ibindi ivyo ari vyo. Mu masaha agoye cane yamaze imbere y’uko yicwa, icari kimuraje ishinga kwari ukuguma ari intahemuka ku Mana no gushitsa ivyo igomba. Ni co gituma yaguma asenga cane. Abigishwa biwe bobo, ntibagumye bari maso nka Yezu. Ahubwo barasinziriye «kubera bari barembejwe n’intuntu.»—Luka 22:​39-46; Yoh 19:30.

17. Kubera iki abantu benshi bakunda gukoresha imbuga hwaniro, kandi zishobora gute kubasamaza? (Raba n’ifoto.)

¹⁷ Cokimwe n’abigishwa ba Yezu, vyoshobora gushika tugahagarika umutima. Ibiba muri iki gihe c’iherezo vyoshobora gutuma tugira amaganya. Ivyo bituma abantu benshi birukira imbuga hwaniro kugira biyibagize ingorane. Nk’akarorero, barakoresha izo mbuga mu kuyaga n’incuti n’abagenzi bari hirya no hino kw’isi, mu guhanahana amafoto, be n’ibindi. Barazikoresha kandi mu kumara umwanya munini bisamaza. Ikibabaje, ni uko abo bantu bashobora gutwarwa cane n’izo mbuga, bigatuma bahatakariza umwanya n’inguvu kubera baguma bakurikirana ibishasha biza birasohoka. Kugira rero natwe ntitugwe muri uwo mutego, turakwiye kwibaza duti: «Gukoresha imbuga hwaniro vyoba binduhura, canke biransamaza bigatuma ntabona ibihambaye kuruta ibindi?»

18. Kubera iki dukwiye kwiyubara igihe twisamaza?

¹⁸ Birahambaye kandi ko twiyubara igihe turaba amasinema, ibikino vy’amaseri bica kuri televiziyo, utuvidewo two ku mbuga zo kuri internet, canke igihe dukina udukino two mu buhinga bwa none (jeux vidéo). Naho ivyo bintu vyose usanga biryoshe kandi bishobora kuturuhura, turakwiye kwiyubara ku bijanye n’ivyo turaba be no ku mwanya dukoresha muri ukwo kwinezereza. Abatunganya mwene utwo tuvidewo baguma badusohora ku bwinshi, kandi usanga tumwe muri two twerekana ububisha canke ibiterasoni. Ivyo ni vyo vyashikiye umuvukanyi umwe wo muri Aziya. Yatanguye kuza araraba utuvidewo twerekana imponjo z’amasinema. Uko yaguma araba utuvidewo bamwereka, yasanze asigaye araba ibintu bitabereye. Amaherezo yaratanguye kuraba amasanamu y’ibiterasoni. Igishimishije ni uko abifashijwemwo n’abakurambere be n’abagenzi biwe somambike, yahavuye afata ingingo zikomeye. Zimwe muri zo, kwabaye ugukura muri telefone yiwe imbuga zimwezimwe no kugabanya umwanya yamara ayikoresha. Ivyashikiye uwo muvukanyi birerekana igituma bihambaye ko twiyubara igihe twinezereza.

19. Ni ibiki vyodushikira hamwe twotwarwa n’ivyo kwinezereza?

¹⁹ Turakeneye kandi kwiyubara igihe turi mu biringo vyo kwiruhura. Rimwe na rimwe, twese turakenera kuruhuka kuko bidufasha kugira amagara meza. Ariko dutwawe cane n’ivyo kwiruhura, vyoshobora kudusamaza ntitube tukironka umwanya wo gukora ibihambaye kuruta. (Flp. 1:10) Umwe wese ni we yifatira ingingo y’ivyo yokora mu kwiruhura be n’umwanya yomara ariko arabikora. Imbere rero yo gufata iyo ngingo, turakwiye kwibaza duti: «Umwanya mara mu vyo kwiruhura woba werekana ko ndi umuntu akoresha ubukerebutsi? Noba nerekana ko nshira imbere ibihambaye kuruta ibindi kandi ko ndiko nditegurira‘iherezo ry’ibintu vyose’?»

20. Kurwanya ibidusamaza bitugirira akamaro gute?

²⁰ Kurwanya ivyoshobora kudusamaza mu vy’impwemu biratugirira akamaro. (Yes. 48:17) Yehova aradufasha kwihanganira ingorane zidushikira mu buzima. Ibiriko biraba mw’isi ntibiduhungabanya. Vyongeye, ntidushingira ubuzima bwacu ku vyo kwiruhura. Nimuze rero tubandanye kubona ibintu nk’uko Yehova abibona, tugume dufise vyinshi dukora mu gikorwa ciwe kandi tugume twibuka ibihambaye kuruta ibindi ivyo ari vyo. Ivyo nitwabikora, tuzorwanya ibidusamaza twongere ‘ducakire ubuzima nyakuri.’—1 Tim. 6:19.