Nturambirwe no gukora ivyiza

INTUMWA PETERO yatanze impanuro igira iti: “Mugire ingeso nziza mu mahanga” (1 Petero 2:12). Ijambo ry’ikigiriki ryahinduwe ngo “nziza” ryerekeza ku kintu “giteye igomwe, kiranga imico myiza, giteye iteka, c’agahore”. Muri iki gihe tugezemwo, vyoshobora gusa n’ibidategereka na gato ko umuntu yitega ko abantu muri rusangi bagira inyifato iranga imico myiza kandi iteye iteka. Ariko rero, muri rusangi abasavyi ba Yehova muri iki gihe baragendera iyo mpanuro Petero yatanze. Nkako, kw’isi yose barazwi ko bafise ingeso nziza.

Ivyo birahambaye canecane turavye imikazo be n’amakuba bidushikira muri ibi “bihe bigoye” (2 Timoteyo 3:1). Ibigeragezo turamana imisi yose, kandi abarwanya ukubaho rukirisu usanga ari benshi. Bisubiye, naho ibigeragezo bimwebimwe bimara igihe gito, hari ibindi usanga bibandanya bidatezura, mbere bikanarushiriza gukomera. Naho bimeze gutyo, intumwa Paulo yadukebuye ati: “Twame dukora ivyiza, ntiducobogore, kukw igihe ni cashika tuzokwimbura, ni tutarambirwa” (Ab’i Galatiya 6:9). Ariko bishoboka bite ko umuntu akora ivyiza, mbere akaguma abikora, kandi ari mu bigeragezo bivuna umutima no mu rwanko rudahera?

Ivyogufasha gukora ivyiza

Biraboneka neza yuko kugira ‘imico myiza, kuba uwuteye iteka, kuba agahore’ vyerekeza ku muntu w’imbere, ni ukuvuga ukuntu umutima umeze. Kugira inyifato nziza rero igihe umuntu ari mu bigeragezo no mu ngorane ntibipfa kwizana, ahubwo bizanwa n’ukwama dukurikiza twongera tugendera ingingo ngenderwako zo muri Bibiliya mu mice yose y’ubuzima. Ibintu bimwebimwe bishobora kudufasha muri ivyo ni ibihe? Rimbura ibintu bikurikira.

Nutsimbataze inyifato yo mu mutima nk’iya Kirisitu. Bisaba ukwicisha bugufi kugira ngo umuntu yihanganire ibintu vyosa n’uko ari akarenganyo. Umuntu yiyumvira ko ari hejuru y’abandi bisa n’uko atokwihanganira gufatwa nabi. Ariko Yezu ‘yaricishije bugufi, aragamburuka no gushitsa ku rupfu’ (Ab’i Filipi 2:5, 8). Nitwamwigana ‘ntituzoruha canke ngo tudendebukirwe’ mu murimo mweranda turangura (Abaheburayo 12:2, 3). Niwimenyereze kugamburuka wicishije bugufi mu gusenyera ku mugozi umwe n’abaja imbere abandi mw’ishengero urimwo (Abaheburayo 13:17). Niwige kubona abandi nk’‘abakuruta’ mu gushira ivyabo imbere y’ivyawe.​—Ab’i Filipi 2:3, 4.

Niwibuke yuko Yehova agukunda. Dutegerezwa kujijuka yuko Yehova ‘ariho be n’uko aha impēra abamurondera’ badahengeshanya (Abaheburayo 11:6). Aratwitwararika bivuye ku mutima, kandi ashaka ko turonka ubuzima budahera (1 Timoteyo 2:4; 1 Petero 5:7). Kwibuka yuko ata na kimwe gishobora gukuraho urukundo Imana idukunda bizodufasha kudatana n’akabando igihe turi mu bigeragezo.​—Abaroma 8:38, 39.

Niwizigire Yehova uherezeko. Kwizigira Yehova birahambaye canecane igihe ibigeragezo bisa n’ibidahera canke igihe bisa n’ibigeramiye ubuzima bwacu. Dutegerezwa kwizigira tugaherezako yuko Yehova atazoreka ngo dushikirwe n’ikigeragezo ‘tutoshobora kwihanganira’, be n’uko azokwama ‘aducira icanzo’ (1 Ab’i Korinto 10:13). Mbere naho bodukangisha kutwica turashobora kuguma dufise umutima rugabo igihe twizigiye Yehova.​—2 Ab’i Korinto 1:8, 9.

Nushishikare gusenga. Isengesho rivuye ku mutima ni ngirakamaro (Abaroma 12:12). Isengesho rituwe ata buryarya ni bumwe mu buryo budufasha kwiyegereza Imana Yehova (Yakobo 4:8). Biciye ku vyo twiboneye, turazi yuko “iyo dusavye ikintu cose . . . , itwumva” (1 Yohana 5:14). Nimba Yehova aretse ngo ikigeragezo turimwo kibandanye kugerageza ukutadohoka kwacu, turamusaba ngo adufashe kucihanganira (Luka 22:41-43). Isengesho riradufasha kubona yuko tutigera tuba twenyene, ko tuzokwama dutahukana intsinzi kubera Yehova adushigikiye.​—Abaroma 8:31, 37.

Ibikorwa vyiza ‘biratera gushimagizwa be n’iteka’

Abakirisu bose rimwe na rimwe ‘barababazwa n’ibibagerageza vyinshi’. Ariko ntidukwiye ‘kurambirwa no gukora ivyiza’. Iyo uri mu mukazo, nukure inkomezi ku kumenya yuko bitebe bitebuke ukudahemuka kwawe ‘kuzogutera gushimagizwa be n’iteka’ (1 Petro 1:6, 7, UB). Niwungukire bimwe bishitse ku bintu vyose vyo mu buryo bw’impwemu Yehova yatunganije kugira ngo agukomeze. Igihe ukeneye kwitwararikwa ku ruhande rwawe, niwiture abakora igikorwa co kuragira, kwigisha no guhanura mw’ishengero rya gikirisu (Ivyakozwe 20:28). Niwame witaba amakoraniro yose y’ishengero, ayaduhimiriza ‘gukundana no gukora ibikorwa vyiza’ (Abaheburayo 10:24). Urutonde rwo gusoma Bibiliya ku musi ku musi no kwiyigisha ruzogufasha kwama urikanuye no kuguma ukomeye mu buryo bw’impwemu. Kwama ugira uruhara mu busuku bwa gikirisu na vyo nyene bizogukomeza.​—Zaburi 1:1-3; Matayo 24:14.

Uko uzorushiriza kwibonera urukundo Yehova agukunda be n’ingene akwitwararika, ni ko uzorushiriza kugirira ‘ishaka ibikorwa vyiza’ (Tito 2:14). Niwibuke yuko ‘uwihangana agashitsa kw’iherezo ari we azokira’ (Matayo 24:13). Emwe, niwiyemeze ‘kutarambirwa no gukora ivyiza’!

[Iciyumviro ku rup. 29]

Dutegerezwa kwizigira tugaherezako yuko Yehova atazoreka ngo dushikirwe n’ikigeragezo ‘tutoshobora kwihanganira’, be n’uko azokwama ‘aducira icanzo’

[Amafoto ku rup. 30]

Kuguma dufise vyinshi dukora mu mirimo ya gitewokarasi birashobora kudufasha kwitegurira guhangana n’ibigeragezo