Woba uzi agahimbare kazanwa n’ugutanga?
UWO mukirisukazi yari amaze imyaka yababa 50 ari umunyamwete mu murimo wa gikirisu. Naho imyaka yo mu zabukuru yari yatumye asigara ari magara make, yari yiyemeje kuja ku Ngoro y’Ubwami yari iherutse kwubakwa. Yifadikije ukuboko kw’umuvukanyi mukirisu yariko aramwandaza, yarinjiye muri nya ngoro maze agenda buhorobuhoro mugabo ari n’ahantu yerekeje. Uti hehe? Ku gasandugu k’intererano. Ashitse aho kari, yarashizemwo uduhera dukeyi yari amaze igihe aziganiriza uwo mugambi. Naho bitashoboka ko atanga inguvu ziwe mw’iyubakwa rya nya ngoro, yarashaka kugira ico afashije.
Uwo mukirisukazi yoshobora kukwibutsa uwundi mugore w’umwizerwa, uwo na we akaba ari wa “mupfakazi w’umworo” Yezu yitegereza ariko aterera udusenge tubiri mw’isandugu y’amahera yo ku rusengero. Ntitubwirwa ukuntu ivyiwe vyari vyifashe, mugabo kubaho ata munega muri ico gihe vyashobora gutuma umugore agira ingorane zikomeye mu vy’amahera. Nta mazinda yuko Yezu yamwumviye akagongwe, kubera yatahura bimwe bishitse ingorane yarimwo. Mu kumushemagiza bwa karorero ku bigishwa biwe, Yezu yavuze ko atanze “ivyo yar’afise vyose, n’ibimutunze vyose”.—Mariko 12:41-44.
Ni kubera iki umugore yibereye mu bukene nk’uwo mupfakazi w’umukene yagize akigoro nk’ako? Uca wumva yuko kwari kubera yari umuntu yibanda bimwe bikomeye kuri Yehova Imana, ahari ku ntimatima y’ugusenga Yehova hakaba hari ku rusengero rw’i Yeruzalemu. Naho atari ashoboye gukora vyinshi, yashaka guteza imbere umurimo mweranda. Kandi ategerezwa kuba yariyumvisemwo umunezero nyawo mu guterera ivyo yari ashoboye vyose.
Gutanga kugira ngo dushigikire igikorwa ca Yehova
Gutanga intererano z’ibintu vy’umubiri be n’amahera vyamye ari umuce ntahara w’ugusenga gutyoroye, kandi vyamye ari isôko ry’umunezero mwinshi (1 Ngoma 29:9). Muri Isirayeli ya kera, intererano ntizakoreshwa gusa mu gushariza urusengero, mugabo kandi zaranakoreshwa mu gutuma imice yose y’ugusenga Yehova yo kuri urwo rusengero iguma ikora ku musi ku musi. Ivyagezwe vyaravuga mu buryo butomoye yuko Abisirayeli bakwiye gutanga ikigira cumi c’ivyo bimbuye kugira ngo bashigikire Abalewi barangura ibikorwa vyo ku rusengero. Mugabo n’Abalewi bategerezwa guterera Yehova ikigira cumi c’ivyo baba baronse.—Guharūra 18:21-29.
Naho abakirisu bakuriweko ivyasabwa n’isezerano ry’Ivyagezwe, ingingo ngenderwako yasaba abasavyi b’Imana gutanga mu buryo bw’umubiri mu gushigikira ugusenga kw’ukuri ntiyigeze ihinduka (Ab’i Galatiya 5:1). Ikindi kandi, abakirisu bo mu kinjana ca mbere babona yuko ari ikintu giteye umunezero gutanga intererano zigenewe gutuma abavukanyi babo baronka ivyo baba bakeneye (Ivyakozwe 2:45, 46). Intumwa Paulo yaribukije abakirisu yuko, nk’uko nyene Imana yabaronkeje ibintu vyiza ititangiriye itama, ari ko na bo nyene bakwiye kugaragariza abandi ubutanzi bwa cane. Yanditse ati: “Wihanize abatunzi bo mu vy’iki gihe, boye kwibona, canke kwishimira ubutunzi butar’ubgo kwishimirwa, ariko bishimire Imana, iduha vyose bisēsekaye, ngo tubinezererwe; kandi bakore iciza, babe abatunzi ku bikorwa vyiza, babe abanyabuntu bakunda gutanga, bībīkire ubutunzi buzoba itanguriro ryiza mu gihe kizoza, kugira ngo bacakire ubugingo nyakuri” (1 Timoteyo 6:17-19; 2 Ab’i Korinto 9:11). Kukaba nkako, Paulo afatiye ku vyo yiboneye, yarashoboye kwemeza amajambo ya Yezu agira ati: “Gutanga kuzana [“agahimbare”, NW], kuruta guhabga”.—Ivyakozwe 20:35.
Ugutanga kw’abakirisu muri iki gihe
Muri iki gihe, abasavyi ba Yehova barabandanya gukoresha amatungo yabo kugira ngo bafashanye, no kugira ngo bashigikire igikorwa c’Imana. Mbere n’abafise uburyo buke baraterera ivyo bashoboye. “Wa mushumba w’umwizerwa kandi w’incabwenge” yiyumvamwo ko hari ico Yehova amubaza ku bijanye no gukoresha mu buryo bwiza kuruta bushoboka ayo mahera yose aba yatanzwe bwa ntererano (Matayo 24:45, NW). Ayo mahera arakoreshwa kugira ngo ibiro vy’amashami bikore neza, agakoreshwa ku bijanye n’uguhindura be n’ugucapura Bibiliya hamwe n’ibisohokayandikiro bishingiye kuri Bibiliya, mu kuringaniza imitororokano mininiminini ya gikirisu, mu kumenyereza no mu kurungika abacungezi b’ingenzi be n’abamisiyonari, mu gutabara abatewe n’ivyago, akongera agakoreshwa no mu yindi migambi myinshi ya nkenerwa. Reka twibande ku mugambi umwe muri mwene iyo: ni ukuvuga gufasha kugira ngo haboneke ibibanza vyo gusengeramwo.
Ivyabona vya Yehova barikoraniriza hamwe incuro nka zingahe mu ndwi mu Ngoro z’Ubwami z’iwabo kugira ngo bungukire ku nyigisho yo mu vy’impwemu no ku kwifatanya n’abandi kwiza. Ariko rero, mu bihugu vyinshi ivy’ubutunzi ntibikundira Ivyabona baho gutanga amahera yo kwubaka Ingoro z’Ubwami batabanje gusahirizwa. Kubera ico, mu 1999 Ivyabona vya Yehova baratanguje porogarama yo gukoresha amahera avuye mu bihugu bitunze gusumba mu gufasha mu vyo kwubaka Ingoro z’Ubwami mu bihugu bikenye gusumba. N’ikindi kandi, abantu ibihumbi n’ibihumbi bakora bavyishakiye baratanze umwanya wabo n’ubuhanga bwabo, akenshi bagakorera mu mihingo ya kure yo muri ivyo bihugu. Mu kiringo c’ubwubatsi, Ivyabona bo muri ivyo bihugu bariga ubuhanga bujanye no kwubaka be no kubungabunga inyubakwa, Ikigega kigenewe Ingoro z’Ubwami na co kigatuma bishoboka kugura ibikoresho bikenewe. Ivyabona bariko bakoresha izo ngoro nshasha ubu, barakenguruka rwose kubona abo basangiye ukwizera baratanze umwanya n’amahera. Ikindi kandi, ivyo Vyabona bubakiwe, baratanga intererano ku kwezi ku kwezi zo kubungabunga izo Ngoro z’Ubwami nshasha no gufasha kuriha ayatwawe n’ubwubatsi, gutyo bagafasha mu bijanye no kwubaka izindi Ngoro z’Ubwami.
Ingoro z’Ubwami zubakwa hakoreshejwe ubuhinga be n’ibikoresho vyo mu bihugu ziriko zirubakwamwo. Naho izo ngoro zitubakwa mu buryo buhanitse, usanga ziryoheye ijisho, ari ngirakamaro, kandi ziryoshe gukoraniramwo. Igihe iyo porogarama y’ubwubatsi yatangura mu 1999, ibihugu nka 40 bifise uburyo buke ni vyo vyashizwe ku rutonde ngo vyubakirwe. Kuva ico gihe, iyo porogarama y’ubwubatsi yaraguwe ishirwamwo ibihugu 116 nk’ivyo, birimwo ica kabiri kirenga c’amashengero y’Ivyabona vya Yehova kw’isi. Mu myaka itanu iheze, Ingoro z’Ubwami zirenga 9.000 zarubatswe biciye kuri iyo ndinganizo, ni ukuvuga incahagati y’ingoro nshasha zirenga 5 ku musi! Naho ibintu biri ukwo, muri ivyo bihugu 116, haracakenewe Ingoro z’Ubwami nshasha 14.500. Yehova niyahezagira, Ivyabona bo hirya no hino kw’isi na bo bakagira umutima ukunze kandi bagatanga batitangiriye itama, vyitezwe yuko hazoboneka amahera ahagije yo kwubaka izo ngoro zikenewe.—Zaburi 127:1.
Ingoro z’Ubwami ziratuma haba iyongerekana
None ako kigoro kadasanzwe kagize ingaruka iyihe ku Vyabona bo muri ivyo bihugu no ku gikorwa co kwamamaza Ubwami? Mu mihingo myinshi, usanga hariho iyongerekana riteye ubwoba ry’abitaba amakoraniro iyo Ingoro y’Ubwami nshasha ihejeje kwubakwa. Akarorero k’ivyo tugasanga muri iyi raporo yavuye mu Burundi: “Ingoro y’Ubwami bakimara kuyubaka, ica yuzura abantu. Nk’akarorero, hari Ingoro y’Ubwami yubakiwe ishengero ryari rifise incahagati y’abantu 100 bitaba amakoraniro. Ingoro y’Ubwami yabo nshasha ijamwo abantu 150 bicaye neza. Kuva igihe baheza kuyubaka, abantu 250 ni bo bari basigaye bitaba amakoraniro”.
Ni kubera iki haba iyongerekana nk’iryo? Imvo imwe ni uko imigwi y’abamamaji b’Ubwami badafise ikibanza bikoranirizamwo cemewe mugabo bategerezwa gukoranira munsi y’igiti canke mu gahinga, rimwe na rimwe usanga abantu babicura. Mu gihugu kimwe, bivugwa yuko ubukazi bushingiye ku vy’idini bugirwa n’utugwi dutoduto tw’ivy’idini, ari co gituma amategeko asaba ko amakoraniro yose y’ivy’idini agirirwa mu nzu yo gusengeramwo.
Kugira ingoro zabo bwite birafasha kandi Ivyabona vya Yehova kwereka ikibano ko atari abayoboke b’umupasitori munaka. Ibiro vy’ishami vyo muri Zimbabwe vyanditse biti: “Kera, abavukanyi bo muri aka karere bakoranira mu mazu y’abantu, maze abanyagihugu bo muri ako karere ugasanga iryo shengero baryitirira nyene inzu baba bikoranirizamwo. Wasanga bavuga ko nya bavukanyi bakukira ishengero ry’umushingantahe naka. Ivyo vyose biriko birahinduka ubu, kubera ko abantu babona ivyandiko vyerekana mu buryo butomoye yuko ingoro imwimwe yose ari ‘Ingoro y’Ubwami y’Ivyabona vya Yehova’”.
Abatanga banezerewe
Intumwa Paulo yanditse ati: “Imana ikunda ūtanga anezerewe” (2 Ab’i Korinto 9:7). Ego ni ko, intererano z’amahera menshi zirafasha cane. Mugabo igice kinini cane c’amahera atangwa ku bw’igikorwa c’Ivyabona vya Yehova, kiva mu dusandugu tw’intererano zigenewe Ingoro y’Ubwami. Intererano zose, zaba iz’amahera menshi canke makeyi, zirahambaye kandi nta wuzisuzugura. Uribuka ko Yezu yicaye aho yashobora kubona wa mupfakazi w’umworo atanga twa dusenge twiwe tubiri. Abamarayika na Yehova na bo nyene baramubonye. Ntitunazi mbere uko nya mupfakazi yitwa, mugabo Yehova yaritwararitse ivy’uko igikorwa ciwe kizira ubwikunzi candikwa muri Bibiliya ku bw’ibihe vyose.
Turetse ivy’uko intererano dutanga zifasha mu vyo kwubaka Ingoro z’Ubwami, zirashigikira kandi iyindi mice yose ya ca gikorwa gihambaye c’Ubwami. Gufasha muri ubwo buryo biraduha imvo zo kunezerwa no “[ku]rushirizaho gushimira Imana” (2 Abakorenti 9:12, UB). Abavukanyi bacu bakirisu bo mu gihugu ca Bénin batanga raporo igira iti: “Ku musi ku musi amasengesho menshi yo gukura ubwatsi araduga kuri Yehova ku bw’imfashanyo y’amahera yatanzwe n’ikivukano mpuzamakungu”. N’ikindi kandi, abo bose muri twebwe bagira uruhara mu vyo gushigikira igikorwa c’Ubwami mu gutanga amahera, bararonka agahimbare kazanwa n’ugutanga kwa gikirisu!
[Uruzitiro/Ifoto ku rup. 22, 23]
Uburyo butandukanye bamwebamwe bahitamwo mu gutanga
INTERERANO KU BW’IGIKORWA KIRANGURIRWA KW’ISI YOSE
Abenshi barashira ku ruhande amahera, canke bakabika igitigiri kinaka c’amahera bazoshira mu dusandugu tw’intererano twanditseko ngo “Intererano ku bw’igikorwa kirangurirwa kw’isi yose—Matayo 24:14.”
Ku kwezi ku kwezi, amashengero ararungika ayo mahera ku biro vy’Ivyabona vya Yehova bikorera ibihugu arimwo. Izo mfashanyo z’amahera zitangwa n’abavyishakiye zishobora no guca zirungikwa kuri Watch Tower Bible and Tract Society of Pennsylvania, bakazicisha ku Biro vy’Umunyamabanga akaba n’Umushingwabigega, kuri 25 Columbia Heights, Brooklyn, New York 11201-2483, canke ku biro vy’ishami rikorera mu gihugu iwanyu. Amasheki birashobora gushingwa ko ashikirizwa “Watch Tower”. Ibintu vyo mu mabuye y’agaciro canke ibindi bintu vy’agaciro na vyo nyene birashobora gutangwa. Ikete rigufi rivuga yuko ivyo bintu ari ingabirano rikwiye kujana n’izo ntererano.
INDINGANIZO Y’IVYO GUTANGA AMAHERA YOSHOBORA GUSUBIZWA
Amahera arashobora gutangwa hishimikijwe indinganizo idasanzwe, ku buryo hamwe nyene kuyatanga yoyasaba, ayo mahera yatanze yoyasubizwa. Kugira ngo umenye vyinshi kuri ico kibazo, turakwinginze uvugane n’Ibiro vy’Umunyamabanga akaba n’Umushingwabigega ukoresheje aderese yerekanywe.
KURINGANIZA IVYO GUTANGA BIVUYE KU MUTIMA W’URUKUNDO
Uretse ingabirano z’amahera be n’ugutanga amahera yoshobora gusubizwa, hariho ubundi buryo buteza imbere umurimo w’Ubwami urangurirwa kw’isi yose. Muri ubwo buryo harimwo ubukurikira:
Soransi: Birashobora gufatwa ko ishirahamwe Watch Tower Society riba ari ryo ryakira amahera ya soransi y’ubuzima bw’umuntu canke imbitso y’amahera umuntu azokwikorako mu gihe akukurutse canke ahawe pansiyo.
Amakonte yo muri banki: Amakonte yo muri banki, impapuro zemeza amahera yabikishijwe muri banki, canke amakonte y’umuntu yakukurutse birashobora kubikishirizwa canke gushingwa ko bizohabwa ishirahamwe Watch Tower Society nyene vyo niyapfa, hisunzwe ibisabwa n’ibanki y’aho umuntu aba.
Umutahe umuntu afise ahantu be n’ivyete bitanga uburenganzira bwo kwakira amahera aho ayafise: Ivyo na vyo nyene birashobora guhabwa ishirahamwe Watch Tower Society bwa ngabirano.
Itongo canke inzu: Itongo canke inzu canke vyompi ari ibishobora kugurishwa, birashobora gutangwa bwa ntererano haba mu kubigaba canke, mu gihe ari aho umuntu aba, nyene kubitanga agasigirwa aho aba arabaye, agashobora kubandanya kuhaba igihe cose asigaje kubaho. Imbere y’uko ugira amasezerano yo gushikiriza ico ari co cose muri ivyo, urabanza ubivugane n’ibiro vy’ishami biri mu gihugu iwanyu.
Ukuza uraronka amahera ku yo watanzeko ingabirano: Muri iyo ndinganizo, umuntu araha ishirahamwe Watch Tower Society amahera canke inzandiko zemeza ko ayafise ahantu. Nyene gutanga na we, canke umuntu yagenywe na we, araronka amahera kanaka ku mwaka ku mwaka amufasha kubaho. Mu mwaka vyemejwe ko nyene gutanga ayo mahera agendera kuri iyo ndinganizo, hari aho akurwako ikori yahora ayatangako.
Ivyete vy’iragi be n’imbitso: Itongo canke amahera birashobora kuragwa ishirahamwe Watch Tower Society biciye ku cete c’iragi canditswe mu buryo bwemewe n’amategeko, canke bigashobora kwitwa ko ishirahamwe Watch Tower Society ari ryo rigabiwe icete cemeza imbitso umuntu afise ahantu. Imbitso iteza imbere ishirahamwe ry’ivy’idini irashobora gutuma umuntu akurwako amakori amwamwe.
Ubwo buryo bwo “gutanga bivuye ku mutima w’urukundo” busaba ko nyene gutanga abanza kubitegekanya. Mu gusahiriza abantu bipfuza guteza imbere igikorwa Ivyabona vya Yehova barangurira kw’isi yose biciye ku buryo bunaka bwo gutanga bivuye ku mutima w’urukundo, harateguwe agatabu mu congereza be no mu gisupanyoli kerekeye ugutanga kwo gushigikira umurimo w’Ubwami urangurirwa kw’isi yose (Charitable Planning to Benefit Kingdom Service Worldwide). Ako gatabu kanditswe ngo kishure ibibazo vyinshi twagiye turabazwa ku biraba ingabirano, ivyete vy’iragi be n’imbitso. Karimwo kandi ayandi makuru y’ingirakamaro ku bijanye n’ugutegekanya ivyo gutanga itongo, amahera canke gutegekanya ibijanye n’amakori. Karamenyesha abantu ivyerekeye uburyo butandukanye ingabirano zishobora gutangwa haba ubu canke biciye ku kubiraga. Abantu benshi, bamaze gusoma ako gatabu no kubiganira n’abahanuzwajambo babo mu vy’amategeko canke mu vy’amakori hamwe n’ibiro birungikwako izo ntererano, barashoboye gushigikira igikorwa c’Ivyabona vya Yehova kw’isi yose, kandi kubera ukubigenza gutyo, barahungukiye rwose mu bijanye no kuriha amakori. Ako gatabu umuntu arashobora kukaronka mu kugasaba ivyo biro.
Nimba ushaka kumenya ayandi makuru kuri ivyo, wobiganira n’ibiro, haba mu kwandika ikete canke mu guterefona kuri aderese ishizwe aho hepfo canke ku biro vy’Ivyabona vya Yehova bikorera mu gihugu iwanyu.
Charitable Planning Office
Ivyabona vya Yehova
B.P. 2150 Bujumbura
Telefone: (257) 241110
[Amafoto ku rup. 20, 21]
Ibibanza vya kera be na bishasha vyo kwikoranirizamwo vy’Ivyabona vya Yehova
Zambiya
République centrafricaine