Kwihanganira ‘Ihwa mu Mubiri’

“Ubuntu bganje buraguhāgije.”​—2 AB’I KORINTO 12:9.

1, 2. (a) Ni kuki tudakwiye guta umutwe kubera duhanganye n’ibigeragezo be n’ingorane? (b) Ni kuki dushobora kugira icizigiro igihe duhanganye n’ibigeragezo?

“ABAGOMBA bose kugenda bubaha Imana bari muri Kristo Yesu, bazohamwa.” (2 Timoteyo 3:12) Ni kuki ivyo ari uko bimeze? Kubera Shetani aharira avuga yuko umuntu akorera Imana abitumwe n’ubwikunzi gusa, kandi Shetani akaba yita ku rutare kugira yerekane ko ico ciyumviro ciwe ari co. Yezu igihe kimwe yaburiye intumwa ziwe z’intahemuka ati: “Satani yabasavye ngw abagosore nk’ ingano.” (Luka 22:31) Yezu yari azi neza yuko Imana ireka Shetani kugira ngo atugerageze akoresheje ingorane zitera umubabaro. Ego ni ko, ivyo ntibisobanura yuko ingorane yose duhangana na yo mu buzima iva neza na neza kuri Shetani canke ku madayimoni yiwe. (Umusiguzi 9:11) Mugabo Shetani arashashaye gukoresha ikintu cose ahambije kugira ngo asenyure ukudahemuka kwacu.

² Bibiliya itubwira yuko tudakwiye guta umutwe kubera ibigeragezo turimwo. Ivyo ari vyo vyose bishobora kutuzako giturumbuka, si bishasha canke si ivyo tutaba twiteze. (1 Petero 4:12) Nkako, “imibabaro ihwanye n’iya[cu] i[ra]shitswa kuri bene Data bari mw isi.” (1 Petero 5:9) Muri iki gihe, Shetani ariko arashira umukazo ukomeye ku musavyi w’Imana wese. Murwanizi arahimbarwa no kubona dutuntuzwa n’ingorane nyinshi zimeze nk’amahwa zose zishoboka. Kugira ngo abishikeko, akoresha urunkwekwe rw’ibintu rwiwe mu buryo kumbure bwo kwongereza canke kwunyura ‘amahwa yo mu mubiri wacu.’ (2 Ab’i Korinto 12:7, NW) Naho ari ukwo, ibitero vya Shetani si ngombwa ngo bisenyure ukutadohoka kwacu. Nk’uko nyene Yehova ‘azoducira icanzo’ kugira ngo twihanganire inyosha mbi, ni na kwo azobigira igihe duhanganye n’ingorane zimeze nk’amahwa mu mubiri wacu.​—1 Ab’i Korinto 10:13.

Uburyo bwo Kwihanganira Ihwa

3. Yehova yishuye gute igihe Paulo yamusaba gukura ihwa mu mubiri wiwe?

³ Intumwa Paulo yaringinze Imana kugira ngo ikure ihwa mu mubiri wiwe. “Kur’ivyo natakambiye Umwami wacu gatatu ngo kimvemwo.” Yehova yishuye gute isengesho Paulo yaturanye ubwira? “Ubuntu bganje buraguhāgije; kuk’ubushobozi bganje buhīngūrirwa mu ntege nke.” (2 Ab’i Korinto 12:8, 9) Nimuze duce irya n’ino iyo nyishu maze turabe ukuntu ishobora kudufasha tukihanganira ingorane izo ari zo zose zimeze nk’amahwa zidutera umubabaro.

4. Ni mu buryo butari bumwe ubuhe Paulo yungukiye ku buntu bwa Yehova atari akwiriye?

⁴ Urabona yuko Imana yaremesheje Paulo gukenguruka ubuntu atari akwiriye yari amaze kugirirwa biciye kuri Kirisitu. Kukaba nkako, Paulo yari yarahezagiwe cane mu buryo bwinshi. Mu buryo buranga urukundo, Yehova yaramuteye agateka ko kuba umwigishwa, naho yahora arwanya abayoboke ba Yezu bimwe bikabije. (Ivyakozwe 7:58; 8:3; 9:1-4) Mu nyuma, Yehova abigiranye ubugwaneza yarashinze Paulo ibikorwa vyinshi n’uduteka twinshi bikora ku mutima. Icigwa twohakura kiratomoye. No mu bihe bigoye cane, tuguma dufise imihezagiro myinshi twokenguruka. Ibigeragezo ntibikwiye gutuma twigera twibagira ukugira neza kwinshi kwa Yehova.​—Zaburi 31:19.

5, 6. (a) Yehova yigishije Paulo gute yuko ubushobozi bwiwe “buhingūrirwa mu ntege nke”? (b) Akarorero ka Paulo kagaragaza gute ko Shetani ari umubeshi?

⁵ Ubuntu tudakwiriye bwa Yehova buragaragara ko buhagije no mu bundi buryo. Ubushobozi bw’Imana burahagije rwose kugira ngo budufashe gutsinda ibigeragezo. (Abanyefeso 3:20) Yehova yigishije Paulo yuko ubushobozi bwiwe “buhingūrirwa mu ntege nke.” Gute? Yarahaye Paulo mu buryo buranga urukundo inkomezi zose yari akeneye kugira ngo yihanganire ikigeragezo ciwe. Ukwihangana kwa Paulo be n’ukwizigira Yehova yari afise na vyo vyareretse bose yuko ububasha bw’Imana bwariko buratsinda muri uwo muntu w’intege nke kandi w’umucumuzi. Ubu naho rimbura ico vyakoze kuri Murwanizi, uwivugisha yuko abantu bakorera Imana igihe gusa ubuzima bumeze neza ata ngorane burimwo. Ukutadohoka kwa Paulo kwatumye uwo mucokoranyi amaramara!

⁶ Uwo yari Paulo, uwahora afatanije na Shetani mu kurwanya Imana, uwahama Abakirisu bimwe bikomeye, akaba n’Umufarizayo w’umunyamwete kandi nta nkeka yahora yinovora ubuzima bwo kudibama kubera yavukiye mu bantu b’abakire. Paulo ico gihe na ho yariko arakorera Yehova na Kirisitu ari “[ha]nyuma y’izindi ntumwa zose.” (1 Ab’i Korinto 15:9) Kubera ico, yaricishije bugufi arisunga inyobozo z’inama nyobozi y’Abakirisu yo mu kinjana ca mbere. Vyongeye yarihanganye adahemuka naho yari afise ihwa mu mubiri. Icababaje cane Shetani ni uko ibigeragezo vyo mu buzima bitatumye umwete wa Paulo ugabanuka. Paulo ntiyigeze areka kwitwararika icizigiro c’uko yogize uruhara mu Bwami bwo mw’ijuru bwa Kirisitu. (2 Timoteyo 2:12; 4:18) Nta hwa na rimwe uko ryaba ribabaza kwose ryashoboye kugabanya umwete wiwe. Ese umwete wacu woguma ukomeye nk’uko nyene! Kubera ko adushigikira mu bigeragezo turimwo, Yehova aradutera agateka kugira ngo duterere umuganda mu kugaragaza ko Shetani ari umubeshi.​—Imigani 27:11.

Intunganyo za Yehova Zihambaye

7, 8. (a) Yehova aha ububasha abasavyi biwe muri iki gihe abicishije ku ki? (b) Ni kuki gusoma Bibiliya ku musi ku musi no kuyiga bihambaye kugira ngo twihanganire ihwa riri mu mubiri wacu?

⁷ Muri iki gihe, Yehova araha ububasha Abakirisu b’abizerwa abicishije ku mpwemu yiwe yera, kw’Ijambo ryiwe be no ku kivukano cacu c’Abakirisu. Nka kumwe kw’intumwa Paulo, turashobora guterera imitwaro yacu kuri Yehova mw’isengesho. (Zaburi 55:22) Naho Imana itodukurako ibigeragezo, irashobora kuduha ubukerebutsi kugira ngo tuvyihanganire, eka mbere na bimwe bigoye rwose kwihanganira. Yehova arashobora kandi kuduha inkomezi​—akaduha “ubushobozi buhebuje”​—kugira ngo budufashe kwihangana.​—2 Ab’i Korinto 4:7.

⁸ Imfashanyo nk’iyo tuyironka dute? Dutegerezwa kwiga Ijambo ry’Imana dushirutse ubwira, kubera muri ryo ari ho tuzoronkera uguhumurizwa nyakwo. (Zaburi 94:19) Muri Bibiliya, turasoma amajambo akora ku mutima abasavyi b’Imana bavuze igihe bazamba basaba imfashanyo iva ku Mana. Mu kubishura, dusanga kenshi Yehova yakoresha amajambo ahumuriza, na yo akaba adufasha kuzirikana. Ukwiga kuzodukomeza kugira ngo “ubushobozi buhebuje bube ubg’Imana, butavuye kuri twebge.” Nka kurya dukenera gufungura imisi yose kugira ngo tubungabunge amagara n’inkomezi, ni na kwo dutegerezwa gufungura amajambo y’Imana ubudahorereza. Ivyo twoba tubigira? Nimba tubigira, ico gihe tuzobona yuko kuronka “ubushobozi buhebuje” bidufasha kwihanganira ihwa iryo ari ryose ry’ikigereranyo ryoshobora kudushikira ubu.

9. Abakurambere bashobora gute gushigikira abariko barahangana n’ingorane?

⁹ Abakurambere b’Abakirisu batinya Imana barashobora kuba “nk’aho kwikinga umuyaga” w’amagorwa, n’“ubgugamo bg’ikirura” c’ingorane. Abakurambere bashaka gushitsa ivyo bintu vyahumetswe bihejeje kudondorwa, baricisha bugufi kandi bivuye ku mutima bagasaba Yehova kugira ngo abahe “ururimi rw’abigisha” kugira ngo bashobore kumenya ingene bishura abababaye bakoresheje amajambo abereye. Amajambo abakurambere bavuga ashobora kumera nk’akanyanyaga k’imvura gatuma umutima wacu uba uwufutse kandi ugahumurizwa mu bihe bigoye vyo mu buzima. Abakurambere bavuze mu buryo “buremesha ubugingo budendebu[kiwe]” (NW), mu vy’ukuri baba bashigikiye abavukanyi n’abavukanyikazi babo bo mu vy’impwemu bashobora kuba bariko baracika intege canke bavunika umutima kubera ihwa rinaka riri mu mubiri wabo.​—Yesaya 32:2; 50:4; 1 Ab’i Tesalonike 5:14.

10, 11. Abasavyi b’Imana bashobora gute kuremesha abandi bari mu bigeragezo bikaze?

¹⁰ Abasavyi ba Yehova bose bari mu bagize umuryango wiwe w’Abakirisu wunze ubumwe. Emwe, turi ‘ingingo z’abagenzi bacu,’ kandi “dukwiye gukundana.” (Abaroma 12:5; 1 Yohana 4:11) Ico kintu tugishitsa gute? Nk’uko muri 1 Petero 3:8 habivuga, ivyo tubigira ‘mu kubabarana, mu gukundana nk’abavukana no mu kugiriranira imbabazi’ n’abo dusangiye ukwizera. Ku bantu bihanganiye ihwa ribabaza cane mu mubiri, baba abato canke abakuze, twese turashobora kubitwararika. Gute?

¹¹ Dukwiye kwihatira gusangira na bo umubabaro. Nimba tutagira igishika, tutabitaho canke tutanegwa ibintu, vyoshobora gutuma umubabaro wabo wunyuka ntitunabice n’ikanda. Kuba tuzi ibigeragezo barimwo bikwiye gutuma tuba maso ku vyo tuvuga, ku kuntu tubivuga be no ku kuntu twifata. Kuba turi abantu babona ibintu neza kandi baremesha birashobora gufasha kugira ngo dutume umubabaro ukaze baterwa n’ihwa iryo ari ryo ryose ugabanuka. Kubera ico twoshobora kugaragaza ko turi imfashanyo ikomeza kuri bo.​—Ab’i Kolosayi 4:11.

Ingene Bamwebamwe Bavyihanganiye Bakererwa

12-14. (a) Ni ibiki Umukirisukazi umwe yakoze kugira ngo yihanganire kanseri? (b) Abavukanyi n’abavukanyikazi bo mu vy’impwemu b’uwo mukenyezi, ni gute bamushigikiye bongera baramuremesha?

¹² Uko twegereza ku mpera y’iyi misi y’iherezo, “ububabare” bwongerekana ku musi ku musi. (Matayo 24:8, UB) Kubera ico, ibigeragezo birashobora gushikira umuntu uwo ari we wese kw’isi, na canecane abasavyi ba Yehova b’abizerwa, bariko barondera gukora ivyo agomba. Nk’akarorero, rimbura ivy’Umukirisukazi umwe akora ari mu busuku bw’igihe cose. Bamutoye kanseri kandi akaba yategerezwa kubagwa kugira ngo bamukuremwo igihimba gihingura amate be n’ibihimba bihingurirwamwo utugingo ngengabuzima twera tw’amaraso dufasha umubiri kurinda imikorobe. Igihe we be n’umugabo wiwe bamenya yuko yari afise iyo ndwara, ubwo nyene baciye bahindukirira Yehova mw’isengesho, iryo batuye umwanya muremure. Nya muvukanyikazi mu nyuma yavuze yuko bagize amahoro batari biteze. Mugabo, yarihanganye mu bihe vyiza na bibi, canecane igihe yahangana n’ingaruka z’imiti yafata.

¹³ Kugira ngo avyifatemwo neza, uwo muvukanyikazi yaragerageje kwiga vyinshi bishoboka ku vyerekeye kanseri. Yarabajije abaganga biwe. Mu Munara w’Inderetsi, muri Réveillez-vous! no mu bindi bisohokayandikiro vya gikirisu bijanye na vyo, yarabonyemwo inkuru zivuga ivy’ubuzima abantu bagize zimwereka ingene bihanganiye iyo ndwara mu buryo bw’akanyengetera. Yarasoma kandi imirongo yo muri Bibiliya ijanye na zo yerekana ubushobozi Yehova afise bwo gushigikira abasavyi biwe mu gihe c’ingorane, yongera asangamwo n’ayandi makuru y’ingirakamaro.

¹⁴ Ikiganiro kimwe kivuga ivyerekeye ukwihebura casubiyemwo aya majambo aranga ubukerebutsi agira ati: “Uwigungira ukwiye aba arondera ivyo yiharije gusa.” (Imigani 18:1) Ico kiganiro rero catanze iyi mpanuro igira iti: “Nurwanye ivyo kwigungira ukwa wenyene.”a Uwo muvukanyikazi yigana ati: “Benshi barambwira ko bansengera; abandi bakampamagara kuri telefone. Hari abakurambere babiri bama bahamagara kuri telefone kugira ngo bamenye ukwo merewe. Hari abandungikiye amashurwe be n’udukarata twinshi turiko indamukanyo. Bamwebamwe mbere barategura ibifungurwa. Vyongeye, benshi baritanga bakaza kuntwara kwa muganga.”

15-17. (a) Umukirisukazi umwe yihanganiye gute ingorane yatewe n’amasanganya? (b) Ni imfashanyo iyihe abo mw’ishengero bamuhaye?

¹⁵ Hari umusavyi wa Yehova amaze igihe kirekire aba muri Nouveau-Mexique, muri Leta Zunze Ubumwe za Amerika, yagize amasanganya abiri y’umuduga. Izosi ryiwe be n’ibitugu vyiwe vyarababaye cane, birunyura indwara yo kuribwa mu ngingo (rhumatisme) yari asanganywe akaba yari ayimaranye imyaka irenga 25 ayihanganira. Yigana ati: “Naragira ingorane yo kugorora umutwe no gutwara ikintu ico ari co cose gipima ibiro birenga bibiri. Mugabo isengesho naturana ubwira nsaba Yehova ryarankomeje cane. Cokimwe n’ibiganiro twize mu Munara w’Inderetsi. Kimwe muri vyo carasiguye Mika 6:8, cerekana yuko kuba uwifata ruto mu kugendana n’Imana bisobanura kumenya aho ubushobozi bw’umuntu bugarukira. Ivyo vyaramfashije gutahura yuko naho nari merewe nabi, ntari nkwiye gucika intege, naho nyene umwanya namara mu busuku wari muto ugereranije n’uwo nipfuza kumara. Kumukorera tubitumwe n’imvo nziza ni co kintu gihambaye.”

¹⁶ Avuga kandi ati: “Abakurambere bama bankeza kubera utwigoro nagira two kwitaba amakoraniro no gusohoka mu busuku bwo mu ndimiro. Abakiri bato barangwa mu nda mu kundamutsa. Abasuku b’abatsimvyi baranyihanganira cane kandi kenshi bagahindura amaporogarama yabo mu misi naba ndemvye. Igihe ikirere caba kitameze neza, barantora bakanjana ku masubirayo canke bakantumira kwicara aho barongorera inyigisho za Bibiliya. Vyongeye kubera ntashobora gutwara agasaho k’ibitabu, abandi bamamaji baca bashira ibisohokayandikiro vyanje mu masaho yabo igihe ngiye mu gikorwa co kwamamaza.”

¹⁷ Raba ingene abakurambere bo mw’ishengero n’abo basangiye ukwizera bafashije abo bavukanyikazi babiri kwihanganira ubumuga bwabo bumeze nk’amahwa. Barabasahirije mu buryo ngirakimazi, buranga ubuntu kugira ngo baronke ivyo bari bakeneye mu vy’impwemu, mu vy’umubiri no mu vy’akanyengetera. Ivyo none ntibikuremesha gufasha abandi bavukanyi n’abavukanyikazi bariko barashikirwa n’ingorane? Namwe bakiri bato, na mwebwe nyene murashobora kuba imfashanyo ku bo mw’ishengero mukukira bariko baranyinyana n’amahwa mu mubiri wabo.​—Imigani 20:29.

18. Ni indemesho iyihe twokura mu nkuru zivuga ivy’ubuzima abantu bagize zisohorwa mu binyamakuru Umunara w’Inderetsi na Réveillez-vous!?

¹⁸ Ibinyamakuru Umunara w’Inderetsi na Réveillez-vous! vyarasohoye inkuru nyinshi zivuga ivy’ubuzima abantu bagize be n’ivyabonywe vyerekeye Ivyabona bihanganiye ingorane mu buzima kandi bakiriko barazihanganira. Uko usoma ubudahorereza ivyo biganiro, ni ko uzobona yuko benshi mu bavukanyi n’abavukanyikazi bawe bo mu vy’impwemu bari hirya no hino kw’isi bihanganiye amagume yo mu vy’ubutunzi, ukubura ababo bahitanywe n’ivyago be n’ibihe bigoye vy’intambara. Abandi babayeho bafise indwara zituma batagira utuguvu. Benshi ntibashobora gukora na dukeyi mu tuntu dutoduto two mu buzima abakomeye babona ko ari udusanzwe. Indwara zabo zirababera ikigeragezo bimwe bikomeye, canecane igihe badashobora kugira uruhara mu bikorwa vya gikirisu uko bavyipfuza kwose. Ese ukuntu bakenguruka cane ingene abavukanyi n’abavukanyikazi babo, abato n’abakuze, babafasha bakongera bakabashigikira!

Ukwihangana Kuzana Agahimbare

19. Ni kuki Paulo yashoboye kunezerwa naho yari mu bigeragezo be n’intege nke bimeze nk’amahwa?

¹⁹ Paulo yaranezerejwe no kubona ingene Imana yamukomeje. Yavuze ati: “Canecane nzonezererwa kwirata intege nke zanje, ng’ubushobozi bga Kristo bunzeko. Ni co gituma kubga Kristo nzonezererwa intege nke zanje, no gukubagurwa, n’imibabaro, no guhīgwa, n’ivyago: kukw iyo mbaye umunyantege nke ari ho ndushiriza kugira ubushobozi.” (2 Ab’i Korinto 12:9, 10) Kubera ivyamushikiye, Paulo yarashoboye kuvuga adakeka ati: “Simbivuze kubg’ubukene, kuko nize kubumbga n’ivyo mfise uko ndi kose. Nzi gucishwa bugufi, nzi no kugira umurengera; muri cose no muri vyose nātiwe ibanga ryo mu vyo guhāga no mu vyo gusonza, ryo mu vyo kugira umurengera no mu vyo gukena. Nshobozwa vyose n’ūmpa inkomezi.”​—Ab’i Filipi 4:11-13.

20, 21. (a) Ni kuki dushobora kuronka umunezero mu kuzirikana ku “bitaboneka”? (b) Ni ibintu bimwebimwe ibihe “bitaboneka” wizigiye kubona mw’Iparadizo kw’isi?

²⁰ Ni co gituma bivuye ku kwihanganira ihwa ry’ikigereranyo iryo ari ryo ryose riri mu mubiri wacu, dushobora kugira agahimbare kenshi mu kwereka umuntu wese yuko ubushobozi bwa Yehova buriko burahingurirwa mu ntege nke zacu. Paulo yanditse ati: “[Ntitw]ihebura; . . . umuntu wacu w’imbere yama ahinduka musha uko bukeye. Kukw amarushwa yacu ahwahutse y’akanya ka none yiyongeranije cane kudushikiriza ubgiza buremereye bg’ibihe bidashira. Natwe . . . turāba ku bitaboneka: kukw . . . ibitaboneka [ari] ivy’ibihe bidashira.”​—2 Ab’i Korinto 4:16-18.

²¹ Abatari bake mu basavyi ba Yehova muri iki gihe barizigiye kuba mw’Iparadizo kw’isi no kwinovora imihezagiro yasezeranye. Imihezagiro nk’iyo twoshobora kuyifata ko ‘itaboneka’ kuri twebwe muri iki gihe. Ariko rero, igihe kiriko kiregereza cihuta aho tuzobona iyo mihezagiro n’amaso yacu bwite, yemwe tukayinovora ibihe bidahera. Umuhezagiro umwe muri iyo kuzoba ugukurwako buhere ingorane iyo ari yo yose imeze nk’ihwa! Umwana w’Imana “a[zo]sangangur[a] ibikorwa vy’umurwanizi” yongere “[ah]indurishe ubusa ūfise ubushobozi bg’urupfu.”​—1 Yohana 3:8; Abaheburayo 2:14.

22. Ni icizigiro ikihe n’umwiyemezo uwuhe dukwiye kugira?

²² Ihwa iryo ari ryo ryose rero riri mu mubiri wacu ritubabaza muri iki gihe, nimuze tugume turyihanganira. Nka kumwe kwa Paulo, tuzoronka inkomezi zo kubigira dufashijwe na Yehova, we aduha ububasha bwiwe atitangiriye itama. Igihe tuzoba tuba mw’Iparadizo kw’isi, tuzoshimagiza Yehova Imana yacu imisi yose kubera ibikorwa vyose bitangaje yadukoreye.​—Zaburi 103:2.

[Akajambo k’epfo]

Wokwishura Gute?

• Ni kuki Murwanizi agerageza gusenyura ukutadohoka kw’Abakirisu nyakuri kandi abigenza gute?

• Ubushobozi bwa Yehova “buhīngurīrwa mu ntege nke” gute?

• Abakurambere hamwe n’abandi bashobora gute kuremesha abababajwe n’ingorane?

[Ifoto ku rup. 13]

Paulo yasenze incuro zitatu ngo Imana imukure ihwa mu mubiri