Gumiza Umusi wa Yehova Hafi mu Muzirikanyi

“Mu misi y’iherezo hazoza [abatyekezi].”—2 PETERO 3:3.

1. Ni inyiyumvo iyihe y’uko ibintu vyihutirwa Umukirisu umwe wo mu gihe ca none yari afise?

HARI umukenuzi w’intavanyako abumazemwo imyaka 66 yanditse ati: “Namye nantaryo niyumvamwo cane yuko ibintu vyihutirwa. Harumagedoni, mu kwiyumvira kwanje, nantaryo yamye ari hirya y’ejo. (Ivyahishuriwe Yohana 16:14, 16) Nk’uko dawe yari, eka na se wiwe yamuboneye izuba, nabayeho ubuzima bwanje nk’uko intumwa [Petero] yahimirije, ‘ngumiza hafi mu muzirikanyi ukuhaba kw’umusi wa Yehova.’ Namye nantaryo mbona ya si nshasha yasezeranwa nk’‘ikintu kitari umugani yamara kitabonwa.’ ”—2 Petero 3:11, 12, NW; Abaheburayo 11:1; Yesaya 11:6-9; Ivyahishuriwe Yohana 21:3, 4.

2. Bisobanura iki kugumiza hafi mu muzirikanyi umusi wa Yehova?

² Imvugo ya Petero ngo ‘mugumiza hafi mu muzirikanyi’ ku bijanye n’umusi wa Yehova bisobanura yuko tutawikuramwo mu mizirikanyi. Dukwiye kutibagira yuko umusi Yehova azohonnya uru runkwekwe bikaba nk’inyitangizo y’isasagazwa ry’isi shasha yiwe yasezeranywe uri hafi cane. Ukwiye kuba ikintu kitari umugani kuri twebwe ku buryo tuwubona mu buryo burongorotse, nk’uko woba uri aho imbere yacu. Uko ni ko utǎri umugani ku bahanuzi b’Imana ba kera, kandi kenshi bawuvuga ko wegereje.—Yesaya 13:6; Yoweli 1:15; 2:1; Obadiya 15; Zefaniya 1:7, 14.

3. Bisa n’uko ari igiki catumye Petero atanga impanuro ku biraba umusi wa Yehova?

³ Ni kuki Petero yaduhimirije kubona umusi wa Yehova nk’uko woba uzoza “hirya y’ejo”? Kubera ko hari bamwe bari batanguye gutyekeza iciyumviro c’ukuhaba kwa Kirisitu kwasezeranywe, mu gihe ari ho ari inkozi z’ikibi zikaba zohanywe. (2 Petero 3:3, 4) Nuko mu kigabane ca 3 c’ibaruwa ryiwe rya kabiri, ari co tugiye kurimbura, Petero arishura ivyagirizo vy’abo batyekezi.

Turinginganwa Ikibabarwe ngo Twibuke

4. Ni igiki Petero ashaka ko twibuka?

⁴ Igishika Petero yari afitiye abavukanyi biwe kirerekanwa n’ukuntu yabita yisubiriza muri iki kigabane ngo “abo nkunda.” Mu kubingingana ikibabarwe ngo ntibibagire ivyo bari barigishijwe, Petero atangura ati: “Abo nkunda, . . . ndakangura imitima yanyu ikeye, mbibutsa; kugira ngo mwibuke amajambo yavuzwe kera n’abāvugishwa n’Imana bera, mwibuke n’icagezwe c’Umwami ni we Mukiza, cavuzwe n’abatumwa bābatumweko.”—2 Petero 3:1, 2, 8, 14, 17; Yuda 17.

5. Abahanuzi bamwebamwe bavuze iki ku vyerekeye umusi wa Yehova?

⁵ “Amajambo yavuzwe kera n’abāvugishwa n’Imana bera” Petero ahimiriza abasomyi biwe kwibuka ni ayahe? Emwe, ni amwe yerekeye ukuhaba kwa Kirisitu mu bubasha bw’Ubwami hamwe n’ay’ugucirwako iteka kw’abatubaha Imana. Mu ntango Petero yari yakwegeye iciyumviro kuri ayo majambo. (2 Petero 1:16-19; 2:3-10) Yuda arerekeza kuri Henoki, uwari we muhanuzi wa mbere avugwa yabûye ivyerekeye urubanza rubi rwociriwe inkozi z’ikibi. (Yuda 14, 15) Hariho abandi bahanuzi bakurikiye Henoki, Petero akaba adashaka ko twibagira ivyo bǎnditse.—Yesaya 66:15, 16; Zefaniya 1:15-18; Zekariya 14:6-9.

6. Ni amajambo ayahe ya Kirisitu n’intumwa ziwe atuboneshereza ku vyerekeye umusi wa Yehova?

⁶ Turetse ivyo, Petero abwira abasomyi biwe kwibuka “icagezwe c’Umwami [ari na] we Mukiza.” Icagezwe ca Yezu kirimwo iyi nyihanikizo ngo: “Mwirinde, kugira ngw imitima yanyu ntīremērwe . . . ng’uwo musi ntubazeko giturumbuka, nk’umutego.” “Mwiyubare, mube maso, . . . ”; kuko mutazi igihe bizoshikira.” (Luka 21:34-36; Mariko 13:33) Petero kandi araduhimiriza gukwirikira amajambo y’intumwa. Nk’akarorero, intumwa Paulo yanditse, ngo “umusi w’Umwami wacu uzoza nk’ukw igisuma kiza mw ijoro. Nuko rero ntidusinzire nka ba bandi, ariko twame tugavye, [tugumane amenge yacu].”—1 Ab’i Tesalonike 5:2, 6.

Ivyipfuzo vy’Abatyekezi

7, 8. (a) Abatyekeza ubutumwa bw’Imana butanga imburizi ni abantu bameze bate? (b) Abo batyekezi bivugisha ibiki?

⁷ Nk’uko vyavuzwe imbere y’aha, impamvu yatumye inkeburo ya Petero yandikwa ni uko bamwe bari batanguye gushinyura kuri mwen’izo mburizi, nka kumwe mbere Abisirayeli bo mu bihe vya mbere bari barahemye abahanuzi ba Yehova. (2 Ngoma 36:16) Petero arasigura, ati ‘Irya mbere mukwiye kumenya n’uko mu misi y’iherezo hazoza [abatyekezi n’agatyekezo kabo], bakurikiza ukwifuza kwabo.’ (2 Petero 3:3) Yuda avuga yuko ivyipfuzo vy’abo batyekezi ari “[ivyo] kutubaha Imana.” Abita ‘abantu b’ubunyamaswa, badafise impwemu.’ (Impirikano ni icazu.)—Yuda 17-19.

⁸ Abigisha b’ibinyoma Petero yavuze ngo ni “abagenda bakurikira ivy’akameremere kabo, bifuza ibihumanya” bisa n’uko bari muri abo batyekezi batagiramwo ivy’impwemu. (2 Petero 2:1, 10, 14) Barabaza Abakirisu b’abizerwa babahema, ngo “Isezerano ry[’ukuhaba] kwiwe riri hehe se? Kuk’uhereye aho ba sogokuruza basinziririye, vyose bihora uko vyamye, uhereye ku kuremwa kw’isi.”—2 Petero 3:4.

9. (a) Ni kuki abatyekezi bagerageza gusenyura ukwihutirwa kw’ibintu kwuzuye mw Ijambo ry’Imana? (b) Ni mu buryo ki ukugumiza hafi mu muzirikanyi umusi wa Yehova bidukingira?

⁹ Ako gatyekezo ni ak’iki? Ni kuki basa n’abavuga yuko ukuhaba kwa Kirisitu gushobora kutigera kuza, yuko Imana ataho irigera irenguka mu vyo abantu bakora n’uko ataho izigera ibigira? Urabona, mu kugerageza gusenyura ivy’ubwihute vyuzuye mw Ijambo ry’Imana, abo bantu b’ubunyamaswa barondera gutuma abandi bafororoka bakaja mu kutanegwa ivy’impwemu, bigatuma batagora gufatwa n’imikwegakwego iranga ubwikunzi. Mbega indemesho ikomeye kuri twebwe muri iki gihe kugira tugume turi maso mu vy’impwemu! Tugumane hafi mu muzirikanyi umusi wa Yehova kandi twame nantaryo twibuka yuko adushizeko ijisho! Gutyo bizotuma dusukurira Yehova dufise umwete kandi tukagumana ugutyoroka kwacu mu vy’ukwigenza runtu.—Zaburi 11:4; Yesaya 29:15; Ezekiyeli 8:12; 12:27; Zefaniya 1:12.

Bagira Ibintu Ibigirankana Kandi Barakengeretse

10. Ni gute Petero atanga igihinyuza ko abatyekezi batavuga vyo?

¹⁰ Abatyekezi mwen’abo hariho ikirukuri ca kahise gihambaye rwose biyobagiza. Ico baracirengagiza babona, kandi bakagerageza gutuma abandi bacibagira. Kuki? Kugirango gukwegakwega abantu birushirize kuborohera. Petero arandika, ngo ‘Kuko, nk’uko bavyipfuza, iki kirukuri kirabacika.’ (NW) Ikirukuri ikihe? “Yuko kera hār’amajuru, n’isi yakūwe mu mazi n’ijambo ry’Imana, rikayirema mu mazi. Ivyo vyatumye isi ya kera amazi ayirengera, iratikira.” (2 Petero 3:5, 6) Egome, Yehova koko yararanduye ubukozi bw’ikibi kw isi mu gihe c’Umwuzure wo mu misi ya Nowa, kikaba ari ikintu Yezu na we nyene yashimitseko. (Matayo 24:37-39; Luka 17:26, 27; 2 Petero 2:5) Nuko, mu buryo buhushanye n’ivyo abatyekezi bavuga, ibintu vyose ntabwo vyabandanije “uko vyamye, uhereye ku kuremwa kw’isi.”

11. Ni ibiki Abakirisu ba mbere bari biteze hataragera vyatumye bamwe babatyekeza?

¹¹ Abatyekezi bashobora neza kuba barahemye Abakirisu b’abizerwa kubera ko bano bari n’ivyo biteze ariko bitaribwashike. Hagisigaye gatoyi ngo Yezu apfe, abigishwa biwe “biyumvira yuk’ubgami bg’Imana bugira buboneke uwo mwanya.” Maze, inyuma y’izuka ryiwe barabajije yuko nya Bwami ari co gihe bwoba bwagira bushingwe. Vyongeye, nk’imyaka cumi imbere y’uko Petero yandika ibaruwa ryiwe rigira kabiri, bamwe bari ‘bahagaritswe umutima’ n’ “ijambo” canke n’ “icete” ngo coba kivuye ku ntumwa Paulo canke bagenziwe, “[k]ivuga yuk’umusi w’Umwami wacu uhejeje gushika.” (Luka 19:11; 2 Ab’i Tesalonike 2:2; Ivyakozwe n’intumwa 1:6) Ariko rero mwen’ivyo bintu abigishwa ba Yezu bari biteze ntivyari ivy’ikinyoma, ni uko gusa hataribwagere. Umusi wa Yehova woje!

Ijambo ry’Imana Ni Iryishimirwa

12. Ijambo ry’Imana ryagaragaye gute ko ari iryishimirwa mu buhanuzi bwaryo bwerekeye ‘umusi wa Yehova’?

¹² Nk’uko vyavuzwe amaja ku ntango, abahanuzi b’imbere y’Ubukirisu barakunda kubûra yuko umusi wa Yehova w’ukwihora wari hafi. ‘Umusi wa Yehova’ mutoyi waraje mu 607 B.G.C. igihe Yehova yashitsa uguhora ku bantu biwe b’imburabugirire. (Zefaniya 1:14-18) Mu nyuma, ayandi mahanga, gushiramwo Babiloni na Misiri, yariboneyeko ‘umusi wa Yehova’ mwen’uwo. (Yesaya 13:6-9; Yeremiya 46:1-10; Obadiya 15) Umuhero w’urunkwekwe rw’ibintu rw’Abayuda rwo mu kinjana ca mbere na wo nyene wari warabuwe, hanyuma urashika igihe ingabo z’Abaroma zasangangura Yudaya mu 70 G.C. (Luka 19:41-44; 1 Petero 4:7) Ariko Petero adoma urutoke ku ‘musi wa Yehova’ wo muri kazoza, mu kuba uwuhambaye ukazoba mbere uheta wa Mwuzure wakwira hose!

13. Ni akarorero k’intibagirwa akahe kerekana neza yuko umuhero w’uru runkwekwe rw’ibintu uzoza vy’ukuri?

¹³ Petero atangura kudondora uwo musi uriko uza mu kuvuga, ati ‘Ariko bivuye kuri iryo jambo nyene.’ (NW) Yari ahejeje kuvuga ngo “ijambo ry’Imana,” isi y’imbere y’Umwuzure ‘ryayikuye mu mazi, rikayiremera mu mazi.’ Ukwo kuntu ibintu vyari bimeze, ukudondorewe mu nkuru y’ivy’irema iri muri Bibiliya, kwatumye Isegenya ishoboka igihe amazi yacukumbukira hasi bitegetswe n’Imana canke ijambo ryayo. Petero arabandanya, ati ‘Bivuye kuri iryo jambo nyene [ry’Imana] amajuru n’isi biriho ubu vyabikiwe kuzosha, kandi bikaba birindirijwe umusi w’amateka n’uwo gutikira kw’abatubaha Imana.’ (2 Petero 3:5-7; Itanguriro 1:6-8) Kuri ivyo turafise ijambo ry’Imana ryishimirwa! Izozana umuhero ku ‘majuru n’isi’—uru runkwekwe rw’ibintu—mu burake bw’umuriro bwo ku musi wayo uhambaye! (Zefaniya 3:8) Ariko ni ryari?

Ugushashara ko Umuhero Uza

14. Ni kuki dushobora kwemera tudakeka yuko ubu turi mu “misi y’iherezo”?

¹⁴ Abigishwa ba Yezu bashaka kumenya aho umuhero woziriye, ari ho bamubaza, bati “Ni igiki kizoba ikimenyetso c’ukuhaba kwawe n’ic’insozero y’urunkwekwe rw’ibintu?” Bisa n’uko bariko babaza aho urunkwekwe rw’ivy’Abayuda rwohereye, ariko inyishu ya Yezu yashimikiye ubwa mbere ku gihe ‘amajuru n’isi’ vyoboneye agatikizo. Yezu yaramenyesheje imbere y’igihe ibintu nk’intambara zikomakomeye, amapfa, vya nyamugigima, indwara, n’ubukozi bw’ikibi. (Matayo 24:3-14, NW; Luka 21:5-36) Guhera mu 1914, twariboneye nya kimenyetso kiranguka, ico Yezu yatanze ngo kibe ikiranga “insozero y’urunkwekwe rw’ibintu,” hamwe n’ibintu intumwa Paulo yavuze ko vyoranze “[i]misi y’iherezo.” (2 Timoteyo 3:1-5) Mu vy’ukuri, ubu ikimenyamenya c’uko tubayeho mu gihe c’iherezo ry’uru runkwekwe rw’ibintu ni ikidaharirwa!

15. Abakirisu bahengamiye ku kugira iki nanzi inkeburo Yezu yari yaratanze?

¹⁵ Ivyabona vya Yehova bǎragize umushasharo wo kumenya igihe umusi wa Yehova uzoshikirako. Muri uwo mushasharo wabo rimwe na rimwe baragerageza kugereranya igihe ushobora kuzirako. Ariko mu kugira gutyo barananiwe no gukurikiza inkeburo ya Shebuja, nk’uko abigishwa ba Yezu ba mbere bananiwe no kuyikurikiza, imwe y’uko “[t]utazi igihe bizoshikira.” (Mariko 13:32, 33) Abatyekezi barahemye Abakirisu b’abizerwa kubera ukwitega ibintu kwabo hataragera. (2 Petero 3:3, 4) Yamara rero, uko Petero avyemeza, umusi wa Yehova uzoza, nk’uko ingengabihe yiwe iri.

Harakenewe Ukubona Ibintu Nka Yehova

16. Ni inkeburo nki dukurikira n’ubukerebutsi?

¹⁶ Turakeneye kubona nka Yehova ivyerekeye igihe, nk’uko Petero ubu abitwibutsa, ati: “Arikw abo nkunda, iri rimwe mweho ntimuryiyobagize, yuko ku Mwami Imana umusi umwe umeze nk’imyaka igihumbi, n’imyaka igihumbi imeze nk’umusi umwe.” Ese ukuntu igihe c’ubuzima bwacu c’imyaka 70 canke 80 ari kigufi tugereranije! (2 Petero 3:8; Zaburi 90:4, 10) None rero mu gihe ukuranguka kw’amasezerano y’Imana gusa n’ugutevye, turakeneye kwemera inkeburo umuhanuzi w’Imana yatanze, ati ‘Naho [igihe cagennywe c]otebagana, ukirorere; kuko kitazobura kuza; ntikizoteba.’—Habakuki 2:3.

17. Naho imisi y’iherezo yabandanije igihe kirekire kuruta uko benshi bari bavyiteze, ni igiki duwiye kwizera?

¹⁷ Ni kuki imisi y’iherezo y’uru runkwekwe yabandanije igihe kirekire kuruta uko benshi bari bavyiteze? Kubera impamvu nziza, nk’uko Petero abisigura ubukurikira, ati “Umwami Imana ntitebeje isezerano ryayo, uko bamwe biyumvira kw iritevya. Ariko yihanganira mwebge, ntigomba ko hagira abahona, arikw igomba ko bose bihana.” (2 Petero 3:9) Yehova ararimbura ikintu coronsa abana b’abantu bose akunguko keza bihebuje. Ikimuraje ishinga ni ubuzima bw’abantu nk’uko abivuga, ati “Simpimbarwa n’uk’umuntu apfa, atar’uko yohindukira, akava mu ngeso ziwe, akabaho.” (Ezekiyeli 33:11) Turashobora rero kwizera yuko umuhero uzoza ku gihe nyene kibereye kugira ngo ushitse intēgo y’Umuremyi nyen’ubukerebutsi bwose, w’umunyarukundo!

Ni Ibiki Bizovaho?

18, 19. (a) Ni kuki Yehova yiyemeje gusangangura uru runkwekwe rw’ibintu? (b) Ni gute Petero adondora umuhero w’uru runkwekwe, kandi ni ibiki mu vy’ukuri bizosangangurwa?

¹⁸ Kubera ko Yehova akunda vy’ukuri abamusukurira, azozimanganya abo bose babateza amarushwa. (Zaburi 37:9-11, 29) Kubera ko Petero yabona nka kumwe kwa Paulo imbere yaho yuko iryo sangangurwa ryoje ku gihe kititezwe, yandika ati: “Umusi w’Umwami wacu uzoza nk’igisuma, ah’amajuru azovaho, hakaba n’ukwasana guhambaye, ivy’itanguriro vyose bigashongeshwa n’ikibengebenge gikaze, isi n’ibikorwa biri muri yo [bikuburwa].” (2 Petero 3:10; 1 Ab’i Tesalonike 5:2) Amajuru bujuru n’isi busi ntivyashiriye mw Isegenya, eka kandi ntibizoshira mu gihe c’umusi wa Yehova. None ni ibiki ‘bizovaho’ canke bizosangangurwa?

¹⁹ Intwaro za kimuntu zaganjije abana b’abantu nk’ “amajuru” zizohera, hahere n’ “isi,” ari co kibane c’abantu kitubaha Imana. Ukwo ‘kwasana guhambaye’ kumbure kwerekana ukuvaho gutebuka kw’amajuru. “Ivy’itanguriro” bigize ikibane ca kino gihe kiri ku mushiro ‘bizoshongeshwa,’ ari kwo gusangangurwa. “Isi” na yo, gushiramwo n’ “ibikorwa biri muri yo,” ‘izokwuburwa.’ Yehova azoshira ku mugaragaro ibikorwa bibi vy’abantu igihe azozana urunkwekwe rw’isi rwose uko rungana kw iherezo rukwiriye neza.

Guma Uhanze Amaso Icizigiro Cacu

20. Ubumenyi dufise bw’ibiraririye gushika bukwiye kugira ico bugize ku buzima bwacu gute?

²⁰ Kubera ko ivyo bishikiragihe vy’amarorerwa vyegereje, Petero avuga yuko dukwiye kugira ‘ibikorwa vy’ingendo vyeranda n’ukugira ibiranga ukwibanda ku Mana, turindira kandi tugumiza hafi mu muzirikanyi ukuhaba kw’umusi wa Yehova.’ (NW) Ntihashobora kuba amazinda kuri ivyo! “Amajuru a[zo]shongeshwa no gusha, kand’ivy’itanguriro vyose bi[zo]yagishwa n’ikibengebenge gikaze.” (2 Petero 3:11, 12) Ivy’uko ivyo bishikiragihe vy’amarorerwa vyoshobora gutangura ejo, bikwiye kugira ico bikoze ku kintu cose tugira canke dutegekanya kugira.

21. Ni igiki kizosubirira amajuru n’isi vy’ubu?

²¹ Petero ubu aratubwira ikizosubirira urunkwekwe rwa kera, akavuga ati: “Ariko nk’uko yasezeranye, tureretse ijuru risha n’isi nsha, ivyo ukugororoka kuzobamwo.” (2 Petero 3:13; Yesaya 65:17) Yo, mbega ukuremururwa! Kirisitu hamwe na bamwe 144 000 bategekana na we ni bo bazoba bagize “ijuru”-ntwaro “risha,” abantu bazorokoka umuhero w’iyi si na bo bakazoba abagize “isi nsha.”—1 Yohana 2:17; Ivyahishuriwe Yohana 5:9, 10; 14:1, 3.

Niwamane Ukwihuta Hamwe n’Ubutyoroke bw’Ingeso Runtu

22. (a) Ni igiki kizodufasha kugira twirinde ikirabagu cose canke umugayo wose vyo mu vy’impwemu? (b) Petero abūra ivy’ingeramizi iyihe?

²² Petero arabandanya, ati “Ni co gituma, abo nkunda, kuko mureretse ivyo, mukwiye kugira umwete wo kuzosangwa mu mahoro, mutagira ikirabagu, mutarik’umugayo imbere yiwe. Mwiyumvire yuko kwihangana kw’Umwami wacu ar’agakiza.” Kubirindira tubishashaye nk’aho tubibona, n’ikintu cose gisa n’uguteba kw’umusi wa Yehova tukakibona nk’inseruro y’ukwihangana kw’Imana, bizodufasha kwirinda akarabagu kose ko mu vy’impwemu canke umugayo. Yamara, hariho ingeramizi! Petero abūra ko mu vyandiko vya “mwene Data akundwa Paulo . . . harimwo bimwe-bimwe bigoye itahura, ivy’abatungu badakomeye bagoreka, nk’uko bagira ivyanditswe bindi, bakīhamagarira guhona.”—2 Petero 3:14-16.

23. Ingabisho y’ukwikebanura Petero atanga ni iyihe?

²³ Abigisha b’ibinyoma biboneka yuko bahotoye ivyandiko vya Paulo vyerekeye ubuntu tutabereye bw’Imana, bakabikoresha nk’urwitwazo rwo kugira ingendo y’isoni nke. Kumbure Petero ivyo ni vyo yari afise mu muzirikanyi igihe yandika inkebuzo yiwe y’ukubikebanura, ati “None mweho, abo nkunda, kuko musanzwe muzi ivyo, mwirinde ngo ntimutwarwe n’ubuzimire bg’abatirinda, mugata ugushikama kwanyu.” Maze arasozera ibaruwa ryiwe, agahimiriza ati: “Mukurire mu buntu [tudakwiriye] bga Yesu Kristo Umwami wacu n’Umukiza, no mu kumumenya.”—2 Petero 3:17, 18.

24. Ni ingendo nyabaki abasuku ba Yehova bose bakwiye gufata?

²⁴ Birumvikana, Petero ashaka gukomeza abavukanyi biwe. Yipfuza ko bose bagira agatima kaseruwe na ca Cabona w’imyaka 82 y’amavuka, umwe twadonda amajambo yiwe mu ntango, avuga ngo “Nabayeho ubuzima bwanje nk’uko intumwa yahimirije, ‘ngumiza hafi mu muzirikanyi ukuhaba kw’umusi wa Yehova.’ Namye nantaryo mbona ya si nshasha yasezeranwa nk’‘ikintu kitari umugani yamara kitabonwa.’ ” Twese nitubeho ubuzima bwacu muri ubwo buryo nyene.

Mbega Wokwishura Ute?

◻ ‘Ukugumiza hafi mu muzirikanyi’ umusi wa Yehova bisobanura iki?

◻ Ni igiki abatyekezi biyobagiza babona, kandi ni kubera iki?

◻ Ni impamvu nki yatumye abatyekezi bahema Abakirisu b’abizerwa?

◻ Ni ukubona ibintu ukuhe dukeneye kugumya?

[Ifoto ku rup. 30]

Uragumiza hafi mu muzirikanyi umusi wa Yehova . . .

[Ifoto ku rup. 31]

. . . na ya si nshasha izokurikira