Uragaba ku Bigisha b’Ibinyoma!

“Muri mwebge hazobah’abigisha b’ibinyoma.”—2 PETERO 2:1.

1. Yuda yari yagabiye kwandika ku vyerekeye iki, kandi ni kuki yahinduye umutwe wiwe w’ikiyago?

MBEGA ikintu c’agahomerabunwa! Abigisha b’ibinyoma mw ikorane rya gikirisu ryo mu kinjana ca mbere! (Matayo 7:15; Ivyakozwe n’intumwa 20:29, 30) Yuda murumuna wa Yezu basangiye nyina yari azi ivy’ivyo bintu vyobayeho. Yavuze yuko yari yagabiye kwandikira abizera bagenzi biwe “ivy’agakiza dusangiye,” ariko yasiguye ati “numvise ikingōbēra kubandikira ivyo kubahanūra kurwanira cane ukwizera.” Ni kuki Yuda yahinduye umutwe wiwe w’ikiyago? Uko abivuga, ni kubera ko ‘hariho bamwe babajemwo binyegeteza [mw ikorane ry’Abakirisu], . . . bahindura ubuntu tutabereye bg’Imana yacu urwitwazo rw’ingendo y’isoni nke.’—Yuda 3, 4.

2. Ni kuki 2 Petero ikigabane ca 2 na Yuda bisa cane?

² Uko biboneka, Yuda yanditse inyuma gatoyi y’aho Petero yandikiye ibaruwa ryiwe rigira kabiri. Nta gukeka, Yuda yari azi cane iryo baruwa. Ni vyo koko, yaraseruye ivyiyumviro vyinshi vyogereranywa n’ibiri muri ryo, mw ibaruwa rikomeye ubwiwe yanditse ry’ukwihanikiza. Rero, igihe twihweza 2 Petero ikigabane ca 2 turaja kubona ukugene rimeze nk’ibaruwa rya Yuda.

Inkurikizi z’Inyigisho z’Ibinyoma

3. Ni ibiki vyashitse kera Petero avuga ko vyokwongeye gushika?

³ Petero amaze guhimiriza abavukanyi biwe gushira umutima ku buhanuzi, avuga ati: “Ariko hār’abigira abavugishwa n’Imana kandi, mu bgoko bg’Abisirayeli, nk’uko no muri mwebge hazobah’abigisha b’ibinyoma.” (2 Petero 1:14–2:1) Abantu b’Imana mu bihe vya kera bararonse ubuhanuzi bw’ukuri, ariko babwirizwa kandi kunigana n’inyigisho zononekaye z’abahanuzi b’ibinyoma. (Yeremiya 6:13, 14; 28:1-3, 15) Yeremiya yaranditse, ngo “Mbonye ubuyobe muri ba kamenyi b’i Yerusalemu: barasambana, bagendera mu binyoma.”—Yeremiya 23:14.

4. Ni kuki abigisha b’ibinyoma bakwiriye guhonywa?

⁴ Mu kudondora ico abo bigisha b’ibinyoma bogize mw ikorane ry’Abakirisu, Petero avuga ati: “Bazozana inyigisho mu mpisho zirema ibice, zitera guhona: bazokwihakana na Shebuja yabaguze [Yezu Kirisitu], bīhamagarire uguhona gutebutse.” (2 Petero 2:1; Yuda 4) Amaherezo icavuye kuri mwen’ukwo kwirema ibice kwo mu kinjana ca mbere ni Kirisitendomu nk’uko tubizi kino gihe. Petero arerekana igituma abigisha b’ibinyoma bakwiye koko gusangangurwa: ‘Ibikorwa vyabo vy’ingendo y’isoni nke benshi bazobikurikira, kubg’ivyo inzira y’ukuri bazoyitukisha.’—2 Petero 2:2.

5. Ni ibiki vyari kubazwa abigisha b’ibinyoma?

⁵ Vyiyumvire! Bitumwe n’akosho k’abigisha b’ibinyoma, benshi mu makorane bogiye mu vy’ingendo y’isoni nke. Ijambo ry’Ikigiriki rihibanuwe ngo ‘ingendo y’isoni nke’ ryumvikanamwo ukutagira inzitizi, ukubura ukwitangira, ukwigenza nabi, ubushegabo, ingendo y’ubushirasoni. Mu ntango Petero yari yavuze yuko Abakirisu bari ‘baracitse bava mu bwononekare bwazanywe mw isi no kwifuza.’ (2 Petero 1:4) Ariko bamwebamwe bari bagiye gusubira kuri ubwo bwononekare, kandi abigisha b’ibinyoma mu makorane ni bo bobaye abobibazwa ku rugero runini! Gutyo inzira y’ukuri yogize izina ribi. Ese ingene bibabaje! Nta nkeka, ico ni ikintu Ivyabona vya Yehova bose bo muri iki gihe bakwiye gushirako umutima cane. Dukwiye kutigera twibagira yuko bivuye ku kuntu twigenza dushobora guhesha ishemezo Yehova Imana n’abantu biwe canke tukabatako iceyi.—Imigani 27:11; Abaroma 2:24.

Ukwinjiza Inyigisho z’Ikinyoma

6. Ni igiki gitera ingiro abigisha b’ibinyoma, kandi ni gute barondera gushikira ico bashaka?

⁶ Dukoresheje ubukerebutsi, turabona ukugene abigisha b’ibinyoma binjiza ukwiyumvira kwabo kwononekaye. Petero ubwa mbere avuga yuko ivyo babigira mu mpisho, canke mu buryo butibonekeza, bw’urwenge. Arongerako, ati “Ukwifuza inyungu kwabo kuzobatera kwunguka kuri mwebge, bababgiye amagambo y’amaremano.” Ukwipfuza kurimwo ubwikunzi kuratera ingiro abigisha b’ibinyoma, nk’uko bishimikwako n’ukuntu uwo murongo uhinduwe muri Bibiliya yitwa La Bible de Jérusalem, ngo “bazogerageza n’ishaka kubagura babigurira n’amajambo aryosharyosha.” Muri ubwo buryo nyene, impibanuro y’uwitwa James Moffatt ngaho ivuga, iti “Mu kwifuza kwabo bazobarya imitsi n’ivyiyumviro vy’urwenge.” (2 Petero 2:1, 3) Ibivugwa n’abigisha b’ibinyoma bishobora gusa n’uko ari vyo ku wutari maso mu vy’impwemu, ariko amajambo yabo mu buryo bwitondewe agenewe “kugura” abantu, kubakwegakwegera mu gukora ivyo abo bahendanyi barondera vy’ubwikunzi.

7. Ni Filozofiya nyabaki yagiye gukundwa na benshi mu kinjana ca mbere?

⁷ Nta gukeka, abigisha b’ibinyoma bo mu kinjana ca mbere barohejwe n’ukwiyumvira kw’isi kwari kuhari. Nko mu gihe Petero yandika, hari filozofiya yitwa Ubuginositike yariko itera ikundwa na benshi. Abaginositike bemera yuko ikintu cose gifadika ari kibi, n’uko ikijanye n’impwemu ari co conyene ciza. Gutyo rero, bamwe muri bo bavuga ngo ivyo umuntu akoresha umubiri wiwe nta co bitwaye. Uko babivuga, ngo amaherezo umuntu ntiyogize uwo mubiri. Ni co gituma baca bapfundika ivy’uko ngo ivyaha bikorwa n’umubiri—ushizemwo n’ibijanye n’uguhuza ibitsina—bidahambaye. Biboneka ko ivyo vyiyumviro vyatanguye kwosha bamwebamwe bavuga ko bakurikira Ubukirisu.

8, 9. (a) Ni ukuhe kwiyumvira guhotoye kwanyengereye Abakirisu ba kare bamwebamwe? (b) Nk’uko Yuda abivuga, bamwebamwe mu makorane bariko bagira ibiki?

⁸ Umuhanga umwe mu vya Bibiliya yavuze yuko “mw Ikeleziya hariho abonona inyigisho y’ivy’inema,” canke iy’ivy’ ‘ubuntu tutabereye.’ (Abanyefeso 1:5-7) Nk’uko yabivuze, iciyumviro ca bamwebamwe cagenda uku: “Mwoba muvuga ko [ubuntu tutabereye] Imana itugirira bwagutse bihagije ku buryo bupfuka icaha cose? . . . Reka rero tubandanye gucumura, kuko [ubuntu tutabereye] bw’Imana bushobora guhanagura icaha cose. Nkako uko turushiriza gukora ivyaha ni ko [ubuntu tutabereye] bw’Imana bworushiriza kuronka akaryo ko gukora.” Hari ukwiyumvira guhotoye kuruta ukwo urigera urumva?

⁹ Intumwa Paulo yararwanije ukwiyumvira kutari kwo ku vyerekeye ikigongwe c’Imana igihe yabaza ati: “Mbega twame dukora ivyaha kugira ng’ubuntu [tutabereye] bg’Imana bugwire?” Yarabajije kandi ati: “Mbega dukore ivyaha, kuko tutaganzwa n’ivyagezwe, ariko tuganzwa n’ubuntu [tutabereye]?” Ku kibazo cose muri ivyo, Paulo yarishuye mu buryo bw’ugushimika, ati “Biragahera.” (Abaroma 6:1, 2, 15) Mu buryo burongorotse, nk’uko Yuda abivuga, bamwebamwe bariko “bahindura ubuntu [tutabereye] bg’Imana yacu [ingendo y’]isoni nke.” Ariko rero, Petero avuga yuko kuri mwen’abo ‘uguhona kudahinyiza.’—Yuda 4; 2 Petero 2:3.

Uturorero tw’Ukuburira

10, 11. Ni uturorero dutatu tw’imburizi utuhe Petero yatanze?

¹⁰ Mu gushimangira ivy’uko Imana izogira ico ikoze ku bakora ikibi n’ibigirankana, Petero aratanga uturorero dutatu tw’imburizi two mu Vyanditswe. Ubwa mbere yanditse, ati “Imana [ntiya]giriye ikigongwe abamarayika bākoze ivyaha.” Uko Yuda abivuga, abo “[ntiba]gumye mu bukuru bgabo, ariko bātaye ahantu habo” mw ijuru. Baje kw isi imbere y’Umwuzure hanyuma biyambika imibiri y’inyama kugira baje mu vyo guhuza ibitsina n’abakobwa b’abantu. Igihano baronse kubera iyo ngeso itajanye n’akamere kandi itabereye, batawe muri “Tarutare,” canke nk’uko inkuru ya Yuda ibivuga, “[barindirijwe] kuzocirwakw iteka ryo ku musi uhambaye, bari mu minyororo idashira no mu mwiza.”—2 Petero 2:4; Yuda 6; Itanguriro 6:1-3.

¹¹ Ubukwirikira, Petero arerekeza ku bantu bo mu misi ya Nowa. (Itanguriro 7:17-24) Avuga yuko mu gihe ca Nowa Imana “itāgiriye ikigongwe isi ya kera, . . . aho yazana umwuzure kw isi y’abatayubaha.” Amaherezo, Petero yanditse yuko Imana yashizeho ‘akarorero ku bantu batibanga Imana k’ibizoza,’ mu ‘kugira umunyota ibisagara vy’i Sodomu n’i Gomora.’ Yuda aratanga ayandi makuru ngo abo bantu ‘bihaye ubusambanyi birenze urugero kandi bagakurikira imibiri mu buryo itaremwe.’ (2 Petero 2:5, 6; Yuda 7) Abagabo ntibǎhuza ibitsina n’abagore mu buryo butemewe vyonyene, ariko kandi baripfuza umubiri w’abandi bagabo, mbere bikaba bishoboka ko bipfuza n’umubiri w’ibikoko bukoko.—Itanguriro 19:4, 5; Abalewi 18:22-25.

12. Nk’uko Petero abivuga, ni mu buhe buryo ingeso igororotse itangirwa impera?

¹² Yamara ubwo nyene, Petero avuga yuko Yehova ari uwuha impera abamusukurira badahemuka. Nk’akarorero, arigana ukuntu Imana “[yakijije] Nowa, umwigisha w’ivyo kugororoka, hamwe n’abandi ndwi” igihe yazana Isegenya. Arongera akavuga ivy’uko Yehova yarokoye “Loti, umugororotsi” mu gihe ca Sodomu, agasozera avuga, ati ‘Umwami Imana arazi gukiza abamwubaha ibibagerageza, no kurinda abagabitanya ku bw’umusi w’amateka kugirango barandurwe.’—2 Petero 2:5, 7-9.

Ibikorwa Bikwiriye Igihano

13. Ni bande canecane barindirijwe ugucirwako iteka, kandi biboneka ko bihereza inzozi nyabaki?

¹³ Petero aradoma urutoke ababikiwe canecane gucirwako iteka n’Imana, ni ukuvuga “abagenda bakurikira akameremere kabo, bifuza ibihumanya bagakengera ababaganza.” Turashobora nko kwumva ishavu Petero yari afise igihe avuga, ati “Nta co batinya, ntibakūrwa kw ijambo, ntibahindishwa agashitsi no gutuka abanyacubahiro.” Yuda yanditse yuko ‘abo bantu . . . inzozi zabo zibatera kwonona imibiri yabo, . . . no gutuka abanyacubahiro.’ (2 Petero 2:10; Yuda 8) Inzozi zabo zishobora kuba zarimwo n’ivyo bǐshiramwo mu kwiyumvira vyerekeye igitsina biremesha ugukwirikirana ukwiryohereza mu vy’ukwimara inambu y’umubiri. None ni mu buhe buryo ‘bakengera abaganza’ kandi ‘bagatuka abanyacubahiro’?

14. Ni mu buryo ki abigisha b’ibinyoma ‘bakengera abaganza’ kandi ‘bagatuka abanyacubahiro’?

¹⁴ Ivyo babigira mu buryo bw’uko basuzugura ubukuru bwashinzwe n’Imana. Abakirisu b’abakurambere baserukira Yehova Imana y’inyacubahiro hamwe n’Umwana wayo, bigatuma haba icubahiro kinaka bambitswe. Niko, barakora amakosa, nk’uko Petero ubwiwe yayakora, ariko Ivyanditswe bihimiriza abagize ikorane kuyobokera mwen’abo banyacubahiro. (Abaheburayo 13:17) Udukosa twabo si impamvu namba y’ukubacokōra. Petero aravuga ngo abamarayika “ntibarega [abigisha b’ibinyoma],” naho nyene vyoba bibereye koko. Petero arashishikara, ati “arikw abo bantu bameze nk’ibikōko bitagira ubgenge, ibikōko bukōko, vyavukiye gutegwa no kwicwa, batuka ivyo batazi, guhonnya kwabo kuzobahonnya na bo.”—2 Petero 2:10-13.

“Bagisangira Namwe”

15. Ubuhinga abigisha b’ibinyoma bakoresha ni ubuhe, kandi ni hehe bakwirikiranira imikwegakwego yabo?

¹⁵ Naho abo bantu bononekaye “bumva ibibahimbara ar’ukwirirwa badayangwa” bakaba kandi “[ari] amarabaga n’agasembga,” bisubiye ni abantu bakevya. Bakora “mu mpisho,” bagakoresha “amagambo y’amaremano,” nk’uko Petero yari yabivuze imbere yaho. (2 Petero 2:1, 3, 13) Gutyo bashobora kutarwanya vyigaragaje utwigoro abakurambere bagira ngo bashigikire ingingo mfatirwako z’Imana mu vy’ukwigenza runtu, canke kudakurikirana vyibonekeje ukwiryohereza ubwabo mu vy’ukwimara inambu y’umubiri. Ahubwo, Petero avuga yuko bihereza ‘ibisosera bitagira urupimo mu nyigisho zabo zihendana bagisangira namwe ivyiza.’ Yuda na we yanditse, ngo “Abo n’ivyubirizi mw isangira ryanyu ry’urukundo.” (Yuda 12) Egome, nka kurya kw’ibitandara bikarishe vyo munsi y’amazi bishobora gusambura igihimba co munsi c’ubwato, bigatuma abasozabwato b’intiyubara basoma nturi, abigisha b’ibinyoma bǎriko bonona abatiyubara, bakaba biyerekana nk’ababafitiye urukundo vy’uburyarya mw “isangira rya[bo] ry’urukundo.”

16. (a) ‘Isangira ry’urukundo’ cari iki, kandi ni mu biki bisa na vyo abasambanyi bashobora gukoreramwo muri iki gihe? (b) Abigisha b’ibinyoma bitunira bande, none mwen’abo bategerezwa kugira iki?

¹⁶ Iryo ‘sangira ry’urukundo’ biboneka ko vyari ibihe vyahaba mu mibano, Abakirisu bo mu kinjana ca mbere bakegeranira hamwe kugira banezerererwe imfungurwa hamwe n’ivy’ukuja hamwe. Ivyabona vya Yehova muri iki gihe na bo nyene baregeranira hamwe mu mibano, kumbure ku bihe vy’ubukwe, ku mapikinike, canke kugira bamarane akagoroba. None abantu bononekaye bashobora gukoresha gute ivyo bihe kugira ngo bakwegakwege abohasigara? Petero yanditse, ngo “Amaso yabo yuzuye ubusambanyi, . . . [bagasuka] imitima idashikamye.” Bashinga “imitima [yabo] yamogoreye kwifuza inyungu” ku badashikamye mu vy’impwemu bananiwe no gutuma ukuri kubanyura bimwe vyuzuye. Nuko rero nuhabwe imburizi n’ivyashitse mu gihe ca Petero, kandi ube maso! Nunanire ibiryosharyosho ivyo ari vyo vyose bihumanye, kandi ntuhendwe n’ubutore canke ugutera igomwe kw’umubiri vy’umuntu akugirako ibiryosharyosho vy’ubusambanyi!—2 Petero 2:14.

“Inzira ya Balamu”

17. “Inzira ya Balamu” cari iki, kandi yagize iki Abisirayeli 24 000?

¹⁷ Ivyo ‘bivume’ baramaze igihe kinaka bazi ukuri. Bashobora kuba bakiboneka ko bashirutse ubute mw ikorane. Ariko Petero avuga, ati “Bātaye inzira igororotse, barazimira, bakurikira inzira ya Balamu, mwene Beyori, umwe yakunze ingero zo kugabitanya.” (2 Petero 2:14, 15) Inzira y’umuhanuzi Balamu kwari uguhanura ngo hagirwe ivy’ugukwegakwegera abantu mu vy’ubusambanyi kugirango yironkere inyungu. Yabwiye Umwami Balaki w’Umunyamowabu yuko Imana yovumye Isirayeli mu gihe abantu bokwoshwa bagakora ubusambanyi. Ingaruka yavyo, abenshi mu bantu b’Imana barakwegerewe n’abagore b’Abanyamowabu, hanyuma 24 000 baratikizwa biturutse ku ngendo yabo y’ubusambanyi.—Guharūra 25:1-9; 31:15, 16; Ivyahishuriwe Yohana 2:14.

18. Balamu yabaye intateshwa ku rugero ki, kandi ico vyavuyemwo kimenyesha iki ku bigisha b’ibinyoma?

¹⁸ Petero avuga yuko Balamu yatangiriwe igihe indogoba yiwe yavugana na we, yamara Balamu “yakunze ingero zo kugabitanya,” azikunda cane ku buryo no mu gihe ivyo vyashika ataretse “ibisazi” vyiwe. (2 Petero 2:15, 16) Ewe kuntu yari mubi! Haragowe abameze nka Balamu bose bagerageza kwonona abantu b’Imana mu kubosha ngo bakore ubusambanyi! Balamu yapfuye azize ububi bwiwe, bikaba ari integuza y’ibizoshikira abo bose bakurikira inzira yiwe.—Guharūra 31:8.

Imikwegakwego Yabo ya Kidiyabule

19, 20. (a) Abameze nka Balamu bagereranywa n’iki, kandi ni kuki? (b) Bakwegakwega bande, kandi gute? (c) Ni kuki dushobora kuvuga yuko imikwegakwego yabo ari iya kidiyabule, kandi dushobora dute kuyikingira tukayikingira n’abandi?

¹⁹ Mu kudondora abameze nka Balamu, Petero yandika ati: “Abo n’amasōko [canke imigezi] akamye, kandi n’ibipfungu bikubebga n’igihuhuta.” Ku ngenzi inyotewe mu bugaragwa, umugezi ukamye ushobora gusobanura urupfu. Ntibitangaje yuko “umwiza w’umuzitanya [urindirijwe]” abasa na mwen’ivyo! Petero arabandanya, ngo ‘Bavuga ibitumbaganyemw’ibitagira ico bimaze, basuka abariko baridohora mu bagenda bazimiye, babasukisha ukwifuza kw’umubiri n’ingeso z’isoni nke.’ Uko Petero abivuga, bakwegakwega abatazi utuntu n’utundi mu “[ku]basezeranira umwidegemvyo,” mu gihe ‘ubwabo ari abaja b’ubwononekare.’—2 Petero 2:17-19; Ab’i Galatiya 5:13.

²⁰ Imikwegakwego ya mwen’abo bigisha bononekaye ni iya kidiyabule. Bashobora kuvuga, nk’akarorero, bati ‘Imana irazi ko turi ab’intege nke n’uko dufatwa n’ihahame. Mu gihe rero twirekuye hanyuma tugashitsa ivyipfuzo dufise vy’ukwimara inambu y’umubiri, Imana izogira ikigongwe. Nitwatura icaha twakoze, izoturekurira nk’uko nyene yabigize igihe twari tukiza mu kuri.’ Ibuka yuko Diyabule yaganirije Eva mu buryo nk’ubwo, akamwemerera yuko ashobora gucumura ntihagire ico aba. Ku biraba Eva, Shetani yivugishije ngo gucumura ku Mana vyashobora gutuma Eva abonesherezwa akaronka n’umwidegemvyo. (Itanguriro 3:4, 5) Mu gihe vyoshika tugahwana n’umuntu yononekaye mwen’uwo yifatanije n’ikorane, dutegerezwa kwikingira no gukingira abandi mu gushikana ivy’uwo muntu ku babijejwe mw ikorane rya gikirisu.—Abalewi 5:1.

Gukingirwa n’Ukumenya Neza

21-23. (a) Ingaruka z’ukunanirwa gukurikiza ukumenya neza ni izihe? (b) Petero ayaga ivy’iyindi ngorane iyihe ija kwihweza ubutaha?

²¹ Petero asozera iki gice c’ibaruwa ryiwe mu kudondora ingaruka z’ukunanirwa gukurikiza ubumenyi yari yavuze imbere yaho ko ari ubwa nkenerwa rwose ku ‘buzima no ku kwubaha Imana.’ (2 Petero 1:2, 3, 8) Yanditse ngo: “Namba kumenya neza Yesu Kristo Umwami wacu n’Umukiza kwarabateye kudohoka, bakava mu vy’isi bihumanya, maze bakongera kuvyizingiramwo, bikabanesha, ivyo hanyuma vyabo birusha ivya mbere kuba bibi.” (2 Petero 2:20, impirikano ni izacu.) Ingene bibabaje! Mwen’abo mu gihe ca Petero bari bataye icizigiro c’igitangaza c’ubuzima budahwera bwo mw ijuru bakurikira ibihe binyika vy’ukwiryohereza mu vy’ubusambanyi.

²² Nuko Petero aravuga, ati “Icobaye ciza kuri bo, iyaba batigeze kumenya inzira yo kugororoka, hako basubira inyuma, bamaze kuyimenya, bagata icagezwe cera bāhawe. Ivyabashitseko n’ivy’uyu mugani w’ukuri ngw Imbga isubiye ku vy’idashwe; kandi, ngw Ingurube yuhagiwe isubiye kwivurunga mu vyondo.”—2 Petero 2:21, 22; Imigani 26:11.

²³ Iyindi ngorane isa n’iyari yatanguye kunyengetera Abakirisu ico gihe, ni co kimwe n’iyiriko inyengetera bamwebamwe muri kino gihe. Ico gihe, hari abo vyaboneka ko bidodomba ku vyerekeye icasa n’ukudashika kw’ukuhaba kwa Kirisitu kwari kwarasezeranywe. Reka twihweze ukugene Petero araba ivy’ico kibazo.

Mbega Uribuka?

◻ Ni uturorero dutatu utuhe Petero adondagura dutanga imburizi?

◻ Ni mu buhe buryo abigisha b’ibinyoma ‘bakengera abaganza’?

◻ Inzira ya Balamu ni iki, kandi ni gute abayikurikira bohava bakwegakwega abandi?

◻ Inkurikizi z’ukunanirwa gukurikiza ukumenya neza ni izihe?

[Ifoto ku rup. 24, 25]

Balamu ni akarorero ntangamburizi