“Nimube Beranda mu Migenzo Yanyu Yose”

“Nk’uko uwabahamagaye ari mweranda, namwe nimube beranda mu migenzo yanyu yose, nk’uko handitswe ngo: ‘Nimube beranda nk’uko nanje ndi mweranda.’ ”—1 PETERO 1:15, 16, UB.

1. Petero yateye akamo gute Abakirisu ngo babe beranda?

NI KUKI umuposolo Petero yatanze iyo mpanuro iri aho haruguru? Kubera yabona ko bikenewe ko umukirisu wese arinda ivyiyumviro vyiwe n’inkwakuro ziwe kugira agume abihuje n’ubweranda bwa Yehova. Gutyo, ayo majambo ari aho haruguru yayatanguririje mu kuvuga ati: ‘Mwamane ubwenge bubangutse kandi mwamane umutima ugavye, . . . nk’abana b’ingamburutsi, mureke kwishushanya na vya vyipfuzo mwahoramwo kera mutari bwamenye.’—1 Petero 1:13, 14, UB.

2. Ni kuki ivyipfuzo vyacu bitǎri vyeranda imbere y’uko tumenya ukuri?

² Ivyipfuzo twahoramwo ntivyari vyeranda. Kuki? Kubera ko abatari bake muri twebwe wasanga dukurikira uko isi ikora imbere y’uko twemera ukuri gukirisu. Petero ivyo yari abizi igihe yandika avyeruye ati: “Igihe cashize [kira]hāgije gukora ivy’abanyamahanga bakunda gukora, no kugendera mu ngeso z’isoni nke, n’izo kwifuza, no kunohorwa na vino, no kudandahirwa, no kurundāna aho bateretse, n’ibizira vyo gusenga ibigirwamana.” N’aho nyene, Petero ntiyadondaguye ibikwaku bitari vyeranda bikunda kugirwa n’isi turimwo ya kino gihe, kubera ko ico gihe bitari bizwi.—1 Petero 4:3, 4.

3, 4. (a) Twoshobora gute kurwanya ivyipfuzo bibi? (b) Abakirisu boba bakwiye kuba ba ntakanyengetera? Sigura.

³ Woba wabonye yuko ivyo vyipfuzo ari bimwe bikwegêra umubiri, amenge hamwe n’akanyengetera? Iyo turetse ivyo bikiganza, ivyiyumviro n’inkwakuro vyacu ntibiteba rero gucika ibitari vyeranda. Ivyo biratanga ikirorezo c’uko bikenewe ko tureka ububasha bw’ugutegeza bugakontorora inkwakuro zacu. Paulo ivyo yarabiseruye muri ubu buryo: “Nuko bene Data, ndabahanūra kubg’imbabazi z’Imana, ngo mutange imibiri yanyu ibe ibimazi bizima vyera[nda], bihimbara Imana, ni kwo kuyikorera kwanyu [n’ububasha bwanyu bw’integero, NW].”—Abaroma 12:1, 2.

⁴ Kugira dushikanire Imana inkuka nyeranda, dutegerezwa kureka ububasha bw’integero, atari akanyengetera, bukiganza. Mbega abǎhitanywe n’ubushegabo kubera baretse inyiyumvo zabo zikaganza inyirongōro yabo bangana iki! Ivyo ntibishaka kuvuga yuko akanyengetera dufise kabwirizwa kuzimanganywa; ahandiho, twoshobora gute guserura umunezero dufise mu busuku bwa Yehova? Ariko rero, niba dushaka kwimbuka ivyamurano vy’impwemu ah’ibikorwa vy’umubiri, dutegerezwa rero guhindukiza umuzirikanyi wacu ukaja ku buryo bw’ukwiyumvira bwa Kirisitu.—Ab’i Galatiya 5:22, 23; Ab’i Filipi 2:5.

Igiciro Ceranda, Ubuzima Bweranda

5. Ni kuki Petero yǐyumvamwo cane yuko ubweranda bukenewe?

⁵ Ni kuki Petero yǐyumvamwo cane yuko ubweranda bukirisu bukenewe? Kubera ko yari azi neza igiciro ceranda cǎrishwe kugira abantu bagamburutsi iyo bava bakagera bacungurwe. Yanditse ati: “Mu[ra]zi yukw ivyo mwacungujwe ngo muve mu ngeso zanyu z’imburakimazi mwatojwe na ba sogokuruza atar’ibishira, nk’ifeza cank’izahabu, ariko mwacungujwe amaraso y’igiciro kinini, nk’ay’umwagazi w’intama utagira agasembga cank’ibara, ni yo ya Kristo.” (1 Petero 1:18, 19) Egome, umwe Sôko ry’ubweranda, Yehova Mana, yari yararungitse kw isi Umwana wiwe w’ikinege, ‘Wa Mweranda,’ ngo arihe incungu yoha abantu inzira y’ukugiranira ubucuti bwiza na Mana.—Yohana 3:16; 6:69; Kuvayo 28:36; Matayo 20:28.

6. (a) Ni kuki kuri twebwe gukurikirana inyirongōro nyeranda bitoroshe? (b) Ni igiki gishobora kudufasha kugumya inyirongōro yacu ari nyeranda?

⁶ Ariko rero, ni ngombwa ngo twemere icese yuko bitoroshe kugira ubuzima bweranda kandi turi hagati mw isi yononekaye ya Shetani. Uno aratega imitego Abakirisu b’ukuri, abariko bagerageza kurokora igufa muri uru runkwekwe rw’ibintu rwiwe. (Abanyefeso 6:12; 1 Timoteyo 6:9, 10) Imikazo iva ku murimo dukora mw isi, iyiva ku rurwanyo ruterwa n’abo mu rugo, ku gatyekezo kw ishure hamwe no ku mukazo uva ku runganwe bisaba ko ugukomera mu vy’impwemu kuba ntahara kugira umuntu agumye ubweranda. Ivyo biratsindagirira ku ruhara rwa nkenerwa cane rurangurwa n’intohozo twebwe ubwacu tugira hamwe n’ukwitaba kwacu amahwaniro makirisu tudahorereza. Paulo yahanuye Timoteyo ati: “Gumya icitegererezo c’amajambo mazima wanyumvanye, ukigumishe ukwizera n’urukundo rubonerwa muri Kristo Yesu.” (2 Timoteyo 1:13) Turumva ayo majambo ntangamagara ku Ngoro y’Ubwami yacu no mu gihe c’intohozo ya Bibiliya tugira ukwa twenyene. Arashobora kudufasha kuba beranda mu nyirongōro yacu umusi ku wundi mu nyifato z’ibintu zitandukanye zitari nke.

Inyirongōro Nyeranda mu Rugo

7. Ubweranda bukwiye gukora iki ku buzima bwacu bwo mu rugo?

⁷ Igihe Petero yasubiramwo Abalewi 11:44, yakoresheje ijambo ry’ikigiriki haʹgi·os, risigura, “batanije n’icaha bakaba rero bariyeguriye Imana, ari batagatifu.” (An Expository Dictionary of New Testament Words, yanditswe na W. E. Vine) None ivyo bikwiye kugira iki kuri twebwe mu buzima bukirisu bwacu bwo mu rugo? Bitegerezwa kuba bisigura yuko ubuzima bwacu bwo mu rugo bukwiye kuba bushingiye ku rukundo, kuko “Imana ar’urukundo.” (1 Yohana 4:8) Urukundo ruranga ukwibabaza ni yo mavuta anonora imigenderanire iri hagati y’abatambukanyi no hagati y’abavyeyi n’abana.—1 Ab’i Korinto 13:4-8; Abanyefeso 5:28, 29, 33; 6:4; Ab’i Kolosayi 3:18, 21.

8, 9. (a) Ni inyifato y’ibintu nki ireremuka rimwe na rimwe mu muhira mukirisu? (b) Ni impanuro nki irongorotse Bibiliya itanga kuri ico kibazo?

⁸ Twoháva twiyumvira yuko uguserura urukundo mwen’urwo vyokwizana vyonyene mu rugo rukirisu. Yamara, turiyemerera yuko mu mihira mikirisu imwimwe urukundo rutama ruhangamye uko bikwiriye kuba bimeze. Vyoshobora gusa n’uko ruhangamye ku Ngoro y’Ubwami, ariko ibaze ukuntu ubweranda bwacu bwoshobora kugabanuka bitagoranye iyo turi i muhira. Maze woháva wibagira ningoga yuko umukazi wawe akiri umuvukanyikazi wawe mukirisu canke ko umunega wawe akiri wa muvukanyi nyene (kumbure akaba ari umusuku mugenwa canke umukurambere) aboneka ko yubahwa ku Ngoro y’Ubwami. Imitsi iraranda, imihazuko ikaze igashobora kureremuka. Ingingo nyatubiri yoshobora mbere gukukumba mu buzima bwacu. Ntibukibaye ubucuti bwo hagati y’umunega n’umukazi nka bumwe bwagirwa na Kirisitu, ariko bucitse gusa ubw’umuntu w’umugabo n’umuntu w’umugore bari mu mahâne. Baribagira yuko mu muhira hakwiye kuba hari akayaga karanga ubweranda. Kumbure bagatangura kuvuga nk’abantu bo mw isi. Ingene vuba mu kanwa hoshobora gutangura gusokorokamwo ijambo rishisha, ribāga mu nda!—Imigani 12:18; gereranya n’Ivyakozwe n’intumwa 15:37-39.

⁹ Ariko rero, Paulo ahanura ati: “Ntihaze hagire ibiyāgo bibi [mu kigiriki, loʹgos sa·prosʹ, “imvugo mpumanya,” ni ukuvuga rero itari nyeranda] biva mu kanwa kanyu, ariko muvuge ijambo ryiza ryose ryo gukuza ūkwiye kuribgirwa, kugira ngo riheshe abaryumvise ubuntu bg’Imana.” Ivyo kandi vyerekeye abumviriza bose bari muri nya muhira, tutibagiye abana.—Abanyefeso 4:29; Yakobo 3:8-10.

10. Impanuro y’ivy’ubweranda yerekeye gute abana?

¹⁰ Vyongeye iyi nyobozo yerekeye ubweranda irarāba n’abana nyene mu rugo rukirisu. Uzi ukuntu vyoroshe ko baza i muhira bavuye kw ishure bagatangura kwigāna ya nganiro ngarariji kandi itagira urupfasoni y’urunganwe rwabo rwo mw isi! Bana mwe, ntimube mujanwa n’inyifato zǎrangwa na ba bahungu b’imihimbiri bǎtuka umumenyeshakazoza wa Yehova, abameze nka bo b’akanwa k’ubupfu k’akarogosi bakaba bahari no muri iki gihe. (2 Abami 2:23, 24) Imvugo yanyu ntikwiye kuba iyihumanijwe na ya mvugo y’imporomoka y’abantu batihata na gato ngo bakoreshe amajambo yisoneye canke ngo bayarimbure. Ko turi Abakirisu, imvugo yacu ikwiye kuba nyeranda, iryoshe, yubaka, nyabuntu kandi “[i]runzwe umunyu.” Ikwiye kuba idutorānura ko dutandukanye n’abandi bantu.—Ab’i Kolosayi 3:8-10; 4:6.

Ubweranda n’Abaharurwa bo mu Rugo Iwacu Batizeye

11. Ni kuki ukuba beranda bidasigura ukwibona ugutungana?

¹¹ Naho twiva inyuma tugerageza kumogorera ubweranda, dukwiye kutaboneka nk’abirutisha abandi canke abibona ugutungana, canecane iyo tugirana ibintu n’abaharurwa bo mu rugo batizeye. Inyirongōro yacu nkirisu nyabuntu n’imiburiburi ikwiye kubafasha bakabona yuko tumeze ukundi mu buryo bwiza, yuko tuzi koko ubugene bw’ukuranga urukundo n’imbabazi, nka kumwe nyene vyagirwa na wa musamariya mwiza avugwa muri ca kirorezo Yezu yatanga.—Luka 10:30-37.

12. Abatambukanyi bakirisu bashobora gute gutuma ukuri kuba ugukwegēra kuruta, ku bubakane babo?

¹² Petero yaratsindagiriye ku buhambare bw’agatima kabereye twogira imbere y’abaharurwa b’urugo rwacu batizeye igihe yandikira abakazi bakirisu ati: “Namwe bagore n’uko, mugamburukire abagabo banyu, kugira ngo, naho bamwe batumvira ijambo ry’Imana, bareshwe n’ingeso nziza z’abagore babo, batagize ijambo bavuze, ni bābona ingeso zanyu zitunganye zifatanije n’ugutinya.” Umukazi mukirisu (canke umunega muri ivyo) ashobora gutuma ukuri kuba ugukwegēra kuruta, ku mwubakane wiwe atizeye, mu gihe inyirongōro yiwe ari iyitanduye, iranga uburimbūzi, kandi yisoneye. Ivyo bisigura yuko urutonde nkurikizwa rw’ivya gitewokarasi rukwiye kuba urugondeka kugirango nya mutambukanyi atizeye ntakengerwe canke ngo arenzweko ijisho.a—1 Petero 3:1, 2.

13. Abakurambere n’abasuku bagenwa rimwe na rimwe bashobora gute gufasha abanega batizeye kugira bashime ukuri?

¹³ Abakurambere n’abasuku bagenwa rimwe na rimwe barashobora gufasha mu kumenyana na nya munega atizeye, mu buryo bwa kibanyi. Muri ubwo buryo yoshobora kubona ko Ivyabona bameze ugusanzwe, ko ari abantu bisoneye kandi bitaho ibintu vyinshi cane, bagashiramwo n’ibindi atari ivya Bibiliya. Igihe kimwe umukurambere yaritayeho agakorwa k’uburovyi umunega umwe aruhukirako. Ivyo vyari bihagije kugira amene ishamba. Uwo munega yarahavuye acika umuvukanyi abatíjwe. Ikindi gihe, hari umunega atizeye yashîma ivy’inyoni bwoko bw’intwenzi, zitwa canari. Abakurambere ntibaciye bagodoka. Umwe muri bo yaratohoje ivy’izo nyoni ku buryo hanyuma ahwânye na nya mugabo, atanguza ikiyago kuri iryo remezo uno munega yikundira! Kuba beranda rero ntibisigura kuba indadarare canke kugira umutima waga.—1 Ab’i Korinto 9:20-23.

Mw Ikorane Twoba Beranda Gute?

14. (a) Bumwe mu buhinga Shetani akoresha kugira asenyure ikorane ni ubuhe? (b) Dushobora gute kunanira umutego wa Shetani?

¹⁴ Shetani ya Diyǎbule ni umucōkōranyi, kuko izina Diyǎbule mu kigiriki, di·aʹbo·los, risigura “indeganyi” canke “incōkōranyi.” Ubucōkōranyi ni kimwe mu bintu yanongereyemwo, kandi aragerageza kubukoresha mw ikorane. Ubuhinga yikundira ni ukuvuga urusaku. Twoba twirekerana tukaba abahěndwa biwe muri iyo nyirongōro itari nyeranda? Ivyo vyoshoboka bite? Mu kurutanguza, kurusubiramwo, canke mu kurwumviriza. Umugani munyarwevu watamura uti: “Umuntu w’ikigoryi yandurutsa intonganya, kand’[umucōkōranyi, NW] atandukanya abakundana cane.” (Imigani 16:28) Ni igiki cozina urusaku n’ubucōkōranyi? Dukwiye kuraba neza ko imvugo yacu yama ari iyubaka kandi ishingiye ku rukundo. Niba turondera ingeso nziza z’abavukanyi bacu aho kurondera ivyo twibaza ko ari utugeso tubitubi twabo, ikiyago cacu kizokwama nantaryo kiryoshe kandi kimota ivy’impwemu. Uribuka yuko kunegura vyoroshe. Kandi umuntu aza kuri wewe akavuga abandi urusaku yoshobora no kuja ku bandi akarukuvuga!—1 Timoteyo 5:13; Tito 2:3.

15. Ni insinzoke izihe zimeze nk’iza Kirisitu zizofasha gutuma bose mw ikorane baguma ari beranda?

¹⁵ Kugira ikorane turigumize ryeranda, twese turakeneye kugira wa muzirikanyi wa Kirisitu, tukaba tuzi kandi yuko insinzoke yiwe yiganje ari urukundo. Ni ho Paulo yahanuye Abanyakolosayi ngo babe banyambabazi nka Kirisitu, ati: “Nuko rero, nk’uko bibereye abātoranijwe n’Imana bera[nda] bakundwa na yo, mwambare umutima w’[imbabazi], n’ineza, n’ukwicisha bugufi, n’ugutekereza, n’ukwihangana, . . . muharirana, . . . Ikigeretse kur’ivyo vyose mwambare urukundo, ni rwo mugozi [ntamakemwa w’ubuhure, NW].” Maze yongeyeko iri: “Kand’amahoro ya Kristo aganze mu mitima yanyu.” Nta mazinda, mu gihe dufise ako gatima k’uguhárira, turashobora kugumya iyungabumwe n’ubweranda vy’ikorane.—Abi Kolosayi 3:12-15.

Ubweranda Bwacu Buriranga mu Kibano Cacu?

16. Ni kuki insengo yacu nyeranda ikwiye kuba insengo y’ubuhirwe?

¹⁶ Ababanyi bacu bo bite? Batubona gute? Twoba dushwarika umunezero uranga ukuri, canke dutuma kuremera nk’umunzeganzega? Niba turi beranda nk’uko nyene Yehova ari mweranda, bikwiye rero kwibonekeza mu mvugo yacu no mu nyirongōro yacu. Bikwiye kuboneka neza ko insengo nyeranda yacu ari insengo y’ubuhirwe. Ivyo ni kubera iki? Kubera ko Yehova ari Imana mpǐrwe, ishaka ko abasenzi bayo baba banyamunezero. Ni ho umwandikamazaburi yashoboye kuvuga ivyerekeye igisata ca Yehova mu bihe vya kera ati: “Harahiriwe igisata Imana yaco ari Yehova!” (NW) Twoba duca ikibatsi c’ubwo buhirwe? Abana bacu na bo boba bagaragaza ko bahāgíjwe n’ukuba mu gisata ca Yehova ku Ngoro y’Ubwami no ku materaniro?—Zaburi 89:15, 16; 144:15b.

17. Dushobora kugira iki mu buryo ngirakimazi kugira turange ubweranda burimbanye?

¹⁷ Turashobora kandi kuranga ubweranda burimbanye bwacu mu kugira agatima k’ugufashanya n’ak’ubuntu ndangabubanyi. Rimwe na rimwe birakenerwa ko ababanyi barema ikibiri, kumbure mu gusibura aho babaye, canke nk’uko biri mu bihugu bimwebimwe, bagafasha kugira basanure amayira n’amabarabara. Muri ivyo, ubweranda bwacu bushobora kugaragarira kandi mu kuntu tubungabunga ubusitani bwacu, imbuga yacu canke irindi shamvu. Niba dusiga umwavu wandagaye, canke imbuga yacu ari urufayi canke iriko umwavu, ngirango mbere ikaba irimwo ibiduga vyapfuye aho bose babibona, twoshobora none kuvuga yuko ababanyi bacu tububaha?—Ivyahishuriwe Yohana 11:18.

Ubweranda ku Kazi no kw Ishure

18. (a) Ni igiki usanga kitoroshe ku Bakirisu muri iki gihe? (b) Dushobora kuba abatandukanye n’isi gute?

¹⁸ Umuposolo Paulo yarandikiye Abakirisu bo mu gisagara kitǎri ceranda c’i Korinto, ati: “Nabandikiye mw’ibaruwa riheruka ko mworeka kunywana n’abasambanyi; ariko simvuze abasambanyi bo kur’iyi si canke abimanyi canke ibisuma canke abasenga ibigereranyo: ahandiho mwoba mukwiye kuva kur’iyi si.” (1 Ab’i Korinto 5:9, 10, UB) Ivyo ni ikitoroshe ku Bakirisu usanga buri musi bategerezwa kuvangana n’abantu b’abashegabo canke batigenza runtu. Ako ni agasuzumisho kanini k’ubutadohoka, canecane mu mico kama aho usanga agatuno k’ivy’ukwimara inambu y’umubiri, ubupfumbatishwe, n’ubunyuruji biremeshwa canke bikirengagizwa. Ibintu bimeze gutyo, ntidushobora kugerageza gucuvya imfatirwako twisunga kugira tuboneke ko turi “abasanzwe” mu maso y’abadukikuje. Ahubwo, inyirongōro nkirisu nyabuntu yacu ariko itameze nk’iy’abandi, ikwiye gutuma tuba insobanuke ku bantu b’inkerebutsi, ku bemera icese ko bakenye ivy’impwemu kandi bariko barondera ikintu ciza gusumba.—Matayo 5:3; 1 Petero 3:16, 17.

19. (a) Ni udusuzumisho duki mwebwe abana mufise kw ishure? (b) Ni igiki abavyeyi bashobora kugira ngo bashigikire abana babo hamwe n’inyirongōro yabo nyeranda?

¹⁹ Ni nk’ukwo nyene, hariho udusuzumisho twinshi abana bacu bahangana na two kw ishure. Mwebwe abavyeyi mwoba mugendera ishure abana banyu bigako? Mwoba muzi ubwoko bw’akayaga kahagwiriye? Mwoba muhanahana amakuru n’abarimu? Ni kuki ivyo bibazo bihambaye? Kubera ko mu turere tw’isi tutari duke two mu bisagara usanga amashure yacitse amadonzi y’ikorabukazi, ibiyayuzi n’ihuzabitsina. Abana banyu boshobora gute kuguma bafise ukutadohoka hamwe n’inyirongōro vyeranda niba bataronka inshigikiro nyembabazi y’abavyeyi babo? Paulo ntiyihenze mu guhanura abavyeyi ati: “Ba se, ntimukaratse abana banyu, ngo ntibaranduke imitima.” (Ab’i Kolosayi 3:21) Uburyo bumwe bw’ukurandura abana imitima ni ukunanirwa gutahura imbangamyi hamwe n’udusuzumisho bibashikira buri musi. Ukwitegurira kurwanya inyosha kw ishure bitangurira mu kayaga k’ivy’impwemu ko mu muhira mukirisu.—Gusubira mu vyagezwe 6:6-9; Imigani 22:6.

20. Ni kuki ubweranda ari ntahara kuri twebwe twese?

²⁰ Mu gusozera, ni kuki ubweranda ari ntahara kuri twebwe twese? Kubera ko ico bukora budukingira ibitero vy’isi hamwe n’ukwiyumvira vya Shetani. Bugize kuba umuhezagiro ubu no muri kazoza. Burafasha kutugumiriza ubuzima buzoba ubuzima nyakuri mw isi nshasha y’ivy’ugutungana. Buradufasha kuba Abakirisu banyaburimbane, bēgêreka, baserura akari ku mutima—atari abanyeshaka ndenzarugero b’intakurako. Muri make, butuma tumera nka Kirisitu.—1 Timoteyo 6:19.

[Akajambo k’epfo]

Wewe Uribuka None?

◻ Ni kuki Petero yabonye ko guhanura Abakirisu bikenewe mu vy’ubweranda?

◻ Ni kuki bitoroshe kugira ubuzima bweranda?

◻ Twese dushobora kugira iki ngo turyohore ubweranda mu rugo bimwe birushirije?

◻ Kugira ikorane rigume ari ryeranda, ni inyirongōro nki itari nyeranda dukwiye kuzibukīra?

◻ Dushobora gute kuguma turi beranda ku kazi no kw ishure?

[Amafoto ku rup. 26, 27]

Twebwe Ivyabona vya Yehova, dukwiye kuba banyamunezero mu gusukurira Mana hamwe no mu yindi mikwakwaguro