‘Mutegerezwa Kuba Beranda Kuko Jewe Ndi Mweranda’

‘Mube beranda, kuko jewe Yehova Imana yanyu ndi mweranda.’—ABALEWI 19:2.

1. Abantu bamwebamwe usanga barimburwa beranda n’isi ni bande?

MENSHI mu madini maninimanini y’iyi si ari n’abo arimbura ko ari beranda. Māma Tereziya amenyekanye mu Buhindi kenshi akunda kubonwa ko ari mweranda kubera yihebera aboro. Pāpa yitwa “Muvyeyi Mweranda.” Uwafonze umuhari wa Gatolika wa none witwa Opus Dei, ari we José María Escrivá, Abagatolika bamwebamwe babona ko ari “indorerwako y’ubweranda.” Idini y’Abahindu irafise abiheberamana bayo bitwa abaswami, ari bo bagabo beranda. Gandhi yarasonerwa rwose nk’umuntu mweranda. Idini ya Budha irafise abamonaki beranda bayo, Isiramu ikagira abanabi beranda bayo. Ariko neza na neza kuba mweranda bisigura iki?

2, 3. (a) Amajambo “mweranda” na “ubweranda” asigura iki? (b) Ibibazo bimwebimwe bikeneye kwishurwa ni ibihe?

² Ijambo “mweranda” risobanuwe ko ari “1. . . . yifatanije n’ububasha bwa kimana; mutagatifu. 2. Arabanwa canke akwiriye ugusengwa canke gusonerwa cane . . . 3. Abaho akurikiza uburyo bw’ivy’idini canke bw’ivy’impwemu bwumije canke bukirurutse mu vy’ukwigenza runtu . . . 4. Atowe canke ashizwe iruhande ku bw’intēgo yinaka y’ivy’idini.” Mu makikuro yo muri Bibiliya, ubweranda busigura “ubutǒsoke canke ubutyoroke; ubutagatifu.” Dukurikije igitabu c’irābiro ry’ivya Bibiliya citwa Insight on the Scriptures, “[ijambo] ry’amamuko ry’igiheburayo qoʹdhesh ritanga iciyumviro c’ubutanywe, ubwiharizwe, canke ubwerāre ku Mana, . . . ubumere bw’ukuba ashizwe hampande ngo abe uw’ubusuku bw’Imana.”a

³ Ihanga rya Isirayeli ryabwirijwe kuba ryeranda. Amateka y’Imana yavuga ati: ‘Ndi Yehova Imana yanyu: nimwiyerāze rero, mube beranda, kuko nanje ndi mweranda.’ Ni nde yari we Sôko ry’ubweranda? Vyoshobotse gute ko Abisirayeli banyamakemwa bacika beranda? Kandi muri kino gihe ni ivyigwa biki vyo ku bwacu dushobora gusanga mu kamo Yehova adutera ko kugira ubweranda?—Abalewi 11:44.

Ukugene Isirayeli Yari Ifatanye na Sôko ry’Ubweranda

4. Ubweranda bwa Yehova bwatangiwe akarorero gute muri Isirayeli?

⁴ Buri kintu gifatanye n’ugusenga Yehova Mana kwa Isirayeli cabwirizwa kurimburwa ceranda kandi kigafatwa ukwo. Ivyo hǎri kuki? Kubera ko Yehova ubwiwe ari we mamuko na sôko vy’ubweranda. Inkuru Musa atanga ya rya tegurwa rya ya taberenakulo nyeranda na ya mishanana n’ibisharizo, isozerera kuri aya majambo: “Maze bacura akabāte [gakayangana], ni co gitsibo cera[nda], mw izahabu iramuye, bakandikakw amajambo mu buryo bgo guca amagarwe ku kabuyenge ko kudoma ikimenyetso, ngo [Ubweranda ni ubwa Yehova, NW].” Ako kabate gakayangana gakozwe mw izahabu iramuye kaboherwa ku gitambara co ku mutwe c’umuherezi mukuru, kakaba kasigura ko ashizwe ku ruhande ku bw’ubusuku bw’ubweranda budasanzwe. Igihe Abisirayeli bǐbonera ico kimenyetso canditseko gíshwarika ku muco w’izuba, caguma kibibutsa ubweranda bwa Yehova.—Kuvayo 28:36; 29:6; 39:30.

5. Abisirayeli banyamakemwa bari gushobora gute kurimburwa beranda?

⁵ Ariko none Abisirayeli bocitse beranda gute? Vyobaye gusa biciye mu bucuti bwa cane bogiranira na Yehova hamwe no mu nsengo ityoroye bomushikanira. Bari bakeneye ubumenyi ntagakosa bwerekeye ‘Umwe Mweranda Arushirije’ kugirango bamusenge mu bweranda, mu butosoke bwo ku mubiri no mu vy’impwemu. (Imigani 2:1-6; 9:10) Abisirayeli rero babwirizwa gusenga Imana bafise interangiro ityorotse n’umutima utyorotse. Ubwoko bw’insengo ubwo ari bwo bwose burimwo uburyarya bwobaye ubushisha kuri Yehova.—Imigani 21:27.

Igituma Yehova Yáragirije Isirayeli

6. Abayuda bo mu misi ya Malaki bafashe gute imeza ya Yehova?

⁶ Ivyo vyaratangiwe ikirorezo neza igihe Abisirayeli bǎzana, n’ubugumyi n’akantu, inkuka z’imicaca, zirwaye, ku rusengero. Akóresheje umumenyeshakazoza wiwe Malaki, Yehova yarabagirije ivy’amashikanwa yabo agayitse, ati: “Simbanezererwa na gatoya, ni k[o Yehova, NW] Nyen’ingabo agize, kandi sinzokwemera ishikanwa munshikaniye. . . . Ariko mweho murarihumanya, kuko muvuga, mut’Ameza y[a Yehova, NW] aranduye, kandi n’ivyo aduhēra kuri yo vy’ivyo kurya n’ibikēngēretse. Ikindi muvuga, mut’Ewe miruho turimwo! kandi muravyimyoza, ni k[o Yehova, NW] Nyen’ingabo agize; kandi muzana ico munyaze, n’igicumbagira n’ikirwaye: uko ni ko muzana amashikanwa. Mbega ben’ayo mashikanwa noyemera? ni k[o Yehova, NW] abaza.”—Malaki 1:10, 12, 13.

7. Ni inkwakuro nki zitari nyeranda Abayuda bǎriko bafata mu kinjana ca gatanu B.G.C.?

⁷ Malaki yarakoreshejwe n’Imana kugira yagirize Abayuda imimogorero mibi yabo, ngirango nko mu kinjana ca gatanu B.G.C. Abaherezi bǎtanga akarorero ntakimazi, n’inyirongōro yabo ntiyari nyeranda namba. Abantu, kubera ko bǎkurikira ubwo buyobozi, bǎri indegarege mu vy’ugukurikiza ingingo, gushika aho mbere bahukana n’abagore babo, kugira kumbure bashobore kwirongorera abagore bapagani bakiri bato. Malaki yanditse ati: “[Yehova, NW] yabaye icabona canyu, mwe n’umugore wawe wo mu bucance, uwo waryarutse,b nah’ar’umugenzi wawe, akaba n’umugore w’isezerano. . . . Nuko rero mwirinde mu mitima yanyu, ntihagire ūryaruka umugore wiwe wo mu bucance. Kuko nanka ivyo kwahukana, ni k[o Yehova, NW] Imana y’Abisirayeli agize.”—Malaki 2:14-16.

8. Bamwebamwe mw ikorane rikirisu bagizwe iki n’ukuntu umwahukano ubonwa muri iki gihe?

⁸ Mu bihe vya none, mu bihugu vyinshi aho umwahukano uronkwa bitagoranye, urugero rw’imyahukano rwaraduze. N’ikorane rikirisu ntiryabuze kugira ico riba. Bamwebamwe, aho kurondera imfasho y’abakurambere kugira biyuburure intambamyi zibashikira hanyuma bagerageze gutuma umwabirano wabo utunganirwa, bǎrihuse guheba abubakane babo. Abana kenshi ni bo basigara barishura bimwe bibabaje, mu vy’akanyengetera.—Matayo 19:8, 9.

9, 10. Dukwiye kuzirikana dute insengo dushikanira Yehova?

⁹ Nk’uko twabibonye haruguru, turavye inyifato y’ibintu yo mu vy’impwemu y’agaterantimba yari ihari mu gihe ca Malaki, Yehova yaraneguye adahisha insengo y’aba Yuda yari iyidafashe hanyuma araheza aranga yuko yokwemeye gusa insengo ityorotse. Ivyo none ntibikwiye gutuma tuzirikana ivyerekeye ubusinzoke bw’ugusenga Yehova Mana kwacu, we Mukama Segaba w’ihangāre, we Sôko ry’ubweranda nyakuri? Twoba vy’ukuri dushikanira Imana ubusuku bweranda? Ubwo tuguma twitosoye mu vy’impwemu?

¹⁰ Ivyo ntibisigura yuko ari ngombwa ngo tube inkemuke, ico kikaba ari ikidashoboka, canke ko dukwiye kwigereranya n’abandi. Ahubwo, bisigura riho yuko umukirisu wese akwiye kuba ashikanira Imana insengo ingana n’aho ageza aravye uko ivyiwe vyifashe. Ivyo vyerekeye ubusinzoke bw’insengo dushikana. Ubusuku butagatifu dushikana bukwiye kuba bungana n’aho tugeza hose—ubusuku bweranda. Ivyo tubishitsa dute?—Luka 16:10; Ab’i Galatiya 6:3, 4.

Imitima Ityorotse Ijana ku Nsengo Ityorotse

11, 12. Inyirongōro itari nyeranda ibanziriza hehe?

¹¹ Yezu yarigishije bitomoye yuko ibiri mu mutima bizogaragazwa n’ivyo umuntu avuga n’ivyo agira. Yezu yaravuze abwira ba Bafarisayo bǐbona ubutungane ariko atari beranda, ati: “Mwa bana b’inzoka mwe, mwoshobora mute kuvuga ivyiza muri babi? Ibibōgabōga mu mutima ni vyo akanwa kavuga.” Mu nyuma yararanze yuko inkwakuro nkorakibi zituruka ku vyiyumviro nkorakibi biri mu mutima, ari ho muntu w’imbere. Yavuze ati: “Ibiva mu kanwa biba biturutse mu mutima, ni vyo bimuhumanya. Kuko mu mutima havamw’ivyiyumviro bibi: ubgicanyi, ubusambanyi, ubushakanyi, ubgivyi, kwagiriza abandi ibinyoma, ibitutsi. Ivyo vyose ni vyo bihumanya umuntu.”—Matayo 12:34; 15:18-20.

¹² Ivyo biradufasha gutahura yuko inkwakuro zitari nyeranda zidapfa kwiyadukiza canke ngo zibe ata co zahereyeko. Ziva ku vyiyumviro bihumanya biba vyari bibunze mu mutima—ivyipfuzo vyinyegeje, ngirango mbere n’ivyishushanirizo. Ico ni co catumye Yezu ashobora kuvuga ati: “Mwarumvise ko vyāvuzwe, ngo Ntugasambane. Ariko jeho ndababgira yuk’umuntu wese [abandanya kurāba umugore ku buryo amugirira ihahame, NW], aba amaze gusambana na we mu mutima wiwe.” Mu yandi majambo, ubusambanyi n’uburengabigo biba vyamaze gushinga imizi mu mutima imbere y’uko inkwakuro iyo ari yo yose igirwa. Maze, ivyiyumviro bitari vyeranda bihawe akaryo nyako, bica bicika inyirongōro itari nyeranda. Ubusambanyi, uburengabigo, ubusodomu, ubusuma, amarogoto, n’ubuhuni, biraheza bikaba bimwebimwe mu bivamwo vyibonekeza.—Matayo 5:27, 28; Ab’i Galatiya 5:19-21.

13. Ni uburorero bumwebumwe ubuhe bw’ukugene ivyiyumviro bitari vyeranda bishobora kujana umuntu ku nkwakuro zitari nyeranda?

¹³ Ivyo bishobora gutangirwa ikirorezo mu buryo butari bumwe. Mu bihugu bimwebimwe, inzu z’ibikino zigwirirana nk’akaranda, bigatuma abantu boroherwa no gukina akamari. Umuntu yoshobora guháva yoshwa ngo aje kuri ico gisâmuti, kugira agerageze gutunganya imbangamyi afise mu vy’amahera. Ugutegēza kw’impendabwenge kwoshobora gusuka umuvukanyi agashibura canke akajoborora ingingo za Bibiliya yisunga.c Ahandi na ho, kubera ko ivyerekana ubweruzi kuri TV, mu mavidewo, mu vyuma vy’intasobwa canke mu bitabu, bitagoye kuronka, vyoshobora gushikana umukirisu mu nyirongōro itari nyeranda. Apfa gusa kwanjanjwa ku vyikingizo vyiwe vyo mu vy’impwemu, imbere y’uko anabimenya akaba yaguye mu bushegabo. Ariko kenshi ukunyererera mu caha bitangurira mu muzirikanyi. Egome, iyo ibintu vyifashe gutyo aya majambo ya Yakobo arataha: “Umwe wese arageragezwa n’ivyipfuzo vyiwe bimukwega bikamuryosharyosha; maze, ivyo vyipfuzo bimaze kurema, biravyara igicumuro, igicumuro na co kimaze gushika mu butigu kikavyara urupfu.”—Yakobo 1:14, 15, UB; Abanyefeso 6:11-18.

14. Abatari bake bǎkize gute bavuye mu nyirongōro yabo itari nyeranda?

¹⁴ Tugahirwa, Abakirisu benshi bacumúra bivuye ku bugoyagoye bararanga ukwihana nyakuri, abakurambere na bo bakabangukirwa no kugarukana mwen’abo mu vy’impwemu. N’abenshi bacibwa bivuye ku kubura ukwihana usanga bihanura hanyuma bagasubizwa mw ikorane. Barahava bagatahura ukugene Shetani yabasēzūtseko bitamugoye igihe bǎrekerana ivyiyumviro bitari vyeranda bikabashinga imizi mu mutima.—Ab’i Galatiya 6:1; 2 Timoteyo 2:24-26; 1 Petero 5:8, 9.

Agahigisho—Guhangana n’Ubugoyagoye Bwacu

15. (a) Ni kubera iki dutegerezwa guhangana n’ubugoyagoye bwacu? (b) Ni igiki codufasha kwemanga ubugoyagoye bwacu?

¹⁵ Dutegerezwa kugira akigoro tukamenya umutima wacu bwite ata kwibesha. Twoba n’umutima ukunze dúhangana n’ubugoyagoye bwacu, tukabwemanga, hanyuma tukigora kugira tubuneshe? Twoba n’umutima ukunze túbaza umugenzi w’imvugishakuri ukugene twoshobora kuryohora, hanyuma maze tukumviriza impanuro aduha? Kugira tugume turi beranda, dutegerezwa kwiyuburura udukosa twacu. Kubera iki? Kubera iko Shetani azi ubugoyagoye bwacu. Azokoresha ibidendekeranyo vy’incacanya vyiwe kugira atwoherereze mu caha no mu nyirongōro itari nyeranda. Arakoresha ibikwaku vyiwe vy’ubugunge akagerageza kudutanya n’urukundo rw’Imana kugira ntitube tucerājwe canke tukiri n’ico tumaze ku bw’insengo ya Yehova.—Yeremiya 17:9; Abanyefeso 6:11; Yakobo 1:19.

16. Ni amatati maki yari muri Paulo?

¹⁶ Umuposolo Paulo yari afise ibigeragezo n’udusuzumisho vyiwe bwite, nk’uko yabishingiye intahe mw ikete yandikiye Abaroma: “Ndazi yuko muri jewe, mu kameremere kanje, ata ciza kimbamwo: kuko kugomba gukora iciza kubana nanje, ariko kugikora nta kwo. Kukw iciza ngomba atari co nkora, arikw ikibi ntagomba akaba ari co nkora. . . . Nnezererwa ivyagezwe n’Imana mu mutima wanje, ariko mbona ikindi kingera kiri mu mubiri wanje kirwanya ikingera co mu mutima wanje, kikamfatira mpiri kuganzwa n’ikingera kiri mu mubiri wanje.”—Abaroma 7:18-23.

17. Paulo yatsinze ate mu rugamba yarimwo rw’uguhangana n’ubugoyagoye bwiwe?

¹⁷ Rero, igihambaye cane mu vyashikira Paulo ni uko yěmanze ubugoyagoye bwiwe. Naho yari abufise, yarashoboye kuvuga ati: “Nnezererwa ivyagezwe n’Imana mu mutima wanje.” Paulo yarakunda iciza kandi akanka ikibi. Ariko yari akiri n’intambara arwana, ya ntambara nyene twese turwana—kazire Shetani, isi, n’umubiri w’inyama. None twoshobora gute gutsinda rwa rugamba rw’ukugira tugume turi beranda, twitanije n’iyi si hamwe n’ukwiyumvira kwayo?—2 Ab’i Korinto 4:4; Abanyefeso 6:12.

Dushobora Dute Kuguma Turi Beranda?

18. Dushobora gute kuguma turi beranda?

¹⁸ Ubweranda ntibushikîrwa mu gukora ivyo tubonye, canke mu kuba ba ntaconiyima. Umuntu mwen’uwo azokwama agira ivyitwazo vy’inyirongōro yiwe kandi ikibi akama agerageza kugita ahandi. Kumbure turakeneye kwiga kwemera kubazwa ivyo dukora aho kuba nka bamwebamwe usanga bitwaza ngo ni ivyashitse kubera uburyo bǎkuze hamwe n’ingeso mvukanwa barazwe. Umuzi w’ingorane ni mu mutima wa nya muntu. Uwo muntu yoba akunda ivy’ugutungana? acambirwa cane ubweranda? yipfuza umuhezagiro w’Imana? Umwandikamazaburi yaratomoye ivy’uko ubweranda bukenewe igihe yavuga ati: “Tandukana n’ibibi, ukore ivyiza, rondera amahoro, uyakurikire.” Umuposolo Paulo yanditse ibi: “Urukundo rwanyu rwoye kuba uruheyiheyi. Mwanke ibibi, mumatane n’ivyiza.”—Zaburi 34:14; 97:10; Abaroma 12:9.

19, 20. (a) Dushobora gute kwubaka umuzirikanyi wacu? (b) Intohozo kirumara y’umuntu ubwiwe isaba ko agira iki?

¹⁹ Turashobora ‘kumatana n’iciza’ turavye ibintu uko Yehova abibona tukaba dufise umuzirikanyi nk’uwa Kirisitu. (1 Ab’i Korinto 2:16) Ivyo bishitswa gute? Mu gutohoza no mu kuzirikana kudahorereza kw Ijambo ry’Imana. Ingene iyo mpanuro imaze gutangwa kenshi! Ariko twoba tuyifata ata kwanjanjwa bimwe bihagije? Nk’akarorero, woba vy’ukuri utohoza iki kinyamakuru, ukarondera ibisomwa vya Bibiliya, imbere y’uko uza kw ihwaniro? Gutohoza ntidushaka kuvuga gusa yuko ari uguca imirongo ku twungane dukenyi muri buri gifungo. Ikiganiro co gutohoza gishobora gucishwako ijisho kigacibwamwo imirongo mu minuta nka 15. Ivyo none bisigura yuko tuba twatohoje nya Kiganiro cose? Mu vy’ukuri, vyoshobora gutwara isaha canke abiri gutohoza no gusóbwongera akunguro k’ivy’impwemu buri Kiganiro kizana.

²⁰ Kumbure turakeneye kwitoza indero kugira tuve imbere ya TV amasaha makeyi buri mushamvu hanyuma vy’ukuri twitunire ubweranda bwacu bwite. Intohozo idahorereza tugira iratwubaka tugakomera mu vy’impwemu, igakaza umuzirikanyi kugira dufate ingingo nziza—ingingo zijana ku “migenzo myeranda.”—2 Petero 3:11, UB; Abanyefeso 4:23; 5:15, 16.

21. Ni ikibazo giki gisigaye kwishurwa?

²¹ Ubu ikibazo ni iki: Ni mu yindi mice miki y’ubukwakwaguzi n’inyirongōro twebwe Abakirisu dushobora kuba beranda, nk’uko nyene Yehova ari mweranda? Ikiganiro gikurikira kiraja gutanga ivyiyumviro dukwiye kuzirikana.

[Utujambo tw’epfo]

None Wewe Uribuka?

◻ Umwe Sôko ry’ubweranda yagenekerejwe gute muri Isirayeli?

◻ Ni mu buryo ki insengo y’Abisirayeli itari nyeranda mu misi ya Malaki?

◻ Inyirongōro nyeranda ibanziriza hehe?

◻ Kugira tube beranda, ni igiki dutegerezwa kwemera icese?

◻ Dushobora dute kuguma turi beranda?