Zigama Iyungabumwe Muri Ino Misi Y’iherezo

“Ingeso zanyu zimere nk’uko bibereye ubutumwa bgiza . . . muhagaze mushikamye mufise impwemu imwe, muhuje umutima mu kurwanira ukwizera ubutumwa bgiza.”—AB’I FILIPI 1:27.

1. Ni ubusobanuke buki buri hagati y’Ivyabona vya Yehova hamwe n’isi?

IYI ni ya “misi y’iherezo.” Ata n’ikibazo, “ibihe bigoye” biri aho. (2 Timoteyo 3:1-5) Muri iki ‘gihe c’iherezo,’ ikirimwo umudurumbanyo mu kibane c’abantu, Ivyabona vya Yehova bariserukije bimwe vyisobanuye rwose, kubera amahoro n’iyungabumwe vyabo. (Daniyeli 12:4) Ariko buri muntu ari mu muryango w’abasenga Yehova ukwiye ku mubumbe wose, aterwa akamo ngo yihâte kugira azigame iryo yungabumwe.

2. Ni ibiki Paulo yavuze ku vyerekeye ukuzigama iyungabumwe, kandi ni ikibazo giki tuja kurimbura?

² Umuposolo Paulo yarakebuye Abakirisu bagenziwe ngo bazigame iyungabumwe. Yanditse ati: “Ingeso zanyu zimere nk’uko bibereye ubutumwa bgiza bga Kristo, kugira ngo nje kubagendera canke ntaje, numve ivyanyu ko muhagaze mushikamye mufise impwemu imwe, muhuje umutima mu kurwanira ukwizera ubutumwa bgiza, ko mudakangwa n’abarwanizi ku kintu na kimwe; ico kizobera abo ikimenyetso co guhona, ariko mwebge ic’agakiza, kandi kivuye ku Mana.” (Ab’i Filipi 1:27, 28) Amajambo ya Paulo araranga neza yuko dutegerezwa gukorera hamwe nk’Abakirisu. Nuko none, ni igiki kizodufasha kuzigama iyungabumwe rikirisu ryacu muri ibi bihe bigerageza?

Orohera Igomba ry’Imana

3. Abapagani ba mbere batakebwe bacitse abakurikizi ba Kirisitu ryari kandi biciye mu buryo ki?

³ Uburyo bumwe bw’ukuzigama iyungabumwe ryacu ni ukworohera igomba ry’Imana ibihe vyose. Ivyo bishobora gusaba imbogoro mu kwiyumvira kwacu. Rimbura abayoboke bayuda ba kare ba Yezu Kirisitu. Igihe umuposolo Petero yakwiririza ari bwo bwa mbere ku Bapagani batakebwe, mu 36 G.C., Imana yarahaye impwemu yera abo bantu b’amahanga hanyuma barabatizwa. (Ivyakozwe n’intumwa, ikigabane c’10) Gushika ubwo, Abayuda hamwe n’abari bakebanukiye idini y’ikiyuda, hamwe kandi n’Abasamariya, ni bo bonyene bari bacitse abakurikizi ba Yezu Kirisitu.—Ivyakozwe n’intumwa 8:4-8, 26-38.

4. Aho Petero amariye gusigura ivyabaye vyerekeye Koruneliyo, ni igiki yavuze, kandi ni agasuzumisho gaki ivyo vyazanye ku bayoboke bayuda ba Yezu?

⁴ Aho abaposolo hamwe n’abandi bavukanyi b’i Yeruzalemu bumvitiye ivyerekeye ihinduka rya Koruneliyo hamwe n’abandi Bapagani, barashimishijwe n’ukwumviriza raporo Petero ashikiriza. Ahejeje gusigura ivyari vyabaye vyerekeye Koruneliyo hamwe n’abandi Bapagani bizeye, uwo muposolo yaciye asozera muri aya majambo: “None kw Imana yabahaye [Abapagani bizeye] ingabire imwe [impwemu yera] n’iyo natwe [Abayuda] twahawe hamwe twizera Umwami Yesu Kristo, jewe [narí] iki gishobora gutāngīra Imana?” (Ivyakozwe n’intumwa 11:1-17) Abakurikizi bayuda ba Yezu Kirisitu ivyo vyarababereye agasuzumisho. Mbega bokworoheye igomba ry’Imana bakemera ko Abapagani bizeye baba abasenzi bagenzabo? Canke iyungabumwe ry’abasuku ba Yehova bo kw isi ryogiye mu kaga?

5. Abaposolo hamwe n’abandi bavukanyi bǐshuye gute ivy’uko Imana yěmeye ukwihana kw’Abapagani, kandi ni icigwa giki dushobora gukura kuri ako gatima?

⁵ Nya nkuru ivuga iti: “[Abaposolo n’abandi bavukanyi] bumvise ivyo barīhorera, bahimbaza Imana, bati Noneho rer’Imana ihaye n’abanyamahanga kwihana ngo baronke ubu[zima].” (Ivyakozwe n’intumwa 11:18) Ako gatima kǎragumije kandi karakorereza iyungabumwe ry’abakurikizi ba Yezu. Mu gihe kigufi gusa, umurimo w’ubukwiririji warateye imbere mu Bapagani, ari bo bantu b’amahanga, n’umuhezagiro wa Yehova wari kuri iyo mikwakwaguro. Twebwe ubwacu dukwiye kwihorera igihe ubufashanyi bwacu busabwe mu bijanye n’ishingwa ry’ikorane rishasha canke igihe hari imbogoro ya gitewokarasi yinaka yagizwe munsi y’ubuyobozi bw’impwemu yera y’Imana. Ubufashanyi bwacu n’umutima wacu wose buzoryohera Yehova bwongere budufashe kuzigama iyungabumwe ryacu muri ino misi y’iherezo.

Numatane n’Ukuri

6. Ukuri kugira iki kw iyungabumwe ry’abasenga Yehova?

⁶ Ko turimwo mu muryango w’abasenzi wa Yehova, turazigama iyungabumwe kubera ko twebwe twese ‘twigishwa na Yehova’ kandi tukaguma dushikamye ku kuri kwiwe guhishuye. (Yohana 6:45; Zaburi 43:3) Kubera ko inyigisho zacu zishingiye kw Ijambo ry’Imana, twese tuvuga rimwe. Turemera n’akamwemwe za mfungurwa z’ivy’impwemu turonswa na Yehova biciye kuri “wa mushumba w’umwizerwa kandi w’incabwenge.” (Matayo 24:45-47, NW) Iyo nyigisho isa kuri bose iradufasha kuzigama iyungabumwe ryacu kw isi yose.

7. Mu gihe twewe ubwacu twogorwa n’ugutahura ikintu kinaka, dukwiye kugira iki, kandi ni igiki tudakwiye kugira?

⁷ Bite hoho mu gihe twebwe ubwacu dufise ingorane y’ugutahura canke y’ukwemera ikintu kinaka? Dukwiye kuzamba kugira turonke urwevu kandi tukajamwo tukagira ubushakashatsi mu Vyanditswe hamwe no mu bisohokayandikiro bikirisu. (Imigani 2:4, 5; Yakobo 1:5-8) Ukuyaga n’umukurambere kwoshobora gufasha. Niba na buno nya kintu tudashoboye kugitahura, vyoshobora kuba vyiza kuruta, túkiretse kikirenganira. Kumbure amabwiro yandi kuri nya kibazo azosohorwa, hanyuma maze ugutahura kwacu kukabona gutamuruka. Ariko rero, vyoba ari bibi kugerageza kwumvisha abandi mw ikorane ngo bemere iciyumviro cacu bwite kimeze ukundi. Ivyo kwoba ari ukubiba amacakubiri, ntikwoba ari ugukora ngo dukingire iyungabumwe. Ese ingene ari vyiza kuruta, ‘kubandanya kugendera mu kuri’ no kuremesha abandi bakagenza kuno!—3 Yohana 4.

8. Ni agatima nyabaki kabereye dukwiye kugira ku kuri?

⁸ Mu kinjana ca mbere, Paulo yavuze ati: “Kuk’ubu turābira mu cirore ivyijiji, arikw ico gihe tuzorāba nk’abarābana imbonankubone. Ubu nzi agace, arikw ico gihe nzomenya rwose nk’uko namenywe rwose.” (1 Ab’i Korinto 13:12) Naho Abakirisu ba kare batǎbonye ibintu vyose ido n’ido, bagumye bunze ubumwe. Ubu turafise ugutahura gutomotse cane kuruta kw’intēgo ya Yehova hamwe n’Ijambo ryiwe ry’ukuri. Nitube inkengurutsi rero kubera ukuri twaronse biciye kuri wa ‘mushumba w’umwizerwa.’ Kandi nitube dukura ubwatsi kubona Yehova yaratuyoboye akoresheje iyungungane ryiwe. Naho tutǎmye dufise urwo rugero nyene rw’ubumenyi, ntitwicwa n’inzara canke ngo tunyoterwe mu vy’impwemu. Ahubwo, Umwungere wacu, Yehova, yamye atwunze ubumwe yongera aguma atubungabunga.—Zaburi 23:1-3.

Koresha Ururimi Neza!

9. Ururimi rushobora gukoreshwa gute kugira rukorereze iyungabumwe?

⁹ Ugukoresha ururimi kugira uremeshe abandi ni uburyo buhambaye bw’ugukorereza iyungabumwe n’agatima k’ubuvukanyi. Ya baruwa yatunganya ikibazo c’ivy’ugukebwa, nk’uko yarungitswe n’inama nyobozi yo mu kinjana ca mbere, yari isôko ry’indemesho. Aho bamariye kuyisoma, abayoboke b’Abapagani muri Antiyokiya “ba[ra]nezererwa iyo mpanūro.” Yuda na Sila, abari barungitswe báva i Yeruzalemu bafise iryo kete, ‘bǎrahanuye abavukanyi mu majambo menshi, barabaremesha.’ Nta mazinda, ukuhaba kwa Paulo na Barunaba na kwo nyene kwararemesheje kwongera kurakomeza abizera bagenzabo muri Antiyokiya. (Ivyakozwe n’intumwa 15:1-3, 23-32) Turashobora kugira vyinshi nk’ukwo igihe dutororokaniye amahwaniro makirisu kandi ‘tukaremeshanya’ biciye ku kuba tuhari no ku nsasanuro zubaka dutanga.—Abaheburayo 10:24, 25.

10. Kugira tuzigame iyungabumwe, ni igiki coshobora gutegerezwa kugirwa mu gihe habaye ubutukanyi?

¹⁰ Ariko rero, ikoresha ribi ry’ururimi rirashobora guhanamira iyungabumwe ryacu. “[Ururimi] n’urugingo rutoya, rukirarira ibikomeye,” vyanditswe n’umuyoboke Yakobo. “Rāba ishamba, naho ryoba rinini rite, ridomekwa n’akariro gake.” (Yakobo 3:5) Yehova aranka abatera amaruru. (Imigani 6:16-19) Ikiganiro mwen’ico gishobora gutera amacakubiri. None rero, hogirwa iki mu gihe habaye ubutukanyi, ni ukuvuga, ukwuriza umuntu imisibo canke kumuremereza amajambo y’ubushirasoni? Abakurambere bazogerageza gufasha uwagize nabi. Ariko rero, umutukanyi w’intihana akwiye gucibwa kugira amahoro y’ikorane, urupange hamwe n’iyungabumwe vyaryo bizigamwe. Washaka, Paulo yanditse ati: “[Ntimukivange] n’uwitwa mwene Data, namb’ar[i] . . . ūtukana, . . . ūmeze artyo, no gusangira ntimugasangire na we.”—1 Ab’i Korinto 5:11.

11. Ni kubera iki ukwicisha bugufi ari ukw’ingirakamaro mu gihe twavuze ikintu kigatuma haba umushamirano hagati yacu n’uwemera mugenzacu?

¹¹ Ukudadira ururimi biradufasha kuzigama iyungabumwe. (Yakobo 3:10-18) Ariko dufate ko hagize ikintu tuvuga kigatera umushamirano hagati yacu n’umukirisu mugenzacu. Ntivyoba bibereye none twibwirije tukagiranira amahoro n’umuvukanyi wacu, tugasaba imbabazi niba bikenewe? (Matayo 5:23, 24) Vy’ukuri, ivyo bisaba ukwicisha bugufi, canke ubwimanure bw’umuzirikanyi, ariko Petero yanditse ibi: “Mukenyere ukwicisha bugufi kugira ngo mukorerane: kukw Imana irwanya abībona, arikw abicisha bugufi ikabaha ubuntu.” (1 Petero 5:5) Ukwicisha bugufi kuzotuma ‘dukurikirana kugiranira amahoro’ n’abavukanyi bacu, tukiyemerera amakosa twakoze hanyuma tugasaba imbabazi uko bibereye. Ivyo birafasha kugira hazigamwe iyungabumwe ry’umuryango wa Yehova.—1 Petero 3:10, 11.

12. Dushobora gukoresha gute ururimi kugira dukorereze iyungabumwe ry’igisata ca Yehova?

¹² Turashobora guteza imbere agatima k’umuryango hagati y’abari mw iyungungane rya Yehova niba dukoresha ururimi rwacu neza. Kubera ko ivyo ari vyo Paulo yagira, yarashoboye kwibutsa Abanyatesalonike ati: “Mu[ra]zi ingene twari tumeze ku muntu wese muri mwebge, nk’uko se amera ku bana biwe, tubahanūra, tubaremesha, dushinga intahe, kugira ngo mugende nk’uko bibereye ab’Imana.” (1 Ab’i Tesalonike 2:11, 12) Kubera ko Paulo yari yaratanze akarorero keza muri ivyo, yarashoboye kwinginga Abakirisu bagenziwe ‘guhoza abarandutse imitima.’ (1 Ab’i Tesalonike 5:14) Iyumvire iciza kinini dushobora kugira dúkoresheje ururimi mu guhoza, kuremesha abandi no mu kububaka. Egome, “Ijambo riziye mu gihe kibereye, ewe kuntu ari ryiza!” (Imigani 15:23) Vyongeye, imvugo nk’iyo irafasha gukorereza no kuzigama iyungabumwe ry’igisata ca Yehova.

Ba Uharira!

13. Ni kuki dukwiye kuba duharira?

¹³ Uguharira uwakugiriye nabi yisabiye imbabazi ni ikintu c’intahara niba dushaka kuzigama iyungabumwe rikirisu. None dukwiye guharira kangahe? Yezu yabariye Petero ati: “Si, Gushika ku ncuro ndwi, ariko, Gushika ku ncuro mirongwirindwi n’indwi.” (Matayo 18:22, NW) Niba turi intaharíra, tuba turiko dukora kazire inyungu zacu bwite. Mu buryo ki? Urabona, ubwankanyi hamwe n’ugutunga akazîká bizotunyahura amahoro yo mu muzirikanyi. Kandi túmenyekanye ko uburyo tugira ibintu ari ububabaza kandi budaharira, twoshobora kwikwegera inabi. (Imigani 11:17) Ukugumya akazîká birabihira Imana, kandi birashobora gushikana umuntu ku gukora icaha gikomeye. (Abalewi 19:18) Uribuka ko Yohani wa Mubatizi yaciwe umutwe mu mugambi wapanzwe n’inkorakibi Herodiya, uno akaba ‘yari amufitiye akazîká.’—Mariko 6:19-28.

14. (a) Matayo 6:14, 15 hatwigisha iki ku vyerekeye uguharira? (b) Twoba dutegerezwa kwama turindira ko umuntu asaba imbabazi imbere yuko tumuharira?

¹⁴ Rya zambo ndorerwako rya Yezu ririmwo aya majambo: “Uduharire ivyaha vyacu, kuko natwe duhebera abari n’imyenda yacu bose.” (Luka 11:4) Niba turi intaharíra, umusi munaka duhakwa kutazoba tugiharirwa na Yehova Mana ivyaha vyacu, kuko Yezu yavuze ati: “Ni mwaharira abantu ivyaha vyabo, na So wo mw ijuru azobaharira namwe. Ariko ni mutāharira abantu ivyaha vyabo, na So na we ntazobaharira ivyaha vyanyu.” (Matayo 6:14, 15) Nuko rero, niba vy’ukuri tugomba kurangūra uruhara rwacu mu vy’ukuzigama iyungabumwe ry’umuryango wa Yehova w’abamusenga, tuzoharira abandi, kumbure vyonyene tukibagira inabi yoba yavuye ku kutiyumvira, kandi ikaba itagizwe ibigirankana. Paulo yavuze ati: “Muramutse mutase, nimwengengane, muheze murekuriranire: nk’uko Umukama yabarekuriye, namwe kube ari ko murekuriranira.” (Ab’i Kolosayi 3:13, UB) Iyo duhariranira, tuba dufashije kugira hazigamwe rya yungabumwe ry’agaciro ryo mw iyungungane rya Yehova.

Iyungabumwe Hamwe n’Ingingo Umuntu We Nyene Yifatira

15. Ni igiki gifasha abantu ba Yehova kugira bazigame iyungabumwe igihe bifatira ingingo bo ubwabo?

¹⁵ Imana yaturemanye ukwidegemvya muri twebwe, adutera agateka n’ibango vy’ukwifatira ingingo twebwe nyene. (Gusubira mu vyagezwe 30:19, 20; Ab’i Galatiya 6:5) Yamara, turashoboye kuzigama iyungabumwe ryacu kubera twumvira amateka n’ingingo vya Bibiliya. Turabirimbura igihe twifatira ingingo twebwe nyene. (Ivyakozwe n’intumwa 5:29; 1 Yohana 5:3) Dufate ko havyutse ikibazo ku vyerekeye ubwitaramure. Turashobora kwifatira ingingo twebwe nyene twishimikije amamenyeshwa dufise, mu kwibuka yuko ‘tutari ab’isi’ n’uko ‘inkota zacu twazivunjemwo amasuka.’ (Yohana 17:16; Yesaya 2:2-4) Nk’ukwo nyene, mu gihe dutegerezwa kwifatira ingingo twebwe nyene ku biraba imigenderanire iri hagati yacu na Reta, turarimbura ico Bibiliya ivuga ku vy’ ‘uguha Imana ivy’Imana,’ mugabo tukiyorohereza “abakuru ba rutura” (NW) mu bintu bijanye n’isi. (Luka 20:25; Abaroma 13:1-7; Tito 3:1, 2) Egome, ukurimbura amateka n’ingingo vya Bibiliya mu gihe twifatira ingingo twebwe nyene birafasha kuzigama iyungabumwe rikirisu ryacu.

16. Twoshobora gute gufasha kugira hazigamwe iyungabumwe igihe dufata ingingo zitari nziza canke mbi túravye Ivyanditswe? Tanga ikirorezo.

¹⁶ Turashobora gufasha kuzigama iyungabumwe rikirisu n’igihe dufata ingingo ituraba ubwacu gusa itari na nziza canke mbi turavye Ivyanditswe. Mu buryo ki? Mu kuranga ko twitwararikanye abandi urukundo boshobora gukorwako n’ingingo dufata. Tubitangire ikirorezo: Mw ikorane i Korinto kera, hǎravyutse ikibazo ku biraba ivy’inyama zatanzweko ibimazi ku bigirwamana. Ego ni ko, umukirisu ntiyojamwo mu birori vy’ugusenga ibigirwamana. Ariko rero, kurya inyama zasigaye mwen’izo zakuwemwo amaraso mu buryo bubereye zagurishwa mw isoko, nticari icaha. (Ivyakozwe n’intumwa 15:28, 29; 1 Ab’i Korinto 10:25) Mugabo rero, imburanyamutima z’Abakirisu bamwebamwe zaravuruzwe n’ivy’ukurya izo nyama. Ni ho Paulo yahimiriza abandi Bakirisu kwirinda kubatsitaza. Nkako, yanditse ati: “Namb’ivyo kurya bigwisha mwene Data, sinzopfa nongeye kurya inyama kugira ngo singwishe mwene Data.” (1 Ab’i Korinto 8:13) Nuko, naho ata teka rya Bibiliya canke ingingo itanga vyoba vyerekewe, umva ukuntu vyoba biranga urukundo turimbuye abandi igihe twifatira ingingo twebwe nyene zohava zigira ico zikora kw iyungabumwe ry’umuryango w’Imana!

17. Ni igiki kibereye kugirwa iyo dutegerezwa kwifatira ingingo twebwe nyene?

¹⁷ Niba tutazi neza ico twofata n’ico tworeka, ibiranga urwevu ni ugufata ingingo mu buryo dusigarana imburanyamutima idafyiriye, kandi abandi bakwiye kwubahiriza ingingo dufashe. (Abaroma 14:10-12) Mugabo ntiwumve, iyo twifatiye ingingo twebwe ubwacu, turakwiye kurondera ubuyobozi bwa Yehova mw izambo. Nka kumwe kw’umwandikamazaburi, dushobora kuzambana umwishimiro duti: “Umbangire ugutwi, . . . Kukw ari wewe gitandara canje n’igihome kinkīngira: nuko kubg’izina ryawe unje imbere, undōngōre.”—Zaburi 31:2, 3.

Niwame Uzigama Iyungabumwe Rikirisu

18. Paulo yatangiye gute ikirorezo iyungabumwe ry’ikorane rikirisu?

¹⁸ Mu rya mbere ku b’i Korinto ikigabane c’12, Paulo yakoresheje umubiri w’umuntu kugira atangire ikirorezo iyungabumwe ry’ikorane rikirisu. Yarashimikiye ku vy’ukuba magiriranire hamwe no ku bugirekamaro bw’urugingo rwose. “Iyo zose ziba urugingo rumwe, umubiri wobaye hehe?” ni ko Paulo yabajije. “Ariko noneho, ingingo ni nyinshi, umubiri ukaba umwe. Ijisho ntiryoshobora kubarira ikiganza, ngo Nta co ummariye; cank’umutwe kubarira ibirenge, ngo Nta co mummariye.” (1 Ab’i Korinto 12:19-21) Ni nk’ukwo nyene, mu muryango wa Yehova w’abamusenga, twebwe twese ntiturangura uruhara rumwe. Yamara, turunze ubumwe, kandi turakeneraniye.

19. Dushobora gute kwungukira ku ndonswa Imana itanga z’ivy’impwemu, kandi umuvukanyi umwe w’inararibonye yavuze iki kuri ivyo?

¹⁹ Nk’uko umubiri ukeneye ibifungurwa, imbungabungo n’ubuyobozi, turakeneye indonswa z’ivy’impwemu Imana iduha biciye kw Ijambo ryayo, ku mpwemu yayo no kw iyungungane ryayo. Kugira twungukire kuri izo ndonswa, dutegerezwa kuba turi mu muryango wa Yehova wo kw isi. Umuvukanyi umwe, inyuma y’imyaka myinshi mu busuku arangurira Imana, yanditse ngo: “Ndakura ubwatsi kubona nabayeho mu bumenyi bw’intēgo za Yehova kuva muri irya misi yaciye ikurikirwa n’umwaka w’1914 aho vyose bitari bitomotse cane . . . gushika uyu musi aho ukuri kurasa nk’izuba ryo ku mutaga. Niba hari ikintu cabaye ngirakamaro kuruta vyose kuri jewe, ni ukuguma niyegereje rwose iyungungane rya Yehova riboneka. Ivyo niboneye ubwa kare vyaranyigishije ukuntu kwishimira ukwiyumvira kw’umuntu ari ubujuju. Aho umuzirikanyi wanje unyuriwe n’ico kintu, nariyemeje kuguma hampande y’iri yungungane ryǐzerwa. Hari ukundi none umuntu yoshobora gutoneshwa na Yehova kandi agahabwa na we umuhezagiro?”

20. Twoshobora kwiyemeza kugira iki ku vyerekeye iyungabumwe ryacu twe tugize igisata ca Yehova?

²⁰ Yehova yahamagaye abantu biwe abakura mu muzitanya n’amacakubiri vy’iyi si. (1 Petero 2:9) Yatuzanye mw iyungabumwe rihezagiye tugirana na we ubwiwe, hamwe n’abemera bagenzacu. Iryo yungabumwe rizoba rihari mu runkwekwe rw’ibintu rushasha ubu rwegereje hafi. Muri iyi misi igoye rero, nitubandanye ‘kwiyambika urukundo’ no kugira ikintu cose dushobora ngo dukorereze kandi tuzigame iyungabumwe ryacu ry’agaciro.—Ab’i Kolosayi 3:14.

Wewe Wokwishura Ute?

◻ Ni kuki ukugira igomba ry’Imana hamwe n’ukumatana n’ukuri bidufasha kuzigama iyungabumwe?

◻ Iyungabumwe rifitaniye isano gute n’ikoresha ryiza ry’ururimi?

◻ Uguhárira birimwo ukugira iki?

◻ Dushobora gute kuzigama iyungabumwe igihe twifatira ingingo?

◻ Ni kuki twozigama iyungabumwe rikirisu?

[Ifoto ku rup. 16]

Nk’uko uyu mwungere agumya ubusho bwiwe hamwe, ni ko Yehova igisata ciwe akigumya cûnze ubumwe

[Amafoto ku rup. 18]

Dúsavye imbabazi twicishije bugufi iyo hari uwo tugiriye nabi, tuba dufashije gukorereza iyungabumwe