Tehk Mwahu Mwomwen Amwail Kin Rongorong

1-2. (a) Dahme Siohwa kin ketin wia ong sapwellime aramas akan rahnpwukat? (Melkahka 23:​1, 2, 5) (b) Dahme kitail pahn koasoiapene nan iren onop wet?

RAHNPWUKAT Siohwa kin ketikihong kitail soahng koaros me kitail anahne pwehn sukuhlki dahme e kin ketin padahkihong kitail nan Paipel. Kitail kak uhdahn pwungki dahme Depit koasoia ni eh koulki: “Siohwa iei Silepei. Sohte mehkot me I pahn anahne.”—Wadek Melkahka 23:​1, 2, 5.

² Ehu ahl me Siohwa kin ketin padahkih kitail iei ni atail mihting en mwomwohdiso kan. Ni mihting pwukat, kitail kin kalapw rong soahng kan me kitail sukuhlkier mwoweo. Mehnda ma kitail pil “poadidier teng nan padahk mehlel,” kitail anahne mehn kataman pwukat. (2 Pit. 1:12) Ahpw ni atail kin pwurupwurehng rong mehkot me kitail rongehr pak tohto mwoweo, ke kin apwalki rong kanahieng? Iren onop wet kak seweseiuk. Kitail pahn tehkpene dahme kahrehda kitail anahne rong kanahieng ni mihting kan. Kitail pil pahn kilang ia duwen irail kan me kin padahk nan mwomwohdiso ar kak sewese meteikan ren kin rong kanahieng. Oh kitail pil pahn koasoiapene ekei iren sawas kan me kak sewese kitail en kamwahwihala mwomwen atail kin rongorong. Ahpw keieu, kitail pahn tehkpene ihs me kin uhdahn koasoakoasoiong kitail.

TAMATAMAN ME SIOHWA ME KETIN MAHMAHSENIONG KITAIL

3. Ia duwen Siohwa eh kin ketin mahseniong kitail, oh ia duwen sapwellime ladu kan ar kin doadoahngki Paipel ni arail kin padahk?

³ Ni atail kin wadek Paipel, e kin mwomwen me Siohwa kin ketin mahmahseniong kitail. (2 Tim. 3:​16, 17) Sises mwahngih met. Uwen eh kin ketin doadoahngki Mahsen en Koht ni koahiek, irail kan me rongorong idek: “Ia duwen ohl menet eh ahneki loalokong en Nting Sarawi kan nan eh sohte kin iang sukuhl?” (Sohn 7:15) Aramas mohngiong mehlel kan uhdahn perenkihda ni Sises eh ketin kawehwehda Mahsen en Koht. Tepin Kristian kan, duwehte wahnpoaron Pohl oh Apolos, pil kin doadoahngki Mahsen en Koht pwehn sewese meteikan ren wehwehki dahme Siohwa ketin kupwurki ren wia. (Wiewia 17:​2, 3; 18:​24, 28) Kitail Sounkadehdehn Siohwa kan ese me neitail iren onop kan, audepen broadcast kan, padahk kan, oh kisin kasdo kan kin poahsoankihda Paipel. Aramas tohto me ehdin arail iang towehda atail mihting kan kin pwuriamweikihla mwomwen atail kin doadoahngki Paipel. Irail akan me mie arail padahk kan ni mihting kan kin doadoahngki Mahsen en Koht pwehn padahk. Oh re sohte kin wadekete Paipel, ahpw re kin sewese me rongorong kan ren ese ia duwen arail pahn kapwaiada dahme Paipel mahsanih.—Luk 24:32.

4. Nan Paipel, dahme lepin lokaiao “rong” kin kasalehda?

⁴ Lepin lokaiao “rong” kin kalapw kadoadoahk nan Paipel pwehn kasalehda me aramas emen kin peik. Ihme kahrehda ni Siohwa eh kin ketin mahseniong kitail sang nan Paipel ni atail mihting kan oh kitail kin wehwehkihla ia kupwure, e kin mengei ong kitail en peikiong. Kitail kak kamehlele me Siohwa kin ketin kupwurperenkihda ni atail kin rong oh peikiong Ih.—Lep. Pad. 27:11.

DAHME KAHREHDA KITAIL EN RONG KANAHIENG NI MIHTING KAN?

5. Dahme atail limpoak ong Siohwa kin kamwakid kitail en wia? (Sohn 4:​23, 24; 1 Sohn 5:3)

⁵ Kitail kin rongorong ni mihting kan pwehki kitail poakohng Siohwa. (Mad. 22:37) Ni atail kin kalaudehla atail sukuhlki duwen Siohwa, atail limpoak ong ih pil kin lalaudla. Limpoak wet kin kamwakid kitail en men rong, peikiong, oh kaudokiong ih ni ahl me e ketin kupwurki.—Wadek Sohn 4:​23, 24; 1 Sohn 5:3.

6. Ni atail mihting kan, dahme kitail kin sukuhlki me pid sewese meteikan?

⁶ Kitail kin rongorong ni mihting kan pwehki kitail poakohng aramas. (Mad. 22:39) Ni atail mihting kan, Siohwa kin ketin padahkihong kitail ia duwen atail pahn sewese riatail Kristian kan oh irail kan me saik ese duwen ih. Karasepe, kisin pwuhko Poakohng Aramas—Katohnpadahk kin sewese kitail en kasalehda limpoak ong irail kan me kitail kin koasoiong nan kalohk. Ia duwe, ke kin apwalki tepida koasoiong aramas akan? Ma iei, tehk kanahieng mwomwen riomw brother oh sister kan ar kin wia met erein ar kamwomwada kan nan mihting en nan wihk.

7. Dahme kahrehda e kesempwal kitail en rongorongete Siohwa?

⁷ Kitail kin rongorong ni mihting kan pwehki kitail men ahneki mour nsenamwahu ni ahnsou wet oh mour kohkohlahte. Duwehte me Siohwa ketin padahkihong sapwellime ladu kan ni mwehin Paipel, ma kitail men ahneki mour nsenamwahu oh mour kohkohlahte, kitail anahne peikiong ih. (Deud. 32:​44-47) Sang ni atail kin rongorong ni atail mihting kan, kitail kin alehdi mehn kangoang me kitail anahne pwehn dadaurete lao sampah kapwo pahn pweida. (Rom 8:25) E kesempwal kitail en rong Siohwa met pwehki kitail kin momour ni imwin rahn akan oh pil anahne soupisengki sapwellime doadoahk.—Mad. 24:​42-44; Kaud. 1:3.

IA DUWEN ATAIL KAK SEWESE METEIKAN REN RONGORONG NI MIHTING KAN

8. Dahme kahrehda brother kan me kin padahk anahne pousehlahte kamwahwihala arail koahiek en padahk?

⁸ Brother kan me kin wia padahk ni mihting kan, ahpw mehlel irail kan me kin wia kapahrek ong wehipokon, anahne pousehlahte kamwahwihala arail koahiek en padahk. Padahk ehu me kin kaunopada mwahu oh poahsoankihda Paipel kin uhdahn kak sewese aramas akan ren sukuhlkihdi padahk kesempwal kan en Paipel. Oh e pil kak sewese iangatail Kristian kan ren mihmihte nan padahk mehlel. Irail me iang ahneki padahk kan nan mihting kan pil kak sewese meteikan laudsang dahme re medewe. Ma mie omw padahk, medewehla ia duwen omw kak kapwaiada iren sawas kan me irekidi pah. Mendahki iren sawas pwukat ar keieu dokedoke irail kan me kin wia kapahrek ong wehipokon, ire pwukat pil kak sewese koaros me pahn padahk.—2 Tim. 4:2; Taitus 1:9.

9. Dahme kahrehda e kesempwal omw padahko en mengei en pwakih?

⁹ Koasoanehdi mwahu dahme ke pahn koasoia. Ni omw kin wia padahk ehu, ke men me rongorong kan en mengeiki pwakih omw padahko. Ma e pahn nohn apwal en pwakih, re pahn apwalki rong mwahu. Dahme ke kak wia pwehn wia padahk ehu me soandi mwahu? (1) Ni tepin omw padahko, kasansalehda ire kesempwal kan me ke pahn koasoia. (2) Koasoia ehuehu ire ko oh ekis uhdi mwurin omw kanekehla omw koasoia ehu ire kesempwal pwehn kasalehda ire kesempwal me ke pahn uhd koasoiao. (3) Kousapahlih ire kesempwal kan ni kaimwiseklahn omw padahko.

10. Dahme kahrehda e kesempwal en perenki ire kan me ke pahn koasoia?

¹⁰ Perenki ire kan me ke pahn koasoia. Ma ke perenki ire ehu, ke pahn men koasoia, oh irail me rongorong pahn kak kilang met. (Lep. Pad. 2:​4, 5; Wiewia 4:20) Ni omw kin doudouloale duwen ire kan oh iren Paipel kan me ke pahn koasoia nan omw padahko, met pahn seweseiuk ken uhdahn perenki dahme ke pahn padahngkio. Brother men sang United States me sounpar 70 samwa tamatamante padahk ehu me wiawi ni ahnsou me e pwulopwulo. E koasoia: “I tamatamante mwomwen brother me padahko eh kangoange kiht en kin doudouloale mwahu ni at kin wadek Mahsen en Koht. E kawehwehda ni sansal ia duwen at pahn wia met oh I kak kilang me met wia mehkot me uhdahn kesempwal ong ih. Padahk wet wekidala ei mour. E sewese ie nan ei wadawad en Paipel iangahki ei nanpwungmwahu rehn Siohwa.”

11. Dahme ke anahne wia pwehn sewese me rongorong kan ren paiekihda omw padahko? (1 Timoty 4:​13-16)

¹¹ Medemedewe anahn en irail me rongorong, oh kihda iren sawas kan. Dehr koasoite ni oaralap, ahpw kasalehda oaritik kan sang ni omw doadoahngki Paipel pwehn kangoange oh kihda iren sawas kan ong irail me rongorong. Karasepe, wahnpoaron Pohl padahkihong Timoty ni oaritik dahme e anahne wia pwehn karanihte Siohwa ni eh kin nantihong sewese rie Kristian kan nan Episos. (Wadek 1 Timoty 4:​13-16.) Medewe duwen dahme pahn uhdahn sewese irail me rongorong oh sewese ren kilang dahme re anahne wia pwehn kapwaiada audepen padahko nan arail mour.

12. Dahme kahrehda e keieu mwahu en padahk ni mwomwen koasoakoasoipene?

¹² Praktiski omw padahko ni ngihl laud pwe ken kak padahk ni mwomwen koasoakoasoipene. Ma ke kin padahk ni mwomwen koasoakoasoipene, a kaidehn wadekete dahme ke ntingihedi, irail me rongorong pahn mengeiki rong oh wehwehki omw padahko. Kisin pwuhko Nantihong Omw Pwukoahn Wadawad oh Padahk koasoia: “Koasoi sang nan omw mohngiong ni ahl me ke uhdahn kin wia, oh me pahn kasalehda duwen omw pepehm ong ireo oh sounrongorong kan.” Ni omw kin koasoi sang nan omw mohngiong, irail me rongorong pahn rong kanahieng, men esehla ire me ke padahngki, oh men kapwaiada nan arail mour.

13. Ni omw kaunopada omw padahk, dahme kahrehda ke anahne peki sawas sang rehn brother men me koahiek en padahk? (Pil kilang kilel.)

¹³ Peki sawas sang rehn brother men me koahiek en padahk. Ia duwen omw kak wia met? Mwein mwohn omw pahn padahk, ke kak ehukihong brother men me koahiek en padahk dahme ke kaunopadahr oh song doadoahngki dahme e sewesehkin uhk. Patehng met, ke kak peki brothero en rong ni omw praktiski omw padahko ni ngihl laud pwe en kak padahkihong uhk dahme ke kak kamwahwihala. (Lep. Pad. 1:5) Kitail sohte kin ahnsou koaros ese wasa me sohte nohn sansal nan atail padahk kan. Eri kitail men kamwahwihala atail koahiek en padahk pwe kitail en kak sewese irail me rongorong ren wehwehki mwahu oh kapwaiada padahk mehlel kan nan Mahsen en Koht.a

IA DUWEN ATAIL KAK KAMWAHWIHALA MWOMWEN ATAIL KIN RONGORONG

14. Dahme kahrehda kitail en kakairada soangen madamadau me sounnting en Melkahka 119 ahnekio? (Melkahka 119:24, 111, 167)

¹⁴ Kitail kak kamwahwihala mwomwen atail kin rongorong ni atail tamataman me sapwellimen Siohwa mehn kataman kan kin uhdahn kesempwal. Kitail anahne sapwellimen Koht mehn kataman kan pwe kitail en kak dadaur pahn kahpwal kan me kitail kin lelohng erein “ahnsou apwal oh keper” pwukat. (2 Tim. 3:1) Eri pil ni ahnsou me kitail kin sukuhlki mehkot me kitail rongehr pak tohto, kitail en song ahneki soangen madamadauohte me sounnting en Melkahka 119 ahneki duwen sapwellimen Koht mehn kataman kan.—Wadek Melkahka 119:​24, 111, 167.

15. Dahme kak sewese kitail en pousehlahte kesempwalki padahk kan nan atail mihting kan?

¹⁵ E kesempwal kitail en pousehlahte kilangwohng padahk kan me kitail kin rong ni atail mihting kan nin duwen kisakis kei sang rehn Siohwa. Kitail kak sukuhlkihsang dahme wiawihong mehn Israel ko nan sapwtehno ni ahnsou me Siohwa ketikihong irail manna. (Eks. 16:​15, 31) Nin tapio, re perenki mannao. Pwe e kohsang rehn Siohwa, e iou, oh e sewese ren kak momourte. Ahpw mwuhr, ekei irail pwangahkihda kang manna rahn koaros. (Nemp. 21:5) Dahme kitail kak sukuhlkihsang met? Mie ekei padahk kan me kitail kin pwurupwurehng rong ni mihting kan, ahpw kitail en dehr medewe me mehn kataman pwukat sohte kesempwal. Kitail anahne pohnese me Siohwa me ketikihda mepwukat. Kitail anahne tamataman me sapwellimen Siohwa pwihn kin pilada ni keneinei dahme re pahn padahngki ni mihting kan. Oh kitail anahne pil tamataman me dahme kitail kin sukuhlki kak sewese kitail en wiahda pilipil mwahu kan oh mour kohkohlahte.—Lep. Pad. 3:​13, 16-18; Sohn 17:3.

16. Dahme sewesehier ekei sapwellimen Siohwa ladu kan me wereilahr nan padahk mehlel ren kin rong kanahieng ni mihting kan? (Pil kilang koakono “Iren Sawas ong Kamwahwihala Mwomwen Omw Kin Rongorong.”)

¹⁶ Kitail kak kamwahwihala mwomwen atail kin rongorong ni atail kin kapwaiada iren sawas kan. Tehk dahme sewesehier ekei sapwellimen Siohwa ladu kan me wereilahr nan padahk mehlel ren kin rong kanahieng ni mihting kan. Ashley, me kin papah Siohwa daulih sounpar 30, koasoia: “Kaunopada mwahu kin sewese ien kak rong kanahieng. Ma I sohte kin kaunopada, I kin apwalki iang pasapeng oh I kin tepida medemedewe duwen soahng teikan erein mihtingo.” József, me kin papah Siohwa erein sounpar 52, koasoia: “I kin perenki pwurehng rong duwen oaralap ehu ni mihting kan pwehki I kin sukuhlki soahng kapw kan ni ei rong soangsoangen padahk kan oh pasapeng kan me pid oaralapo.” E pil koasoia: “Ma brother men sohte nohn koahiek en padahk, I kin medemedewehte dahme e padahngki sang nan Mahsen en Koht, a kaidehn mwomwen eh padahko.”

17. Dahme ke kak wia pwehn kamwahwihala mwomwen omw kin rongorong ni mihting kan? (Pil kilang kilel.)

¹⁷ Iet pil ekei soahng me ke kak wia pwehn seweseiuk en kamwahwihala mwomwen omw kin rongorong. (1) Dehr mwenge laud mwohn mihting pwe ken dehr men meir. (2) Kohla mwadang oh rapahkihda dewomw mwohn mihting eh pahn tepida. (3) Wiahiong noumw cellphone de tablet en dehr kedirepweiuk erein mihting. (4) Kasikasik dahme padahk kan pahn koasoia. (5) Song en kilikilangete me padahko. (6) Ntingihedi de mahlenihada ire kesempwal kan. (7) Rong kanahieng iren Paipel kan oh song en medewehla ia duwen arail dokpene. (8) Pein idek rehmw, “Ia duwen ei kak doadoahngki met pwehn sewese emen nan ei mwomwohdiso de wasahn kalohk?” (9) Mwohn kapokon kan, wiahda ahnsou en kilang prokramo oh wadek oaralap en rahno, oaralap en padahk kan, oh iren Paipel kan ong ehuehu padahk. (10) Mwohndi oh rong ngilen keseng oh kilang kisin kasdo kan pwe ni ahnsou me prokramo pahn tepida, ke onopadahr en rong padahk kan.

POUSEHLAHTE RONG KANAHIENG NI SIOHWA EH KIN KETIN PADAHKIHIUK

18. Dahme kahrehda kitail anahne pousehlahte rong kanahieng ni mihting kan?

¹⁸ Kitail anahne pousehlahte rong kanahieng ni mihting kan pwehki ni atail wia met, kitail kin mweidohng Siohwa en ketin kahluwaikitail “nan ahl pwung kan.” (Mel. 23:3; 31:3) Kitail anahne Siohwa en ketin kaweid kitail pwe kitail en kak pousehlahte wia dahme pwung. Eri ‘tehk mwahu mwomwen omw kin rongorong,’ oh kapwaiada kaweid me ke kin alehdi ni mihting kan. (Luk 8:18) Irail kan me kin rong Siohwa pahn nsenamwahu ni ahnsou wet oh ahneki mour soutuk ni ahnsou kohkohdo.—Mel. 119:​2, 14.