Kamwahwihala Omw “Koahiek en Padahk” nan Kalohk

1. Koahiek dah me kitail anahne kakairada, oh dahme kahrehda? (2 Timoty 4:2) (Pil kilang kilel.)

SISES mahsanihong sapwellime tohnpadahk kan: “Padahkihong aramas . . . pwe ren wiahla nei tohnpadahk . . . padahkihong irail en kapwaiada mehkoaros me I kehkehlingkihong kumwail.” (Mad. 28:​19, 20) Kaweid wet kasalehda me Kristian koaros anahne wia sounpadahk kei. Ei mehlel, Siohwa me kin ketin kakerenihedo irail kan me “ahneki mohngiong mwahu,” oh tohnleng kan kin sewese kahluweikitaillahng soangen aramas pwukat. (Wiewia 13:48; Sohn 6:44; Kaud. 14:6) Ahpw, kitail pil anahnehte wia atail pwukoa. Tehk mehn kahlemeng en wahnpoaron Pohl oh Parnapas. Paipel mahsanih me ni ahnsou me ira kalohk nan sinakokeo nan Aikoniomw, ira kin “padahk ni mwohmw ehu me kahrehiong me tohtohie, mehn Suhs oh mehn Krihs, ren pwosonla.” (Wiewia 14:1) E sansal me Pohl oh Parnapas kakairada “koahiek en padahk.” (Wadek 2 Timoty 4:2.) Oh Kristian koaros pil anahne kakairada soangen koahieko.

2. Dahme kakete kahrehiong ekei Kristian kan ren pehm me re sohte kak kamwahwihala arail koahiek en padahk?

² Ekei kakete pehm me re sohte kak kamwahwihala arail koahiek en padahk pwehki re sohte kanekehla arail sukuhl de pehm me re soakoahiek. Ekei ohl me kileldi nan Paipel pil ahneki soangen pepehm wet. (Eks. 4:10; Ser. 1:6) Ekei ele kin mworuskihla mwomwen arail koahiek en padahk pwehki re sohte kin pweida mwahu duwehte meteikan. Ei mehlel, kaidehn koaros me kitail kin koasoiong de tuhwong pahn men esehla duwen rongamwahwo. Oh ni aramas akan ar kin rong rongamwahwo, Siohwa oh tohnleng kan me kin sewese kitail diar aramas pwukat. Ahpw kitail anahne padahkihong meteikan duwen rongamwahwo ni ahl ehu me pahn kamwakid irail. Pwehn sewese kitail, iren onop wet pahn koasoia ahl siluh me kitail kak kamwahwihala atail koahiek en padahk nan kalohk.

NSENOHKI ARAMAS AKAN

3. Dahme kahrehda Sises kak ketin sair mohngiong en irail kan me rongorong?

³ Paipel mahsanih me Sises kin “mwahngih dahme mi nan mohngiong en aramas.” (Sohn 2:25) Ire wet kasalehda me Sises kin mwahngih madamadau oh pepehm en aramas akan. Oh e kak ketin sair mohngiong en aramas akan pwehki e mwahngih arail anahn akan. E mwahngih me aramas ako anahne kaweid oh kangoang pwehki kaunen pelien lamalam kan kin kahpwalihala ar mour ni arail kin wiahda kosonned oh tiahk tohto. (Mad. 9:36; 23:4) Eri nan sapwellime Kapahrek en Pohn Dohlo, Sises ketin sewese aramas akan sang ni eh padahkihong irail soahng kan me kamwahwihala arail mour. Aramas tohto kin men rong Sises pwehki e kin ketin padahngki duwen soahng kan me re kin pwunodki.

4. Ia duwen atail kak kasalehda me kitail kin nsenohki aramas akan? (Pil kilang kilel kan.)

⁴ Kitail kak kasalehda me kitail kin nsenohki aramas akan me kitail tuhwong sang ni atail kin song en wehwehki dahme kin kapwunode irail. Mie soahng suwed tohto me kin wiewiawi nan en Sehdan sampah. Eri aramas koaros me kitail kalohk ong kin pwunodki de lokolongki kahpwal ehu. Ni atail kin tamataman met, e pahn mengei ong kitail en men sewese irail. Karasepe, mie mehkot me ahpwtehn wiawi me kakete kapwunode aramas akan nan atail wasahn kalohk? Pahpa nohno kan kin pwunodki me mehkot suwed kakete wiawihong neirail seri kan nan sukuhl? Aramas akan nan atail wasahn kousoan kin kalapw apwalki diar doadoahk? Song en medewehla ia uwen mour eh apwal ong aramas akan me sohte ese duwen soahng mwahu kan me Paipel inoukihda.—2 Tim. 3:1; Ais. 65:​13, 14.

5. Ia duwen Sises eh weksang Parisi ko nin duwen sounpadahk men? (Madiu 11:​28-30)

⁵ Sises kin ketin nsenohki aramas akan oh re kak kilang met sang ni eh wiewia ong irail. E uhdahn ketin weksang Parisi ko, me kin kalapw wiakauwe meteikan pwehki re medewe me re mwahusang irail! (Mad. 23:13; Sohn 7:49) Sises pil kin ketin kadekohng oh wauneki aramas akan. E me “mpahi oh mohngiong karakarahk,” oh met sewese ih en wia sounpadahk mwahu men. (Wadek Madiu 11:​28-30.) Kitail pil anahne kadekohng oh wauneki irail kan me kitail kin kalohk ong.

6. Ia duwen atail kak kasalehda kadek oh wahu ong irail kan sohte men rong dahme kitail padahngki oh irail kan me uhwong kitail?

⁶ Ekei kin lingeringerkihda de pil sohte kin men rong dahme kitail kin padahngki. Sises ketin padahkihong kitail en dehr wiakauwe irail kan me kin uhwong kitail. E mahsanih “wia me mwahu ong irail me kin kailongkin kumwail,” “kapaia irail me kin keria kumwail,” oh pil “kapakapki irail me kin mwamwahlikin kumwail.” (Luk 6:​27, 28) E pahn mengei ong kitail en wia met ma kitail kin tamataman me ele mie kahrepen ar sohte men rong kitail. E mehlel me ekei aramas men kauhdi atail doadoahk en kalohk. Ahpw, ekei ele sohte kin men koasoiong kitail pwehki re pwunodki kahpwal ehu nan arail peneinei de mehkot tohrohr me sohte pidada kitail. De mwein ni ahnsou me kitail tuhwong irailo, re nsensuwedki mehkot me wiawi. Sohte lipilipil dahme wiawi, kitail anahne peikiong kehkehlik wet: “Ahnsou koaros [atail] lokaia kan en kin kadek, doalki soahl, pwe [kitail] en kin ese duwen [atail] pahn sapeng emenemen aramas.” (Kol. 4:6) Ma kitail kin nsenohki aramas akan oh song en wehwehki arail anahn kan, kitail sohte pahn mwadang nsensuwedkihla dahme re nda de wia oh kitail pahn kak wiahla sounpadahk mwahu kei.

DOADOAHNGKI MAHSEN EN KOHT

7. Dahme Sises kin ketin doadoahngki pwehn padahki aramas akan? (Sohn 7:​14-16)

⁷ Sises sohte kin ketin padahngki pein eh madamadau kan. Ahpw sapwellime padahk kin poahsoankihda Mahsen en Koht oh e kin ketin padahk ni ahl ehu me mengei ong me rongorong kan ren wehwehki oh tamataman dahme e ketin padahkihong irail. Paipel padahkihong kitail me Sises kin ketin padahk “nin duwen emen me ahneki manaman, a kaidehn duwehte sounkawehwehn Kosonnedo kan.” Oh aramas ako kin “pwuriamweikihla” met. (Mark 1:22) Sounkawehwehn Kosonned kan ni mwehin Siseso kin padahkihong aramas akan dahme sounpadahk ndand en pelien lamalam teikan kin koasoia. Weksang met, Sises kin ketin padahngki Mahsen en Koht. Mendahki Sises kin ketiket rehn Koht nanleng mwohn eh ketidihdo nin sampah, e sohte song en doadoahngki eh erpit pwe aramas akan en tehk ih de kahrehiong ren pehm me re pweipwei sang ih. Ahpw, e kin ketin doadoahngki Mahsen en Koht pwehn padahkihong irail dahme Koht ketin kupwurki ren wia. (Wadek Sohn 7:​14-16.) Sises ketin wia mehn kahlemeng me uhdahn mwahu ong Kristian kan koaros.

8. Ia duwen Piter eh alasang Sises?

⁸ Sapwellimen Sises tohnpadahk ko pil kin doadoahngki Mahsen en Koht nan ar padahk. Karasepe, medewehla kapahrek me wahnpoaron Piter wiao ni Pendekos pahr 33. Piter sohte iang sukuhl laud. Ahpw e sair mohngiong en aramas akan ni eh doadoahngki iren Paipel kan me kawehwehda ni sansal kokohp me Sises ketin kapwaiadahr. (Wiewia 2:​14-37) Dahme wiawi mwurin mwo? “Irail ko me kamehlele eh koasoio ahpw papidaisla, oh rahno mpen aramas 3,000 iangala ar pwihn.”—Wiewia 2:41.

9. Ni atail kin padahk, dahme kahrehda kitail anahne doadoahngki Mahsen en Koht?

⁹ Mahsen en Koht me keieu mwahu en doadoahngki pwehn sair mohngiong en aramas akan. (Ipru 4:12) Eri kitail anahne doadoahngki Paipel ni atail padahk ong irail. Kitail men “kalohki mahseno,” a kaidehn pein atail madamadau. (2 Tim. 4:2) Lepin Padahk 2:6 mahsanih: “Pein Siohwa me kin ketikihda erpit; loalokong oh koahiek en dehdehki kin pwilisang nan doauese.” Eri ni atail kin padahk sang nan Paipel, met duwehte atail kin mweidohng Siohwa en ketin mahseniong irail. (Mal. 2:7) Kitail men aramas akan en ese me Paipel kin audaudki mehkot me siksang loalokong en aramas. E ntingdier sang ni kaweid en Koht oh kin sewese kitail en ese dahme kitail anahne wia pwehn kaperenda Sounkapikpatailo oh ahneki mour nsenamwahu.—2 Tim. 3:​16, 17.

10. Ia duwen atail kak sewese neitail tohnsukuhlo en kilang me dahme e sukusukuhlki kohsang nan Paipel?

¹⁰ Ni omw kaukaunop ong onop en Paipel ehu, sewese noumw tohnsukuhlo en kilang me dahme e sukusukuhlki kohsang nan Paipel. Mendahki kitail kin doadoahngki kilel oh kisin kasdo kan nan atail padahk, Paipel me keieu kesempwal kitail en ahnsou koaros doadoahngki. Eri erein onop en Paipelo, wadek iren Paipel kan me pahn sewese noumw tohnsukuhlo en wehwehki mwahu ire kesempwalo oh sewese en medewe dahme e kak sukuhlkihsang iren Paipel ko. Pil ni omw doadoahngki kilel oh kisin kasdo kan, sewese noumw tohnsukuhlo en kilang mehn kasukuhl dah me e kak sukuhlkihsang nan Paipel. Ke sohte anahne koasoakoasoi werei de wadekala iren Paipel koaros nan iren mehn kasukuhlo. Ahpw kihong noumw tohnsukuhlo ahnsou en wehwehkihla dahme kumwa ahpwte wadekpeneo de pil pwurehng wadek ehu iren Paipel ma anahn. Ni ahl wet, kitail sohte pahn padapadahngki dahme pwuhk ehu, kilel ehu, de kisin kasdo kin koasoia, ahpw kitail pahn padahngki dahme Paipel kin mahsanih.—1 Kor. 2:13.

11-12. (a) Ia duwen atail kak kanengamahiong neitail tohnsukuhl en Paipel kan? (Wiewia 17:​1-4) (Pil kilang kilel.) (b) Dahme ekei sohte ese duwen Paipel, oh ia duwen atail kak sewese irail?

¹¹ Ma noumw tohnsukuhlo apwalki kamehlele de wehwehki ire ehu, tamataman en “kalohki mahseno . . . ni kanengamah.” Mwomwen en emenemen kekeirda kin wekpeseng. Ekei padahk kan kin mengei ong kitail en wehwehki, ahpw ekei aramas kin anahne ahnsou laud pwehn wehwehkihla. Pohl anahne pwurupwurehng kalohk ong mehn Suhs kan nan Deselonika oh sewesehkin irail en medemedewe Nting Sarawi kan pwe ren kak wehwehkihla mwahu dahme e padapadahngki.—Wadek Wiewia 17:​1-4.

¹² Pil ehu ahl me kitail kak kanengamahiong neitail tohnsukuhl kan iei sang ni atail kin idek peidek kan oh dehr nohn koasoakoasoi, ahpw kihong irail ahnsou en sapeng. Nantihong en kin rong kanaiehng oh wehwehki arail madamadau. Mwuri wadek oh koasoiapene iren Paipel kan pwehn sewese irail en wehwehki sapwellimen Koht madamadau ong ire ehu. Pil tamataman met: Ekei aramas saikinte kilang Paipel pak ehu eri re sohte ese dahme e audaudki. E pahn sawas en kasalehiong irail Paipelo oh ia uwen pwuhko eh laud? Ke kak kasalehiong irail wasa me koasoia “Dahme Kitail Kak Sukuhlkihsang Mahsen en Koht?” nan Kawehwehn Sampah Kapw, pwehn kasalehiong irail ire kesempwal kan me dierek nan Paipel. Mwein ke kak sewese irail en wehwehki me Paipel kak wia sawas mwahu nan arail mour. Ke kak wia met sang ni omw kasalehda iren Paipel ehu de riau me kileldi pahnangin peidek 15 me kawehwehda ia duwen Paipel eh kak sewese kitail en diar nsenamwahu. Eri ni omw kasalehiong noumw tohnsukuhlo me Mahsen en Koht kin uhdahn sawas laud, met pahn kamwakid ih.

SEWESE REN ESEHLA SIOHWA

13. Ni atail padahk, ihs me kitail men keieu koasoia duwe? Menlau kihda ehu karasaras.

¹³ Atail mehn akadei iei en sewese irail en esehla Siohwa oh karanihala ih. (Seims 4:8) Kitail kak karasahiong atail doadoahk ong emen me kin doadoahngki dengki pwehn sewese aramas men en kilang mehkot nan rotorot. E sohte kin sere pein ih ahpw e kin serlahng dahme aramas teio kilikilang. Ni soangen ahlohte, ni atail kin padahkihong meteikan duwen Paipel, kitail sohte men koasoakoasoia duwen pein kitail ahpw kitail men keieu koasoia duwen Siohwa.

14. Ia duwen atail kak sewese neitail tohnsukuhlo en kaperenda Siohwa?

¹⁴ Ni omw wia onop en Paipel ehu, sewese noumw tohnsukuhlo en kakairada ineng en men kaperenda Siohwa. (Lep. Pad. 27:11) Ke sohte kin padapadahkihongete noumw tohnsukuhlo en wia dahme pwung oh soikala dahme sapwung pwehn wiahla emen Sounkadehdehn Siohwa. Ahpw ke men noumw tohnsukuhlo en wiahda wekidekla kan pwehn kak kaperenda Siohwa. Karasepe, ma noumw tohnsukuhlo kin apwalki soikala tiahk samin ehu, ke kak idek reh soangen peidek pwukat: “Dahme kahrehda Siohwa ketin kalahdeki tiahk wet? Dahme kahrehda Siohwa ketin kupwurki ken kesehla mehkot me ke kin perenki? Ia duwen met eh kasalehda me Siohwa ketin poakohng uhk?” Ni omw sewese noumw tohnsukuhlo en kalapw medewe duwen Siohwa oh sapwellime irair kaselel kan, ke kin sewese en wehwehki ia uwen Siohwa eh ketin poakohng ih. Oh met pahn sewese noumw tohnsukuhlo en men kaperenda Siohwa.

POUSEHLAHTE KAMWAHWIHALA OMW KOAHIEK EN PADAHK

15. Dahme ke kak wia pwehn pousehlahte kamwahwihala omw koahiek en padahk?

¹⁵ Ke kak peki sapwellimen Siohwa sawas ni kapakap pwehn seweseiuk en kasawih wasa me ke kak kamwahwihala nan omw koahiek en padahk. (1 Sohn 5:14) Kitail men mwekid pahrekiong atail kapakap kan sang ni atail kin rong kanaiehng oh kapwaiada kaweid me Siohwa ketikihda ni mihting kan. Ke kak luke sounkalohk koahiek men en iang uhk nan omw onop en Paipel. Oh mwuri, idek reh dahme ke kak kamwahwihala. Pil tamataman me ke wehwehki audepen mehn kasukuhlo ahpw noumw tohnsukuhlo saikinte wehwehki. Song en medewehla dahme noumw tohnsukuhlo kakete medewehki duwen dahme kumwa pahn koasoiapene. Kowe eri sewese en kilang me dahme kitail kin padapadahngki iei rohng mwahu mehlel. Met kak kamwakid ih en ahneki nanpwungmwahu rehn Siohwa oh pil nsenamwahu mehlel.—Mel. 1:​1-3.

16. Dahme kahrehda e mwahu en pousehlahte kamwahwihala atail koahiek en padahk?

¹⁶ Mehkot me kin keieu kahrehiong kitail en ahneki peren iei atail kin padahkihong meteikan duwen Siohwa. Doadoahk kaperen wet pahn uhdahn anahn nan sampah kapwo. Eri kitail en pousehlahte nsenohki meteikan, doadoahngki Mahsen en Koht, oh sewese ren esehla Siohwa ni atail kin kalohki rongamwahwo. Ni atail wia met, kitail kak kamwahwihala atail koahiek en padahk nan kalohk.